Ka Nupepa Kuokoa, Volume XVII, Number 3, 19 January 1878 — Page 1
| This text was transcribed by: | Mary Nishioka |
| This work is dedicated to: | Hawaii Council for the Humanities |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XVII. HELU 3.
The Children’s Te Deum.
Nine O’clock in the Morning. p. 208.
Chorus. Hoolea, hoonani Ia Iehova ke Lii mau.
Aole inoa i like me kou,
Nou no ka mahalo, ka nani a mau aku no,
Ke Akua, Hoola, ke Lii o na ao.
1
Semi Cho. Hookani na leo a eko mai O,
A hui a kani na oli naau.
2
Aloha hoomaikai i ke Akua mau,
No kona malama, a hoomalu no.
3
No kana mau huaolelo maikai
No keia la oli e hauoli ai.
4
E hui na leo a mele pu no.
A pii ae ke kani i o i ke ao.
Chorus Hoolea, hoonani I Iehora ke Lii mau, &.
1
Solo. Ke Akua mau loa,
E launa kokua,
Aloha, hoomaikai mai,
Nou ka hoonani ae.
2
Mau no kou malama,
Ia oe ka mana.
Nau makou e alakai
I ka homo ma o.
3
Kiai ia makou la,
Kokua, hoola,
Hoolana i na manao,
Hoohauoli a mau.
4
Ke mele makou la,
Hoolohe Iehova
I ko makou meme nei,
Me lakou_____________
Cho. Hoolea, hoonani Ia Iehova ke Lii mau,
Aole inoa i like me kou.
Nou no ka mahalo, ka nani a mau aku no,
Ke Akua, Hoola, ke Lii o na ao.
Haleluia, haleluia, haleluia, Amen
Haleluia, haleluia, haleluia, Amen
Haleluia, Amen—Amen.—
HAWAII.
KA
NANEA EEHIA
O KA HIWAHIWA OPIO
ABEONA
KE KEIKI
ALII O KO KE AUPUNI TEROGINA,
KA MEA I
HANAUIA ME KA UMAUMA AIII
LAPALAPA O KA WIWO OLE,
KA WALI WAIPAHE.
Nani i kaili ka Puuwai Kupaa o ke
KAMA ALIIWAHINE
MARIADANE.
KA
OPUU PUNAHELE LUA OLE A KA
MOI MINOSA, O KE
AUPUNI KUPUA O KARETE.
MOKUNA I—HELU 3.
AI kahaha kou naau e ke kanaka opio no keia mau mea, oiai, he mea hiki wale no ia’u ke hoopau aku i kou pohihihi ; wahi a ka Pilikua.
“He mea kahaha io no keia mau mea a’u i ike iho nei, aka, ke ane hiki aku nei no nae ia’u ke hoomaopopo. O keia ka inoa o ko’u makuakane a’u e imi nei, a o kana kauoha keia no ko’u malama ia e ka Pilikua Ganeha, a me he la, o oe no ia.”
“Ae, owau no ia, a o ke kauoha keua a kou makuakane ia’u. Ua hauoli nui loa au no ka loaa ana o keia pomaikai o ke kokua ona i kane keiki ma kana mau mea e imi ai, oiai, o kana mau kauoha, ua lawe hoohiki paa ia e a’u e hooko. Nolaila, e ka mamo a ka puuwai koa, ano ua makaukau au e kokua ia oe ma kau mea e makemake ai.”
Hoihoi aku la o Abeona i na maka o ua Pilikua nei, a pau ao la kona mau manao ino i kona hoa paio o na minute pokole mamua iho.
“Hookahi wale no a’u kauoha ia oe,” wahi a Abeona, “e hoihoi hou aku ia’u mai kahi au i lawe mai nei ia’u, a e imi aku i ko’u mau kanako a e hoakoakoa mai ia lakou, i hiki ai ia’u ke hoomau aku ma ka’u huakai imi i ko’u makuakane.”
“E kuu makamaka, e hooko koke no au i kau kauoha, aka, e ae mai nae oe ia’u e kamailio pokole aku no na mea e pili ana i kou makua. O kou makuakane, ua aoo loa ia kona kino, a ua nawaliwali na ami. Aia mamua o kona alo na keiki a ke kupua Medea, ka mea nana e hoonawaliwali nei i kou makua me ke ake nui e make koke oia a lilo ke aupuni i kana keiki mua loa. O kou kaulana, ua mama ka hele ana mainua ou, no ka mee, i kou one hanau no oe, lohe e ia ma keia mau Paemoku. Ua lohe ia no hoi ke ano o kau huakai, nolaila ua piha ke kupua me kana mau keiki i ka inaina ia oe, a ke imi ia la kahi ou e make ai, ma ka hoaoia ana e hoohewahewa mai ko makuakane ia oe. Nolaila, e hele oe me ka makaukau ao keia mea, me ka malama paa loa i ka pahikaua, no ka mea, malaila no e ike mai ai ko makuakane ia oe.”
No keia mau olelo a ka Pilikua, ua hoomaikai aku la o Abeona iaia, me ka ae aku e hoolohe i kana mau olelo.
Mahope iho o ka akoakoa ana mai o na kanaka o Abeona, a me ka lohe ana i na mea kupanaha i halawai mai me Abeona, ua kau hou aku la lakou maluna o na moku a holo aku la.
He mau la lehulehu wale ko lakou nei holo ana me ka maikai o na mea a pau, a hiki wale i ka ike ia ana o na puu hauliuli o ka aina a lakou e imi nei. I ko Abeona nana ana aku ia oka o ka aina, aku kona aina hanau.
Hookomo aku la na aumoku o Abeona ma ke awa a kuu ia iho la na heleuma ma kahi ku o na moku, a ua ike ia mai la e ka poe o uka ka welo aku o ka hae alii o Abeona a kona kupuna i makana mai ai iaia.
I ka lohe ia ana iuka o ka aina o Abeona keia i hele mai e imi i kona makuakane, aia hoi, ua piha mai la na wahi a pau i ka poe makaikai, me ke ake nui e ike mai i ke kino o ka mea nona ke kaulana i lohe mua ia mai kahi pea o ka aina a hoea i kahi pea.
Ua lohe ia e na mea a pau ko Abeona hiki ana mai, koe wale no kona makuakane, aole loa oia i lohe iki, no ka mea, ua huna loa ia mai iaia mai e na keiki a ke kupua, oia hoi kona mau luna aupuni imua o kona alo.
I ka makaukau ana ona mea apau, aole no i hoolohilohi iho o Abeona, aka, lele mai la oia iuka maluna o kona waapa alii, i ukali ia me ka hanohano nui e kona mau hoa alokai. I ka lele ana mai iuha, ua hiki ole i na kanaka ke umi iho i ko lakou mahalo a me ka hauoli. Ua hoike aku la ko Abeona kulana a me kona mau hiohiona imua o lakou i ka oiaio o ka mea i lohe mua ia nona, he koa ikaika, a he ui nani o ka oi loa.
Lohe aku la ka Moi e noho ana maluna o kona noho alii i ka ne o na leo, me he la e haehae ia ana na ao o ka lewaluna i kau a mea o ka nui o ka hauoli o na kanaka i ka ike ana’ku i ka ui o ke aupuni-Terogina, ninau ae la ia.
“Heaha keia paiakuli i pae mai nei a ano naueue na paiapaa o keia halealii?”
“He powa e ka Moi, ua holo mai nei ma ka moana mai me ka manao ino e lawe ae i kou ola a lilo iaia kou kalaunu,” wahi a na keiki a ke kupua.
No keia mau olelo, ua piha loa’e la ke alii i ka inaina, a ua kauoha ia’ku la e hoomakaukau ia na mea apau no ka pepehi ana a keia kanaka ino nui wale.
I keia manawa, ua hiki mai la o Abeona i ka ipuka o ka pa alii, a me ka maalea nui loa, ua miki e aku la no ua mau keiki nei a ke kupua a halawai aku la me Abeona. Me ka mimo aka a me na wali, lalau aku la i ka lima o Abeona a aloha aku la.
“E ka haku alii o makou,” wahi a laua, “ua hauoli nui kou makuakane i ka lohe ana no kou hele ana mai nei ma kau huakai, e hoike ana i ka nui o kou aloha iaia, a nolaila, i hele mai nei maua e haawi aku ia oe i ka hookipa aloha ano. Aka, mamua o kou hele ana’ku e ike iaia, ke noi aku nei maua ia oe e huna oe ia oe iho, mai kamailio aku ma ke ano he keiki nana, i hoomaopopo ia aku ai ka mau o kona hoomanao no kana keiki mamuli o na hiona la.”
No ko Abeona manao ole no na hana ino a keia mau kanaka, ua ae aku la ia me ka manao maikai.
Hoi hou aku la laua a hei aku la i ka Moi i na olelo hoopunipuni, i hakuepa ia me ka nui o ka inaina ia Abeona.
“I aha la uanei ka’u hoopai e kau aku ai maluna o keia kanaka manao ino ia’u,” wahi a ka Moi, “oiai, o ke kipi o keia kanaka he hewa nui loa ia.”
“E hookipa mai iaia, me ka maikai a me ka oluolu,” wahi a ka luahine kupua, “a e noi aku iaia e inu i ka waina o ke kiaha a’u e haawi aku ai, a e pau no auanei kona mau manao ino ia oe, e poina ana oia i na mea a pau oia ano, a e hoi mai na maneo maikai a aloha.”
Puni aku la ka Moi i neia mau huaolelo maalea nui a wale a ka luahine, a kii ia aku la o Abeona a hookipa ia mai la imua ona. Maluna o ke pakaukau imua o ke alo o ke alii e ku ana ke kiaha waina.
I ke komo ana mai o Abeona iloko o ka rumi alii, hookahi wale no mea imua o kona noonoo, oia hoi ka Moi aoo me kona lauoho hina. Ike aku la keia e noho mai ana ua Moi nei maluna o kona noho alii kiekie, ke kalaunu daimana ma kona poo, a ma kona lima akau e paa ana i ke kookoo hailona o ka mana alii. Ike aku la no hoi o Abeona me ke kaumaha o kona manao i ke ano nawaliwali o kona makua, me he la ua kau ia aku maluna ona na aumaka kaumaha ; me he la o kela a me keia makahiki o kona ola ana he mau tausani paona ke kaumaha, Haule ina________ waimaka o ke kaumaha i awili pu ia me ka hauoli ma na papalina o Abeona, no ka mea, ulu ae la ka manao luuluu iloko o kona puuwai no ka ike ana aku i kona makua ua hele a palupalu ; a me ka manaolana e lilo oia i kokua no kona mau la hope o ke ola ana, i hilinai mai ai kona kino palupalu iluna ona, a nana e kaupale ae i na pilikia e kau aku ana maluna ona, a e hoohauoli aku i kona manao mamuli o kana mau kamailio ana aku iaia. He mea i maopopo a i paa hoi i ko Abeona manao, o ka lawe ana mai o ke keiki i ke aloha o kona makua a komo iloko o ka puuwai, he mea ia e hoolilo hou ia ai ka manao kahiko o ka makua i mea opiopio, a pela oia i manao ai e hana aku i kona makua.
Me ke kapuai maloeloe a me na maka e haka pono aku ana i kona makua i hele mua aku ai o Abeona a ku iho la malalo o ka nohoalii, me ka manao e pane aku, aka, ua ulu mai la ke aloha, a moni hou ia aku la na huaolelo ana i manao ai e pane aku.
Ike mai la ke kupua i keia mau ano e o Abeona, a pane koke ae la i ke alii, me ka leo hawanawana i lohe ole ia’ ku ai.
“Ano e ka Moi, ke ike aku nei anei oe i ke ano pioo o keia kipi? No kona ike iho iloko ona no kona hewa, ua piha loa ia ae la kona kino me ka haalulu a ua haalele mai la kona leo a hiki ole ke pane mai. Heaha la kou mea e ae aku nei e ola loihi oia? E wiki! e haawi ‘ku i ka waina!”
Aole nae i hoolohe aku ka Moi i keia mau huaolelo, no ka mea, ua hoomaopopo aku la ia i ke kulana o keia kanaka opio, a me he la ma kona ano a pau, he mamo oia na kekahi alii. Aia ma na hiona o keia alii opio, he nanaina kiekie, a ma kona mau ano a pau, ua hiki ole i ua alii nei ke ae aku e lawe i ke ola o ka opuu akahi no a mohala ae.
Hoomaopopo mai la ke kupua i ke ano nawaliwali o ka manao ka Moi, a paipai hou mai la no me na olelo akamai a piha i ka maalea ; a no ka ikaika loa o kana mau koi ana, ua punia ia aku la ka manao o ua Moi nei. Nana mai la oia me ka hiohiona i piha i ka inaina, no ka mea, ua puni io aku la kona manao he kipi io o Abeona, a pane mai la me na huaolelo maalea a ke kupua.
“E ka kanaka opio,ke haawi aku nei au i na hookipa manawalea ana ia oe. He mea hanohano nui i ko’u manao ka hoike ana aka imua o kekahi opio koa e like la me oe i na hookipa aloha ana o ko’u halealii nei. E oluolu oe no’u e anu i ka ia waina, oiai, o ka hoike piha keia o ka manawalea o ko’u aupuni: a aole no hoi he loaa wale, no ka mea, he kokaikahi loa ka poe e pomaikai ma ka loaa ana o keia waina ia lakou.”
Haawi mai la oia i ke kiaha, a lalau aku a o Abeona. Mino aka iho la ke kupua me kana mau keiki manao ino, me ka manaolana e inu ana o Abeona, a e make koke iho ia.
“Imua ou e ke alii ka Moi, ke lawe mai nei au i kau mau hookipa manawalea ana pau me ka hiipoi ana, aka, o ka mea a puu makuahine aloha i papa hope loa mai ai aole e hoopa i ko’u waha, e ka Moi, e kala mai ia’u, aole loa e hiki ia’u ke ae aku, aole loa a haulehia mai kou inaina maluna o kau kauwa nei, a pau hoi ao’u hanu ana i ke ea maikai o kou aina nei.”
No keia mau huaolelo a Abeona, ua komo hou mai la na olelo a ke kupua loko o ka pepeiao o ka Moi, a piha loa a’e la ia me ka inaina.
“E inu oe ano!” wahi a ua Moi nei ka inaina.
“E kono mai ana anei oe ia’u e inu aku i keia waina me kou lohe mua ole i ka’u mau olelo? E ae ana anei oe e ke alii e uhai au i ka hoohiki paa a’u i lawe ai malalo o na hoomaikai piha ana a ko’u makuahine aloha ? E makemake ana anei oe e hana au i ka mea a’u i makemake ole ai e hana? Pehea la oe e olelo ai he hookipa aloha ana keia?”
Ia manawa kauoha ae la ua Moi nei i ua koa e lalau mai ia Abeona a e lawe poke aku iaia a e pepehi a make. I ka aohe ana ona keiki a ke kupua, huki koke ae la laua i ka laua mau pahikaua a holo mai la me ka manao e lawe oio ia __el, aka, e like me ka hikiwawe o ka imo ana o ka maka o ke tiga lele kuahiwi, a me ka hulali anapa o ka uwila o ka inaina ona onohi o ka liona o na waoakua o Benegala, pela no ko Abeona hiona ia manawa.
Huki ae la ia i kana pahikaua a wili aku la imua o lakou me ka pane ana’ ku.
“O ka mea mua o oukou e hoopa mai ana ia’u, e lawe koke no oia i ka hua o ka make a na ke aloha lani e kokua mai i ko oukou hopena.”
Huli ae la ia a kamailio aku la i ka Moi.
E ka Moi, ano ke kala aku nei au no kau mau olelo ia’u, oiai, he mau kumu nana i alakai ia oe e hana i ka mea au i ike ole. Ano, e kauoha aku oe i kou mau koa e malama i ka maluhia o kou alo, a e hoolohe mai i ka’u mau olelo.
Piha loa ae la na mea a pau i ke kahaa, a pioloke ka manao o ka Moi. No ke ano paa loa o ko Abeona manao, a no ka oolea o kona mau maka, ua ae koke mai la ka Moi i ke noi a Abeona ; a i ka maluhia ana o na mea apau, ua ku aku la o Abeona a pane aku la imua o ka Moi.
“He mau la lehulehu i hala ae nei, ua haalele aku la au i na aekai nani o kuu aina aloha, a me ko’u makuahine a me ko’u kupunakane aoo, no ka hooko ana i ka huakai a kuu manao i iini ai mai na la opio mai o ko’u ola ana. Me ka puuwai kaumaha au i haalele aku ai i ka makua aloha nana au i hiipoi, aka, no ka nui o ko’u manao no ka’u mea i manao ai, ua pale ae au i na kaumaha a me na pilihua o ko’u manao. Ua maalahi ka’u huakai, aole no i ulu mai na kumu e hookuemi hope ai i ko’u mau manaolana, a hiki wale no i ko’u kipa ana mai ma na aekai okou aupuni nei.
O keia kahi a’u i manao ai e maha, o keia ka’u wahi i manao ai e lanakila, a ianei hoi au i iini ai e loaa ka’u mea i imi ai, ke kumu hoi o ko’u haalele ana aku i kuu makua aloha. Aka, ua kahaha wau i ka loaa ana mai o na hookipa kupanaha mai ia oe mai, ua hoomanawawanui no nae au. O ka mea nana i hoopiha i kou naau me ka wahahee a me ka inaina, ka mea nana i hookaumaha i kou mau la aoo, a o ka mea hoi e ake nui nei e make oe, oia kela luahine e noho mai la me ka hookamani nui, a ano, e make oia ia’u, no ka mea, owau no keia o kau keiki o Abeona, ka mea au i hooilina ai i keia pahikaua.”
Lele aku la o Abeona me ka manao e uhau aku a make ka luahine, aka, lohe aku la nae ia i ka leo o kona makua i ke kahea ana mai.
“E kuu keiki, e kuu Abeona, e kali ka inaina, a e haawi mai i ke aloha,” a uwe leo nui ae la ua Moi nei me ka piha i ke aloha. (Aole i pau.)
PAPA HOIKE MANAWA
NO NA
Mea Kaulana iloko o ka Moolelo
Hawaii.
1804, Manao hou o Kamehameha e holo e kaua ia Kauai, a hoomakaukau iho la oia i kekahi a u moku kuna he 21 ka nui, aka no ka pahola koke ana mai o ka mai ahulau i kapaia he okuu, nolaila ua hoopau wale ia kela manao.
1804, Make o Keeaumoku ka makuakane o Kaahumanu.
Lilo o Kanehoa i Kiaaina no Hawaii.
1809, Holo mai o Kaumualii ka Moi o Kauai, e ike ia Kamehameha ma Oahu, a haawi mai la i kona mokupuni no Kamehameha. Mai ia manawa mai ka hlo ana o keia Paeaina i hookahi aupuni, malalo o Kamehameha I.
1810, Aperila, make o Olohana.
1812, Hoomakaia ke kukulu ana i ka pa o Kiholo ma Hawaii.
1814, Maraki 17, hanau o Keopuolani ia Kauikeaouli (Kamehameha III) ma Kailua, Hawaii.
1815, Hiki mai na Rukini a noho ma Kauai.
1816, Hanau o Keopuolani ia Nahienaena.
Hoomaka o Kalanimoku i ke kukulu ana i ka papu ma Honolulu, a paa no i kekahi makahiki ae.
1818, Feb. 9, Hanau ka Mea Kiekie Ruta Keelikolani.
1819, Mei S, make iho la o Kamehameha I ma Kailua, i ke 66 o kona mau makahiki, a lilo ae la ka nohoalii ia Liholiho (Kamehameha II.)
Okatoba, hoohiolo o Liholiho i na kapu kahiko ma ka po o Kukahi, ma kona paina pu ana me na wahine.
1820, Ianuari, ala mai la ke kaua kipi no ka hoohioloia ana o na kapu kahiko, a ua hooukaia ke kaua ma Kuamoo a pela hoi poe alakai kipi i ka luku ia, a ua auhee aku la ka poe i hahai mamuli o lakou, a ua haawi pio mai hoi kekahi poe.
Maraki 30, ku mai la oa Misionari mua ma Kailua, maluoa o ka moku Tadaio mai Bosetona mai.
Aperila 18 pae mai la na Misonari mua ma Honolulu.
Iulai holo a ku la o Wini a me Mr. Raukeke ma Kauai.
Dek. Komo maila ka moku okohola mua loa o Mary, ma ke awa o Honolulu, o Alani ke Kapena.
Hoomaka ka Moi Liholiho i ke kaahele ana i na mokupuui, ma Maui ka mua a i Oahu a me Kauai.
1821, 15, hoolaaia ka luakini mua ma Honolulu.
Pae mai ka huakai Rukini imi aina, ma keia mau mokupuni.
1822, Jan 7, hoomaka muaia ke pai palapala ma keia paeaina : a na ka Moi Liholiho i pai ka pepa mua loa.
Aperila 15, pae mai o Eliki o ka Misiona ma Tahiti, a meia pu mai he elua mau Misionari no ka Ahahui ma Ladana, maluna mai o ka mokukaua Prince Regent, he makana na ka Moi Kini Keoki o Enelani ia Liholiho.
June 26, puhiia i ke ahi he 102 mau akua kii, malalo o na kauoha a Kaahumanu.
Iulai 4, malama muaia ka hauoli ana ma Honolulu nei, no ka la i Kuokoa ai o Amerika mai ka Mana aku o Beritania.
Aug, hoomakaia ka oihana mare Kristiano mua loa ma keia paeaina.
Aug. 22, hoi aku la o Eliki a me kona mau hoa no Tahiti.
1823 Feb. 4, hoi hou mai o Mr. Eliki a me kona ohana mai Tahiti mai.
Aperila. 23, pae mai na Misionari hou ma ka moku Tameza mai Nu Havena mai, o ka lua ia.
Mei, 31, Hookahuaia ka oihana Misiona me Lahaina.
Sept. 16, make o Keopuolani ma Lahaina, i ke 45 o kona mau makahiki.
Nov. 27, holo ka Moi Liholiho a me ka Moiwahine Kamamalua Pelekane, maluna o ka moku L”Aigle, a me laua pu hoi kekahi poe ukali, a waihoia iho la ke aupuni malalo o ka hooponopono ana a Kaahumanu.
1824. Maraki, Make o Keeaumoku ke Kiaaina o Kauai.
Mei. 22, pae aku la ka huakai Alii ma Potamata i Enelani.
Mei. 26, Make o Kuamualii ma Honolulu, ka Moi mua o Kauai. Kukuluia ka oihana Misiona ma Hilo.
Iolai S, make iho la o Kamamalu ma Ladano, a ma ka la 13 no hoi oia malama, make aku la ka Moi Liholiho.
Aug.8, hoomaka ke kaua kipi o Humehume ma Kauai, a pepehiia o Kiaimakani, kekahi o na alakai kipi, a pau aku la hoi i ke auhee kona poe.
(Aole i pau.)
MAIKAI KA HOI KA PAPA
A ME
KA LAAU O KOU HALE!
NO HEA LA
KAI NO HOI NO KAHI O
WAILA MA
Nana aku no hoi ia la
Ohi ka Io o ka Laau o Makawao
I ka ua mea hoi o ka nani o
Na PAPA ! Na PAPA!!
A ME
NA PONO KUKULU HALE
O NA ANO NO A PAU.
Aia ma ke kihi o na
ALANUI PAPU me MOIWAHINE !
HONOLULU
MALAILA E LOAA AI
E LIKE me ka MAKEMAKE
NO KE
KUMUKUAI MAKEPONO LOA!
PAPA, PAPA, PAPA,
Na Papa Huluhulu,
Na Papa Manoanoa,
Na Papa i kahiia,
Na Papa Kepa,
Papa Hole Keokeo,
Papa Hole Ulaula.
NA LAAU, NA LAAU!
Na Kau,
Na Kaola,
Na Aaho,
Na Molina,
Na Peapea,
Pine Huluhulu,
Pine i kahiia.
NA PAPA a me na Laau Ulauia!
Pili ulaula,
Pili Keokeo,
Pani Puka,
Pani Puka Aniani,
Ipuka Aniani,
Puka Olepelepe.
PENA O NA ANO A PAU:
Hulu Pena mai ka Liilii a ke Nui,
Aila Pena,
Aila Hoomaloo,
Waniti, Pate.
NA LAKO O KELA A ME KEIA ANO!
Na Ami Puka Hale,
Na Ami Puka Pa.
ANIANI!
Pepa Hale a me na Lihilihi
E LOAA NO MALAILA.
PAAKAI HELU 10 KAKAAKO me PUULOA.
No ke DALA KUIKE, e loaa no na mea a pau i haiia ae la, no ke Kumukuai Emi loa. O na kauoha a pau mai Hawaii a Niihau, e loaa’ku ana ia lakou, e hooko koke ia no ia me ka lawa pono.
E Kipa Nui Iiaila, i ike i ka Oiai o