Ka Nupepa Kuokoa, Volume XVI, Number 17, 28 April 1877 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA KUOKOA, ME  KE AUOKOA I HUIIA.

 

THE HAPPY DAY.

Gospel S@ger p 101.

1.

La pomaikai e hui ai

Ma o ma kela ao,

E mele ae a hoomaikai,

A noho pu a mau;

A ike aku ia Iesu,

A launa oli ae

A ike i na hoa pu; -

La oli pomaikai

Cho.- La maikai, La maikai,

La maikai, La maikai,

I ka hui ma ke ao;

La maikai, La maikai,

La maikai, La maikai,

I ka hui po a mau, mau a mau.

2

La pomaikai e kau mai ai

Na lei olino mau,

A loaa mai na pama lai,

Na lole lani no,

A hui mau ia me Iesu,

A me na hoa nei,

Me na anela a mele pu,

A noho maemae e.

Cho. - La maikai, &c.

3.

La pomaikai e hui ai

E mele ano hou

Me na puali maluna'e,

A me na hoahanau.

Ke ola no ia mele hou,

Hooho oli ae,

Hooho no a mau a mau!

La oli pomaikai.

Cho – La maikai, &c.

Hawaii.

 

 

 

HAAWINA KULA SABATI.

HELU 7 – SABATI, MEI. 13.

            KUMUHANA. - Iehu, kona mau ano elua, ano maikai, ano hewa.

PAUKU BAIBALA – 2 Na Lii 10:20-31.

            20 I aku la o Iehu, E hoolaa aku i ka houluulu ana no Baala. A hoolaa aku la lakou.

            21 A hoouna aku la o Iehu i ka Iserae la a puni; a hele mai na kauwa a pau a Baala, aole i koe aku kekahi i hele ole mai. A komo lakou i ka hale o Baala, a piha loa ka hale o Baala mai kela aoao a i keia aoao.

            22 I aku la ia i ka mea nana i malama ke keena lole, E lawe mai iwaho i ka lole no na kauwa a Baala. A lawe mai no ia i ka lole no lakou.

            23 Komo aku o Iehu, a me Iehonadaba, ke keiki a Rekaba, iloko o ka hale o Baala, a i aku la i na kauwa a Baala, E nana oukou a ike, i ole maanei me oukou kekahi o na kauwa a Iehova, o na kauwa a Baala wale no.

            24 A komo aku la lakou e kaumaha aku i ka mohai, a me na mohaikuni, alaila hoonoho iho la o Iehu i na kanaka, he kanawalu mawaho, i aku la, O ka mea nana e hoopakele kekahi o na kanaka a'u i lawe mai nei iloko o ko oukou lima, e lilo no kona ola no ko ia la ola.

            25 A pau kana kaumaha ana'ku i ka mohaikuni, i aku la o Iehu i ka poe kiai, a i na luna, E komo iloko, e luku ia lakou; mai puka iwaho kekahi. A luku aku la ua poe la ia lakou me ka maka o ka pahikaua; a o ka poe kiai a me na luna hoolei aku la ia lakou, a hele aku la i ke kulanakauhale o Baala.

            26 A lawe mai lakou i na kii mawaho o ka hale o Baala, a puhi aku la i ke ahi.

            27 A wawahi lakou i ke kii o Baala, a wawahi hoi i ka hale o Baala, a hoolilo lakou ia mea i hale kiona a hiki i keia la.

            28 A luku aku la o Iehu ia Baala mai loko aku o ka Iseraela.

            29 Aka hoi o na hewa o Ieroboama ke keiki a Nebata, nana i hoolilo ka Iseraela i ka hewa, aole i haalele o Iehu i ka hahai ana mamuli o lakou, o na keikihibipi gula ma Betela a ma Dana.

            30 A olelo mai o Iehova ia Iehu, no ka mea, ua maikai oe i ka hana ana i ka poni ia'u, a ua hana aku oe i ko ka haie o Ahaba, e like me ka mea a pau ma ko'u naau, e noho auanei kau poe keiki maluna o ka nohoalii o ka Iseraela a hiki i ke kualua.

            31 Aka aole o Iehu i malama i ka hele ana ma ke kanawai o Iehova ke Akua o ka Iseraela me kona naau a pau; no ka mea, aole ia i haalele i ua hewa o Ieroboama, nana i hoolilo ka Iseraela i ka hewa.

            Pauku Gula. P 31. Hoopaanaau.

            Mele. - Him. 299. 7-6. Elua pauku.

            Pule pokole no ke kula i huli a mihi, &c.

No na Papa.

            O kekahi hapa o ka mok. 8, e pili ana i ka wi a me Gehazi me Hazaela paha, pono ke hookomoia mawaena o ka mokuna 4 a me ka 5. No ka mea, mamua aku no na akahiki wi 7. O Gehazi hoi, aole oia he lepera i ka wa e kamailio pu ana ke'lii Benehadada me ia. Ua hookaawaleia'ku oia mai na kulanakauhale aku ma ka mok. 5, no kona ano lepera.

            Ua hele Elisai ma Damaseko 8:7, no keaha la? no ka mai paha o Benehadada, no ka poni paha ia Hazaela i alii, i pani no Benehadada. Ua kauoha ke Akua ia Elia, I Na Lii 19:15 e hele i Damaseko e poni ia Hazaele i alii no Suria. Aole akaka, ua hele Elia, aka, ua haawi paha oia ia hana ia Elisai, a nana paha ia i poni. Aole nae i kakauia. Ke ano o Hazaela ka i kakauia. P 12.

            Mok 9:1.-Iehu, kona poniia'na i alii no ka Iseraela, ka hana i haawiia ia ia, kona hooko ana ia hana me kona kono ana ia Iehonadaba e hele pu e nana i kona ikaika  Heluhelu 9:1-13, 22-27. 30-35. Mok. 10:6-14. 15-19.

            P 20. Heaha ka Iehu kanoha? hoolaa, e hoakoakoa i aha la, i aha mohai na Baala. He aha hoomana ia Baala. Ua hanaia        anei pela? Heaha ka manao o Iehu? p 19.

            P 21. Hoouna Iehu me ke kauoha, e hele mai ka poe hoomana ia Baala mailoko mai o ka Iseraela a pau, i koe ole kekahi. He heiau nui loa paha ko Baala me kona mau lanai, na pa e puni ana.

            P 22. Heaha ke kauoha no na lole? na lole kahuna paha, lole keokeo, lole laa. Aia paha ia iloko o ke keena lole kahuna.

            P 23. Owai pu me Iehu ka i komo iloko o ka hale laa? Kauoha Iehu e hookaawale ia'ku owai? no keaha? Owai wale no?

            P 24. A komo na kauwa a Baala a aha? Ehia kiai a Iehu i hoonoho ai mawaho? Heaha ka olelo hooweliweli ia lakou?

            P 25. A pau ka mohai ana, kena Iehu ia poe kiai e komo a aha? Ua hana anei kela? A pau ia, hele aku la lakou ihea?

            P 26-28. Ua aha ia na kii o Baala? na kii laau paha ia i puhiia i ke ahi. O ke kii nui o Baala, he pohaku paha ia, ua'haia  ia? Pehea hoi ka heiau? a lilo ia i aha? Pau loa anei ka hoomana Baala ia Iehu?

            P 29. Ikaika loa Iehu i ka hoopau ana i ka hoomana Baala. Heaha nae kona hoomana?

            P 30. Pehea ko Iehova mahalo ana ia Iehu? Heaha ka pomaikai e loaa ana ia ia, nohea ia pomaikai? no ke ao nei wale no paha.

            P 31. Ka pauku gula keia, e hai paanaau mai. Owai ke hoohalike ana? Nana Roma 2:21-23

Mele.- Him 339, 6-8 Pauku 1,2,5.

Na Ninau a ke Kahu.

            1. Heaha ka mea i pau ai ka wi a nui ai ka ai ma kela Haawina 6? Owai ka i kauoha ia e poni ia Hazaela? Na Elia anei i poni? Nawai? Hiki anei i na kaula ke poni i ka poe kue, i na enemi e like me Hazaela? Pehea Saula? He enemi hoi ia mahope, nawai nae ia i poni? Nawai hoi i hoalii i na lii? Hai mai. Rom. 13:1.

            2. Owai Iehu? Kipi oia ia wai? Owai ka i kauoha mua ia e poni ia ia? Ua poni anei Elia ia ia? Nawai ia i poni? Na ke Akua i kauoha ia Elia. Na Elia i kauoha ia Elisai. Na Elisai i kauoha i kekahi haumana ana. Ua oleloia, na Solomona i kukulu i ka luakini, aole nae nana i kukulu me kona mau lima ponoi. Nana i imi i na mea e paa ai ka luakini. Pela Elia. Ia ia ke kauoha mua e poni ia Hazaela, a ia Iehu. Aole nae na kona mau lima ponoi i poni. Ua waiho nae oia ia hana ia hai, i kona mau hope. Kauoha Iesu i na haumana he 11, e hele i ke ao a pau, a hai aku i kana olelo. Aole nae lakou ponoi i hele aku i ne ao nei a puni. Ua waiho nae lakou ia hana i ko lakou nau hope. A pela ia i hookoia'i.

            3. Hai mai i na hana a Iehu i hana'i i hookoia na wanana no Ahaba, no Iezebela, no ko ka hale o Ahaba, no ka poe hoomana ia Baala. Ehia keiki i okiia'i na poo a laweia io Iehu la? A i kona ike ana, heaha kana olelo hoahewa ia ia iho, a hoapono ia lakou?

            4. Heaha ka hope o Iezebela? No keaha kona pena ana i kona maka, a aahu i ke kapa nani? Pehea ko Iehu kaena ana imua o Iehonadaba? He ikaika aha kona? Heaha ke kaulana no Iehonadaba, e pili ana i ka pualiinuwai. Heaha ka ke Akua i mahalo ai iloko o Iehu? Ua hemolele anei Iehu? Heaha ka pauku gula? me Rom. 2:21-23

            Na manao pili. 1. E hookoia'na na olelo a pau a ke Akua, Aole loa e haule ka mea hookahi me ka hooko ole ia.

            2. Aia no i ke Akua na mea, na kanaka, na lii, na mea a pau e hookoia'i kana mau olelo, kona mau manao a pau. Ia ia hoi ka manawa e hookoia'i. Aia a hiki mai ka manawa, alaila e hookoia, aole hoonala ia.

            3 Nui ka poe i like me Iehu, naau lua, no ka pono kekahi naau, no ka hewa kekahi naau. Ikaika ma ke kinai i ko hai hewa, hoomau nae ma ko lakou hewa iho.

            4. Mahalo ke Akua i ka poe ikaika i ka hooko ana i kona makemake no hai. Hoolea nae oia ia lakou iloko o ka lua ahi no ka hana'ole kona makemake no lakou iho.

            Mele.-Him. 487  7. Elua pauku

            Pule a hookuu aku.

 

 

 

Hoike a E. Bailey, ka Ele-

LE O KA PAPA HAWAII, NO KA

PAEMOKU O MAIKONISIA.

 

            No MAKALA. Ke moe nei na Mokupuni a Makala ma kahi nui o ka ua. Uliuli loa lakou. Nui kolaila laau, niu, ulu, hala, a nui no hoi ka hua ana. Ulu wale ka pia, a nui loa. He pae aina haahaa waie no – ma Arno wale no puka iki paha he puu me ka pohaku maoli. Aole nae au i ike maka – lohe wale no. He kalo ma keia mau mokupuni, aka, ia kakou he ape, aole he kalo. Ma na wahi haahaa iwaena o ka aina ku ka wai o ka ua; a malaila kanu ia ke kalo. Aole momona kolaila kalo i ka ai ana e like me ko Hawaii nei.

            O ka Lahui Makala, he ano e. Kainoa e nui loa lakou, a ikaika, a lehulehu no ka momona, a hua wale mai o ka aina. Aole loa! O ka hui pau loa o na kanaka o Makala, mai o a o, aole e oi mamua o ka 15.000; a manao kekahi he 10.000 wale no. Ma ka nui o ke kino, emi iki lakou malalo o ke kanaka Hawaii; a pela paha ka ikaika. Nui ka poe maimai, he pala, he mahuna, a pela aku. O ko Maikonisia a pau ke kakau i ka ili. Hoonui hoi ko Makala i ka puka kula pepeiao a nui loa – komo ka lima okoa o ke kanaka nui.

            Ma ka lalani hikina oia pae aina puu ia ka lauoho o na kane maluna o ke poo. Kapae iki ka olelo oia aoao, aoloe like loa me ka aoao komohana, aka, ua pau ia mau mea i ka hoikeike ia ma na pepa a Mrs. Kahelemauna.

            Ku mua makou ma Ebon, ka mokupuni ma ka hema loa o Makala i ka la 17 o Aug. Pae au iuka ma ka waapa o na misionari, a halawai me Mr. Snow ma a me Mr. Wini ma.

            Kalewa ka moku mawaho ia po – he po ino – a i ka la 18 komp ia maloko o ka lakuna. Halawai makou me na kanaka me ka oluolu, a me ke alii hoi, o Kabua. Halawai maloko o ko lakou halepule maikai i ka la Sabati. He hale lauhala mawaho, aka, maloko he papa hele maikai, ua halii ia i ka moena e like me ko Hawaii nei. He mau puka nui, aole aniani. O ka nui o ka hale 60x32 paha, a ua piha pono i na kaha; aole nae piha loa.

            Aahu ia kekahi poe i ka lole. a o kekahi he hapa lole, hapa aahu maoli. Maikai ke ano o ka halawai ana.

            Hoike ia ke kula nui; he kula keiki kekahi, a he kaikamahine kekahi, 60 ka nui o na haumana, holo maikai lakou ma ka ike, o Mr. Wini a me kana wahina, a me Mrs. Snow na kumu. He hale lauhala ka hale kula, kula nui ka hale, no ka mea, he la ua nui loa ka la hoike.

            Holo aku makou i ka la 22 o Augate. Ee mai o Mr. Wini maluna e kaapuni i na mokupuni o Makala i hoonoho ia i ke kumu.

            O Ieremia ma kekahi ee moku – e hele i kona kihapai ma Mile. I ka puka ana mawaho o ka lakuna, no ke keku o ke kowa, a haiki, a lauwili ka makani, a mimilo ke kai i ka holo ikaika o ke au, pili ka Hoku Ao i ka pukoa, a paa. Aka, lawe ia ke kaula nui ma kela aoao o ke kowa a hana paa ia i ke kumu niu, alaila, huki ia ka moku a iwaenakonu o ke kowa, a hoopaa ia i ka heleuma a hiki i ka manawa a ke au e huli ai iwaho; no ka mea, ia makou e huki ana i ka moku iwaena, ua huli ke au iloko, e like me ka mau i kela la keia la – elua huli ana iloko, a elua huli ana iwaho. A i ke ahiahi, ua huli hou ke au iwaho, holo loa makou, a i ka la 24 komo iloko o ka lakuna o Jaluij (Kaluiki.)

            Loaa malaila o Rev. D. Kapali; a malaila noho makou no kekahi mau la e halawai me na kanaka a me na haole.

            He halekuai nui ko Mr. Capelle&Co. maonei. Maanei hoi ko lakou hale noho; a maanei e holo aku ai ko lakou mau moku, elua a ekolu paha, i na mokupuni e ae o Maikonisia. O ka niu maloo – copea – ka mea kuai nui o na kanaka; a haawi aku ka haole i kela a me keia mea a ke kanaka i makemake ai.

            Holo aku makou i Mile i ka la 29. Mai ili makou i ka puka ana mawaho, no ka makani ole – ua pale ia ka makani e ka niu, e like me ia ma Ebon. Komo makou iloko o Mile i ka la 1 o Sept.; a halawai me Kaaialii, ka wahike kane make o Kahelemaunp. Ua nawaliwali no ia, a ua mai loa kana keiki uuku. Noho makou i ka la Sabati;  a ia la nui loa ka hana. Hoonoho ia o Ieremia i kahunapule a i kahu no ka ekalesia. Ewalu paa i mare ia; 30 ka nui o na mea i komo i ka ekalesia – 25 mamua. O ke alii kekahi i mare ia me kana wahine, oia hoi kekahi i komo i ka ekalesia.

            Haalele makou ia Mile i ka hora 2 1/2 o ka la 4 o Sept.; alaila, ee mai i Kaaialii, a holo aku i Arno, a kakahiaka pae maua maluna o ka waapa, kalewa ka moku mawaho, no ka mea, aole makemakk ke kapena e komo maloko, nolaila aole maua i noho loihi ma Arno; nana wale no i ke ano o ka hana, a i ke ahiahi. holo hou aku makou i Mejuro. O Anederea ka mea noho kumu ma Arno; he kumu Makala, aka, aole holo ka hana. He mokupuni nui keia, nui no hoi na kanaka. I keia wa, ua hele na kanaka ui i ke kaua ma Mejuro. Aole ekalesia ma Arno; aole kokua na kanaka i ke kumu.

            Komo makou maloko o Mejuro i ka la 6. Nui loa ka ua a me ka makani. Holo mai o Mr. Kekuewa i ka Hoku Ao maluna o ka waa liilii, inoino – ua nahae ka pea – Hiki mai oia me ka opili i ka ua. He ano maimai kona, aka ua oluolu ka wahine, o Miriama. No ka lilo nui o na kanaka i ke kaua, aole nui ka hana iwaena o lakou. He mau kaikamahine nae ka lauo e ao ai iloko o ko lauo eale iho. Ike au i na kumu laau i puka i ka poka i ke kaua ana.

            Holo aku makou i ka la 8 o Sept. a hoi hou i Jaluij; komo malaila i ka la 11. Lohe makou i ke kipaku ia o Kabua, ke alii o Ebon, e kona mau makaainana a me kekahi poe alii; a halawai makou maanei. Iwakalua a keu na waa nui o lakou ma kahakai e pili ana me ka pa o ka halepule. Elua la o ko lakou holo ana mei Ebon mai, a ekolu la o kekahi, me ka ai ole, a wai ole.

            Pae iuka o Mrs. Kahelemauna ma e kali i ka hoi mai o Holu Ao. Alaila, holo aku makou i Namerik i ka la 12. I ke ahiahi o ka la 13, pae maua me Mr. Wini iuka; a malaila moe a ao.

            Kalawe ka moku mawaho, no ka puka ole me ke kohola e komo ai.

            O Mataio ke kumu Makala ma Namerik, a ua maikai kana hana, 300 ka nui o na kanaka; 50 hoahanahu ekalesia mamua, a komo hou 12 i ko maua noho ana. Maikai na kanaka ma Namerick, he ano oluolu. Oleloia 100 tona ka nui o ke kopaa i loaa ma Namerick i ka makahiki hookahi. I ko makou wa malaila, aole i loaa ka niu ia makou, ua hookapu ia e ke alii, aole manao na alii i ka pono o ke kanaka; puni waiwai lakou.

            Haalele makou ia Namerick i ke ahiahi o ka la 14, a hui hou i Ebon. Malaila hoomakaukau o Mr. a me Mrs. Snow e holo i Kusaie e kali malaila i ka hoi ana mai o Hoku Ao mai ke komohana mai. Ee mai la laua a me Mr. Wini ma, a holo makou i Kusaie i ka la 16 o Sept. No ka maikai ole o ka makuni, 9 la o ka holo ana, a hiki makou i Kusaie i ka la 25 – Maikai keia mokupuni o Kusaie, uliuli loa mai ke kai a i ke kuahiwi. Maikai no hoi ke awa. He hale pohaku ka halepule a me ka hale kula. Ano e na kanaka, aole like me ko Maikonisia a pau. He pok karistiano lakou, 400 ka nui o na kanaka a pau. Nui lakou mamua, a i ka pala a me ka mai puupuu liilii, he hapa wale no e koe i keia wa. Nui na moku okohola i komo ma keia awa, a he moku e kekahi. Pau na kanaka i ke komo ole; aole ike ia ka aahu kahiko e kau ana. Haneri paha ka nui o na hoahanau ekalesia. O Likiak Sa ke kahu ekalesia. He kanaka naauao, a oluolu oia.

             Pii aku la au iluna o ke kuahiwi, maikai ka nana ana'ku a puni, 2.000 kap. wale no ke kiekie o kahi oi loa iluka, a ua paapu i na laau kiekie a hiki loa iluna, ma na wahi a pau. He mau laau hou kekahi, aole i ike ia ma na mokupuni haahaa. Ulu wale ka alani, a nui loa ka hua, aole nae ono, o ka alani kanu mai kahi e mai ka mea ono, aka, maikai loa ka hala kahiki a me kekahi maia. Aole e ae ke alii i kekahi haole noho maanei, mamua hana kekahi mau haole lapuwale i ka haunaele, me ka manao e lawe i ka aina no lakou, aole nae i hiki.

            He poe oluolu a noho malie koonei kanaka, he poe lawelawe nui ma ka molowa ole, aka, mamua he poe pepehi kanaka, a ua poeo kekahi mau moku ia lakou. I ke koho ana'ku, no Iapana mai keia lahuikanaka.

            Hookahi wale no mokupuni e ae i like ka olelo me lakou nei, oia o Nawodo, Lat. 0 º 25m hema. Lon. 167 º 5m hikika.

            Hukiia ka heleuma, a holo makou iwaho o ke awa o Kusaie, i ka la 28 o Sepatemaba. Aole nae makani; kuuia na waapa ilalo e hoe, aole nae hiki, no ka ikaika loa o ke au, a mai laweia makou a ili make kohola. Aka, hooikaika ke Kapena e hoohuli i ka ihu iloko. Holo mai ka waapa o ke alii a me na waa ewalu a keu aku o na kanaka, a ua hukiia makou iloko, a kuu hou ia ka heleuma i ke ahiahi.

            I ka la 29 makani ole. A i ka la 30, holo hou makou iwaho, a holo loa i Ponape. Maikai ka makani ia po; a i ka hora 2 o ke ahiahi o ka la 1 o Okatoba, ike makou ia Piniap. Manao makou e pae malaila, no ka mea, ua manaoia e noho ana paha o Mr. Storges malaila, e kali ana i ka Hoku Ao, aka, i ka hookokoke ana aku i ka aina, hiki mai la ka makani ino, a pono ole ke holo; a i ke ahiahi ino loa ka makani, a nui ka ua, aohe ike ia aku o ka aina. Eia hoi kekahi, o Kaai he kanaka ma ka hoeuli, luai kokoko, a haule a make loa.

            He kanaka maimai no oia mamua, a manao makou ua ola oia, a emoole ka ua make iho la.

            No ia mau pilikia a pau, haalele makou i ka manao e pae ma Pinlap, a holo aku makou i Makil. A kakahiaka, alikealike makou mawaena o Pinlap a me Makil, kanuia ke kupapau o Kaai ma ke kai. Ia la hiki hou mai la ka makani ino a me ka ua, a mai loaa ole ia makou ka mokupuni liilii o Mokil, a ahiahi ike ia oia. Pili aku makou, a i ka hora 8 o ka po, hoopaeia kakahi haole mai Honolulu mai, o John Smith (Keoni Kamika) ka inoa, alaila, holo hou aku makou i Ponepe.

(Aole i pau.)

 

 

KA AILA BALAKI A PINKHAMA!

- He Mea -

OLE KA WAI I KEIA AILA HAMO!

Palupalu Maikai na Ili Hooluu.

Ke noi haahaa ia'ku nei oukou, e hoao iho i keia

Aila Balaki, Hamohamo Palewai, Hoopalupalu Ili.

            E kuai a e hoao i na Buti, Kamaa, Ili Kauo Kaa, a i na mea ili hooluu e ae paha i loaa ia

oukou. Ua lana loa ka manao, ina oukou e hoao ana pela, e mahalo ana oukou, a hoomaikai aku auanei me ke kanalua ole. Ina e hamo pinepine ia i keia

AILA BALAKI HOOPALUPALU ILI,

            E mau no ka palupalu maikai o na ili, me ka nakaka ole. Aole hoi no ka wa ua wale no e pono ai keia Aila, aka, no ka wa la kekahi. He 50 keneta no ke tini.

 

 

Aila Inika Balaki Hoomau Ili a PINKHAM.

            He mea maikai loa, i hanapaka maoliia no ka hoopalupalu ana i na ili kaa lio, na kaulawaha lio, na noho lio, a pela aku. E hoao oe – Kumukuai no ke kini 75 keneta.

 

 

Na Olelo Mahalo.

            HILO, Nov. 5, 1875.

            Ua hoao pono wau i na Aila Hamo Kamaa e ae, a ua hoao pono no hoi i ka Aila Hamo Balaki a G. S. Pinkham: a ua hiki ia'u ke olelo me ke kanalua ole, o keia Aila ka helu akahi, a me ka oi o ka maikai, o na Aila Balaki a pau a'u i hoao ai.

A. O. FORBES.

           

            Ua hoao maua i na Aila Hamo Kamaa a G. S. Pinkham  & Co., a ua oi aku ka maikai mamua o na Aila Hamo Kamaa mai na aina e mai.

R.A. LYMAN,

S. KIPI

Hilo, Nov. 10, 1875.    Kiaaina o Hawaii.

 

            HILO, Nov. 10, 1875.

            Ua hoao pinepine au i na Aila Hamo Kamaa a G. S. Pinkham & Co., a ua manao no au oia ka Aila Balaki Kamaa maikai mamua o na aila e ae a'u i hoao ai mamua, a he oiaio keia.

C.      K. HAPAI.

 

            HILO, NOV. 10, 1875.

            No ko'u ike oiaio loa o ka Aila Hamo Kamaa a G. S. Pinkham he Aila maikai loa no ka Hoowaliwali i ka ili.

D.     KAMAI.

 

            Hanaia e G.S: PINKHAM & Co., ma Hilo, Hawaii.

            E kuaiia aku no e BOLLES & Co., Agena, ma Honolulu.  793 3m 815

 

 

ANOAI I KA LEHULEHU.

 

E kipa mai a e nana,

i kumaka ai ka ike i na waiwai nani

i loaa mai nei iloko o na

La Kulaia iho nei.

Penei ke ano o ua mau waiwai la:

N Wati a me na kaula Gula,

a na Lede a me na Keonimaua !

NA KAULA OPELE A NA LEDE

MA KOMO GULA NANI O KELA A ME KEIA

ano o na Lede a me na Keonimaua !

NA KUPEE GULA,

NA LIPINE GULA

Na gula pepeiao o na wahine!

e oaka ai i na pepeiao, a e hulali ai

hoi na manamana lima, a e

kilipohe ai hoi na a-i.

 

Na komo humuhumu gula a me ke kala,

Na pihi pulima gula wahine a kane,

Na laketa gula lei wahine nani,

Na komo daimana o na Lede.

 

Na kaula laketa,

Na pine omau kihei,

Na laketa aniani,

Na huka gula wahine.

NA LAKO HALE.

NA PUNA,

NA PAHI,

NA KIAHA, KALA,

NA APO KALA

NA KAWELE holoi lima,

NA O DALA o kela a me keia ano,

a me na mea nani e ae no he nui wale.

 

E kuaiia aku ana no

ma ke kumukuai haahaa loa i ko

na wahi e ae o ke taona nei.

 

UA MAKAUKAU NO HOINA

mea nani no kanaka makua

a me na kamalii.

Na Kamaa Paa Loa,

e loaa no maanei e like me ka

makemake; a ina e loaa

koke ka ino, he hiki

no ke hoihoi mai

M.    McINERNY.

Kihi o na Alanui Papu a me Kalepa.   798 3m 799

 

 

E.T. Halolani.

LOIO!

EIA HE $20,000 E MAKEMAKE ANA K hoaie aku ma ka ukupane haalaa loa mai ka $200 aku a pii ae ma ka moraki ana i na aina. Ua hoomakaukau e no oia i na palapala aelike, hoolimalima, moraki a me na hooilina, a he hiki iaiai ke hoomaikai i na aina loaa ole na Palapala Sila Nui.

            Hale Oihana, aie ma ka "Real Estate Exchange" Helu 31, alanui Papa, Honolulu, malaila oia e loaa ai i na kanaka a pau, ina he mau ai na kuai a hoolimalima ko lakou, a e hoopaaia me ka uku ole.      792 3m 808

 

 

Milo Kuai.

            O ka poe makemake kuai MILO laau hana ipu paka, e hele mai i ka Halekuai o

KALE LONA, (Chas. Long).

            Alanui Kalepa, Honolulu.   795 3ms.

 

 

MAI KEIA LA A MAHOPE AKU NEI.

O KA UKU O KA

OHUA ONEKI O

NETI MERRIL,

Mai Honolulu aku a me ka hoi mai he

ELUA DALA!

E. D. CRANE. (Kapena.)

Mar. 16, 1877   7@

 

 

Lole Makepono ke Kuike!

E LOAA NO IA MA KAHI O

KAKELA ME KUKE,

- E LAA NA -

AHINAHINA,

KALAKOA,

KEOKEO,

LEPONALO

Pena, Aila, Aniani,

Na Mea Piula,

Kopa, Aila Honua,

Aila Hoomaloo

Kui Kakia, Pakeke,

Tabu, Kaula, Noho Lio,

Hulu-palaki, na Pulumi.

A he Agena no hoi no na Mokupuni o Hawaii nei no na

LAINAKINI-NAO,

LAINAKINI-MAOLI,

PALULE KALAKOA,

ALAPIA, KELEPA, KILISA,

Na Lole kupono i ka wawae,

            Palule Huluhulu,

Na Lole Huluhulu,

Na Lole no ka hoohehelo ana

Lipine, lihilihi, a me ia mea'ku

- A HE -

MAU MEA AI KAHI

Ka Palaoa, Kopaa.

Raiki, Pia, Hoohu,

Paakai, Huaala,

Pia Kulina &c.

- A HE -

LAAU LAPAUAU KAULANA LOA

A Dr. JAYNES.

Laau Kunu,

Laau Hoomaemae Koko,

Laau hoopau naio,

Penikila, Huaale,

A me na Laau Hamo, a pela'ku

788 3m 801

 

 

Papa! Papa!

- NO -

ALLEN A ME ROBINSON.

Ua wehe ae ni maua i

PA KUAI PAPA!

- MA KA -

UWAPO o PAKAKA.

 

Na Papa Ulaula o na ano a pau.

Na papa Paina o na ano a pau.

Na Pili Hale Ulaula.

Na Pili Hale Keokeo.

Na Pepa Hoonani Hale.

Na Pepa Molina.

Na Pena a me na Aila Pena!

NA KUI O NA ANO A PAU!

Na Pani Puka a me

Na Pani Puka Aniani.

Na Pani Puka a me

Na Olepelepe.

 

 

Na lako kukulu Hale

-O NA ANO A PAU-

E kuaiia ma ke

Kumukuai Haahaa Loa!

o keia Makeke

ALLEN & ROBINSON.

Honolulu, Aper 13, 1876      788 3m 799