Ka Nupepa Kuokoa, Volume XVII, Number 4, 26 Ianuali 1878 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKI XVII. HELU 4.} POAONO, IANUARI 26, 1878. {NA HELU A PAU 843.

 

On To Victory.

 

The Reward p. 90.

 

                        1

            E ku na koa o Iesu,

            E ku a paio, paio pu,

            Hoopili ia ia a naue no

              I ke ola mau

            Ke ala nei na enemi.

            Hamau ! he pu e kani nei ;

            E naue ae a paio e,

              Paio koa no.

Cho.    Ala e-------na koa nei-------

            Naue pai--------o, paio e-------

            He lei na--------ni e mao

            No oukou--------ke paio mau.

                             2

            Ke naue ae na koa nei

            No keia kaua maikai e

            Malalo o na bana lai,

              Bana welo mau.

            Ua kaei i na pahi laa,

            Hoouka no a ulupa.

            Makau na enemi, ha, ha,

              Auhee ae lakou.

Cho.    Ala e--------&c.

                             3

            Ku hou na koa o Iesu,

            Me ko Iehova mana pu,

            A naue lanakila no,

              Pili ia Iesu.

            Iehova no ke alakai,

            Ma kana olelo e hilinai--

            Pau ka makou, e naue ae

              I ke ola mau.

Cho.    Ala e-------&c.

                             4

            Ma ko Iesu aloha e,

            Ma kona hooikaika mai,

            Hoolana a e paio,

              Paio a mau no,

            E paio a lanakila e,

            A hiki aku iluna'e,

            E kau ko luna lei maikai,

            Lei olino mau.

Cho.    Ala e--------&c.

                                             HAWAII.

 

KA

NANEA EEHIA

O KA HIWAHIWA OPIO

ABEONA

KE KEIKI

ALII O KO KE AUPUNI TEROGINA,

KA MEA 1

HANA@IA ME KA UMAUMA AIII

LA PALAPA O KA WIWO OLE,

KA WALI WAIPAHE

Nana i kaili ka Puuwai Kupaa o ke

KAMA ALIIWAHINE

MARIADANE.

 

--KA--

OPUU PUNAHELE LUA OLE A KA

MOI  MINOSA, O KE

AUPUNI KUPUA O KARETE.

 

MOKUNA I--HELU 4.

     MAMULI o keia leo nui a kona makua, hapai hou ae la ia i kana pahikaua, a ia manawa i ike mai ai oio i ua pahi nei, a o kona lele mai la no ia a hopu mai la i kana keiki, puliki ae la i kona mau lima ma kona puhaka, a uwe iho la me ka haaloulou ana.

  "E kuu mea aloha, e kuu minamina nui wale e," wahi ana, me ke kuu ana mai i kona mau wuimaka, e helelei me he ua la e helelei ana mai ka lewa mai. "He oiaio, na'u @o e hoao ana e lawe ae i kou ola?  E na lani, e lawe ae i ko'u ola, no ka mea, heaha la ko'u kuleana e ola'i?  E ae no anei ka  lokomaikai kiekie e hanu ke kanaka i puni wale i na hoowalewale a hoao e lawe i ke ola o ka mamo o kona puhaka !  A ina aole au e ae ia e nalo mai keia noho'na, alaia, na'u no e lawe ae i ko'u ola, a e lilo au i mea lapuwale imua o kuu keiki."

  Pela iho la ke ano o kana mau kanikau ana, a owai la ka makua e uwe ole ana no kana keiki, ina pela ke ano o ka hui ana?

  Aloha io no--aloha wale ke keiki i hele huli aku no ka ike ana aku i kona makua, ka mea hoi a kona makuahine i ao mai ai iaia e aloha mai kona la ukuliiwale, a o ke ko ana hoi ia o kona makemake, o ka loaa ana ia o ka lanakila maluna o na manaolana a pau, eia ka, nana no, na ka lima no o ka makua, na ke aloha no o kona puuwai e hoao e ako ae i ka opuu o kona puhaka, a hoonele iaia iho me ka hooilina ole o kona mau aloha a pau.  Ulu mai la kona aloha no kana wahine, no kona hoomanawanui ana no na makahiki loihi, e kiai makaala ana i ka laua keiki a me ka hoolohe paa ana hoi i kana mau kauoha.  Hoi mai la na hoomanao ana a pau no kona mau la opio, a piha loa ia ae la kona puuwai me na kaomi ana a ka ukana luuluu a ke kaumaha.

  O Abeona, e ku ana no ia me ka makaukau e hooko i kana mea i manao ai e kau aku maluna o ka poe i manao ino mai iaia, a i hoao mai hoi e lawe i kona ola. 

  I ka ike ana mai o na keiki a ke kupua no keia mea, o ko laua manawa koke no ia i haalele mai ai i ka Halealii, a nalo loa laua mai ia manawa mai me ka ike hou ole ia.  O ke kupua hoi, haalulu iho la kona kino, a ano ike ole i kana mea e hana ai.

  He manao maikai no ko Abeona, nole i lilo loa i ka inaina, aole hoi i hooko i ka io o kana mau olelo ia manawa, aka, hookuke aku la oia i ua kupua nei me ka i an'ku, "Aole e komo hou kona poo maloko o ia hale, aole no hoi e hehe hou kou mau kapuai maluna o ka honua o ia aupuni a ke hooko ole oia ia mau mea, alaila, o ka make no ka panina hope loa no kana mau hana."

  Ua kau aku la ka hilahila maluna o ua kupua nei, a hemo aku la ia mai loko aku o ka pa alii me ka hoino nui ia e na makaainana, a kona nalo ana no ia nalo loa.

  I ka lohe ana aku o na makaainana i ka haulehia ana o ka manaolana o na keiki a ke kupua, a me ka lanakila ana o Abeona maluna o ka Halealii, aia hoi, ua piha loa ia ne la lakou me ka hauoli, a ua hoomaikai mai la ia Abeona, ka mea nana i hookaawale aku i ko lakou enemi mai ko lakou aina aku.

  Ano, ua lanakia'e la ka Halealii mai ka mana o ka poe ino, a noho iho la o Abeona me kona makua me ka hauoli, me ko ia nei hai aku iaia no na mea e pili ana i kona makuahine.  Ua nui loa ke aloha o ka Moi no kana keiki, a ua ae ole aku iaia e hele wale mawaho aku o na poai o ka pa o ka Halealii.

  He manawa liuliu wale ko Aeona noho ana me kona makua, e hookamaaina ana me ko laila noho'na; a i kekahi po, loaa iho la iaia kekahi hihio moeuhane kupanaha loa.  I kona ala ana mai i ke kakahiaka nui, ua hiki ole ke hoonalo aku i na hoomanao no ua moe nei, a me he la e uluaoa mau ana imua o ka ike a kona mau maku, a e hoolauwili ana hoi i kona mau manao.  No keia mea, ua hele loa aku la ia imua o kona makua, a hai aku la iaia, penei:

  "E kuu makua, i ka po nei, maluna o ko'u wahi moe, oiai hoi au malalo o na eheu o ke kupua hiamoe o ka po, aia hoi, ua kamoe ia iho la maluna o ko'u kino holookoa kekahi mau mea ano e loa, a hoikeia mai la i ko'u ike a me ko'u mau noonoo ana kekahi hihio moeuhane."

  "E kuu keiki," wahi a kona makua. "Ano ke ike aku nei au i ka ikaika o ka pana a kou puuwai, a ke omaka mai la na opuu hou ikiiki ma kou manawa, e hooia mai ana i kou makua nei, ua uluaoa kou mau noonoo ana, a aia maluna ou kahi i kau ai o kekahi mea nana e hooluuluu nei i kou kino. E hai mai ia'u ano a e hoao no au e hoomaloo aku i na hou e hoopulu la i kou lae, a e hoomaalili hoi i na pana ikiiki o kou umauma."

  "Ma kuu hihio, e kuu makua, ike iho la au ia'u iho maluna iho o kekahi wahi mokupuni uuku iki, he pukoa aa wale no iwaena konu lilo o kekahi moana kai uli hohohu, a o na ale inaina a ke kikiao mokani ikaika e hoonee mai ana, e noke ae ana me ka leo nui wawa ia'u, oiai au e ku ana i ka piko kiekiena loa o ua wahi pukoa nei.  Ku iho la au me ka papale ana ae i ko'u mau lima i na maka, e nana ana au o ka ike aku i kekahi pea, me ka manao iho iloko o'u, e kau mai ana ka pilikia maluna o kau keiki nei. Aka, oiai au e ku ana, aia hoi, ua hooea ae la maioko ae o ka moana kekahi leo uwe kaniuhu ; aia manawa koke no, ua paiakuli ae lu ko'u mau pepeiao i na leo kanikau o kela ano keia ano, a piha ae la na poai laula o ka lewa me na wawa o ke ano luuluu kaumaha.  Ike iho la au o na leo lehulehu a pau, ua huiia ae la i hookahi, a pa tausani ae la ka ikaika maluna o ka hekili.  A i ka poha ana o keia leo nui, ia manawa au i puoho ae ai me ka hikilele a pi@a i ke kahaha.  Mamua o ka oaka ana ae o na lihilihi o ko'u mau maka, ua puliki e ma la au i ke a'u o ka'u pahikaua, me ka manao e lele aku a halawai me ka mea e hoea mai ana, aka, ua hoi koke mai la no nae ko'u noonoo ana, me ka piha kupouli hoi i na manao kahaha, nolaila, ua awiwi mai nei au imua ou, me ka makemake nui e hai mai oe i ke ano o keia hihio kupana."

  "A! e kuu keiki e! me moeuhane piha io no kau i ke kanikau.  O ka manawa luuluu keia o keia lahui kanaka, no ka mea, i keia la o kela a me keia makahiki, e wae mau ia ana he ehiku mau kanaka opio, a he ehiku mau kaikamahine opio mai keia lahui, a laweia aku i ke aupuni o Karete, na ke kupua nui ai-kana-ka.  O keia la e kuu keiki, oia no ka la no keia hana kaumaha, a oia no ka haina o kau moe."

  "Ke kupua aikanaka!"  wai a Abeona me ke kahaha.  Heaha kona ano, a pehea kona ikaika? He mea hiki no anei ia'u ke hele aku me ka manao ole i ko'u ola iho, a hoao e hoopakeleia ke ola o kela a me keia poe opio e laweia ana ma keia hope aku i kela a me keia makahiki?"

  Kulou iho la ke poo o ka Moi a luliluli ae la, a i kumu e ike ai o Abeona, he mea makehewa wale no ka hono ana e like me kona manao, nolaila, ua hai mai la oia i keia wahi moolelo pokole:

  "Aia maluna o ka mokupuni o Kerete, ke noho nei kekahi kupua aikanaka; a o ke ano o kona kino, he hapa kanaka, a he hapa nahesa, a he mea weliweli nui kona mau ano a pau ke ike aku. O keia kupua no hoi, ua laka loa i ka Moi o ia aina, oia ka Moi Minosa, a ua lilo laua he mea aloha kekahi i kekahi.  A iloko o kekahi manawa mamua o kou hanau ana, ua ulu ae la kekahi kaua mawaena o na aupuni a elua; a iloko o ia kaua, ua auhee mai la ko'u mau koa, a lanakila ko Karete poe.  Ua koiia aku ia aupuni e hoopau i ke kaua, a e noho maluhia, aka, aole loa lakou e ae mai, ke ole e ae ia aku i kumu no ia pomaikai, e haawiia aku i ehiku mau kanaka opio a me ehiku mau kaikamahine opio i kela a me keia makahiki, i ola no ua kupua nei.  Nolaila, ua hiki mai keia la, a ke piha la ka puuwai o kela a me keia makua me na koni kaumaha, e hopohopo ana o haule aku maluna o ka lakou poe keiki keia haawina kaumaha.  Ke kaumaha nei na opio, o lilo lakou i ai na keia kupua ino nui wale.  Oia iho la ka moolelo e kuu alii opio, a mai aa kou naau e hele aku ia wahi a'u i makemake ole ai ia oe e hele aku."

  Aka, i ko Abeona lohe ana i keia mau olelo a kona makuakane, hoopololei ae la ia i kona kino a maloeloe, a o kona mau helehelena, ua kau aku la na hiona o ka inaina wela o ke kanaka koa no keia kupua, a o ke aloha a me ke kaumaha no ka poe i poino mau malalo o kona makemake.

  "E ae aku i kou mau makaainana e ke Alii, e wae mai loko ae o lakou i eono wale no kanaka opio ma kahi o ka ehiku" wai ana, "a ow@u no ke hele aku i hiku no lakou, a e ai mai ke kupua ia'u ke hiki."

  "Auwe! e kuu keiki, pehea la kou manao i paakiki ai, e hele i kahi e kau mai ai ka make hala ole?  E noonoo iho oe i kou kulana, he Keiki Alii, a ua kau mai ka manao o na makaainana a me kou makua nei kekahi, e lilo oe i koo a i Hoolina hoi no ke Kalaunu o ko makou Nohoalii, a pehea la oe e makemake nei e pepehi i ko mokou manaolana? Ka i no hoi i alo mai oe i na kai loa a me na pilikia a pau, no kou ake nui e loaa au, a e lilo oe i mea nana e hoohauoli mai i ko'u ola ana o na la kanikoo, eia ka aole pela.  Me he la hoi he moeuhane wal@ no ia au e kuu Haku.  O, e kuu Abeona e o oe wale no ko'u ola, a nalo ae oe, pau kino, pio kona kukui, a hoi ka lepo a i ka lepo.  E kuu Aeona hoi, he haku oe, he alii a he momi maluna o na makaainana, a mai ae oe e hoohaahaa iho i kou kulana, a hele pu aku me kekahi poe makaainana ou, e wae ia ana a hele aku.  He oiaio, he aloha no ko'u ia lakou, aka, ke hele hoi kaua me lakou, o ka haalele ana iho no ia i ka hapanui a me ka aina mahope nei, a loa lakou e ae mai ia mea.  E kuu Alii, heaha la kou mea i upu ai e hele, a e haalele mai hoi i keia kino nawaliwali a me keia mau oho hia hoi au?"

  Pela iho la na olelo kaukau o ko Abeona makua no kana keiki, e hoike mai ana, ua kukuni paa ia kona mau iini aloha nona.  He aloha no o Abeona i kona makua, aohe mea nana e hole ia mea ; a no ka mea hoi, na ke aloha no i kono iaia e haalele aku i kona one oiwi, kona kupuna a me kona makuhine aloha, a hoomanawanui mai me ka alo ana i na pilikla he lehulehu wale. Aka, na kana pane i na olelo kaukau me ka hoalohaloha a kona makuakane iaia, e ike ai na makamaka kaunu a huihai olelo o ke Kuokoa, i kona ano kela ma ke kulana a hiwahiwa palena ole ma kana mau huaolelo.

  Ua hiki ole i ka hoomanawanui o ka mea nona ka pulima e kuhakaha nei i keia mau huaolelo, ke uumi iho i ka pana malu ae a na koni makahehi a ke aa-ko-ko o ka puuwai, a ke wiwo ole, a ke hookamani ole nei au i ka puana ana ae, ina paha o konao puu roselani ana a he iwa no ka aoao palupalu, o ke komo poo ana no ia o ko oukou makamaka nei no ka hooipoipo ana me ka hoao hala ole, e lilo mai kona mau iini i wai hoomaalili no ka wela ikiki o ka houpo, i ka ua mea o ka paupauaho a ka iini aloha e uwalu nei ia loko.  Aka, ua nele au ia mea, a nolaila, ke lawe nei au i hoa'loha, i aikane o ka poli hookahi, a ua paa ko'u manao e ukuli iaia, ma na wahi a pau a kona moolelo e lawe hele ai iaia, e alo pu i na pilikia, a e hauoli pu i na pomaikai, a e aloha au iaia, a e aloha hoi oia ia'u, a na ka hopena o kanaka e hookaawale ia maua, a pau na hoomanao ana o kekahi a me kekahi ma keia ola ana ; a ina he pomaikai ke uhi mai ana maluna iho o maua, no ke kuilima pu hou ana ma kela aoao o Ioredane, ulaila, o ka inoa o ka Mana Lani ke hoonaoiia.  Pehea hoi oe e ka mea heluhelu? e iniki aku au, i ike ia kou hui pu ole mai me a'u--o ia --nila.

"No ka mea," wahi a Abena, me ka leo kilakila, a @ne na maka hulili, me kona lima e paa ana i kana pahikaua, "he mamo au nau e ke'Lii, a o ka hooilina hookahi o kou aupuni a me kou no a pau, oia ke kumu o'u e !awe nei maluna iho o ko'u hokua, i ka haawina o ka make i manaoia e kau maluna o kou mau makaainana. A o oe e kuu maku aloha, ka Moi maluna o keia lahuikanaka, ua haawi mai na Lani ia lakou malalo ou, a i ka hopena, e kahea ia mai ana oe e ku aku imua o kela noho eehia o ka Moi o na Moi, a e hoike i ke ano o kau malama ana i kau oihana, ma ke ano he kehuhipa malalo ona.  Nolaila, he mea pono e ke'Lii, no ka pomaikai a me ke ola o kou lahui kanaka, e ae oe e mohaiia kau mau mea i manao nui ai, a i na no o kau mea hookahi i aloha'i maluna ae o na mea a pau.  E kuu  Makua  Alii  A Haku ! ke kukuli aku  nei au imua  ou, me ke  noi haahaa ana'ku; mamua ae o kou ae ana, e kau ia ka poino maluna o ke keikikane opio a kaikamahine opio paha a kou mau makaainana, e ae koke oe i ka mamo o kou puhaka, e hele aku a e lawe i kekahi haawina o ia mau poino.  E ke Alii Moi, mai ae oe e poino kekahi o kou mau kuewa haahaa loa me ka mohai ole."

  E like me ke kulu ana o na omaka kehau o ka wehe kaiao, a okuku ae la maluna o na lau a me na pua, pela no na kulu waimaka o ke keena aloha o ko Abeona makua, a pela no hoi kona mau papalina, ua hele a kawau i ka pehia e ka ukana a ke kaumaha.  Ua koi ikaika ia, aka, ua paa ka manao o kana keiki, me kona olelo mai, "Ina e lilo ana au i inai ne kupua, ke hai paa aku nei au ia oe e kuu makua aloha, o ka hoouka kaua mamua, mahope ia e paina ai ke lanakila ia."        (Aole i pau.)

 

PAPA HOIKE MANAWA

 

-- NO NA --

Mea Kaulana iloko o ka Moolelo

Hawaii.

 

  1824 Aug. iho o Kapiolani kakahi Aliiwahini kiekie, ilalo o ka luapele o Kilauea, a hoopau i ka weliweli ana aku o ko Hawaii nei ia Pele ko lakou akuawahine,

  1825, Holo aku la o Rev.Mr.Eliki a me kona ohana ma ka moku russell, no Nupepeki.

  Mei 4, hoi mai o boki ma mai Pelekane mai, me na kino make o na Moi, maluna o ka manuwa Blonde.

  Hoomaka mua ia ka mahiko a me ke kofe mauka o Manoa.

  1826, Ianuari 11, ku mai ka moku kuna Amerika o Dolepina, ma Honolulu nei, o Lutanela Perecivala ke Aliimoku.

  1827, Feberuari 8, make o Kalanimoku ma Kailua, Hawaii.

  Okatoba, Mareia o Kinau me Kekuanaoa.

  1828, Mar 30, Pae mai ka huakai ekolu o na misionari, ma Bosetona mai, maluna o ka moku Peretiana.

  Iulai 3, Hoolaaia ka luakini mua ma Honolulu.

  1829 Dek 2, Holo o Boki ma mai keia paeaina aku, a o ko lakou nalowale loa ana no ia.

  1830 Dek 11, Hanau ka Moi Kamehameha V., a make i Dek. 11, 1872.

  1831 Iune 7, Pae mai ka huakai eha o na misionari, mai Nupepeki mai, ma ka moku Nu Elelani.

  Sep. Hoomakaia ke Kulanui ma Lahainaluna.

  1832 Mei 17, Pae mai ke huakai elima o na misionari, mai Bosetona mai, maluna o ka moku Averika.

  Iune 5, Make o kaahumanu ma Manoa, i ke 58 o kona mau makahiki.

  Iune, Hookohuia o Kinau i Kuhina Nui.

  Hoomakaia ke Kula Manawalea ma Honolulu.

  1833 Mar. Hooniaka o Kamehameha III., i ka hooponopono ana i ke Aupuni, a o Kinau kona Kuhina Nui.

  Mei 1, Pae mai ka huakai eono o na misionari.

  Kukuluia ka luakini Betela ma Polelewa, Honolulu.

  1834 Feb 9, Hanau o Liholiho Kamehameha IV.

  Feb 14. Paiia ka nupepa Hawaii mua loa ma Lahainaluna, i kapaia ka "Lama Hawaii."

  Paiia ma Honolulu nupepa ke "Kumu Hawaii."

  1834 Dek. 31 Hanauia ka Moiwahine Kapiolani.

  1835 Ian 31, Hanau o Lunalilo, na Kanaina me Kekauluohi.

  Hoomakaia ka mahiko ma Koloa, Kauai.

  Mareia o Leleiohoku me Nahienaena.

  Iune 6, Pae mai ka huakai ehiku o na misionari.

  Paiia ka Alemanaka Hawaii mua loa ; na ka Ahahui misionari i hoopuka.

  1836 Ianuari 2, Hanau ka Moiwahine Kanemake Emma.

  Hoomakaia ke Kula Kaikamahine ma Wailuku, Maui.

Hoomakaia ke Kulahanai a Laimana ma Hilo.

  1836 Nov. 16, Hanau ka Moi Kalakaua ma Honolulu, na Kapaakea me Keohokalole.

  Dek. Make o Nahienaena, ka wahine a Leleiohoku, i ka 21 o kona mau makahiki.

  1837 Feb 4 Mareia ka Moi Kauikeaouli Kamehameha III., me Kalama.

  Aperila 9, Pae mai ka huakai ewalu o na misionari.

  Iulai 3, Hookuuia o Rev. Willima Rikeke, mai ka Aha Misionari aku, no ka hui ana aku e hooponopono no ke aupuni Hawaii.

  Hoomakaia ka wehe ana i na Alanui Aupuni ma Honolulu.

  Nov. 7, He kai mimiki a puni keia Paeaina.

  1838 Hoomaka ke ao ia ana o na'lii i na oihana hooponopono pili Aupuni, e Mr. Rikeke.

  Nov. 1, Hanau o Victoria Kamamalu, na Kinau a me Kekuanaoa.

  1839 Aper. 4, Make o Kinau ma Honolulu.

  Aper. 5, Lio o Kekauluohi i Kuhina Nui no ke Aupuni.

  Mei 10, Pau i ke paiia ka buke mua o ka Baibala Hawaii.

  Iula 9, Ku mai ka moku kaua Farani l'Artemise, Kapena Lapelake.

  Make o Kaikioewa ma Kauai, oia kekahi alii o Maui.

  1840 Hoomakaia ke kula no na'lii opio ma Honolulu, e Mr. a me Mrs. Kuke.

  Ianuari, Make o Hoapili ke Kiaaina o Maui.

  Kukuluia ka luakini pohaku o Kawaiahao ma Honolulu

  Augate 3, Hoi o binamu a me kona ohana i Amerika.          (Aole i pau.)

 

MAIKAI KA HOI KA PAPA!

 

--A ME--

KA LAAU O KOU HALE!

NO HEA LA?

KAI NO HOI NO KAHI O

WAILA MA!

Nana aku no hoi ia la

          Ohi ka Io o ka Laau o Makawao

                    I ka ua mea hoi o ka nani o

Na  PAPA!   Na   PAPA!!

 

--A ME--

NA PONO KUKULU HALE

O NA ANO NO A PAU

 

Aia ma ke kihi o na

ALANUI  PAPU  me  MOIWAHINE !

                     HONOLULU

MALAILA E LOAA AI

             E LIKE me ka MAKEMAKE

                       --NO KE--

 

KUMUKUAI MAKEPONO LOA!

 

PAPA, PAPA,PAPA,

    Na Papa Huluhulu,

             Na Papa Manoanoa,

                       Na Papa 1 kahiia,

                       Na Papa Kepa,

              Papa Hole Keokeo,

    Papa Hole Ulaula.

 

NA LAAU, NA LAAU!

Na Kua,

      Na Kaola,

            Na Aaho,

                 Na Molina,

                      Na Peapea,

Pine Huluhulu,

              Pine i kahiia.

 

NA Papa a me na Laau Ulaula!

        Pili ulaula,

        Pili Keokeo,

        Pani Puka,

                  Pani Puka Aniani,

                  Ipuka Aniani,

                  Puka Olepelepe.

 

PENA O NA ANO A PAU!

Hulu Pena mai ka Liilii a ke Nui,

          Aila Pena,

                   Aila Hoomaloo,

                              Waniti, Pate.

 

NA LAKO O KELA A ME KEIA ANO!

      Na Ami Puka Hale,

                             Na Ami Puka Pa.

                        ANIANI!

 

Pepa Hale a me na Lihilihi

     E LOAA NO MALAILA.

PAAKAI HEU I O KAKAAKO me PUULOA>

  No ke DALA KUIKE, e loaa no na mea a

pau i haiia ae la, no ke kumukuai Emi loa.

O na kauoha a pau mai Hawaii a Niihau,

e loaa'ku ana ia lakou, e hooko koke ia no

ia me ka lawa pono.

 

  E Kipa Nui Ilaila, i ike i ka Oiaio

                       084  3m@