Ka Nupepa Kuokoa, Volume XVII, Number 14, 6 April 1878 — Page 4
This text was transcribed by: | John Swindle |
This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA Kuokoa me ke Au Okoa
I HUIIA.
No ka Makahiki, $2. Eono Mahina, $1.
Dala Kuike ka Rula.
APERILA 6, 1878
Aha Euanelio o Hawaii Hikina—E halawai ana keia Aha ma Hilo, ma ka la 10 o Aperila, M. H. 1878.
OLELO HOOLAHA.
E halawai ana ka Ahahui Euanelio o ka Mokupuni o Oahu, ma Waikane, ke hiki aku i ka Poalua elua o Aperila, o keia M. K. oia ka la 9 o Aperila. No laila, ke paipai ia aku nei na hoa a me na lala a pau, e akoakoa pau ae i ka manawa i olelo ia. J. Kekahuna.
Lunahoomalu.
Haawina Kula Sabati.
HELU 3 SABATI APER. 21, 1878.
KUMUHANA:
Ieremia iloko o ka halepaahao. Pauku Baibala. Ier. 33: 1-9
ALAILA, hiki lua mai la ka olelo a Iehova io Ieremia la, i kona pau ana iloko o ka pahale o ka halepaahao, i mai la,
2 Penei ka olelo ana mai a Iehova, a ka mea hana, o Iehova ka mea i hoonohonoho ia me, i mea e paa ai ; o Iehova kona inoa ;
3 E hea mai oe ia'u, a e o aku no wau ia oe, a e hoike aku ia oe i na mea nui a paakiki, au i ike ole ai.
4 No ka mea, ke olelo mai nei o Iehova, ke Akua o ka Iseraela penei, no na hale o keia kulanakauhale, a no na hale o na'lii o ka Iuda, na mea i hoohioloia e na puu, a me ka pahikaua ;
5 Ke hele mai nei lakou e kaua me ko Kaledea, he mea nae ia e hoopiha ai ia lakou i na kupapau o na kanaka, ka poe a'u i luku ai i ko'u huhu, a i ko'u ukiuki, a ua huna hoi au i ko'u maka mai keia kulanakauhale aku, no ka hewa a pau o lakou.
6 Aia hoi, e lawe mai no au io na la i ka wahi, a me ka mea e ola'i, a e hoola no wau ia lakou, a e hoike aku au ia lakou i ka maluhia nui, me ka oiaio.
7 A e hoihoi mai au i ke pio ana o Iuda, a me ke pio ana o ka Iseraela, a kukulu no au ia lakou, e like me ka wa mamua.
8 A e hoomaemae au ia lakou i ko lakou hewa a pau a lakou i hana hewa mai ai ia'u: a e kala no hoi au i ko lakou hala a pau a lakou i lawehala'i, a kipi mai hoi ia'u.
9 ¶ A e lilo mai ia ia'u i inoa e olioli ai, no ka maikai, a no ka nani imua o na lahuikanaka a pau o ka honua, ka poe e lohe ana i ka maikai a pau a'u e hana aku ai ia lakou. A e makau auanei lakou a e haalulu hoi no ka maikai a pau, a no ka pomaikai a pau a'u e haawi aku ai ia wahi.
Pauku Gula.—p. 3 hoopaanaau.
Na mahele. 1. Ka olelo a Iehova ia Ieremia iloko o ka pahale o ka halepaahao. p. 1,2.
1 E noi aku, a e hoike mai oia i na mea nui. p. 3.
2 Na olelo wanana no na hale &c i hoohioloia, e kukulu hou ia. p. 4--6.
3 Na olelo wanana no ka poe i lawepio ia. p. 7, 8.
4 Na olelo wanana no ke kulanakauhale p. 9.
Mele Him 328. 8. Leo.
E hana mau, e hapai pu. &c.
Elua pauku.
Pule no ka poe e hoopilikia ia ala, a mihi, a hana no ke Akua, &c.
Na ninau a na kumu
Ia iosia i lohe ai i na olelo hooweliweli a Huleda ke kaula wahine no ko ke Akua huhu, a manao paa e luku i kona poe kanaka, a ia Irusalema, &c, no ko lakou hewa, ala oia a hoouluulu i na luna, i na kahuna, i na Levi, i na kanaka a pau iloko o ka hale o Iehova, a heluhelu oia i ka buke kanawai, a hana lakou i berita, hoohiki e hoopau i ka hewa, a e malama ia Iehova.
Ke ala like no ia o ke lii, o na kahuna, o na Levi, o na luna, o na kanaka e hoomaemae loa i ka luakini, e hoopau loa i na kii, i na wahi kiekie hoomana kii, i na kuahu kii, i ke kuahu ma Betela a Ieroboama i hana'i, e hooko ana i ka wanana kahiko. 1 Na Lii 13 ; 1–2.
A pau keia hana, kauoha Iosia e malama ia ka ahaaina berena hu ole. He ahaaina lua ole keia. Nui wale na mohai.
I ka makahiki hope o ko Iosia alii ana, hele oia me kona poe koa e kaua aku ia Parao Neko, ke lii o Aigupita, e keakea aku i kona hele ana e kaua aku i ke lii o Asuria, oia hoi, e kokua ana Iosia i ke lii o Asuria, no ka mea, he kauwa oia nana. Ua papa mai no Neko ia Iosia, aole make e kaua ia ia. Paakiki nae Iosia e kaua aku ia Neko. Ma ia kaua, ua hoehaia Iosia, a ua lawe ia i Ierusalema, a make iho la. A kanuia me ka uwe nui ia e na kanaka a pau, a e Ieremia ke kaula. 31 mak. i alii ai Iosia. Make oia, a lilo ke aupuni ia Iehoaza kana keiki. He alii hewa wale ia. Ekolu wale no malama i alii ai oia.
Hele mai. Neko, a hoopaa ia Iehoaza, a lawe aku ia ia i Aigupita, a malaila oia i make ai.
Hoolilo Neko ia Eliakima ke kaikuaana o Iehoaza, i i alii ma Ierusalema, a hoololi i kona inoa i Iehoiakima. A kau Neko i ka auhau nui maluna o Iehoiakima.
Hana ino loa Iehoiakima. Oia ae lii i huhu loa ia Ieremia a okioki i ka owili palapala wanana ana, a hoolei iloko o ke ahi. Ier. 36 ; 22–23.
Ia ia e alii ana, ala hou Neko a hele a kaua aku i ke lii o Asuria o Nebukaneza. Lanakila nae Nebukaneza. A hele oia a hoopuni ia Ierusalema, a lawe aku i kekahi mau mea i Babulona, a hoopaa ia Iehoiakima i ke kaula me ka manao e lawe ia ia i Babulona no kona kipi ana, aole nae oia i lawe pio ia.
Alii Iehoiakima 11 mak. a make iho la ma Ierusalema, a kanu ino ia no. A lilo ke aupuni ia Iehoiakina kana keiki. Ekolu malama oia i alii ai, a hana hewa mau no. A hele hou Nebukaneza i Ierusalema, a hoopau ia Iehoiakima, a haawi i ke aupuni ia Zedekia ke keiki ekolu a Iosia, a lawe pio aku ia Iehoiakima i Babulona a ilaila oia i noho ai a make. Me ia hoi kekahi poe Iudaio i lawe pio ia'i i Babulona.
Zedekia, ke'lii hope o ka Iuda. Alii oia 11 mak. a hana hewa mau no, a e kokoke loa ana ka manawa e hookoia'i ka wanana no ka hoopau loaia o ke aupuni o ka Iuda, e like me ke aupuni o ke Iseraela, no ka nui loa o ka hewa. Ier. 33 ; 1, 2. Ka olelo a ke Akua ia Ieremia iloko o ka pahale o ka hale paahao. No ke aha i hooleiia'i Ieremia iloko o ka hale paahao? 1 No kona wanana ana. E pau ana Ierusalema, me ka luakini ia Nabukaneza, a e lawe pio ia'na na Iudaio i Babulona, a noho pio malaila 70 mak. 2 No kona paipai ana i ke'lii me na kanaka e haawi pio ia lakou iho ia Nebukaneza, i hoola oia ia lakou.
3 No kona haalele ana ia Ierusalema, e hoi aku i Anetota, kona kulanakauhale i pakele oia i ka pepehiia e na koa o Babulona, a kuhi na Iudaio, e huli ana oia mamuli o Nebukaneza. Mahea oia i hooleiia'i mamua? makahi ino loa, ma ka lua i piha i ka wai lepo. Ma ke aha oia i hukiia'i mailoko mai oia lua ino, a hoonohoia ma ka pahale o ka halepaahao ? Ier 38;6–13. Owai ka inoa o ka mea nana i olelo ia Ieremia ? E aha ia'na na olelo a Iehova ? E hooko loa ia'na.
E aha Ieremia ia Iehova ? A e aha mai oia ia Ieremia.
P. 4,5. No na hale aha keia wanana ? Ua aha ia ia mau hale? Heaha na puu? Oia paha na puu a Nabukaneza ma, i hana'i mawaho o ka pa o Ierusalema, kahi i ku ai na koa, a hoolei i na mea ulupa i ka pa o ke kulanakauhale. Owai kai hele e kaua me ko Kaledea ? Na Iudaio. Make hewa nae ke kaua ana. Lilo ia kaua i mea e piha'i na hale i na kupapau o kanaka. Ko ke Akua hoopai ia no ka hewa loa o na Iudaio.
P 6. Na olelo wanana hooluolu. He aha ia olelo hooluolu ? E lapaau ana ke Akua, e lawe ana i ka wahi, e wahi ai i na eha, e hoala hou i na hale, e hoopiha hou ana i na hale i kanaka, e hoike ana i ka maluhia, me ka oiaio.
P 7. A peha ke Akua i na pio o ka Iuda me ka Iseraela ? Mahea ia mau pio ? Ae kukulu ke Akua ia lakou pehea ? Peha lakou mamua ? No ka manawa hea keia ?
P. 8. Pehea ke Akua e hana'i i ko lakou hewa ? me ko lakou mau hala ?
Kala wale anei ke Akua i ko lakou hala, ke mihi ole ? Ahea ke Akua e hana'i e like me keia wanana ?
P 9. Heaha ka mea e lilo ana i inoa e olioli ai? no ke aha ? a no ke aha ? imua owai ? No ka poe hea ? A e aha lakou ? A e haalulu no ke aha ? He haalulu hauoli paha keia. No ka manawa mahope loa mai paha keia, no ka wa euanalio, e huli nui ana na Iudaio, me na kanaka e, a loaa ka Iseraela oiaio.
Mele. Him 499, Leo.—Milenio.
E oli, e oli, eia'e ka milenio, &c.
Elua pauku.
Na ninau a ke Kahu.
Na makua. Na hana a Iosia ma keia Haawina, hai mai. 1 Ka hookaaka ana ia wai ? No ke aha ? 2 Ke kaapuni ana i na aina me na luna e hoopau i ke aha ?
3 Ke kaouha ana i ka Iuda, me ka Iseraela e malama i ka abaaina aha ? Aole he ahaaina me keia mai hea mai ?
4 Kona hele ana i ke kaua ia Neko ke'lii o Aigupita. A loaa ma ia kaua ke aha ? Mahea oia i make ai ? A kanuia pehea ?
Na keiki. Make Iosia, a lilo ke aupuni ia wai ? Alii o Iehoaza i ehia malama ? Heaha kona ano, me kona hope ino ? O wai ke'lii o Aigupita ? Owai ke panihakahaka o Iehoaza ? Nawai i hoalii ia Eliakima ? Nawai i hoololi i kona inoa i Iehoiakima ? Heaha kona ano ? Aha oia i ka palapala wanana a Ieremia ? No ke aha ? Hana ino anei oukou i ka baibala ? Alii Iehoiakima i ehia makahiki ? Ma hea oia i make ai? Owai kona panihakahaka ? Nawai i hoalii ia Iehoiakina ? Alii oia i ehia malama ? Heaha kona ano ? Na wai ia i hopu a lawe pio ia ia i Babulona ? Hoalii Nebukaneza ia wai i pani no Iehoiakina ? Alii Zedekia i ehia mak ? Heaha kona ano nui ?
Ke kula a pau. Owai ke kaula i hooleiia i ka halepaahao e Zedekia ? No na kumu e hia ? Ma ka lua aha i hooleiia'i oia ma mua ? A ma ka uwao ana oa wai i hukiia'i oia a hopaa ia mahea ? Heaha kai hiki mai io Ieremia la iloko o ka pahale o ka halepaahao ? Hai mai i ke ano nui o ia mau olelo wanana ? I ka manawa hea i hookoia'i ?
Ma ko Iosia wawahi ana i ke kuahu ma Betela, ka wanana a wai kai hookoia ? Mahea ia i kakau ia'i ? Owai ka inoa o ia kaula ? Iadona, wahi a Iosepata. A kuhikuhi ia kona luakupapau, ua aha ia ia e Iosia ? Hai paanaau mai i ka pauku gula.
Mele. Him. 498
Puhi i ka pu oukou, &c.
Pauku akahi me ke kolu
Pule i hiki koke mai ka wa e huli nui ai na Iudaio, me ko na aina e.
Haawina no Aperila 28, Ier. 35;12–19.
Ma ka Poakahi iho nei, la 1 o keia malama, ua hoomaka ka noho ana o ke Kau Jure o Honolulu nei.
Ke Au o ka Manawa, ua Hiki mai.
E ka Nupepa Kuokoa : Aloha oe :—
O ke au o ka manawa, he mea nui ia, a he mea i lia nui ia e na mea a pau. A ua lilo au i hoa kaana aloha mau no keia manao ano nui, a nana e one nei i na paona io o ka noonoo o ka mea e kakau nei, e hoowaliwali ana i na aa-huki o ka pulima, a na ka welelau o ka lima ka hana. Aloha oukou a pau loa.
O ka la 6 o Feb. 1878, he la no ka pomaikai a me ka ole, a he la no ke ola a me ka make, oia no ka la a oukou i koho ai i mau wahaolelo e hele ai imua o ka Ahaolelo hanohano o ke aupuni, a owai la ko'u hoa olelo ma keia mea, o na tausani anei e heluhelu ana i ka nupepa, a o ka poe paha i lilo i mau Lanamakaainana. Ae, oia no.
Ua lilo oukou he mau kamana moku, e kiei, e halo ana ma kahi i puka, e komo nui nei ka lio, a ua lilo ka elua hapakolu iloko o ka hohonu o ka moana o ka make. Nawai e pani e paa ai keia kunono nui, nawai hoi ; heaha ka pilikia o keia lahui, a me ke poho o ke aupuni e noho ia nei, a owai na mea oi, o ka waiwai anei, o ke kanaka paha ka mea nona ka uhane ola ; a ma keia mea, ua pani ole ia mai ko'u noonoo e kekahi mea, a e hoakaka no au ma ka mea hiki, oia keia. Aohe pilikia o kakou i keia mea o ke dala, ka poe nona keia aina, aole no hoi e ilihune a nele loa me ka ehaeha ole, hookahi pilikia nui o kakou e noho nei i keia wa, mai ka mea haahaa loa ilalo a hiki aku i ka mea kiekie loa, mai ka o a haule wale, a ka ohana lehulehu, hoookahi mea nui, a ma ona la ke poho nui o ke aupuni a oukou e nana mai ai e na Lunamakaainana.
Ka mai lepera e laha nui nei iwaena o kakou, na ia mai i hookaawale ia kakou na hoa kanaka mai ka noho ana mai ka ohana ae, a he hoike au no keia mea no ka oiaio, a owau kekahi i loohia e nei mai, a i hookaawale ia mai ka ohana ae ; he mea nui keia, umi makahiki a ke aupuni e uhiki nei me ka manao e pau ana, aole nae hiki, ua oi aku ka ulu mamua o ka poe i hookaawale ia, mai pono iki la paha, ina he makahiki ke kowa mai kekahi lawe ana mai a i kekahi ; a i ole he mahina, alaila e maopopo io e pau ana ka pilikia ma keia laau lapaau o ka hookaawale, he oki loa no ka auanei, i hakalia i ke ku mai o ka moku, kau mai ana ehiku a oi ae, a pela wale no ia e komo mai nei ma ke awa o Kalaupapa. I ko'u wa aole i loaa i keia mai, hiki aku la no au ma Ainahou a ike i ka poe e hookaawale ia ana, e ku-o ana me ka ehaeha nui, o ka makua i ke keiki, ke kane i kona hoa, a pela wale aku ; owau pu no kekahi i ehaeha me lakou.
O ka poe a ohana i loaa ole i keia haawina, kani no ka aka iki, onou no e hoopii ai e kaawale, a loaa iho o kahi kanu keia.
Hiki oukou i keia wahi me ka pilikia, a ina pela ua loaa ia makou na laau e lapaau ai a ola makou, a me oukou apau no ka mea ua manao au, ehia la i koe i keia mai, aole paha nui uuku loa elike me keia ano malalo iho.
Ka helehelena o ka mai pake.
1. Wela, anu ma ka manamana wawae.
2. Pohaka liilii ma ka ili.
3. Maneo mau ke kuu, a kaumaha ke kiekala. 4. Maneo ke kue maka a mania ka wawae.
5. O na, me he uku moa ala.
6. Lolo kekahi o na lala o ke kino.
7. Make ka ili ma kau wahi.
He mau hiona e ae no kekahi, o keia mai a ina ua loaa kekahi i keia mea ua maopopo, no Kalawao ia. Na oukou mai ia e noonoo, ua pau keia, ke loku mai nei ke anu i ka poli wawae. D. Puna.
Makanalua, Molokai.
E Nana i keia Kuhikuhi ana.
E ka poe e ao ana i na leo mele ma ka buke mele hou. "Colonial Singer ;" e nana i keia papa kuhikuhi i loaa koke na himeni ma ka Buke Himeni Hawaii e kupono ana i na leo ma ka Buke Mele Coloniala.
Na himeni no na leo ano e, e pai ia ana ia ma ke Kuokoa, hookahi himeni ma kela, a ma keia pule i hiki ke ao ia keia mau leo maikai.
Ma ka helu ma ka buke hou ke kakau ana i na leo, a ma ka himeni ma ka buke Himeni Hawaii, na himeni.
Helu 1 Guide, 7. Him. 171.
" 4 Jesus Waits for thee. Ua paiia.
" 5 Cleansing Fountain 8–6, Himeni. 134.
" 7 Abiding Rest. Him. 80.
" 8 The River of Life. Him. 128.
" 9 Alas and did my Savior bleed 8–6. Him. 444.
" 10 Even me. 8–7. Him. 9.
" 11 Jesus Paid it all. Him. 97.
" 12 Bartimeus 8–7–Him. 237.
" 13 The Pilgrim Invited 7, H. 206.
" 15 How can I keep from Singing Him. 348.
" 16 With me Abide, Him. 19.
" 17 Waiting by the River 8–7, Him. 262.
" 20 New Haven 6–4, Him. 292.
" 22 Oh Sing of His Mighty Love, Ke paiia aku nei.
" 23 Sweet hour of prayer, Him. 274.
" 24 Meribah 8–8–6. Him. 211.
" 25 Nettleton 8–7, Him. 306.
" 27 Guide us Shephard, Him. 279.
" 28 Nearer my God to Thee, H. 289.
" 29 Lenox, Him. 466.
" 30 Arise my Soul, Arise, Uim. 59.
" 32 Just as I am, Him. 248.
" 34 Come, ye disconsolate, paiia'na.
" 35 Invitation, Him. 218.
" 37 Lebanon, Him. 242.
" 38 Ariel, Him. 151.
" 39 Autumn, Him. 413.
" 40 Sicilian Hymn, Him. 8.
" 42 I am coming, Lord. paiia'na.
" 43 The Rock &c, Him. 43.
" 44 There is an hour, Him. 590.
" 45 Loved Ones, Him. paiia'na.
" 46 Jesus is mine, Him. 316.
" 47 Jesus Loves me, Him. 428.
" 48 Zion, Him. 356.
" 49 Happy Zion, Him. 401.
" 50 Greenville. Him. 495.
" 52 The Heavenly Lan. paiia'na.
" 54 Missionary Hymn. Him. 468.
" 55 Webb, Him. 492.
" 57 Watchman, 490.
" 58 No Sorrow there, Him. 266.
" 60 Duane Street, Him. 317.
" 63 Woodland 8–6, Him. 22.
" 65 De Fleusy, Him. 101.
Ua lawa keia no keia wa. Mahope ke koena. Aia paiia, e okioki, a kapili i ka buke himeni. Hawaii.
Halahu mawaho o ke Kanawai a me na Kanawai o keia Aupuni.
E ka Nupepa Kuokoa Aloha oe:—
E oluolu mai kou mau Kapena, e okomo iho i keia mau hua e kau ae la maluna, oia hoi keia, "Halahu mawaho o na Kanawai o keia aupuni. " E ninau mai paha kekahi, heaha keia huhewa a a-e ae mawaho o na Kanawai ? Eia no ka laikini awa o Kohala Hema, Hawaii ; o G. W. Ahu ka mea nona keia laikini, o ka Hope Ilamuku Z. Paakiki ka mea nona ka lawelawe ana e kuai i ka awa no keia makahiki, ma Ianuari a hiki i Maraki nei. Eia ka hewa, kuai wale me ka palapala ae inu awa ole, mai ka L. H. P. mai, ka mea i haawiia ka mana mai ke Kuhina Kalaiaina mai. Eia kekahi, kuai a oi aku mamua o 5lbs no ka mana i haawiia e ke Kanawai.
Lawe wale i Waipio nei e kuai ai, komohewa i keia apana me ke kuleana ole.
Ua lohe wau mai ka mea haawi Palapala ae inu awa mai, aole hookahi kanaka o keia Apana i kii aku iaia i palapala ae inu awa nona, mai Jan. a hiki i Maraki o keia makahiki. A ua hele wale na kanaka e kuai me ka mana ole. No wai ia hewa ? no ka mea Laikini awa ia hewa, pela kuu manao. Ua hopu ia iho nei kekahi mea nana i lawe mai ka awa i Waipio nei, e kuai ai me ka Laikini ole, oia o Olepau k. no Waimea. O keia awa nae, no Z. P. mai no ia, ka Hope Ilamuku o S. Kohala, i lawe ia mai e hoolimalima loi kalo. Kupanaha keia hana kue i ke kanawai, he ike kanawai oe e Z. P. He aha hoi keia hana a oukou ? kahaha, mai hana hou pela, o loaa ka pilikia.
Me ke aloha i na keiki paahana o ke Kuokoa. Owau no S. K. Kali'a
Lulu Dala Luakini ma Keanae.
Ma ka la 27 o Maraki nei, M. H. 1878. Ua hoala a e kekahi mau hoahanau ma Keanae he wahi paina lulu dala no ko lakou Luakini, e ku nei, oiai, ua pau na pili mua i ka heo i ka makani ; a ke waiho hakahaka nei ia halepule, a no ia pilikia i ike ia e na hoahanau, nolaila kela wahi paina i hai ia ae la maluna; a penei na hana. Ua hele kekahi kanaka e kuai puaa me kona dala ponoi no, a loaa ka puaa, he $7½. a ma ka ia 26 oia ka Poaono, ma ka po oia la, ua hoomoa ia ua puaa nei, oiai nae ua hai e ia mai i na mea apau, e hele aku e paina me ka lulu ana i kahi aloha, (dala) a i ke ao ana ae he Sabti ia, oia ka la 27 i olelo ia maluna. Ua hele aku na mea apau e paina, a lulu hoi i ko lakou aloha e like me ka mea hiki, aole no i nui loa ka poe i hiki mai, no Nahiku mai a Honomanu ka poe i hele aku a ua malama maikai ia no ka maluhia o ka la Sabati, apau ka ai ana, ua helu ia na wahi lau Oliva i loaa, ua hiki aku no ia i ke $40.75, he mahalo piha ko'u ia hana ana, oiai ; mamua aku, palua, a pakolu, a paha, ke noi ana o na luna aole nae he loaa wahi kenikeni hookahi, a i ka i-o hoi o ka puaa, a make a lilo ana na dala maikai he $40.75, o ka la 7 o Aperila a e nei e kukulu hou ai he hana meia· Me ke aloha. D. W. Kalua
Honomanu, March. 28, 1878.
He Leo Uwalo
He leo uwalo keia i na manu hulu like a pau o ka moku o Kakuhihewa i kanu ia na naau i ka lokomaikai pau ole o ka oihana Kristiano oiaio, nolaila, ke kau leo ia aku nei na manu nunu maka onaona lawe lau oliva a ke aloha elele auna hoolai mai oukou ina hauliuli o keia Koolau a hui lulu lima pu hauoli kakou ma ka Betera hale Akua ma Waikane.
He wahi aie ko makou no ka hoomaemae Luakini ana a me ka Pa o ka hale noho o ke Kahu a me ka hale noho, ua hapai ae nei no makou na wahi koa kakaikahi a uuku maoli no hoi, ua hiki no kekahi hapa, koe no kekahi hapa, nolaila keia hookolo ana i ka nui manu a ke aloha, ina e kui lima pu mai ana oukou me makou, alaila, e noho pu auanei kakou iloko o ke aloha o Kristo.
He hoike Kula Sabati ko makou ma ka la 10 o Aperila hora 1 auina la, he wahi paina no hoi ka ke Kula Sabati i hoomakaukau ai no ka poe houpo lewalewa e naue mai ana e nana no na hana oia la, me oukou ke aloha. E. P. Aikue.
Waikane, Kahu Kula Sabati, Mar. 27, 1878.
Na Hana a ka Haku.
Halawai pake. Ke hoomaka nei na pake ma Paliuli nei, i ka halawai i keia mau Sabati elua, penei ka hana ana i kakahiaka nui ; i na kanaka, awakea i na pake, i ke ahiahi ia Kamakahiki, oia ka hana a ka Haku ma Paliuli nei, o ka nui o na pake e halawai nei, he 34 ke hui ia na kane, na wahine me na keiki. I. P. Moo.
Paliuli Hamakuapoko, Maui.
RICHARD F. BICKERTON, [PEKETONA.]
LOIO a he KOKUA ma ke KANAWAI !
E HELE ANA OIA IMUA O NA AHAHOOkolokole a pau o keia Aupuni ma na ano hihia a pau, ina paha ma Oahu nei, a ma na Mokupuni e ae.
Ua makaukau mau oia! ka hana ana i na Palapala; ili kunawai o kela a me kela ano.
Ua hiki no hoi iaia ke hoaie dala aku ma ka moraki ana i na aina, ma ka ukupanee haahaa loa.
E hanaia na hana me ka hikiwawe a ma ka uku haahaa.
Keena Hana, Helu 23 Alanui Kalepa, elua puka ma o aku o ka hale kauka o Kauka Minuteole.
LOLE MAKEPONO
Ke Kuike.
E LOAA NO IA MA KAHI O
KAKELA ME KUKE!
— E LAA NA —
Ahinahina, Kalakoa,
Keokeo, Leponalo,
Pena, Aila, Aniani,
NA MEA PAULA!
KOPA, AILA HONGA,
AILA HOOMALOO
Kui Kakia, Pakeke,
Tabu, Kaula, Noho Lio,
Hulu Palaki, na Pulumi.
—A HE—
AGENA NO HOI NO NA MOKUPUNI O HAWAII NEI NO NA
Lainakini-nao,
Lainakini Maoli,
Palule Kalakoa,
Alapia, Kelepa, Kilika,
Na lole kupono i ka wawae,
Palule Huluhulu,
Na Lole Huluhulu,
Na Lole no ka hoohehelo ana
Lipini, Lihilihi, &c.
LIPINE, LIHILIHI, &c.
——A ME NA——
Mikini Humuhumu MakeponoLoa!
——A HE——
MAU MEA AI KANI
Ka Palaoa, Kopaa,
Raiki, Pia, Hoohu,
Paakai, Huaala,
Pia Kulina, &c.
A he Laau Lapaau Kaulana Loa
A DR. JAYNES.
Laau Kunu,
Laau Hoomaemae Koko,
Laau Hoopau Naio,
Penekila, Huaale,
A ME NA LAAU HAMO, A PELA'KU !
827 3m 839
PAPA ! PAPA !
——NO——
ALLEN & ROBINSON
UA WEHE AE NEI MAUA I
PA KUAI PAPA
——MA——
KA UWAPO OA PAKAKA
Na Papa Ulaula o na ano a pau.
Na Papa Paina o na ano a pau.
Na Pili Hale Ulaula.
Na Pili Hale Keokeo.
Na Pepa Hoonani Hale,
Na Pepa Molina.
Na Pena a me na Aila Pena !
NA KUI O NA ANO A PAU.
NA PANI PUKA a me
NA PANI PUKA ANIANI.
NA PANI PUKA a me
NA OLEPELEPE.
NA LAKO KUKULU HALE
O NA ANO A PAU !
E KUAIIA MA KE
KE KUMUKUAI HAAHAA LOA
O keia Makeke.
ALLEN & ROBINSON.
Honolulu, Ian. 1, 1878. 840 3m
MEA HOU
NO NA KAMALII !
Kinipopo Laholio !
Kinipopo Laholio !
UA loaa mai nei ia'u he heluna nui o na kinipopo lahholio ma ke kuai kudala, no ke kumukuai malalo iho o na lio mua, a e kuai aku ana wau ia lakou malalo iho o na kumukuai mai ka 5 keneta a hiki i ke 35 keneta o ka popo hookahi a pela aku.
Eia no hoi ma ko'u halekuai na kuka hele ua laholio, a me na laholio @ penikala o hope. E kuai ia aku ana lakou me na kumukuai haahaa loa.
A. L. KAMIKA, Opio.
Helu 44, Alanui Papu. 850 2ms
PAPA, PAPA
AIA MA KAHI O
LEWERS & DICKSON !
(O LUI MA.)
MA KE KAHUA KAHIKO MA
Alanui Papu a me Moi !
E LOAA AI NA
Papa Nouaiki !
o kela a me kaia ano.
Na Papa Nani a Paa no ke Kukulu
ana i na Hale!
Na Pani Puka, Na Puka Aniani,
Na Olepelepe, Na Pou, Na O-a,
Na Papa Hele, Na Papa Ku,
A me na Papa Moe nui loa.
NA PILI O KA HALE
O NA ANO A PAU.
Na Pepa Hoonani, Na Pena o na Wai a Pau.
Na Kui mai ke Nui a ka Makalii,
Na Ami Puka, Na Ami Puka Aniani,
Na Ami o na ano a pau,
Na Aila Pena, o kela me keia ano,
Na Aila Hoomaloo, he lehulehu wale,
Na Aila e ae o na ano a pau.
NA WAIVANIKI
— A ME NA —
WAI HOOHINUHINU NANI!
o na ano a pau loa.
NA BALAKI ANO NUI WALE!
A ke hai ia aku nei ka lono i ua makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana
— NO KA —
UKU HAAHAA LOA!
E like me ka mea e holo ana mawaena o LAUA a me ka MEA KUAI.
E hele mai ! E na Makamaka ! !
A e lawa no hoi ko oukou makemake me ka oluolu a me ka maikai !
845 tf
KOPA KUKAEPELE
—A—
GLENN ?
AOLE LUA NO KA MOOMAE–
MAE I KA ILI !
He mea hoopau i na eha,
Na Ili Puupuu,
A he hoomaemae i na mea ino,
A he hoopau Lumatika,
A he kopa auau no hoi
O keia hopa ka oi aku o ka mea maika
I waihoia mai imua o kanaka.
Aole wale no ka Hoopau ana i ka Huehue Ili Poha, Wela la, Luluaina, a me na mea e ae o ka ili;
A ma ia holoi ana, o ka hoopalupalu pu kekahi i ka Ili, a keia
Laau Hoomaemae lua ole e hana ai.
O ka hoemi ana iho i na mai o ka Ili, a o ke pale aku i ka mai mai na lole e na Mai Lele, oia kekahi. O na Ohana ame na poe makaikai, ina e hoolako lakou i keia
KOPA HOOMAEMAE LUA OLE !
ALAILA, UA LANAKILA LAKOU.
He hoopau i ka lehu o ke poo,
A he Kopa no hoi e kaohi mai ai
I ka lauoho mai ka hina ana.
Ua hooia nui mai na Kauka no ka maikai o keia Kopa!
E loaa no ma kahi o
M. MCINERNY.
Kihi o na Alanui Papu a me Kalepa. 840 3m