Ka Nupepa Kuokoa, Volume XVIII, Number 15, 12 ʻApelila 1879 — Page 4
KA NUPEPA
Kuokoa me ke Au Okoa
I HUIIA.
No ka Makahiki, $2. Eono Mahina, $1. Dala Kuike ka Rula.
APERILA 12, 1879.
Na Misiona
HELU 16.
Burema. Aia no ia ma ka hikina o ke kaio Benegala ma A sia Hema. He aina hoomana kii loa ia mamua. O Buda ko lakou akua kii nui.
He poe puni hoomana lakou. Ikaika na kahuna i ka hoomana. Pela hoi na kanaka. Aka, o na kanaka, hoohui lakou i na hana lealea me ka lakou mau hana hoomana.
Na manawa hoomana, oia ka manawa mahina hou me ka mahina piha, a me na la e pili ana ia laua, mai Iulaia Oketoba. Ma Oketoba, he wa hookahakaha ia he wa oli, a hula a ahaaina.
Nui na huakai hele, lehulehu loa kanaka mai o a o i hele ma ka aina, ma na muliwai maluna o na moku liilii, a hiki i kahi o keia mau lealea. Aia no ia ma Raneguna kekahi kulanakauhale o Burema. Ilaila ka heiau nui lua ole, i kapa ia. Ka Pagoda Gula. E ku ana ia mawaho iki aku o ke kulanakauhale ma kekahi puu uuku. O ke anapuni ma ke kumu o keia heiau, 1500 kapuai ; a o kiekie, he 300 kapuai ia. Nani wale kona puoa. Aia maluna o ka puoa, he mea me he mamalu la, he mea laa loa. Aia a kau keia mamalu ano gula maluna, o ke koke no ia o ke akua iloko, wahi a lakou.
Ke kaumaha o ke gula e pili ana i keia heiau, ua like ia wahi a lakou me ke kaumaha o kekahi 'lii nui kahiko o Burema. Olino loa ka piko o ka puoa me ka la, a me ka hiki ole ke nana'ku.
He mau kii heiau liilii maloko, a mawaho o keia heiau nui. He mau mea keia i waiho ia ma ka wawae ona, me he mau mohai la nana. He mau mohai kekahi, he mau mamalu pepa, mau hua, mau pua, he mau pule, he mau hoopohapoha ana o kalaka luaipele me ka paula, a he mau mea ano lapuwale loa e ae, ka i hookomo ia iloko o ka hoomana naaupo ana ia Buda.
He hana kupanaha kekahi i mea e loaa'i ka ua ke maloo ka aina, a e ane make ana na mea kanu. Aole o ka mohai ana i puaa eleele na ko lakou akua ia hana, aka, ua kapaia, he hooikaika kaua. Ua hihia he mau lala ano lope a loaa, he kaula uaua loa. Elua no aoao. Lalau kekahi aoao i kekahi welau o ke kaula, a lalau kekahi aoao i kekahi welau. E noho ana, he mau kahuna e nau ana i kekahi mea ano pilali, me ka heluhelu i na kanawai i kakau ia ma na lau niu. He mau mea hookui kekahi. Aia a kani na mea kani, o ka hoomaka koke no ia o na aoao elua e huki i ke kaula. Huki kekahi, a huki kekuhi, huki kue nae, a kani na mea kani, a paipai na kahuna.
A pela e aumeume ai na aoao elua io ia nei ma kekahi alanui, a aha? loaa anei ka ua ? Aole paha me ia hana naaupo loa e loaa'i ka ua. Na ke Akua oiaio o ka lani i hooua mai maluna o ka poe pono, a me ka poe hewa, e like me kona manao, a e like me ka manao io, o ka poe haipule ke pule lakou no ka ua.
A me ia no kekahi ma Burema. No ka mea, he mau misionari no malaila, mai 1813 a hiki i keia manawa. Nui na kula, nui na ekalesia, nui na kahuna pule maoli; ua unuhi ia ka baibala iloko o ka olelo Burema ; he mau tausani hoahanau. Aka, he mau miliona paha i koe ma ka hoomanakii ana. E pule ikaika no lakou i pau i ka hoohuli ia mai ma ka pono.
Roma. Kahi ia o ka hoomana pope. Hoomana Buda ma Burema. Hoomana Pope ma Roma. Nana i ke ano like. Ka La Karisemaka ma Roma Pope, oia hoi ka la hanau o Iesu. Ma na wahi Ka ristiano io, he la makana ia o na hoa no na hoa, o na makua no na keiki, o na keiki no na makua, a hoea mai he mea i kapa ia o Sanekalausa nana ka i makana mai. Aka nae, ma Roma Pope, he mau makana no ma ia la. O ka mea nana i makana mai, he luahine ia, o Bepana ka inoa ; ua kahiko ia ma ke ano o ka poe kahiko, he papale kahiko ma kona poo, he kakini nui ma kona lima i hoopiha ia i na makana, a nana no i makana i na keiki ma ke ano o Sanekalausa ia kakou. Nui wale na hana lealea, na mea hookani, a holoholo na kanaka, na kamalii, a piha loa i ka olioli.
O Saneto Bamebino. Mahope iho o ka la Karisemaka, ka hoomana ana ia Saneto Bamebino iloko o kekahi luakini. He mau anuu pohaku 100 e pii aku ai ka poe hoomana a hiki ilaila. He kii laau nui i pena ia, oia ua Saneto Bamebino nei, he hoailona ka ia no ke keiki o Iesu. Nui na Katolika i ike ia e kukuli hoomana ana imua o keia kii inoino, me he kii akua no Hinedu la.
Kona maka, he maka kikokiko, me he mai Hepera 'la kona mamua. He lei nani nae ma kona poo, a e moe ana ia maloko o kahi moe luliluli nani.
Ma na manawa e ae, ua malama ia keia kii ma kekahi keena i hoopaa ia i ka laka. Ma ka uku ana i ka poe malama e hiki ai ke ike aku o ka poe i makemake e ike. Aka, ma keia la, ua hoike ia ua Bamebino nei ma kahi akea, imua o ka lehulehu, ma ka uku ia nae. He mau hana ano keaka i hana ia ma kekahi awai loihi a laula ; o Be telehema, Maria, Josepa, Iesu ma kahi moe, na kahu hipa, ua hoike ia ma na ano kii. Nui ka lealea. Nui ke dala i loaa i ka poe i malama i ua kii nei. He hana makahiki keia ma Roma Pope.
Nohea hoi ua kii nei ? Na Luka ka i hana, a lawe ia i Roma e Paulo, wahi a kekahi. He moneka ma Ierusalemaka ka i hana, a iho mai, he mau anela a pena ia i ka wa e moe ana Iesu. Paa ka manao o ua Moneka nei e lawe ia kii i Roma. Lawe ia maluna o ka moku. I ka holo ana, kahuli ka moko, pau ka poe maluna i ka make. Pakele nae ua Bamebino nei. Lana ia a hiki i Legehona. Loaa i kekahi malaila, a laweia i Roma, a hoonoho ia ma ua luakini hooikeike nei. He mea oiaio ole keia.
Nui ka hoomana ana i keia kii. Kekahi lunahoomalu, ma Roma, haawi oia 24,000 dala i mea hana i kaa nani loa nona. Laa loa ia kaa nona. Makau na Pope i ka ee ma ia kaa.
He mana ko Saneto Bamebino ma ka lapaau ana i ka poe mai. Laweia ia ma ka hale o ka poe mai me na Moneka elua. Ola kekahi. I na ola ole, no ka manaoio ole ka, Ua haawi kekahi luna i kona kaa nani kahi e holo ai ua kii nei i na hale mai. Mamua ako nei no ia haawi ana. Mahea ka like ole o Roma hoomanakii, me Burema hoomanakii ? HARPERS WEEKLY, me N. Y. O.
Home at Last.
Go spel Hymns, No. 2. Hymn 98.
1 Eia au la ma ka lani,
Kahi home maikai o'u.
A ke ku nei a hoonani
I ka Haku ia Iesu.
Ref. Home lai a ao mau loa !
Pau ka auwana io ia nei.
Oli me koonei mau hoa ;
Maha me Iesu ke Lii.
2 Pau na hewa, pau na ino,
Pau na mea hookekee.
Oli au, ua lanakila,
Ua loaa ko luna lei.
Ref. Home lai &c.
3 Ua ola au ; me e ka nani!
Nani e na hoa nei!
Nani no ka mililani
O na kini maikai e!
Cho. Home lai, &c.
4 Eia au ke ku hauoli
Ma Ziona nani nei!
Kani mau na lira lani!
Maha, malu, pomaikai.
Cho. Home lai, &c.
HAWAII.
Haawina Kula Sabati.
HELU 4. SABATI APER. 27, 1879.
KUMUHANA.
Ka Hoola e hiki mai ana. Pauku Baibala. Isaia 42 ; l—10.
AIA hoi ka'u kauwa, ka mea a'u i malama'i,
O kuu mea i waeia, a ua olioli ko'u naau ia ia;
E haawi aku no au i ko'u Uhane maluna ona ;
A nana no e hoolaha ae ka pono no na lahuikanaka.
2 Aole ia e kahea, aole hoi e hoowalaau aku.
Aole hana aku a lohe ia kona leo ma ke alanui.
3 Aole ia e uhai i ka ohe pepe,
Aole hoi ia e kinai i ka uiki e pipi ana ; A hoolaha aku oia i ka pono oiaio.
4 Aole ia e pio, aole hoi ia e uhaiia,
A hookumu oia i ka pono ma ka honua nei;
A e kakali no na mokupuni i kona kanawai.
5 Ke i mai nei ke Akua, o Iehova, penei,
Ka mea nana i hana na lani, a hohola ae la ia lakou ;
Ka mea i hoopalahalaha ae i ka honua, a me kona mau mea ulu ;
Ka mea haawi i ka hanu no na kanaka maluna ona,
A me ke ea hoi i ka poe e hele ana maluna ona :
6 Owau o Iehova, ua hea aku au ia oe i mea e pono ai,
A na'u no e hoopaa aku i kou lima, a e malama no hoi au ia oe,
A e haawi no wau ia oe i berita no na kanaka,
I malamalama hoi no ko na aina e ;
7 E hookaakaa i na maka o ka poe makapo,
E lawe mai hoi i ka poe pio, mailoko mai o kahi paa,
A me ka poe e noho ana iloko o ka pouli, mailoko mai o ka halepaahao.
8 Owau no Iehova, oia ko'u inoa : Aole au e haawi i ko'u nani ia hai, Aole hoi ko'u hanohano i na kiikalaiia.
9 Aia hoi, ua ko na mea i olelo kahiko ia, A ke hai aku nei au i na mea hou : Mamua o ko lakou hiki ana mai, ke hai aku nei au ia mau mea ia oukou.
10 E oli aku ia Iehova i ke oli hou,
I kona nani hoi mai ka welau mai o ka honua:
Ka poe iho ilalo ma ka moana, a me kona mea i piha'i,
O na mokupuni, a me ko lakou poe e noho ana.
Pauku Gula. Mat.3;17.
Mele. Him. 137.
Pule no na haumana i paulele lakou ia Iesu.
Ka Wehewehe me ka Ninau ana.
He haawina pohihihi keia. Nui ka poe i hoao e wehewehe i ke ano. Okoa ka wehewehe ana o kekahi. Okoa hoi ka wehewehe ana o kekahi. Okoa na haina. E like me ka ninau helu pohihihi, okoa na haina o ka poe e imi ana. Nui ka hoopaapaa, a loaa ke ki, na ke ki e hoopau i ka hoopaapaa ana.
Ka mea hoopaapaa keia, ka'u kauwa, owai ia ke kauwa a Ieho va ? Elima haina. I Ka poe Isaraela, 2 Kuro. 3 Isaia. 4 Na kaula oiaio a pau. 5. Ka Mesia.
Aia mahea ke ki nana e hii i ka haina oiaio, a hoopau i ka hoopaapaa ana ? Pomaikai no kakou no ka loaa ana o ke ki. Aia no ia ma Ma taio 18; 14—21. Heluhelu i akaka ; I ko ae ka olelo a ke kaula a kaia i i mai ai, aia hoi kuu kauwa a'u i koho ai, kuu mea aloha. Heluhelu a pau ka pauku 21.
Ua akaka ma keia ki. Ka Mesia ke kauwa a Iehova ; oia ka haina oiaio.
Na Mahele o keia Haawina. 1. Ka mea e kakau ana. Owai ia ? Owai hoi o I saia ? kona makua ? Kana oihana ? Wanana oia ma na au o na lii hea ? Ehia makahiki mamua o ko Iesu hanau ana ? Pili kana mau wanana i na lahui hea ? He mau wanana no kekahi mau alii nui elua, he alii e lawe pio ana i na Iudaio, a he alii e hookuu ana i na pio, owai ia mau alii ? Owai ke kulanakauhale nui o ka mua? E aha ana ia, a e lilo ana ke aupuni ia wai ? Heaha ka haia wanana nui no kekahi wahine puupaa, a me ka inoa kupanaha o kana keiki? Owai kekahi mau inoa kamahao oia keiki? 9; 14. 9 ; 6.
Mahele 2. Na mea kakauia. Na olelo wanana a Iehova.
P. 1. Ka'u kauwa. Owai ia? u'aha ke Akua ia ia ? Inahea kona wae ana ia ia Mahea hoi kona malama ana ia ia ? Mamua paha o ka hookumu ana i ka honua ka wae ana, a ma ka lani ka malama ana.
Ua aha kona naau i keia kauwa ? Ma ka hooko ana ka manawa hea i olelo ai ke Akua, ka'u keiki punahele keia, ka mea a'u i olioli loa'i ? Hai mai i na manawa elua. E haawi ana ke Akua i keaha maluna o kana kauwa ? Heaha keia uhane? Ka mana paha e hana ai i na hana mana, e hoohuli ai i na kanaka mamuli ona. Heaha ka ke kauwa e hoolaha aku ai no na lahui kanaka? Ma o wai la hoi ? Mat. 28; 19, 20.
P.2—4. Hai mai na mea 7 i hoole ia aole hona keia kauwa, a hana ia iaia. A hoolaha oia i keaha ? A hookumu hoi i keaha? A kakali na mokupuni i keaha ? I ka wa hea ke ko ana? Mat. 12; 14—21. I ka wa i noho ai Iesu ma ka honua, a hana i na hana kupanaha, hoola i na mai, i na makapo, na lolo, a hoala i na mea make, me ke kaena ole, hooho ole, walaau ole, e papa ana, mai hai aku ia hai e aloha ana, kokua ana i ka poe palupalu nawaliwali, opiopio, oia na ohe pepe ana i uhai ole ai, me na uiki pipi ana i kinai ole ai, e hai aku ana i ka pono oiaio, i ka euanalio. Aole oia i pio, aole i uhaiia, aole oia i make, i pepehi ia a make ma ke kea mamua o kona hookumu ana i ka pono, i ka hoomana oiaio e ola'i ma ka honua, me he la, oia ke kanawai, oia ka mea nui a na mokupuni me na aina e e kakali ana e lohe, a e ike, oia hoi ka haina i ka ninau nui, Heaha ka makou e hana'i i ola makou ? Ua kali Hawaii nei a loihi loa i lohe oia ia mea. A ua lohe no. A ke lohe nei no. A, ua ola kekahi, a e ola'na kekahi. Aka, e pau ana ka nui i ka make no ka hookuli,
Mahele 3. Ka ke Akua mau olelo nona iho, a no kana kauwa.
P. 5—9. Heaha kana mau olelo nona iho ? na hana kupanaha ana no ka lani, no ka honua, no na mea ulu, ka hanu, ke ea ? Heaha kana mau olelo no kana kauwa ? kona hea ana, kona hoopaa ana, malama ana ; kona haawi ana ia ia i aha no na kanaka? i aha hoi no ko na aina e ? E aha oia i na makapo, i na pio, i ka poe iloko o ka pouli ? Aole oia e haawi i kona nani ia wai ? a i kona hanohano i keaha ? Me he la, ke Akua no ka Mesia, aole oia he kanaka wale no, aole oia he akua kii. Pela io no. Io. 1 ; 1—-3, 14. Ma o wai la e ko ana, a ua ko no na mea kahiko e pili ana i ka Mesia i ka mea e ola'i ? Na mea hou, oia na mea e pili ana i ke ola ma o Iesu la.
Mahele 4. Ka olelo paipai a Isaia.
P. 10. Heaha keia olelo paipai ? Owai ka poe i paipai ia e oli aku ia Iehova ? Heaha hoi ke kumu e oli ai ? Pili anei keia olelo paipai i na kanaka, i na keiki Hawaii ?
Mele. Him. 464.
Pule i hoolohe, a huli a ola ko na moku, ko na aina i ka Mesia.
Haawina no Mei 4, Isaia 53 ; 1—12.
Na Pueo ma ka Ahaaina ahiahi.
HOOPAAPAA IKAIKA NA PUEO NO SANEKA-
LAU SA MA KA LUAKINI.
Mika Ioane. Aole o'u makemake iki ia mea, e ke kahunapule. Ua hewa ia ua hewa ka hope, e alakai hewa ana i ka poe opiopio.
Kauka Kakauolelo. Heaha ka olua e hoopaapaa nei, malia piha, ua pili ia ia kakou a pau.
Mika Ioane. E hai aku ana au i ko kakou kahunapule i na hana i hana ia maloko o na luakini ma ka la ka risimaka; a maloko o kona luakini kekahi. Ma ka lohe ana, he mea ano kanaka e holo ana me na eheu, o Sanekalausa ka ia, e komo ana iloko o ka luakini me na eke makana e makana aku ai i na keiki, e komo pu ana ke kahunapule iloko o keia mau lealea. He oiaio anei?
Ke kahunapule. Ua oiaio no. A ke ninau aku nei au, heaha, ka hewa oia hana? ma ka lohe he mea kahiko o Sanekalausa, a hele oia ma na la ka risimaka i kela hale i keia hale me na makana maikai no na keiki maikai, a iho ma na puka uahi e hoopiha i na kakini i kaulia malaila i na mea ono a nani, oiai e hiamoe ana na keiki. He mea lealea no na keiki, a kuhi no mamua, he mea oiaio o Sanekalausa, mahope nae, lohe lakou, he mea oiaio ole ka, he mea hoolealea kamalii wale no.
Mika Ioane. He mea pono paha ia ma na ohana. I na makemake oe, e kuhi naaupo kau mau keiki, na Sanekalausa mai keia mau makana, oia iho la ; ia oe no ia. Owau nae, ke ao nei au i ka'u mau keiki, na ke Akua mai ia mau makana. Aka, aole no ka hana ana ia mau mea lealea ma na ohana, aka, ma na luakini kou hoohalahala a hoahewa ana. Kela lilo ana o ka luakini, ka hale o ke Akua, i hale keaka, mea hoolealea, hewa loa paha ia.
Kekahi hoa pueo. Aole pela ko'u. E wela ana ka manao o Mika Ioane. Akahi oia a hoahewa ikaika i kekahi hoa. Ma ko'u manao, he mea maikai no, he mea hoolealea maikai i na keiki, ka laau ka risimaka, me Sanakalausa, me ka umiumi loihi, me na ope, na kamaaputi, na eke, e hookani ana i na hele i mea e oli lea'i na keiki. Ka lealea ko na keiki makemake.
Ke kumu ao. Aole paha i hana ia pela maloko o ka nui o na luakini. Ma na wahi i nele i na hale kupono e ae, a ma na wahi kuaaina paha, ua hana ia pela. Hui na keiki, na makua, ka poe opio, ka poe elemakule a luahine ma na luakini, e mele pule me ka haiolelo ; a komo hoopuiwa o Sanakalausa, a lilo lakou a pau i ka lealea wale. Aole oia o ko'u makemake, aka, nae, aole paha i pono ke hoahewa loa ia. no ka mea, aole o lakou manao e hana ino i ka luakini.
Mika Ioane. Ke manaoio nei anei oe i keia mau olelo. " Kupono ka hemolele i kou hale, e lehova o na kaua.?"
Ke kahunapule. Oiaio, ke manaoio nei kakou a pau i ka baibala.
Mika Ioane. Owai kai naaupo a ike ole. O Sanekalausa me ona mau hana lealea, he mau mea kupono ole ia i ka hemolele ? Ua like ia me ka hookomo ana i na hana keaka iloko o ka luakini, i mea hoolealea i na kamalii. Aole pono ke lilo ka luakini i hale hoikeike no na hana lealea. A o keia hana a Sanekalausa i mea e hoomanao ai i ka la hanau o Iesu, he hana pegana kahikoia, aole kupono iki i ka hale o Iehova. Aole loa i hana ia ia iloko o ko'u luakini. E lilo e ko'u ekalesia i ano pegana, a e wawahi e ia ka puka o ko'u luakini mamua o ka ae ana e komo keia hana lealea iloko, Ke makemake nei au e hoike mai ko kakou hoa, ka loio, i ke kanawai no keia mea.
Ka Loio. Ua hoolohe pono au i keia hoopaapaa ikaika ana, aole nae i manao e ekemu aku. Aole maopopo ke kanawai no keia hana. O ka noonoo pono, me ke lunaikehala ke kanawai kupono. O ka hana mua nae, oia ka noonoo i ke ano o na luakini. Ina he hale halawai wale no, he hale aole i hoolaa ia no ke Akua, hiki no ke hana ia maloko na hana a Sanekalausa. Ua like ia me na hale kula, na hale hookolokolo, kahi i ae ia ai ia mau hana lealea. Aka, ina ua hoolaa ia, hoolilo ia, hookaawale ia ka luakini no Ieho va, no na hana wale no e kupono ana i ka hoomana ana ia Iehova, aole paha pono ke hookomoia ia mau hana hoolealea kamalii iloko. Ko'u manao hooholo keia ; okoa ka hale i hoolaa ia no ka hoomana ia Iehova, okoa ka hale hoolealea. Ma ka mua, e komo na mea wale no e ao ai, e hapai ai i na manao iluna, a e hoonaauao ai i kanaka. Ua hoonaniia ke Akua ma na mea e pono ai ka naau me ka uhane o na kanalia. Nolaila, kupono ka pule me ka haiolelo ana i na luakini me na mea ano like e ae, me na haiolelo hoonaauao, na haiolelo kinai i na mea ona. Aka, pono ke hooleia na mea hoolealea, aole make e komo iloko o na hale i hoolaaia no Iehova. Aole no ka manao ana, ua hewa io ia mau lealea kamalii, aka, aole i kupono ia i ka hemolele o ko ke Akua hale, a he mea hoolalau paha i ka manao o na keiki no ke ano o ka luakini.
Mika Ioane. Ko'u manao like loa no ia.
Kekahi hoa. Pono no nae ke hanaia kekahi mau mea ano lealea maikai iloko o ka luakini, i mea e hele olioli ai na keiki ilaila.
Kauka Kakauolelo. Ke hoapono nei au i ke kahunapule.
Mika Ioane. Malama o hiki koke mai ka Haku iloko o ka luakini, a hili mai paha me na kaula liilii i ka poe hoohaumia i kona halepule, a kipaku aku ia lakou iwaho. N. Y. O.
(Aole i pau.)
Halawai Makahiki o ka Aha
Hui Euanelio o ka Pae Aina Hawaii.
E halawai hou ana keia Ahahui Nui ma Honolulu, ma ka Poalua mua la 3 o Iune, hora 10 kakahiaka o keia A. D. 1879.
1. Nolaila. Ke paipai ia aku nei na Kahunapule, na Elele, a me na lala a pau o ka Aha, e noho makaukau no ka holo mai i ka halawai makahiki o ka Aha.
2. Ke paipai pu ia aku nei no hoi, e hoomakaukau mua i ka oukou mau haawina e pili ana i keia Aha; oia na Hoike Komi te, na Papa Helu Ekalesia, a pela aku. Mai waiho, a eia i Honolulu nei kahi e hoomakaukau ai ia mau mea.
3. E hoomanao na Ahahui o na mokupuni i kona mau lala e hele mai ana i keia Aha, i ole e haule, a hiki ole mai no ka nele i ke kokua ia mai.
4. E hoouna mua mai ke kakau moolelo o kela a me keia Ahahui mokupuni, i ka Papa inoa o na elele a lakou i koho ai no keia Ahahui, i ke kakauleta o ka Papa Hawaii; a i ole, i ke KUOKOA.
5. E hooikaika na lala a pau, e holo mai i ka halawai makahiki o ka Ahahui nui o ka Pae Aina Hawaii. E hoopale aku i na manao kanalua no ka hele ana mai.
E hoopakela aku oukou a oi aku ka nani, mamua o keia mau olelo paipai; ma ko oukou akoakoa nui ana mai, mamua o ka la e wehe ai ka Aha.
"O ke aloha o ke Akua me oukou a pao." Owau no me ka mahalo.
E. KEKOA. Luna Hoomalu. Honolulu, Apr. 1 1879.
OLELO HOOLAHA.
A. McWAYNE,
Hale kuai laau lapaau. A me na Waiala o na ano a pau, me na SOPA ALA o na ano he nui wale. Ma ka kihi o Alanui Papu me Kalepa. 840 1y
DR. RODGERS,
oia o
KAUKA LOKEKE.
Ua hoonee ae nei i kona keena oihana mai ka hale ae o Aliuene ma Monikahane a iloko o ka Hale Mu, helu 54 Alanui Papu. Ma keia hope e hoomakaukau ana ke Kauka i kona mau Laau ponoi a puunaue aku i ka poe kii mai. O kona hale noho, aia no ma ka pa o ka Hotele Hawaii, ma kahi i noho mua ai. 881 tf
E. STREHZ.
(AILUENE.)
Malaila e loaa ai na ano laau a pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o alanui Papu a me Hotele, ma Monikahaae. (845 ly)
E. O. HALL & SON.
(E.O. HOLO MA.)
Na mea kuai i na mea mahiai, Na Lole, Na Pena, Na Aila, a me Na ano Lako e ae a pau he lehulehu wale. 846 Kihi o Alanui Papu me Moi. ly
LOLE MAKEPONO
Ke Kuike.
E LOAA NO IA MA KAHI o
KAKELA ME KUKE!
E LAA NA Ahinahina, Kalakoa, Keokeo, Leponalo, Pena, Aila, Aniani, NA MEA PIULA! KOPA, AILA HONUA, AILA HOOMALOO Kui Kakia, Pakeke, Tabu, Kaula, Noho Lio, Hulu Palaki, na Pulumi. A HE AGENA NO HOI NO NA MOKUPUNI O HAWAII NEI NO NA Lainakini-nao, Lainakini Maoli, Palule Kalakoa, Alapia, Kelepa, Kilika, Na lole kupono i ka wawae Palule Huluhulu, Na Lole Huluhulu, Na Lole no ka hoohehelo ana Lipini, Lihilihi, &c. LIPINE, LIHILIHI, &c. A ME NA Mikini Humuhumu MakeponoLoa! A HE MAU MEA AI KAHI Ka Palaoa, Kopaa, Raiki, Pia, Hoohu, Paakai, Huaala, Pia Kulina, &c. A he Laau Lapaau Kaulana Loa A DR. JAYNES. Laau Kunu, Laau Hoomaemae Koko, Laau Hoopau Naio, Penikila, Huaale, A ME NA LAAU HAMO, A PELA'KU ! 827 3m 839
PAPA! PAPA!
NO
ALLEN & ROBINSON
UA WEHE AE NEI MAUA I PA KUAI PAPA MA KA UWAPO O PAKAKA Na Papa Ulaula o na ano a pau. Na Papa Paina o na ano a pau. Na Pili Hale Ulaula. Na Pili Hale Keokeo. Na Pepa Hoonani Hale, Na Pepa Molina. Na Pena a me na Aila Pena! NA KUI O NA ANO A PAU. NA PANI PUKA a me NA PANI PUKA ANIANI. NA PANI PUKA ame NA OLEPELEPE. NA LAKO KUKULU HALE O NA ANO A PAU! E KUAIIA MA KE KE KUMUKUAI HAAHAA LOA O keia Makeke.
ALLEN & ROBINSON
Honolulu,Ian l,1878.
8 40 3m
PAPA, PAPA
AIA MA KAHI O
LEWERS & DICKSON!
(O LUI MA.)
MA KE KAHUA KAHIKO MA
Alanui Papu a me Moi!
E LOAA AI NA Papa Nouaiki! o kela a me keia ano. Na Papa Nani a Paa no ke Kukulu ana i na Hale! Na Pani Puka. Na Puka Aniani, Na Olepelepe, Na Pou, Na O-a, Na Papa. Hele, Na Papa Ku, A me na Papa Moe nui loa. NA PILI O KA HALE O NA ANO A PAU. Na Pepa Hoonani, Na Pena o na Wai a pau. Na Kui mai ke Nui a ka Makalii, Na Ami Puka, Na Ami Puka Aniani, Na Ami o na ano a pau, Na Aila Pena, o kela me keia ano, Na Aila Hoomaloo, he lehulehu wale, Na Aila e ae o na ano a pau. NA WAI VANIKI A ME NA WAI HOOHINUHINU NANI! o na ano a pau loa. NA BALAKI ANO NUI WALE! A ke hai ia aku nei ka lono i na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana NO KA UKU HAAHAA LOA! E like me ka mea e holo ana mawaena o LAUA a me ka MEA KUAI. E hele mai! E na Makamaka !! A e lawa no hoi ko oukou makemake me ka oluolu a me ka maikai! 845 tf
KOPA KUKAEPELE
A
GLENN?
AOLE LUA NO EA HOOMAEMAE I KA ILI!
He mea hoopau i na eha, Na Ili Puupuu, A he hoomaemae i na mea ino, A he hoopau Lumatika, A he kopa auau no hoi O keia kopa ka oi aku o ka mea maikai 1 waihoia mai imua o kanaka. Aole wale no ka Hoopau ana i ka Huehue, Ili Poha, Wela la, Luluaina, a me na mea e ae o ka ili; A ma ia holoi ana, o ka hoopalupalu pu kekahi i ka Ili, a keia Laau Hoomaemae lua ole e hana ai. O ka hoemi ana iho i na mai o ka Ili, a o ke pale aku i ka mai mai na lole e na Mai Lele, oia kekehi. O na ohana ame na poe makaikai, ina e hoolako lakou i keia KOPA HOOMAEMAE LUA OLE! ALAILA, UA LANAKILA LAKOU. He hoopau i ka lehu o ke poo, A he Kopa no hoi e kaohi mai ai I ka lauoho mai ka hina ana. Ua hooia nui mai na Kauka no ka maikai o keia Kopa! E loaa no ma kahi o M. McInerny. Kihi o na Alanui Papu me Kalepa