Ka Nupepa Kuokoa, Volume XIX, Number 1, 3 January 1880 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XIX. HELU 1 } POAONO, IANUARI 3, 1880. {NA HELU A PAU 944.

 

KA NUPEPA

Kuokoa me ke Au Okoa

I HUIIA.

 

NA OLELO HOOLAHA: -- O na Olelo Hoolaha he 10 keiau kakau lima, he Hookahi Dala no ka puka mua ana; elua puka ana, he $1.50; no hookahi mahina, he $2.00.

NA KANIKAU A ME NA MELE: -- He 10 Keneta ka uku no ka lalani hookahi, na like me $1.00 no 10 lalani.

HOOLAHA MAU: -- E hoomanao na makamaka a e hookomo mai i na olelo hoolaha mamua ae o ke awakea Poaha, i ole e kaukai ia aku kekahi pule ae.

            E hoomanao e na lehulehu, aole o hoopukaia kekahi Olelo Hoolaha, Kanikau a me ke Mele, ke ole e hookaa mua ia mai ka uku.

 

MOOLELO O NA LA O KA Haku Visakauna Nelesona, KE DUKE O BERONETI

KE KAUA ANA O NA AUMOKU KAUA BERITANIA, -- A ME KO ENELANI MAU PAPU LAAU, &c.

 

No ka ike ana mai o ke Komodoa Farani, aia kona mau moku e lana ana me ka poino nui o ko laua mau kia me na palekai, ua kauoha koke ae la oia i kona Kapena, a huki ia ae la ka hae hoailona, e kahea aku ana ia laua e huli hoi mai no ko lakou kulana mau.

Oiai na aumoku kaua Farani e kiai nei ia Nelesona ma kahi haiki loa, ua hooholo ae la ke Komodoa Farani, e huli hoi lakou no ko lakou awa hoolulu moku kaua ma Toulana, oia i, aole e loaa hou ona kulana a lakou e manao ai, e hiki ke lawe pio mai ia Nelesona, a heaha la auanei kana hana ana e kiai ai mawaho, me ka hiki ole hoi paia ke hana aku i kona enemi, malia paha, a loaa mai oia i ka hapa o ko Nelesona mau aumoku kaua mai ke Kaikuono mai o Abokia, oiai lakou ma ko lakou alahele iwaho o Cadiz, imua o ka Alihikaua Nui Lord St. Vincent.  A ua manao oia, aia oia a huli hoi hou mai Toulana mai, alaila e hooko ia no auanei kona nui, ma ka mana o kona mau aumoku kaua.  Nolaila, ua kauoha koke ae la ke Komodoa Farani i kona mau aumoku, a haalele aku la lakou i na kahakai o ka mokupuni o Sadinia, me ka nele i kane meaiI manao nui ai no kona enemi.

Mai ka hoomaka ana mai o na aumoku Farani e ki poka i ka Vanguard, a hiki i ka manawa i haalele aku ai, he mea mau ia Nelesona ka noho iki ana iloko o kona keena no kekahi manawa, a aia hoi imua o kona maka ka Buke Moolelo Kaua Moana o Enelani, mai ke Kenetoria 1500, 1600, me 1700.

Mailoko mai o na Adimarala hiena wiwo ole o Enelani, iloko o ka makahiki 1591, i ka manawa e noho ana ka Moiwahine Elizabeta ma ke Kalaunu o Beritania, aole hookahi o lakou i like aku me Adimarala Sir Rikeke Garinevile, (Richard Grenville) oiai oia loaa hookahi ai i na aumoku o ke Komodoa Sepania Amida.  Ua kaulana oia ma ia kaua ana, ma kea no, e pale aku ana oia i kona mau enemi, a ua lilo hoi ia kaua ana ma ka papa ekahi o na moolelo kaua moana o Enelani, a hiki iloko o keia manawa.  Oiai, aole kakou i lohe i na kaua moana i keia wa, ke kaua pale ana o kekahi moku hookahi i ka lehulehu moku o kona mau enemi.  A ua lilo hoi keia kaua pale o Nelesona ma ka kuanalu o ka mokupuni o Sadinia, ma ka papa elua o na moolelo kaua moana o Enelani. 

Ua kaulana oia ma ia kaua ana, no kona koa a me kona wiwo ole ma kona hoopuni ia ana aka, aole nae oia i ae iki e haawi pio aku i kona hae, ke kaulana o kona aina, ke Kiekie o ka Moiwahine Elizabeta, a me ka hanohano o kona Inoa, nolaila, ua lana iho la oia iwaenakonu me ka hoopuni ia ana e na aumoku Sepania he 17, a aohe hoi i emi iho na pukapuka o kona moku malalo o ke tausani, o ua hooaohee aku hoi oia: ka pii ana mai o na regimana Sepania maluna o kona moku, no 15 manawa.

Ua hoomaka oia e kaua hookahi aku i kona enemi i ka hora 2 o ka auina la, a aole hoi oia i lawe pio ia a hiki wale i ka hora 11 o ka po, a iloko o ia manawa oia i loaa hou ai i kekahi poka pukuniahi ma kona mau uha, a na ia mea i hoonawaliwali mai i kona kino, oiai, ua nui na eha i loaa iaia, a e kahe awai ana kona koko ma o a maanei.

No ka nui o na poino i loaa iaia, o kona moku hoi e ku olohelohe wale ana, ua pau na kia i ka hakihaki kona oneki e waiho wale ana, kona ihu a me kona hope, ua pau i ka nahaha, o waena o kona moku e a ia ana e ke ahi, o kona mau koa, e waiho mokaki ana ma o a maanei, a mai loko mai o 130 koa a me na alii moku, he 16 o lakou i ola mahunehune mai, a ua lawe pio ia lakou mahope iho o ka hora 11 o ka po, oiai na koa o keia Adimarala wiwo ole, e kaheawai ana ko lakou mau koko i ka make.

Iloko o keia kulana pilikia a Adimarala Sir Rikeke, ua aa loa oia e kaua aku i kona mau enemi a hiki i ka hopena o kona hanu ana.  Mamuli o kona, ike maka ana aku i kona mau koa a me na alii moku, he mea kaumaha loa ia i kona manao me ka ehaeha nui o kona naau, oiai lakou e waiho mokaki ana ma o a maanei.

Oiai ke koko hala ole o keia Adimarala e kahe nei, a e paa ia ana hoi oia e kona mau alii moku, he mea mau iaia ke kuhikuhi ana iluna, me ka hoopuka ana, “Iaia wale no e hilinai aku ai.”  I ka manawa o kona moku i hoopuni ia ai e na waapa kaua Sepania, ua ano mauleule iho la oia, oiai oia e waiho ana ma ka oneki iloko o ka pouli uwahi pauda me ka ehaeha, ua paa ae la oia i kana pahikaua ma kona lima akau, a kuhi pololei ae la oia i ka lani me ka leha ana o kona mau maka, a hoopuka ae la oia i keia mau huaolelo no ka manawa hope loa, e hoike ana no kona koa, kona wiwo ole i na eha i loaa iaia, a me ka hanohano o kona inoa, a e heluhelu ia kana pule me ka eehia, penei:

“Owau, o Sir Rikeke Garinevile, ua make au iluna o ko ka Moiwahine Beritania moku kaua Revenge, me ka olioli a me ka naau haahaa.  No ka mea, ua oluolu loa i ke Akua Mana Loa ka hoopokole ana mai i ko’u mau la, he koa oiaio e hiki ai ke hana, a e kue ana hoi i ka enemi no ka hanohano o kona aina, kona Moiwahine, kona kuokoa, a me ka hanohano o kona inoa, i haawina a i kumuhana hoi no na tausani opio o Enelani, e alakai ia ai lakou i ke kulana o ka ike a me ke koa.”

O keia iho la na olelo hope loa a keia Adimarala wiwo ole, a lele loa ae la kona hanu he mau minute pokole mahope mai o ia manawa.

Iloko o keia kaua ana, ua make o Adimarala Sir Rikeke me kona mau koa a pau maluna o ka oneki o kona moku me ka a ia ana e ke ahi.  O ko na Sepania hoi – mai loko mai o na aumoku kaua he 17, he eha moku nui i nahaha, a aole hoi i emi iho na koa Sepania i make malalo o ke tausani.  O na make o ko Nelesona moku, aole i oi aku mamua o ka 20, me ka nui o ka poino o kona moku.  Mai loko mai o na aumoku kaua Farani ewalu, ua pau loa lakou i ka weluwelu, a koe aku ka moku o ke Komodoa Farani, aole oia i pii aku e kipoka i ka Vanguard.

O keia iho la oa kaua paakiki e hiki ai i ka ikaika o ka mea hookahi ke kue aku i ka nui lehulehu o kona mau enemi.  Oiai, o keia mau kaua, aole oia i kaua aku, aka, ua kaua aku oia ma kea no e pale ena nona, oiai oe e holo ana ma ka moana akea, a aole hoi au mau awa e kipa koke aku ai no kou pakele.

Oiai kakou e heluhelu nei i ka moolelo piha o Nelesona, ua ike ia kona koa a me ke akamai, a iloko o keia mau la pokole, e hiki aku no auanei kakou i kekahi o ka Nelesona mau hana koa a kaulana hoi, oiai oia i kue aku ai i na aumoku kaua ikaika o ka Akau, ma ke Kai Balatika, (Baltic Sea.)  He wahi manawa pokole iki no, e hiki aku no auanei kakou i kekahi o kana mau hana koa i oi aku i ko ka mua, ma na kahakai o Bolona, (Boulogne) oia hoi kela uwapo pakui a Napoliona i hana ai mai Farani mai, a ike koke ia keia uwapo, oiai, ua hiki mai lakou i ka hapalua like o ke Kowa Pelekane.  He wahi manawa loihi iki aku, e hiki mai no auanei kakou i ka hopena o kana mau hana koa, kahi hoi a ka mea heluhelu e makemake nei e hiki koke aku i kahi a keia koa i kaulana loa ai kona inoa, a i loaa ai hoi ia Enelani ka hanohano a me ka ikaika o kona mau aumoku kaua ma ka moana akea, i kona manawa i haulehia ai iloko o ka lanakila imua o na aumoku kaua hui o Farani me Sepania a ua hewa iki hoi ka mea e kakau nei i keia moolelo ma keia mau helu mua aku nei, no ke kahua kaua o Tarafalaga, aole nae i hoomaopopo loa ia ia hewa, a eia ka pololei.  Ua hoouka ia ke kaua ma ka Lae o Tarafalaga, Sepania, mawaena o Vice-Adimarala Haku Nelesona, a me na Adimarala Farani Vilenua me Magona, a me na Adimarala Sepania Garavina me D’Alava, o na aumoku kaua hui, ma ka la 21 o Okatoba, 1805; aole hoi ma ka la 5.  Ke noi aku nei ka mea kakau nei i ka lokomaikai o ka poe e heluhelu nei i keia moolelo e kaia mai.

E hoi hou kakou i ke kamailio ana no ka Vanguard.  No ka haalele ana aku o na aumoku Farani i na kahakai o Sadinia, ua kauoha koke ae la o Nelesona ia Kapena Haki, a hoopuka koke mai la ka Vanguard iwaho, a ike koke ia aku la kekahi mau moku e holo mai ana, a o kekahi ia o kona mau moku, oiai lakou e holo ana ma ko lakou mau alahele no Napela.

I ka manawa i ike mai ai o keia mau moku i ka hae Adimirala o Nelesona e kau ana, akahi no laua a ike, eia ka ma na kahakai o Sadinia o Nelesona kahi i lana ai, me ko lakou manao, ua loaa la i ka pilikia ka Vanguard, mai loko mai o kela ino nui ma ka po o ka la 21 Augate, a hoomaka mai la laua e hoopii ma kahi a Nelesona ma e lana ana, a kuu iho la ko laua mau heleuma.

Ua kauoha hou ae la o Nelesona i kona mau aumoku no ka haalele ana aku i na kahakai o Sadinia no Napela, a kolo ia aku la ka moku poino e keia mau moku.  A ma ka la 30 o Augate, ua kalewa ae la o Nelesona iwaho pono o Italia, he 15 mile mai ke kulanakauhala mai o Napela.

Aole i pau.

 

KA MOOLELO O BERIANA KA WIWO OLE A ME MAHONE KE KOA:

MOKUNA XIV

 

[E na makamaka hoohialaai o ka moolelo o Beriana, mamuli o ke kaawale ana aku o ka mea kakau i kekahi mau apana o keia mau Paemoku, nolaila, ua alo i ko oukou mau kii onohi ka hoea ana aku o keia moolelo oiaio a maikai, a i keia pule ke hoomau ia aku nei kona puka ana.  L. H.]

Oiai ua moneka aoo nei a hookaukau ana, paa ae la ia i ka lei gula iluna ma kekahi lima, a kilokilo iho la i ua lei la me na maka aloha.

Nau i hoopio i ke Denemaka e lei una ia lei?  wahi a ke ‘lii Powa, oiai oia e haka pono ana i ua moneka aoo nei.

Ae, na keia mau lima i hoohaahaa i ke Denemaka nana e papahi ana!  wahi a ka moneka i pane aku ai me ke kuoo.  A e ike oe ia’u ano, e ke kanaka kolohe i hui pu aku me ko Irelani mau enemi.

I keia wa a ka moneka i pane aku ai, wehe ae la oia i ke koloka e uhi ana iaia, a kiola aku la i ka uhi maka e huna ana i kona helehelena, a waiho moakaka aku la imua o ke ‘lii Powa na ouli o kekahi kanaka i kiei aku na makahiki ma kela kapa o na oho hina keokeo, aka o kona kulana ua maloeloe pono, a o kona mau maka ua like me ka hulili wela o ka inaina.

Ma kuu ola ana!  wahi a ke ‘lii Powa, o Malaki o Meaka keia.  E na ‘lii, ua halawai kakou me ka poino.  E nana i ka mea nana i lumai aku i ka maka o ka pahikaua iloko o ka puuwai o ko oukou koa kaulana i make ma kela awawa mamao ma-o, a lawe ae la i ka lei gula mai iaia ae me ka lanakila kiekie.  Auwe!  oe e Malaki, ka haku ‘lii kaulana o Irelani nei, no ke aha oe i kulou ai a hoohaahaa ia oe iho imua o ka mea pakaha wale, ia Beriana o Tekomona?

Pane aku la ka moneka me ka leo ku io a me ka mokaka, a hohola ‘ku la kona leo a lohe ia e ko waho o ka pakaua, i ka i ana aku:

Aole au i kulou aku imua o ka Moi Beriana, e ke kanaka kolohe, aka, ua haawi au ia’u iho no ka pono a me ka pomaikai o ka lehulehu o ka aina, a me ka makemake o ka Moi Kiekie ma ka lani.  O Beriana o Tekomona, he enemi naau haahaa oia, a ua kaikai oia i kona lima e pale aku i na hoopilikia ana a na Denemaka kue.  Owai ka mea hiki ke alakai aku i na mamo o Erina i ka lanakila?  Oia wale no.  E ike oe, e lilo au i mea hewa ke hapai au i ko’u lima a kue aku i kekahi kanaka e hana ana i ka pono no ke ‘lii maikai o ka aina i ike ole ia kona lua, a oiai oia ko’u hoapili iloko oia mau la.  Ua hoopio aku maua i na Denemaka ma Glen Mora, a ma ke kokua ana mai o ke Akua e hoopio hou ia no ka enemi ma ka hoouka kaua ma Clontarf.  Ke hoike mai nei na la kanikoo, ua aloha a hiipoi me ka makahehi ao i kuu aina kulaiwi nei mamua ae o na hana pili makamaka i panee ia aku imua o na hoino ia mai; a e hailiili auanei na heluna la i koe o keia mau oho hina i na ‘lii e haawi ana i ko lakou ikaika e hookaawale i ka nohona maluhia maluna o ka aina imua o ka maka o ka mea kokua.

I keia manawa, ua hoopiha ia na ‘lii Denemaka me ke kahaha no ke koa kaulana nana i hoohaahaa ko lakou pukonakona i na la i au wale aku la.

Haka pono aku la o Mahone a me Donala i ke koa lanakila, Malaki me na maka aloha, a komo pu mai la na Delakasiana e paa ana i na pio ma ka hauoli pu ana me ia

Oiai iloko o keia manawa, e mahuahua mau ana na leo hooho a me na koele ana mawaho o ka pakaua, oiai ke alii Powa e imi ana i wahi e hoopakele ia ai lakou ma na paia o ka pakaua.

Pane aku la ka moneka i ka kakou koa, i ka i ana aku, oiai, eia me kakou ka lei gula, nolaila, e kau na mea apau ma kona lio iho, a e hookuu hou aku i ke alahaka.  O oe hoi e ke koa opio, ka mea lio holo, e puka aku oe iwaho a komo aku mawaena o na mahele o ka enemi e ku nei mawaho, a mahope aku makou e kokua ai ia oe.

Alaila, haliu ae la ua moneka nei i ke alii Powa a me na Denemaka, a pane aku la:

E lawe aku i ke koena o na pio iloko o na keena hoopaa me ka poe ilaila.  Na ke Keiki Alii Mukada e papahi ana i ka lei gula ma Clontarf, a owau pu kekahi ma kona aoao ma ia la.  Na ke kanaka koa o ka puali kaua o na Denemaka e imi ae a loaa makou ilaila, a lawe mai me kona ikaika lua ole i keia lei gala, ina e hiki iaia.  Aloha oe e ke kanaka kolohe, a pela olua e na Denemaka hookano.  E halawai hou no kakou ma Clontarf. 

I keia wa i hookuu ia ai ke alahaka, a me ka leo hauoli no ka lanakila, i oili aku ai ka opio Mahone maluna o kona lio, i ukali ia aku e Malaki a me na Delakasiana.

E ola ka Moi Beriana a me ka inoa o Erina!  i hooho ae ai ke koa opio Mahone, oiai oia e alo ana iwaena o kona mau enemi.

E ola ke koa Malaki a me ka lei gula, wahi a Donala i hooho ae ai.

MOKUNA. XV.

I ke koa opio Mahone i oili aku ai maluna o kona lio kaua maluna aku o ke alahaka, ua uhi ia no kona kino holookoa me ke koloka o ka oihana powa, a e paa ana ma kona lima kana pahikaua.

Mahope mai ona na kapuai haluku o ke pukonakona Malaki me Donala a me na kanaka Delakasiana i huna ia na helehelena.

Mamua ae o ko lakou haalele ana i ka pakaua, ua hoike ae la ke koa moneka aoo i kona manao, e hookahaha ia ana ka manao o ka poe mawaho o ka pakaua no lakou, ma ko lakou puka ana aku me ka aahu piha o na kanaka Powa, a he mea ia no ka kakou koa opio e puka malaelae aku ai mawaena o na enemi me ka lei gula ma kona poli, ma kona ala no ka Moi Beriana; oiai lakou e paio ana me ka enemi ia manawa.

He oiaio, ua hookahakaha io ia na kanaka powa a me ko lakou mau alakai no keia puka ana aku o na Delakasiana me na aahu ano e.

Ia Mahone i puka mai ai a komo iwaena o kona enemi, puana ae la oia i kana olelo kukala kaua, me ke pale ana aku i na keakea ma kela a ma keia aoao ona e kue mai ana iaia, oiai e ake ana oia e hiki ma ke poo o ke ala e moe ana ilalo o ke kuahiwi, kahi e loaa ai iaia ka palekana.

Me ka leo hooho a kaena ke koa Mahone i puana ae ai iaia e maalo ana mawaena o kona mau enemi maluna o kona lio kaua, me kona helehelena i hoopiha ia e ka hopo ole oiai, ua makala ae la ia i ke koloka e uhi ana i kona kino a me ka uhi maka, a paa kehakeha ae la i ka lei gula ma kona lima, me ke kuupau ana i ka mama o kona lio ma ke ala, me ka manaolana ana ke ukali aku nei kona mau hoa’loha iaia me ke kanalua ole.

Ia Mahone he 50 iwilei mai ke alahaku mai, huli ae la oia i hope a nana i kona mau hoa’loha, ina aia no lakou mahope ona kahi i ukali aku ai, aka, aia hoi, oia wale no ka keia e holo nei.

Maluna ae o kona ala e holo nei, e lohe ana oia i ka nakeke o na makakila a me na leo hooho kaua, oia ka mea nana i hoike mai iaia, ua hahana ka hoouka kaua ma na aoao elua; a maluna ae oia mau leo uluaoa i pa e mai ai ka leo o Malaki i ka pane ana mai:

E kui ka mama e ke koa opio a loaa o Beriana.  E hai aku oe ia Beriana na Malaki o Mia i kaili hou mai ia waiwai kauoha mai na enemi mai o Irelani.  Ina wau e ola, e halawai hou kakou ma Clontarf; no laila, i nui ka mama me kou ola a pau me ia waiwai makamae.

E make na kokua o Beriana!  Ilalo me Malaki o Mia!  E na kanaka koa o Teinster me na Denemaka wiwo ole, e hahai aku mahope o ke pio!  E loaa ia kakou ia lei makamae, wahi a kekahi leo malihini i ko Mahone mau pepeiao; aka, ua hoomaopopo aku la nae ia, he leo no kekahi Denemaka.

E na lani kiekie!  wahi a Mahone, e holo loa anei au me ka haalele i ka pukonakona Malaki e auamo hookahi i na popilikia a kona mau enemi?  Aole, aole loa, e komo pu au iloko oia mau pilikia e puunaue like me ia.

I keia wa, ua ku iho la ka kakou opio ma ke ala, e kali ana i ka hopena o kona mau hoa’loha, a iaia i lohe ai i ka haluku uluaoa o ke kaua, hoohuli ae la oia i kona lio no ka pakaua, me ka manao e kaana like i na popilikia me kona mau noa make.

(Aole i pau.)

 

 

HE MOOLELO KAAO NO VONA KA WIWO OLE A ME FINITI KA UI O NOREWAI

 

                Mahope iho o ka hala ana o kekahi mau la, oiai lakou e luakaha ana ma na oneki o ko lakou moku e ahai palanehe ia ana e na ahe makani o ka moana, ma kekahi po, me he aha la, ua hoohikilele ia mai la ko ua Vona nei mau manao me ka pihoihoi nui, aia hoi ia manawa, ua kau aku la ua moku nei maluna o kekahi pukoa, ia sekona no, ua lohe ia aku la ka owe weliweli ana o ua moku nei maluna o ua pukoa la; ua helelei mai la na pea mai luna mai o na kia a waiho mokaki iho la maluna o ka papahele, a haule aku la iloko o ke kai kekahi; aia hoi na ale hanupanupa e poi pu mai ana maluna o ka moku, a kaiehu aku la i na mea a pau maluna ona.  Ia manawa i kahea aku ai ua wahi Vona nei, “Imua e Kerevela,” oia no ka manawa a kona poo i haule aku ai iloko o ke kai, a o kona hoomaka aku la no ia e au, me he mea la aia no oia e auau ana iloko o ka lokowai lana malie ma na kaiaulu o kona one hanau.

                Oiai oia e au lana malie ana ma ka ili kai me he aha ala la kona ike ana aku i kekahi wahi kiko eleele iwaena o na ale e anaanapa ana ma kekahi wahi mamao aku mai ia ia aku, lele ae la ko ia nei hauli me ka manao lana no ka pakele o kona hanu i na paha he aina ia.

                Hoomau aku la oia i ka nana akahele ana a loihi maopopo iho la ia ia nei he aina ia, ia manawa koke no, ko ia nei hookokoke aku la no ia me ka au hoomanawanui ana a no na hora pokole, a pa ana ko ia nei mau wawae i ka honua paa, manao aie la keia i ke ola.

                Ia manawa hoomanawanui aku la keia a pae loa i kahakai, ua hele mai la nae keia a haukeke i ke anu; ua luhi ke kino, he aneane wale ae no koe e lele loa ae ka hanu.  No ka hiki oie ia ia nei ke ku ae iluna nolaila, olokaa hele aku la keia i kaha one a hiki ma kahi kupono, a hoomanao ae la i ke Akua, a hiamoe aku la.

                E hoomanao kakou o ka aina keia o Norewai, kahi a ua Vona nei i kau aku ai, a ma keia mua aku, malaila oia i walea ai me ka Finiti, ka mea nona kekahi hapa o keia moolelo.

 

MAHELE II.

 

                I ke kakahiaka wale, i kona puoho ana’e halo aku la kona mau maka ma o a maanei, me ke ake nui e maopopo o ka aina hea la keia ana i hiamoe ai.  Pela kona nana akahele ana ma o a maanei a hala kekahi mau minute, ike aku la ia i kekahi hale nui me he luakini la na helehelena i ka nana aku ma kahi mamao loa.

                Ia manawa, lana ae la kona manao e hele aku i ua hale la, malia paha he kanaka ko laila a loaa la hoi ka makamaka.

                No kekahi manawa pokole, ko ia nei eu ae la no ia a hele aku la.  Mai kakahiakanui a po, hiki no hoi keia i ua hale nei.  I ko ia nei hiki pono ana aku, i nana aku ka hana, aohe no hoi kau i kana mai o ka hale nui – ke nana ae i kona puka, nui launa ole o ke kikeke o kona mau puka makani he 50 kapuai.  Kieke aku la keia i ke pani puka, ua like me ka mea ole, aohe e lohe ia mai.

                No ka lohe ole ia mai ma ke kikeke ana me kona mau puupuu lima, nolaila, kii aku la keia i kekahi pohaku nui a hapai mai la, a me ia pohaku oia i hookui aku ai i ka puka, a akahi no a lohe ia aku ka pane ana mai o ka leo mai loko mai, “E komo mai,” wahi a ka leo, a o ka leo i pane mai, ua like no ia me ka umo ana a kekahi pipi bulu ka halulu ke hele la ia “a nei ka papa o Apua.”

                Ia sekona no, ua hamama ae la ke pani puka, aia hoi ku iho la keia imua o ke alo o kekahi kanaka nui launa ole, nona na kapuai he 40 ke kiekie.

                No ka hiki ole i ua kanaka nui nei ke ike pono i ua wahi Vona nei, nolaila lalau iho la kela i ua wahi Vona nei, a hapai ae la iluna a paa iho la mawaena o kona mau manamana lima, a ninau aku la.  Owai kou inoa, a heaha kou makemake i hiki ai ia nei?

                O “Makauole” ko’u inoa, a e imi ana au i ko’u pomaikai wahi a Vona i pane aku ai, me ka nana hoihoi ana aku i ke kanaka nui.

                “Ahe, e Makauole wiwo ole, ua loaa kou pomaikai.” wahi a ke kanaka nui i pane aku ai me ke ano pahenehene.

                Ua nele ae nei au i ke kauwa hana ole, nolaila e haawi aku no au i hana nau.  E hele koke aku oe i ka hana ano, no ka mea, o keia ka manawa a’u e ho-a aku ai i ka’u mau hipa ma ke kula hanai, nolaila, e noho iho oe ma ka hale nei, a e hoomaemae i ka pa hipa i ko’u wa e hele aku ai.  Pane hou aku la no ia, aole au e haawi aku i hana e ae nau, a akaaka iho la.  Ike oe la ea, he Haku maikai au.

                Aole i pau.

 

MAIKAI KA HOI KA PAPA!

A ME KA LAAU O KOU HALE!

NO HEA LA?

KAI NO HOI NO KAHI O WAILA MA!

Nana aku no hoi ia la

Ohi ka lo o ka Laau o Makawao

I ka ua mea hoi o ka nani o

Na PAPA!  Na PAPA!!

A ME NA PONO KUKULU HALE O NA ANO NO A PAU.

 

Aia ma ke kihi o na ALANUI PAPU me MOIWAHINE HONOLULU MALAILA E LOAA AI E LIKE me ka MAKEMAKE NO KE KUMUKUAI MAKEPONO LOA!

 

PAPA, PAPA, PAPA,

Na Papa Huluhulu, Na Papa Manoanoa, Na Papa i kahiia, Na Papa Kepa, Papa Hole Keokeo, Papa Hole Ulaula.

 

NA LAAU, NA LAAU

Na Kua, Na Kaola, Na Aaho, Na Moli, Na Peapea.

Pine Huluhulu, Pine i kahiia

NA Papa a me na Laau Ulaula!

Pili ulaula, Pili Keokeo, Pani Puka, Pani Puka Aniani, Ipuka Aniani, Puka Olapelepe.

 

PENA O NA ANO A PAU

Hulu Pena mai ka Liilii a ke Nui, Aila Pena, Aila Hoomaloo, Waniti, Pate.

NA LAKO O KELA A ME KEIA ANO!

Na Ami Puka Hale.  Na Ami Puka Po.  ANIANI!

 

Pepa Hale a me na Lihilihi

E LOAA NO MALAILA.

PAAKAI HELU I O KAKAAKO me PUULOA

 

                No ke DALA KUIKE, e loaa no na mea a pau i halia ae la, no ke Kumukuai Emi loa, O na kauoha a pau mai Hawaii a Niihau e loaa ‘ku ana ia lakou, e hooko koke ia no ia m ka lawa pono.

                E Kipa Nui Ilaila, i ike i ka Oiaio,