Ka Nupepa Kuokoa, Volume XVII, Number 17, 27 April 1878 — Page 4
| This text was transcribed by: | Malialani Cabaniss |
| This work is dedicated to: | Hawaiinuiakea School of Hawaiian Knowledge |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA
Kuokoa me ka Au Okoa
I HUHA.
No ka Makahiki, 82. Eono Mahina, 81.
Dala Kuike ka Rula.
APERILA 27, 1878.
OLELO HOOLAHA.
E halawai ana ka Ahahui Lunakahiko o na mokupuni o Maui, ma ka Poalima elua o Mei, M H 1878.
A ke paipai ia aku nei na Ekalesia, a pau oia Aha, e hele pau loa mai na Kahu, Haiole lo, a me na lunakahiko. A ke paipai pu ia ʻku nei na Ekalesia kahu ole, e hele mai ko lakou mau lunakahiko me ko lakou mau palapala kahea kahu no lakou, e makaale, a mai hoopoina.
O. NAWAHINA, Kakauolelo
Art Thou Weary?
Colonial Singer, No. 161.
Quartet. Eha mea himeni no ka pauku mua wale no.
1
Luhi anei oe, ke hoa,
A kaumaha e?
Ku a hele io Iesu la.
I mahaʻe, i mahaʻe.
2
Ninau. Nana anei e hoomaha,
A hoona maikai?
Pane. Maha oe, wahi ana,
Hele mai, hele mai.
Hui. Maha oe, wahi ana,
Hele mai, hele mai.
3
Ninau. He lei maikai anei kona
Noʻu ke hele ae?
Pane. He lei nani a mae ole
No kou lae ke maemae.
Hui. He lei nani a mae ole
No kou lae ke maemae.
4
Ninau. I na pili au ia Iesu
Waiwai anei au?
Pane. Waiwai no, pau na kaumaha,
Oli mau, oli mau.
Hui. Waiwai no, pau na kaumaha,
Oli mau, oli mau.
5
Ninau. A heaha la kuu uku
Ma ke ao ma o?
Pane. Aia hala foredane,
Ola no, ola mau.
Hui. Aia hala foredane,
Ola no, ola mau.
HAWAII.
Na Misiona.
Ua minamina makou no ka hoapono ole ia ana o Mr. S. Hookano a me kana wahine e ka Papa Hawaii, i mau hoahana no ko na aina e; a ua haule wale ko makou hoolaha ana pela ma ka pule i hala ae nei. Ua hoaponoia no laua me ka lokahi o na hoa a pau imua o ke Komite, aka, i ka hoea ana imua o ka Papa, malaila kahi i haule ai, no na kumu i ike ia malaila. Aka, aole i hoemi ia ko makou mahalo a me ko makou hilinai ana maluna o keia mau hoa opio i haawi ia laua iho no ka hana iwaena o ko na aina e, a ke manao nei makou, na ke au o ka manawa e hoike mai i ko laua oiaio a me ko laua pono.
Ua loaa mai nei ia makou mai ke Kakauolelo mai o ka Papa Hawaii, kekahi mau leta mai na Pae Aina mai o Maikonisia, a ke hoolaha aku nei makou malalo iho, no ka pomaikai o na hoa heluhelu: BUTARITARI, DEK. 31, 1877.
Rev. H. Binamu, ke kakau leta o ka Papa Hawaii, aloha nui oe a me Binamu wahine, oluolu no makou e noho nei. Oia mau no na hana ma keia mau kihapai, aole hoihope hou na hoahanau elike me na makahiki ma mua, ua kupaa no na hoahanau e noho nei, me he mea la he opala ka mea i helelei, a koe ka mea io. Aole nae i haalele mai o Satana i kana hana i waena o keia mau kihapai, aole hoi i maule ka maau e hoihope ai, ua hoi hou mai kekahi poe i haalele ai, a ua mihi mai, ke ola maikai nei na hoahanau o na Ekalesia maanei.
Ua haalele akula au i koʻu kihapai, no ke kahea ana o na hoahanau o Butaritari nei, e kokua aku ia lakou no ke kukulu ana i ko lakou Halepule, o ka akahi malama keia o ka hana ana, e pau ana iloko o Januari o keia makahiki ae. Ke ku nei ma kahi kokoke i koʻu hale ma Meaʻn iho.
A pau keia hana, alaila, e hana hou ana au i ka Luakini ma Kuma i hooleiia ka hale maluna e ka makani, ua loaa ka puna a me ka wahi, o ka hoomaka o ka hana ka mea i koe, e aloha auanei, ke aloha aku nei o Meri ia olua a nui.
R MAKA
BUTARITARI, JAN. 1, 1878.
Rev. H Binamu, aloha nui oukou a mau loa aku. Hora elua o ka po keia wa.
Eia no makou a pau ke ola maikai aku nei i keia po, aole omaiaai, e hai ae oe i koʻu aloha piha i ka Moi o ko Hawaii Pae Aina, a me na kaukaualii a pauloa, a me a me na hoahanau a pau loa, mai Hawaii a hiki loa aku i Niihau.
Ke kukulu nei makou i ka luakini hou o makou, kokoke e paa, aole nae e maemae ana oloko ua heo e na wahi dala, o ka huina pau o na dala i lilo aku nei, ($325.68), ekolu mea i koe, o ke pena, a me ka papa lahilahi pale oloko, a me ka pele. A ke hoooaku ae nei i kahi e loaa ai keia mau hemahema, a nolaila, ke olena aku nei koʻu mau wahi maka ia oe, e Hawaii imi loa, ka mea nana i imi mai nei a loaa ana o kai lilo nei.
E na hoahanau aloha, na leau i hoomaikai, nona ko kakou aloha, a nona no ko kakou ola nei, eia kaʻu wahi noi ia oukou, e alu ka pule ia Hakalau i pau ai ko makou mau hemahema, he kanawalu ka huina o na wahi hoahanau mai ka hookumu ana o keia Ekalesia, a ua pau i ka hoi hope, a o kahi poe, ua komo aku ina Ekalesia e, a ua make hoi kahi poe. A he umi wale no mau wahi hoahanau e noho pono nei i ka Ekalesia, aole o makou kanalua iki, a hoi hope no ko lakou lauwili imua a i hope, e hele no kakou imua a hiki i ke oo ana.
No na hana a ka Haku ma keia kihapai, ua mau no kahi mau hana maikai, oia na halawai a me ke kokua dala mahinahou a me ke kokoa dala luakini a me ke kaapuni i ke kihapai, ua inu lama hou ae nei kanaka o keia aina, elima mau moku i ku mai nai. Ua pau au maanei. Owau no ko oukou wahi pokii.
J W KANOA
MEJURO, JAN 4, 1878.
Rev. H. Binamu, Aloha oe:--Me ka lokamaika o na lani eia no maua ke ola maikai nei. He oia mau no ka noho pouli ana o ka aina nei, kue no naʻlii kekahi me kekahi, paa no ko lakou manao no ke kaua. Eia hoi, he ane kaua kuloko ma Arona i keia mau la e nui ae ana paha, aole paha, ua au hee mai nae kekahi mau alii ma keia aina. Ua palapala aku au ia oe ma ka moku Newzland, a e hiki mua aku ana paha ia leta ia oe. Aia maia leta, ua hoakaka au i na mea o maua i poino ma ka moku, a na oukou e noonoo. E hai i ko maua aloha i na haumana o ke kula kaikamahine o Kawaiahao, auhea la ka poe aloha i keia poe Pegana? Ua makaukau anei kekahi o lakou, e lawe i ke kea o Karisto a auamo, e hoonele ia ana anei ka hikimua i kona ukali? E na makamaka o maua iloko o ka Haku Iesu Kristo, o ka leo aloha o ko kakou Haku e pae mai nei, he leo i oi aku aku ke aloha mamua ae o na makua o kakou a me na kumu. Ke kike mau nei oia ma ka puka o ko kakou mau pepeiao me ka i ana. "E hele ae oukou e hoohaumana i na lahui kanaka a pau, a bapetizo ana i na inoa o ka Makua o ke Keiki, a me ka Uhane Hemolele. "Oia ke oki ana, ke hui pu aku nei maua o Miriama i ke aloha no oukou a pau loa, a na ka lokamaikai o ka Mea Mana loa e malama ia kakou, aloha.
S W KEKUEWA
JELUIJ, JAN. 10, 1878.
Rev. H. Binamu, Aloha oe.--O ka leta au o ka la 14 Dek 1877. loaa mai la ma ka la 29 no o Dek. a me na nupepa, hauoli maoli, ku no ke la moku maanei a ma koʻu hale nei o Capt. Campbell, Jan 1, 1878 holo aku oia, o ko Ebon Eke leta aole i lawe ia, e ia maa nei a loaa ka wa pono, a pela no ko Gilibati mau palapala, aole i loaa ka moku kupono.
Nui na mea hou ma ka Nupepa, aloha Mr. Pogue, a me Mr. Andrew, kuu mau alakai o kuu mau la opio, a pela no na Elemakule a pau na makua alakai uhane. No makou iho, ma na la hope o ke la makahiki a i keia makahiki hou, loaa iaʻu he wahi ano ikaika ma ke kino a ke olioli nei au i na e ae mai ka Haku o koʻu kulana ke ia a oi ae, alaila ua makaukau no ka hana o keia makahiki hou. Koe no nae ke la apana iwi poo e waiho wale ana, aole no wau i hoohana iaʻu iho me ka ikaika i keia wa e oluolu nei a e akahele ana, a o kau wahine aole lawa loa no ka oluolu, no ka luahine iho paha ke kahi, he oluolu ke ola o na keiki ekolu.
Ua hoi hope no kekahi mau hoahanau no lakou iho kekahi, a no ka ikaika o ka hoowalewale o naʻlii ka hapanui, minamina nui au i keia hana ino a naʻlii, he kula ohana ko maua a hanai no hoi, he umi a oi aku haumana, me maua na mea apau, a nolaila, aole piha mau na wa kula, no ka lilo o kahi hapa i ka wa huli no na mea e ai ai, a no ka wela o ka hahana a ka wi kekahi ma ko maua wahi e noho nei, a no naʻlii hoi e noho pu nei me makou me na kanaka o lakou. O ka makou wahi niu a wahi hala, he mea ole ia ua pau e mamua o ka wa kupono no ka ai aku, o na holoholona pau pu maila no. He poe malihini keia, aole o ko ka aina nei, a o naʻlii ko lakou kumu e noho nei. kolohe naʻlii kolohe na kanaka. E ao ia mai lakou e kekahi mana e ae ke ae mai ka Haku.
No Hokuao, Nov. 5,1877. Oia kona la ia haalele hope ai i keia aina a huli aku i ke komohana, ua waiho ia o Mr. Kaaia ma, a me Mr. Nawaa ma, ma koʻu hale no na la 6 no kekali ana i ka moku e hoi hoi ai ia lakou i ko lakou mau aina, minamina loa au i kuu mau hoa no ka uuku o ko lakou mau mea ai i hoi mai nei, i na he ai ko lakou mau aina alaila, ua lawa a i ole ia, e haule pu paha, aole no hoi i ko kua ia mai ko lakou noho ana maanei, a no ka nui ae o ka mana ai i keia makahiki, ua lawa na hookiana me ka walohia.
He mau leta kai loaa mai nei i keia kakahiaka, no Mr. Kekuewa ma a me Mr. Kaaia ma, he oluolu ko lakou mau ola kino, ke nee nei i mua ko Arno ma aka lima o Mr. Kaaia ma, ke ku nei ko Mejero. "A no ka apana o ka hana ma keia aoao, aole no he mea e hoolana ia ai, he mau ao hakumakuma ke uhi mau nei." Wahi a ka anela o Mejero.
Ua kau leta mai la hoi o Mr. Nawaa kekahi o na kiai o Mile Dek. 15, 1877. He oluolu na ola oiwi o lakou, a ke nee nei i mua na hana, a ua hookaawale ia kekahi o na paa hana mai ka noho akoakoa ana a hoi aku la ma kekahi apana e noho ai, pomaikai ko Mile elua paa hana. (Rev. J. Lokomoir kumu o Makala.) Ke hoopau nei au, e aloha aku i ka lahui.
D KAPALI
ABAIANA, JAN 9, 1878.
Rev. H. Binama; Aloha oe.--Ua hauoli ka naau no ka nui o ko ke Akua lokamaikai, i ka hooloihi ana mai i ko makou ola, a loaa hou keia makahiki. Eia no o Loe ke waiho nei iloko o ka pilikia nui i keia mau la, e like me kona makahiki i hala ae nei, e oluolu hou ae ana paha, a i ole e waiho ana paha i keia ola ana. Oluolu no koʻu ola a me ko na keiki a maua; aka no kaʻu wahine ka haawina ehaeha me ke kaumaha nui o ko makou noho ana, ke mau nei no kuu hapai ana i ka hana a ka Haku me ka hoomananui, elike me na mea hiki ma keia noho pilikia ana. Ni ka mahalo o ka manao no na hana a ka Uhane Hemolele ma Abeiau i ka makahiki i pau, a hiki loa mai nei i keia makahiki hou. Heaha la na mea e ike ia i keia makahiki e hele nei? O ke Akua kai ike ina mea apau, nui ka maluhia ma Abaien i ka makahiki i hala, aole olelo kaua, aole nui ka hula, aka he poe uuku e hula nei. Oluolu ka noho ana o na hoahanau, elike me ke ano o ka ohana malalo o ke kahu hipa hookahi. Aole nui ka poe i kapaeia, i kela makahiki, a o kekahi poe ua hoihoi hou ia mai. I ka la Sabati nei ua hookomoia i ka ekalesia he 11 poe hou, a ua kali ia kekahi poe. Mai Jan. o ka makahiki i hala, a hiki i keia Sabati iho nei Jan. 6, ua loaa he 66 ka nui o ka poe i hookomoia i ka Ekalesia. Aole o Bauro maanei i keia wa, aia oia ma Auainano kahi i kula ai, no ka mea ua waiho o Pekea ia wahi no kekahi kumu hoopilikia iaia malaila, aia ma Aonobuaka kahi iao ai. A o Abera, Birirake, Takabeti (opio) aia oia i Panimaiaki kahi ia ao ai. Aole hui mai ko Aonobuaka maanei i ka Poakolu, no ka mea ua hooholo makou e malama no lakou i ka Poakolu ma Aonobuaka, a hui mai maanei i ke Sabati. Ke malama nei o Bauro a me Birirake i ka Poakolu a me ke Sabati ma Auainano. E hele no au ma Auainano i kahi Poakolu a me kahi Sabati ke oluolu iki o Loe. O Pekaure ke kumu i koho hou ia no Koinawa, aole nae he kula iki i keia mau la no ka holo wale o na keiki i o a ianei, a no ke pi maoli kahi o koonei poe i ka uku o ke kumu. Aole oʻu kula mau no kuu lilo mau i ka malama i koʻu ohana pilikia maoli. O ka mahinahou no ka mea emi loa maanei i keia wa, aka ma ke ano o na hana a me ka noho ana, maluhia maoli, a ke mahalo mai nei na kamaaina. Ma Abaian nei ka aina olelo kaua ole i kela makahiki a hiki ia nei; ua makaʻu loa i na kanawai, i kau ia. He kaua ma Marakei i ka malama o Oct. o kela makahiki i hala, a ua make kahi poe i ka poe pehiia, ao kahi poe ua make i ka moana, ao kahi poe ua pae mai ia nei, a ke noho nei. A o kahi poe aia i Tarawa, he kaua hou ma Tarawa i ka malama iho nei o Dek. aole nae i hui na aoao kaua, no ka mea ua holo aku o Nei Tekanebu me Kaobunau a hai aku i ka olelo a ko makou alii e hoopau i ke kaua, nolaila ua pau wale. Ke lohe hou ia mai nei no nae ke hoomakaukau ala no, he kaua no ma Maian a pela ma Nonouti, Tabiteuea. Ua noa loa ka inu rama ma Mikini, na ke Akua e malama mau ia Abaian, a e hoohikiwawe mai i ka pono. Ke uwe nei ko Abaian no ka nele i ka Himeni ole, a ua nui no hoi ka makemake i ke Kauoha Hou.
E wiki mai ka loaa ana o keia mau buke, hookahi wale no wahi Himeni a maua, aole nae ka 1-5 ua nahaehae, a e manao ana e kakau maoli me ka inika a pani ma kahi i hooneleia, ke haawi mai nei o Loe i kona leo mailoko mai o ka pilikia, ke imai nei. "E aloha aku ia Binamu wahine," aloha no olua Nau na kou hoa kauwa iloko o Iesu.
G LELEO
Haawina Kula Sabati.
HELU 6. SABATI MEI. 12, 1878,
KUMUHANA
Na pio ma Babulona. Pauku Baibala. Da,1: 8-17
8 Ua paa ko Daniela manao aole e hoohaumia ia ia iho ma ka ai a ke alii, a me ka waipa ana i inu ai: a noi aku la oia i ka luna o ka poe i poaia i hoohaumia ole oia ia ia iho malaila.
9 Ua haawi mai ke Akua ia Daniela i ka lokomaikai a me ke aloha nui ia mai imua o ka luna o ka poe i poaia.
10 Olelo mai la ka luna o ka poe i poaia ia Daniela. Ua makau au i kuu haku i ke ahi, ka mea i kauoha mai i ka oukou ai, a me ka oukou mea e inu ai. Pehea la uanei e ike mai ai ke alii i ko oukou mau maka ua inoino mamua aku o na maka o na kamalii me oukou pu? Malaila, e hookewa ai oukou i kuu poo i ke alii.
11 I aku la o Daniela i ke kuene, ka mea a ka luna o ka poe i poaia i hoonoho ai maluna o Daniela, a me Hapania, a me Misaela, a me Azario.
12 E hoao mai i kau mau kauwa i na la he umi, a e haawi mai oe na makou i na laauikiai e ai, a me ka wai e inu.
13 Alaila e ikeiaʻi imua ou ko makou mau maka, a me na maka o na kamalii ka poe i ai i ka ai a ke alii; a e like me kou ike ana, pela no e hana mai ai oe i kau mau kauwa nei.
14 A ae mai la no oia i ka lakou ma keia mea, a hoao iho la ia lakou i na la he umi.
15 A i ka hope o ua mau la la he umi, ua ikeia ko lakou mau maka, ua maikai, ua momona ka io mamua o ko na kamalii a pau i ai i ka ai a ke alii.
16 Alaila, lawe aku la ke kuene i ua ai la a lakou, a me ka waina i haawiia mai i mea inu, a haawi ia lakou i ka laauikiai wale no.
17 A o keia mau keiki eha, haawi mai la ke Akua ia lakou i ka ike, a me ke akamai ma na mea a pau i palapalaia, a me ka naauao; a o Daniela, ua ike oia i ka hoakaka i na akaku a pau me na moe uhane.
Pauku Gula. O ka makau aku ia Iehova, oia ke kumu o ke akamai, he naauao maikai ka poe a pau e hana malaila. Hal. 111:10.
Na mahele. 1. Ke noi ana a Daniele. p. 8. 2. Ke kanalua ana o ka luna. p. 9. 10. 3. Ke noi hou ana a Daniela. p. 11-13. 4. Ka ae ia oia noi ana, a me ka hope. 14-17
Mele. Him. 321. 8-6 Leo.
1
Pomaikai e, ka Haka e, %c.
Pauku 1 me ka 2.
Pule i like kakou me Daniela ma.
Na ninau a na kumu.
Ua lohe kakou ma kela Sabati, o Daniela kekahi i lawe pio iaʻku i Babalona. Ma ka lawe pio mua oia me kona mau hoa, me kekahi mau ipu o ka luakini.
Ma Dan. 1:1, Ua akaka ka manawa o keia lawe pio ana, ke lii, ka makahiki o kona alii ana, ke lii nana i lawe pio. Ka manawa hea la? Owai ke lii o ka Iuda? Owai ke lii o Babulona? Ua lawe ia ihea? Mahea i waiho iaʻi na ipu o ka luakini? Owai ko Nebukaneza akua? Heaha ke kauoha a Nebukaneza ia Asepenasa? Owai kekahi mau keiki alii a ka Iuda i wae ia e keia luna? Owai na inoa hou i kapa iaʻi lakou? Kapa ia Daniela o Beletesaza mamuli o Bele, ke akua nui o Nebukaneza. Ke ano oia inoa Daniela ma ka olelo Hebera. Ke Akua kuu Lunakanawai. Pehea ka hanai ana i na keiki alii? Pehea ka loihi? p. 3-7.
Ma mooolelo a Ioseputa, he mau pili kino Daniela ma o Zadekia, ke lii hope o ka Iuda.
P. 8. Ke noi ana a Daniela. Heaha ka manao paa o Daniela? Makau oia o ai oia i kekahi mau mea i hookapu ia ma ke kanawai Iudaio, e like me ka puaa; makau hoi oia i ka mu waina o ona a hele hikaka a hoowahawaha ia. ua ike oia i ke ano o ka waina. Nolaila keia noi ana e aha ka luna ia ia me kona mau hoa? Owai kekahi poe e ae mamua i hoohiki, aole lakou e inu waina a mau loa aku? Aole anei he pono ia oukou ke hoohiki pela?
P. 9-10. Ke kanaluna ana o ka luna. Aloha no ka luna ia Daniela ma, a manao, he noi pono ole keia, he mea e ino ai ko lakou mau kino ke ae ia. Nolaila, kanalua oia. Heaha na kumu o kona kanalua i keia noi ana? Pehea? ka inu waina anei ka mea e maikai ai ke kino? Pehea Sol. 23; 29? Lalau ea!
P. 11-13. Ke noi hoa ana a Daniela. Heaha keia noi hou ana? E hoao ia ka waiho ana i ka ai a ke lii, me ka waina, a e ai i na laauikiai, a e inu i ka wai no na la ehia? Maikai ia, e hoao oukou i ka haalele i na ai ino, me ka paka, me ka mea inu ino me ka awa, ka waina, ka rama, i akaka ka maikai, ka maikai ole.
P. 14-17. Ka ae ana o ka lua me ka hope. Waiho Daniela ma i ka ai a ke lii me ka waina, a ai i na mea ulu, a inu, a inu i ka wai wale no, a hala na la he 10, ua aha ia lakou? A pehea ko lakou mau maka me na kino ke hoohalike ia me ko ua keiki alii e ae? Oi loa aku ka ka maikai! Maikai loa, ea, ka hoao ana e waiho loa aku ka pono. Mai hoi hou i ka ai ana, i ka inu ana.
A pehea Daniela me ona mau hoa ekolu? Naauao, oi aku ke akamai! Heaha ke kumu o ka naauao?
Mele. Mele hou. 8-7, Leo.
1
Hana, ea me Daniela,
Na haumana kula nei,
Waiho i na mea ino,
Awa, waina, baka e,
I momona e na kino,
A maikai na maka e,
I kii ia a waeia
I mau keiki na ke Lii.
2
Kii i ai haumia ole,
Me ka wai no uka mai,
Ai a inu, a hoonani
I ka Haku malunaʻe,
I pakela nae ka ike,
A pii ae ke akamai,
E makau la ia Iehova,
Hoopaa i na kanawai.
Na ninau a ke Kahu.
Na makua. He poe hewa anei ka poe a pau i lawe pio ia ma Babulona? Owai kekahi poe maikai i lawe pio ia? Daniela me wai? O wai ke kaula? A lawe pio ia ka poe hewa i ka halepaahao o ka po, he poe pono pu anei kekahi me lakou, i poe paipai i ka poe hewa, e like me Ezekiala ma Babulona i paipai ai i na pio hewa malaila? Aole paha. He mau keiki pili kino ia wai Daniela me ona mau hoa ekolu? Iwaena o na keiki alii i wae ia e hanai ia no na oihana alii, owai kekahi mau pio i wae ia?
Na keiki. Owai na inoa Iudaio o keia mau keiki eha? Owai na inoa hou, oia hoi na inoa Babulona? Kapaia Daniela mamuli owai? He akua aha ko Nebukaneza? He Akua aha ko oukou?
Makemake anei oukou e kapaia mamuli o ko oukou Akua? Hai mai. 1 Ioane 3; 1, 2. Rom. 8; 14. Heaha ko Daniela ma manao paa? E ai ole i keaha? A e inu ole i ke aha? Ua hoao ia i ehia la ma ka waiho i ka ai, me ka waina o ke lii? A ai i keaha? a inu i keaha? A hala na he 10, a nana ia lakou e ko lakou luna, pehea na maka me na kino? Maikai loa e. A lilo, lakou i poe aha? A pehea la oukou e lilo ai i poe akamai a naauao e like me Daniela ma? hai paanaau mai i ka pauku gula.
Ke kula a pau. E ku a mele like i keia himeni malalo iho.
1
Aloha ia na kamalii,
Na ai inu awa nei,
A nau a puhi baka no,
A koho ia ka naaupo.
2
Hookii na kino a wiwi,
Mahuna a akaakaa e.
Ele ka waha me ka puu,
Na ake pu me na naau.
3
Ua hele a hohono e
Ka hanu, buke, na kihei,
Na rumi, na moena no,
Hohono e na mea a pau.
4
E ku a e hoohiki no,
E pau, e pau ka naaupo,
E hele a maemae kakoo
I ae Iesu e noho pu.
Pule i nui na Daniela, ka poe hoohiki e haalele i na mea ino, waina, rama awa, baka, &c.
Hameaa no Mei. 19 Dan. 2; 36-45.
OLELO HOOLAHA.
RICHARD F. BICKERTON,
(PEKETONA.)
LOIO a he KOKUA ma ke KANAWAI!
E ELE ANA OIA IMUA O NA A HOOKOLOKOLO a pau o keia Aupuni ma na ano hihia a paa ina paha ma @@@ nei a na ko Mokupuni e ae.
Ua makaukau mau oia i ka hana ana i na Palapala pili kanawai o kela a me keia mea.
Ua hii no hoi iaia ke hoaia dala aku ma ka moraki ana ina aina, ma ka ukupanee haahaa loa.
E hanaia ma hana me ka hukiwawe a ma ka uku haahaa.
Keena hana, Helu 23 Alanui Kalepa, elua puka ma o aku o ka hale kauka o Kaaka Minuteole
846 1y
LOLE MAKEPONO
Ke Kuike.
E LOAA NO IA MA KAHI O
KAKELA ME KUKE!
--E LAA NA--
Ahinahina, Kalakoa,
Keokeo, Leponalo,
Pena, Aila, Aniani,
NA MEA PIULA!
KOPA, AILA HONUA,
AILA HOOMALOO
Kui Kakia, Pakeke,
Tabu, Kaula, Noho Lio,
Hulu Palaki, na Pulumi.
--A HE--
AGENA NO HOI NO NA MOKUPUNI O HAWAII NEI NO NA
Lainakini-nao,
Lainakini Maoli,
Palule Kalakoa,
Alapia, Kelepa, Kilika,
Na lole kupono i ka wawae.
Palule Huluhulu,
Na Lole Huluhulu,
Na Lole Huluhulu,
Na Lole no ka hoohehelo ana
Lipini, Lihilihi, &c.
LIPINA, LIHILIHI, &C.
--A ME NA--
Mikini Humuhumu Makeponoloa!
--A HE--
MAU MEA AI KANI
Ka Palaoa, Kopaa, Raiki, Pia, Hoohu, Paakai, Huaala, Pia Kulina, &c.
A he Laau Lapaau Kaulana Loa
A DR. JAYNES.
Laau Kunu, Laau Hoomaemae Koko, Laau Hoopau Naio, Penikala Huaale,
A ME NA LAAU HAMO, A PELAʻKU!
827 3m 839
PAPA! PAPA!
--NO--
ALLEN & ROBINSON
UA WEHE AE NEI MAUA I
PA KUAI PAPA
--MA--
KA UWAPO O PAKAKA!
Na Papa Ulaula o na ano a pau.
Na Papa Paina o na ano a pau.
Na Pili Hale Ulaula.
Na Pili Hale Keokeo.
Na Pepa Hoonani Hale,
Na Pepa Molina.
Na Pena a me na Aila Pena!
NA KUI O NA ANO A PAU.
NA PANI PUKA a me
NA PANI PUKA ANIANI.
NA PANI PUKA a me
NA OLEPELEPE.
NA LAKO KUKULU HALE
O NA ANO A PAU!
E KUAHA MA KE
KE KUMUKUAI HAAHAA LOA
O keia Makeke
ALLEN & ROBINSON
Honolulu, Ian. 1, 1878. 840 3m
MEA HOU
NO NA KAMALII!
Kinipopo Laholio!
Kinipopo Laholio!
Ua loaa mai nei iaʻu heluna mai o na kinipopo laholio ma ke kuai kudala, no ko kumakuai malalo iho o na lilo mua, a e kuai aku ana wau ia lakou malalo iho o na kumukuai mai ka @ keneta a hiki i ke 35 keneta o ka popo hookahi a pela aku.
Kia no hoi ma koʻu halekuai ua kuka hele na laholio, a me na laholio omaa penikala o hope. E kuai ia aku ana lakou me na kumakuai haahaa loa
A L KAMIKA, Opio.
Helu 43, Alanui Papu. 830 2ms.
PAPA, PAPA
AIA MA KAHI O
LEWERS & DICKSON!
(O LUI MA.)
MA KE KAHUA KAHIKO MA
Alanui Papu a me Moi!
E LOAA AI NA
Papa Nouaiki!
o kela a me keia ano.
Na Papa Nani a Paa no ke Kukulu ana i na Hale!
Na Pani Puka, Na Puka Aniani,
Na Olepelepe, Na Pou, Na O-a,
Na Papa Hele, Na Papa Ku,
A me na Papa Moe nui loa.
NA PILI O KA HALE
O NA ANO A PAU.
Na Pepa Hoonani, Na Pena o na Wai a pau.
Na Kui mai ke Nui a ka Makalii
Na Ami Puka, Na Ami Puka Aniani,
Na Ami o na ano a pau,
Na Aila Pena, o kela me keia ano,
Na Aila Hoomaloo, he lehulehu wale.
Na Aila e ae o na ano a pau.
NA WAIVANIKI
--A ME NA--
WAI HOOHINUHINU NANI!
o na ano a pau loa.
NA BALAKI ANO NUI WALE!
A ke hai ia aku nei ka lono i na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana
--NO KA--
UKU HAAHAA LOA!
E like me ka mea e holo ana mawaena o
LAUA a me ka MEA KUAI.
E hele mai! E na Makamaka!!
A e lawa no hoi ko oukou makemake
me ka oluolu a me ka maikai
845 tf
KOPA KUKAEPELE
--A--
GLENN!
AOLE LUA NO KA HOOMAEMAE I KA ILI!
He mea hoopau i na eha,
Na Ili Puupuu,
A he hoomaemae i na mea ino,
A he hoopau Lumatika,
A he kopa auau no hoi
O keia Kopa ka oi aku o ka mea maika
I waihoia mai imua o kanaka
Aole wale no ka Hoopau ana i ka Huehue
Ili Poha, Wela la, Luluaina, a me
na mea e ae o ka Ili;
A ma ia holoi ana, o ka hoopalupalu pu kekahi i ka Ili, a keia
Laau Hoomaemae lua ola e hana ai.
O ka hoemi ana iho i na mai o ka Ili, a o
ke pale aku i ka mai mai na lole e na
Mai Lele, oia kekahi. O na ohana
ame na poe makaikai, ina
e hoolako lakou
i keia
KOPA HOOMAEMAE LUA!
ALAILA, UA LANAKILA LAKOU.
He hoopau i ka lehu o ke poo,
A he Kopa no hoi e kaohi mai ai
I ka lauoho mai ka hina ana.
Ua hooia nui mai na Kauka no ka maikai o keia Kopa!
E loaa no ma kahi o
M MCINERNY.
Kihi o na Alanui Papu a me Kalepa 840 3m