Ka Nupepa Kuokoa, Volume XVI, Number 22, 2 June 1877 — Na mea hou o Olowalu. [ARTICLE]

Na mea hou o Olowalu.

E KA NUPEPA KUOKOA, Aloha oe; - Ma ka la 11 o Aperila, ua pau iho la kekahi hapa o ka mala ko o Olowalu nei i ke ahi; ua like me ka hapalua Eka a oi ka nui he ahi puhi kula na Manuela (paniolo). Ma ka la 10 o Mei nei, ua ike ia he kai mimiki maanei; ua like me 12 kapuai ka pii ana o ke kai ma kekahi wahi, a emi ma kekahi wahi. Ma ka la 13 o Mei nei, ua poni ia o P. Keaupuni i Kahu no makou, na Rev. J. B. Hanaike, me Rev. A. Pali me Rev. E. Kekoa i poni, o ka nui o na wahi kanaka i naue ae, ua like me 28. Nani ka mailuilu! Eia nae ke kumu, aole i hele ka Lunakahiko i hoouna ia i ka Ahahui Mokupuni o Maui, e hai i na kanaka e poni ia ana o P. Keaupuni. No ka mea, oia wale no ka i lohe i ka mea i hooholoia e ka Aha Lunakahiko. Me keia apana no hoi, he nui ka [ ] awa a me ka pepa, o kekahi kumu no hoi ia o hele ole mai ai na kanaka i ka la Sabati, Nolaila, na makamaka, na makua, na keikikane, na kaikuahine, maka palupalu, e ike, ua poni ia ae nei o P. Keaupuni i Kahu no kakou, e hoonaue mai; e haalele i na hana lapuwale. E ike ia kakou hookanaka, o ki pa hewa ke aloha auanei i ka puawa ; ka mea aole i kuli ae me oe e "Hawaii Ponoi." Ma ka la 14 o Mei nei, ua pa ikaika mai ka makani Hikina Akau, a ma ka la 15 ae, ua oi ae ka ikaika o keia i ko ka la mua a no ia makani, aole i holo ke Kilauea no Hawaii. Ua ku no ma Lahaina. Ma ka la 16, ua hoao ae ke Kilauea e holo i Hawaii, aka, no ka mau no o ka ikaika o ka makani, ua hoi hou ka paakai i Waimea. Ma ka la 17 ae, ua malie iho la ka makani, a ua holo aku no hoi o Kilauea no Hawaii. P. N. KAHAKUOLUNA-OPIO. Olowalu, Mei 18, 1877.