Ka Nupepa Kuokoa, Volume XVII, Number 8, 23 Pepeluali 1878 — PAPA HOIKE MANAWA NO NA Mea Kaulana iloko o ka Moolelo Hawaii. [ARTICLE]

PAPA HOIKE MANAWA NO NA Mea Kaulana iloko o ka Moolelo Hawaii.

1872, Feb. Waihoia ka pohaku kihi o ka hale aupuni hou Aliiolani Hale. Wehe mua ia ka Hotele Hawaii. Oct. 2, Make ka wahine a Kauka G. P. Judd, iloko o ke 68 o kona mau makahiki, oia hoi kekahi o ka huakai elua o na misionari. Dek. 11, Make o Kamehameha V ma Honolulu i ke 43 o kona mau makahiki, me ka waiho hakahaka ana i ka nohoalii. Dek. 18, Make o A. Bihopa i ke 76 o kona mau makahiki. Ua hiki mai oia i Hawaii nei i ka makahiki 1823. Dek. 26, Make o Wini wahine ma Waimea, Kauai, i ke 77 o kona mau makahiki. Oia hoi kekahi o na misionari Paionia, i hiki mua mai i ka makahiki 1820. 1873, Ian. 8, Kohoia o W. C. Lunalilo i Moi no Hawaii nei, e ka Ahaolelo kuikawa. lan. 9, Hoohiki o Lunalilo malalo o ke Kumukanawai, maloko o ka luakini o Kawaiahao. Iulai, Make o Dr. G. P. Judd ma Honolulu, i ke 70 o kona mau makahiki. Oia kekahi o na misionari i pae mai ma ka makahiki 1828, a ma ka makahiki 1842, noho oia ma ka hooponopono ana i ke aupuni Hawaii. Hooikaika hou ia ka imi ana i ke Kuikahi Panailike me Amerika Huipuia, me ka manao ana e hoohui aku i ke Awa o Puuloa, i wahi hoolulu moku-kaua. Ua hoopau ke Aupuni Hawaii i ka manao hoohui ia Puuloa. Sept. 7, Hoomaka ia ka haunaele ma ka halekoa, a hoopauia ka oihana koa kumau e ka Moi Lunalilo ma ka la 12. 1874, Feb. 3, Make ka Moi Lunalilo ma Honolulu, i ke 39 o kona mau makahiki, me ka waiho hakahaka hou ia o ka nohoalii. Feb. 19 Kohoia o Davida Kalakaua e ka Ahaolelo i Moi no ko Hawaii Paeaina. Haunaele ma ka Hale Hookolokolo o Halekauwila, a pepehiia na Lunamakaainana e ka poe kipi. Hoomaluia ka haunaele e na koa o na aumoku kaua Amerika a me ko Beritania, e ku ana ma ke awa nei ia manawa. Feb. 13, Hoohiki iho la ka Moi Kalakaua malalo o ke Kumukanawai, maloko o Kinau Hale. Feb. Kuahauia ka mea Kiekie W. P. Leleiohoku i Hooilina no ka nohoalii. Iune, hooholoia ke kanawai e ae ana i na mahiko e puhi rama. Hooholoia ke Kanawai aie Miliona Dala. Iulai 5, Make ka wahine a Rev. D. Dole ma Honolulu, i ke 61 o kona mau makahiki. I ka makahiki 1837 kona hiki mua ana mai i Hawaii nei. Oct. Hooikaika hou ia ka imi ana i ke Kuikahi Panailike me Amerika Huipuia, a ma ka la 19 oia malama, hoounaia aku la na Mea Hanohano E. H. Allen a me H. A. P. Carter ma Wasinetona, ma ke ano he mau Komisiona. Nov. 17, Holo aku la ka Moi Kahkaua i ka makaikai ia Amerika Huipuia, maluna o ka mokukaua Benicia, i ukali ia e na Kiaaina Jno. O. Dominis a me Jno. M. Kapena. 1875 Hoopuka mua ia ka Alemanaka Hawaii a me ka buke hoomanao makahiki. Ian. 29, Make o Capt. Meek i ka 83 o kona mau makahiki. Feb. 15, Huli hoi mai ka Moi Kalakaua me kona mau ukali, maluna o ka moku kaua Adimarala Pensacola mai Amerika Huipuia mai. Oct 16, Hanau o Victoria Kawekiu Kaiulani Lunalilo, he kaikamahine na ka mea Kiekie Miriama Likelike Cleghorn. Oct. 19, Ku mai ka mokuahi Vasco de Gama, no ka Laina Hooholo Mokuahi o Auseteralia, mai Kapalakiko mai, ma ke alahele no na Panalaau. Novemaba, Hoouna houia ka Hon. E. H. Allen i Wasinetona Amerika no ke Kuikahi Panailike. 1876 Feb. 10, Ku mai ka moku kialua Hera : mailuna aku hoi o ka oneki o keia moku, i haule ai ka Earl o Aberdeen iloko o ke kai a nalowale, ma ka la 27 o Ianuari, oiai ka moku e holo ana mai Bosetona aku, no Melebona, Auseteralia. Make o Kauka Makibine makua ; ua Kamaaina kona noho ana Honolulu nei mai ka makahiki 1855 mai. Mei 14, Make o Mrs. Betsy Judd, i ke 94 o kona mau makahiki o ke ola ana—oia ka makuahine o Dr. G. P. Judd. Iulai 4, he hauoli nui ma Honolulu, no ko Amerika la Kuokoa. Aug. 8, Make o James Robinson ma Honolulu, he haole i noho a kamaaina ma Hawaii nei. Aug. 14, Hooholo ia ke Kuikah Panailike o ka Aha Senate o Amerika. (Aole i pau.)