Ka Nupepa Kuokoa, Volume XVIII, Number 30, 26 July 1879 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

KA NUPEPA

Kuokoa me ke Au Okoa

 

I HUIIA.

 

No ka Makahiki, $2.  Eono Mahina, $1.

Dala Kuike ka Rula.

 

      IULAI 26, 1879.

HALEIWA.

 

      E hoomaha ana keia Kula i eono pule, a e hoomaka hoo ana ke Kula i ka la 14 o Augake, oia no ka Poaha.

      I ka wa e hoi mai ai na haumana, e lawe pakahi mai lakou i akahi kiaha aniani, akahi bola nui, i maona pono ke keiki, akahi pa paina, akahi bakeke, akahi aiana lole, i kopa, i pia, akahi baibala haole, i "Lei Alii" i Himeni Hawaii. Aole au e makemake i kekahi haumana e hoi mai me ka nele i ka moe laau, e hoi mai na haumana me kekahi dala kuai buke, malalo o ke ao ana a Miss. A. N. Royce.  E lawe mai i dala mahina hou.

      E hoi pau mai na haumana, i loko o ka Poakahi, Poalua, Poakolu ; a Poaha hoomaka hou ke kula i ke kakahiaka, hora 9, ua lawa na pule 6 no na mea a pau e makaukau no ke komo ana.

      Aole e komo hou ana na keiki kula la.  O na keiki Kula Hanai wale no.

      E hoomaikai ana na kamana i keia wahi i makaukau pono no ka noho ana o na haumana.  Mary E. Green, Kumu Kula.

      Waialua, Iulai 4, 1879.  920–4@.

 

Na Misiona.

Helu 24.

      Bulegaria. Mawaena ia o Tureke ma Europa. Malaila ke kaua nui o Rusia me Tureke. Nui ka hana ino ia'na o na Karistiano malaila mamua aku nei. Oia kekahi kumu o ke kaua.  Ua hoopau ia nae ia ma keia kaua ana.  Ua lilo paha ia i aupuni kuokoa.

      I ka hana ana o ka Aha aupuni i kumu kanawai no ke aupuni hou, ua paa loa ka manao, e holo keakea ole ia ka aoao Karistiano.  Aole make e koomaau ia, e keakea ia e na Mahomeda, e na bihopa Helene.  E noho like na aoao hoomana.  Aole loa e ae ke aupuni e hooholo i kekahi mea kue a keakea i ka hana a na ekalesia euanalio.  He mea keia e hauoli nui ai ka ekalesia euanalio.  He mea e huii nui ai ko Bulegaria ma ka pono io ma keia hope aku.

      Siama, ma ka hema o Kina.  Me ia no ke lii o Siama.  Aole loa oia e ae e hoomaauia, e hana ino ia kekahi lala o kona aupuni no kana hoomana.  Aole ae e papaia kekahi hoomana.  E hoomana na kanaka e like me ko lakou makemake.  I na makemake kekahi e huli mamuli o Iesu Karisto, pono no mai keakea kekahi ia ia.

      Ke kahu o ka ekalesia kokua ole i ko na aina e.  E imi ana kekahi Diakona i kahu no kona ekalesia.  Ua kuhikuhi ia kekahi kahu e makemake ana e hele i kahi e.  Ninau ka diakona, pehea kona ekalesia ? kokua anei i ko na aina e ?  Aole.  Ina pela, aole makou makemake ia ia.  Pehea na ekalesia Hawaii ?  He ekalesia kokua ole anei kekahi ?  Ina pela, aole anei he pono ke hoopau ia kona kahu ?

      Nui ka @e o ka Papa Misionari o ka ekalesia Lunakahiko ma Amerika, $62,558 ka nui.  E wiki e ala a hookaa ia aie, e ka ekalesia lunakahiko o Amerika.  Mai hoopanee, o wela mai ka inaina o ke Akua.

      Kauka Hu Mila no Sekotelani.  Ua noho oia ma Bomeba ma Hinedu he mau makahiki.  Nui kona aloha i na Pegana malaila.  Kokua nui oia i ke kukulu ana i hale kula kahuna malaila.  I ka wa e make ana oia, haawi oia $102,000 i mea e pono ai na misiona ma Hinedu.  E hoohalike na kauka ma Hawaii nei keia kauka.  E aloha a kokua nui i ko na aina e.

      Nani ke kokua o na kamalii me ka poe ui me Enelani, no ka Aha Misionari ekalesia Enelani.  Nui ka hana e na kamalii.  Ikaika i ka hana, i ka hele e noi, e ohi i ke dala kokua, me ka kuai i na mea e loaa'i ke dala.  Pehea ka nui o na dala i loaa ma keia makahiki i hala iho la ?  Eia $227,930.  Nui loa ea.

      Pehea na kamalii, na ui o Hawaii nei ?  Ehia dala i loaa, i haawi ia no na aina e ?  Kokua ole ea, ka nui o oukou.  E ala e imi, e noi, e haawi.  He hana maikai ia.

      Ka pule malama hou.  Ke malama ia nei anei ia a nui ma Hawaii nei ?  He halawai nui ia.  Pono ke hoalaia i na ua make.  A e hoomauia, ke malama ia nei.  He mea hiki wawe ke kokua i dala.  E hui pu ke kokua me ka pule.  I halawai okoa no.  E heluhelu ia ma ia halawai na mea hou no na misiona i pai ia ina ke Kuokoa.  Make hewa ke kokua ana, ke pai ana, ke heluhelu ole ia.  Lana anei ka manao o ka mea i luhi i ka huli a kokua i na mea no na misiona ke heluhelu ole ia ?

      " Owai ka'u e hoouna aku ai ?  Owai ke ae e hele aku no makou ?"

      He ninau misionari keia.  Ninau Iesu.  Ninau na Papa Misionari, ka Papa Hawaii.  Holo ka Hokuao, ka moku misionari i Maikonisia.  Aole nae he misionari hou.  Auhea?  Owai ke ala a ae, owau ?  Iloko o keia mau malama a hiki i Iune 1880, e ala kekahi poe a hoomakaukau e holo aku i Maikonisia ia makahiki.

      Guinealuna, Guinealuna, Kahakai Gula.  Ma ke komohana ia o Aferika.  Ma ka makahiki 1828, hele eha Misionari Geremania malaila, a hoomaka i ka hana misionari iwaena o na Negero naaupo me na kanaka keokeo.  Ma na makahiki mua he 10, aohe mea i huli mai.

      He mau misionari hou mahope iho.  Ikaika lakou i ka hana.  A hala na makahiki hou he 10, ua loaa he 40 karistiano negero ; 300 kamalii ma na kula.

      Mahope iho, he mau misionari hou he 30 ka nui, me 26 kokua kamaaina.  A hala na makahi hou he 10 ua loaa 385 hoahanau.  Mahuahua ke kihapai maloko.  Mahuahua ke kula.  Hookahi kula kahuna 20 haumana.  Mahuamua ka naauao, na oihana akamai, na hale maikai.

      Mahuahua hou no na misionari iloko o ka ha o na 10 makahiki.  56 misionari, 52 kokua kamaaina, 1,851 hoahanau.  Ua hoakea ia ke kihapai ma ka hikina, a maka akau.

      Ma ka 10 hope o na makahiki, oia hoi mai 1868 a 1878, he wahi kaua n@i ; a keakea ia i ka hana misionari mamua.  Aka, ua hoolilo ia ia kaua i mea e akea loa ai ke kihapai maloko.  Mahuahua na hoahanau, 4000 lakou, 89 kokua kamaaina.  Ua hoopau ia na kauhale ino a pelapela loa.  He mau kauhale ano haole na pani.  Mahuahua loa na oihana naauao.  Nui na misionari i make iloko o keia mau makahiki he 50.  Ma ke ano, a pani koke ia nae.  Ahonui makau ole i ka make.  Kauoli hoi kakou no ka nui o ka hua.

      Helene.  Aia no ia ma ka hema o Tureke ma Europa.  Ke aupuni Helene, me ka ekalesia Helene, keakea like laua i ka hana a na misionari euanalio.  Ano like ia me ka ekalesia Katolika.  Penei ka ke aupuni i hooholo ai no na kula.  E kaulia ke kii o ka Mesia ma kela, a ma keia hale kula, i aoia'i i na keiki Helene.  A e ao ia ka ui ekalesia Helena ma ia mau kula a pau, e kekahi kahuna Helene.

      Ke oki no ia o ke ao ana a na kumu euanalio ma na kula Helene.  He kahuanapule Helene no kekahi i huli i karistiano oiaio ; ku oia a holo i kahi e no Tureke e lilo ana nae ia Helene.  Ma kona noi ana i ke Komisina Beritania e uwao nona me ke aupuni o Beritania ma ka paipai ana i ke aupuni Helene e ae e ao oia ma na kula me ke keakea ole ia no ka hoomana, ua huhu loa Helene ia ua kanaka nei, a olelo ino loa me na olelo wahahee loa.  M. H.

 

We've a Home Over There.

Colonial Singer. No 208, p. 205.

 

1

He home maikai ma o ae,

Ma ka muliwai lai o ke ao.

A malaila na kini maemae,

A ku a memele a mau.

 

Ref.     Ma o ae — — ma o ae — —

            He home maikai ma o ae.

            Ma o ae, ma o ae, ma o ae,

            He home maikai ma o ae.

 

2

I laila na hoahanau,

I hala'e mamua'e i ke ao,

A memele a oli lakou,

A malu a ola mau no.

 

Ref.     Ma o ae, &c.

 

3

I laila Iesu kuu Alii,

Me na puali lani maikai ;

A iini no au la e pii,

A komo ia ao ma o ne.

 

Ref.     Ma o ae, &c.

 

4

Kuu home no ma o ae,

A ke hoea mamua o'u.

Aia no kuu mau hoa maikai,

Ke kiai a kakali no'u.

 

Ref.     Ma o ae, &c.

 

      Hawaii·

 

Haawina Kula Sabati.

HELU 6. SABATI AUG. 10, 1879.

KUMUHANA.

Na hua na ka uhane.  Pauku Baibala, Gal. 5; 22–26, 6; 1–9.

      22 Aka, o ka hua na ka Uhane, oia ke aloha, ka olioli, ke kuikahi, ke ahonui, ka lokomaikai, ka maikai, ka manaoio.

      23 Ke akahai, ka pakiko; aohe kanawai papa mai ia mau mea.

      24 A o ka poe no Kristo, ua kau aku lakou i ko ke kino, me na manao hewa, a me na kuko hewa ma ke kea.

      25 A i noho kakou ma ko ka Uhane, e hele hoi kakou ma ko ka Uhane.

      26 Mai manao kiekie kakou, me ka hoonaukiuki aku i kekahi i kekahi, a me ka huahuwa i kekahi i kekahi.

E na hoahanau, a i loohia wale ke kanaka e kekahi hewa, na oukou ka poe ma ka Uhane, e hoihoi mai ia ia me ka naau akahai; a me ka malama ia oe iho, o lilo hoi oe i ka hoowalewaleia.

       2 E hali oukou i na mea kaumaha a kekahi, pela oukou e hooko ai i ke kanawai o Kristo.

       3 No ka mea, i na paha e manao ana kekahi ia ia iho he mea nui oia, aole ka hoi ina ua hoopunipuni oia ia ia iho.

       4 Aka, e hoao iho kela me keia mea i kana hana ana, alaila iloko wale iho no ona kona kaena ana, aole iloko o hai.

       5 No ka mea, e halihali auanei kela mea keia mea i kona luhi iho.

       6 O ka mea i aoia mai i ka olelo, e haawi aku oia i na mea maikai a pau na ka mea nana i ao mai.

       7 Mai kuhi hewa oukou, aole ke Akua e hoomaewaewaia'ku; no ka mea, o ka ke kanaka lulu, o kana hoi ia e ohi mai.

       8 No ia mea, o ka mea e lulu ma kona kino iho, no ke kino ia e ohi auanei i ka make; aka, o ka mea e lulu ma ka Uhane, no ka Uhane ia e ohi auanei i ke ola mau loa.

       9 Mai hoopalaleha kakou i ka hana maikai; no ka mea, i ka wa pono e ohi auanei kakou, ke hoonawaliwali ole kakou.

      Pauku Gula.  Gal. 6; 7.  Hopaa naau.

      Mele.  " Kena Iesu," Lei Alii, aoao 17.

      Pule i loaa na hua na ka Uhane.

Ka Wehewehe me ka Ninau ana.

      He buke hou keia o Galatia.  Aole i kula ia mamua.  He aina o Galatia ma Asia Uuku.  Malaila Paulo ma kona kaahele ana.  Me he la ua noho oia ilaila me ka mai i kekahi manawa, mok. 3; 13.  He poe hoomanakii ko Galatia mamua.  He poe Iudaio nae kekahi malaila.  I ka Paulo haiolelo ana, ua huli mai kekahi poe.  Ua manaoio ia Iesu.  Ua kukuluia he ekalesia malaila.  He ekalesia ikaika ma kinohi.  Nui ke aloha ia Paulo.  Mahope iho nae ua emi ke aloha.  Ua hoi i hope kekahi.  Ua alakai hewa ia e na kumu Iudaio.  Nolaila keia palapala a Paulo ia ekalesia, e hai aku ana i ko lakou hewa, e ao ana, e paipai ana, e hoike ana i na hua na ka Uhane.

      Heaha la na hana na ke kino ? mok. 5; 19–21.  Nui anei ia mau hana ma Hawaii nei ?  Aia anei kekahi maloko o na Kula Sabati, a maloko o na ekalesia ? a maloko o na ohana ?  Heahea hoi na hua na ka Uhane ? p 22–23.  Hai mai ia mau hua.

      1 Ke aloha.  Heaha ke ano o ke aloha ?  I Kar. 13; 4–7.  2 Ka olioli.  Heaha ke ano o ka olioli ?  E hana me ka olioli, pule, hele i ka halawai, i ke kula, kokua, hana a luhi no ka pono, no ka Haku, me ka olioli, hauoli ke hana ino ia no ka malama ana ia Iesu; hauoli iloko o na pilikia.

      3 Kuikahi.  Heaha ke ano ?  Kuikahi me wai ?  Me ka hewa anei ? me ka poe hewa anei ?  Me ka diabolo anei ?  Me ka manuahi anei ?  Pehea ke hui a kue me ka poe hewa?  Pehea na kumu me na haumana ?  Na kahu me na hoahanau ? nana ma Rom. 12; 18.

      4 Ke ahonui.  Heaha ia ?  Ahonui ma ke aha ? ma ka hana hewa anei ?  I ka hewa anei ?

      5 Ka lokomaikai.  Heaha ia ?  Lokomaikai anei i ka poe hana ino mai, hoomaau mai enemi mai ?  Rom. 12;20.  Mat. 5; 44.

      6 Ka maikai heaha ia ?  Maikai ma ke aha ? ma ka olelo, ma ka hana, ma ka manao.  Ua like paha ia me ka hemolel.

      7 Ka manaoio heaha ia ?  Manaoio ia wai ? a i ke aha ?  Manaoio ia Iesu kekahi, a i ke kanaka, i kana olelo kekahi, oia hoi ka manao oiaio i ka ke kanaka.  I Kor. 13; 7.

      8 Ke akahai heaha ia ? akahai i ke aha ? ma ke aha ?  Kue ia i ke aha ? i ka huhu, me ka paupauaho.  Nana Mat. 5;5.

      9 Ka pakiko heaha ia ?  Pakiko ma ke aha ? ma ka ai ana, ma ka inu ana, ma ka hana, ma na lealea.  Mai hoonui, mai hoonuu.

      He kanawai papa anei i keia mau mea?  He kanawai papa anei i na hana ma ke kino, ka moekolohe, hookamakama, &c ?  Pehea ke kanawai o ka aina e ae ana i na laikini i ka poe hookamakama ?  Kue loa ea i ke kanawai o ke Akua.

      P 24  Ka poe no Kristo, owai lakou ?  Ua aha lakou i ko ke kino, na manao hewa, na kuko hewa ?  Ua kau ma ke kea, heaha ia ?  Ua pepehi, ua kinai loa ia ia mau mea.

      P 25  A i noho kakou ma ko ka Uhane, mamuli o ka Uhane, mamuli o kona kuhikuhi ana, pono no ke hele e like me ke kuhikuhi ana, e hoohua mai i na hua na ka Uhane, me ia maluna.

      P 26  Heaha na mea i papaia ?  He mau mea kue ia i ke aha ? i ka noho haahaa, akahai, aloha, &c.

      Mok. 6; 1  Heaha ka pono ke loohia ia kekahi hoahanau i ka hewa ?  Owai ka poe ma ka Uhane ?  Ka poe kupaa, e hoohua mau ana i na hua na ka Uhane.  Lakou ke aha i ka mea i hewa ? me ka malama o lilo oe i ke aha ?  Nana I Kor. 10; 12.  pehea hoi ka Iesu ao ana mai ma Mat. 18;15–17?  Ke hana nei anei kakou pela ?

      P 2  Heaha ke kauoha ?  Heaha ke kanawai o Kristo ?  Ke aloha paha, kekahi i kekahi ma ka halihali ana i na mea kaumaha, i na luhi pono, i na hana e pono ai, e uwe pu me ka poe e uwe ana, &c.

      P 3  Pehea ka mea e manao ana he mea nui oia, he mea kiekie, hanohano, he alii paha, a pono ole ke kokua i ka mea kaumaha ?  Hoopunipuni oia ia ia iho, heaha ia ?  Ma ko ke Akua nana ana, ua like na kanaka, aole oi, aole emi, he mau hoa like.  kuhihewa na lii, ka poe hanohano, he poe oi lakou.

      P 4  Heaha ke kauoha ?  E hoao, e nana ke kanaka ia ia iho, e nana i kana hana.  Kupono anei i ka ke Akua olelo ? kupono anei i ka mahalo ia ? ina pela, na ke Akua e mahalo.  A hiki ia ia ke kaena, ke hauoli iloko iho ona.  nona iho no ia hauoli, aole no hai.

      P 6  Pehea kela me keia mea ?  Pehea i ku like ai keia pauku me ka pauku 3 ? penei: No na kaumaha kino, no na luhi pono, na kaumaha naau ka pauku 3.  Na kaumaha ma ka pauku 5, no na hoopai ia, na poino ma kela ao.  E hoopa@ia ke kanaka no kona hewa iho, a nana no e halihali ia hoopai ana me ke kokua ole ia mai.

      P 6  E ahaia ka mea nana i ao ?  Pono ke uku ia na kumu, na haiolelo, na kahu ekalesia.

      P 7–8  Mai aha ?  Aole ke Akua e aha ia'na ?  Mai kuhi oe, he kanaka pono oe oiai oe iloko o ka hewa, a manao e hoopunipuni i ke Akua, a komo malu oe iloko o ka lani.  I na lulu oe i ko ke kino, i ka hewa, heaha kau e ohi ai ?  I na lulu i ko ka Uhane, i ka pono, e ohi i ke aha ?

      P 9  Mai aha kakou ?  I ka manawa hea e ohi ai i ka hua, i ke ola mau loa ? ke aha ole nae kakou ?  Owai ka mea e ola mau ana ?  Ka mea hoomau e hiki ihea ?

      Hai like mai i ka pauku Gula.

      Mele, " Mao, mao."  Lei Alii, aoao 21.

      Pule i ala i noonoo, i hoao, i malama o kuhihewa, o hoopunipuni kekahi ia ia iho, a a haule iloko o ka po.

      Haawina ao Aug. 17, Epeso 6; 10–20

 

HE HAIOLELO NA

Rev. H. H. PALEKA.

—MA—

KAWAIAHAO, IULAI 13, 1879.

E Pale i na Hoowalewale.

" E kuu Keiki, ina e Hoowalewale mai ka Poe Hewa ia oe, mai ae aku." —Na Solomona, I: 10.

      He olelo keia na ka Moi naauao o ka Isaraela; he olelo ao na ka makua aloha ia kana keiki.  O Solomona, ka mea i hoao i na lealea a me na hewa he nui wale, a i ike no hoi i ka lapuwale o ia mau mea, ke haawi mai nei oia i olelo alakai, me he makua la e hooikaika ana i ke kaiki i aloha ia no ke pale ana aku i na hana hewa.

      He mea pono ke lawe mai kakou a e noonoo no kekahi mau hoowalewale e hele nei maluna o ka aina i keia wa, a he mau mea no hoi e hoopoino ana i kanaka.  Ke hoao ia nei ka lahuikanaka i keia wa me na hoowalewale ikaika loa, i ike ole ia iloko o na kau i hala.  Me ka mahuahua ana mai o na pomaikai mawaho mai, ka waiwai, ka naauao, a me na kanaka o na aina e mai, pela no hoi i mahuahua pu ai na mea keakea i ka pono me ka maluhia iwaena o ka lahui.  A me ka ulu ana mai o keia mau hoowalewale, pela no hoi i emi aku ai na koo a me na kokua o ka pono iwaena o kakou.  He oia mau no ke aloha o ke Akua, a me na kokua ana o Kristo a me ka Uhane Hemolele, ke kokua mau nei no me ka poe i hookipa Iaia.  Aka, o na kokua o ka pono i ike maka ia a i hilinai nui ia iloko o na kau i hala, aole kekahi mau mea o lakou ua nalowale.

      Oia kekahi kumu o ka nawliwali o kekahi poe ma ke pale ana ina hoowalewale a me ka hapai ana i na hana pono.  O na alii pono o na kau i hala ae mahope, e alakai ana i na makaainana ma ka hana pono, a e hapai pu ana me lakou iloko o na hana maikai, aole lakou i keia wa; ua lawe ia lakou mai o kakou aku, a ua nele ka aoao o ka pono ia mau kokua.  O na kumu kahiko o kakou, na makua misionari, e noho ana i na wa i hala iwaena o ka lahui mai Hawaii a hiki aku i Kauai, he kokua ikaika loa lakou no ka lahui ma ke pale ana i na hana ino, a me ka hooikaika ana no na hana pono.  Aka, aole ka hapa nui o ia poe makua i keia wa.  Ua lawe ke Akua ia lakou i kahi e maha ai.  Ua hele pu lakou me na alii pono a me na makaainana pono, a ua nele ka pono i kela mau koo.  Ina e nana kakou i keia ekalesia o Kawaiahao, ua maopopo he lehulehu no na koa ikaika o ka pono iloko o na makahiki pokole i nui hope ae nei, a ua haule aku lakou mai waena aku o ko kakou heluna o ka honua nei.  He poe hoa'loha a he poe hoa lawe hana pu me kakou iloko o ke kihapai a ka Haku; aka, i keia wa ua hoonele ia kakou, aole ko lakou mau kokua pu ana me kakou.  Aia kela wahine haipule o Kapalama, o Kekai, ua hala.  O Umalele ko Waikiki; Koa. Kawelohealii a me Kanui o Moiliili; Ehu, Lima, Pine a me Kala@a o Manoa, Alika Daniela, Kauhi, a me Kila o Makiki; a iloko nei o ke kaona o Kapule, Kaihumua, Pahau, Kekuanaoa, Ioane I:, a me kekahi poe e ae.  He poe hoahana lakou iloko o ka pono a ka Haku, a he mau makua lakou no kekahi poe e noho ola nei.  Aka, aole ko lakou mau helehelena me kakou i keia wa.  Ua hana lakou oi kau ka la, a ua napoo ka la, ua pau ka wa hana.  A ke manao nei au e like me ko kakou ike iwaena o kakou iho, pela no iloko o na ekalesia e ae a pau; ua lawe ia na hoa hana kahiko iloko o ka pono, na koo o ka pono iwaena o ka lehulehu, aole hoi i paa pono ko lakou mau makalua.  A no ia kumu, i ka hiki ana mai o na hoowalewale iwaena o kanaka, aole kakou i lawe pono me na kokua i ike maka ia no ke p@e ana i na hana ino a me ka hookupaa ana maluna o ka pono.

      Heaha kekahi mau hoowalewale e hoohalawai nei me kanaka i keia wa ?

      1.  O ka puni lealea, oia kekahi mea e alakai hewa nei i ka manao o ka lahui i keia wa.  O keia ake lealea, ua hele maluna o ka lahui holookoa me he kai mimiki la, a ua hoopuni ia ko kakou poe opio a me na poe o@ me na hana e pili ana no na mea lealea wale no.  Me he mea la, ua poina i ka lehulehu ka lawe kupono ana i na hana lealea, me ka malama ana i na rula kupono o ia mau mea, a ua holomoku ka manao o kanaka iloko o na lealea kino me ka ike ole aku i ka palena.  O ka heihei lio ma Waikiki, a ma na wahi e ae no hoi, ua lawe pu kanaka me ka pili dala, ka ona a me na hana e ae i kupono ole i ka noonoo pono o ke kanaka.  O na keaka e lawe ia mai nei a e kukulu ia nei ma keia kulanakauhale, a ma kekahi mau apana e ae o kakou, ua kauo ia mau hana i ko kakou poe opio iloko o ka inu ana i na waiona, ka hakaka ana, ka auwana wale ana i ka po, a me na hana pono ole e ae he nui wale.  O ka pepa piliwaiwai e hana mau ia nei ma kekahi mau kauhale, he mea ia e ino ai ka lahui, he makua no na palaualelo, a he mea hookahuli i na manao maikai o ke kanaka; e hoolapuwale ana i ka lahui kanaka, a e hoohilahila ana i ka inoa maikai o ka poe lawelawe iloko oia mau hana.

      2. O ka puni ona, oia kekahi o na hoowalewale ikaika o keia wa.  Ke laha nei keia hana mawena o ko kakou mau mokupuni e like me ka laha ole ana mamua.  He mea loaa wale no na waiona i ka poe e makemake ana.  O ka poe i inu ole mamua ke inu nei lakou i keia wa; a ua komo keia hana iloko o na ekalesia.  O keia la ho@no, he la inu mea ona ia no kekahi poe.  Ma kekahi mau apana, ua hele mai @a o@a a hoopa, a keakea i na hana hoomana i ke Akua.  He mea kaumaha keia ke hai aku, ak@ o ka o@o no keia.  A ma keia e ike ai kakou i ka ikaika a me ka a@ maoli no o keia hoowalewale.  He mea hilahila no ka poe maikai ka hele lanakila ana o ka poe ona iwaena o kekahi hapa o kakou.  He oiaio, aole i pau loa kakou iloko o keia hana lapuwale, ke kupaa nei kekahi poe.  Aka, @e hookeke ikaika nei keia mea i ka poe pono.  Ua hoopuni ia na poe opio me na hoowalewale no ka inu ana i na mea ona.

      3. O ka hehi ana i ka maluhia o ka la Sabati.  He oiaio aole i ino loa kakou elike me kekahi mau kulanakauhale ma na aina e.  Aka, o ka maluhia o ka la o ka Haku i keia wa, aole i like me na makahiki i hala ; he malu i oi iloko oia mau la ; he la hoomaha ia, a he la hoano, e like me ka olelo a ke Akua.  Ke hookahuli ia nei kela ano maikai o ka la Sabati, i la lealea wale no : i la ahaaina me ka hooholo lio a me na hana kue i ka maluhia o ka lehulehu.  Ma Honolulu nei, ua halawai ko kakou poe opio, a me na makua kekahi, me na hoowalewale i kela a me keia pule, e kauo ana i ko kakou mau manao e haalele i ka hale o ke Akua, a e hele aku mamuli o na laelea kino me ka hoopoina i na hana kupono no keia la.

      Oia iho la kekahi mau hoowalewale ikaika a'u i ike ai, a ua ike pu no kakou a pau, a he mea pono ia kakou ke noonoo akahele no keia mau mea.  Ka puni lealea, ka puni ona a me ka hoowahawaha i ka la Sabati, he mau hoowalewale keia ekolu e hoao nei e kulai i ka pono o ka aina, a e wawahi i ka maluhia o na kanawai o ka aina a me na kanawai o ke Akua.  Ina e lanakila keia mau mea ino maluna o ka lahui kanaka, heaha ka hopena ?  He mea hiki ole ia kakou ke helu i na poino e ukali ana mahope o ka lanakila o keia mau hewa maluna o kekahi lahui kanaka.  He ino ka mea maopopo, he he ino no ka lahui.  Ua maopopo keia ma na moolelo i ike ia ma na aina e, a ma ka olelo a ke Akua, a ma na mea no hoi a kakou e ike maka nei ma kaia aina kulaiwi o kakou.  O ka hopena o ka haawi holookoa ana o ke kanaka ia ia iho mamuli o ka lealea, a me ka ona, me ka hana ino i ka la hoano o ka Haku, he hopena lapuwale ia.

      Pehea kakou e hoopale ai i keia mau hoowalewale ?  He mea maopopo loa no ka haina o keia mau ninau.  Ke i mai nei ke Alii naauao, " ina e hoowalewale mai ka poe hewa, mai ae aku."  O ka haina au a ka hoahanau e pane aku ai ka mea hoowalewale mai ia oe e hana hewa, oia no ka hoole aku, aole.  A i ka wa e hoowalewale ai ka mea hewa ia oe e ke keiki opio a me ke kaikamahine, e pane aku oe, aole.  Mai ku a paio aku me ka mea alakai hewa: mai nana aku i kana; mai hoolohe; mai hele pu me ia; mai hoolauna aku.  E hoole i ka hana hewa, a e kupaa ma ka hoole ma ka mana o ka Uhane o ke Akua, aole ma ke akamai o ke kanaka.  He kokua no kou e pono ai, oia o Kristo ka Haku.  Ua haawi mai Oia i kona inoa maluna ou, a ua kahea Oia ia oe i keiki nana.  E lawe mai oe i kaia olelo a kou Makua ma ka lani, i hoike ia mai ma o Solomona la, i lei no kou ai, a i kokua no ka la o ka hoowalewale : " E kuu keiki, ina e hoowalewale mai ka poe hewa ia oe, mae ae aku.

 

OLELO HOOLAHA.

 

KAKELA a me HAKI.

O KAKELA OPIO A ME F. M. HATCH, ua hui laua ma ka lawelawe ana i ka oihana Loio

      Ua hiki ia I@a ke ku imua o na Aha a pau, mai ka Aha Hoomalu a hele iluna.  A e lawelawe no hoi ma na hana pili i ka hooponopono waiwai, me ka imi ana i na Palapala Sila Aina, ka hana ana ia na Palapala Kuai, Hoolimalima, a me ka Hoaie Dala ana.

      W. R. CASTLE, Luna hoiaio Kope.

      Keena Hana, maluna ae o ka Halekuai o Dillingham & Co.

Helu 37, Alanui Papu.  3 6m@

 

ALFRED S. HARTWELL, [HAKAWELA.]

LOIO a he KOKUA ma ke KANAWAI!

Aia kona Keena Oihana maluna ae o ka Hale Baneko Hou o Bihopa ma.  867 tf

 

CECIL BROWN.

LOIO A HE KOKUA MA KE KANAWAI

A HE AGENA no ka Hoolalo ana i na Palapala no ka Mokupuni o Oahu.

      Helu 8. Alanui Kaahuman.  Honolulu. H. P. A.  2y

 

JNO. LOTA KAULUKOU.

LOIO A HE KOKUA.

Ua makaukau au e lawelawe i na hihia a pau o kela a me keia ano iloko o na Aha Hookolokolo a pau o keia Aupuni.  Ua hiki no hoi ke hana i na palapala a pau e pili ana i ka Oihana Loio me ka ele@. E loaa no au ma Heeia Koolaupoko, a ma Honolulu no hoi i kekahi manawa.  901 tf

 

EDWARD KEKOA.

He Loio no na Aha Kakau ole ma Hawaii.  Aia kona Keena Oihana ma alanui Waianuenue, ma o mai o ka hale hookolokolo o Hilo, o Nani Kaauea ka inoa.  E loaa no ma ke Keena mawaena o ka hora 8 am a me ka hora 4 pm., ke ole he pilikia e ae.  882 ly oc26

 

S. M. P. KALEO.

He Loio, he Kokua, a he Pale ma ke Kanawai.

No ka Aha Apana a me ka Aha Hoomalu o ka Apana o Wailuku, Maui.  E loaa no au ma Waiehu, Waihee, a i ole ma ka Hale Hookolokolo ma Wailuku.  884 ly no9

 

RICHARD F. BICKERTON, [PEKETONA.]

LOIO a he KOKUA ma ke KANAWAI!

E HELE ANA OIA IMUA O NA AHA HOOKOLOKOLO a pau o keia Aupuni ma na ana hihia a pau, ina paha ma Oahu nei, a ma na Mokupuni e ae.

      Ua makaukau mau ola i ka hana ana i na Palapala pili kanawai o kela a me keia ano.

      Ua hiki no hoi iaia ke hoale dala aku ma ka moraki ana ina alo@, @a ka @kup@ haahaa loa.

      E @ na hana me ka hikiwawe e ma ka uku haahaa.

      Keena hana, Helu 23 Alanui Kalepa, @i@ puka ma o aku o ka hale kauka o Kauka M@l@.  840 ly

 

WILLIAM O SMITH.

LOIO !  LOIO ! !

Alanui Kaahumanu, Honolulu, Oahu.  913 ly

 

PAPA, PAPA

AIA MA KAHI O

LEWERS & DICKSON

(O LUI MA.)

MA KE KAHUA KAHIKO MA

Alanui Papu a me Moi !

E LOAA AI NA

Papa Nouaiki !

o kela a me keia ano.

Na Papa Nani a Paa no ke Kukulu ana i na Hale!

Na Pani Puka, Na puka Aniani,

Na Olepelepe, Na pou, Na O~a,

Na Papa Hele, Na Papa Ku,

A me na Papa Moe nui loa

NA @ O KA HALE

O NA ANO A PAU.

Na Pepa Hoonani, Na Pena o na Wai a pau,

Na Kui mai ke Nui a ka Makalii,

Na Ami Puka, Na Ami Puka Aniani,

Na ami o na ano a pau.

Na Aila Pena, o kela me keia ano,

Na Aila Hoomaloo, he lehulehu wale,

Na Aila e ae o na ano a pau.

NA WAI VANIKI

—A ME NA—

WAI HOOHINUHINU NANI !

o na ano a pau loa.

NA BALAKI ANO NUI WALE!

A ke hai ia aku nei ka lono i na makamaka a pau, na makaukau keia mau makamaka o oukou e hoolawa aku ma na mea a pau e pili ana ma ka laua oihana

— NO KA —

UKU HAAHAA LOA!

E like me ka mea e holo ana mawaena o LAUA a me ka MEA KUAI.

E hele mai !  E na Makamaka ! !

A e lawa no hoi ko oukou makemake me ka oluolu a me ka maikai !

845 tf

 

A VALUABLE

MEDICAL DISCOVERY

Reuter's

Life

Syrup

(NURSE BERTRAND.)

LAAU LAPAAU

WAIWAI LOA !

—Oia—

KA WAI OLA A REUTERA.

He laau keia i imi ia a kekahi kahu mai kaulana, o Bertrand kona inoa, ua lawelawe keia kahu mai ma ka malama ana i ka poe mai no na makahiki he kanalima a oi ae, a o keia laau hou he mea i hanala noloko ae o na Lau Nahelehele a me na aa o na laau ulu o ka pahele i huiia, he ono ma ka ai ana, he ala ma ka honi ana, a he pumehana kona ano.  He laau hoonoha ikaika keia, me ka hoeha ole ana i ka pou a me ka hoopailua ole.  Aohe nawaliwali ka mai mahope o ka ai ana i keia laau, e like me ka naha l@o ana o kekahi mau laau e ae, he kupono no ke ai na keiki liilii a me ka poe nawaliwali loa me ka hopu ole.  @le laau hoola maopopo keia i ka opu paa, a me ka inoino o ka opu waiho ai, a me na mai a pau e pili ana i ka opu.  He laau hooikaika no hoi keia i ke AK@PAA, a he mea e no hoi ka hikiwawe o kona hoomaemae ana i ke koko, a me na mai a pau o ke kino.  No ka mea, mao keia laau la i hookuke ia aku ai na haumia a pau iloko o ke koko.  He like ole me kela na laau e ae, oiai e ai ana ka mai me na huaale hoonaha me la mau laau, aole hoi peneia.

Ka Wai Ola a Reutera,

Aka, ua lawa iloko ona na hoonaha ana a me na hoomaemae ana i ke koko a pau.

— A ME —

KO BARRY LAAU HOOLA EHA,

He Laau Hamo a he Laau Ai.

He laau hoola keia iloko o ka minute hookahi, E H@

A. W. RICHARDSON,

Oia o LIKIKINI Opeio, ka Agena @o ke@a mau laau no ke aupuni Hawaii.  916 3m 927

 

KALE KULIKA,

LUNA HOOIAIO PALAPALA KUAI,

Molaki, a me na palapala oia ano.

LUNA HOOIAIO PALAPALA

Aelike mawaena o na Haku me na Kauwa.

Luna Haawi Palapala Ae Mare

      Ma ke kihi o ke alanui Moiwahine me Kaahumanu, kulanakauhale o Honolulu, ko Hawaii Pae Aina.  906 tf

 

HOOLAHA.

UA makaukau ka mea nona ka inoa malalo iho, e kokua i ka poe e manao ana e

Kuai, Hoolimalima a Moraki Aina,

A no ka

Hoaie Dala Ana.

WILLIAM O. SMITH, Loio.

Honolulu, Iune 16, 1879.  916 3m 927