Ka Nupepa Kuokoa, Volume XVII, Number 9, 2 March 1878 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA

Kuokoa me ke  Au Okoa

I HUIIA.

No ka Makahiki, $2.  Eono Mahina, $1

Dala Kuike ka Rula.

 

MARAKI 2, 1878.

 

OLELO HOOLAHA.

            E halawai ana ka Aha Euanelio o Hawaii Akau ma Waimea, Kohala Hema, ma ka la 6 o Maraki.  Ua hoololiia ka hoolaha mua ana.

            MA KE KAUOHA.

 

Haawina Kula Sabati

HELU 10, SABATI, MARAKI 10.

 

KUMUHANA;

Ko Hezekia alii maikai ana.  Pauku Bai-

bala, II Oih. Lii, 29;1-11.

 

HOOMAKA iho la o Hezekia e alii i kona makahiki he iwakaluakumamalima, a he iwakaluakumamaiwa makahiki kokna noho alii ana ma Ierusalema; a o ka inoa o kona makuahine, o Abia, ke kaikamahine a Zekaria.

            2 Hana pololei iho la oia imua i ke alo o Iehova, e like me na mea a pau a Davida kona kupuna i hana'i.

            3 I ka makahiki mua o kona noho alii ana, a i ka malama mua no hoi, wehe ae la ia i na puka o ka hale o Iehova, a hana hou ia mau mea.

            4 Kii aku la i na kahuna a me na Levi, a houluulu ia lakou ma ke ala ma ka hikina;

            5 Olelo aku la oia ia lakou, E hoolohe mai oukou ia'u, e na Levi: ano, e huikala oukou ia oukou iho, a e hoomaemae oukou i ka hale o Iehova ke Akua o ko oukou poe kupuna, a e lawe aku i na mea haumia mai kahi hoano aku.

            6 No ka mea, ua lawehala ko kakou poe kupuna, ua hana ino lakou imua i ke alo o Iehova, ko kakou Akua, ua haalele lakou ia ia, ua huli ko lakou maka mai ka halelewa o Iehova aku, a ua haawi mai lakou i ke kua.

            7 A ua pani lakou i na puka o ka lanani, ua kinai i na kukui, aole lakou i kuni i ka mea ala, aole hoi i mohai aku lakou i kekahi mohai ma kahi hoano o ke Akua o ka Iseraela.

            8 No ia mea, ua kauia mai ka huhu o Iehova maluna o ka Iuda, a me ko Ierusalema, a ua haawi oia ia lakou i ka hana ino ia mai, a me ka heneheneia mai, a me ka hoowahawahaia mai, e like me ka mea a ko oukou mau maka i ike iho nei.

            9 Aia hoi, ua haule ko kakou poe kupuna i ka pahikaua, a o ka kakou poe keiki kane, ame na kaikamahine a kakou, a me na wahine a kakou, he poe pio lakoku no keia hewa.

            10 Ano, eia no iloko o ko'u naau e hana i berita me Iehova ke Akua o ka Iseraela, i huli ao kona huhu wela mai o kakou aku.

            11 Ano, e ka'u poe keiki, mai lalau oukou; no ka mea, ua wae mai o Iehova ia oukou e ku imua ona e hookauwa nana, a e lawelawe i kana mau oihana, a e kuni i ka mea ala.

            Pauku Gula. Ina hana a pau ana i hoomaka'i, me kona naau apau oia kana i hana'i, a ua kokuaia mai.  II Oih. Lii. 31;21.

            Na Mahele.  1 Ka hana mua a Hezekia, p. 1-4.

            2 Kana mau olelo paipai. p. 5-7.

            3 Na pilikia i ili mai, a me ke kumu. p8-9.

            4 Ka manao iloko o ko Hezekia naau a me ka olelo paipai hope. p 10-11.

            Mele. 8 Leo.

1

E oli a hauoli e;

Ua puka mai ke'lii maikai;

He mamo na Davida nei;

O Hezekia keia 'lii.

2

Pua no ka luakini e,

Hookapuia na mohai.

Na Hezekia i wehe ae,

Hoomana hou, a hoomaikai.

Pule i mahuahua na Hezekia &e.

Na ninau a na kumu.

            P 1-4. Na hana mua a Hezekia.  Hezekia ke keiki oia awai?  Heaha ke ano o Ahaza?  He makua hewa ka, maikai nae ke keiki?  Hoomaka Hezekia e alii i ka makahiki ehia ona?  Ehia makahiki i alii ai?  Mahea? Owai kona makuahine?  Hoomaka oia e lii ma ka makahiki ehia mamua o ko Iesu hanau ana?  Owai ke'lii o ka Iseraela ia wa?  II Na Lii, 18;1.  Owai ke'lii o Asuria?  o Suria?  o Aigupita?  E kukulu ia'na ke kahua, na kumu mua o ke Aupuni hou ma ia wa, he aupuni kaulana loa, owai ia aupuni, me kona alii mua?  Owai kekahi mau aupuni e ae ia wa?

            Ke'lii ehia Hezekia o na'lii o ka Iuda?  Ke'lii ehia mai a Davida mai?  Hana  pololei oia me wai?  Ehia makahiki ia mai o Davida mai?

            I ka makahiki ehia o kona alii ana i wehe ai oia i na puka o ka luakini, a hana hou ia?  Nawai i pani i na puka?  No ke aha?  Nawai i pani a e pani ana i ka puka o ka lani i ole e komo na kanaka maloko; Mat. 23;13.

            Ka Malama mua, ka malama mua ia o ke aha?  O ko Hezekia alii ana nei?  O ka makahiki laa anei?  Owai ka inoa o ka malama mua o ka makahiki laa? a o ka makahiki nea?

            Mahea i houluuluia'i na kahuna me na Levi?  Ke ala hikina, ka pa paha ia ma ke alo o ka puka o ka luakini.           

            P 5-7.  Na olelo paipai a Hezekia.  1 E hoolohe. 2 E huikala i ke aha?  3 E hoomaemae i ke aha?  4 E aha i na mea haumia?  Heaha ia mau mea haumia?  Na kii a kuahu kii o Ahaza.  II Na Lii 16;12-16. 

            Ua aha na kupuna imua o ke alo o Iehova?  Ua haalele ia wai?  Uaha ka maka?  U'aha ke kua?  Owai ke hoohalike ana me lakou i keia wa?  U'aha lakou i na puka o ka luakini?  Ua kinai i ke aha?  Aole hoi i aha ma kahi hoino o ke Akua?  Pela anei kekahi poe oonei?

            P 8-9.  Na pilikia i ili mai me ke kumu.  Heaha ka i kauia mai maluna o ka Iuda me Ierusalema?  Ka hana aha ka i haawiia mai?  Ua hoopilikia mai na aupuni e, a henehene mai, a hoowahawaha mai.  No ke aha keia mau pilikia?  Kan. 28;15,20, 25, 26, 37.  Aole anei oukou e makau o ili mai keia mau poino maluna o oukou no ka hookuli ia Iehova?

            P 10-11. Ka manao iloko o Hezekia, me ka olelo paipai hope.  Heaha ia manao?  E hana i berita me wai?  No ke aha?  Me wai mamua?  Me Asa ma.  Heaha ka olelo paipai?  Mai lalau, ma kanaloa, mai hoololohi.  Ua wae ke Akua ia wai e ku imua ona, a e aha?  Nah. 3;6. 18;2,6.

            Mele. 7-6.  Leo, Hosana kamalii.

E ala na kahuna,

Ame na luna pu,

Na kumu, na haumana,

E hoomaemae kakou,

Kai ae i na haumia

I maemae na naau,

E ku a lawelawe,

A hana pono mau.

Cho.    Ke kau nei ka inaina,

Ua wela ka huhu,

E mihi. a e huli,

I ola pu kakou.

Na ninau a ke Kahu

            Na makua.  Nui wale na ninau a na kumu ia oukou, he mau ninau paakiki kekahi.  Ua loaa anei na haina?  Ina ua loaa, hai mai i na inoa o ke lii o ka Iseraela, o Suria, o Asuria, o Aigupita, o Roma.  Loaa ole ka.  Ua loaa anei i na keiki, a i na kumu?  Ina aole, e imi a hai mai kela Sabati.

            Na keiki. He alii aha Hezekia?  Owai kona makuakane?  He makuakane aha ia?  Owai kona makuahine?  Malama he makuahine maikai ia, a nolaila, ua maikai kana keiki.  Owai na kupuna maikai o Hezekia?  Owai na kupuna hewa?  Owai ke lii nana i pani na puka o ka luakini?  Na ke lii hea i wehe na puka?  Ua piha ka luakini i na mea haumia, owai ka i kauoha ia e lawe aku i na mea haumia mai ka luakini aku? Heaha na mea haumia a hoopaumahele iloko o ko kakou luakini?  Ka uahi baka, a kuha baka, a lealea, a hawanawana, a hiamoe a--He aha ka pono?  A pehea ka luakini o ka naau?  Heaha ka wai hoomaemae i ka naau?  A maemae ole ka naau, ae anei Iesu e noho iloko?  Aia mahea ka luakini maemae loa?  Owai ke ae ia'na e noho maloko.

            Ke kula a pau.  Heaha ka pa ku gula?  Me ke aha kakou e hana'i i na hana i loaa mai?  Kek. 9;10.  Hai mai hoi. Rom. 12;11. 1 Kor. 15;58.  Heaha ke ano oia inoa Hezekia? Owai ke kaula kaulana e noho ana i ka wa ia Hezekia z  Owai pu kekahi me Isaia?  E huli i loaa.

            Na manao pili.  1 Hoala pinepine ke Akua i na agena e pono ai kona aupuni.  2 E hoomaemae e na kahuna, na luna ia lakou iho.  alaila hiki ke hoomaemae i na luakini, me na ekalesia.  3 E kokua na lii i ka hoomaemae ana i ka aina i ka hoopau ana i na mea haumia.  4 E noi aku i ka Uhane Hemolele e hoomaemae i ko kakou mau naau.  5 E wehe i ka puka o na luakini, e komo maloko e mohai i na mohai maikai i na mele, na himeni, na pule, ka hoomana ia Iehova.

            Mele. 8. Leo--

1

Ma ka nana mao, maanei

A puni ae Hawaii nei,

Ua pani ia na puka e

O ko ke Akua mau hale nei.

2

Ina aole, e hai mai

Ke kumu o ka noho ae,

Ku no na noho a haohao,

Auhea na ona i lalau?

3

E wehe a akea no,

Kahea, e komo mai oukou;

Hoomana, a hoolohe ae

I na olelo e ola'i.

            Pule i hoomaemae ia, a hoopiha ia na lua kini, &e.

            Haawina no Maraki 17, 2 Oih'Lii. 32;9-21.

 

HELU 11, SABATI MAR. 17, 1878.

 

KUMUHANA:

Hezekia me ko Asuria.  Pauku baibala,

II Oih Lii, 32;9-21.

 

            9 A mahope iho o keia mea; hoouna o Senakeriba ke alii o Asuria i kana poe kaua i Ierusalema, (aia no ia ame kana poe ikaika me ia e ku e ana ia Lakisa,) io Hezekia la, ke alii o Iuda, a i ka Iuda a pau, aia ma Ierusalema, i mai la,

            10 Penei i olelo ai o Senakeriba, ke alii o Asuria, Ma ke aha la i paulele ai oukou i ko oukou noho ana i ka popilikia ma Ierusalema.

            11 Aole anei i hooikaika o Hezekia ia oukou e haawi ia oukou iho i ka make i ka pololi a me ka makewai, i kana olelo ana ae, O Iehova ko kakou Akua, e hoopakele oia ia kakou mai ka luna aku o ke alii o Asuria.

            12 Aole anei o ua Hezekia la keia, ka ka mea nana i lawe aku i kona mau wahi kiekie, a me kona mau kuahu, a olelo aku i ka Iuda, a me ko Ierusalema, i aku la, Imua o ke kuahu hookahi, e hoomana ai oukou, a maluna iho o ia mea e kuni ai i ka mea ala?

            13 Aole anei oukou i ike i ka mea a'u i hana'i, Owau a me ko'u mau makua, i na kanaka a pau o na aina?  Ua hiki anei i na akua o na lahuikanaka o na aina ke hoopakele i ko lakou aina mai ko'u lima aku?

            14 Owai ka mea a na akua a pau o ia mau lahuikanaka a ko'u mau makua i luku loa ai. I hiki ia ia ke hoopakele i kona poe kanaka mai ko'u lima aku.  i maopopo e hiki i ko oukou Akua ke hoopakele ia oukou mai ka'u lima aku?

            15 Ano, mai noho a hoopunipuni o Hezekia ia oukou, a malimali  mai ia oukou pela, mai paulele oukou ia ia; no ka mea, aole hiki i kekahi akua o kekahi lahuikanaka, a me kekahi aupuni ke hoopakele i kona poe kanaka mai ko'u lima aku, a mai ka lima aku o ko'u poe kupuna; a pehea la e hoopakele ai ko oukou Akua ia oukou mai ko'u lima aku?

            16 A olelo ino hou aku kana poe kauwa ia Iehova, ke Akua, a ia Hezekia kana kauwa.

            17 A kakau ia i na palapala e hoino aku ia Iehova ke Akua o ka Iseraela, me ka olelo aku ia ia, i aku la,  E like me na akua o na lahuikanaka o na aina e, aole lakou i hoopakele i ko lakou poe kanaka mai ko'u lima aku, pela hoi, aole e hoopakele ke Akua o Hezekia i kona poe kanaka mai ko'u lima aku.

            18 Kahea lakou me ka leo nui, ma ka olelo a ka Iuda, i na kanaka o Ierusalema i ka poe maluna o ka pa, e hoomakaukau ia lakou, a e hoopihoihoi ia lakou, i loaa mai ke kulanakauhale ia lakou.

            19 Olelo ino aku la lakou i ke Akua o Ierusalema, e like me na akua o ko na aina e, na mea a kanaka i hana'i.

            20 No ka mea, pule aku la o Hezekia ke alii, a me Isaia ke keiki a Amosa, ke kaula, a kahea aku laua i ka lani.

            21 A hoouna mai o Iehova i anela, nana i luku iho i ka poe koa ikaika a pau, a me na luna, a me na kapena, ma kahi i hoomoana'i ke alii o Asuria: a hoi aku ia i kona aina me ka maka hilahila.  A hiki ia i ka hale o kona akua, o na mea i puka mailoko mai o kona puhaka, pepehi lakou ia ia malaila i ka pahikaua.

            Pauku Gula, Me ia he lima kanaka, aka, me kakou o Iehova ko kakou Akua, e kokua mai ia kakou, a e kaua i ko kakou kaua.  II Oih Lii 32;8.

            Topika, Ke kaua kue i ke Akkua.

            Na Mahele. 1 Ka mea e kaena ana, p 9.

            2. Na olelo kaena, p 10-19.

            3. Ka lukuia'na o ka mea kaena. p20-21.

            Mele. Mele hou.  7,--Leo.

1

Mai kaena, e na 'lii,

Na aupuni kaua nei.

Lanakila anei oukou

Ke kue i ke Lii mau?

2

Mai kaena kamalii

No ko oukou akamai.

Oukou hoi, na kumu, ao

Mai kaena, mai haanou.

3

Noho haahaa, akahai,

Me Iesu la i ao mai,

Pela e loaa mai ai

Ko ka lani pomaikai.

            Pule i hoopauia ke kaena, ka hookiekie ana, i noho haahaa kakou &e.

            Na ninau a na kumu.  Heaha ke kauoha a Hezekia ma kela Haawina?  II Oih Lii. 29;5.  Ua hookoia anei ia kauoha? p 16-19.

            Heaha kekahi mau kauoha me na hana no na mohai, no na himeni, no ka hoomaikai ana?  p20-36.

            Ka ahaaina hea kai kauohaia, a hoala hou ia?  Owai ka poe i kiiia'ku e hele mai ia ahaaina?  Mai hea a hea e kii aku ai?  Pehea ka nui o ka poe ma ka akau?  Pehea me kekahi hapa?  Lehuleu anei ka poe i akoakoa mai ma ia ahaaina?  E hia la i ahaaina ai?  Ehiku la no ka ahaaina moliaola, a no ke aha keia mau la hou e hiku?  Aole he ahaaina e like me keia mai ia wai mai?

            Mokuna 30;1-27.

            Ma hope iho o keia ahaaina, heaha ka hana no na kii, a no ka hooponopono ana i ka luakini, na papa kahuna, na papa Levi, na hapaumi, na mohai, na kuauhau?  Pehea hoi Hezekia i hana'i me ke aha ia mai hoi e ke Akua?  Mokuna. 31;1-21.

            Mahope o keia mau mea, owai ke lii i ala, a hele kue mai ia Ierusalema?  Heaha ka hana a Hezekia, e pale ai, e hoopilikia ai i ko Asuria poe koa?  Heaha kana mau olelo paipai a hoolana?  Mok. 32;1-8.

            P 9. Ka mea e kaena ana. Owai ia mea?  Owai kana i hoouna aku ai e kaua ia Ierusalema?

            Nana. II Na Lii. 18;17-19.  I ko Hezekia lohe ana, ua hele kue mai Senakeriba, a ua lawe pio i kekahi mau kulanakauhale, wikiwiki oia e hoolaulea i ke lii ma ke aha?  2 Na Lii 18;13-16.  Ka inoa ua oluolu Senakeriba i keia makana nui, ua pau ka manao e kaua, aole ka?  He ahi hoopunipuni, e kaena ana i kona ikaika iho.  e hoole ana ia Iehova e like me Parao. Puk. 5;1-2; me Golia, 1 Sam. 17;10; me Benehadada, 1 Na Lii 20;10.  Heaha ka hilinai mana ole?  Hal. 33;16,17.

            P 10-19. Na olelo kaena, Heaha ka ninau kaena mua a Senakeriba ma ka waha o na elele? E haawi ana Hezekia i na kanaka i ke aha?  ma ke aha wahi a lakou?  p 11.  Heaha ka Hezekia i lawe aku mai o lakou aku?  p 12. Oiaio anei keia mau olelo?  Heaha na olelo kaena ino ma p 13-14 no na akua e, no ke Akua oiaio hoi?  Heaha kekahi mau olelo ino no ko Hezekia hoopunipuni ana ia lakou, a no ka hiki ole o ke  Akua ke hoopakele ia lakou?  p 15.  Pehea hoi lakou ia Iehova, a ia Hezekia?  p 16.  A kakau lakou i palapala aha? p 17.  A kahea lakou i na kanaka o Ierusalema me ka leo nui i mea e aha ai? p 18.  A aha lakou i ke Akua o Ierusalema? p 19.  Nana hoi II Na Lii 18;19-25, 29-35, 19;10-13. Hal 97;7. Isa 10;15.

            P 20.Ka pule ana a Aezekia laua me Isaia. heaha ia pule?  @e na olelo hoolana a Isaia?  II Na Lii 19;1-7, 14-34. Isa. 37;6,7,14-35.

            P 21, 22, Ka lukuia ana o ka mea kaena.  Pau ka pule a Hezekia, hoouna ke  Akua ia wai e luku i na koa o Asuria?  Aia mahea lakou?  Mawaho aku no o Ierusalema.  Ehia ka poe i make?  II Na Lii 19;35.  Isa. 37;36.  He make malu keia mai ke Akua mai, oiai e hiamoe ana na koa ma ka po e like me kela make o na hiapo o Aigupita.  Puk. 12;29.  Pau loa anei na koa i make II Na Lii 19;35.  Heaha hoi ka hope o Senakeriba? nawai i pepehi?  II Na Lii 19;37.  Ko ka olelo hea?  Isa. 37;7, 31;8,9.  heaha hoi ka hope o Parao?  o Golia?  o Benehadada?  Owai kekahi alii o Bablalona mahop iho i kaena nui no kona aupuni?  Heaha hoi kona hope?  dan. 4;28-32.

            Mele. Mele hou.  8-6 Leo,

1

Hookiekie no ke lii,

Senakesiba nei,

Kue i ko ke ao Moi,

Hoino wale ae.

2

A hoouna mai ke Akua mau

He anela hoopai;

A luku oia ma ka po

Ia kini haanou nei.

3

Makau na'lii, na kanaka

I ke Akua mau,

O iho mai he anela,

A luku ia oukou.

 

Na ninau a ke kahu.

            Na makua. Owai keia alii kaena?  Heaha ke ano nui o kana mau olelo kaena?  Maluna o ke aha kona hilinai ana?  Papa oia, mai hilinai ka Iuda ia wai?  Io wai la Hezekia i hoopii aku ai iloko o keia pilikia?  Owai ke kaula i kokua a hoolana ia ia?  Lohe anei ke Akua i ka Hezekia pule?  Owai ka i hoouna ia mai e ke Akua e luku i ka puali koa o Senakeriba?  Pehea ka luku ana?  Ehia tausani i luku ia?

            Na keiki.  Heaha ka hope o Senakeriba keia alii kaena nui wale?  Nawai oia i pepehi?  Owai na inoa o keia mau keiki?  Isa. 37;38.  Hai mai i kekahi poe kaena e ae.  Parao, Golia, Benehadada, Nebakaneza.  Mahea Parao i make ai?  Nawai i pepehi ia Golia?  Me ke aha?  Heaha ka hoopai i hiki mai maluna o Nebukaneza?  Kipaku ia oia ma ka nahelehele, a ai i ke aha?  me ke aha?  Pehea ka lauoho?  na maiao?  Pehea ka loihi?  Maikai anei ke kaena ana?  Hai mai i ka pauku himeni o keia la.

            Ke Kula a pau.  Hai mai i ka pauku gula.  Owai ka i kokua nui ia Hezekia?  Heaha kekahi mau hana maikai ana?  Ua aha i aka luakini?  Ua aha ia ka ahaaina moliaola?  Ua waiho wale ia anei ia ahaaina na mamua aku?  Aole he ahaaina me keia mai ia wai mai?  Ma ke aha e hiki ai ke malama ia ahaaina?  Heaha ke kauoha no ka ahaaina a ka Haku?  1 Kor. 5;7,8.  Ma ke kukulu ana i ka ahaaina berenahu ole mua heaha kekahi luku ana i like ke ano me kekahi luku ana ma keia Haawina?  Mahea i make ai Senakeriba?  Owai ke'lii mua o Nineva?  Owai ke panihakahaka o Senakeriba?  He aha ka hope o ka poe haakei?  Sol. 15;25.

            Mele 8-7 Leo, Beatley.

1

A kau mai ka pilikia,

Hoopii i ke Akua e,

Me ia ke'lii Hezekia,

A kokua ia mai.

2

Lanakila no ka Iuda,

Me Iurusalema pu,

Pau na kue i ka make,

Olo ae na kanikau.

            Pule i lanakila ka poe, pono a auhee aku na enemi, &e.

            Haawina no Maraki. 24. 2 Oih'Lii 33, 9-16

 

E KA NUPEPA KUOKOA; Aloha oe:--

            Ma ka helu 52 o ke KUOKO, ua ike akea ia na pane a Thom. Puuohau i ke komite o ka Aha Kiekieo Hawaii Komohana, pu me ke komike o ka Ekalesia o Pukaana.

            O ke Komite nae o ka Ekalesia kana i ake nui ai e ike ia'e kona poo, alaila, hoohuli koke ka waha o ka pu ia ia, malia paha ua piha; E kuu makamaka aloha, aole au e hoihoi aku ana i ka hewa no ka hewa, a i na hua olelo ino ma ke ano panai i like pu; Aka, he okoa ka'u nou e kuu hoa'loha.

            Ke aa aku nei au e hoike imua o na kini o kaua i ka mea oiaio, penei, ua kahea ka Ekalesia o Pukaana ia oe iloko o ka M.H. 1876.  puka koke mai no kau palapala e apono ana ia leo kahea; a iloko no o Augate oia makahiki; hiki kino mai oe a makaikai i ke Kihapai, ka loa ka laula, ka momona, a panoa paha, ma na pule hope o Dekemaba hiki kino mai oe me kou ohana a me ko olia mau pono kino a pau;  a na ka Ekalesia no i uku aku na lilo uku moku a pau o olia.

            E ka hoa e, ua kau ka Moa i ka haka, a kali aku la ma ka la mua o Ianuari o 1877, hoomaka koke no ka mahiai, waele kanu a kipulu, no ka mea, ua ike oe, koku kuleana ia, a pela hoi ka Ekalesia ia oe; Aka, ke hoole manawaino loa mai nei oe; "Aole! Aole!! Aole loa!!!" he kuleana iki o ka Ekalesia wahakani o Pukaana ia oe.

            E ka makamaka, pela iho la anei ka hooia ana mai a kou lunaikehala ia oe?

            Lawelawe ponoi no oe i ke kihapai a hiki i loko o Maraki, noho ka Aha Hui i Lanakila; waiho hou aku ka Ekalesia he palapala kakau ia oe ma o ka Aha'la, i na paha ua ae aku oe i ua palapala nei a ka Ekalesia mao ka Aha Hui la, ua manao no hoi au ua kuleana ka Aha ia oe, aka, aohe o'u kuleana ia, ia lakou ae no ia.     

            "Aole no i hookuuia o T. Puuohau mai kona keiki ana no ka Aha Ekalesia o ka mokupuni o Oahu, e kuleana ai ia Aha Hui, a me ka Ekalesia hookamaai o Pukana ia T.P."

            Ea, ua naauao anei keia pane ou?  aia ma kekahi lalani o kou palapala kahea, penei i kakau ia:  "Aia a kaawale oe i na mea hihia o ke ao nei."

            Ma kou kumu mua, penei:  1 "Aole i hoonoho o ka Aha Hui ia T.P. i kahu no ka Ekalesia o Pukaana.  2 aole no i haawi i palapala haiolelo, 3 aole no i hookama i keiki na ka Aha."

            E.T. Puuohau, i na paha i lawelawe ka Aha Hui Ekalesia o Hawaii Komohana i kekahi o keia mau kumu ekolu ia oe: aole oe e hapai i ke kumu hope alaila ua olu he wai malalo, ina paha i kapae aku oe i ke kumu mua, a huna kele aku ia ia ma kahi pouli, a o ke kumu elua wale no kau k hoaiai mai, no kou hookuu oleia mai kou keiki na ka Aha o Oahu, e aho ia, aka, oiai no kekahi mea hihia i oleloia maloko o kou palapala kahea.

            Na ka lehulehu e nana mai; Owai la ka hookamani?  O ka Ekalesia paha, o ke komike paha, a o T. Puuohau anei?

            "He alapahi, a he hoopunipuni lua ole keia o ke komike o ka Ekalesia o Pukaana &e."  Oia hoi, no ka hoike aku i ka Aha, ua haalele ino o T.P. i ka Ekalesia, mahope o kona ae pono ana mai i ka palapala kahea, a me ka hanai pono ana o ka Ekalesia ia ia.  

            E.T. Puuohau, ua hapala mai oe ia mea ino iluna o kou makamaka aloha; ma kuu ano komike no ka Ekalesia o Pukaana, ua huli no wau i huaolelo kupono ma kahi o haalele ino, aohe olelo Hawaii e ae i kupono loa elike me "haalele ino."  No ka mea hoi, ma ka la Sabati iho, aole oe i hai iki imua o ke Anaina Ekalesia e hoi ana oe ma ia Poakahi ae, aole loa he wahi leo oia ano i lohe ia mai loko aku o kou waha, a e hoike mai ana la hoi i na kumu o ka waiho mai i ka Ekalesia aole loa no; Ua hooholo ia ma ia Sabati he lulu no ka hanai ia oe ma ia Sabati aku, aka, palahiu e nae oe kau ana iluna o ka moku, i ko makou hoi ana mai uka mai, ua hala aku la oe e lana ana maluna o ka ili o ke kai, aole hoi i aloha mai elike me ke ano i maa mau ia kakou, pela iho la kou hele ana la e ka makamaka,  Ua manao ke komike he haalele ino ia; oia nae kau e hapala mai nei, he alapahi a he hoopunipuni lua ole ke komike.  Na ka lehulehu e nana mai ia kaua.

            Ma kou manao hope, e ahewa ana i ka Aha Hui Ekalesia o Hawaii Komohana, no ka hai ole i ka inoa komike.

            E ku kohana aku ana au imua ou he maka a he maka, mai kuu poo o kuu wawae, aole loa au e hoao iki e pee iho,

            E ike auanei oe ia'u aohe he enemi; aka, kou hoa'loha oiaio no ka mea i iini nui e hookupaa ia oe maluna o ka Ekalesia nei, ai haawi aku i na kokua ana elike me ka hiki, aka nae paha ua kuhihewa oe he mea okoa, aole.

            Owau iho no me ke aloha ia oe a me kou ohana pu, a ke aloha aku nei hoi me ko'u ohana ia olua.   D.H. NAHINU.

            Hookena, Ian. 1878.

 

Na Kula Sabati, Ko lakou ano

ma Hawaii nei, na hemahema, na

kuhihewa, na mea e pono ai.

 

            Heaha ke ano o na kula Sabati Hawaii?  E hai mai ka mea i ike, oia hoi ka mea i kaahele apuni keia Pae Aina ma ke ano o ke kiu, e komo ana iloko o kela, a o keia kula Sabati, a e nana pono i ke ano o na hana, i ka maikai a me ka maikai ole, a e kakau i paiia ma ka nupepa.

            Ua paiia no kekahi mau mea no kekahi mau kula Sabati.  Ma na mea nae i paiia, aole akaakalea ke ano oia mau kula. Ua lako paha i na mea e pono ai, ua hemahema paha.

            Eia na mea e pili ana i ke k ula Sabati maikai.

            1. He kahu maikai, naauao akamai, oluolu akahai, aloha, imi, naauao e, hoomakaukau pono kana oihana, ike i na inoa a pau o na haumana, launa pu me lakou ma na la noa, ume ia lakou ia ia iho, e like me ka ume ana o ka la i na Hokuhele i ole e hele lalau.

            E lako ke kahu i na mea e pili ana i na haawina kula Sabati, i ka baibala, i ka buke wehewehe i na hua baibala, i na nupepa kahi e paiia'na na haawina kula Sabati, ka palapala aina kahi i kakauia ai na inoa o na aina o na kulanakauhale &e.

            Aole nae he mau mea keia e waiho wale ia.  E nana mau no i kela pule, i keia pule, a i na la apau paha.  A ina he mea pohihihi kekahi, a loaa ole, e hele i kahi o ke kahuna pule, a o ka mea i ike.  Me ia e makaukau ai oia e hoomalamalama i na haumana me na kumu ona, i ka wa e kula ana.  Mai olelo, aohe manawa.  E lawe i manawa.  Loihi na po.  Nui na minute, a hapa hora paha i kaawale.  E hoopiha i ka wa kaawale i keia hana maikai.  E hoomanao ana, ka oihana kahu kula Sabati, he oihana nui, hanohano ia, e pili ana, a e koo ana i ka oihana kahunapule, me ka oihana anela. Me na luna oihana e ae, na kahuna, na loio, na Lunakawai Kiekie i hoomakaukau e ai mamua o ka hana ana, pela e hana'i na kahu kula Sabati.

            E hui pu hoi lakou me na kahunapule, me na kumu, e kukakuka no na mea e pono ai.

            E kukulu i halawai kumu, i mea e makaukau ai na kumu.  A ma ka wa kula, e nana na kahu i ka hana a na kumu, a e kokua ma ke kuikahi ana.  A ina he wa kaawale no na ninau mawaho o ka haawina, na ke kahu no e hoopuka ia mau ninau.

            Ina na kela, na keia, he haumana, he kumu e hoopuka i na ninau, hemahema paha, lalau, naaupo, hoala hoopaapaa waiwai ole, poho ka manawa.                   (Aole i pau.)

 

RICHARD @

 

LOIO a he @

E HELE @

a pau @

Oahu nei @

            Ua ma@

nawai o @

            Ua h@

aina@

            K@

            K@

ka hele @

 

LOLE MAKEPONO

Ke Kuike.

E LOAA NO IA MA KAHI O

KAKELA ME KUKE!

E LAA NA

Ahinahina, Kalakoa,

Keokeo, Leponalo,

Pena, Aila, Aniani,

 

KA MEA PIULA!

KOPA, AILA HONUA,

AILA HOOMALOO

 

Kui Kakia, Pakeke,

Tabu, Kaula, Noho Lio,

Hulu Palaki, na Pulumi.

 

A HE

 

AGENA NO HOI NO NA MOKUPUNI O HA

WAII NEI NO NA

 

Lainakini-nao,

Lainakini Maoli,

Palule Kalakoa,

Alapia, Kelepa, Kilikia,

 

Na lole kupono i ka wawae,

Palulue Huluhulu,

Na Lole Huluhulu,

Na Lole no ka hoohehelo ana

Lipini, Lihilihi, &e.

 

LIPINE, LIHILIHI, &e.

 

 A ME NA

 

Mikini Humuhumu MakeponoLoa!

 

A HE

 

MAU MEA AI KANI

 

Ka Palaoa, Kopaa,

Raiki, Pia, Hoohu,

Paakai, Huaala,

Pia Kulina, &e.

 

Ahe Laau Lapaau Kaulana Loa

A DR. JAYNES.

 

Laau Kunu,

Laau Hoomaemae Koko

Laau Hoopau Naio,

Penikila, Huaale,

 

A ME NA LAAU HAMO, A PELA'KU!

827 3m 839

 

PAPA! PAPA!

NO

ALLEN & ROBINSON

 

UA WEHE AE NEI MAUA I

PA KUAI PAPA

MA

KA UWAPO O PAKAKA!

Na Papa Ulaula o na ano a pau.

Na Papa Paina o na ano a pau.

Na Pili Hale Ulaula.

Na Pili Hale Keokeo.

Na Pepa Hoonani Hale,

Na Pepa Molina.

 

Na Pena a me na Aila Pena!

 

NA KU'I O NA ANO A PAU.

 

NA PANI PUKA a  me

NA PANI PUKA ANIANI.

NA PANI PUKA ame

NA OLEPELEPE

 

NA LAKO KUKULU HALE

O NA ANO A PAU!

 

E KUAIIA MA KE

 

KE KUMUKUAI HAAHAA LOA

 

O keia Makeke.

 

ALLEN & ROBINSON.

Honolulu, Ina. 1, 1879.           840 3m

 

E KA POE MAI

 

E KA POE PILIKIA!

 

E NANA MAI OUKOU I KEIA.  UA LOAA HOU MA

Ka Laau Lapaau Kaulana!

 

No ka hoomaikai ana i ke koko,

A me na mai a pau.

 

E hele a ike, aia ma kahi o

A.L. KAMIKA, Opio.

Helu 44, Alanui Papu.             840 3ms