Ka Nupepa Kuokoa, Volume XVII, Number 15, 13 ʻApelila 1878 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XVII. HELU 15.

POAONO, APERILA 13, 1878.

NA HELU A PAU 854

 

 

  Come Ye Disconsolate.

  Colonial Singer, No. 34.

 

1

E na kaumaha nei, luuluu a ana,

Hele ae io Iesu, kukulu ae,

Hai i na luuluu e, me na kaumaha,

Nana e kai aku, a hoomaha mai.

Cho.    Hai i na luuluu e, me na kaumaha,

Nana e kai aku, a hoomaha mai.

 

2

Oli, hauoli e, na kulolia.

Iesu ke hoa e, a launa pu;

Oia ka malu e, a maluhia,

Oia ka home e, home mau no.

Cho.    Oia ka malu e, a maluhia,

Oia ka home e, home mau no.

 

3

Iesu ka mane e, wai o ke ola;

Mai ke Akua mai, wai ono no;

Ai no, a inu e, inu mau loa,

Loaa ke ola nou, ola a mau,

Cho.    Ai no, a inu e, inu mau loa,

Loaa ke ola nou ola a mau.

 

HAWAII.

 

Ka Halolelo a W.M.Kipikona,

I haawila ma Lahaina, Maui, Jan. 18, 1878, no na mea e pili ana i ke Kulaia Hauoli no ke Ceneteniela o ka loaa ua ana o ka Pae Aina Hawaii ia Kapena Kuke, ma  ka 1778.

     E na makamaka a me na hoamakaainana o Lahaina nei:  O keia ka la e hoomanaoia ai no ka pae mua ana mai o Kapena Kuke ma ko kakou nei mau kapakai, a he mea pono hoi i na kanaka Hawaii Kristiano a i hoonaauao ia ke hauoli, a pela pu hoi me na luna o na lahui e, e imi mai nei ano, i wahi noho ma keia aupuni.  Aohe maopopo iki ia'u ke kumu e olelo nei kekahi poe, o na kanaka Beritania wale no ka, ke hauoli i keia la, no ka mea, o ko lakou hoa-makaainana no o Kapena Kuke, e like hoi me ka pono i na Sepania wale no ke hauoli, no ka loaa mua ana o Amerika.  E hauoli kakou no ka hookomoia ana mai o ka naauao, aole no ka mea nana i ke mua; oka aole no a'u ninau, no ka loaa io ana o keia mau mokupuni Hia Kapena Kuke.

     I ka manawa hoi a keia Holomoana pookela, e hoomau ana i kona noii ana, ma na wahi a pau o na moana i ike hapu ia, ua hoomaopopo ia hoi e kekahi mau lahui naauao, o kana hooikaika ana, aia ma o ke aloha kanaka la, a oiai hoi keia mau lahui e kipikipi ana kekahi me kekahi, ua haawi aku la ko lakou mau Aupuni i na kauoha, i na luna o lakou ma ka aina a ma ke kai, e ae ia aku o Kapena Kuke ma kana huakai holo moana, e hele me ka maluhia, a e pahola pu ia aku hoi ke kokua nona ma kona alahele ke makemake ia; a pela hoi kuu aina o Amerika a me Farani, i komo pu aku ai i ka hoomalu ana ia Kapena Kuke, ma ka loaa ana o keia mau mokupuni; nolaila he mea pono i na lahui a pau i kukulu ia ma ke ano he aupuni,

e hui pu mai iloko o ka hoomanao, no ka piha pono ana o ka manawa iloko o ka moolelo o kekahi lahui, a he mau mokupuni liilii hoi, iloko o ke kai, i huki ia mai loko mai o ka noho ana palaka, iloko hoi o ke moana akea, a hoolauna ia aku la iloko o ka noho ana naauao, no na makahiki he hookahi haneri e piha ana i keia la.

     He mea kaumaha no'u ku ike ana, i ke kuee o na noonoo e pili ana no keia mea a puni ka aina.  O keia no @ ka'u i hoike aku ai i ka Ahaolelo o ka 1876, a i ka Aha Kuhina hoi e noho ana ia manawa, e hoomanaoia ko kakou Keneturia.  He poe kakaikahi wale no nae kai huli ole aku mamuli o keia mau manao hookuee, aka ua manao ka hapanui o ko kakou poe kanaka naauao, he wahi kuhua wale iho no o Hawaii nei i nele i ka moolelo e hiki ai ke hoomanao, a he wahi oioina paha iwaena o na lahui, a o kona mau kapakai momona hoi, he mau kihapai wale no lakou, no na malihini hele mai no ka wa pokole, e hoopiha ai i ko lakou mau waihona waiwai iloko o ka manawa pono, a huli hoi aku no i ko lakou mau home kahiko.

     Aka, ua hauoli au, ua loaa na manaolana maanei, no ka hoomanao ana i "Ko Hawaii Keneturia" - Eia ma Lahaina nei, ke Kulanakuahale Alii o ke au i hala.  O kahi no keia o Kahekili i noho ai, o Kamehameha, Liloliho, Kauikeaouli, o me na Alii Kiekie no hoi a pau, iloko o ka Moolelo Hawaii.  Aka oiai ua hala ae nei kona hanohano a me ka nani, ua nalohia hoi kona mau pihana kanaka, a eia oia ua neoneo, ma ke ano he kulanakauhale, e hiolo ana ma ke kapakai; aka eia no he poe i koe, i piha i ka eleu a me na manaoana lahui, a i hauoli pu hoi me ko kakou Kiaaina naauao Moehoaua, ma ka ae ia ana e lawe hapa pu iloko o ke hoomanao, no ka piha pono ana o ko Hawaii nei manawa kaulana loa iloko o ka moolelo o ke au malamalama.

     A o keaha ka kakou e hauoli ai!  O oukou hoi e na Hawaii, nona ka heluna he hapaha miliona na kanaka i ka wa i hiki mai ai o Kapena Kuke, aka iloko o keia Keneturia hookahi, ua emi mai nei a ua haule malalo iho, o ka akahi hapalima o kela heluna.  E hauoli anei kakou i keia la no ko oukou emi ana, a ma ka hopena hoi o kekahi Keneturia hou aku no ko oukou neoneo loa ana hoi?  Auwe!  he nui wale na kanaka noonoo ole, e hiki mai ana, a e hele ana hoi iwaena o ko oukou aina hanohano, e manao ana pela, a oia wale ae la no na mea e hiki ai ke hoike mai, no ko Hawaii Keneturia o ka ike mua ia ana.

     Ua ninau lakou, heaha la ka mea hiki ke hoike ia imua o na kanaka ili ulaula o Amerika, no ko lakou ike mea ia ana e ko Europa poe?  He wiwo ole wau i ka olelo ae, he mea ole loa ia, imua o ka lahui ilikini Paiute ai aa laau a ai moo hoi o ke Kapakai o ka Pakifika; he mea ole hoi imua o na ilikini Seminole noho ahalia o Felorida; a pela hoi me na iikini hupo noho hau anu o Pategonia; aka heaha la auanei ka olelo mai a na lahui ilikini Cherokee, Creek a me ka poe Choctaw oiai aia me lakou he mau luakini a me na kula hoonaauao, me na keikikane a me na kaikamahine hoi i hoonaauao ia.  A heaha hoi ka ke kanaka Aztec e olelo ai, ka mea nona ka imi ana aku i ka maha malalo o ka hoomalu ana a ka Virigini Maria o Guadalupe, me ka ike pu aku no hoi ia wa hookahi, i ka pohaku i kikohuia me na aweawea koko, kahi e mohai ai o kona poe kupuna, e waiho maluhia ana i keia wa, i hoike no ka pouli a me ke au o ke ano koko, maloko o ka Plaza o ke kulanakauhale o Mekiko?

     E hui mai auanei keia poe kanaka ili ulaula o ka aina puni ole me oukou, na kanaka Hawaii i lilo i mau Kristiano a i hoonaauao ia hoi, a e olelo mai, aole e ola ke kanaka ma ka ai wale no; o ka io, ke koko ka iwi a me ke olona, aole ia o ka lawa pono o ke ola; a ua hoopomaikai ia mai ke ola kino, a me ka lahui, i ka manawa a ka naauao e halihali mai ai i ka maluhia, ke aloha hoi o ko kakou hoa kanaka, a me ka manaolana no ke ao maikai hou ae, a o keia mau mea ae la a pau, ua oi aku imua o ka ikaika, ka weliweli a me ka heluna o ka poe hawawa; a no ka manaolana hoi me ke kaana pu iloko o keia mau mea, ke kumu ia o ko kakou akoakoa ana mai nei, e hoomanao no ke au, i loaa ai ka manawa i wehe mua loa mai ai ke alaula malamalama o ka naauao.  Aka oiai ua kamailio ae nei au no ka emi o ko oukou heluna, aole nae au i hoopuka i kekahi oelo no ka emi o ka mana a me ka ikaika lahui.  O na kanaka Hawaii he 50,000 i keia la, ua oi aku ko lakou waiwai io, imua na kanaka he hapaha miliona, o ka haneri makahiki i hala aku nei. 

     Owai na puulu kanaka lehulehu ma keia mau kapakai i hele a pipikini a hookeke?  O ko oukou mau kupuna anei ia poe i oi ole aku imua o na holoholona?  E nana aku ia lakou, e kokolo ana malalo iho o ka laau hahau a ke alii, a me ka pahi hoi a ke kahuna; aole hoi e aa e hoike ae no ko lakou pono ma kekahi mea, aole hoi no ko lakou mau ola iho; a e nana iho hoi ia oukou a me ko oukou mau hale na aina, a me ko oukou pono no ke koho ana i ko oukou mau alii ponoi.  He lahui oukou  A o lakou hoi he poe lopa haahaa loa.  A o ke tausani hookahi hoi o oukou, me ko oukou naauao a me na lako ua oi aku ka ikaika mamua o ko Kamehameha puali a pau.  Nolaila, he nui no na mea a ka manao e kaumaha ai o ka haneri makahiki i hala, aka he nui hoi na mea e hauoli ai.

     Aka, ia kakou nae e hauoli ai no ka wa o ke au malamalama, e hoomanao pu hoi kakou, aia iloko o kela manawa naaupo, i hoea mai ai ke kanaka pookela loa o keia Keneturia.  Ua piha ka hapaha mua o ka manawa, i na hana o ko Kamehameha ola ana, a e mau aku auanei ka hoomanao ia o kona inoa, no na wa e hiki mai ana, iwaena o na kanaka koa a me ka poe nai aupuni o ka honua nei.  Ua holomua oia ma ke kulana i oi loa aku ke kiekie iwaena o na kanaka ili ulaula.  Ma ka aina puni ole o Amerika, aohe e loaa kona mea like, aole no hoi iwaena o na pae aina lehulehu o ka moana.  He alii oia no kekahi wahi hapa uuku o Hawaii, e like hoi me Egebereta he alii pelekane, no kekahi hapa o Enelani, a ua hakaka o Kamehameha e like me kela alii, a e pono au ke olelo ae ua kue aku oia i ka noho hoomalu ana o kekahi mau alii haahaa ehiku, no ke kukulu paa a me ka imi ana i ka mea e maluhia ai o kona aina.  I ka wa hoi i pau ai na puali kaua o ka enemi i ka hoopio ia, kau aku la ua koa Hawaii lanakila la i mau kanawai maluna o na kanaka a pau, e like me ka hana a ka poe Sakone o Beritania; ua kau pu no hoi ke kanawai maluna ona ponoi i mahuahua ai ka maluhia a puni na moku, i noho iloko o ka pakaha wale a me na hana weliweli mamua aku; ano hoi ua hiki i na hapauea a me na kamalii ke moe ma na alanui me ka hoopoino ole ia.

     Ma ka wehe mua ana mai o ke alaula malamalama o keia Keneturia a kakou e hauoli nei, he kanaka opiopio koa a wiwo ole o Kamehameha, e imi ana e like me Davida o ka Iseraela ka hele imua, me ke komo pu ana hoi iloko o na hooili kaua, me na paio ikaika kiekie.

     E noho ana no o Kamehameha me kona makuakane hoahanau me ka Moi Kalaniopuu, ka mea nana i hookipa aloha mai ia Kapena Kuke ma Kealakekua; aka, iloko oia manawa ma Maui nei a ma keia kaona ponoi no hoi o Lahaina nei, aia hoi ua Holomoana Kaulana la, i hoea mua ae ai ma Kauai ma keia la no a kakou e hauoli nei, e holo pili aina mai ana, ma na kapakai o keia mokupuni.  Ua kaalo ae la ua aliimoku Beritania la ma na kapakai o Molokai a me Lanai, me ka hooneleia o kona mau kiionohi i ka ike ana i kekahi mea nana e ume i na koni ana a kona manao.

     Aka ia wa no, ke ike mai la oia i na kapakai o Maui nei, ua hele wale hoi a uluwehi i na ululaau aloha o keia kaona, o ka alohi anapa hoi a ke kukui i kiponaia me ka nani uliuli o ka ulu, i hele ka lau a kohu lau holu o ka laau pa ma.  Maluna ae hoi o na mea a pau, ke oni mai la na kumu niu e kela ae iluna.

     Lohe koke ia aku la hoi ke kani halulu o ka pahu, me na leo uluaoa lealea o ko au pouli.  Aole i upuupu iho, a ike ia'ku la he waa e holo ana maluna o na wai i hele wale a alania ka waiho ana, i houmalu ia mai hoi e na kakai mauna kiekie, e waha mai ana maluna o ko kakou taona nei.  Aia hoi maluna o ua waa la, kekahi opio hanohano nona na helehelena kapukapu.  Lekei aku la oia iluna o ka moku.  Ua hoike koke mai la kona ouli i ke kahana nui, aka aole nae no ka hopohopo i keia poe malihini a me na mea a pau e hoopuni mai ana iaia.  No kona wiwo ole, nolaila ua hoohala oia i kona manawa maluna o ka moku ia po holookoa, oiai hoi kona makuakane Kalaniopuu a me na makaainana o Lahaina, e hoopiha ana i keia mau kapakai me na leo kumakena o ke kanikau, me ka manao ua poino oia.

     Aka, ua hookipaia aku ua opio la me ka hiwahiwa e ke Alii o ka halelana kupaianaha, a i kekahi la ae, ua huli hoi aku la oia me na makana iwaena o kona mau makamaka, a pela iho la i halawai pu ai o Kamehameha ka Lanikila me Kapena Kuke, i ka wehena mai o ke alaula malamalama o ko kakou Keneturia.

     Ua loaa mai hoi i ua Kamaaliikane Hawaii hiwahiwa nei o ke au pouli, na hoomanao ano nui palena ole, ma o keia launa ana, a mahope mai me na kanaka ili keokeo.  E noho ana no hoi oia ia manawa me kona makua Kalaniopuu, ma Kealakekua Hawaii, ma ka wa i make ai o ka Holomoana Kaulana, aka aole loa he hoike maopopo, no kona hui pu ana aku iloko o kela hana manaonao.  Aole au e kuihe ma ka manao ana, o kona ano lokomaikai nui, ka mea nana i hookaumaha mai no kela ulia, no ka mea, he makamaka mau loa oia no na malihini ili keokeo, i hiki mai ma keia mau kapakai; a ke iini hoi lakou no kekahi mea, aia ka lokomaikai ma kona mau poho lima a me kona mau makaainana.

     Hookahi mea kaumaha a manaonao, nana e hoike piha mai i ka lokomaikai a me ka manao ahonui o Kamehameha.  Ke ehaeha nei au i ka olelo ae, no ka hiki ana mai o ka moku Amerika mua loa ma keia mau wai iloko o ka 1790, nona hoi ke aliimoku o Metcalf kona inoa; a no ka nalowale ana o kona waapa a me kekahi o kona mau kanaka, ua hekau ae la kona moku mawaho o Olowalu, ma kekahi wahi i hiki loa ke ike ia mai keia hale aku a kakou e ku nei, a mahope o kona hoowalewale ana i na kamaaina i loaa ole ka noonoo he poino e ili mai ana, oia lakou e hoopuni mai ana ma na aoao o kona moku iluna o ko lakou mau auwaa, ua haawi aku la ua alii moku la i ka poino weliweli maluna o lakou, a luku nui aku la i na kane a me na wahine, i oi aku mamua o ka haneri, a he poe hoi i nele i na kokua ole.  I ka hiki ana mai hoi o ka ukali no ka Eleanora, oia ka moku kuna Fair American, ua hopu ia iho la ia moku a lawe pio ia mawaho aku o ka mokupuni o Hawaii, i hoopai no kela hoomauhala mua, a o ka hapa nui o kona mau luina kai pau i ka pepeh@ia, aka o Kamehameha kai hooikaika nui, ma ka hoopakele ana i ke ola o Isaac Davis, he luina oia no luna o ka moku Fair American, a ia John Young hoi ke alii waapa no ka moku Eleanora; o laua hoi ka Kamehameha i hoolilo ae ai i mau alii, a i mau kakaolelo O ke kauo ana i ka moku pio iuka o kahi maloo, i uhiia a malumalu i mea e mau ai ka maikai, oia kekahi hana a Kamehameha, e kakali ana no ka loaa o ka wa pono e hoihoi hou aku ai i ka ona nona ia moku.

     Ua oleo ae nei au he alii o Kamehameha i hoonaauao ole ia, aka ma ka makaikai pono ana aku i kona ano naauao, a me kana mau hooponopono ano makamaka imua o na malihini ili keokeo i komo mai iloko nei o ka aina me ka manao hoopilikia wale, ua hoike oia me ka moakaka i ke kupaa o kona manao ma ke ano he alii i hoonaauao ia.  Iloko o ka wa i manaoia ai he mau hana akeakea wale no, ke kumu i kukulu ae ai na kukini i na papu ma Kauai, i ka wa o ko na aina e oia hoi na kanaka Amerika a me na Beritania, e koi kue mai ana iaia a me kona mau makaainana no ko lakou mau poino akaka, a o kona mau kakaolelo hoi kai hookokono aku la iaia, no ke kipaku 'ku i na haole a pau, aka, ua pupuu mai la kona mau lima; ke alii o ka lahui kanaka nona ka heluna he hapaha miliona, a ua hilinai hoomanawanui oia me ka ekemu ole, ke kupaa me ka hooponopono loea i mea e hookaawale ia aku ai ka poino.  Ina paha he alii ili ulaula no Amerika, Melesia, Auseteralia a me Nu Kilani, ina la ua kiola makehewa oia i kona ola iho a me ke ola o kona lahui ma ke kue makehewa ana aku i na kanaka ili keokeo, no lakou ka mana a me ka ikaika i oi pakela loa aku.  E like hoi me ke kulana o ke alii i hoonaauaoia, ua maliu aku la oia mamuli o na oleloao a Vanekouva, ma na mea pili i kona launa makamaka ana aku me ko na aina e, me ka hoolilo ana i kela mau haole elua i lawe pio ia mai ka moku pepehi kanaka mai a'u hoi i hoike mua ae nei, o laua kona mau luna manao kupaa a he mau hoa'loha oiaio hoi nona

     Ua ao pu aku la no hoi o Vanekouva ia Liholiho ka Kamehameha keiki, oia kai holo makaikai aku ia Enelani, e hooikaika a e hookahua paa i na launa oluolu ana me na malihini o waho i komo mai iloko o ka aina e hoopilikia wale.  Ina hoi ua aoia mai kela Moi Lanakila, e noho haku ana maluna o na kanaka manaopaa he mau haneri tausani, no ka malama ana i ka noho aloha a me ke ahonui mawaena o na lahuai kanaka, alaila, heaha la ko kakou noonoo no na hana hookuee o keia la, nana e alakai nei ia kakou e paio aku i na malihini, iloko o ka wa e emi iho nei ka heluna o na kanaka Hawaii ili ulaula malalo o ke kanalima tausani.

     A! ua ike no o Kamehameha Nui i keia la, ka wa hoi a na kaoo nui o na ili keokeo e puukiuki mai ai ma ka moana Pakipika nei, me ka hookahua ana hoi ma kela a me keia mokupuni a pukoa paha i kupono no ko ke kanaka mau hooikaika ana.  Ua lohe no hoi oia no ka Palapala Hemolele, a ke kanaka ili keokeo mai Tahiti mai, a ua maopopo mua no hoi iaia ka manawa e hiki mai ai oia mea.

     Hoike aku la oia ia Vanekouva e nonoi aku i kona Moi, e hoounaia mai kekahi mau kumuao Palapala ma Hawaii nei.  A iloko o ko Kamehameha mau la hope loa ma keia ola ana, ua kamailio mai la oia e like me Davida ke alii, no ka pono i kana keikikane e ae a hooko aku, no ka lawe ae a hooko i kana mau hoololi i noonoo nui ai, oiai oia ma ka nohoalii a hiki i kona wa i hala aku ai i ka make.  Ae, ua hooikaika nui o Kamehameha i loaa ai ka noho ana maluhia like mawaena o ke kanaka ili ulaula a me na ili keokeo, a o kakou hoi a pau no ke koko hookahi wale no, e like hoi me na olelo maloko o keia Buke, e waiho nei malalo iho o kuu lima, a he mea pono ia kakou ke like ma ka manao hookahi, i hookahi ka noho ana maanei, no ka hauoli i na pomaikai a Kamehameha i na'i ai no Hawaii nei.

     (Aole i pau.)

 

 

"Hoku 'Ao" ma ka Ilikai no na Pae Aina o Maikonisia.

 

     4 Ka haalele ana ia Fannings Island.  Ma hope paha o ka aina awakea, ua haalele aku ia Fannings Island, a ua holo aku no na pae moku o Maikonisia.  Maikai ka makaoi, holo maoli no hoi o "hoku ao," he hapa la wale no oia holo ana me ka makani, o ke kaili no ia o Kiaimakani i kana, a hopu ihola makou i ka mea a kalaneo, a o ka neo no ka ia. 

     5 Ka pohu o ka moana a me ka ua kuakualau.  He nui ka pohu o ka moana, ka hele ia a lana malie lua ka wai i Hauola.  I na hoi e makani mai, o ka hoi aela no ia a mamua mai, hookuku hou ia makou e hoi hou i hope.  A ina hoi e hele ae ka makani a hookuke ia makou e holo i Maikonisia, holapu mai hoi ke kuakualau ma mua, a o ka pio iho la no ia o ka makani.  E noke aku hoi i ke noi i kamalii o Hilo.  O ka makou ka ipu nui a o ka lakou ka ipu iki, he ole ka ae mai.  Pi no hoi kamalii o Hilo.

     6 K@la 4 o Iulai maluna o ka Morning Star a me kahi makani pukiki ino.  He la malie a maikai keia, a he wahi makani maikai iki ko makou, e lawe haaheo ana i ke kaupu aukai o Maikonisia (Morning Star), ka hele ia a auka ka po@ laeala.  I ka wehe ana'e o kai ao, a o ka hora 5 ia aoiai, ua haawi ae o Kapena A.D.Colcard, he mau ki pu panapana hauoli la eha o Iulai, nona na kani ke he 12, me ka hookuu pu ia o na hae e pulelo i ka makani.  A ma ka Paina awakea, ua pahola aela ke Kapena i kana papaaina hauoli la eha o Iulai, a ua kono maila ia'u me ka@ wahine, a me ka maua Simeona, e paina hauoli pu me lakou, ohuohu lua no hoi luna o ka papaaina i na mea ai he nui.  Ma ka aina ahiahi, ua kono ia mai o Rev.S.P.Kaaia a me kana ewa, e paina ahiahi hauoli la eha o Iulai, me lakou.  Maia la no, ua haawi mai ka Haku ia makou he mau Ia Ahi 3, ma o ka lawaia ana a ka poe Kilipati, oiai ke Ahi a me ke Aku e lele ana mamua o "Hoku Ao".  Ai Ahi makou ia la a me ia mau la' 'k.  He pule paha i hala mai ka la eha mai o Iulai, loaa ihola makou he wahi makani ino i ka po, oia paha ka hora 9, ua luli ka moku i o a ia nei, e pa mai ana ma o a maa nei, ua nahae nela kekahi pea o makou, a lepe aela ka ihu i ka makani, he wa pokole wale no, o ka pau no ia, a o ka malie no ia.  Ia ao ana'e no, ua paa no i ka humuhumu ia, a kau hou ia no.  O ka wati e ala ana ia wa, o ka ka malamamoku.  O ke kumu no nae o ka poino, no ka maamaa ole no i ka uli o ka malamamoku a me kona hope.

     7 Ka hoololi ia ana o ka la Sabati.  He mea haohao paha ia, ke ike mai oukou e na makamaka, me ka olelo ana paha.  auwe?  He mea hiki no ka hoi i ke kanaka ke hoololi ae i ka la Sabati?  Ae, he mea hiki no.  O ka la 22 o Iulai, oia ka la Sabati i huliia ma Hawaii, a ua maa kakou ka poe o Hawaii maia helu.

     Aka, ma kekahi mau aina, he heluna Sabati e ko lako.  He kumu no nae oia helu ana pela.  E like paha me ka like ole o ke au o ka manawa, pela no i like ole ai.  No ka mea, ina ua awakea ka la ma kekahi wahi, alaila, ma kahi wahi, o na hora aumoe ia o ka po; a ina hoi he ahiahi ma kahi wahi; a oia like ole, o ke kumu ia o ka like ole o na la Sabati, a pela i hiki ai ke hoololi i na la Sabati, ke ole nae au e kuhihewa.  Ia makou nae ma ka moana nei, a e hiki aku ana makou i ke kaeiwela, a o ka Poaono ia la 21 o July ma ka helu la pule o Hawaii, ua hoolilo ia e laa ka Poaono, la Sabati, a oia ko makou la hoane ma "Hoku Ao" nei a me na Pae Moku o Maikonisia apau.  Na ke Akua no i hana i na mea apau, e hoonani nui ia kona lokamaikai.

     8 Ka i ke ana i ka mokupuni o Alolaina.  O Alolaina, oia no kekahi mokupuni o Kilipati, a he mokupuni ma ka Hikina.  Akau.  O ka po o ka la 27, hora 2 o ua po nei, ua ike ia, a ua kalewa ia po a ao.  O ke kumu o ko makou holo ilaila, i hoihoi makou he mau kanaka nolaila, oia no ka poe i hoike ia ma ka mahele 3 o keia moolelo.  Ehiku ka nui o lakou, 2 kane, 2 wahine, a me 3 keiki.  Me ka naau walohia a loko, no ia mau hoa au ale o ka moana no ka mahina a oi.  I ka hora 5 A.M. ua hooili ia ka ukana a ua poe nei, a ua alo ia'ku i uka o ka aina e ka waapa no o "Hoku Ao" a o ka malamamoku no ke'lii moku i holo i uka.

     (Aole i pau.)

 

MAIKAI KA HOI KA PAPA!

A ME

KA LAAU O KOU HALE!

NO HEA LA!

KAI NO HOI NO KAHI O

 

WAILA MA!

 

Nana aku no hoi ia la

Ohi ka Io o ka Laau o Makawao

I ka ua mea hoi o ka nani o

 

Na PAPA1 Na PAPA!!

A ME

 

NA PONO KUKULU HALE

O NA ANO NO A PAU.

 

Aia ma ke kihi o na

ALANUI PAPU me MOIWAHINE!

HONOLULU

MALAILA E LOAA AI

E LIKE me ka MAKEMAKE

NO KE

KUMUKUAI MAKEPONO LOA!

 

PAPA, PAPA, PAPA,

Na Papa Huluhulu,

Na Papa Manoanoa,

Na Papa i kahiia,

Na Papa Kepa,

Papa Hole Keokeo,

Papa Hole Ulaula.

 

NA LAAU, NA LAAU!

Na Kua,

Na Kaola,

Na Aaho,

Na Molina,

Na peapea,

Pine Huluhulu,

Pine i kahiia.

 

NA Papa a me na Laau Ulaula!

Pili ulaula,

Pili Keokeo,

Pani Puka,

Pani Puka Aniani,

Ipuka Aniani,

Puka Olepelepe.

 

PENA O NA ANO A PAU!

Hulu Pena mai ka Liilii a ke Nui,

Aila Pena,

Aila Hoomaloo,

Waniti, Pate.

NA LAKO O KELA A ME KEIA ANO!

Na Ami Puka Hale.

Na Ami Puka Pa.

ANIANI!

Pepa Hale a me na Lihilihi

E LOAA NO MALAILA.

PAAKAI HELU I O KAKAAKO me PUULOA

 

     No ke DALA KUIKE, e loaa no na mea a pau i haiia ae la, no ke Kumukuai Emi loa.  O na kauoha a pau mai Hawaii a Niihau, e loaa 'ku ana ia lakou, e hooko koke ia no ia me ka lawa pono. 

     E Kipa Nui Ilaila, i ike i ka Oiaia

                                                                       

984 @