Ka Nupepa Kuokoa, Volume XIX, Number 27, 3 July 1880 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XIX. HELU 27}        POAONO, IULAI 3, 1880.        {NA HELU A PAU 970.

 

KA NUPEPA

Kuokoa me ke Au Okoa

I HUILA.

                                                                 

     NA OLELO HOOLAHA : - O na Olelo Hoolaha he 10 laina kakau lima, he Hookahi Dala no ka puka mua ana; elua puka ana, he $1.50; no hookahi mahina, he $2.00

     NA KANIKAU A ME NA MELE:  He 10 Keneta ka uku no ka lalani hookahi, ua like me $1.00 no 10 lalani.

     HOOLAHA MAU:  E hoomanao na makamaka a e hookomo mai i na olelo hoolaha mamua ae o ke awakea Poaha, i ole e kaukai ia aku a kekahi pule ae.  E hoomanao e na lehulehu, aole e hoopuka i kekahi Olelo Hoolaha, Kanikau a me ke Mele ke ole e hookaa mua ia mai ka uku.

     E hoouna pololei mai i na leta i ka Nupepa Kuokoa.

 

MOOLELO O NA LA

- O KA -

Haku Visakauna Nelekona,

KE DUKE O BERONETI.

 

KE KAUA ANA O NA AUMOKU KAUA BERITANIA, - A ME KO ENELANI MAU PAPU LAAU, &c.

 

     MAHOPE iho o ka make ana o ke Keiki Alli Italia Kasarioli, aole he mau haunaele i ulu hou ae iloko o ke kulanakauhale o Napela.  Ua loaa ke kuokoa o ke aupuni, a au loaa hoi ka maluhia o na kanawai o ka Moi Fadineda a me kona mau lahuikanaka.

     Aole he mau hana ano nui a Nelekona iloko o keia mau pule pokole ma Napela, aka, hookahi wale no ana mau hana hou i koe, o kona waiho ana aku i ka inoa o na puali kaua Farani maloko o na Kakela ma na kiekiena o Napela, ma ka hapa o ke Aupuni Emepera he enemi no ke aupuni o Enelani, imua o kekahi Aha Hanohano no ka hookolokolo ia, a i kulike ai hoi me na Kanawai a me na Rula o ko Enelani mau aumoku.

     Ma ke kakahiaka o ka la 2 o Iune, ua kau ae la ka hae hoailona a Adimarala Nelekona, ma ke kia waena o ka Farodoiana, a iloko o ia manawa, ua akoakoa ae la na Kapena ekolu, a me kekahi mau Kenela Italia, no ka hoolohe ana i ka uku hoopai e haawi ia aku ana i na koa Farani maloko o na Kakela, mai kekahi olelo hookolo mai e waiho ia mai ana imua o keia Aha, e ka Alihikaua Nelekona o na aumoku Beritania.

     Ua hana o Nelekona e like me ka mana hiki iaia ke hana.  Ua hana oia i keia mau mea, he mea nona e kaulana ai; e ike ia ai; a e makau ia ai hoi.  No ka mea, na keia mau hana ana i hapai ae i kona inoa ma ke ano hookelakela iwaena o na Kenerala a me na Adimarala hiena o Europa.  Aia imua o keia Aha, ke Alakai Kiekie o ko ka Moi Fadineda mau puali kaua, ke Alakai o na Sadinia a me na Sisilia, a me na Alakai o na aumoku Italia.

     I mea e hooko ia ai keia mau hana, lawe ae la o Nelekona i kahi kiekie i hoomakaukau ia no ka manawa, ku mai la oia maluna o ia kahua, a hai mai la oia i kekahi haiolelo ano nui me ka ikaika, a maluna o keia kahua o Nelekona i kaena iho ai, owai la ka Adimarala Beritania a Farani paha, i eha iloko o ke kaua, pololi, makewai, loaa i na ino nui ma ka moana, hoomanawanui iloko o na ululaau me na kula anu iloko o na makahiki ehiku o keia kaua huliamahi ana o ke aupuni Farani, no ka pono a me ke kuokoa o kona aina.  He mau olelo ano nui keia!  A he mau olelo hoi e hoikeike aku ai ia lakou i na haawina o ka ike a me ke koa.  Nolaila, hai ma ia oia i keia haiolelo, (aole nae he olelo hooholo i waiho ia aku imua o keia Aha,) a ua like ia mau olelo me kekahi pohaku makamae; he io a me ka waiwai; a he mea hoi na lakou e poina ole ai no kekahi mau la loihi e hiki mai ana, ka lilo ana o keia kanaka koa nui wale - @ Hoola no Italia.  Nolaila, ma keia wahi kakou e heluhelu ai i kana haiolelo i pane ai imua o keia Aha penei:

     "Ano, " wahi a Nelekona, "e hoopau ai au i ka hopena o ka'u mau kaua ana.  Ua kukulu aku au i na aupuni kaua o ke aupuni Emepire o Farani, kona mau panalaau a me na okana aina he lehulehu ma ke ano he mau Aupuni Repubalika; ma ka mana i haawi ia mai ai ia'u e hoopau aku i na hana pakaha wale ana a na puali kaua Farani: a he mea hoi na'u i ike ole iwaena o na Adimarala hiena o ko'u aupuni, ka hookumu ia ana o ka maluhia maluna o keia mau kai malalo o'u."  "He hoino wau i ke kanaka Farani."  wahi hou a Nelekona, "no ka mea, aole i kulike ko'u noonoo ana e like me ka lakou mea i manao ai he pono.  He lili au i ka inoa o ko'u aina, a he hoopakele hoi au no ka hanohano o ko'u Moi, a owau hoi kekahi o na Adimarala Beritania inaina wela, a he mea hiki ole hoi i kekahi ke hoomalielie mai i ko'u inaina, no na hana hookiekie a ke aupuni Farani, ka powa a me ke kipi, a pela aku; a he oi loa aku hoi ko'u hoino ana maluna o na 'Lii koko lehulehu o ia aupuni."  'O na lanakila i loaa ia'u," wahi hou no a Nelekona, 'iloko o keia kaua huliamahi ana, au kokua ia au e ko'u mau pokii a me na hoaloha i komo pu me a'u iloko o na pilikia he nui wale.  Ua na-i ia e a'u keia moana mai ka akau a i ka hema, a ilaila hoi au i hooauhee aku ai i na aumoku ikaika o ko'u mau enemi, maluna o ia kahua kaua nui weliweli iloko o na hora ekolu.  Ua holo puni ia e a'u o Italia, a ua paniku aku hoi au i kona mau Kaikuono nui a me na awa liilii, a no ia kumu, ua paa aku la na puali kaua Farani iloko o Italia, e noho ana iloko o ka pololi a ka ai o na puali.  He ao ana keia, a he haawina hoi e hoomanao mau ai lakou, aole i lilo mai ke aupuni o Italia no ka manawa elua mahope iho o ko lakou lanakila ana maloko o ka hookahe ia ana o ke koko.  Ma ka inoa o keia mau aumoku, ke olelo aku nei au, he mau pio lakou iloko o keia la.  Aka, e like me na Kanawai a me na Rula o na aupuni malamalama, ua ae ia lakou e hoi i ko lakou mau aupuni mahope iho o ka hana ia ana o ke Kuikahi, mawaena o ke aupuni Emepire o Farani me ke aupuni o Enelani."

     O keia iho la ka Nelekona haiolelo imua o keia Aha Hanohano, e hoike ana oia i ke kaulana a me ka malamalama o kona mau kanawai, a o keia iho la hoi ka hopena o kana mau hana i ke aupuni o Italia, a mai keia manawa mai kona noho ana i Napela a hiki i ka malama o Iulai, kona haalele ana iho i na kahakai o Italia no Enelani, ka aina hoi i olelo ia -

    Ka aina o ka nani a me ke ala,

Ka aina kamahao -

O kuu aina hanau,

Aina makuahine.

     Ma keia wahi e wehewehe iki aku au i ke ano o ka uku hoopai i haawi ia aku i na puali kaua Farani maloko o na Kakela, a me ke Kuikahi.  Aole i hana ia ke Kuikahi iloko oia manawa, aka, aia nae i ka wa a Nelekona i hehi aku ai i ka lepo o kona aina hanau a mahope iho.  hana ia ai ke Kuikahi mawaena o na aupuni a elua.  He mea ku ole hoi i ka hewa, ina wau e hoike koke aku i ke ano a me kahi i hana ia ai o ke Kuikahi, aole hoi kakou e kamailio hou aku no ia mea ma keia mua aku, a e hoi hou no kakou i ke kuamoo pololei o keia moolelo.

     Ma ka la 1 o Okatoba, A.D. 1800, ua kakau inoa iho la na Komisina Kiekie elua, ma ke kulanakauhale alii o Ladana, o ka Vaikauna Hawkesbury, ma ka hapa o ke aupuni Pelekane o Beritania Nui, a me Mons. Louis-Guillaume Otto, ma ka hapa o ke aupuni Emepire o Farani - e kukala ia ka maluhia maloko o kekahi mau pauku o ke Kuikahi, mawaena o na aupuni a elua, me ka haawi ana i ka mana o ke Kaiwaenahonua a me na aina e pili ana, malalo o ka mana o na mea kaua o ke aupuni Beritania.

     O na mea ano nui wale iho la no ia o keia Kuikahi i hana ia, - o ka lilo ana o ke Kaiwaenahonua, na Kaikuono nui a me na wahi e ae.  A i ko Nelekona wa i hoouna ia ai e kue aku i na aumoku o ka Akau, ua kaili hou ia aku keia mau pomaikai a pau e na mana Farani.  A i ko Nelekona wa i lanakila ai maluna o na moku o ka Akau, ua huli hoi hou mai oia i ke Kaiwaenahonua, no keia kumu hookahi no, alaila, e hiki mai no auanei kakou i ke kahua kaua weliweli o Tarafalaga, a me ka haulehia ana o ke koa kaulana iloko o ka lanakila.

     O ka uku hoopai i na puali kaua Farani maloko o na Kakela, ua hoopaa ia lakou ma ka mana o na kanawai Beritania, a i ka holo ana o ke kuikahi mawaena o na aupuni elua, ua lawe ia mai na koa Farani he 7,000 mai loko mai o na Kakela a hiki ma na aekai o Napela, a ua waiho iho lakou i ka lakou mau pu i na aeone, a ua hoihoi ia lakou a pau iloko o ke awa hoolulu moku kaua Farani ma Toulana. 

     Ma keia wahi, ua hiki mai no kakou i ka hopena o keia kaua.  Mamua o ko kakou hoopau loa ana, ke noi aku nei au i ko oukou lokomaikai, e wehewehe iki aku ana au i na keikikane hookelakela iloko oia au, ka mea nana i hapai ae i ke aupuni Farani iloko o na lanakila he nui - oia hoi ke koa kaulana Napoliona Bonepati e hoopuka ia nei maloko o kekahi o ko kakou nupepa Aole au e lawe mai ana i ke Kenerala kaulana ma ke ano kue, a hoino paha, no ka mea, ua komo ko Napoliona moolelo iloko o ko Nelekona moolelo, i kona wa i huli ai i na aumoku Farani mai na aekai aku o Europa a loaa ma ke kaikuono o Abokia.  E waiho aku ana au ia laua ma ke ano - he Kenerala kaulana, a he Admirala kaulana, a na ko oukou mau lunakehala e kaana no oukou iho. 

     Ma ke kahua kaua o Toulana i ike ia ae ai o Napoliona Bonepati keia.  No kana mau huakai lanakila ma na kahakai hema o Farani a iloko o na okana aina o Italia a me na mokupuni e pili ana, na ia mea hookahi i hapai ae i kona inoa iwaena o Europa.  Ma na kahakai o Kalavi, ke kulanakauhale o Cadiz a imua hoi o na papu pohaku paa o Santa Crutz, i ike ia ae ai o Haratio Nelekona keia.  A no ka Napoliona mau huakai lanakila mai na kahakai hema aku o Europa a i na kahakai akau o Aferika, na ia mea hookahi i hookaulana loa ae i kona inoa - he koa - he ikaika - a me ka makau ia hoi e Europa holookoa.  A no ka Nelekona mau huakai lanakila i kaiehu ai i na aumoku Farani ma ke kahua kaua o ka Naile, a me kana mau huakai wiwo ole no ke kuokoa o Italia, na ia mea i hapai ae i kona inoa - ke Kaeaea o ke Kaiwaenahonua.

     Ma ka la 19 o Mei, 1798, haalele aku la na aumoku Farani i ke awa o Toulana no na kahakai o Aikupita, malalo o ke alakai ana a na Adimarala Farani Blanquet a me Brueys, a e lawe ana hoi keia mau moku i na koa he 40,000, malalo o ke alakai ana a Napoliona, me kona manao e ko ana kona iini nui ma ka lilo ana mai o Inia ma ka mana o kona mau puali kaua.

     Iloko o keia manawa i ohe ia ae ai, ua haalele aku o Napoliona ia Europa me na puali ikaika maluna o na aumoku he 17, ua hoouna koke ia mai o Nelekona, ka olali o na aumoku Beritania, e huli a loaa, a e pepehi aku ia lakou ma kekahi wahi.  Ua huli oia ma na kahakai a pau o Europa, aole nae i loaa, nolaila, hooiho pololei aku la oia i na kahakai o Aigupita, aole no i loaa nolaila, hoololi ae la oia i kona alahele no Malata, aia nae iloko olaila ua poe moku Farani nei kahi i pee ai.

     No ka lohe ana o Napoliona, eia o Nelekona me kona mau aumoku ke huli nei ia lakou, ua ano pioo kona manao me ka makau no kona mau puali kaua, no ka mea ina e loaa ana lakou ia nelekona iwaena o ka oana, aole e kali ana ke kaua no kekahi mau hora.  ze kaua lakou ma ia wahi, a i pio na moku Farani, alaila, he poho nui loa keia no ke aupuni Farani, a e piholo hoi keia Napoliona a me kona mau puali kaua iloko o ka hohonu.  I mea e hooiaio ai keia, e waiho aku no au i kekahi mau olelo i puka mai mai ka waha mai o napoliona oiai na aumoku Farani i kalewa ae ai he @ mile mai ka mokupuni mai o Candia ma ka la 20 o Iune, a penei ko Napoliona makau ekahi ana.

     Ma ke kakahiaka o ua la nei, oiai na aumoku e holo nei me ka maikai, ua kaoaia ae la kekahi hoailona, ua ike ia aku kekahi moku e holo mai ana mai ka aina mai, a pioo ae la na mea a pau me ke kuhihewa ia he moku Pelekane ia; aka, ua puiwa ae la ua Napoliona nei a pane ae la oia i keia mau huaolelo: "E ka Lanakila a me ka waiwai," wahi ana, "e haalele mai ana anei oe ia'u?  E haawi mai ia'u i elima wale no la."

     Ua hoohalike aku o Napoliona ma keia wahi i ka lanakila a me ka waiwai oia kona Akua.  No ka mea, na ke Akua i haawi mai a loaa iaia ka lanakila, a iloko hoi o ka lanakila i loaa ai iaia he waiwai, kaulana a me ka hanohano.

     I ka manawa i kokoke mai ai au moku nei, ike ia aku la he moku Farani no ia o La Justice ka inoa.  I ka manawa i uhi mai ai o ka po, ua loaa iho la na aumoku i kekahi makani ikaika, a iwaenakonu o ka po, kaalo ae la o Nelekona me kona mau aumoku he 12 mile mai ia lakou aku, mai na kahakai mai o Aikupita.  He pakele nui keia o na aumoku Farani.  Ina o keia hoopii ana mai la a Nelekona a i loaa keia poe moku i ke ao, alaila, he mea maopopo, he holo ko lakou pakele.

     I kona manawa i hiki aku ai ma na kahakai o Aikupita, ua hele lanakila aku la oia a hiki ma Roseta, a i ka huli hoi hou ana aku a Nelekona.  au loaa aku na aumoku Farani e ku ana iloko o ke Kaikuono o Abokia, a i ka hiki ana aku o ka lono iaia, ua pio kona mau aumoku, ua pau ae la kona manaolana no ke kii ana aku i ke aupuni o Inia, aka, ua make iloko o kona paniku ia ana iloko o na waoakua o Aferika, he 3,000 o kona mau koa ponei, a ua hoolewa ia ka lakou mau pukuniahi a kanu ia iloko o na aeone, a ua hoi aku lakou a hoolulu a Jaffa.

     Noho iho la o Napoliona iloko o na waoakua me ke kokoke e piha ka makahiki okoa, me kona lohe ole hoi a me ka loaa ole o kekahi leta iaia mai ke aupuni aku o Farani.  Aohe moku nana e lawe aku ka lono!

     Ua pau lakou i ka pepehi ia e Nelekona ma ke Kaikuono o Abokia.  I ka loaa ana aku ia Napoliona o kekahi nupepa Pelekane mai ia Komodoa Sir Sydney Smith aku, ieha ae la kona mau maka ma o a maanei o ka nupepa, a ike iho la oia, ua pau hou na aina a lakou i hele ai i ke kaua i ka lilo, malaio o ke alakai ana a Adimarala Nelekona; a kahana koke kona naau iloko o ia manawa, a pane ae la oia i keia mau huaolelo penei:  "E na Lani!" wahi a Napoliona, " O ka'u moeuhane - ua hooko ia.  Ua lilo hou o Italia i na hupo nui.  O ka hua o ko kakou mau lanakila  ua poho.  E haalele au e pono ai ia Aikupita."

     O na olelo iho la keia a Napoliona i kona wa iike ai, au pau hou na aina a pau i ka hoi hou e like me maua.  A ke olelo nei keia buke moolelo, aole he enemi a Napoliona i hoino ai, e like me kona hoino ana i ka inoa laahia o Nelekona e like me ke diabolo.  No ka mea, o ka elua hoohoka ia ana keia o Napoliona e paa ma ka waha o na pukuniaha ana.  Iloko o keia mau mahina pokole iho, e hiki hou mai no auanei kakou i ka ekolu o kona hoohoka ia ana e Nelekona ma na kahakai o Bolona.  A ma keia wahi hoi au e hoopau ai i na wehewehe ana o keia ano, a e kamailio hoi kakou ma keia helu ae i ko Nelekona haalele ana ia Napela no Enelani, e ike i ka ohana, a e ai hoi i ka hua o ka momona o ka hoomanawanui ana i na inea o na makahiki ehiku. 

     Aole i pau.

 

I MAU HALEMAI KUIKAWA.

Ka Olelo Hooholo a me ka Haiolelo a ka Hon. W. M. Kipikona malalo o ke poo maluna;e, maloko o ka Hale Ahaolelo o keia kau o 1880.

 

     "E hookaawale ia i $20,000 no ke kukulu ana i mau hale haawi laau, oia hoi, i mau halemai kuikawa ma kela a me keia mokupuni, a e hoonoho ia malalo o ka mana o ka Papa Ola."

     Ku mai o M. Kipikona, ka mea nana i waiho mai ka olelo hooholo, a pane mai la penei.  He mau huina dala nui kai hoohoilo ia iho nei no na pomaikai holomua o ka aina, a ua ano piha mahuahua no hoi ka waihona o ke aupuni mamuli o na loaa o na oihana, aka, o ke kahua o keia mau mea, oia no ka hana lima, ma o na kanaka i hanau ia o ka aina a me ko na kanaka i noho mai, a e pono kakou e manao iho, o ka hapa nui o na oaa i hoihoi ia mai mamuli o na dute, mai na loaa no ia mamuli o ka poe lima hana kilihune, no ke kuai ana aku i na waiwai komo mai.  Ua aie pu no hoi kakou i kekahi aloha no ka lahui Hawaii, ma kuai ano, oia ka mea kuleana oi iloko o keia aupuni.  E manao ana no paha kahi poe ua lawe iho la no keia wahi aupuni uuku me ka ha ia mai hookahi, me kona mau wahi heluna lahui kakaikahi; aka, aia kakou malalo o kekahi mau kulana kamahao.  Ua kau ia e no ouli a pau o ke au naauao ko kakou lahui oiwi o ka aina nei, me ka maopopo ole o na ano e alakai ai i na kulana o ke ola oluolu a maikai; a o kakou, ka poe i kahiko iloko o ka malamalama, ua loaa mamuli o na kumu kuhikuhi o na ano lehulehu, na ao ana ma na mea pili i na kanawai o ke ola.

     Ua kupono loa e haawi ia na haawina kokua no ka hoomaamaa ana a me ke ao ana i ka malama ana i ke ola i ka lahui Hawaii.  O ka'u mea i makemake ai e hapai, oia no na halemai liilii kuikawa, e like me na mea e hapai ia nei i keia manawa ma Amerika.  O ka lilo no ka halemai hookahi e makemake ia nei e ka poe naauao i ka lapaau ma ka mokuaina o nui Ioka, aole no e oi aku mamua o $1,000 a i ole he $1,500 no ka hale hookahi.  Ua ike ia mai nei o na halemai i ku a kahiko, ua ano kawowo ia e na mai ino na mai lele, a e like no hoi me ka mea i hoike ia mai ia kakou ma ka Baibala, he mea kupono i kekahi manawa e wawahi ia lakou, a e kukulu ia i mau hale hou ma ko lakou mau wahi.  Nolaila, ua manao ia, o na hale liilii kuikawa ke kupono loa i mau halemai; i mahele la me elua mahele, i hookahi no kane, a i hookahi no ka wahine, me ona keena, a me ona lumi haawi laau mawaena.  Aole i manao ia he mea kupono ke kukulu ana i hale i oi aku ka lilo mamua o $1000 no ka halemai.  Ua hoolako kakou no na kauka kuloko a kaahele, a i mea e hoopaa ia ai ka malama pono ana o neia poe kauka i ke ola a me ka pomaikai o ka lahui, he mea pono e hoomakaukau pu ia i mau wahi oihana kuikawa no lakou.  O na ulia poino a pau e loohia ana ma na mahiko, he mea pono e lapaau koke ia ma ia wahi no, oiai, he mea hiki ole a he mea pono ole ko lakou hoouna ia ana mai i anei; a nolaila, he mea hiki ke lapaau kupono ia ma keia mau wahi, me ke kaa o na lilo i na haku mahiko.  Ua hoike ia mai ia kakou, he elima haneri a oi poe mai lepera e hele akea nei maloko nei o ka aina.  He mea kaumaha keia ina he oiaio, aka, aohe a kakou mau hooia kuio e hiki ai ke hooiaio i keia mau olelo,  Ua manao au, na kekahi luna lapaau o na lepera e hoolawa mai ia kakou i kela a me keia manawa i na hoike pololei.  i mea e pale aku ai i na manao pihoihoi a hoolele haoli.  O na olelo hoonuinui no ka heluna o na mai pake e hele laulaha nei, he mea hoalala ia i na kumu hoolele hauli.

     Ina ua loae ia kakou keia mau Halemai kuikawa, aole no e hoouna ia ka poe i manao waleia he mai pake i Molokai.  He kumu ia e pale ae ai i kekahi mau pilikia o keia ano, a ke hiki aku i ka wa e hoomaopopo loa ia ai ka mai io, e makaukau ana ma ia mea na makamaka o ka mea mai no ka hookaawale hope ana.  Ua lawe ia aku no kahi poe ma ke ano he mai lepera, me ka loaa ole nae ia mai.

     O ke komite hope loa i holo ai i Molokai, ua hoihoi mai la lakou he elua a ekolu paha poe i lapaau @ ola.  A ua ike no hoi au i kahi poe, ua kupono ole ko lakou laweia ana.  He me@ hui kela a me keia ola; a e kupilikii auanei ko kakou manao, na Haole ke hookaawale ia mai ko kakou mau ohana mai, a e mohai ana ia kakou a pau, i mea e pale ae ai ia hookaawaleia ana; a nolaila, he mea ia na kakou e kiai makaala ai me ka lili nui, i ke ola o ka poe i maopopo ole ke ano o ko lakou mai, a i aneane e hoolei ia aku iwaena @ poe mai pake e ola ole ana, kahi ho@ manaolana no ko lakou hoi hou mai.  @ anaolana nui au no na pomaikai nui e ulu mai ana mamuli o keia mau Halemai kuikawa.

     Aole i like ka ikaika o ka wahine Hawaii o keia la, me ka ikaika o kona mau kupuna o ke au pouli i hala, a ke hanau mai i ke keiki, au oi aku kona ehaeha mamua o na ehaeha o ke kuakoko o kona mau kupuna mohaha a kino maloeloe; ua ano pale ia ka pilikia a me ka poino o ke ola mamuli o ka naauao lapaau o keia au hou.  O kekahi wahine opio ma ko'u Mokupuni, ua aneane e make mamuli o ka nahunahu loihi ana no elua la.  Ua manao iho la au he mea pono e haawi ia ka naauao lapaau ma keia pilikia.  Hoouna aku la au i Lahaina i kauka lapaau, a ua pomaikai ka loaa ana mai.  A o au wahine opio nei i manao ia ua ku ma ke kae o ka lua o ka make, e kona mau makamaka, ua hoohanau ia me ka maikai a me ka oluolu iloko o ka hapalua hora mahope iho o ka hiki ana ae o ke kauka lapaau; i keia manawa, ke ola nei ke keiki me kona makuahine, me ka mohaha oluolu maikai o na ola. 

     He mea kupono, a he mea nui, e hookaa waleia kekahi keena o keia mau Halemai i manaoia, no ka hoomoe malie ana ma kahi moe.  Aole no i lawa loa ka makaukau o na wahine Hawaii ma ko lakou mau home, nolaila, ua makemake ia e loaa kahi kupono, me ka makaukau i na kokua lapaau iloko o ka wa hanau keiki.  E makemake ana kakou i mau kokua maloko oia mau wahi manawalea, a ua manao au, aole e nele ana ka loaa o ia mea.  Ua laha ma na wahi a pau o ka honua nei, na Wilikini o ka Puuwai Manawalea, a e hele mai no auanei lakou e hoohana ia lakou iho, ma ka malama ana i ka poe i loohia ia e ka mai.  A au manao no hoi au, he mea pono e noonoo nuiia neia mea he malama ana i ka poe mai, a me ka hoomakaukau ana i na wahi e hooko ia ai ia ea.  Ua manao au, e haawi manawalea mai ana keia poe Wilikini i ko lakou luhi, koe ko lakou hoolako ana aku i na pono no ke ola ana.

     He mea pono e noonoo nui ia keia mea me ke akahele, oiai, ua pili pono i ke ola o ka lahui.  Aole no he mau kumu ano nui no ka noonoo ana e kukuluia i mau Halemai nunui a puni ka aina nei, i mea e malamaia ai na mai hiki ole ke lapaau ia a ola.  Ua haawi nui iho nei kakou i na puu dala no na Kauka kaahele, he poe hoi i hoopomaikai nui ole i ka aina mamua iho nei, aka, ke manaolana nei au, ma keia mua aku, e hoopaaia keia poe Kauka kaahele e haawi i ko lakou manawa a pau no ka malama ana, a me ka lapaau ana, i ka poe ilihune maloko o ko lakou mau apana iho. 

     O ka mea nui iloko o kou puuwai, oia ka hoao ana e hoohui i keia Ahaolelo a me ka lokomaikai o keia aina, e hoomakaukau a e hoolako no ka poe e noho aua iloko o ka pouli naaupo, a me ka ike ole i ka malama ana i ko lakou mau ola uhane a me na ola kino pu.

     He mea kupono e hoomakaukau a e hoolako keia Ahaolelo no ka poe ilihune a me ka poe naaupo o ko kakou aina nei ka poe hoi i malama nui ia ma na aina e, e na hui manawalea.  Ua oi ko'u manao nui i ke ola o ka mea ilihune, mamua o na loaa nui a ka mea waiwai.  No ka hooholomua ana i keia mea ko'u kumu iini nui ma ko'u ano he kanaka kuokoa, i ae ai e lawelawe i na hana pili kau kanawai; a mamuli o keia kumu, ka hapa nui o na hookomo ana ia'u e ae e lilo i waha olelo no na makaainana o Lahaina; i kumu e loaa ai ia'u na haawina kupono no ka hoomakaukau ana i na mea e malama ia ai a oi aku na loina o ke ola Kino - ka malama ana a me ka hoomau ana i ke ola o ka Lahui Hawaii. 

 

MAIKAI KA HOI KAPAPA'

- A ME -

KA LAAU O KOU HALE!

NO HEA LA?

KAI NO HOI NO KAHI O

WAILA MA!

Nana aku no hoi ia la

Ohi ka Io o ka Laau o Makawao

I ka ua mea hoi o ka nani o

Na PAPA! Na PAPA!!

- A ME -

NA PONO KUKULU HALE

O NA ANO NO A PAU

Aia ma ke kihi o na

ALANUI PAPU me MOIWAHINE,

HONOLULU

MALAILA E LOAA AI

E LIKE me ka MAKEMAKE

- NO KE -

KUMKUKUAI MAKEPONO LOA!

 

PAPA, PAPA, PAPA,

Na Papa Huluhulu,

Na Papa Manoanoa,

Na Papa i kahiia

Na Papa Kepa,

Papa Hole Keokeo,

Papa Hole Ulaula.

 

NA LAAU, NA LAAU

Na kua,

Na Kaola.

Na Aaho,

Na Molina

Na Peapea,

Pine Huluhulu, Pine i kahiia

NA Papa a me na Laau Ulaula!

Pili ulaula,

Pili Keokeo,

Pani Puka,

Pani Puka Aniani,

Ipuka Aniani,

Puka Olepelepe.

 

PENA O NA ANO A PAU

Hulu Pena mai ka Liilii a ke Nui,

Aila Pena,

Aila Hoomaloo,

Waniti, Pate.

NA LAKO O KELA A ME KEIA ANO!

Na Ami Puka Hale.

Na Ami Puka Pa.

ANIANI!

Pepa Hale a me na Lihilihi

E LOAA NO MALAILA.

PAAKAI HELU I O KAKAAKO me PUULOA

     No ke Dala Kuike, e loaa no na mea a pau i hai ia ae la, no ke Kumukuai Emi oa.  O na kauoha mai Hawaii a Niihau, e loaa aku ano ia lakou, e hooko koke ia no la me ka lawe pono.  E kipa nui ilaila, i iike ka oiaio.       905 tf