Ka Nupepa Kuokoa, Volume XVII, Number 46, 16 November 1878 — Page 2
Ma ke Kauoha.
Ua hookohuia aka o Mr. Henry Gibson i keia ia i Luna Alanui no ka mokupuni o Lanai. SAM L. G. WAILA
Kuhina Kalalaina
Keena Kalaiaina Oct 30.1878. 331 3t
Ua hookohuia aku o Mr. Makaiwa, i Luna Kula no ka apanao Lahaina, mokupuni o Maui, ma kahi o ka mea ha-nohano W. L Moehonua i make. W. JAS. SMITH,
Kakauolelo.
Keena Hoonaauao, Oct. 24, 1878 331 3t
Ua oluolu i ke Alii ka Moi ka hana ana i keia mau hoo-kohu malalo iho penei:
Okatoba l9,18—Hon. R.F.Bickerton, ke Komisina Palena Aina no ka mokupuni o Oahu, ma kahi o ka mea kauoha no K. Preston i waiho mai.
Okatoba 19. 1878-Hon. L Aholo, ke Komisina Palena Aina o ka mokupuni o Maui, Molokai a me Lanai, ma kahi o Hoa. A. Fornander i waiho mai.
Okatoba 23, 1878-O ka mea hanohano S. Kipi ke Komisina Palena Aina o ka mokupuni o Hawaii ma kahi o K. A. Ly-man Esq, i waiho mai.
Halealii Iolani,Oct 31, 1878.334 3t
KE hoike ia aku nei i ka lehulehu, e wehe ia ana ka pa o Iolani, Halealii i ka po o ka la 13 o Novemaba, mamua iho o ka la 16 o Novemaba, ka la hanau o ka Moi. O ka poe hea inoa a pau, a me ka poe e hooili ana i na Mele Kahiko no ka Moi, e hele ae ma ia ahiahi mamua iho e ke kani ana o ka o-le kapu, oia ka hora 7 pm.
O na inoa a pau i hooili ia, a me na inoa i hea ia, e hoolaha ia no ma na nupepa, me na inoa o ka poe nana i hea a me ka poe nana e hooili ana i na inoa, e hoike ia no ia malalo o na mele i hea ia, ai hooiliia no lakou. C. N. JUDD,
Puuku o ka Moi.
Oct. 18. 1878. 332 4t
E kudala akea ia ana ma ka hoolimalima na Aina Aupuni malalo iho no na makahiki he umi, ma ka la 15 o Nove-maba, hora 12 o ke awakea, ma ke alo iho o Aliiolani Hale.
Apana 1. Aia ma Hilo Akau, Hawaii, kekahi apana aina mawaena o Humuula a me Waipunalei, e pili ana i ka aina o Awawaiki a me kekahi, a ua kuhikuhiia na palena malalo iho:
E hoomaka ana mawaena o ke kahawai o Kaawalii ma ke kai, a e holo ana ma ka pilikai i aneane e hookahi mile, a hiki i ke kahawai o Waipunalei; alaila moe aku la ma ka aoao o Waipunalei e like me ke kuhikuhi ma ke kii, he ekolu mile ke kaawale; a mai laila aku, moe aku la mawaena o ke kahawai o Kaawalii e pili pu ana me Humuula, a hiki i kahi i hoomaka ai; o ka nui he 900 eka. Maluna aku o $200 ka uku hoolimalima no ka makahiki.
Apana 2. Aia ma Hamakua, Hawaii, he apana aina, mawaena o Opihilala a me Paauilo i kuhikuhi ia malalo iho:
E hoomaka ana ma ke kihi akau o Paauilo a moe aku la ma ke kahakai mawaena o ke kahawai a moe aku la ma ke kai : Akau 79 degere, Komohana 550 kapuai, Akau 69 degere, Komohana 780 kapuai, Akau 46 degere, 30 minute, Komo-hana 750 kapuai, Akau 62 degere, Komohana 600 kapuai, Hema 76 degere 4 sekona, Komohana 795 kapuai a hiki ma ka palena o Opihilala 947; alaila, moe aku la ma ka palena o Opihilala i olelo ia, Hema 11 degere 40 minute, Komohana 3160 kapuai; alaila moe aku ma Opihilala he 1277, Hema 70 degere 45 minute, Hikina 2250 kapuai a hiki iwaena o ke kahawai o Paauilo, alaila moe aku la mai waena aku o ke kaha- wai i olelo ia (i aneane e 3160 kapuai ke kaawale) a hiki i kahi i hoomaka ai; o ka nui he 207 eka. Maluna aku o $175 ka uku hoolimalima no ka makahiki hookahi.
E ike ia no na kii a me na kuhikuhi no keia mau aina ma ke keena o ke Anaaina Aupuni.
He hookaa ma ka hapaha makahiki ma ke kuike SAM'L G. WILDER. (Waila.)
Kuhina Kalaiaina.
Keena Kalaiaina, Sept. 3, 1878. 882 tf
HE LEO UWALO-
Ke poloai ia'ku nei na Luna o ka NUPEPA KUOKOA a me ko poe e ae, ina he mau koena aie ko lakou no ko kakou NUPEPA, e hookaa koke mai ia makou ma Honolulu nei. A oiai hoi eiwa wale no helu i koe alaila pau keia makahiki; nolaila, ua makemake makou e hoomaka no ka makahiki hou me ke koe ole o kekahi mau mea keakea.
E hoolohe i keia, e na makamaka, a e maliu mai i ka leo uwalo aku, i mea e nui ole ai ka hana mahope. Honolulu Oct. 20, 1878.
KA NUPEPA
Kuokoa me ke Au Okoa
I HUIIA.
No ka Makahiki, $2. Eono Mahina, $1
Dala Kuike ka Rula.
NOVEMABA 16, 1878.
MA ke kakahiaka o ka la Sabati i hala, i huli hoi mai ai ka Hooilina Moi maluna o ka mokuahi " Likelike " mai ka malu ulu aloha mai o Lele.
HE mea nui ka wawa ana o kanaka o Honolulu nei iloko o keia mau la e noho nei no ka opiuma. Ma ka Poalua o ka pule i hala iho nei ua hoolele malu ia mai kekahi mau tini opiuma mai luna mai o ka mokuahi Kulanakauhale Nu Ioka, mai Kaleponi mai. Mahope mai, i ka Poalima iho, ua loaa hou kekahi mau tini. Ua hopu ia kela mau waiwai i hoopae hewa ia, a aia iloko o ka lima o na mana aupuni kahi e paa nei. Ua hopu ia no hoi kekahi mea, a mau mea paha, a ua ninaninau ia imua o ka Aha hoomalu, aole nae olelo hooholo i hoopuka ia. Aole i hoea mai i ka malamalama na hiohiana a pau e pili ana i keia hana. Aka, o ka mea i maopopo ma ka nana ana i na hiohiona i ike ia o keia hihia e imi ia nei, me ka maopopo ole i keia wa ka poe nana i lawelawe e haihai i ke kanawai o ka aina, ua akaka lea no nae, ua lawelawe ia keia hana, oia ka hoopae opiuma ma ke ano kue i ke kanawai, no kekahi mau mahina loihi i hala ae nei. He mau aouli e ae kekahi e pili ana i keia hewa, aole nae makou e kamailio i keia wa, oiai aole i pau ka ninaninau ana a me ka imi ana o ka mana kanawai Aka, mahope aku e kamailio hou no makou no keia mea.
ILOKO iho nei o keia mau pule ua hoopuka ka Hon. D. Malo iloko o Ko Hawaii Pae Aina he mau manao e pili ana no kana mau hana iloko o ke Kau Ahaolelo o keia makahiki. Ua poholo pu a waiwai ole no hoi na hooikaika ana o Malo maloko o ka Ahaholelo; a ua po-ho ka manaolana o ka lehulehu i hookau aku ai maluna ona i ka wa a lakou i lohe ai i kana mau haiolelo mamua ae o ka la koho balota. Aka nae, i mea e ko ai ka oiaio o kana mau olelo imua o ka apana o Honolulu iloko o na la holo balota, e i ana ina e koho ko Kona nei iaia i wahaolelo no lakou, alaila e hoike mai oia i ka moolelo piha o kana mau hana iloko o ka Ahaolelo, oia paha ke kumu o keia hoopuka moolelo ana. A ua pono no hoi paha ia. Aka, ke ole makou e kuhihewa, aole e puni hou ana ko Honolulu poe makaainana e like me na mea i akena ia mamua. Ua ike ia he lau wale no ko luna o ka laau ; aohe hua.
HE OIAIO, o ke Kau Ahaolelo i hala iho nei, ua like no kona ano ma na hana a me na kamailio ana a kekahi poe o kona mau lala hanohano me ko na Kau i hala mua. Ua kaulana no ma ka hoohaahaa ia o ka inoa hanohano o ia oihana, a me ka hoolapuwale ia o ke kulana wahaolelo no ka lehulehu ; a oiai, ua ike ia a ua maopopo keia mau mea i ko makou mau makamaka; a oiai no hoi he mea i kamaaina ia ka helu papa ana i na kee o kela a me keia o na hoa o ia ano i hai ia'e la ; nolaila, aole makou e kamailio malaila, aka, e puana pokole ae ma kekahi mau mea i hooholoia a makou e manao nei he kia hoomanao hanohano no na inoa o ka poe i malama i ke kulana a i kaulike hoi i ka pono me ka hookapakahi ole.
Mawaena o na hana maikai i hooholoia, oia no ka $10,000 no kekahi kahuna Lapaau no ko kakou mau hoakanaka i aloha nui ia e noho mai la iloko o ka ehaeha ma Kalawao, Molokai; e like hoi me ka makou i hoike aku ai i kekahi pule i hala'e. O keia ka hoike ana i ke aloha io o ka poe-i kokua i keia haawina ; ua hoomaopopo lakou iloko iho o lakou i ka hana haawi ia i kela a me keia no kona hoalauna ; a ua hooko i ka olelo kauoha " e aloha oe i kou hoalauna e like me kou aloha ana ia oe iho." Aia maloko o kela a me keia makamaka i loohia ia i keia mai kaumaha a pilihua ; ae ! aia ua kuni ia iloko o ko lakou mau puuwai he kia hoomanao na ka make wale no e holoi, no keia poe; a aole wale no ia lakou, aka i na tausani e noho aku ana mawaho o ia Panalaau me ka u ana. A aole no oia wale ; aia ma na pea o na aina naauao, ua hoea aku ka lono, ua hoike o Hawaii i kona aloha kuhohonu io no kona mau oiwi i loohia ia e na palapu a ka lepera ; a kau ae la he lei hanohano o na mahalo ia, ma ke ano, he aupuni i naauao, malalo o na kuhikuhi ana a ke aloha Kristiano!
Na keia Kau Ahaolelo iho nei no i hooholo i kekahi Kanawai e wehe ana i ipuka, a e haawi ana i na kokua a me na kumu hoohoihoi a pau no ka hookomo ana mai i na alahaka. He hoike ana keia o ka poe i kokua ma ia mea i ko lakou makemake e hooholo mua ia na kumu hoopomaikai i ka aina a me na kupa o ka lepo i aloha ia. A ano, ke hoomanao ae nei makou i na la i hala'e, ua kilo mua ia e makou, " aia he la e hiki mai ana, a e kamoe ia ke alahaka ma kou lepo e Hawaii! " a ano no hoi, ke we-he'a la ka honua i Hamakua o Hawaii no ka hooko ana i ka makou kilokilo hikimua.
Ua hooholoia he Kanawai e haawi ana i na pomaikai like me kela maluna'e, no ka " hoomalamalama ana i ke Kapitala o Hawaii nei me ka makani Aa, a me kekahi hana akamai e ae o ia ano." O ka hoomalamalama kupono ia o na alahele o kekahi kulana kauhale, he kumu kokua nui ia i ka oihana malama maluhia ; a he kumu hoopomaikai no hoi i ka lehulehu. A oiai, ke kamoe ikaika mai nei ke kahe ana a ka wai kipa o na malihini o kela a me keia ano ma na kaiaulu o ko kakou aina, nolaila, he mea pono "e houluulu i ka mauu oi kau ka la ;" wahi a kahi olelo, a hoea mai ke kau ino o ka Hooilo, ua lawa ua makaukau no ka halawai ana me ia he alo a he alo.
O ke Kanawai e hooponopono ana i ka Oihana Leta, o kekahi ia o na keehina naauao i hoike ia e ka poe i kokua ma ka hooholo ana. E hoike aku ana i na aupuni naauao, ua loaa ia Hawaii he kulana like me ko na aupuni nui o ke ao nei ma na mea pili i ka Oihana Leta. Aole makou e poina i ka haawina no ka hooloihi ana i ke alanui Moi; no ka mea, he mea maopopo, he ipuka ia no ka pomaikai o ka poe e noho ana ma ka aoao Waikiki o ke kulanakauhale.
Aka $10,000 i hooholoia no ke kii o ka makua o Hawaii, KAMEHAMEHA KA NUI; ka hailona hoomanao hoi no ka piha ana o ke au keneteniela o keia Paemoku o ke kai mai ka ike mua ia ana e ke Kapena kaulana KUKE ; ua ku i ka mahaloia ; aole ma waena wale iho no o kakou nei, aka, ma na aina e kekahi. Ua ike ia ma na nupepe na olelo mahalo ia kakou no keia hana. Ua ike ia ma kekahi nupepa o Bosetona, kekahi mea e pili ana i keia mea, a penei ke ano nui o na olelo:
"E hoomanaoia ana ke keneteniela o ka Paemoku Hawaii mai ka loaa ana ia Kapena KUKE i ka 1778 ma ke kukulu ia ana o kekahi kii kino kanaka o KAMEHAMEHA, ke alii koa nana i nai ia mau Paemoku a i hookahua hoi i ka noho aupuni ana. Ua haawi ke kau Ahaolelo o ke aupuni e noho nei he $10,000; e hoomanao ana i ke koa wiwo ole o ko lakou lahui, a i ke keneteniela o ko lakou one hanau.
Ua haawi ia iho nei ka hana hanohano o ke kalai ana i ke kii o ke koa o ka Pakipika i ke kalai kii kaulana o Bosetona nei, oia o T. R. Gould, a ua makee nui ko onei poe keia hanohano, no ka mea, mai Bosetona nei ka hoouna mua loa ia ana 'ku o na elele Makua Misionari me ka hua o ka malamalama a ke Akua ; a me na aumoku Kalepa a hiki ia mau Paemoku nani a kamahao.
Ua kamailio nui ia ke kamoe ana i uwea telegarapa mai ka moana Pakpika, me ke kipa ana mai ma na kapakai o kakou nei. Wahi a kekahi leta a ka Hon. W. M. Kipikona.
" Ua manaolana nui ke alii o ka oihana kamoe telegarapa, oia o Cyrus W. Field, no ke kamoe ana i uwea o ia ano ma ka moana Pakipika mai na kapakai o Kaleponi a halawai me ko Hawaii mau ae one."
Eia keia makana nui nou e Hawaii. He haawina nou e anapuni ai i ka honua iloko o na minute wale no; E apo aku kakou i ka manawa maikai i panai ia mai.
Mahope iho o keia mau mea a pau a makou i kamailio ae la, a he nui aku no koe; hookahi wale no a makou puana no ka panina loa—Ua hamama ka ipuka no Hawaii mamuli o na kanawai hoopomaikai a me ka hiohiona o ka holomua a o ka hana wale no a na makaainana, oia ka iini ana no lakou iho, i loaa'i kekahi o neia mau pomaikai e hoea mai ana me ka hala ole. O keia ae la kekahi o na hana ku i ka mahalo i ke kau Ahaolelo 1878, mamuli o ka hapa noonoo maikai o kona mau hoa, a he mau kia hoomanao lakou. He nui no na mea kupono ole i hanaia ; aka, he opala ia mau mea mamua o ka maikai.
NU HOU KULOKO.
UA ike iho makou, he paina ka na hoa o ke KILOHANA a me kekahi mau opio o ke taona alii nei, i hui ia lakou iho malalo o ka inoa " Hui Hauoli o na opio, " no ka hoomanao ana i ka la hanau o ka Moi.
MAKENA UA HOKI.-—Ua haalale aku ka moku Kiapa, " Discovery " i ka la 27 o Okakoba, no Honolulu nei, a aia maluna o kona oneki he 84 mau hoki no Henry Turton, Esq. o Lahaina. Wahi a ka lono.
MAHOPE iho o ka hala ana o ka mahina hoomaha o na keiki Puhi Ohe o ke aupuni, ua hoonanea hou ia ae ko kakou mau kamaaina i hoonele ia me na mea hoohauoli me ke kani hoohaihai ana a ka lakou mau ohe, ma kekahi mau po o ka pule i hala.
MA ka po o ka Poalua iho nei, mai pau i ke ahi ka hale moe o J. Campbell ma Kaakopua Honolulu nei; ua ho-a ia ke ahi e kekahi mea manao kolohe ma ka lanai mamua o ka hale; e ole ka ike e ia ana pakele ai. Pela mai o D. Manuia ia makou.
HOOLAHA A MELLIS A ME WILKINSON.— No ka hiki ole ana mai o ka waiwai o ka halekuai o Mellis a me Wilkinson ma ke ku ana mai nei a ka mokuahi Kulanakauhale o Nu Ioka, i ka Poalua o ka pule i hala; nolaila. Ua hookaulua ia ka hoopuka ana ‘ku i ka laua Olelo Hoolaha, a i ka wa e hiki mai ai e hoopuka ia 'ku no ka laua hoolaha.
UA hauoli makou i ka hai ana'ku i na makamaka, ua hoomakaia ka hoomakaukau ana e hooko i ka makemake o ka Ahaolelo o 1878 ; oia hoi ke kalai ia i kii no Kamehameha nui, i mea hoomanao iaia, a me ka piha ana oke keneturia mai ka manawa i loaa'i o Hawaii nei ia Kapena Kuke. Ke hanaia la e kekahi haole kaulana o Bosetona malalo o na kuhikuhi ana a W. M. Kipikona.
AHI HAWAII.—Ua haawi makana ia mai ia makou kekahi ope Ahi koe Hawaii e Frederick Vehling. A o ka makou panai ma ko makou aoao no ia lokomaikai; oia ka haawi ana 'ku i ko makou mahalo me ka hoomaikai pu hoi. He ahi maikai loa keia. A ke poloai aku nei makou i ka lehulehu e kokua i na oihana mikiala o kou one oiwi. E loaa no keia ano ahi ma Alanui Liliha, ma Honolulu nei.
KALUA PUAA MA KA LA SABATI:—Ma ka hora 1 o ka auwina la Sabati i hala Nov. 10, ma kahi kokoke i ka Halemai Moiwahine; ua ike aku makou i kekahi imu puaa e a ana; a e laulau ana kekahi kanaka i na laulau puaa. Heaha no la hoi ka mea i kalua puaa ole ai i ka wa kupono, a waiho ae hoi ka maluhia o ka la Sabati ? Malia paha he malihini ua hiki mai ia kakahiaka, a ua nele ka hale i ka mea ai ole.
HE LONO NO MAKONISIA.—Ma keia mau la iho nei, ua loaa mai i ke Kakauolelo o ka Papa Hawaii he leta na ke Kapena o Hoku Ao, a ua loaa mai ia makou he lono e pili ano no Tarawa, oia ke kihapai o G. Haina. I ke ku ana aku o ka Hoku Ao i Apemama, ua hai ia mai he kaua ko Tarawa a puni, a o na kumu i haalele ia aku e Haina ia ia i holo mai ai ia nei, ua pau i ka holo i Apemama no ka makau o poino ko lakou ola. I ka wa a Haina i lohe ai i keia, aole oia i hopo, aole no hoi i kanalua i kana mea i hana ai. Ua holo aku oia maluna o " Hoku Ao'' a ku lakou i Tarawa i ka po. A ua ike aku no lakou i ka a ana mai o ke ahi, me ka lohe no hoi i ke kani ana o na pu kaua. Ua kali lakou a ao ka po ; a i ke ao ana ae, holo aku la o Haina maluna o ka waapa o ka moku, lele aku la ia i uka a loaa kahi mau alii o ka aoao kipi, a lawe ia e ia iluna o ka moku ; alaila hoi hou o Haina iuka a loaa ka Moi o Tarawa me kekahi alii, a lawe pu ia aku la e ia iluna o ka moku, a malaila kahi a ko kakou Misionari i hooponopono ai mawaena o na aoao elua a kuikahi hou laua. Alaila kakau iho la o Haina i na olelo aelike o ke kuikahi ma ka olelo Gilibati, a kakau inoa ia iho la e na aoao elua. A pau ia, lulu lima na aoao elua, a himeni iho la lakou i ka himeni: " He aina pomaikai, aia ma o. " A pau ka himeni ana, haawi o Haina i ka pule a hookuu ia aku la na mea a pau me ka maluhia. He hua maikai keia o ka pono ma ia Paeaina, a he mea e loaa mai ai ka mahalo ia i na makamaka paahana o kakou.
KA LA KULAIA —Ke hoea aku nei makou i kela la me na naau hauoli no ka la Kulaia, ka la hoi a na mamo oiaio o Hawaii e hiipoi mailani ai no ko lakou Moi a e paa ana na hale oihana aupuni.
MA ke awakea Poaha iho nei, mamua pono ae o ka Halekuai Buke o Wini & Robikana ; ua puiwa ae la ka lio kauo kaa o Keopuhiwa a haki kekahi kolo o ke kaa, a ma ia puiwa ana ua huikau hou ae kekahi mau kaa e ae elua, a poino ke kaa o Mahiai. Laki nae i ka nui ole ana o na poino.
KA MAKE ANA O J. D. WATSON.—Ua lohe pono mai makou. Ma ka hora 4 o ke ahiahi Poakolu iho nei; ua make o J. D. Watson kekahi haole kamaaina o Kaneohe. Mahope o kona make ana ua haawi ae kana mau keiki he kipu aloha ana no ko lakou makua kane mai ia ahiahi mai a ao ka po a mai ke kakahiaka Poaha mai a hiki i ka hora 12 awakea oia la, me ka hoomaha iki no hoi i kekahi manawa.
MAI PAU I KE AHI.—Ma ka hora 5 o ke kakahiaka Poaha iho nei, ua pa-hu ia kekahi ipu kukui mahu ma kekahi hale ma Honokaupu Honolulu nei, a pomaikai ka pio ana, oia ano aila kekahi o na aila mahu i papa ia a makou e hoolaha nei. A ma ke awakea ana'e oia la no, ua lawe ia ka ona nona ka hale kuai i loaa mai ai ua aila la i ka Halewai.
MOKU VIOLET.—Ma na lono i hiki mai nei e pili ana i keia moku, ua loaa i keia moku kekahi ulia poino, no ka mea, mahope iho o kona haalele ana ia Kapalakiko no Honolulu nei, me ka piha i ka ukana no ko kakou nei awa, ua paa oia i ke ahi, a ua poho kekahi poe kalepa waiwai o kakou nei, aka, ua hoopakele ia na ola e kekahi moku e ae.
KA MOKUAHI MOKOLII:—Ma ke kakahiaka o nehinei i ku mai ai ka mokuahi " Mokolii " mai Kauai mai; a ua lohe pu mai hoi makou e malama ia ana he mau hana hoomanao no ka la hanau o ka Moi ma Lihue Kauai. A aia malaila e luakaha ai ka Moiwahine, a e ike i na hana oia la.
OLELO HOOLAHA.
AHA Kiekie o ko Hawaii Pae Aina, Oahu. ss. Kau o Okatoba, 1878. Lavinia ka mea hoopii no ke oki mare, kue ia Nakapuahi ka mea i hoopii ia, hoopii oki mare. Ma ka palapala hoopii i olelo ia maluna no ke oki mare, ano ua kauohaia, o ka olelo hooholo e oki ana mai ka berita mare 'ku e hookomo ia ma ka moolelo o ka Aha, mamuli o ka aoao o Lavinia no ke kumu o ka haalele loa o Nakapuahi k i oleloia, e lilo i mea paa mahope o na malama eono mai ka la i hoopuka ia ai keia olelo hooholo ke hanaia e like me na olelo maloko nei, ke ole nae i ike ia ke kumu kupono e hoole ai. A ua kauohaia ka mea hoopii e hoolaha i ke kope i hooiaioia o keia olelo kauoha ma ka Hawaiian Gazette a me ke Kuokoa i kela a me keia o na hebedoma eono, o ka hoolaha mua ana iloko o ka malama hookahi mai ka la aku i hoopukaia ai keia olelo kauoha; i mea e hiki ai i na mea a pau i pili ke hoike mai iloko o na malama eono, ina he kumu ko lakou e hooko ole ia ai ia olelo hooholo a lilo i mea paa.
Na ka Aha. JNO. E. BARNARD.
Kakauolelo.
Hanaia i keia la—o—1878.
Honolulu, ss ; Ke hoike aku nei au me ka oiaio, o na olelo a pau maluna ae, oia no ke kope oiaio a pololei o ka olelo hoo-holo o ka hihia maluna ae, a e waiho nei ma ke Keena o Ke Kakauolelo o ka Aha Kiekie.
Hoike ia e ko'u lima a me ke Sila o ka Aha Kiekie ma Honolulu, i keia la 4 o Novemaba, 1878. JNO. E. BARNARD, 884 6t Kakauolelo o ka Aha Kiekie.
AHA Hookolokolo Kaapuni Apana Eha o ko Hawaii Pae Aina, ma ka hooponopono waiwai ma ka waiwai o Kaahuna k o Nawiliwili, Kauai, i make kauoha ole. Ma ke keena imua o ka Lunakanawai Kaapuni Apana Eha H P A. Olelo kauoha e hoolaha aku no ke noi ana mai e koho i lunahooponopono waiwai- Ma ka heluhelu a me ka waiho ana mai o ka palapala noi a Naipuone w o Nawiliwili, Kauai, e hoike mai ana o Kaahuua no Nawiliwili, Kauai, ua make kauoha ole ma Nawiliwili, Kauai, ma ka la 14 o Iulai, 1876, a e noi ana e haawi ia ka palapala hookohu lunahooponopono waiwai ia G. W. K. Malama. Ua kauoha ia o ka Poalua oia ka la 10 o Dekemaba, 1878, i ka hora 10 kakahiaka, oia ka manawa i koho ia no ka hoolohe aua i ua noi la imua o ua Lunakanawai la, ma ke keena hookolokolo o keia Aha ma Koloa, a ma ia manawa a ma ia wahi no e hele mai ai na mea a pau i pili e hoike mai i ke kumu ina he kumu oiaio ko lakou, e ae ole ia ai ua noi la. A o keia olelo kauoha e hoolaha ia ma ka olelo Hawaii i ekolu pule ma ke Kuokoa he nupepa ma Honolulu.
Kakau ia ma Koloa ko Hawaii Pae Aina. Novemaba, 1878.
JACOB HARDY, 884 3t Lunakanawai Kaapuni Apana Eha H P A.
AHA Hookolokolo Kaapuni Apana Eha o ko Hawaii Pae Aina, ma ka hooponopono waiwai ma ka waiwai o Huahaule k o Waimea, Kauai, i make kauoha ole. Ma ke keena imua o ka Lunakanawai Kaapuni Apana Eha H P A. Olelo kauoha e hoolaha aku no ke noi ana mai e koho i lunahooponopono waiwai. Ma ka heluhelu a me ka waiho ana mai o ka palapala noi a Kaaihue w o Waimea, Kauai, e hoike mai ana o Huahaule no Waimea, Kauai, ua make kauoha ole ma Waimea, Kauai, ma ka la 21 o Okatoba, 1876, a e noi ana e haawi ia ka palapala hookohu lunahooponopono waiwai ia Kaaihue w. Ua kauohaia o ka Poalua oia ka la 10 o Dekemaba, 1878, i ka hora 10 kakahiaka, oia ka manawa i kohoia no ka hoolohe ana i ua noi la imua o ua Lunakanawai la, ma ke keena hookolokolo o keia Aha ma Koloa, a ma ia manawa a ma ia wahi no e hele mai ai na mea a pau i pili e hoike mai i ke kumu ina he kuma oiaio ko lakou, e ae ole ia ai ua noi la. A o keia olelo kauoha e hoolaha la ma ka olelo Hawaii i ekolu pule ma ke Kuokoa he nupepa ma Honolulu.
Kakau ia ma Koloa ko Hawaii Pae Aina,Novemaba 2,1878.
JACOB HARDY. 884 3t Lunakanawai Kaapuni Apana Eha H P A.
AHA Kiekie o ko Hawaii Pae Aina, Oahu, ss. Kau o Okatoba, 1878. Kahinu w ka mea hoopii oki mare, kue ia Nakoana k ka mea i hoopii ia, hoopii oki mare. Ma ka palapala hoopii i oleloia maluna no ke oki mare, ano ua kauoha ia, o ka olelo hooholo e oki ana mai ka berita mare aku e hookomoia ma ka moolelo o ka Aha, mamuli o ka aoao o Kahinu w no ke kumu o ka haalele loa a me ka moekolohe o Nakoana k i oleloia, e lilo ia i mea paa mahope o na malama eono mai ka la i hoopukaia ai keia olelo hooholo ke hanaia e like me na olelo maloko nei, ke ole nae i ike ia ke kumu kupono e hoole ai. A ua kauohaia ka mea hoopii e hoolaha i ke kope i hooiaioia o keia olelo kauoha ma ka Pacific Commercial Advertiser a me ke Kuokoa i kela a me keia o na hebedoma eono; o ka hoolaha mua ana iloko o ka malama hookahi mai ka la aku i hoopukaia ai keia olelo kauoha; i mea e hiki ai i na mea a pau i pili ke hoike mai i loko o na malama eono, ina he kumu ko lakou e hooko ole ia ai ia olelo hooholo a lilo i mea paa. A. ROSA,
Na ka Aha. Hope Kakauolelo.
Hanaia i keia la 19 o Okatoba, 1878.
Honolulu. ss: Ke hoike aku nei au me ka oiaio, o na olelo a pau maluna ae, oia no ke kope oiaio a pololei o ka olelo hooholo o ka hihia maluna ae, a e waiho nei ma ke Keena o ke Kakauolelo o ka Aha Kiekie.
Hoike ia e ko'u lima a me ke Sila o ka Aha Kiekie ma Honolulu, i keia la 26 o Okatoba, 1878. A. ROSA, 883 6t Hope Kakauolelo o ka Aha Kiekie.
Amara ! Amara ! Amara !
UA lilo iho nei ia James H. Hanlon ka Amara kaulana ma ke kapili kapuai lio ana a me ka lapaau ana i na lio mai, ka hale amara o James Taylor mauka iho o Hale Dute kahiko ma Ulakoheo, a ke hoike aku nei ia i na kanaka a pau, ua makaukau oia e lawelawe i na mea a pau e pili ana i kana oihana me ke emi loa. Nolaila e hele nui mai oukou e ka poe kaa hakihaki, lio eha o na wawae a mai e ae paha, a na'u e lapaau me ka eleu loa. Me ke akahele a mikioi loa e kapili ia ai ke kapuai hao o na lio.
Honolulu, Nov. 6,1878. 884 7ta
E IKE auanei na kanaka a pau e nana mai ana i keia, owau o Puakala k, no Mokuleia, Waialua, Oahu, mamua, nolaila, ke hai aku nei au me ka oiaio loa,o kuu hoolilo ana i ko'u hapa ma ke kanawai iloko o ka waiwai paa o Hapo k a me Kahula k, oia na apana aina e waiho la ma Puukauila, Kamananui, Waialua, Oahu,i hoike ia ma ka palapala Sila Nui Helu 375 ia Poina Waimalu mamua aku nei, aohe mana oia hoolilo ana a'u, no ka mea, aole i hookaa iki mai o ua Poina Waimalu la i na dala he kanakolu iloko o ko'u lima, a hiki i keia la a'u e hoolaha nei ma ka Nupepa Kuokoa, nolaila, ua lilo loa ia palapala i mea ole mai keia la aku.
P. PUAKALA
Kamananui, Waialua, O, Oct. 29, 1878 883 4t
OWAU o ka mea nona ka inoa malalo iho, ke hookapu loa aku nei au i kuu aina holimalima i loaa mai ia'u mai ka Papa Hoonaauao mai, oia keAhupuaa o Makawao, ma ka mokupuni o Maui, aole e hookuu wale i na lio, pipi, ho-ki, kekake, hipa, kao a me ka puaa ma luna oia Ahupuaa o Makawao, ua kapu loa, aole e hookuu wale i na holoholona i olelo ia maluna. Ina o ka mea hookuu wale i kana mau holoholona me ke kulena ole, e hopu ia ao a e lawe ia i ka pa aupuni no ke no ke komohewa. A pela no na ano kanaka a pau, aole e kii wale i na mea a pau maluna o ua Ahupuaa la i oleloia maluna, a o ka mea hoolohe aku i keia mau olelo, e hana ia e like me ke kanawai o ka aina. E hoolohe i keia olelo hoolaha o pilikia auanei. T. AKANA LIILII.
Makawao, Maui, Oct. 1, 1878 881 tf
E NA
LEDE A ME NA KEONIMANA !
o ka
MAKANI APAAPAA O KOHALA.
E Kipa, E Naue, E Komo, A e ike i na Nani o kela a me keia ano o na Waiwai Hou Loa i hiki mai nei ma ko maua HALEKUAI MA KAIOPIHI!
Malaila no e loaa ai ia oukou keia mau Waiwai Maikai malalo iho nei :
NA PAPALE WAHINE HULU NANI HOU LOA E PULELO AI I KA MAKANI.
Ina no hoi e kau mai i ko poo, aohe i kana mai ua mea o ka Pulelo o na Lipine a me ka luhe maewa o ka Hulu i ke oho makani, nana aku no hoi, hele kela a “Kau ka Iwa he la makani," i ka ua mea o ka Nani Lua Ole, oia no oe la o ka HULU MAMO GULA LELOLELO O KA IU O GOMOHERA. NA KIHEI KUWELU.
O keia mau Kihei, aohe i laha ma na Halekuai e ae ma ko maua Halekuai wale no ; ua lawe mai maua no ka Pomaikai o na Lede papalina nohenohea o ua aina nei a ke aloha i anoi ai; ina no hoi oe e Hoani ae ana i ka Aluna Ahiahi.
Nolaila, ke kau leo aku nei maua ia oukou, ano wale no ka wa kupono e loaa ai keia mau Kihei Nani ia oukou NA LEI A-I HIPUU KIKEPA O NA KEONIMANA E LINOHAU AI Ke hoohiolo nei iloko o ko maua Halekuai na Lei A-i Silika o na ano waihooluu like ole he nui, e kau mai ai i ka A-i, aohe i kana mai ke kinikohu. Na Kamaa Hila Aulii a Mikioi o na Kane, Wahine a me na Kamalii.
O keia na Kamaa Hila Aulii Helu Ekahi a maua, i lawe mai ai no oukou e na Lede a me na Keonimana o ua Aina Haaheo nei. He mau Kamaa keia e uwe hone ai i ka Papa Lohi o Maukele, oia no oe la, o ka Leo o ke Kolohala i ka po Lai.
NA WAIALA MOANI ALA LOA. Eia pu no hoi ia maua na Waiala Moani Ala Lua no na Hainaka, e unuhi ae ai oe aohe i kana mai ka puia i ke ala me ke onaona.
NA KALAKOA. Eia no hoi na Lole Kalakoa ke ahu mokaki mai nei o na ano he nui wale.
Na Pahu. A pela no hoi me na Pahu Pake, i hele kela a panio lua o waho i ka waniki.
Na Moena. Eia no hoi ia maua na Moena Pake, oia no oe la o ka Pawehe o Niihau ka panio
Na Pa, Bola, & c. A eia no hoi ma ko maua Halekuai nei na Pa, Bola, Ipukukni, o ke nui a me ka liiii, a me na waiwai e ae he nui wale, he hiki ole ke hue pau aku i ka nui launa olle. O keia mau waiwai i hoakakaia maluna, e loaa no ia oukou ma ke kumukuai makepono loa.
AKINA & ASEU,
Kaiopihi, Kohala, Hawaii, Nov. 9, 1878. 885 tf
O MR. A. W. CARTER, ka mea i noho pokole ma ka makou hana, ke papa loa ia aku nei, aole e ohi a kikoo i kekahi dala, a lawelawe i ka hana ma ko makou inoa. A. S. CLEGHORN & CO.
Novemaba 5,1878. 885 lm no16
AHA Hookolokolo Kaapuni Apana Eha o ko Hawaii Pae Aina, ma ka hooponopono waiwai. Ma ka waiwai o Kaili k o Koloa, Kauai i make kauoha ole. Imua o ka Lunakanawai Kaapuni ma ke keena. Olelo kauoha e hoolaha aku no ke noi ana mai e koho i lunahooponopono waiwai. Ma ka heluhelu a me ka waiho ana mai o ka palapala noi a Mahoe w o Koloa, e hoike mai ana o Kaili no Koloa, Kauai, ua make kauoha ole ma Koloa ma ka la 2 o Maraki 1873, a e noi ana e haawi ia ka palapala hookohu lunahooponopono waiwai ia Frank Bindt k. Ua kauohaia o ka Poalua ka la 10 o Dekemaba 1878, ma ka hora 10 kakahiaka, oia ka manawa i koho ia no ka hoolohe ana i ua noi la imua o ua Lunakanawai la, ma ke keena hookolokolo o keia Aha ma Koloa, a ma ia manawa a ma ia wahi no e hele mai ai na mea a pau i pili e hoike mai i ke kumu, ina he kuma oiaio ko lakou e ae ole ia ai ua noi la. A o keia olelo kauoha e hoolaha ia ma ka olelo Hawaii i ekolu pule ma ke Kuokoa, he nupepa ma Honolulu. Kakauia ma Koloa ko Hawaii Pae Aina, Nov. 6,1878.
JACOB HARDY. 883 3t Lunakanawai Kaapuni Apana Eha H P A.
KAUKA T.P. TISDALE.
HOMEOPATIKA.
AIA kona keena a me kona wahi noho ma ke alanui Beritania, mawaena o ka halepule o Kaukeano a me ka pa o ka Moiwahine Ema. E hamama ana ke keena mai ka hora 8 a hiki i ka hora 10 am., a mai ka hora 1 a hiki i ka hora 3 pm. a me ka hora 6 a hiki i ka hora 9 o ke ahiahi. Honolulu, Nov. 12,1878.885 tf
P. NUI.
LOIO! LOIO!!
O ka Ua Ukiukiu o Makawao, Maui.
UA makaukau oia e kokua i na mea a pau e hele aku ana i ona la, ma na mea pili kanawai imua o ka Aha Apana a me ka Aha Hoomalu, me ka Aha Keena a ka Lunakanawai Kaapuni o Maui. E loaa no au ma ka Hale Hookolokolo o Makawao, a i ole ma Haiku.
885 1y no16
HENRY N. KAHULU
Loio a he Kokua ma ke Kanawai.
UA makaukau no au e lawelawe i na hana a pau ma ka Oihana Loio imua o na Aha a pau o ka mokupuni o Oahu. E loaa no au ma ko makou Keena Oihana ma alanui Papu, Helu 31. E hookoia na kauoha mai na wahi a pau o ka mokupuni me ka eleu a me ka hakalia ole. 885 1y nol6
ASA KAULIA.
Loio a he Kokua ma ke Kanawai.
UA makaukau au e lawelawe i na hana a pau ma keia Oihana imua o na Aha a pau o ka mokupuni o Oahu. E loaa no au ma ke Keena Oihana ma alanui Papu, Helu 31 ; a e hooko ia na kauoha mai na wahi a pau o ka mokupuni me ka eleu a me ka hikiwawe. 885 ly no16
MA ke keena o ka lunakanawai Kaapuni Apana 2 o ko Hawaii Pae Aina. Ma ka waiwai o Keolea k no Hana, Maui i make. Ua heluhelu ia a ua waiho ia ka palapala noi a Oninia w, e noi ana e hooponopono ia ka waiwai o kana keiki o Keolea k no Hana, Maui i make aku nei, a e hoonoho ia ia i lunahooponopono. Nolaila, ke kauoha ia aku nei na kanaka a pau ke pili, o ka Poaha oia ka la 21o Novemaba, 1878, ma ka hora 12 awakea, ma ka halekula ma Mokulua, Kaupo, oia ka la a ma kahi i koho ia no ka hoolohe ana i ua nonoi la a me na mea kue ke hoike ia.
ABR. FORNANDER,
Lunakanawai Kaapuni Apana 2 H P A.
Lahaina, Oct. 26, 1878. 883 3t
HAULE.
$10 Makana! $10 Makana!
UA haule he pine omau umauma i kinohinohiia me ke gula, ua manaoia ua haule maluna o ka mokuahi Likelike a i ole ma ka uapo ma ke kakahiaka Sabati Oct. 3. E uku ia aku no ka makana maluna ae i ka mea e loaa ai a hoihoi ae ma ka Hale Kuai Buke o Wini a me Robikana. Honolulu, Nov. 8, 1878. 881 tf
Kuai a ka Lunahooponopono Waiwai ma ka Waiwai Paa.
MA ka pono o ka palapala kauoha i hoopukaia e ka mea hanohano C. C. Harris ka Lunakanawai o ka Aha Hookolokolo Kiekie.
E kuai aku no au ma ka Poaono, oia ka la 30 o Novemaba ma ka hora 12 o ke awakea, ma ke alo iho o Aliiolani Hale, he kuai ma ke kuike i ka mea e koho kiekie mai ana, i na pono a me na pomaikai a pau o C. Kanaina i make, oia hoi keia mau waiwai paa malalo iho, penei :
Apana 1. He aina mahi kalo e waiho la ma Manananui, Ewa, Oahu, nona hoi ka ili he 88-100 eka.
Apana 2. Ma ia wahi no, he apana aina, oia hoi he hookahi pa hale a me ka aina kalo. O ka ili he 41-100 eka.
Apana 3. Ma ia wahi hookahi no, he hookahi aina kula a me ka aina kalo O ka ili he 24 eka.
Apana 4. Ma ia wahi no, he aina kala a me ka aina kalo, O ka ili he 130-100 eka
Apana 5. Oia hoi ka ili aina o Paakea, ma Ewa, he 19 eka aina kanu raiki i hoolimalima ia no na makahiki he 10 mai ka 1876 aku, ma ka $100, e uku ia ma ka hapalua makahiki; a he loko ia he 12 1/2 eka i paa pono i ka pa ia; a o na pono lawaia o Wahaloa, mawaho ae la o ka loko ia, nona ka ili he 53 eka, e kuai ia aku no keia apana aina me kela hoolimalima maluna.
Apana 6. Ma ka ili aina o Muliwai, Ewa, Oahu, he 3 1/2 eka he aina kalo a me ka aina kula.
Apana 7. Ma ia wahi no, he apana aina he 42-100 eka, he aina kalo a me ka aina kula.
Apana 8. Ma ia wahi no, he aina kalo he 3 57-100 eka.
Apana 9. Ma ia wahi no, he 40-100 eka aina kalo
Apana 10. He kahawai mai kela kapa a i kela kapa e kokoke ana i kahi i waiho ai kela mau aina maluna, he 7 89-100 eka ka nui.
Apana 11. Oia hoi ka ili o Kailele, Kalihi, Oahu, i mahele ia malalo iho.
Kailele he 26 eka, he kula a me ka aina wahie.
Leaha he 65 45 100 eka, he aina kula a me ka aina wahie.
Luaia he 9 eka he aina kalo. A e kuai pakahi ia aku no keia mau apana aina.
Apana 12. Ka aina o Pamoa, Manoa, Oahu, a me ka aina o Kolowalu ma ia wahi hookahi no, he 40 6-100 eka, he aina kalo i pau i ke kanu ia, ke hoomakaukau ia nei ke ana ana i keia mau aina maluna, a e kuai pakahi ia aku no.
Apana 13. Na aina o Kalehua a me Kukuiao ma Manoa, Oahu. he 22 1/2 eka. O ka aina o Kalehua ua hoolimalima ia no ke kanu raiki no na makahiki he 15, mai ka la 1 o Oct. 1878, a e kuai ia aku no me kela hoolimalima, he $235 ka uku hoolimalima no ka makahiki. A ke hoomakaukau ia nei ke ana kaawale ana o keia mau aina. A e kuai hookaawale ia aku no kela a me keia.
Apana 14. O ka aina o Haukulu a me Waihinui ma Manoa, he 112 1/2 eka, o ka aina hanai holoholona a me ka aina wahie.
Apana 15. O keia apana aina mahope aku o Kauka Makipine, ma ka aoao o ke alanui Puowaina, a e komo ana hoi mai ke alanui Ema a me kahi alanui uuku ma ka aoao hikina o kahi noho o Kauka Makipine- Apana A, he 3 18-100 eka, a o ka apana B, he 98-100 eka, he mau pa hale maikai loa keia, a e kuai hookaawale ia aku ana kela a me keia.
Apana 16. He apana aina ma ke awawa o Palolo, he 8 62-100 kaulahao kuea.
Apana 17. He apana aina ma Waiehu, Maui, he 1/2 eka.
Apana 18. Na aina o Manienie, Kaohe, Puhiawaawa, Kauanoku. Puohala a me Lemuke, e waiho la ma Wailuku, Maui. Aohe i ike ia ka nui o keia mau aina, aka, ke hoomakaukau ia nei ke ana pakahi ana i keia mau aina, a e pau ana i ke ana ia mamua o ka la e kuai ia aku ai.
E kuai kaawale ia aku no keia mau aina. O na aina o Kauanoka a me Puohala, ua hoolimalima ia i ka Hui mahiko o Wailuku, a ua makemakeia e uku i ka mea e lilo ai, ma ka $600 o ka makahiki mai ka la e kuai ia ai a hiki i ka wa e oo ai a e wili ia ai ke ko e ulu nei maluna o keia mau aina.
Apana 19. O ka aina o Puaaloa, ma Ukumehame, Maui, ke hoomakaukia la nei ke ana ana.
Apana 20. 1 Apana aina ma Kawaiku, Lahaina, he 19 mau pauku.
Apana 21. O ka apana aina ma Lahaina, mai ia J.Kahula a ia C. Kanaina, he 38 pole kuea,
Apana 22. 1 Apana aina ma ke ahupuaa o Kaholilea, Lahaina, i kuaiia e Nipoa a me kana wahine ia C. Kanaina, he 1 eka me 15 ruda.
Apana 23. 1 Apana aina ma ia wahi hookahi no, i kuai ia e keia mau mea ae la maluna ia C. Kanaina, he 2 ruda.
Apana 24. Ka aina o Paeohi ma Lahaina, he 1 eka, 1 ruda a me 12 pauku.
Apana 25. Ke ahupuaa o Anaehoomalu a me ka Loko ia ma Kohala Hema, Hawaii.
Apana 26. Ke ahupuaa o Kalahuipuaa ma Kohala Hema, Hawaii. O keia aina ua hoolimalima ia no na makahiki he 20 mai ka makahiki 1876 no ka $100 no ka makahiki, a e kuai pu ia aku no me kela hoolimalima maluna.
O ke ana ana o kela mau aina elua maluna, aia no ia ma ka lima o Mr. D.H. Hitchcock, a e loaa no i na mea a pau.
A pela no hoi me ka nui o na aina maluna, ke makemakeia no na mea e pili ana i keia kuai ana.
Na ka mea kuai mai e uku i ka hana ana i na palapala.
O na kuhikuhi a me ke ana ana o na aina i hoike ole ia 'ku ko lakou mau wehewehe ana, e ike ia no ma ke keena o W. C. PARKE.
Lunahooponopono o ka Waiwai o C. Kanaina i make.
Honolulu, Nov. 6. 1878
884 4t
Kuai a ka Ilamuku.
Ma ka pono o ka olelo hooholo i hoopukaia e ka Aha Hookolokolo Kiekie o ko Hawaii Pae Aina ma ka la 24 o Okatoba, 1878, ma ke koina a Antone no $104.06 kue ia Ah Kong.
E kuai kudala aku no au ma ke keena kudala o C. S. Bartow ma ka Poaono, oia ka la 7 o Dekemaba ma ka hora 12 o ke awakea, i na pono a me na pomaikai o Ah Kong i oleloia oia hoi he hookahi kaa lawe ohua hou maikai loa a paa no hoi. Aia wale no ke koe a uku mua ia mai na koina i olelo ia, a me na lilo a pau a me ko'u uku.
W. C. PARKE,
Ilamuku.
Honolulu, Nov. 8, 1878.
884 5t