Ka Nupepa Kuokoa, Volume XVII, Number 1, 5 Ianuali 1878 — Ola nei Makapehu. [ARTICLE]

Ola nei Makapehu.

MR. LUNAHOOPONOPONO: Aloha kaua:Ma ke kakahiaka nui o ka Poaha i kunewa iho la, la 13 o Dek. ike ia aku la ka Noio Aukai hou o ka moana, ka mea nana i hehi mai ke kaiholo o Kaleponi, oia ka mokuahi Likelike, e kaalo ae ana ma ka lae hia mau i ka makani o Hoolehua; a hekau ae la i ka hoe, lohe nui ia aku la na leo ke-lo! me ka leo hauoli kupinai e hooho ana, "Eia o na Lani-eha-i-ka-moku!" Aohe i upuupu iho, akoakoa piha loa aku la makou ma ke awa, me he la, eia makou a pau i Ainahou e nana ana i ka hono o na moku. A owau hoi, he waimaka kai hoopulu iho ma ko'u mau papalina no na kukai ana o na manao o loko. Aia maluna o kona oneki ke keiki lalawai o ka aina mauna, oia Samuel P. Parker, a me ke'lii o ka malu Hekuawa o Nawaiehu, ka Hon. H. Kuihelani. A i ka pili ana'ku o ka waapa o uka nei, o laua na mea i lele mai i uka nei; a launa ma ka home aekai o J. H. Napela no na minute pokole, a malaila makou i puili pu ai i na lulu lima aloha ana me laua; me ka i iho o ko'u manao, ola nei makapehu nui! O na kukai ana me ka oluolu. A mahope iho oia manawa i hoolei ia mai na puolo manamana kikoola he bipi no keia awa, he 75 ka nui; a na na nalu nui i ulupa mai a kau ana i Kapua ka auwaa panana, iluna o ka puu pahoehoe; a ua kalua koke ia iho la kahi mau bipi no makou, e ole ia, ola nei makapehu ia o keia mau la kai ino o ka hooilo, i na io bipi momona o Maunakea. A ma ka hora 2 p.m., i haalele mai ai ka mokuahi Likelike ia Kalaupapa nei, o Ainahou ka ihu. Me ke eehia haalulu napenape o ka houpo i ke aloha, i puana wale aku ai au, oiai ka mahu e hana ana i kana hana o ke kue o ke oi i na epaepa, penei: "E lawe oe iko makou aloha a haawi aku i ke Capitala hanohano o ke Aupuni Hawaii, me ka pahola pu aku, "i Good-bye ia mai nei oukou e ka lahui o ke Aupuni Poepoe." Me ka welina. D. PUNA. Makanalua, Molokai, Dek, 18, 1877.