Ka Nupepa Kuokoa, Volume XVII, Number 8, 23 February 1878 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

The River of Life.

The Prize, p 128

 

1

Muliwai nani,

Wai o ka lani,

Kahe a mau ma Edena ma o;

Owe a kani

Mele hoonani

Mele a mau ia mele no Iesu.

 

Cho.    Kahe mau ana,

Owe hosana,

Ma na papu o Edena ma o,

Me ke aloha

I kuu mau hoa,

A oli lani lakou la a mau.

 

2

Muliwai nani,

Wai o ka lani,

Kahea mau a hoolohe ko o

I kou nu lani,

Muliwai nani,

Nu hou maikai no ka uwao o Iesu.

 

Cho.    Kahe mau ana, &e.

 

3

Muliwai nani,

Wai o ka lani,

Aia a hiki makou la i o,

Hui me oe,

Nani ka oli!

Nau e hookuu i koonei mau luuluu.

 

Cho.    Kahe mau ana,

Owe hosana, &e.

 

4

Muliwai nani,

Wai o ka lani,

Aia a ku ma Edena ma o,

Nau e hookani

Kou mele nani,

A ku makou la a mele pu mau

 

Cho,    Kahe mau ana,

Owe hosana, &e.

 

HAWAII.

 

KA

NANEA EEHIA

O KA HIWAHIWA OPIO

ABEONA

KE KEIKI

ALII O KO KE AUPUNI TEROGINA,

KA MEA I

HANAUIA ME KA UMAUMA AHI

LAPALAPA O KA WIWO OLE,

KA WALI WAIPAHE

Nana i kaili ka Puuwai Kupaa o ke

KAMA ALIIWAHINE

MARIADANE

KA

OPUU PUNAHELE LEA OLE A KA

MOI MINOSA, O KE

AUPUNI KUPUA O KARETE.

 

MOKUNA II--HELU 8.

 

E KA mea heluhelu, ano ua ike iho la kakou i ka lanakila ana o Abeona maluna o ke kupua, a me ka puni ana o ke koa kiai mamuli o na hana maalea a ke keiki koa wiwo ole, a ke noi ia aku nei ka oluolu o na makamaka e hoomaha iki i ka nanea ana nona, a e aui iki ae kakou a e hoohala manawa iki ma ka ukali ana mahope o ko Mariadane mau kapuai.

            Ua maopopo no ia kakou ka piha iini o ka puuwai o keia ui nohenohea no ke keiki alii, a no ia kumu, uamakau ole oia i ka haalele ana aku i kona rumi a kokua mai la i ka kakou hiwahiwa.  I kona haalele ana mai ia Abeona, a huli hoi aku la i kona keena, aia hoi ike aku la ia i ka malamalama piha o loko o ka halealii, e holoholo pioo ana na kanaka o loko, a e nui ana ka leo o kona makua me ke kalakala.  Akahi no a komo mai la na manao hope iloko ona, no ka mea,ua hoomaopopo koke iho la ia e ike ia ana kana mau hana, a e ahu wale ana ka noe, a e kau io aku ana ka pilikia maluna o Abeona.  Kuemi hope mai la ia ihope me kamanao e hoi hou a koi aku me ka paakiki ia Abeona e kau aku maluna o kona moku a huli hoi, aka, hoomanao koke ae la nae ia i ke kulana koa o ke keiki alii a me kana mau olelo kupaa, a komo ae la ka manaolana iloko ona i ka upu ana ae penei:

            "Heaha no la ka hewa, oiai ua komo aku la au iloko o keia hana, nolaila, mamuli o keia koa opio, ka mea mua hoi nana i okomo mai i na kui houhou walania o ke aloha iloko o ko'u puuwai, ke ae nei au e hele aku imua a halawai mena hoopai a pau e kau ia mai ana no ka'u mea i hana ai, a oiai hoi he hana ku i ke aloha ka'u i hooko aku nei, ke aa nei no au e hopo ole i ka make.  Nolaila, e Abeona, aloha oe, ke hele nei au imua a i halawai io aku me ka make, alaila he make hanohhano ana ia o'u, oiai ua make mamuli ou, ka mea i kapaia ka opuu nani hookahi."

            Me keia manao, kai hou aku la k ona mau wawae imua me ke kuoo, a me ka pololei o kona kino. Pa nahe malie mai la ke kehau huihui o ka wehe kaiao a halawai mai la me kona oiwi kino nani palupalu, me he la e haawi mai ana i kona honi maeele ana no ke kupaa ana o kona mano mahope o ke ola o kanaka, a holo puni ae la ka hahana o na hoomanao no kana mea i lawe ai i ipo, a ikaika loa aku la kona mau kapuai wawae i ka hele ana.

            O ke kumu o ka pioo o loko o ka halealii, oia no ka puiwa ana o ka Moi a me na mea a pau i ka nakulu kohu hekili i ka make ana o ke kupua, a ua kuhihewaia he olai, a holo koke ia aku la e nana maloko o ko Mariadane keena a piha iho la na mea a pau i ke kahaha nui i ka ike ana aku e waiho wale mai ana kona wahi moe, aole hoi ke kaikamahine alii.  Noke ia aku la ika huli, e holo imi ana na elelema o a maanei o ke kulanakauhale aole nae i loaa, a ua ano pupule ka Moi no keia mea kaumaha a ano e i hoea mai.

            Oiai iloko o keia pioo nui i huli hoi aku ai ka mea a Abeona i kapa aku ai o ka onohi o ka mahina konane o ka aluna ahiahi.  O kona kapa moe po wale no kona aahu i ka ili a me ke koloka wai gula e kaei ana maluna o kona mau poohiwi. E pulelo ana kona mau owili lauoho nani a e kuku mai ana hoi na lihilihi ooi maloko mai o na papalina ula pua rose.

            Hele awiwiaku la ia a ike ia mai la e na kauwa e haiamu ana mamua o ke alo alii me ka pioo, a holo aku la lakou me ka hauoli a hai aku la i ka lono i ka Moi. Komo aku la keia a holo mai la kona makuakane me ka hauoli nui me ka makaukau e apo mai iaia a honi iho, aka, kau aku la nae ia i kona lima a pane 'ku la me ka hoohaahaa.

            "Alia, e ka Moi.  Ano he haumia wau imua ou, a aia a kala ia mai ko'u hewa, alaila e pili aku no ia i kou kio."

            Kahaha iho la ka manao o ka Moi a me na mea a pau no keia mau huaolelo a kuia aku la kona makua me he la he pua i pana ia aku a ku i kona puuwai.  Haalulu iho la na mea a pau a ano e ko lakou noonoo.

            "E hai mai e kuu lei," wahi a ka Moi, "a ina he mea hiki i kou makua nei ke hana, e hooko ia no me ka hala ole."

            Aka, ua maopopo no ia Mariadane ina e lohe aku ana kona makua i ke ano o kana hewa i hana ai, alaila e nalo aku ana kona mau manao aloha a pau a e noho alii iho ana ka inaina, nolaila, ua makaukau no oia e halawai aku me kona mau manao inaina a pau.

            "I keia po, a i keia manawa a kaua e kamailio nei, aia ke kino  o kau punahele a o ka'u mea hoi i makau mau ai, ke waiho la i ka ilihonua, ua pau kona hanu aua nele kona kino i na ike ana o keia ola.  O kau kupua e ke alii ka Moi, ua make, a i make oia mamuli o kau kauwa nei."

            "Heaha keia moeuhane kupanaha e kuu kaikamahine?" wahi a ka Moi me ka hooi loa ia o kona kahaha.

            "Owau no keia mai luna a lalo, o Mariadane me kona mau noonoo kanaka a pau, a o na mea i hoopuka ia aku nei mai keia mau lehelehe aku, he oiaio e like me ka oiaio ana o ka malamalama o ke ao a me ka pouli o ka po, a ia a kala ia mai kau kauwa nei, alaila e pili aku no au me oe a ole mamua ae."

            Ike mai la ka Moi i ka oiaioo keia mau olelo a hoomaka mai la ke kau ana mai o na kuekue nui a nnahuki ka auwae.  aka, aole loa i hopo o Mariadane, me he la, i kona honi mua ana ia Abeona,a pili aku la  kona mau lehelehe palupalu i ka ili papalina onaona o ka ui o ka aina e, ua komo koke mai la na manao koa iloko o kona mau aakoko.

            "He oiaio anei eia ke kipi iloko o ko'u punana ponoi?  He oiaio anei o oe e ka mea i kapa ia he hua no keia puhaka ka mea nana e hoao nei e lawe ae i ke ola o keia mau limu hina a aole hoi na hai aku?  e hele mai a kokoke e ke pio, a ehoakaka mai, no keaha keia hana, a pehea i hanaia ai;" wahi a ka Moi me ka inaina wela a hiki ai ke lawe koke i ke ola o Mariadane, aka, no ke kaikamahine wale ana no. Ua piha ua Moi nei me ka inaina a me ke kaumana pu, e naka ana kona kino a haalulu a puni me ke kulu ana iho o na omaka hou nunui o ka ikiiki i ka nui o ka wela o ka huhu.  ke ano nao aku la na noonoo ana he kaikamahine, a kau ma ka manao ana aku he enemi keia wahine ui opiopio e ku aku nei imua ona

            Hele aku la o mariadane a kokoke, a me he la o ka manawa ia a na mana lani i ae mai ai i na anela a pau e lu mai i na hiona nohenohea maluna o kekino o keia kaikamahine, a o ka owaka anapa o ke daimana, ua hapa ia oi ko Mariadane mau onohi, a o ka memele o na pua, ua lilo ia i mea ole i ka liula o na papalina o keia ui.  Maanei, haupu ae nei ka peni a ka mea kakau, e ano hoolana wale ana no e lilo i hoa kaunu, i ka pane ae:

            "E ke ola hoomaalili i keia puuwai wela ikiiki; ke kuahiwi kiekiena hoi o ka nani o keia ola ana; e awihi lihi iki mai hoi kou mino aka nohenohea; i ono aku ai keia mau lehelehe maloo i ka wai meli momona o kou onaona, a hoomaopopo iho na aakoni i ka mania eehia o kena pali kiekie."

            "Na ka pahikaua a Abeona, ke keiki alii mai ka maona mai i pepehi.  mamui o ka'u mau kokua ana," wahi a Mariadane me ke kuoo.

            O ka piha pono loa ana ia o ke kino o ka MOi me ka inaina, a kauoha ae la e lawe koke ia aku o Mariadane a hoopaa iloko o ka rumi pouli, a o ka barena paakiki a me ka wai kona ola.  Ua hooko kokeia kona kauoha, a lawe ia aku la o Mariadane me ka hooponopono ole ia iho a hoopaa ia aku la.

            Hoouna koke ia aku la na elele e hele e nana ina he oiaio ka mea a Mariadane i hai aku ai, a ika hiki ana aku o na elele, aia hoi, ua ike maka maku la lakou i ka waiho mai o ke kino make o ke kupua.  hoi aku la lakou a hooiaio aku la ia mea imua o ka Moi, me ka uwe ana ae o ua Moi nei.

            Heaha la kou manao e ka mea heluhelu no keia Moi, no ka mea, ke ike nei kakou ua oi aku kona aloha i keia kupua ino ai kanaka mamua o ka hua o kona puhaka. Eia wale no paha ka haina, he Moi keia i manao nui loa i kona hanohano ponoi, a me kona mana, ai kumu e mau ai kona wiwo nui ia, ua hauoli loa ia ka malama hoopunahele ana i keia kupua i pale kaua nona. Hoolanakila mau keia ino ai kanaka iaiamaluna o na lahui he lehulehu, a no ia kumu ua kau mai ka wiwo ma na wahi a pau no na.  No keia mea, ua aloha loa ka Moi iaia, a ua oi aku kona punahele maluna ae o na mea a pau.

            I ka paa ana aku o Mariadane i loko o ka rumi pouli, hoomaka koke iho la ia i ka pule ana no Abeona ma, a aole loa oia i noonoo iho nona ponoi, a aole hoi i makau.  O ka mea nui iloko o kona naau ia manawa, oia no ka pakele o Abeona ma mai ka poino ae.  Aole no hoi i ulu ae ka manao ino iloko ona no na hana aloha ole a kona makua, aka, ua kula no ia ia mau mea a pau,a ua makaukau hoi e mihi aku imua o kona makua me ka hoakaka aku i na kumu o kona kue ana i na kanawai o ka Moi.

            Aloha ino keia kaika mahine alii opio, ka nani hoi nana e hoolauwili nei a e hoinoino nei i ke aakoni o ka mea nona ka pulima e hoomanawanui nei ma keia moolelo.  Ina paha he mea hiki ke hoihoi hou ia mai ka manawa a i keia wa, a o keia kino kekahi e kokoke ana ma kahi o keia Moi ma ka piha o ka hoolale ana no ia o na ai a ka ui.  a e aihua ia kana kaikamahine a hoolanakila ia mai kana mau hana ino i pono ai.  O kela kino nani makamae ka ka mea e hana ino ia, a o ke kanawai o ke kupua ka mea e aloha ia.

            Aka, e kali nae kakou no Abeona, ke pukonakona o ka ikaika, a o ke koa hoi nana i hoonaueue ka poai o ka lawe luna a naka ka papahele o ka honua, a e haalele iki kakou ia Mariadane.  a i keia pule ae, e hoi hou kakou a halawai pu me ka hiwahiwa o ke KUOKOA, ka inoa kaulana hoi o Abeona ka puuwai ahilapalapa.

            (Aole i pau.)

 

Ka Emepera ma ke Kahua

Kaua.

 

            Ua hoike mai ka mea kakau o ka Nupepa Novoe Neremuga, i na mea malalo iho nei, e pili ana i ka Emepera, ma na wahi hoomoana o Gorene-Setudane penei: HE ala kakahiakanui mau ka Emeper, aohe hilinai nui o kona manao no kona wa e holuolu ai, a no ka nui o kona luhi, no ka mea wahi ana, ina aole e hiki ia ia ke hoomanawanui, aole loa e holopono iki ana kana mau hana.  Ina i ke kuluaumoe e hiki mai ai na lono telegaramame na hana e hoouna kokeia mai ana no imua ona, e eleu ana oia e lawelawe ia mau hana me hakalia ole.

            I ka manawa paina, e mahuahua ana kona kamailio ana, a he ohaoha loa hoi oia i na mea a pau, koe wale no kona manawa e pilikia ai i na hana. Ma na ai e hoounaia'i na ahaiolelo i SanaPeteroboro, aole i kaemai kona piha i ka hana.   Aole loa i loheia aku kekahi huaolelo kaniuhu mai kona waha ae, no ka wela o ka la, ka luhi a me ka oluolu maikai ole o ke ola ma ka kahuakahua.  Ua ike nuiia oia e makaala mau aku ana ma na Halemai, a ua hiki pono ole ke hoike ae i ka nui o kona mau hana aloha, a me kona ano hoohaahaa maoli no.

            Ma ka nana aku, aohe oia he Emepera, aka, me he wahi makaainana haahaa loa 'la. e kuoe ana iwaena o ka poe mai, ame ka poe i loohia i na palapu a ke kaua, a e imi ikaika ana i na mea a pau e hiki ai ke hoomahaia ka popilikia.  E ike mauia aku no na waimaka e haloiloi mau mai ana ma kona mau kiionohi, a ua hoomaha wale ae no oia i kona hanu, me na hiohiona e hoike ana i ke aloha walohia iloko ona no kona mau makaainana.  Me he mea 'la no hoi, aole i oi ae ka pipili paa o ke aloha mawaena o ka Emepera, a me kona lahui i ka manawa ma na home, mamua o ko keia wa ma ke kahuakaua.  Na keia kaua e hoohiwahiwa hou ae i na mea a pau, a e lilo auanei ka inoa o ka Moi Alekanedero II, me he kia  hoomanao la i kahakahaia ma ka puuwai o kona lahui.  I kekahi la hiki maila oia ma ke kahua o na halemai me na makana i hele aku ka paila a oia no hoi ka hoomanao ana i ka la sana Alekanedero. O keia mau mea, oia no na palule, na aa moni, na pahi, na buke, a o kekahi mau mea e ae, ua hiki ole ke hoomaopopo ia kau no ka nui loa.

            Ua haawiia na makana a pau i kela a me keia.  Iaia i komo aku ai iloko o na halemai, eia kana i pane aku ai i kona mau koa poino.  Na ka Emepera Wahine keia mau makana i hoouna mai nei ia oukou; a ia manawa no hoi, e hoomaka ai oia i ka ninau pakahi ana ia lakou no ko lakou mau palapu.  ke ano maha mai a me ka ole.  a hamo aku la oia i ko lakou mau papalina me he mau kamalii hanau la nana,a haawi maila hoi lakou i na honi pumehana ana ma kona mau lima.

            Pela iho la ka Emepera e hele'i mai kekahi moe a i kekahi moe.  Ua haawi makana pu aku hoi oia i kona kii ponoi i kekahi mau koa a me na aliikua, a i kekahi poe alii hoi, haawi aku la oia i ka inoa hoohanohano, o "Ke Kea Hanohano o ka Papa o Sana Keoki," he kulana i hooili mau ia aku maluna o ka poe i ikeia ke kulana koa me ka wiwo ole, iloko o na hoouka kaua.

           

            Ua hoole mai la hoi na makaainana o Aremania, e noho ana ma Setamabola, no ke komo ana i ka oihana kaua, malalo o na kauoha a Tureke.

            Ua kaalo ae la he 25,000 mau koa Rukini, me 70 mau pukuniahi ma Galateza.  Ua ae aku la kekahi hapa o keia puali mao o ke Danube, maluna aku o ke  alahaka o Iberailia, a o ke koena ua hele aku la ma ke ala o Kalaraseka.

LANAKILA NA SEREVIA.

            Belagerade, Dek. 25.--Ma ka Poakahi, ua hoouka kaua aku la na Serevia maluna o Akepalaeka, a ua lilo mai la ia wahi ma ko lakou mau lima. mahope o ka hakaka ana me na Tureke no na hora 8.  Mawaena o na waiwai i pio mai, he 3 mau pukuniahi nunui a Kerupa, na mea kaua e ae aole i kana mai, a me ka ai.  He nui no hoi ka poe make a lawe pioia.  Inehinei ua hiki kino mai ke Keiki Alii Milana, i ka wa e hoomakaia ana ke kipoka pahu ia Niseka

PAPA HOIKE MANAWA

NO NA

Mea Kaulana iloko o ka Moolelo

Hawaii.

 

            1872, Feb. Waihoia ka pohaku kihi o ka hale aupuni hou Aliiolani Hale.

            wehe mua ia ka Hotele Hawaii.

            Oct. 2, Make ka wahine a Kauka G. P. Judd, iloko o ke 68 o kona mau makahiki, oia hoi kekahi o ka huakai elua o na misionari.

            Dek. 11, Make o Kamehameha V ma Honolulu i ke 43 o kona mau makahiki, me ka waiho hakahaka ana i ka nohoalii.

            Dek. 18, Make o A. Bihopa i ke 76 o kona mau makahiki.  Ua hiki mai oia i Hawaii nei i ka makahiki 1823.

            Dek. 26, Make o Wini wahine ma Waimea, Kauai, i ke 77 o kona mau makahiki.  Oia hoi kekahi o na misionari Paionia, i hiki mua mai i ka makahiki 1820.

            1873, Ian. 8, Kohoia o W.C. Lunalilo i Moi no Hawaii nei, e ka Ahaolelo kuikawa.

            Ian. 9, Hoohiki o Lunalilo malalo o ke Kumukanawai, maloko o ka luakini o Kawaiahae.

            Iulai, Make o Dr. G.P. Judd ma Honolulu, i ke 70 o kona mau makahiki. Oia kekahi o na misionari i pae mai ma ka makahiki 1828, a ma ka makahiki 1842, noho oia ma ka hooponopono ana i ke aupuni Hawaii.

            Hooikaika hou ia ka imi ana i ke Kuikahi Panailike me Amerika Huipuia, me ka manao ana e hoohui aku i ke Awa o Puuloa, i wahi hoolulu moku kaua.

            Ua hoopau ke Aupuni Hawaii i ka manao hoohui ia Puuloa.

            Sept. 7, Hoomaka ia ka haunaele ma ka halekoa, a hoopauia ka oihana koa kumau e ka Moi Lunalilo ma ka la 12.

            1874, Feb. 3, Make ka Moi Lunalilo ma Honolulu, i ke 39 o kona mau makahiki, me ka waiho hakahaka hou ia o ka noho alii. 

            Feb 12 K@ Ahaolelo i Moi no ko Hawaii Paeaina.

            Haunaele ma ka Hale Hookolokolo o ka Halekauwila, a pepehiia na Lunamakaainana e ka poe kipi.  Hoomaluia ka haunaele e na koa o na aumoku kaua Amerika a me ko Beritania, e ku ana ma ke awa nei ia manawa.

            Feb. 13, Hoohiki iho la ka Moi Kalakaua malalo o ke Kumukanawai, maloko o Kinau Hale.

            Feb. Kuahauia ka mea Kiekie W.P. Leleiohoku i Hooilina no ka nohoalii.

            Iune, hooholoia ke kanawai e ae ana i na mahiko e puhi rama.

            Hooholoia ke Kanawai aie Miliona Dala.

            Iulai 5, Make ka wahine a Rev. D. Dole ma Honolulu, i ke 61 o kona mau makahiki.

            I ka makahiki 1837 kona hiki mua ana mai i Hawaii nei.

            Oct. Hooikaika hou ia ka imi ana i ke Kuikahi Panailike me Amerika Huipuia, a ma ka la 19 oia malama, hoounaia aku la na Mea Hanohano E.H. Allen a me H.A.P. Carter ma Wasinetona, ma ke ano he mau Komisiona.

            Nov. 17, Holo aku la ka Moi Kalakaua i ka makaikai ia Amerika Huipuia, maluna o ka mokukaua Benicia, i ukali ia e na Kiaaina Jno. O. Dominis a me Jno. M. Kapena.

            1875 Hoopuka mua ia ka Alemanaka Hawaii a me ka buke hoomanao makahiki.

            Ian. 29, Make o Capt. Meek i ka 83 o kona mau makahiki.

            Feb. 15, Huli hoi mai ka Moi Kalakaua me kona mau ukali, maluna o ka moku kaua Adimarala Pensacola mai  Amerika Huipuia mai.

            Oct 16, Hanau o Victoria Kawekiu Kaiulani Lunalilo, he kaikamahine na ka mea Kiekie Miriama Likelike Cleghorn.

            Oct. 19, Ku mai ka mokuahi Vasco de Gama, no ka Laina Hooholo Mokuahi o Auseteralia, mai Kapalakiko mai, ma ke alahele no na Panalaau.

            Novemaba, Hoouna houia ka Hon. E. H. Alleni i Wasinetona Amerika no ke Kuikahi Panailike.

            1876 Feb. 10, Ku mai ka moku kialua Hera: mailuna aku hoi o ka oneki o keia moku, i haule ai ka Earl o Aberdeen iloko o ke kai a nalowale, ma ka la 27 o Ianuari, oiai ka moku e holo ana mai Bosetona aku, no Melebona, Auseteralia.

            Make o Kauka Makibine makua; ua Kamaaina kona noho ana Honolulu nei mai ka makahiki 1865 mai.

            Mei 14, Make o Mrs. Betsy Judd, i ke 94 o kona mau makahiki o ke ola ana--oia ka makuahine o Dr. G.P. Judd.

            Iulai 4, he hauoli nui ma Honolulu, no ko Amerika la Kuokoa.

            Aug. 8, Make o James Robinson ma Honolulu, he haole i noho a kamaaina ma Hawaii nei.

            Aug. 14, Hooholo ia ke Kuikah Panailike o ka Aha Senate o Amerika.

            (Aole i pau.)

 

MAIKAI KA HOI KA PAPA!

A ME

KA LAAU O KOU HALE!

NO HEA LA?

KAI NO HOI NO KAHI O

WAILA MA!

 

Nana aku no hoi ia la

Ohi ka Io o ka Laau o Makawao

I ka ua mea hoi o ka nani o

 

Na PAPA! Na PAPA!!

A ME

NA PONO KUKULU HALE

O NA ANO NO A PAU.

 

Aia ma ke kihi o na

ALANI PAPU me MOIWAHINE!

HONOLULU

MALAILA E LOAA AI

E LIKE me ka MAKEMAKE

NO KE

KUMUKUAI MAKEPONO LOA!

 

PAPA, PAPA, PAPA,

 

Na Papa Huluhulu,

Na Papa Manoanoa,

Na Papa i kahiia,

Na Papa Kepa,

Papa Hole Keokeo,

Papa Hole Ulaula.

 

NA LAAU, NA LAAU!

 

Na Kua,

Na Kaola,

Na Aaho,

Na Molina,

Na Peapea,

Pine Huluhulu,

Pine i kahiia.

 

NA Papa a me na Laau Ulaula1

 

Pili ulaula,

Pili Keokeo,

Pani Pua

Pani Puka Aniani,

Ipuka Aniani,

Puka Olepelepe.

 

PENA O NA ANO A PAU!

 

Hulu Pena mai ka Liilii a ke Nui,

Aila Pena,

Aila Hoomaloo,

Waniti, Pate.

 

NA LAKO O KELA A ME KEIA ANO!

 

Na Ami Puka Hale.

Na Ami Puka Pa.

ANIANI!

 

Pepa Hale a me na Lihilihi

 

E LOAA NO MALAILA.

 

PAAKAI HELU 1 O KAKAAKO me PUULOA

 

            No ke DALA KUIKE, e loaa no na mea a pau i haiia ae la, no ke Kumukuai Emi loa.  O na kauoha a pau mai Hawaii a Niihau, a loaa'ku ana ia lakou, e hooko koke ia no ia me ka lawa pono.

 

            E Kipa Nui Ilaila, i ike i ka Oiaio.

 

864 3ms.