Ka Nupepa Kuokoa, Volume XVI, Number 41, 13 ʻOkakopa 1877 — Page 4
| This text was transcribed by: | Jo Fraticelli |
| This work is dedicated to: | In Memory of Joseph Kanakahelela Goo |
Ka Nupepa Kuokoa
KE KILOHANA POOKELA NO KA LAHUI HAWAII.
LAND AHEAD!
Golden Sunbeams, p. 71.
1
Aina e! he aina uli
Ke hoea mau o mai;
Paapu i na hua nani,
Kahe mau ko ia ‘la wai.
Cho. Aia la! ke awa e!
Ane’ komo a maha ‘e.
Kuu na pea, pae ano,
Pau ka ino, malu mau.
2
Holo aku, na kokoke,
Ikeia ka poe maikai;
Kani no na lina lani,
Paipai mai e wiki ae.
Cho. Aia la ke awa e, &c.
3
Ku ku ae na kimi lani,
O mai no na lima e;
Loheia, na leo nani
Mai ia aina uli mai
Cho. Aia la ke awa e, & e.
4
Nana ea, a hauoli;
Ane ku a pae mao,
A hala ae ke kai halulu,
Kai pii a ooloku.
Cho. Aia la ke awa e, & c.
5
Eia au la ma ke awa,
Kuu ka heleuma e,
Opiopi i na pea,
Lele ae i kahakai.
Cho. Aia la ke awa e, & c.
6
Eia au me na anela
Ma ka aina uli e;
Pau kou eha; mililani,
Maha, ola, pomaikai.
Cho Aia la ke awa e, &c.
HAWAII.
HAAWINA KULA SABATI.
HELU 4.- SABATI, OCT. 28.
KUMU HANA-Paulo imua o ka ahalupakanawai.
PAUKU NBAIBALA-Oih. 23:1-11.
Haka pono mai la o Paulo i ka ahalunakanawai, i mai la, E na kanaka, na hoahanau, ua noho kupa wau me ka lunaikehala maikai wale no i ke Akua a hiki mai nei i keia la.
2 Kena ae la ke kahuna nui o Anania i ka poe e ku kokoke ana io na la, e pai ia ia ma ka waha.
3 Alaila, i aku la o Paulo ia ia, E pai mai no hoi ke Akua ia oe, e ka paia i hookeokeoia.
Ke noho nei anei oe e hooko mai i ku kanawai ia’u a ke kena mai nei anei oe, e paiia mai au ma ka mea ku ole i ke kanawai.
4 Olelo mai la ka poe e ku ana ilaila. Ke olelo ino nei anei oe i ke kahuna nui o ke Akua?
5 I aku la o Paulo, E na hoahanau, aole au i ke, o ke kahuna nui ia. No ka mea, ua palapalaia mai, Maai olelo hoino aku oe i ke alii o kou poe kanaka.
6 A ike aku la o Paulo, he poe Sadukaiokekahi o lakou, a he poe Parisaio kekahi, alaila hea aku la ia ma ka aha lunakanawai, E na kanaka, na hoahanau he Parisaio wau, he keiki na kekahi Parisaio; a no ka manaolana i ke alahouana o ka poe make, ua hookolokoloia mai nei au.
7 A i kana olelo ana pela, kuee iho la ka poe Parisaio, a me ka poe Sadukaio; a mokuahana iho la ua aha kanaka la.
8 No ka mea, ua olelo mai ka poe Sadukaio, aole alahouana, aole awela, aole uhane; aka, o ka poe Parisaio, hooiaio no lakou i keia mau mea elua.
9 Nui loa iho la ka awa; ku mai la na kakauolelo no ka poe Parisaio, hoopaapaa ikaika ae la lakou, i ae la, Aole loaa ia makou ka hewa iloko o keia kanaka. A ina he uhane, a he anela paha i olelo mai ia ia, mai kue kakou i ke Akua.
10 Nui loa iho la ke kuee, no ia mea, makau ae la ka lunatausani o weluwelu o Paulo ia lakou. Kena ae la ia i ka poe koa e iho ilalo, a e kaili mai ia ia mailoko mai o lakou, a e alakai aku ia ia iloko o ka pa kaua.
11 A ia po iho, ku mai la ka Haku imua ona, i mai la, E hoolana oe, e Paulo; no ka mea, e like me kou hoike ana aku’ia’u ma Ierusalema nei, pela no hoi oe a hoike aku ai ia’u ma Roma.
Pauku Gula. ‘Aole nae i hiki ia lakou ke ku imua o ke akamai a me ke koikoi o kana olelo ana” Oih. 6:10.
Na mahele I Ka Paulo hoapono ana ia ia iho, me ka hana ino ia e ke kahuna nui.
2 Ka poe kokua ia Paulo me ka hoopaapaa nui ana.
3 Ka hoihoi ana o ka luna nui ia Paulo i ka pakaua.
4 Ka hoolana ana o ka Haku ia Paulo.
Mele-Him. 331. 8-6 Leo.
1
E ku, e ko’u uhane nei,
Hoolei i kou makau,
Hoomakaukau e naue ae
I kahi ola mau.
6
E naue wiwo ole ae,
E lana ka manao,
E kikoo ae i loaa mai
Ko luna aupuni mau.
Pule i wiwo ole kakou i ka malama ana i ke Akua.
No ninau a na Kumu.
E like me ke kauoha a Losia ka lunatausani, ua akoakoa na lala o ka Sanedesina, ka ahahookolokolo nui, na kahuna nui, na Sadukaio, Parisaio. Ua lawe ia Paulo mai ka pakaua, a hooku ia imua o keia aha nui Ka aha nui keia, nana e haawi ia Paulo mamua aku i ka mana e hopu, e hoopaa i na haumana a Iesu, a alakai ia lakou ma Ierusalema e hoopaiia. Oih. 9:2. Ehia la makahiki mailaila mai.
P. 1 Ka Paulo hoapono ana ia ia iho Haka pono, nana pono Paulo i na lala o ka aha, i ko lakou helehelena, i akaka iki ko lakou ano. Aia paha ilaila kekahi poe ana i ike ai mamua alai. Heaha na olelo mua a Paulo? He poe Iudaio lakou, nolaila, he poe hoahanau lakou nona. Pehea kona noho mua ana a hiki ia la? Ua noho e like me ke kuhikuhi ana o kona lunaikehala. Ua hoapono kona lunaikehala i kana hana mamua o kona huli ana, iaia e hoomaau ana i na haumana a Iesu. Kuhi oia ia wa, he mea hooluolu ia i ke Akua. Alakai hewa ka lunaikehala i kekahi manawa. Mahope o ko Paulo huli ana, hoahewa oia i keia hoomaau ana, a hoomau no i ka hana e like me kana ike ana, ua oluolu ke Akua ia hana.
P.2 Pehea i kena ai ke kahuna nui i kona lohe ana i keia mau olelo a Paulo? No ke aha? Mahea ka hana like?
P.3 Pehea Paulo i wanana’i no Anania? Ua hookoia anei? Ae, elima makahiki mahope iho a pepehiia Anania. Kapa Paulo ia Anania he paia aha? Heaha ke ano? He hookamani, keokeo mawaho, he ino o loko, he lepo e like me ka pa lepo, he le po ko’oko, na hamo ia nae me ka puna, a keokeo, Pehea Iesu ma Mat. 23:27? Pehea Paulo i hoahewa’i ia Anania? Pehea ke kanawai? Oihk. 19:35. Kan. 26:1 Io 7:51
P4. Pehea na kanaka e ku ana ilaila? Huhu paha ia Paulo no kana olelo ia Anania.
P5. A pane aku Pau!o pehea? He malihini Paulo ma Ierusalema ma ia wa, a ike ole ke kahuna nui o Anania. Ku ole kana hana i ke kahuna nui. Oiaio hoi, aole Anania ke kahuna nui ia wa Ke kahuna nui oia mamua, aka, ua hoopauia oia. Aole i paniia kola hakahaka. Nolaila, no ka nele, aole ke kahuna nui i ponoi, lawe Anania ia oihana ma keia aha hookolokolo. I ka lohe ana o Paulo, o Anania no ke kahuna nui, pehea kana olelo? Nana. Puk. 22:28, Kek. 10:20. Pehea hoi Ro. 13:1, 27
P 6-9. Ka poe kokua ia Paulo. Owai na aoao elua iloko o keia aha? I ko Paulo ike ana he poe Parisaio kekahi iloko, heaha kana olelo nona iho? He Parisaio Paulo ma keaha? No ia aoao oia mamua o kona huli ana. A mahope iho he Parisaio oia ma kekahi mau mea, ma ka manaoio ana, i ke ala hou ana, i ka anela, i ka uhane. Pehea na Sadukaio? He poe hoomaloka loa ka lakou Ka aoao hea ka i kokua ia Paulo? Pehea ko lakou kokua ana? Hoole, aole ona hewa, & c. Owai ka i hoole aole o Iesu hewa iki? Oluolu nae anei na Parisaio i ko Paulo hai ana, ua make a ala hou mai Iesu mai ka make mai? No keaha la ko lakou huhu ia ia no ia mea? No kana olelo, ua kokua lakou i ka pepehi ana ia Iesu ka Mesia, ke Alii o na Iudaio.
P10. Ka hoihoi ana o Lusia ia Paulo i ka pakaua. Heaha ka makau o ka lunakausani? Pehea oia i hoopakele ai ia Paulo? Owai ia pakaua? Anetonia ma ke komohana akau o ka luakini Makemake Lusia e hookolokolo pono ia Paulo, i akaka ka hewa, ka hewa ole, ane manao oia, aole o Paulo hewa.
P11. Ka hoolana ana i ko Paulo manao. Ma keaha ka Haku i hoolana’i i ko Paulo manao? Ua hookoia anei mahope? Heaha ko Paulo makemake no Roma? E ike, a haiolelo malaila.
Mele-Him 324 7-Leo,
1
Kan, e kau i kou luuluu,
Ma ka Haku, kou Iesu,
Oia no kou koo paa mau,
Ke hee ae na ao a pau.
2
Ma na ino pa huhu
E hoea kou Iesu,
A olelo olu no.
Owau no keia, mai makan.
Na Ninau a ke Kahu.
Na makua. Heaha ke kumu hana? Ua lawe ia Paulo mai hea mai? A hooku ia imua o ke aha? Heaha keia Ahalunakanawai? Ehia lala ka nui? He poe aha kekahi mau lala? A he poe aha kekahi? Aia mahea keia aha? Aia paha ma ka hale o ke kahuna nui oia hoi ka Peresidena
oia Aha. Owai ke kahuna nui o keia Aha? Ua hoopauia Anania mamua, pehea la oia i noho Peresidena ai ma keia Aha? Ma kesha i huhu ai. Auania ia Paulo a kena e paiia ma ka waha? Ma keaha ke pai ana? Ma ke kaniaa paha. Heaha ka hewa o Paulo? Heaha ka hewa o Anania?
Na keiki. Kapa Paulo ia Anania, he paia aha? No keaha? Owai ka i like pu me na pa lepo i pena keokeo ia? Pehea na haumana hele mai i ke kula Sabati me ka hoopaa i na haawina, aole nae i malama? Pehea ka poe pule, me ka hana hewa nae? Pehea ka poe haiolelo, a noho hewa nae? Ehia Anania, a oukou i lohe ai? Heaha ka hana hewa a ka mua? Oih.5;_ heaha ka hana maikai a ka loa? Oih.9;-Heaha ka liana ino a ke kolu? Kena e aha ia Pauolo? Ua ahaia Anania wahahee? Ua ahaia keia Anania mahope iho? Ma keaha oukou i like ai me na Parisaio? He poe Sadukaio anei kekahi i o oukou? Pela, ma ka nana’ku, sole i manao, he ao e ae, he ala hou, he uhane, he anela, he la hookolokolo. Eia ma keia ao ka manao nui.
Ke kula a pau. Ka lunaikehala, heaha ia? Pololei mau anei kona kuhikuhi ana? Pehea ka lunaikehala o na kanaka Hawaii mamua o ka hiki ana mai o ka ke Akua olelo? Ua alakai hewa i na kanaka-Kuhi na kanaka ua pono ka hoomanakii, me kana mau hana he nui wale. Eia ka, ua hewa. Ola anei ka poe i hahai mamuli o ko lakou ikehala ke kue kona kuhikuhi i ka ke Akua olelo?
Ma keaha i kalaia’i ko Paulo hoomaau ana i na haumana a Iesu? 1 Tim. 1:13. Pehea ka Iesu pule ma Luka 23:34?
Hai like mai i ka pauku gula.
Mele-Him. 438, 8-7. Leo.
Aia ma Ierusalema-
Pauku elua me ke kolu.
Pule i kokua ia ka poe haio’elo, me na kumu kula Sabati, & c.
Haawina no Nov.4. Oih, 24:10-25.
Ka Mooielo no na Kula Sabati mai ka wa kahiko loa mai.
HELU 3.
O ke kanaka nae i hookaulanaia no ka hookumu ana i na kula Sabati, oia o Robeta Raike. Ua hanauia oia ma Gloseta, Enelani, ma ka mak. 1735. A lilo oia i kanaka makua, nui kona aloha i ka poe iloko o na halepaahao. A hoomaka oia e ao ia lakou i ka heluhelu me ke kakaulima, a e ao aku i ka ke Akua olelo ma na la Sabati.
Hoomaka oia i ke kula Sabati mua ma ka pau ana o ka mak. 1781. Eia ke kumu o ka hoomaka ana. Hele oia i kekahi la e hoolimalima i paahana nona.
Loaa ia ia he poe keiki e walaau wale ana ma ke alanui- He poe naaupo, a auwana wale lakou Komo koke ke aloha iloko ona, a hoohiki oia, hoao e houluulu ia lakou iloko o ke kula ma na la Sabati. Imi oia i mau kumu na lakou, a loaa eha wahine, a hoolimalima oia ia lakou e ao ia poe keiki no ka hapaha hookahi no ke Sabati hookahi, o ke kahu ekalesia Mr. Koka, oia ke kahu o keia kula sabati mua 90 haumana. Mahope iho hooikaika loa Robeta Taike no na kula sabati, ma ka hele ana e imi, e paipai, e alakai i na keiki iloko o ke kula Sabati, a mau hoi koua noho kumu ana iloko oia mau kula. a hiki i kona wa i make ai ma ka mak. 1811. Ma kona luakupapau, kaoia he pohaku me ka inoa, Robeta Raike, ka mea naua i hookumu i na kula Sbati. Ua kakauia hoi maluna, he pauku Baibala Ioba 29:11-13.
Iloko o kona wa e ola ana, ua 300,000 keiki a oi aku i hookomo ia iloko o na kula Sabati ma Enelani. Mahope iho, ua ala mai na Bihopa, na kahuna, ka poe aloha e kokua, e hookumu i na kula Sabati.
Wilama Foka he kanaka kuai lole, oia kekahi mea ikaika loa no na kula Sabati. Oia hoi ka mea nana i hookumu i ka aha kula Sabati mua ma ladana, ma ke makahiki 1785.
Hana More, oia kekahi wahine aloha nui i na kamalii, a ikaika loa i ka houluulu ana i na keiki auwana wale iloko o na kula Sabati. Hoomaka oia i kana hana ma Enelani ma ka mak. 1789.
Ma kona ike ana, na piha loa na alanui o na kulanakauhale i na keiki ilihune auwana, naaupo, kolohe wale, aihue, hehi Sabati, hole ole i na halawai Sabati. Imi o Hana Mose i mau hoa wahine nona, a i ka hoomaka ana e houluulu i na keiki iloko o ke kula sabati, nui ke keakea ana, loiloi ana, hana ino ana, iwaena o na makua. Pau nae mahope, a lanakila lakou. Nui ka mahaloia no ka hoano hou ia o na keiki, Pau ka noho kolohe, noho maikai, ike i ka heluhelu, hele i na luakini.
O ka hoike kula Sabati mua, ma ka mak. 1786 ia ma Enelani, malalo ae o Robeta Raike. Ka hoike kola Sabati elua malolo ae ia o Hana Mose, me ka ahaaina hauoli pu ia, i kela, a i keia makahiki, ma kekahi la noa, 5,600 ka i akoakoa i kekahi wa. Ma ka mak. 1794, 1,000 keiki ilihune ka i ai pu ma ia ahaaina.
Mamua, ua hoolimalima ia na kumu, 17,-000 dala a ka aha kula Sabati o Ladana i haawi aku ai i na kumu. Mahope iho nae o ka mak, 1800, ua pau ka hoolimalima ana, a ao na kumu no ke aloha wale no.
Ua hoolaha ia ‘ku na kula Sabati mai Enelani aku. Ua hoomakeia ma Wale ma ka mak. 1789, ma Sekotia, ma ka mak. 1782, ma Farani, ma ka mak. 1825, mahope iho, ma Geremania, a ma na wahi e ae ma Europa. Aole nae i holopono Nui ke keakea mamua. Ane pau ke keakea ma ke kauwahi.
Na Kula Sabati ma Amerika. Ua hele no oa makua mua mai Europa a Amerika ma ka mak. 1620. He poe haipule no ka nui Ua halawai no ma na Sabati, a ua ao ia no na keiki ma na sabati ma na mea e pili ana i ka Baibala, ma na ni ekalesia, ma na himeni kamalii. Aole nae i hoomaka kokeia na kula Sabati. Ua Kukuluia ke kula Sabati mua ma ke mak. 1750, ma Peneselavanis. A ma ke mak. 1783, ua hookumuia kekahi kula ma Virginia. He aha kula Sabati i hookumuia ma Piledelepia ma ka mak. 1791. A na ia aha i hoomaka i kekahi mau kula Sbati me na haumana 2,000 a oi ae. He mau kula Sabati i hookumuia ma Rodilsna ma ka mak. 1797, ma Nu Ioka, ma ka mak. 1803, ma Masekuseta, ma ka msk. 1810, ma Besetona, ma ka mak. 1812.
He man Ahahui Sabati ka i kukuluia ma Nu Ioka, a ma na wahi e ae. A ma ka mak. 1824, ua kukuluia ka Ahahui Kula Sabati e ae, me na kula Sabati a pau e pili ana i na ekalesia Euanelio a pau me Amerika Hui. Ma ka mak. 1831, he 70,000 kumu 003, me 700,000 haumana, ma Amerika, a me Europa, 15,000,000 haumana paha, a hookahi paha miliona kumu.
Ma ka la 14 o Sepatemaba 1831, us malaniaia ka Jubile mua o na kula Sabati ma Beritania, a ma Amerika. He 50 ia makahiki mai ka hoomaka ana i ke kula Sabati mua ia Robeta Raike a hiki ia manewa. O ka la 14 o Sept. oia ka la hanau o Robeta Raike, a nolaila ka lawe ana ia Ia no ka la Jubile. He m’u halawai no ma ia la ma Ladana, a ma Nu Ioka.
He mele i hakuia c James Montgomery ka i himeni ia ma Ladana. Eia kekahi mau pauku
1
Ala’e na hoomaikai,
Oli na kuma nei;
E pili na haleluia e,
O na hosana e.
2
Puka’e he punawai,
He punawai liilii;
Ua kahe a lala ae,
A puni ke ao nei.
3
Ma Enelani no,
A ma na aina e,
Kausani, a kausani hou
Na kula Sabati.
4
Na hoa aloha e,
E hai hauoli ae,
Ka makahiki Iubile,
Kunia na kamalii.
NA KULA SABATI MA HAWAII NEI.
Ua hookumuia lakou ma Kailua, a ma Honolulu ma ka mak. 1820. Nui loa ka hemahema, Ma ka olelo Beritania mamua, ma ka hoomaka ana, no ka mea, aole maepopo ka olelo Hawaii. Aole ia i hoopopono ana i na hua, a kapaia na inoa A akaka na hua he 12, ka hoomaka no ia e pai i kekahi mau mea i na kanawai he 10, i kekahi mau pauku Baibala, ui Baibala. A ao ia na keiki, na kanaka makua, na lii, a ike i ka heluhelu, alaila holo ka hana ma na kula Sabati.
Ma na Kanawai he 10, ma na ui Baibala, a ma Mataio, ma Ioane, ke kula mua ana. He mau himeni kamalii kekahi.
Aka, ma ko’u noonoo ana, aia’ma ka mak. 1832 ka hoomaopopo loa ana i na kula Sabati ma keia Pae Aina. Ma ia makahiki ke pai ana i ka buke oia ka la mua, a hookomoia iloko o na kula Sabati, a maheleia na haumana i mau papa, papa kane, papa wahine, papa keiki, me ko lakou mau kumu pakahi Na kanaka makua ke hapa nui, na haumana ma ia wa a hiki i ka makahiki 1837, 38. E mi na kanaka makua, a mahuahua hou paha na keiki. A i keia manawa, ua mahuahua hou paha na konaka makua, a emi na keiki.
Na Haawina kula Sabati-Nui na wahi i ao ia’i mai ka mak. 1832 mai, ma na Aiokala, ma ka Ninau hoike ma na ui Baibala, ui ekalesia, Huli ano, Hoike i ko ke Akua ano, uikamalii, Heawina Baibala, Manelani, a pela aku a nui loa. Ma keia mau makahiki i hala aku nei ma na Haawina kula sabati i paiia iloko o na nupepa malaila ka nui o ke ao ana.
Ma kekahi makahiki mamua aku nei, ua hookumuia ka aha kula Sabati o Hawaii ma Honolulu, a malalo ae ona ka hooponopono ana i na kula Sabati euanelio a pau.
He mau kahu apana nui kekahi e like me ka nui o na Aha Euanelio, O I W M’o ke kahu nui o na kula Sabati ma ka Aha Euanelio o Hawaii Akau.
Ma ke kauwahi he mau hoike kula Sabati i kela i keia makahiki. A ma ke kauwahi, ua make ia mau hoike. He mau hoike hapaha no nae ma na kula a pau e ao ana ma na Haawina i paiia ma na nupepa.
Ma Amerika Hoi, a ma enelani, holo pono na kula Sabati. Mahuahua loa na haumana. Ikaika loa na kumu me na haumana i ka huli ana i ka ke Akua olelo.
Ma Hawaii nei, na holopono na kula Sabati ma kauwahi, a holopono ole ma kauwahi.
He mau lima akau na kula Sabati no na Kahu Ekalesia, a no na ekalesia. He mau koo, he mau kokua. Nolaila, pono i na kahu ekalesia me na luna ekalesia e hooikaika loa i na kula sabati, e kokua nui i na kahu kalu Sabati me na kumu, me na haumana, e hui a imi pu i na mea e pono ai, e lilo ai na kula Sabati i mau wahi e makaukuu ai na haumana no ka ekalesia, a no ka lani. L. LAIANA.
Moolelo o ka Ahaluna o ka Ekalesia Hui
Ia ma Kalapana, Puna, Hawaii
Sept. 26, 1877.
Akoakoa mai na lala o ka Aha ma ka hora 12 m. Eia na lala i hiki mai.
J W K Nuhi, J W K Nakanaka a me Kapule no Pohoiki.
LM Naahumakua no Opihikao.
Poohiwi no Kehena.
J Paakaula no Kaimu.
Kahuluhulu “
J Ili, S W Kaikuahine. S T Piihonua, J
A Kanaluku, Lota Kaaihili a me Olehulehua no Kalapana.
Wm. Kaloi a me Papapa no Kahaualea.
DW hoopii no Laeapuki & Kealakomo.
Ma ka o lima ana, na kohoia o J W K
Nuhi i Lunahoomalu, a o S T Piihonua i Kakanolelo.
Hoomakaia na hana me ka pule a ka Lunahoomalu. A na ka Lunahoomalu i koho i Ko@te Imi Kumuhana. Eia na lala. J Paakaaula, J W K Nakanaka, S W Kaikuahine a me D W Hoopii.
Eia na Kumuhana. 1 He 10 minute haipule. 2 Ka ‘noonoo i Kahu. 3 Ka hoike a na luna. 4 Ka hoolako o keia Aha i kona mau hemahema iho. 5 Hoike a ka Puuku a me ke Kakauolelo. 6 Koho hou i Puuku a me ke Kakauolelo. 7 Koho ana i Elele e hele ai i ka Aha Euanelio o Hawaii Hikina. 8 Ka manawa a me kahi e halawai hou ai keia Aha.
Mahope iho o ka heluhelu ia ana o na Kumuhana, ua ninau ka L H i ka apono o ko ka hale i na Kumuhana a hooholoia.
Kumuhana 1. Na lota Kaaihili a me R H K Pele i hoopiha i na minute haipule he 10 ma ka pule ana.
Kumuhana 2. Kuka ka Aha no kela Kumuhaua, a hooholo e kahea ia Rev. Mr. Nuuhiwa i Kahu, a hoopaa i kona uku he $ 120.00 i ka makahiki, a koho ko ka hale i Komite pane aku i ke Kahu i makemakeia, 7 lala o ke Komite. S W Kaikuahine, J Paakaula, Wm. Kaloi, D W Hoopii. Poohiwi. L M Naahumakua a me J W K Nakanaka.
Noi mai o S W Kaikuahine e lilo o R H K pele a me Jno Kailikini i mau hoa kuka no keia Aha. Hooholoia.
Kumuhana 3. Na na luna o kela a me keia apana pakahi i hoike mai i na hana ma ko lakou mau apana iho, a ua mahaloia ka lakou mau hoike.
Kumuhana 4. Kuka ka Aha no keia Kumuhana, a hooholo $ 3.50 no ka hooiako ana i kona mau hemahema.
Kumuhana 5. Ua mahaloia ka laua hoike no ka laua mau hana
Kumuhana 6. Ua kuka nui ka Aha me ke ko’iko’i no keia kumuhana, a hooholo e hoomau aku i ka Puuku mua a me ke Kakauololo, me ka uku aku ia laua 5 keneta no kela a me keia dala.
Kumuhana 7. Ma ka o lima ana, ua kohoia o J Paakaula a me J W Alapai i mau elele no makou e hele ia Aha.
Kumuhana 8. Ua hooholo ka Aha ma Kehena e halawai hou ai i ka Poaono hope o Dekemaba.
Noi mai o Poohiwi e heluheluia ka moolelo o ka Aha, aponoia. A na S W Kaikuahine hoi i’ noi hope mai e hoouna i 2 kope o keia moolelo ma na nupepa Hawaii a ielua, hooholoia. Hookuuia na hana me ka pule a L M Naahumakua.
E aloha auanei ke Kapena a me na sela o ka “Lahui Hawaii.” S T PIIHONUA.
Kalapana, Puna. H. Kakauolelo.
Lole Makepono ke Kuuike!
E LOAA NO IA MA KAHI O
KAKELA ME KUKE,
- E LAA NA –
AHINAHINA,
KALAKOA,
KEOKEO,
LEPONALO
Pena, Aila, Aniani,
Na Mea Piula,
Kopa, Aila Honua,
Aila Hoomaloo
Kui Kakia, Pakeke,
Tabu, Kaula, Noho Lio,
Hulu-palaki, na Pulumi
A he Agena no hoi no na Mokupuni o Hawaii nei no na
LAINAKINI-NAO,
LAINAKINI-MAOLI,
PALULE KALAKOA
ALAPIA, KELEPA, KILISA,
Na Lole kupono i ku wawae,
Palule Huluhulu,
Na Lole no ka hoohehelo ana
Lipine, lihilihi, a me ia mea’ku
- A HE
MAU MEA AI KAHI
Ka Palaoa, Kupaa,
Raiki, Pia, Hoohu,
Paakai, Hoaala,
Pia Kulina & c-
- A HE –
LAAU LAPAAU KAULANA LOA
A Dr. JAYMES.
Laau Kono,
Laau Hoomaemae Koko,
Laau Hoopau naio,
Penikila, Hoaale,
A me na Laau Hamo, a pela’ku
827 3m 839
Papa! Papa!
- NO-
ALLEN A ME ROBINSON.
Ua wehe ae nei mana i
PA KUAI PAPA!
-MA KA-
UWA’PO o PAKAKA.
Na Papa Ulaula o na ano a pau.
Na Papa Paina o na ano a pau.
Na Pili Hale Ulaula.
Na Pili Hale Keokeo.
Na Pepa Hoonani Hale.
Na Pepa Molina.
Na pena a me na Aila pena!
NA KUI O NA ANO A PAU!
Na Pani Puka a me
Na Pani Puks Aniani.
Na Pani Puka a me
Na Olepelepe.
Na lako kukulu Hale
- O NA ANO A PAU –
E Kuaina ma ke
Kumukuai Haahaa Loa!
O keia Makeke.
ALLEN & ROBINSON
Honolulu , Aper 13. 1876. 837 3m 839
Eia ma ka Hale Kuai o Wini!
NA EA,
NA OMAU AI,
NA KULA PEPEIAO
NA OMAU HAO BUKALO.
NA MEA ANO HOU A EMI,
Buke Pakeke Ili a me na Eke dala
Na lei Pilali,
Na Lei Eleele,
A me na mea e ae he nui wale.
E HAAWI MAKANA IA nua i kela a me
Kela mea i kuai a hiki i ka
ELUA DALA
E hele mai, e nana i kela mau mea maikai, a eloaa no e like me ka makemake.
Eia ma ka hale Kuai o
756 2 m WINI.
HALE KUAI MANUAHI!
NO KONA,
NO PUNA,
NO KOOLAU,
NO NAPALI,
NO MANAI
Eia ma koloa nei ka mea Hou ano e kupalanaha a e nane nui mai oukou e na mamo a
NOKALANIPO!
A e like i na moa maikai e kela a me kela ano, ma ka
HALEKUAI O PENI!
Ua makaukau oia e kuai aku I
Na Lole o na ano a pau,
Na Papa o na ano a pau,
Na Lako kukulu hale,
Na mea hana kamana,
Na mea mahiai,
Na mea ai, mai na ainaa e mai a me na mea a pau i makemakeia e ke
Kane, ka Wahine ame ke keiki-
Ke loaa mau mai nei kela mau mea ma kela moku kela moku, a no ka mea, ua hoopaeia mai ma Honolulu,
He au hou o ke Kuikahi!
Nolaila, e hiki ia’u ke haawi i keia mau pono ia oukou, ma ka kumukuai
Haahaa loa, i ike ole ia mamua aku nei.
E Lulumi mai a hoao!
FRANK BINDT.
Koloa. Kauai. Aperlia 14, 1877. 802 1 yr 853.
Kuai Haahaa Loa!
E KUAIIA aku no ma ke kumukuai haahaa, ma ka Hale Kuai o H.M. WINI,
Na Kula Pepeiao Ea a me na Kula kanikau, a me na kula e ae o kela a me kela ano.
Na Lei Kanikau no hoi a me na Lei e ae no e linohau ai o na Lede opioopio, e kiukohu ai ke nana aku i ke kau mai iluna. Na apo lima kanikani a me na mea e ae a pau no ke kumukuai haahaa loa. E wiki mai! 816
E.T. HALOLANI. LOIO!
EIA HE $ 20,000 E MAKEMAKE ANA E hoaie aku ma ka ukupanee haahaa loa mai ka $ 200 aku a pil ae ma ka moraki ana i na aina, Ua hoolimalima, moraki a me na hooilina, a he hiki iaia ke hoomaikai i na aina loaa ole na Palapala Sila Nui.
Hale Oihana, aie ma ke “Real Estate Exchange” lielu 31. Alanui Papa, Honolulu, malaila oia e loaa ai i na kanaka a pau, ina he mau ai ke kuai a hoolimalima ko lakou, a e hoopauia me ua uku ole 827 8 m 839
KUAI HOOEMI LOA!
MA KA HALE KUAI LOLE O
C.C. AKINA,
E ku ia ma kaiopihi, kupaia, Hawaii, he mau Lole Hou loa, ka makana o ke kuikahi Panai Like. Ua kupono no na i wa o ka makani Apap o ua aina haaheo nei.
He kamaaina no hoi i uluniu la oukou, no alia, e kuai manuahi aku no au me ka emi maialo o ke kumu lilo. He mau lole nani loa, he Nu Paikini, no ke au o ka Moi Kalakaua-Owau no o ko oukou makamaka olalo,
803 6m’ 823 C.C. AKINA.