Ka Nupepa Kuokoa, Volume XVII, Number 8, 23 February 1878 — Page 4
| This text was transcribed by: | Terry Ledford |
| This work is dedicated to: | Liko Rogers |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA
Kuokoa me ke Au Okoa
I HUHA.
No ka Makahiki, $2. Eono Mahina, $1
Dala Kuike ka Rula.
Feberuari 23, 1878
OLELO HOOLAHA.
E halawai ana ka Aha Euanelio o
Hawaii Akau ma Waimea, Kohala
Hema, ma ka la 6 o Maraki. Ua hoololiia
ka hoolaha mua ana.
Ma ke kauoha.
Haawina Kula Sabati.
HELU 9, SABATI MAR, 3, 1878.
KUMUHANA:
Ko Ahaza ikaika ma ka hewa. Pauku Baibala,
II Oih. Lii 28; 19-27
19 No ka mea, hoohaahaa loa o Iehova i
ka lula no ka hewa o Ahaza, ke alii o ka
Iseraela; no ka mea, ua hookuu aku oia i
ka Iuda i lawehala loa ia Iehova.
20. A hele mai loa io na la o Tilegata-pilenesera,
ke alii o Asuria, a hoopilikia ia ia,
aole hoi i kokua ia ia.
21. No ka mea, ua mahelo o Ahaza i na
mea iloko o ka hale o Iehova, a me ka hale
o ke alii, a o na alii iho, a haawi aku na
ke alii o Asuria; aole nae ia i kokua mai
ia ia.
22 A i kona wa popilikia, hoonui ia i
kona lawehala ana ia Iehova. Oia no ua
alii la, o Ahaza.
23 Ua mohai ia i na akua o Damaseko,
na mea i pepehi mai ia ia; a olelo iho la ia,
No ka mea, o na akua o na'lii o Suria, ua
kokua ia mau mea ia lakou, no ia mea, e
mohai aku wau ia lakou, i kokua mai lakou
ia'u. Aka, ua lilo lakou i mea e make ai
ia, a me ka Iseraela a pau.
24. A houluulu o Ahaza i na kiaha o ka
hale o ke Akua, a okioki oia ia mau kiaha
o ka hale o ke Akua, a pani ia i na puka o
ka hale o Iehova, a hana iho la nona i mau
kuahu ma na huina a pau o Ierusalema.
25 A ma kela kulanakauhale, keia kulanakauhale
o Iuda, hana iho la ia i na wahi
kiekie e kuni i ka mea ala i na akua e, a
hoonaukiuki iho la oia ia Iehova i ke Akua
a kona poe kupuna.
26 A o ke koena o kana mau hana, a o
kona aoao a pau, ka mua a me ka hope, aia
hoi, ua kakauia iloko o ka buke no na'lii o
ka Iuda a me ka Iseraela.
27 A hiamoe iho la o Ahaza me kona
poe kupuna, a ua kanu lakou ia ia iloko o
ke kulanakauhale ma Ierusalema; aka, aole
lakou i waiho ia ia ma na wahi e kanu ai o
na'lii o Iseraela; a noho alii iho la o Hezekia
kana keiki mahope ona.
Pauku Gula. p 22 hoopaanaau.
Topika. Ka hoomau ana i ka hewa.
Na Mahele. I Ka hoolohe ole ana i ka
hahauia, p 19-21.
2 ka hoonui ana i ka hewa. p 22-25.
3 Ka hope hanohano ole o ka hewa. p 26
-27.
Mele. -8-7-Leo Beatley.
1
Hewa no a mau ke hewa,
Hilihila ole no;
Aa Ahaza, oolea no,
Kue ia Iehova mau.
2
Pela na'lii o Hawaii,
Me na kanaka pu no,
Na keiki, man na ui,
Hana hewa, hewa mau.
3
Mihi ea, o wela mai la
Ko Iehova inaina e,
A o mai la kona lima
E hahau a luku mai.
Pule no ka poe ikaika me ka hewa, e mihi,
a huli a ikaika ma ka pono.
Na ninau a na kumu
Make no Uzia ke'lii lepera, a kanu kaawaleia,
a lilo ke aupunu ia Iotama kana keiki.
Alii oia he 16 makahiki. He alii maikai
no oia. Aole akaka, ua pili kekahi hewa
ia ia. Eia nae, ua nawaliwali oia i ke
kinai ana i ka hewa o kona poe kanaka.
Hoomana kii no lakou ma na wahi kiekie.
Ikaika nae oia i ka hooponopono ana i kona
aupuni, i ka hana ana i na mea e pale aku
ai i na enemi, a e malu ai kona aupuni.
Ua kaua aku oia i ka Amona, no ko lakou
hoole ana i ka auhau hookupu a kona
makua i kau aku ai maluna o lakou. Make
oia me ke aloha nui ia, a mahaloia, a kanu
hanohano ia no. A lilo ke aupuni ia
Ahaza kana keiki. II Oih. Lii 27.
Ma ka mak. 20 ona, lilo oia i alii. Ua
hewa wale no ko Ahaza alii ana. Ua like
oia me Ahaba ke'lii o ka Iseraela.
Hai mai i na hewa o Ahaza. 1 Hana
oia i na kii no Baala. 2 Kuni i ka mea
ala ma ke awawa o ke keiki a Hinoma no
ke kii keleawe o Moloka. 3 Phi oia i kana
keiki i ke ahi, mohai aku ia ia no Moloka.
4. Mohai oia a kuni i ka mea ala ma
na wahi kiekie. II Oih. Lii 28; 1-4.
Ko ke Akua hoopai ana ia Ahaza no keia
mau hewa, heaha? Ua hoala mai ke Akua
i na enaemi, i ko Suria, i ko ka Iseraela, e
kaua ia Ahaza ma. Ua kaua mai ka Iseraela,
e kaua ia Ahaza ma. Ua lawe pio
ia kekahi poe i Dameseko. Ua kaua mai
ka Iseraela, a lawepio i 200,000 kanaka o
Iuda i Samaria. Ma ke aoia nae e ke kaula
Odeda ua hoihoi ia mai na pio me ka hana
maikai ia mahope iho, ala kue mai ka
Edoma me ka Pilisetia, a pepehi, a lawepio
i kekahi poe o ka Iuda. Nolaila, kii aku
Ahaza i ko Suria e hele mai e kokua ia ia
p 5-18.
p 19-21. Ka hoolohe ole ana i ka hahauia.
Hahau mai ke Akua ia Ahaza ma ke aha?
Mai owai la? ma na kaua hea? I mea aha?
I mea hoohaahaa a mihi lakou. Ua mihi
anei? A hookuu ke Akua ia lakou e aha?
No ke aha? E like me kana hookuu ana
ia Parao e aha? i hoike oia i kona ano hewa
apau a hoopaiia mahope.
Owai kai kii ia e Ahaza e helo mai e kokua?
Owai ia alii? Ua hele mai oia, ua aha nae?
Aole ka i kokua! Ua kokua no ke lii o Asuria
ia Ahaza ma ke kaua ana i ko Suria, a
a lewepio ia Dameseko, a lawepio i n kanaka
a pepehi ia Resina ke lii o Suria. Aka,
ua lilo keia kokua ana i mea hoopilikia ia
Ahaza. ma ka hookupu makahiki nona, ma
ka wawahi ana i na mea dala, na mea gula
o ka luakini, a o kona hale iho, a haawi aku
na ke lii o Asuria, a ma ke alakai ana ia ia
i ka hoomana kii.
P22-25 Ka hoonui ana i ka hewa. Iloko
o keia mau pilikia, pehea Ahaza? Hoonui i
ke aha? Mohai aku i na Akua hea? I aha
lakou! Kupanaha! hiki anei i na akua kii
ke kokua mai? Halelu 115,4-9.
Ua lilo ia mau akua i mea aha? Nana hoi
Ier. 44;17-18. Heaha kekahi mau hewa o
Ahaza? 1 Okioki hana ino i na kiaha o
ka luakini. 2 Pani i na puka o ka luakini i
ole e komo na kahuna e mohai na Iehova. 3
Hana i mau kuahu hoomanakii ma na kihi
apau o Ierusalema. 4 Hana i mau wahi kiekie
no ka hoomanakii ma na kulanakauhale
apau. A pehea oia ia Iehova ma ia mau hewa?
P 26-27 Ka hope hanohano ole o ka hewa.
Mahea i kokua ia'i ke koena hana a Ahaza?
Ehia makahiki i alii ai oia? Make oia, a
heaha ke mea hanohano i hooleia no kona
kanuia'na? Kanu kaawale ia e like me ke lii
lepera. No ka nui of ka hewa ea. A pehea
na lii hewa o Hawaii ke make a kunu ia
lakou? Heaha ka olelo ao ma Sol. 1;27-29?
Mele. S. Leo.
1
He lii maikai Iotama e,
Ua aloha nui ia mai.
Hewa no nae Ahaza e
Ke keiki a ke lii maikai.
2
He mau makua a maikai
Ka oukou nei, na kamalii,
Pehea oukou? maikai anei?
A hana me ka pololei?
3
Me keia 'lii Ahaza anei
Oukou e noho hewa e?
Makou, haalele, huli mai,
A noho olu a maikai.
Na ninau a ke Kahu.
Na makua. Owai le lii lepera? Owai
kana keiki maikai? Ikaika ia alii? ke eha?
Na waliwali nae ma ke aha? Pela anei
kekahi poe kahu, a kumu, a luna, nawaliwali
i ke kinai ana i ka hewa?
Ehia mak. i alii ai Iotama? Heaha hoi
ke ano maikai o kona make ana a kanu
ia'na? Owai kekahi poe alii i kanu hanohano
ia? Owai ka i kanu ia e na anela?
Make Iotama, lilo ke aupuni ia wai? Alii
Ahaza i ehia mak ? He alii aha oia ? Maikai
ka makua Iotama, hewa nae ke keiki!
Pela anei i keia manawa ?
Na keiki. Mai mai i mau hewa eha o
Ahaza. Owai ka inoa o ke Akua kii nana
i puhi ai Ahaza i kana keiki i ke ahi? Hewa
loa e! haawi ia ke keiki ola e puhi ia i
ke ahi i mohai hooluolu ia Akua! Pehea
ka hana? He mau lima a umauma keleawe,
hakahaka o loko. He ipuhao ahi malalo.
Hoowela ia a enaena. Hoolei i ke
keiki ola ma na lima a umauma wela a umi
ia a make i ka wela enaena Aloha ino!
Pehea na makua kahiko o Hawaii nei? Pehea
hoi na makua hoomana kii ma Hinedu
i keia wa? A ma Kina hoi? Hoolei aku
iloko o na muliwai i mau mohai na na
Kerokodilo, na ia ale wale i ua keiki. No ke
aha ka hana ino ole o na makua Hawaii i
na keiki i keia wa? Pehea la e hiki aku ai
ka Baibala i na aina naaupo?
Ke kula a pau Hai mai i ka pauku gula.
Hai mai i na hewa i koe o Ahaza. Heaha
kana i ike ai ma Dameseko a mahalo, a
kauoha e hana ia i mea like me Ierusalema
no ka hoomana kii ana? 2 Na lii 16;10-13
Heaha hoi kana i hana ino ai i ke kuahu
keleawe nui a Solomona is hana'i? p 14-15.
Heaha kana hana ino ana i na ipu gula o
ka luakini? A aha i na puka o ka luakini?
Heaha kekahi mea maikai ana i hana'i e
pili ana i ka hoike manawa? Isaia 38; 8.
Heaha ka hoailona a Isaia i haawi ai ia
Ahaza? Isa 7;14.
No ke aha ko Ahaza hoihoi ana i na pio
ana i lawe ai no ka Iseraela?
Na manao pili. 1 Like ole na keiki me na
makua.
2. Pili na hewa o na kupuna i na mamo.
3. Hoomanao i kou hewa ponoi, aole i
kohai.
4. Hewa na lii, hewa pu na kanaka, na
kahuna.
5. Mai hana ino i ke dala laa; mai hoohaumia
i ka luakini; mai pani i na puka o
ka luakini. &c.
Mele 7-6 Leo.
1
Ua hana ino ia,
Ka luakini e,
Na ipuka dala gula,
Na mea makamae;
Ua paniia na puka,
Hoopauia na mohai.
Ke lii Ahaza keia,
Lalau, hoomanakii.
2
Puhi i kana keiki,
I mohai na ke kii,
Ua hewa lua ole,
A hoopai ia mai,
Mai ae e hoohalike,
E hana pono e;
Hoomana ia Iehova,
Hoolea, hoomaikai.
Pule no na aina e, &c-
Haawina no Maraki 10, 2 Oih'Lii 29;
1-11
Palapala a W. N. Lono
Maiana. Kilibati,
Sept. 13. 1877.
Rev H. Bingham -
Aloha oe a me ko ka hale ou. Nau e
puunaue like aku i keia haawina i na haipule
a pau loa ma ko Hawaii Pae Aina a
koe ole aku kekahi.
Ua hiki mai ne ka "Hoku Ao" ma Maiana
nei i keia la 13 o September nei, a e
holo ana no i kakahiaka, nolaila, ke kakau
wikiwiki ne au i keia wahi leta ia oe me ka
pupuahola, aole no paha e pau pono ana na
mea apau i ke kakau ia.
Ua manao iho nei la he halawai ko ka
misiona Kilibati i keia makahiki, nolaila, ua
kali iki ke kaka ana a loaa mai na leta
mai a oukou mai, alaila la, pane pono aku,
ua poho nae ia manaolana, ke kakau nei au
i keia leta ia oe, maanei pu hoi ka'u hoike
no keia Kihapai oiai aia hoi oe ma ka noho
o ke kakau leta no ka papa Hawaii.
Ua halawai pu iho nei makou me ke kapena
o Hoku Ao a me Dr. Pease a me na
hoa o'u S. P. Kaaia, a me S. P. K. Nawaa
a me na wahine pu, a me na sela hoi, me ke
aloha nui, me ka hoomanao ana i ko ke
Akua lokomaikai nui.
Hoike Kihapai o Maiana.
O kiea hoike, mai ka malama ia o Augate
A. D 1876, a Hoku Ao i haalele ai ia
Maiana nei a hiki i keia la.
Ka Hana a ka Haku.
Ua nee maikai no ka hana ma keia Kihapai
i kahi manawa, aka, no na mea keakea,
ua ku malie i kekahi manawa. Mahope
iho o ko Hoku Ao haalele ana ia makou i
kela Augate 1876. Ua nee iki ka hana i
mua, aka, ma ka malama o Novemaba 1876
ua ku malie aole nee i mua, aole hoi emi i
hope, a ma ka malama o March 1876. Ua
nee hou ka hana i mua, a ke mau nei a hiki
i keia la, aole nae me ka lanakila wale no,
aka, me na mea keakea no he nui wale o ka
po.
Ka Ekaesia.
Ua hookumu ia he Ekalesia ma keia Kihapai
o kakou. He 11 wale no mau hoahanau
e kupaa nei, aia ma ka Papa Hoike
helu oukou e ike ai.
Poe imi (tau ukeuke.)
He 22 ka huina pau o ka poe imi i keia
manawa, ke kali nei no me ke akahele i ka
hookomo ana.
Kula la.
Aole a makou kula la iloko o keia mau
malama mai Julai mai oiai, paa ka aina iloko
o ke kaua (buaka.)
Ua helu ia nae i ka malama o Mei 47 na
haumana hele mau i ke kula.
Kuai Buke.
Ua kuai ia no ke kau mau wahi buke ua
pau loa na buke Kauoha Hou a me
na himeni i ke kuai ia, aole nae i lawa pono
na wahi haumana. Ua makemake makou
e hooili mai oukou i mau buke Kauoha Hou
a me na himeni, aia ma ka'u hoike kuai
buke oukou e ike ai i na mea e pili ana ilaila.
Mahina Hou.
Ua loaa no he mau wahi eke lauhala ia
makou no keia haawina, aole hoi emi ino
loa elike me ko na makahiki mua i hala ae
nei, aia no ma ka Papa Hoike helu oukou e
ike ai i na mea e pili ana i keia.
Na Luakini.
Ekolu no mau wahi luakini ma keia Kihapai,
o Ierusalema ka inoa o ka mua, o
Mauna Oliweta ka lua, a o Mauna Tinai ke
kolu, ma keia mau wahi makou e kaapuni
mai nei i na Sabati a pau, a me na la halawai
e ae, me ka piha o ka naau i ka olioli
me he mea la o ko ke Akua Uhane pu me
makou.
Ola Kino.
Ke ola maikai nei makou i keia mau la,
aole o makou mea nawaliwali, Na ke Akua
no e malama ahonui mai nei, nui kona
lokomaikai, Iloko o keia mau la pilikia, aole oia
i haalele ia makou.
He Kaua.
Ua hai aku wai ia oukou ma ka'u mau
leta o ka makahiki i hala. He kaua ko keia
aina me ko Abemama, aole nae i ko ia
makemake o lakou, ma ka malama o
Nov. 20 A. D. 1876 ua'la ae he kaua kuloko
ma keia aina iho no. Ua paa ka aina holookoa
iloko o ke kaua mai ia manawa mai, a
hiki i Feb. 7, 1877, akahi no a hui kuikahi.
Ma keia au kaua, e noho ana makou mawaenakonu
o na kahua hoomoana o ke kaua, he
hapalua mile wale no ke kaawale mai ko
makou home aku, a hiki i ka waha o na pu
kuniahi o kela aoao, a me ko keia aoao e
hamama mai ana. He mea mau no hoi ka
lele ana'e o na poka e kani hokiokio ae ana
mauka, a maluna, a makai ae o makou i ka
po a me ke ao, aole nae i ku ae a holo, aka,
hoomau aku la no i ke noi ia lakou e hoopau
i ke kaua, a ua pau ke kaua ma Feb. 7 1877
eia ka hope i loaa ma ia kaua ana.
He Wi.
Nui ka wi ma ia malama mai. Ua make
wale iho ka poe palupalu, a ua nui na auwaa
i make i ka moana, me ka manao e
holo i Tarawa, a i Abaian, a i Marakei e
noi ai ai na lakou, aole nae i pae i ka aina,
o makou pu no hoi kekahi i komo iloko o
pilikia nui, oiai, aole na ai mau o keia pae
aina iloko o ia mau la, a makou e hoomaa
mau nei i ka ai ana i hala ae hoi kahi ai
ana i kahi hua raiki, a me kahi miki-poi.
Iloko hoi o ia au pilikia, ai pu no makou
me na pegana i ka ai a na puaa ma keia
pae aina. oia no hoi ka ai a na peelua ma
ko kakou Pae Aina Hawaii oia hoi ke
akulkuli (te miea.)
Kaua hou no.
Eha malama mahope mai o kela kaua i
kamailio iaela oia ma July 19 ua hoomaka
hou no ke kaua, a eia no ke hoomoana nei
lakou ma na kahua kaua i keia hora a'u e
kakau nei i keia leta. Ua lanakila nae
kekahi aoao, ioa hoi ko Aberehama Beru
aoao. E hai iki aku au i ke ano o keia kanaka
A. Beru. Oia no kahi mea nui, kahi i
hoonoho ia ai o ka misionari ma keia mokupuni.
He kanaka haahaa, he manao maikai,
he aloha i ka lehulehu, he tia raoi. Ua huli
mua oia i ka pono o Kristo mamua o ko W.
N. Lono pai mua ana ia nei, he krissiano
oiaio, a he hua hoi no ka Ekalesia ma
Maiana ne.
Ua lele mai la kona Enemi e kaua ia ia
aka, ua loaa i keia A. Beru ka lanakila nui
mao Iehova la. He hoomana pegana ma kela
aoao kaua, aka, o A. Beru, me kona poe e
hoomana mai ana lakou ia Iehova ma ko
lakou mau kahua kaua. Ke lohe nei no au
ma ka waha o na pegana, "aia a pau ae keia
kaua, alaila, pau aku kakou i ka huli ma
ka olelo a ke Akua."
Ke kokoke mai nei ke Aupuni o ka Haku
e ikaika, e koa, a e hoomanawanui na paahana
o Kristo, me ke kanalua ole.
Wi hou no.
O ka hua ia o keia kaua e noho nei i keia
mau la, ma ko'u hoomaopo ana he oi aku
keia wi i ko kela kau wi i hala, pilikia loa
iho nei makou i ka pololi i keia mau la,
kala kahiko i pau ai ka makou wahi mana i
ka malama no o Mei, aka, he wahi kenikeni
no nae hoi ko kahi hipuu, aolo nae e hiki ke
mama iho i kona oolea, nolaila haawi i na
kanaka, i na he wahi ai ka lakou, aole nae
makemake o kanaka, oia no ka lakoula he
baka, nolaila, haawi akula hoi i na haole
kalepa, oia nele ano no, aia no hoi ko lakou
wahi ola i ka baka. Pilikia loa ihola makou,
me ka hoomanawanui wale ana, kau wale
aku la na maka o ka hoea mai o ka Hokuao,
ua hala kahiko nae kona manawa e hiki mai
ai i anei.
Ona rama wai niu.
Ke mau nei no ka ona ma keia kihapai,
kupaa no nae na haumana. Ua ike pono iho
nei o S. P. Kaaia ma i kekahi kanaka ona
maloko o ko makou hale me ka manao e lele
aku e pepehi i ka poe kela o Hokuao, aka,
ua lele maila kekahi haumana a makou e
koku mamuli o na sela.
Ke ike mai nei oukou, ke ulu nei no ka
pono me ka hewa, ke koe nei no na mole ino
a hooulu ana i ka hewa. Nolaila, e na hoa
haipule. Ke kauoha mua aku nei au imua
ka pule ana a me ka hoomana ana, a me ka
nonoi ana, a me ka hoomaikai ana no na
kanaka a pau loa, no na alii hoi, a me na luna
i malu ko lakou ola ana me ka noho malie,
a me ka pono no hoi, ka Paul I Timoteo
2:1-2.
Ke hooki nei au i keia kakau ana me ke
noi aku. E hoomanao mau ia makou ma ka
oukou pule.
E Aloha ia mai kakou e ka Haku. Amene.
Owau no o W. N. Lono.
Palapala a G. Leleo.
Apaiang, Sept. 18, 1877.
Hoike o na hana a ka Haku ma ke kihapai
hana ka mokupuni o Apaiang: Aole
paha makahiki e ae e hauoli ai ka manao
no na mea e pili ana i ka hana a ka Haku
e like me na hana o keia makahiki. Ua
nui ka poe i huli mai ma ka pono me ka
makemake e imi i ke ola ma o Iesu la.
Hele mau mai la na kanaka manaoio i na
halawai Poakolu a me na Sabati e hoopiha
mau ana i ka luakina o Iehova me ka makemake
e lohe mau i ka olelo no ke ola mau.
He nui ka poe i mihi i ko lakou hewa, a
haalele i na hana ino.
O ka nui o ka poe i hookomo ia mai ka
hoomaka ana o keia ekalesia a hiki i Iulai
nei 158; he 108 ka nui o na hoahanau mai
ka hookumu ana o ka ekalesia, a hiki i ka
pau ana o ka makahiki 1876. A mai Ianuari
o keia makahiki a hiki iho nei Iulai he
50 ka nui o ka poe i hookomo ia iloko o ka
ekalesia, a he nui wale ka poe i kali ia no
ka manawa kupono. Ua malu loa ka aina
i keia makahiki, aole haunaele iki. O kekahi
poe nae ua manao no e hoonaunaele i
ka maluhia, aole nae hiki, no ka mea ua
mau ke ana o ka pono. I ka noonoo ana
i na hana e mau ai ka ulu ana o ka oiaio a
me ka maluhia, aole no hiki pono; aka ua
paipai wau i ke alii e hooikaika e imi i na
mea e malu ai o ka noho ana o na kanaka.
I ka malama o Mar. 20, ua hana ia na
kanawai o ka aina a ua kakau ia ma ka pepa
e like me na mea i hooholoia e ka alii
a me na kanaka a pau i akoakoa mai. Ke
kukuluia nei ka aha hookolokolo i kela a me
keia Poalua, ina e loaa ka hihia iwaena o na
kanaka. I ka hookolokolo ana ua noho mai
no ke alii a me kekahi mau elemakule, e like
ka nui me ka manao o ke alii; a ua kahea
mai ia o Mr. Randoli kela haole kuai
aila e ke alii e kokua i ka hookolokolo ana,
a o wai kekahi i kahea ia, e noonoo i kekahi
mau hihia. Ua kapu loa ka lawe ana o kekahi
kanaka i ke kaikaina o kana wahine i
wahine nana e like me ka wa mamua ke
makemake ole ke kaikaina o ka wahine. O
ka make ka hoopai o ka mea pepehi kanaka.
Ua hoopaiia ke kanaka ke lawe pu i na mea
kaua i ka wa e hele ai ma ke alanui. O ka
poe i mare ia aole hiki e mare hou me kekahi
mea e ke ole e loaa ka hewa moekolohe,
aole hoi e hiki i kekahi e hoohaumia aku
i ua wahine nei i haalele ia me he wahine
kane ole'ia; o ka mea hana pela e hoopaiia
no oia. O ka mea ona i ka rama e hoopaiia.
Ua ao ia kekahi poe i koa i poe malama
i na kanawai a kokua pu i ka malu o
ke'lii. I ka la 14 o Apr. ua hoohikiia ua
poe nei maluna iho o ke kahua mau o ka
oiaio oia ka Baibala e malama lakou i ke
alii a me ka maluhia o na kanawai, a me ka
pono o na mea a pau; Ua kukulu ia hoi he
hale no na koa. O ka hale pule ua hooponopono
hou ia, a ohi hou ia i ke pili hou a
ua hoomaemae hou ia o loko a me na aoao
a me waho o ke kahua. He nui ka poe makemake
i ke kula, aka aole mau ko maua
kula no ka nawaliwali o ka ohana, no ka
mea eia @ ko ke Akua lima maluna o maua.
Kula no nae i kahi wa; a kula ole i kahi wa.
Ua mau ke kula ana o na kumu kamaaina
aka aole hele mau mai na keiki liilii i
kahi wa, nolaila, aole kula i kahi wa. Aole
au kaapuni nui i ka aina i keia wa no ka
mea ua malama mau maua i na hana ma
kahi a maua e hana nei.
Elua o maua holo ana i Tarawa i keia
makahiki e malama i ka ahaaina a ka Haku
i ka malama o Ianuari a me Aperila, a no
ka nui loa o ka ino i ka malama o Iulai aole
maua i holo hou i Tarawa. Ina o ke Akua
pu me makou ma keia hana alaila e wehe
ia auanei ka puka no ka malamalama ma
Apaian nei; a e lilo ka hana a na kumu
nana i kukulu mua i ke kahua o ka pono i
mau ai ko lakou inoa ia hanauna aia hanauna
aku; e like me ka mau o ka hoomanao
ana o ko Hawaii no Binamu makua, pela no
auanei ko Kilibati no Rev. H. Binamu ka
lakou kumu aloha. Ua kanu mua ia ke koko
o ko kakou hoa'loha J. H. Mahoe maluna
o keia kahua hana o kakou a e lilo ana
ia i mea e hooulu ai i na hana pono. ua
hookomo ia iho nei ke alii o Apaiang nei
iloko o ka ekalesia, a ke hoomau nei ma ka
pono oia a me kana wahine. Ua pau,
Owau no. G. Leleo
Olelo Hoalohaloha.
Ua noi ia mai makou e Rev. H. Binamu,
e hoolaha aku i na olelo hoalohaloha malalo
nei e pili ana ia Rev Ioane F. Pogue,
mamuli o ke kauoha o ka Papa hawaii, ma ka
la 12 o keia malama.
A no ka mea, o ko kakou kaikuaana o
Rev. Ioane F. Pogue, he hoa lawe hana i
lawelawe loihi me makou ma ka oihana
Euanelio a ko kakou Haku Iesu Kristo, a mamua
aku nei, ua lawe ia aku la oia e na lima
o ka make, oiai oia ma ke kulanakauhale o
Laramie, i kona huli hou ana mai i Hawaii nei;
Nolaila, o kona mau hoa o loko o ka Papa
Hoa Euanelio Hawaii, kahi ana i lawelawe
ai no kekahi mau makahiki ma ke ano he
kakauolelo no ka Papa, ke makemake nei e
hoopaa ia maloko o ka moolelo o ka makou
mau hana, i mea na makou e hoomanao ai i
kona ano a me na hana.
Ua komo ko makou kaikuana i kono oihana
misionari ma keia Pae Aina m ka A.
D. 1844, a he 33 na makahiki o kona lawelawe
ana i ka oihana me ka pono a me ke
kupaa. He 14 na makahiki o kona noho kumuao
ana a Peresidena hoi no ke kula nui o
Lahainaluna, a he 7 hoi makahiki o ka noho
kakauolelo ana no keia Papa.
Ua waiho iho oia maluna o kona mau
haumana i kona hoailona pai, ma kona ano
he kumu ike piha a ikaika hoi ma ke ao ana
i ka noeau a me ke ano haipule oiaio.
A e hoomanao loihi ia oia ma na Ekalesia
o ka aina, ma ka ikaika i ka hoohuli ma kana
haiolelo ana. Ka hala ole o kona lawelawe
ana i kana oihana laa, ke aloha a me ke
kupaa o kona manao i ke Akua a me ka
ikaika o kona iini e hoola i na uhane, a e
holo mua hoi na Ekalesia o Kristo iloko o
ka hemolele ua akaka keia i ka lehulehu,
ma kona maemae, ka oiaio a me ke aloha
hoalauna.
Ke hoomanao aloha nei makou i na hana
mikioi a ko makou kaikuaana no ka Papa
Hawaii a me na misiona i malama ia e keia
Papa elike me kona manaoio hana no ka
ulu ana o na Ekalesia Hawaii. Pau ka lawelawe
ana i keia mau hana, a ua waiho mai
nie oia i ke kaumaha kulipolipo. A ke kulou
hoomaikai ne makou i ka makemake o ka
Haku ka mea nana i kahea mai iaia e hoi i
ka home Lani.
A ke hoike aku nei makou i ko makou
aloha oiaio i ko makou kaikuahine e kanemake,
ka mea i lawelawe pu no ka wa loihi i
kana hana, a ke noi nei i ka Haku e haawi
mai i ka oluolu nui a me ke aloha a pela hoi
i na keiki iwaena o makou, he poe keiki
i hoomaikai nui ia ma ka moolelo maikai o
ka oihana laahia a ko lakou makuakane.
Ke ikeia aku nei na kiu o na puali kaua
Rukini, mawaho o Aderianopole, a ke
manaoia aku nei, aohe o lakou wa hiki ole ke
komo mai iloko o ke kulanakauhale. Ke
pau nui la na koa Tureke o na pakaua i ka
emi hope a pilipu aku i Konatinopela, me ka
lawe pu ana i ko laakou mau lako a pau. Ke
a ia la ke kulanakauhale o Seragelio kahiko
e ke ahi, a ke auhee nui la hoi na Mugulemana.
Na ka Bihopa Helene a me ke Kumu
Iudaio e malama la i ka maluhia.
Penei ka hoike ana mai a ka Nupepa Manawa
Kuikawa o Guiregero: He mea manaonao
na poino a ka make mawaena o na koa
Tureke pio ma Feratesiti. O ka poe e kaahele
ana mawaena o Bukareseta, a me ke
Danube, he mea makau-@ no lakou ke ike
aku i na hiona o na wahi noho ma Feratesiti..
Ina no aohe ino i oi ae mamua o kahi
mai nalulu i maa mau, aka, o ka nui o ka poino
o na ola he lehulehu wale a puni na wahi
hoomoana o na koa Tureke pio, oi ka mea
nana e hooia mai i ka weli o na poe kaahele.
Ike aku la wau i na koa Rukina e eli ana i
na lua nunui, a aia hoi he 50 mau kino make
o na Tureke e ahu mokaki koke mai ana
me ka huikau, i ka wa no i luia ai mai na
kaa mai.
RICHARD F. BICKERTON,
[PEKETONA.]
LOIO a he KOKUA ma ke KANAWAI !
E HELE ANA OIA IMUA O NA AHA HOOKOLOKOLO
a pau o keia Aupuni ma na ano hihia a pau, ina paha ma
Oahu nei, a ma na Mokupuni e ae.
Ua makaukau mau oia i ka hana ana i na Palapala pili
kanawai o kela a me keia ano.
Ua hiki no hoi iaia ke hoaie dala aku ma ka moraki ana ina
aina, ma ka ukupanee haahaa loa.
E hanaia na hana me ka hikiwawe a ma ka uku haahaa.
Keena hana, Helu 23 Alanui Kalepa, elua puka ma o aku o
ka hale kauka o Kauka Minutecle. 340 1y
LOLE MAKEPONO
Ke Kuike.
E LOAA NO IA MA KAHI O
KAKELA ME KUKE!
E LAA NA
Ahinahina, Kalakoa,
Keokeo, Leponalo,
Pena, Aila, Aniani,
NA MEA PIULA!
KOPA, AILA HONUA,
AILA HOOMALOO
Kui Kakia, Pakeke,
Tabu, Kaula, Noho Lio,
Hulu Palaki, na Puluma.
A HE
AGENA NO HOI NO NA MOKUPUNI O
HAWAIII NEI NO KA
Lainakini-nao,
Lainakini Maoli,
Palule Kalakoa,
Alapia, Kelepa, Kilika,
Na lole kupon i ka wawae,
Palule Huluhulu,
Na Lole Huluhulu,
Na Lole no ka hoohehelo ana
Lipini, Lihilihi, &c.
LIPINE, LIHILIHI, &c.
A ME NA
Mikini Humuhumu MakeponoLoa!
A HE
MAU MEA AI KAHI
Ka Palaoa, Kopaa
Raiki, Pia, Hoohu,
Paakai, Huaala,
Pia Kulina. &c.
A he Laau Lapaau Kaulana Loa
a DR. JAYNES,
Laau Kunu,
Laau Hoomaemae Koko
Laau Hoopau Naio,
Penikila, Huaale,
A ME NA LAAU HAMO, A PELA'KU !
S273 m 839
PAPA! PAPA!
NO
ALLEN & ROBINSON
UA WEHE AE NEI MAUA I
PA KUAI PAPA
MA
KA UWAPO O PAKAKA !
Na Papa Ulaula o na ano a pau.
Na Papa Paina o na ano a pau.
Na Pili Hale Ulaula.
Na Pili Hale Keokeo.
Na Pepa Hoonani Hale,
Na Pepa Molina.
Na Pena a me na Aila Pena !
NA KUI O NA ANO A PAU.
NA PANI PUKA a me
NA PANI PUKA ANIANI.
NA PANI PUKA a me
NA OLEPLEPE
NA LAKO KUKULU HALE
O NA ANO A PAU !
E KUAHA MA KE
KE KUMUKUAI HAAHAA LOA
O keia Makeke.
ALLEN & ROBINSON.
Honolulu, Ian 1, 1878 840 3m
E KA POE MAI
E KA POE PILIKIA !
E NANA MAI OUKOU I KEIA. UA LOAA HOU Ma
Ka Laau Lapaau Kaulana !
No ka hoomaikai ana i ke koko
a me na mai a pau.
E hele a ike, aia ma kahi o
A. L. KAMIKA, Opio.
Helu 44, Alanui Papu 840 3m