Ka Nupepa Kuokoa, Volume XVII, Number 21, 25 May 1878 — Page 1
| This text was transcribed by: | Puakea Nogelmeier |
| This work is dedicated to: | George Kananiokeakua Holokai |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XVII. HELU 21. POAONO, MEI 25, 1878. NA HELU A PAU 860
KA NUPEPA
Kuokoa me ke Au Okoa
I HUIIA.
NA OLELO HOOLAHA - O na Olelo Hoolaha he 10 laina kakau lima, he Hookahi Dala no ka puka mua ana; elua puka ana, he $1.50; no hookahi mahina, he $2.00.
NA KANIKAU A ME NA MELE; - He 4 Keneta ka uku no ka lalani hookahi, ua like me $1.00 no 25 lalani.
HOOLAHA MAU: - E hoomanao na makamaka a e hookomo mai i na olelo hoolaha mamua ae o ke awakea Poaha, i ole e kaukai ia aku a kekahi pule ae.
E hoomanao e na lehulehu, aole e hoopukaia kekahi Olelo Hoolaha, Kanikau a me ke Mele, ke ole e hookaa mua ia mai ka uku.
MOOLELO O KE KAU
Ahaolelo o 1878
La Hana 11, Mei, 13, 1878.
Kamailio mai ke Kuhina Kalaiaina, ua hiki mai na Hons. Pilipo a me Kanealii, a ke noi aku nei au. E haawiia ko laua mau palapala hookohu i ke komite, hooholoia.
Na Palapala Hoopii.
Heluhelu mai ka Hon. Kaoliko, he palapala hoopii no Koolaupoko. E hoihoi i na lepera ma ko lakou mau mokupuni, haawiia i ke komite malama ola.
Heluhelu mai ka Hon. Kamauoha, he palapala hoopii no Kona Hema. E hookuu i na makua mea keiki mai ka elima keiki aku, haawiia i ke komite waiwai.
Heluhelu mai ka Hon. Halstead elua palapala hoopii no Makawao mai. 1 O ka poe i hiki ole aku ko lakou waiwai i ka $500, aole e auhauia i ka auhau kino 2. Aole e kuai i na aina aupuni ma ke kudala, hawiia i ke komite hookolokolo.
Ma ke noi a ke Lii Kaai ua kapaeia na rula, hoike waha mai ke komite wae no na hookohu o na Hons. Pilipo, a me Kanealii, ua nana lakou, ua kupono i ke kanawai, ua hoapono ke komite.
Ma ke noi a ka Hon. Aholo ua aponoia ka hoike a ke komite, a ua noi pu mai no hoi, e kii ia ka Lunakanawai Kiekie e hele mai e hoohiki i keia mau hoa.
NA HOIKE O NA KOMITE.
Heluhelu mai ke komite wae no ke alanui o Kakaako i kana hoike. Ua manao ke komite, he mea pono e hanaia i alanui malaila.
Ma ke noi a ka Hon. Hanauna, ua hoihoi hou ia ka hoike a ke komite, no ka mea, ua kue i na rula, aole i kakau inoa ka mea nana ka hoike , aole no hoi i kakauia ka la, a me ka makahiki.
Heluhelu mai ka Luna Hoomalu o ke komite hookolokolo i ka lakou hoike no ka palapala hoopii o Puna. E hoonoa i ke kohoia ana o ka Luna o Puna, malalo o na kumu ekolu i waihoia mai. Ua manao ke komite.
1 Aole io no i lawa kona waiwai paa,
2 He kanaka hana keia, a ua manao ke komite, ua lawa ia no kona loaa makahiki.
3 Aole i lawa kona ike ma ka helu waiwai, aka, ua manao ke komite, ua lawa iho la no. Ke manao nei ke komite, e apono i ka noho ana o keia hoa o ka hale.
Ma ke noi a ke'lii, Kaai ua aponoia ka hoike a ke komite, aole hoi i lawe ka hale a noonoo i ka hoike a ke komite, oiai hoi he mea nui keia.
Heluhelu hou mai ka Luna Hoomalu o ke komite hookolokolo i ka lakou hoike no ka Bila Kanawai. E hoololi ai i ka Pauku 780,o ke Kanawai Kivila i Luna Makaainana no Honuaula. Ua manao ke komite, e hoopanee loa i keia Bila Kanawai.
Ma ke noi a ke'lii Ake, ua aponoia ka hoike a ke komite.
Heluhelu mai ke komite waiwai i ka lakou hoike no keia mau bila malalo nei.
1 He Bila Kanawai. E hoopau ai i ke kanawai o na Lio Kea.
Ua manao ke komite, ua maikai no ke kanawai e pili ana i na Lio Kea.
2 He Bila Kanawai, e hoemi ai i ka uku o na Ilio. Ua manao ke komite, aole pomaikai ke aupuni ke mahuahua na Ilio, a ua manao ke komite, e waiho ma ka papa.
Ma ke noi a ka Hon. Smith, ua aponoia ka hoike a ke komite.
Waiho mai ke komite pai i ka hoike a ka Papa Hoonaauao.
NA OLELO HOOHOLO ME NA BILA.
Ma ke noi a ke'lii Kaai, ua kapeia na rula. Heluhelu mai oia no ka manawa mua he bila, e hoololi ai i ka Pauku 60 o ke kumukanawai. E kohoia na Luna Makaainana i kela a me keia ewalu makahiki. Noi mai ka Hon. Nawahi, e hoopanee loa i ka bila, kokua mai o Hon. Malo, a me ka Hon. Pilipo, i ka hoopanee loa.
Noi mai na Hons. Biketona. Kakela a me Aholo, e kali iki ka hoopanee loa ana, hooholoia.
Hoolaha mai o Hon. Biketona i kona manao. E lawe mai ana oia he mau Bila Kanawai. 1 He bila e hoololi a i i ka Pauku 512, o ke Kanawai Kivila.
2 He Bila e hoopau ai i ke Pauku 2. Mok 53, o na kanawai hoopai karaima.
Hoolaha mai ka hon. Aholo i kona manao, e lawe mai ana oia he Bila Kanawai, e hookuu ai i na paahana o na mahiko i na la Koho Luna Makaainana, a me na la kulaia o ke aupuni.
Ma ke noi ua kapeia na rula, heluhelu mai o Hon. Halstead no ka manawa mua, he Bila Kanawai. E hoololi ai i ka hooiaio ana i na palapala aelike. Haawi ia i ke komite hooponopono Bila Kanawai a waihoia malalo o na rula no ka heluhelu elua.
Heluhelu mai o Hon. Aholo he olelo hooholo. O ka Bila Kanawai, e hoololi ai i na pauku 61 a me 62, ma ka olelo Hawaii, e waiho nei ma ka papa, e hapai ae, a haawi aku i ke komite hookolokolo, hooholoia.
Heluhelu mai o Hon. Mahoe no ka manawa mua, he Bila Kanawai, e ae ai i na kanaka e lawaia ma na kai lawaia o na aina lei alii, a me na aina konohiki, a me na muliwai, koe no nae ka ia kapu a ke konohiki, haawiia i ke komite hooponopono Bila Kanawai. Heluhelu mai o Hon. Kauai no ka manawa mua, he Bila Kanawai, e hoololi ai i ka pauku 1 mokuna 39, o na kanawai o 1870, e hoemi ana i ka auhau lio i hapalua, waihoia i ke komite hooponopono Bila Kanawai. Hoolaha mai ka Hon Kapahu i kona manao , e lawe mai ana oia he Bila, e hoonoho ai i hookahi kanaka kupono ma kela me keia a pana, e hooponopono ai i ka manawa hana a me na aie o ka poe paa hana.
Heluhelu mai o Hon. Kapahu, no ka manawa mua, he bila, e hoololi ai i ka pauku 3, mokuna 56, o na kanawai hoopai karaima no ka haalele o na mea i mareia kekahi i kekahi.
Haawiia i ke komite hooponopono Bila Kanawai. Heluhelu hou mai oia he Bila Kanawai. E hoololi ai i ka pauku 2 mokuna 41 o na kanawai hoopai karaima, waihoia i ke komite hooponopono Bila Kanawai.
Heluhelu mai ka Hon. Paniani he olelo hooholo, e kauohaia ka Makai Nui. E uku aku i $40, no kela a me keia Makai no ka malama. Ma ke noi, ua haawiia i ke komite waiwai. Ma ke noi a Hon. Malo, ua kapae ia na rula, a heluhelu mai oia no ka manawa mua he bila, e hoopau ai i ka mokuna 41, o na kanawai o 1876, a e hoala hou ai i ka mokuna 27, o na kanawai o 1872. Haaia i ke komite hooponopono Bila Kanawai.
NA HANA O KA LA.
Hapaiia ka noonoo ana i ka Bila Kanawai, e hoololi ai i ka Puuku 892 o ke Kanawai Kivila, i Lunakanawai Hoomalu no Wailuku ma kona heluhelu ekolu.
Noi mai ka Hon. Kakela. E hooholo loa ia ka bila, kamailio mai ka Loio Kuhina. Ua noonoo au i na olelo a ke'lii Kaai, a me na olelo a ka Luna o Molokai, a me ka ka Luna Helu 1, o Lahaina, nolaila, ua kanalua au i ka pono o ka hooholo koke i keia Bila. Nolaila ke noi nei au, e haawi i keia bila i ke komite hookolokolo, hooholoia ma ke noi a Hon. Aholo, a ua hoopanee ka hale, a halawai ma ka la apopo hora 1 p.m.
LA HANA 12, Mei 14, 1878.
NA PALAPALA HOOPII
Heluhelu mai ka Hon. Kealawaa he palapala hoopii mai Puna mai, e kuaiia na koena aina aupuni i na kanaka Hawaii, aole hoi e kuai ia ma ke kudala; waihoia i ke komite o na aina aupuni a me na hana hou.
Heluhelu mai ka Hon. Paniani he palapala hoopii no Honoluala nei, e ae ia na kanaka Hawaii e inu akea i ka rama.
Noi mai ka Hon. Aholo, e waihoia keia palapala hoopii ma ka papa a hiki i ka manawa a ka luna o Honolulu e lawe mai ai i kekahi bila kanawai e pili ana ia mea.
Noi mai ka Hon. Hanuna e hoopanee loa i ka palapala hoopii.
Kamailio mai ka Hon. Keau ma ke kokua i ka aoao o ka palapala hoopii, a olelo mai aole pono ke hoomoe wale i ka palapala hoopii me ka ike ole ia o na kumu kupono e hoomoe ai. Mahope o ka noonoo ana, ua hooholoia e like me ke noi a ka luna helu 1 o Lahaina.
Heluhelu mai ka Hon. Kanealii he palapala hoopii no Wailuku, e wehe akeaia ke awa o Kahului i awa ku moku. Noi mai ka Hon. Aholo e waihoia keia palapala hoopii ma ka papa, a hiki i ka wa e lawe ia mai ai ka bila a ka luna o Wailuku, hooholoia.
Heluhelu mai ka Hon. Kaoliko he palapala hoopii no Honolulu, aole e lawe koke ia na mai lepera i Kalawao, a pau keia Kau Ahaolelo. Haawiia i ke komite malama ola.
Heluhelu mai ka Hon. Palohau he elima mau palapala hoopii no Hanalei a me Anahola mai. 1 He palapala hoopii, e hoopau ia ka auhau lio, a e hoihoiia ma ka auhau waiwai lewa, haawiia i ke komite waiwai.
2 He palapala hoopii, e hoomahuahua ai i ka uku o ka lawe leta ma ia mokupuni, haawiia i ke komite o na hana hou. 3.He palapala hoopii, e hoamiia ka auhau dute i hapaha keneta no ka haneria; haawiia i ke komite waiwai. 4. He palapala hoopii, e hookaawale ke aupuni i kekahi haawina no ka Hooulu Lahui, a e haawi akuno kekahi poe mea keiki lehulehu; haawiia i ke komite hoonaauao. 5. He palapala hoopii, e hookaawaleia ka hapakolu o na loaa aupuni i mea e hookaa aku ai no ka aie lahui &c. Haawiia i ke komite waiwai.
Heluhelu mai o Hon. Kanealii he palapala hoopii no Wailuku mai, e hoemia ka nui o na koa a e haawiia ka hana i na makai, waihoia i ke komite o na hana hou.
Heluhelu mai o Hon. Kamauoha he palapala hoopii no Kona Hema mai, e hoemi ia ka auhau lio i hapalua; haawiia i ke komite waiwai.
NA HOIKE O NA KOMITE.
Heluhelu mai ka luna hoomalu o ke komite hooponopono bila kanawai i ka lakou hoike no na bila malalo nei.
1 He bila e haawi ai i ka mana i na lunakanawai hoomalu a me apana, e hookolokolo i na hihia no ka hoopaahao hewa. 2 He bila e hooponopono ai i na alanui a me na alahaka ma ka mokupuni o Maui. 3 He bila e hoakaka ai i ka nui o na dala ohi mua a ka poe malalo o ka aelike i hoakaka ia ma ka pauku 1417 o ke Kanawai Kivila. 4 He bila e auhau ai i na bipi i hapaha dala no ke poo. 5 He bila e hoololi ai i ka pauku 3, mokuna 56 o na Kanawai Hoopai Karaima. 6 He bila e hoololi ai i ka pauku 2, mokuna 41 o na Kanawai Hoopai Karaima. 7 he bila e hoololi ai i ka pauku 1 mokuna 39 o na kanawai o 1870. Ua manao ke komite ua maikai keia mau bila, ma ke noi ua aponoia ka hoike a ke komite.
Waiho mai ke Kuhina Kalaiaina i ka nui o na kai lawaia, ka Oahu, Kauai a me Lanai, ua maopopo na kai lawaia ko Hawaii, Maui a me Molokai, aole i maopopo.
Waiho hou mai no oia i kana hoike no ka aina o Naaikauna (k), ma Kealakaha, Hamakua, Hawaii, e like me ka maano o ke komite hookolokolo. Ua ike ia no he mau kumu kupono i hiki ole ai ke haawi aku i ka palapala Sila nui, ua manao ke komite, ua pii ae ka waiwai o kela aina i keia wa, u ua pii pu ae me kona kumukuai, nolaila ua manao ke komite e hoihoi aku i na dala he $76.35, a e hookomoia ia mau dala iloko o ka bila haawina.
Ma ke noi a Hon. Smith, ua waihoia ka hoike ma ka papa a hiki i ka wa e noonoo ia ai ka bila Haawina.
NA OLELO HOOHOLO ME NA BILA.
Heluhelu mai ka Hon. Aholo he olelo hooholo, e kauohaia ka makai o ka Hale e hoolako mai i na hoa o keia Hale pa 200 pooleta pakahi, o ke pooleta elua keneta, hooholoia.
Noi hou mai no oia imua o ka Hale,e hookuu iaia no kekahi mau la no ka pilikia o kona ohana; ua ae ia e hele.
Hoolaha mai ka Hon. Kipikona i kona manao, e lawe mai ana oia he bila kanawai e kau ai i kekahi auhau maluna o ka waiwai o ka poe i make.
Hoolaha mai ka Hon, Kanealii i kona manao, e lawo mai ana oia he bila e hoopau loa ai i na pauku 1-6 o ka mokuna 57 o na Kanawai Hoopai Karaima.
Heluhelu mai ka Hon. Hanauna no ka manawa mua, he bila kanawai e hoololi ai i ka pauku 4, mokuna 14 o na kanawai o 1870, e pili ana i ke kuai awa; haawiia i ke homite hooponopono bila kanawai.
Kamailio mai ka Loio Kuhina, ua like ole kona manao me ko ka luna o Kohala no ka papa nana o Waimea, Kauai, noi mai oia e haawi aku ke Kakauolelo i kope o kela olelo hooholo.
Hoakaka mai ka luna o Kohala i kona manao no ia mea.
Heluhelu mai ka Hon. Pilipo he olelo hooholo, e kauohaia ke Kuhina o ko na aina e, e hoakaka mai i ko ke aupuni manao ana a hoolaha ana i ka hoopau ana i ka pauku 4 o ke Kuikahi mawaena o Hawaii nei me Beritania &c. Ma ke noi a ke Kuhina Kalaiaina, ua haawiia i ke komite o na aina e.
Hoolaha mai ka Hon. Malo i kona manao, e lawe mai ana oia he bila e hoopau ai i ka pauku 1 mokuna 41 o na Kanawai Hoopai Karaima, e pili ana i ka waiona.
Heluhelu mai ka Hon. Moanauli no ka manawa mua, he bila e hoololi ai i ka olelo Hawaii i olelo kumu, ke kue ka olelo Beritania me ka olelo Hawaii; haawiia i ke komite hooponopono bila kanawai.
NA HANA O KA LA.
Hapaii ka noonoo ana i ka bila kanawai e hoololi ai i ka pauku 1423 o ke Kanawai Kivilo ma kona heluhelu ekolu ana. Noi mai ka Hon. Pikekona, e haawi i keia bila no ke pai.
Hookomo mai ka Hon. Kakela i kana hoololi i manao ai, oia keia : "A i ole o kona hope a o kona luna paha nana i hana ino."
Kamailio ikaika mai na Hons. Nawahi a me Keau, a me ke lii Kaai i ka pono o ka bila.
Kue mai hoi ka Loio Kuhina a me ka Hon. Malo i ka bila. hoakaka mai ka Hon. Kapahu i ke kumu o kona lawe ana mai i keia bila, wahi ana, ma ka apana o Kau, he nui oa hana ino a na haku a me na luna i na kanaka paahana.
Mahope o ka noonoo ana, ua hooholo loa ia ka bila me ka hoololi a ka luna o Kohala.
Noi mai ke lii Kaai e hoopanee i ka halawai a noho hou i ka la apopo, hora 1 p m hooholoia a hoopanee ka Hale.
LA HANA 13 MEI 15, 1878.
NA PALAPALA HOOPII.
Heluhelu mai ka Hon. Kanealii he palapala hoopii no Wailuku, e hoonohoia i lawe leta ma Waihee, Waiehu, Maui; haawiia i ke komite o na aina aupuni a me na hana hou
Heluhelu mai o Hon Paniani he palapala hoopii no Honolulu, e hookuu akea ia ka rama i na kanaka Hawaii; haawiia i ke komite hookolokolo.
NA HOIKE O NA KOMITE
Heluhelu mai-ka luna hoomalu o ke komite hookolokolo no ka palapala hoopii mai Makawao mai,e noi ana e ae mai ke aupuni o na aina aupuni e kuai me kanaka Hawaii, aole ma ke kuai kudala. Ua manao ke komite e waiho loa i keia palapala hoopii. Ma ke noi a ke lii Kaai, ua waihoia ka hoike ma ka papa.
Heluhelu mai ka luna hoomalu o ke komite hookolokolo i ka lakou hoike no na bila malalo nei. 1 He bila e hoololi ai i na pauia. 60 me 61 ma ka olelo Hawaii, e hooponopono ai i na hihia Karaima. 2 He kanawa, e hoololi ai i ka pauku 892 o ke Ka, @@@ Kivila, i Lunakanawai Hoomalu no Wailuku. O ka manao o ke komite no ka bila mua, he mea pono ke hanaia ma ka olelo hooholo penei: Olelo Hoohlo, hooholoia, oiai ma ke Kau Ahaolelo o 1876, ua hooholoia no keia mau pauku, nolaila, e kauoha keia Hale i ke Kakauolelo, e hoomakaukau oia i ka wa e pai ia ai na kanawai o keia Kau, e pai pu ia me ia muu pauku. O ka manao o ke komite no ka bila elua, he bila maikai ia. Ma ke noi ua apono ia ka hoike a ke komite.
Heluhelu mai ka luna hoomalu o ke komite hookolokolo no ke koho balota ma Molokai, elua hoike a ke komite ma keia palapala hoopii.
Heluhelu mai o Hon. Kakela i ka hoike a ka hapanui o ke komite, no ka palapala hoopii o Molokai, e kue ana i na balota o kalaupapa, i waihoia mai malalo o na kumu eha penei: 1 Aole i hoomakaukau ka luna auhau i papa inoa o ka poe kupono i ke koho balota. 2 He iwakalua wale no poe koho o Kalaupapa i loaa na palapala kupono i ke koho balota, aka, ma ka pahu balota he kanaha balota. 3 Aole i hoolaha ke Kuhina Kalaiaina i kanakolu la mamua o ke koho ana. 4 O ka mana koho ua haawiia mamuli o ke Kumukanawai. Ua manao ka hapanui o ke komite, he mea pono i ka Loio Kuhina e nana i keia, a ke manao nei no hoi ka hapanui o ke komite e hoole i ka palapala hoopii o Molokai.
Heluhelu mai ka hapa uuku o ke komite i kana hoike penei: Ua manao ka hapa uuku o ke komite, aole pono kela koho balota ma Kalaupapa, a ke manao nei au, e haonoa i ke kohoia ana o ka Hon. Kupihea.
Noi mai ka Hon. Kupau, e apono i ka hoike a ka hapanui o ke komite, a e hoopanee loa i ka hoike a ka hapa uuku.
Noi mai ka Hon. Mahoe e apono i ka hoike a ka hapa uuku o ke komite.
Noi mai ke lii Kaai e noonoo ia na hoike a elua imua o ka Hale; hooholoia.
Mahope o ka noonoo ana o na hoa no keia mau hoike elua, ua aponoia ka hoike a ka hapanui o ke komite.
Heluhelu mai ka Hon. Malo no ka manawa mua he Bila Kanawai. E hoopau ai i ka pauku 1. Mokuna 41, o na kanawai hoopai karaima. Haawiia i ke komite Hooponopono Bila Kanawai.
Heluhelu mai o Hon. SMith no ka manawa mua, he Bila Kanawai. E kauoha ana i na Kuhina e hele kaapuni i na mokupuni, i elua kaapuni ana i ka makahiki; haawiia i ke komite hooponopono bila kanawai.
Heluhelu mai o Hon Pekekona no ka manawa mua he bila kanawai, e hoololi ai i ka pauku 513 o ke Kanawai Kivila; haawi ia i ke komite hooponopono bila kanawai, a waiho aku no ke pai.
Heluhelu mai o Hon. Pekekona he olelo hooholo, e kauoha ia ke komite pai e hele e ninau i na hale pai, no ke pai ana i na bila, a e hanaia i aelike, o ka mea emi loa malaila e pai ia ai na bila.
kokua mai ke Kuhina Waiwai i ka olelo hooholo, a ma ka ninau ana, ua hooholoia ka olelo hooholo.
Heluhelu mai ke'lii Kaai, he olelo hooholo. E haawi keia hale hanohano i ka mahalo nui i ka Luna Hoopuka o ka "Nupepa Ko Hawaii Pae Aina," no kona makana wale ana mai i na hoa o keia hale i na nupepa he kanalima. Hoololi mai ka Hon. Nawahi, me ke Capt. Horborn kekahi o ka mokuahi "Kilauea Hou," no kona ae ana mai i na hoa o keia hale. E hoau mua i kona moku. Hooholoia ka olelo hooholo me ka hoololi.
Hoolaha mai ka Hon. Keau i kona manao. E lawe mai ana oia, he Bila Kanawai, e hoololi ai i ka pauku 25 o ke kanawai o ka 1865. E hoopau ana i ka mokuna 10, o ke Kanawai kivila.
Heluhelu mai ka Hon. Kakela he olelo hooholo, e kauoha ia ke Kuhina Kalaiaina, e hoike mai i ka olelo aelike no ka papa pai, a me ka nupepa haole "Hawaiin Gazatte." Hooholoia.
Heluhelu mai ke Kuhina waiwai no ka manawa mua, he Bila Kanawai. E hoololi ai i ke kanawai no ka auhau alanui , haawiia i ke komite hooponopono Bila Kanawai.
Hoolaha hou mai oia i kona manao. E lawe mai ana oia he Bila Kanawai, e hoololi ai i ka mokuna 44, o na Kanawai 1876.
Heluhelu mai ka Hon. Kaiaikawaha no ka manawa mua he Bila Kanawai. E auhau ana i ka Hui Hoopaa ola, pauahi, moraki. Haawiia i ke komite hooponopono Bila Kanawai.
Heluhelu mai o Hon Bikekona he olelo hooholo, e kauohaia ke Kuhina Kalaiaina e hoike mai i na palapala a pau o ka holo ana 'ku nei o Capt. Mist, hooholoia.
Heluhelu mai o Hon. Kauai no ka manawa mua, he Bila Kanawa. E hoololi ai i ka pauku 12 mokuna 86, o na kanawai, hoopai karaima. Haawiia i ke komite hooponopono Bila Kanawai.
Heluhelu mai o Hon Malo he olelo hooholo, e kauohaia ka Luna Wai. E hoomoeia i paipu wai ma ke Alanui Beritania.
Noi mai o Hon Bikekona. E haawiia keia olelo hooholo i ke komite o na hana hou. Hooholoia. Hoopanee ka Hale, a i ka la apopo hora 1.
LETA A NA MAKAMAKA.
E KA NUPEPA KUOKOA;Aloha oe:-
Ua ike iho nei au ma ko kakou Kilohana i ka Nane a K.-i hoike ia ma ka Helu 16 o ka la 20 o Aperila, nolaila ke nonoi aku nei au i kou lokomaikai e hookomo iho i ka'u haina i manao ai no ua Nane ala, oia hoi keia malalo nei. MOANIALA, ma keia haina, ua pau loa na hua mai 1 a hiki i 8 a he 8 nohoi ka nui o na hua e like me ka makemake o ka mea nana ka Nane. Owau no me ka oiaio. SIMON K KAWAI, Jr.
Kapaa, Kauai, Mei 3, 1878.
[Ke apono aku nei makou i ka haina a ka makamaka. L.H]
HE MAKANA NANI.
E MR LUNAHOOPONOPONO; ALoha oe-
Ma ka la Sabati la 21 o Aperila, 1878, oia ka la i hoolaaia ai ka Luakini o Kahana ma Kaanapali, na Rev. A Pali a me J Hanaloa. Ma ia la ua hele mai o D Mamaki ke Kahukula Sabati o Wainee, oia hoi keia: he Baibala a me ka Himeni, o ka lilo o ke Kula Sabati o Wainee no keia mau makana nani; he $15. Ua pai hua keleawe ia mawaho o ka ili o ka Baibala a me ka Himeni. Eia na hua i paiia, "He makana na ke Kula Sabati o Wainee i ka ekalesia o Kahana." I ka nana iho i keia mau makana nani ua oi keia mau makana mamua o na mea a pau. No ka mea, e lilo e a lani a me ka honua, o ka olelo aole e pau. Nolaila au i olelo ai, he mau makana nani kiekie keia. Ke haawi aku nei au i ko'u mahalo piha i ke Kula Sabati o Wainee, me ka mahalo. Ke hoi nei ke keiki o Kauanahua ua ahiahi. SAMUELA PAKI.
Honokawai, Maui, Aperila 24, 1878/
NO KA MALU HEKUAWA.
He ua nui ma Wailuku nei, i ka la 29, o Aperila, o ka ua paha ia la, ke hele ala ka wai a popoi i na hale moe, o ke ko keia a J C Bailey, ua loohia aku la e ka waikahe ua pau, oia ke ko malalo o Kalua e pili ana me Waikapu, ua uhi pu ia aku la ma ne loi kalo paapu, o ka wai hoi e pili a la ma ka aoao ma Waiehu ho'la pa ia mai la ke ko a W O Smith, heokui ia mai me ka hale moe o Wm H Cummings, a me ko W K Kaailau, Keawe, Kaimiwa, a me J N Kapoohiwi, holo hou aku la ka wai malalo o ka pali one a hiki ma ka hale o Makaane, piha pu i ke one komo aku la ka wai malalo o ka pali one a hiki ma ka hale o Makaane, piha pu i ke one komo aku la ka wai i ko Ioane hale, palaha pu ia aku la ke ko a Wm H Cummings, aole nae he ola i poino; o keia wai i olelo ia ae la maluna, he wai no na pali, o ke kahawai nui, aohe wai. O keia wai he mea kupanaha wahi a na kamaaina, aole mai kahiko mai. Ua pau wau maanei ke wehe mai nei ke alaula.
J W KANAKAOKAI.
MAIKAI KA HOI KA PAPA!
A ME
KA LAAU O KOU HALE
NO HEA LA?
KAI NO HOI NO KAHI O
WAILA MA!
Nana aku no hoi ia la
Ohi ka Io o ka Laau o Makawao
I ka ua mea hoi o ka nani o
Na PAPA! Na PAPA!!
A ME
NA PONO KUKULU HALE O NA ANO NO A PAU.
Aia ma ke kihi o na
ALANUI PAPU me MOIWAHINE!
HONOLULU
MALAILA E LOAA AI
E LIKE me ka MAKEMAKE
NO KE
KUMUKUAI MAKEPONO LOA!
PAPA! PAPA! PAPA!!
Na Papa Huluhulu,
Na Papa Manoanoa,
Na Papa i kahiia,
Na Papa Kepa,
Papa Hele Keokeo,
Papa Hele Ulaula.
NA LAAU, NA LAAU!
Na Kua,
Na Kaola,
Na Aaho,
Na Molina,
Na Peapea,
Pina Huluhulu,
Pine i kahiia.
NA Papa a me na Laau Ulaula!
Pili ulaula,
Pili Keokeo,
Pani Puka,
Pani Puka Aniani,
Ipuka Aniani,
Puka Olepelepe.
PENA O NA ANO A PAU!
Hulu Puna mai ka Liilii a ke Nui,
Aila Pena,
Aila Hoomaloo,
Waniti, Pale.
NA LAKO O KELA A ME KEIA ANO!
Na Ami Puka Hale.
Na Ami Puka Pa.
ANIANI!
Pepa Hale a me na Lihilihi
E LOAA NO MALAILA.
PAAKAI HELU 1 O KAKAAKO me PUULOA
No ke DALA KUIKE, e loaa no na mea a pau i haiia ae la, no ke Kumukuai Emi loa. O na kauoha a pau mai Hawaii a Niihau, e loaa'ku ana ia lakou, e hooko koke ia no ia me ka lawa pono.
E Kipa Nui Ilaila, i ike i ka Oiaio.
04 3ms
{END]