Ka Nupepa Kuokoa, Volume XVIII, Number 39, 27 Kepakemapa 1879 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

HE MOOLELO

NO

EVALEKA DE MOLENA!

KE KOA

KAVALIA WIWI OLE O SEPANIA!

NOHEA OLU WAIPAHE,

ROSA AMELIA.

 

            "E ka Manawa:

Nani kou hookahua ana,

A hookupalau mai i na hihio,

I piha i ke pahaohao a eehia,

E like me ka'u e ike nei;

I nei mau oali ano kupanaha,

I @ aka mamua o ka mea la."

            DONA SANKO

 

MOKUNA III ---- HELU III.

 

            I KA manawa a ua puali mele la e kuupau mai la i ko lakou mau kileo kani, ua ike ia aku la ka opio Rosa Amelia e kiei mai ana ma kona puka aniani a nou mai la hookahi boke rose -- a emi hou aku la. O keia paha ka hikimua loa o na ikeia ana o Rosa e kiei mai ana iwaho a hoike mai i kau wahi hoailona o kona hoihoi no ke mele -- oiai aole pela mamua ae.

            No kekahi mau minute liuliu ka aha mele i himeni mai ai, a hele aku la me ka piha hapa o ka lakou kakai moni, i na a-la pokeokeo a ka Makuisa Palemairo, i haawi aku ai, a he hoike ana hoi ia i kona olioli lealea po mahina.

            I ka hala ana aku o ka puali mele kaahele, ua ike hou ia aku la o Rosa Amelia e kiei hou mai ana ma kona ipuka aniani a emi hou aku la.

            O kona manao nae a me kona ake ia manawa, a i ole, o kana hana paha i kau nui ai ia sekona, ma kaia kiei ana mai la, aole i maopopo, o kela maka ike hookahi wale no paha e kiei iho la maluna ona, ka mea i ike a hoomaopopo, i na mea a kona naau e uilani ana ia manawa.

            I ua Ui nei o na ui i kuemi mai ai a noho iho la maluna o kona noho hooluli, ua lalau koke aku la kona lima nanahe i kekahi o na papahi lei ana i haku ai, a hoani ae la i kona mau lehelehe, me ka muki hoomau hookahi hoi, hookou iho la ia i ua owili lei la ma kona uha. Aole hoi i liuliu mahope iho, hapai hou ne la ia i ka lei a muki hou iho la, a puana ae la hoi i kekahi mau mamala olelo hookaukau.

            "E ke ala anuhea,

            E hiki anei ia oe ke hai mai,

            Ahea la keia mau kii onohi ike hou 'ku

            I ka oiwi a nei puuwai i eha ai?

            Ea, e keia onaona ano e--

            E mapa mai oe; a hawanawana mai--

            A hai mai hoi me ka olu,

            I kou mea a'u i lia ai,

            I ka mea hoi i maeele ai kuu houpo.

            I ka nani a'u i aloha ai,

            Ka mea hoi a kuu puuwai,

            I lawe ae ai i ka hoohiki,

            Na'u ia a mau loa--

            Ina-- ina au e ike ana.

            E ke ala o keia lei--

            O oe kuu elele--

            Ina oia e maalo mai ana,

            Me kona aka kino wailua.

            E hopu no oe iaia-- a--

            Hookipa mai me ke aloha."

 

            Oiai ua lede opio nei e puana hookaukau ana, aole paha oia i haupu mua, ua kokoke mai ka wa ana e ike ai a e hui ai me ka mea aua i lia ai.

            A iaia e lilo loa ana i ke kulana hoi hope a hoi mua a kona noho paipai, aia hoi kololio nanahe mai ana he leo mele i awili pu ia me ka melodia liilii palanehe o ke gita. O, he mea e ka hoonaue ia o ka nui kino hjolookoa o ua lede opio la, oiai ua ku ae la ia iluina me ka hikilele a puiwa, a ano okakala ae la ia mai o a o.

            Ku iho la ia me ke pihoihoi o kona houpo, e hoolono pono ana hoi me ka hoao ana, e mawaewae pono, ino ua like keia leo kani aumoe ana e lohe nei, me ko ka leo ana i lohe mua loa ai.

            Iaia e hoolohelohe ana me ka hopohopo, ua akaka lea loa ae la iaia, o ka leo no keia nan i lohe mua ai, a i owili ia ai kona puuwai iloko o ke koloka makolukolu o ka hoohihi a me ka lia.

            Mau mai la hoi ka hoene ilihia ana mai o ka leo mele kamahao, a me ke kani melodia nanahe o na kaula gita, a ia wa i hele aku ai o Rosa Amelia a ma ka puka aniani o kona rumi e huli pono ana i ka muliwai La Palata, kiei aku la, a ai imua o kona kii onohi ka oiwi opiopio nani o kekahi keonimana, e hiipoi mai ana i ka pila gita ma kona alo.

            I keia wa i huli hope ae ai na kapuai o ua lede la, a kai aku la no kona moe, kahi hoi e mau mokaki ana na papahi lei ana i kai ai ia auina la.

            Hele mai la ia, a uu ae la i ka pale aniani iluna, a ma ia kowa i oili loa aku ai ka hapa luna o kona kino. Me kona lima akau hoi nou aku la ia hookahi owili lei, a haule aku la maluna o ka iliwai. Na ke kohu ana hoi a keia owili lei, i ume mai i na maka o ka opio mele, e huli ae a nana i ka hale kakela. A iaia i hana ai pela, ua huki loa ia ae la kana hookaulono nana ana, a ike aku la i kekahi lede opio nani lua ole, e kiei mai ana ma ka ipuka aniani.

            I nei manawa i hooki pu iho ai ua opio nei i kona leo, a hoomalele ae la hoi i kona mau manamanalima mai na kaula ae o kana gita, a ike pu aku la hoi oia i ka lede e emi hou aku ana.

            Lana wale iho la no ua opio mele nei maluna o kona wahi mouo lana, a hale auwai hoi, a liuliu, hookuu hou ae la ia he mapuna leo mele kohaihai, e houhene lailai ana maluna o na wai malino aiai o ka La Palata.

            Hoomau aku la ia i ka himeni ana a me ka hoouwe pu ana hoi i kana gita a hala hope ae la he mau minute, ia manawa oia i ike aku ai i kekahi mea kino aiai e hele ae ana mawaena o na laalaau, a emoole hoi hiki mai la oia malalo o kekahi punonohu laau wilou.

            I ka hooki ana ae o kana himeni ana, a nalo loa ae la hoi kona leo ma na welelau makani, ia wa oia i lohe aku ai i kekahi leo wahine, a he kani leo violaume ke kokua ana i ka iliilihia o ua leo la.

            Hoolono aku la keia mai ka mua a ka hope o ua mele la a ka lede, a penei na olelo i mele ia mai, a oia no hoi kekahi o na mele kaulana loa o Sepania.

            "E ka hiwahiwa a ke aloha,

            E ka nani hoi a ka puuwai,

            Mea e ka iliilihia kamahao,

            E loku a e koni nei i ka houpo;

            Ane hapa pu a hiki ole,

            I keia hinu ke pu-a ae;

            Oia-ua loku-ua koni-a ua wela--

            Ke koko e holo puni nei--

            E poai nei me ka mama,

            I nei mau aakoko maeele.

 

            Aole anei oe e malia mai,

            A haawi mai i hookahi muki ana,

            I aila h@mo hooia ae hoi

            No keia palapu e alina nei,

            E aai makolukolu nei hoi,

            I keia puuwai hala ole.

            E ka anoi-- e ka pula kaumaka--

            E neenee mai oe a kokoke,

            Me kou mau hiona nani lua ole.

            I kikokohuia hoi--

            Me na ouli a ka waipahe;

            Ea, mai hookipa iloko o kou houpo,

            I na haawina o ka mau-a-- aole hoi ka makona--

            A mai mahie ohilahila hoi,

            I keia leo kaulona a ke aloha.

 

            E ke onaona lau wilou,

            Nowai keia leo hea ilihia,

            E hoolale hooipo nei i ke aumoe?

            E hai mai me ka hookaulua ole.

            A mai lokoino hoi;

            E pane mai oe, e ka Mahina,

            Ina ua ike lihi oe--

            I ka mea nona nei leo

            Ilihia o ke aumoe.

            Akahi ka maule maeele,

            O nei mau aa-lolo--

            I ka mumule mai o oukou,

            E na ouli kupu honua.

 

            Akahi au a ike molaelae,

            I ka hanu aala o ka bama,

            E heahea ana i ka anoi e kipa,

            E hoolualai pu me na opuu,

            Na libano nohenohea olu hoi,

            E hooipo mai la ma na pa,

            O Maderida ke aliiwahine.

            E ae mai e ke aloha hoonipo,

            I hookahi muki hala ole,

            Ma kou mau papalina olu,

            I eloelo i ke kiu aumoe,

            E ani nei loku i ka manawa.

 

            Ia'u e hiolani lai ana,

            Hookahi mea nui a ka lia,

            O ka hakoi mau me ka hiaa,

            I na kau po me na kau ao;

            Lele ae no ke au o ka manawa,

            Lele pu hoi me na aui loli ano e,

            Aka, o ke aloha-- o ka wela ikiiki nou,

            E mau ana no ia--

            Huli pu ae la na sekona,

            Hina hoi na minute liilii,

            A panee haahaa ia hoi na hora,

            Aka, o ka lia nou-- e ke aloha,

            E oia mau ana no ia;

            Nolaila, e pae mai e ka olulo,

            E pae mai ma ko makou kaiaulu,

            E luakaha pu me ke aloha,

            A hoonipo oni wela i ke kino--"

 

Iloko o keia manawa a ka lede e himeni la a pau, ua like iho la ke keonimana opio maluna o ka waapa kahiko, a kakou e na hoa e ike nei, me ka ia ua make i ka popo auhuhu, oiai, ua a mai la na kui maeele kupaianaha a ke anoano aloha kupouli ano e iloko o kona mau aa-lolo, a hiki ole iaia ke hoaui hoouana ae ma o a maanei.

            Aole i pau.

 

KA MOOLELO O

BERIANA KA WIWO OLE

A ME

MAHONE KE KOA:

MOKUNA IX.

 

            @ HULI ia loko o keia heiau make o na powa, wahi a ka Moi Beriana, iaia i lalau aku ai i kekahi lamalama a paa ma kona lima. E ka poe hohe wale, no keaha oukou i haalele ai i ko oukou mau wahi kiai?

            Alakai aku la ka Moi Beriana i ke ala, maloko aku o kahi a lakou e akoakoa ana, a komo aku la i ka ponaha waena konu o ke ana iloko lilo, i ukaliia e ke koa Mahone, Donala a me kona mau koa Delakasiana.

            Mahea i nalowale aku ai na moo omo koko o keia lua pa-u? wahi a Beriana, iaia e halo ana a puni oloko o keia ponaha o ke ana, kahi hoi i hoopaa pio ia ai o Mahone a me Donala; i hoike ia ma na helu i hala.

            Aka, haupu ae la oia i na kuhikuhi a ke kino aka kamahao i hoike mai ai iaia no keia ana, no kekahi ala a ipuka hoi, e moe ana a hoea aku i kekahi owawa malalo o ke ana. I ka loaa ana iaia o keia ala, kahea mai la oia i kona mau koa e ukali aku iaia; a wahi ana, E haehae liilii ia ana na powa e kakou ke loaa aku lakou e hoopunana ana iwaena o na malumalu o keia owawa.

            Mawaena aku o keia ala pouli, i alakai aku ai o Beriana i kona mau koa, a hoea aku la ilalo o ka owawa, a ku ana lakou ma ke kae o kekahi muliwai.

            O na lio i haalele ia aku e na koa mahope, ia lakou i komo mai ai e paio a hopu pio i na powa, e auwana ana no lakou ma o a maanei o ka ululaau, me ka hamu ana i na omaka weuweu uliuli e kupu ana, oiai hoi kela pohaku nui i haule ai mamua o ke alo o Beriana, e waiho olokea ana no ma ke alanui; a ua hiki ole ia Beriana a me kona mau koa ke hoomaopopo, i kahi i nalo honua ai o na powa a me na keiki Denemaka.

MOKUNA X.

 

            Oiai ka Moi Beriana e ku ana ma ke kae o ka muliwai me ka nalu ana, e kilo ana hoi maluna aku o ka ili o ka wai iloko o ka pouli, ua pane ae la oia:

            Mahea la i nalowale aku ai na enemi? Aole e hiki ia lakou ke pakele maluna aku o ka wai, no ka mea, he ikaika ke kahe ana o ka wai o ka muliwai.

            Iloko nae oia wa, haule aku la kona lena ike maluna o ka helehelena o ke koa o ka laau ihe, ka mea i hoauau ia me na kahawai o ke koko e kiheahea ana ma o a maanei o kona helehelena. Ha, e ke koa, aole ka oe i malama aku i ke ala mai keia owawa aku, e like me ka'u i kauoha aku ai?

            Ua malama no wau i kau kauoha me ke kuihe ole, e like me ka hiki ia'u ke pale aku i ka huina lehulehu he nui o na kanaka powa, e kuu haku, aka, ua hiki ole ia'u ke ku hookahi aku imua o lakou he nui. Ua lalau no au me ka wiwo ole a puhi i ka o-le, ia lakou i lele like mai ai maluna o'u, aka, ua loaa mai la au i ka hauna laau a kekahi o lakou, a haule aku la au ilalo; ua loaa ae i kou mau koa Delakasiana he elua mau ilio inu koko e waiho make ana ma ko'u wahi kiai. O keia moali e alina nei ma kuu lae, mai ke alii Powa mai no ia. Ina e halawai hou aku ana kakou me ia, nani wale ka loaa ana ia'u he manawa e ana pahikaua pu ai me ia, wahi a Donala.

            Ina wale e loaa ana ia kakou e ke koa, wahi a Beriana. Aka, ua nele au i ka ike ana i kona wahi i pee ai. Owai o oukou e hiki ke hoike mai ia'u i ke ano o kona pakele ana mai ke keena hoopaa mai o ka halealii i keia po, oiai oukou e lawe ana iaia?

            E ka Moi, wahi a kekahi o na koa, ua palemo maoli no ke alii Powa mai o makou aku, ia makou i komo aku ai iloko o ka ululaau e kokoke ana i ka halealii; ua alualu aku la makou iaia iloko o ka ululaau, a e imi hele ana makou iaia, a lohe mai nei i ke kani kuakolu a ka leo o ka o-le, awiwi mai nei makou ianei.

            E ka poe hohe wale, a haalele i kela alahele maluna me ka malama ole ia i keia po, aole kekahi o oukou e holo pu me a'u no Clontarf; wahi a ka Moi Beriana me ka leo hehe. Pela pu hoi me ka poe i hookuu aku i ka enemi mai ko lakou mau poho lima aku. E hoani ae i ka oukou mau lamalama maluna o ka iliwai, a o oe e ke koa opio ke kilo aku ma kela kapa o ka muliwai, no ka mea, he ikaika kou mau panana ike i ko'u. He wahi lihi ike aku anei kahi ou no lakou?

            E ka makua, aole he ike ia aku, wahi a ke koa Mahone, iaia i pakii iho ai ilalo a nana aku la i kela aoao o ka muliwai. Aole a'u mea e ike nei, koe wale no na lau nahele ma kela aoao.

            E nana aku malalo o ka muliwai, malia aia nui malaila, wahi a Beriana.

            E ka makua, e ka makua! wahi a Mahone, ke ike poaeae nei au i kekahi mea e panee malie ae la. Ano, ua moakaka lea ia'u, he waapa me na hoewaa.

            He waapa me na hoewaa! wahi a Beriana me ka leo pihoihoi. Mao Sana Paterika la, ua lawe kolohe aku lakou i ko kakou waapa mai kahi hoopae waa aku. Ua maopopo ia'u ano ke kumu i hikiwawe ai ka hiki ana o ke alii Powa i keia ana, iaia i pakele aku ai mai ko'u mau koa lomaloma aku. Ano, e awiwi aku oukou no ke alahaka o Kilimala e halawai pu me lakou.

            Oiaia o Beriana e paa ana no i ka lamalama ma kona lima, komo koke aku la oia iloko o ke ana a hoea aku la i kahi o kona lio e ku ana.

            Ukali aku la o Mahone, Donala a me kona mau koa mahope ona me ka awiwi nui, a holo aku la ke kaoo lio ma kahi ala oiki, oiai hoi na leo kahea o na o-le e wawalo kupinai hou ana iloko o ka ululaau, e hoike ana i ka lohe i ka poe i lohe ole, e komo pu iloko o keia huakai aluaiu i na enemi.

            Oiai ka waapa o na powa e holo ana me ka pakika ilalo o ka muliwai, e haalele hope ana i na o-lae a me na uhakee, ua hoonee mua ia ka holo oia halelana e ka ikaika o na mapuna hoe a na hoe waa eha wale no, oiai hoi ke alii Powa a me na 'lii Denemaka e ki-pu hoolai malie ana mahope, me ka hoolono ana i na ikuwa ana o na leo ohe iloko o ka ululaau.

            Ua ike ia ko kakou ala i pakele ai, wahi a ke alii Powa, a ke awiwi nui ae la lakou no ke alahaka o Kilimala e halawai pu me kakou. Nolaila, moe ia imua e na pokii, no ko kakou ola a me ka lanakila. A hala ia kakou ke alahaka, alaila, ua hiki ia kakou ke hoino aku ia lakou a pau loa. Mao ke ahi hemolele la e na 'lii, ua loaa ia kakou ka waiwai nui no keia lei gula, a koe wale no ko kakou lili i kela opio hehena. Ina e komohia ana oia a me kona ukali iloko o kekahi o na ulia i ike ole ia o keia po, alaila he uku kupono ia nona.

(Aole i pau.)

           

Na Kanawai o ke Ola Kino.

Hoomakaukau ia Mamuli o ke Kauoha a ka Haholelo o 1878, ma o ko lakou Komite la ka Hon. W. M. Gibson, Hon. W. R. Castle, a me His Ex. J. M. Kapena.

 

MAHELE II - HELU 20.

Hooponopono i na mea Ai a me ka Hooikaika i ke Kino.

           

            Mai ka mea ai a ke kanaka i ai ai i loaa ke koko a pau loa. Ma o kela a me keia apana ai i komo i ka waha i mahuahua ia'i ke koko, aole hoi i lilo ka mea i ai ia ma ke ano e ae. Nolaila ina ua nui kupono ole ke koko maloko o ke kino, a ma kekahi wahi paha o ke kino, a no ia mea ua mai a ua eha paha, alaila e hoomaka kakou ma ke kahua a e hoole, aole e hana hou i koko ma ka hoole ana e ai i ka ai; a no ka mea, o ke kanaka makua ua ai a ua inu he mau paona iloko o ka la hookahi, nolaila ua akaka, o ka hooki ana i ka ai oia ka mea e hoopau koke ai ka hana hou ana o ke koko. Oia wale no ke ano lapaau a na holoholona naaupo i hana'i ia lakou iho. Ina he mai ko kekahi holoholona, kona hooki iho la no ia i ka ai, a ai pakiko paha, a nolaila he kakaikahi na mai iwaena o na holoholona, a o ka make o lakou no ka pepehi ia a no ka elemakule paha.

            Ina i hoopau ia ka hana hou ana o ke koko o ke kanaka i mai mamuli o ka hooki ai, alaila ua hoemi ia ke koko iloko o ke kino holookoa i kela a me keia sekona o ke ola ana o ke kanaka; no ka mea, e lawelawe mau ana na puu io o ke kino i kela a me keia sekona oiai o ke ola o ke kanaka. O ka lakou hana, e hoemi i ke koko e holo ana mao o lakou, e like me ke ake i hai ia mamamua aku nei. A o kekahi o keia mau mea oia na puu paa, hookahi paona a oi aku o ka la hookahi i hoopau ia malaia; oia like no me ke ake; ma o ka ili la, ma ke ano he hou, hookahi a elua paha paona i ka puni ana o na hora he 24; he mau wahi e ae e hoopau ia'i ke koko o na pepeiao me kona kokuli; ka wai o na maka, o ka upe o ka ihu-- ua mahuahua keia mau mea iloko o na hora 24, nolaila ina e hooki ai ke kanaka no ka hookahi, e emi ana kona kaumaha hookahi a elua paha paona, o na ano wai i hai ia ae la, a o keia mau ano wai ua hoolawe ia noloko ae o ke koko, a nolaila na hoemi ia ka nou o ke koko he mau paona mamuli oia ano mau o ke kino, na ke kino e kokua iaia iho e pono ai, ma ka hoopau i ka makemake i ka ai, a i kekahi mamawa ua hoopailoa i ka ike ana a me ka honi ana i na mea ai.

            A nolaila, aole he mea paakiki ka hooponopono ana i na mea ai, no ka mea, na ke kino iho i kuhikuhi i ke ano e hooponopono ia'i. Aka, na ke kanaka e kokua i ke kino ma keia mea ma o kona naauao, a e imi i ana e ae e hoemi ia'i ke koko iloko o ke kino, a e hoopau i na mai a me ka eha, ma ka Hookiaika Kino.

 

OLELO HOOLAHA

E.O. HALL & SON.

(E. O. HOLO MA.)

 

NA MEA KUAI I NA MEA MAHIAI,

Na Lole, Na Pena, Na Aila, a me

Na ano Lako e ae a pau he lehulehu wale.

846 Kuhio Alanui Papa me Mei.        ly

He Nui Anei Kou Makemake i na

Mekini Humuhumu Lole?

O

KAKELA A ME KUKE.

A malaila oukou e ike ai a makaikai i na ano

MEKINI A WHEELER a me WILSON,

mai ke $40 a hiki i ke $50 ke kumukuai o ka mea hookahi.

Ka MEKINI a SINGER,

ma ke pakahi, a me ke ano

MEKINI  a WILCOX me GIBBS,

ma ke $30 a hiki i ke $50 ke kumukuai.

            I mea e pau ai ko oukou kanalua e na Makamaka no ke kupono o keia mau ano Mekini, e naue mai no me ke kuihe ole, a e ike no oukou iho. 862tf

 

Kauka O. S. Cummings, M.D.

HOMEOPATIKA.

Oia ke Kauka i kamaaina mua ia oukou e na kanaka Hawaii ma ka inoa.

"KULU WAI LIILII"

Ua hoi mai nei oia, a e pahola hou mai ana oia i kona akamai lapaau ia kakou. Aia kona Keena Lapaau a me kona wahi noho i keia wa ma kahi o Mr. Wm. G. Irwin, ma ke kihi o na alanui Papu a me Beretania, ma keia aoao aku o ka luakini o Kaukeano. 888 tf

 

ANO NO I LOAA MAI NEI!

Na Kaa Lio

Holo Lealea!

Na Kaa Lawe Ohua a me na kaa holo palua, mau mea hoikeike aku, mai ka Hale Hana Kaa mai o ka Hui o Cortland ma Nu Ioka.

DILLINGHAM & Co.,

876 tf  Na Agena kuai ma Hawaii nei.

 

Ke papa ia aku nei na kanaka a pau aole e komohewa a lawe wale a hoopoino i na mea ulu, a kukulu wale a hookuu wale paha i na holoholona a komohewa paha ma ke ano e a'e maluna o na aina ponoi a me na aina i hoolimalima ia e ka Hui Mahiko o Waihee, Maui. O ka mea hookuli i keia hoopii koke ia ao e like me na Kanawai o ka Aina, nolaila o ka hoolohe loa ka pono o pilikia auanei.

JAMES MAKEE & CO.

Waihee, Maui, Sept. 7, 1878   910 6m 933

 

NA PAHU HAO WAI KUAI.

EIA makai o Ainahou he 55 mau Pahu Wai Hao huinaha no lakou na galani wai pakahi he 500, a me hookahi waapa nui nona na tona he 12 me kona mau pono a pau, e kuai ia aku ana ma ke kumukuai haahaa loa i ka poe e makemake mai ana e kuai. E ninau ia CHARLES LONG.

            Honolulu, Sept. 18, 1879.       929 1m

 

AINA KUAI A HOOLIMALIMA.

HE Kanalima Kumamaono eka aina ma Iwilei. (Makai iho o ka Halepaahao.) He Loko I-a, Aina Kalo, Aina kau Paakai, aina kula a me ke kai. A me kekahi mau eka aina ma Peleula, he aina kalo, aina kula a me ke kai. He oluolu ke kuai ana. E ninau ia J.H. CONEY, (Koni).

Honolulu,        865 tf

 

KO BIHOPA MA

BANAKO MALAMA DALA!

E MALAMA NO MAUA I KE DALA O na kanaka maloko o ka Banako, penei:

            Ina hoomoe mai ke kanaka hookahi i na dala $300 a emi mai paha, alaila, e uku maua i eono hapahaneri ukupanee makahiki, mai ka la o ka lawe ana mai a hiki i ka la o kona ohi ana, ke waihoia ke dala hoomoe i ekolu malama a keu paha. Aole ukupanee e helu ia no ka hakina o ke dala hookahi, aole no hoi no ka hapa malama.

            Ina ohi koke oia i kana dala, aole i hala na malama ekolu aole ukupanee.

            Ina i manao ke kanaka e ohi i kana dala, e pono ke hoike e mai oia ma ka Banako i kona manao ohi, i kanakolu la mamua o kona ohi ana, a o kana Buke kekahi ke laweia mai.

            Ma ke kikoo wale no a ka mea dala e haawi ai i kana, a o ka Buke kekahi ke laweia mai.

            Ma ka la mua o Sepatemeba i keia makahiki a i keia, e houluulu ai i ke dala, a e huipuia ka ukupanee me ke kumupaa o na dala i hoomoeia no na malama ekolu a keu, a mahuahua, ke mumupaa e loaa i ka ukupanee.

Ina oi aku ke dala hoomoe mamua o $300, alaila, hooholo pu ka olelo.

            E weheia ka Hale Banako i na la hana a pau.

831 tf  BISHOP & Co.

 

DR. RODGERS,

OIA O

KAUKA LOKEKE.

Ua hoonee ae nei i kona keena oihana mai ka hale ae o Ailaene ma Monikahaae a iloko o ka Hale Mu, helu 54 Alanui Papu.

            Ma keia hope e hoomakaukau ana ke Kauka i kona mau Laau ponoi a puunaue aku i ka poe kii mai.

            O kona hale noho, aia no ma ka pa o ka Hotele Hawaii, ma kahi i noho mua ai.       881 tf

 

OKI MARE.

AUHEA oukou e ko'u mau makamaka mai Kohala a Hamakua, mai Kona Akau a Kau. E hele ana au ma ke Kaa Jure o Waimea iloko o Novemaba i loko no oukou, a ina ua makemake oukou e loaa ka palapa ia Oki Mare, e palapala mai la'u, e ninau ia'u i ka uku me na mea a pau e pili pu ana, no ka mea, ua haahaa ka uku i keia manawa.

D. H. HITCHCOCK.

Hilo, Iune 12, 1879                 915 @ 931

 

LIO KUAI.

HE Lio Kuai, he lio maikai keia a ua maa i ke kaao kaa, he ikaika, a he kupono loa no na kaa hon'ianalima. E ninau ia ma ke Keena Loio

o KAKELA    920 tf

 

S. B. DOLE.

LOIO! LOIO!

Huina o na Alanui Kalepa me Papu.

924 ly

 

WILLIAM O SMITH.

LOIO! LOIO!

 

Alanui Kaahumanu, Honolulu, Oahu.            913 ly

 

 

MAIKAI KA HOI KA PAPA!

A ME

KA LAAU O KOU HALE!

NO HEA LA?

KAI NO HOI NO KAHI O

WAILA MA!

Nana aku no hoi ia la

Ohi ka Io o ka Laau o Makawao

I ka ua mea hoi o ka nani o

Na PAPA! Na PAPA!!

A ME

NA PONO KUKULU HALE

O NA ANO NO A PAU.

 

Aia ma ke kihi o na

ALANUI PAPU me MOIWAHINE!

HONOLULU

MALAILA E LOAA AI

E LIKE me ka MAKEMAKE

NO KE

KUMUKUAI MAKEPONO LOA!

 

PAPA, PAPA, PAPA,

Na Papa Huluhulu,

Na Papa Manoanoa,

Na Papa i kahiia,

Pa Papa Kepa,

Papa Hole Keokeo,

Papa Hole Ulaula.

 

NA LAAU, NA LAAU

Na Kua,

Na Kaola,

Na Aaho,

Ne Moli

Na Peapea,

Pine Huluhulu.

Pine i kahiia.

 

NA Papa a me na Laau Ulaula!

Pili ulaula,

Pili Keokeo,

Pani Pūka,

Pani Puka Aniani,

Ipuka Aniani,

Puka Oleplepe.

 

PENA O NA ANO A PAU

Hulu Pena mai ka Liilii a ke Nui,

Aila Pena,

Aila Hoomaloo,

Wapiti, Pate.

 

nA LAKO O KELA A ME KEIA ANO!

Na Ami Puka Hale.

Na Ami Puka Pa.

ANIANI!

 

Pepa Hale a me na Lihilihi

E LOAA NO MALAILA

PAAKAI HELU I O KAKAAKO me PUULOA

 

            No ke DALA KUIKE. e loaa no na mea a pau i haiia ae la, no ke Kumukuai Emi loa. O na kauoha a pau mai Hawaii a Niihau, e loaa'ku ana ia lakou, e hooko koke ia no ia me ka lawa pono.

E Kipu Nui Italia, i ike i ka Oiaio

@