Ka Nupepa Kuokoa, Volume XVI, Number 14, 7 ʻApelila 1877 — Page 4
| This text was transcribed by: | Diane Poche |
| This work is dedicated to: | Langues Tirees Translation |
KA NUPEPA KUOKOA, ME KE AU OKOA I HUIIA
THE BEAUTIFUL EVERMORE.
River of Life p 113.
1
Mele ae no ka aina, ka aina ma o,
Ma ke ao maluna'e la, ao nani mau,
Kahi no e pau ai na luuluu, na haalou;
Kahi e hee ai ka pouli a mae ke ao;
TEN. Kahi no---e o we ai la na wai e ola'i---
BASO. Kahi no e owe ae owe ai la na wai e ola'i.
TEN. Ole na---lu a ino, ua malu a mau,
BASO. Ole nalu a ino, a ino, ua malu a mau.
TEN. Ma ha no---na luuluu---me ka poe---auwana'e.
BASO. Ma ha no na luuluu---me ka poe auwana'e---me ka poe auwana'e.
TEN. Ka ho---me maikai---home lani no.
BASO. Ka home maikai---ka home maikai, home lani no.
2
Oli ae no ia ao, no ia ao nani e,
Kahi puni paapu i na ka mahao;
Ma ka maka oloko, ua hoea mai;
A ala'e na iini e komo ano.
TEN. Ma ke ao---nei ke ino, ma o ka maikai.
BASO. Ma ke ao nei ke ino, ke ino, ma o ka maikai.
TEN. Ma ke ao---nei ka make, he ola ma o
BASO. Ma ke ao nei ka make, ka make he ola ma o.
TEN. Kau a mau---ka manao---ma ia ao nani mau.
BASO. Kau a mau ka manao---ma ia ao nani mau---ma ia ao nani mau.
TEN. Ma ka ho---me maikai---home lani no.
BASO. Ma ka home maikai---ka home maikai, home lani no.
3
Ma ia home maikai ma ka aina ma o.
Hui mau la kakou me ka poe maemae.
Pau ka luhi oonei, a e maha pu no
Ma na puu uliuli a nani e;
TEN. Kahi---no e ku ai la a mele lea'e---
BASO. Kahi no e ku ai la, ku ai la a mele lea'e.
TEN. A hoona-----na aku ia Iesu ke Lii.
BASO. A hoonani aku ni aku, ia Iesu ke Lii.
TEN. No na po---no aulii---no na po---maikai lai
BASO. No na pono aulii---no na po maikai lai---no na po maikai lai;
TEN. No ka ma---lu a mau---malu lane e.
BASO. No ka malu a mau---ka malu a mau, malu lani e.
HAAWINA KULA SABATI
HELU 4, SABATI, APERILA 22.
KUMU HANA. Gehazi i ka lepera.
PAUKA BAIBALA, II Na Lii 5:20-27.
20 I iho ia o Gehazi ke kauwa a Elisai ke kanaka no ke Akua, Aia hoi, na hoole kuu haku ia Naamana i keia kana ka no Suria, aole i lawe mai kona lima i ka mea ana i lawe mai ai; aka, ma ke ola o Iehova e holo no au mahope ona, a e lawe i kekahi mea mai ona mai la.
21 A hahai aku la o Gehazi mahope Naamana; a ike ae la o Naamana ia ia e holo mai ana mahope ona, iho ilalo ia mai ka halekaa mai e halawai me ia, i mai la, Ua pono anei?
22 I aku la ia, Ua pono Ua hoouna mai kuu haku ia'u, i mai la, Aia hoi, i keia manawa, ua hiki mai ia'u nei elua kanaka ui mai ka mauna o Eperaima mai, he mau haumana a ka poe kaula; ke noi aku nei au ia oe' e haawi mai oe no laua i hookahi talena kala, a i elua lole aahu.
23 I mai la o Naamana, E oluolu mai oe i ka lawe i na talena elua. Koi mai oia ia ia, a hoopaa iho la ia i na talena elua iloko o na aa elua, a me na lole aahu elua, a haawi aku la i na kauwa ana olua; a lawe aku la laua imua ona.
24 A hiki aku la ma Opela, lawe ae la oia ia mau mea, mai ko laua lima mai, a waiho iho la iloko o ka hale; a kuu aku la i na kanaka, a hoi aku la laua.
25 Komo aku la ia maloko, a ku imua o kona haku; ninau mai la o Elisai iaia, Mai hea mai oe, e Gehazi? I aku la ia, Aole i hele kau kauwa io, a ia nei.
26 I mai la kela ia ia, Aole anei i hele kuu naau, i ka manawa i huli ae ke kanaka mai kona halekaa mai e halawai me oe? he manawa anei keia e lawe i ke kala, a e lawe i na aahu, me na oliva, a me na pawaina, a me na hipa, a me na bipi, a me na kanwakane a me na kauwawahine?
27 Nolaila e pili mau loa mai ko Naamana lepera ia oe, a me kou hua. A hele ia mai kona alo aku me ka mai lepera e li ke me ka hau.
Pauku Gula. "O ka mea makee waiwai, hana ino loa oia i ko kona hale." Solomona 15:27
Mele.---Him. 213, S. Leo.
1
A no keaha e pau ai
Ko oukou wa e ola nei
Ma ko ke ao nei wale no,
A hoopoina i kela ao?
4
E pau ko oukou nei manao
Ma ko ke kino, ko ke ao;---
E ala, huli, lelepau,
A hele i ke ola mau.
Pule no ka poe makee waiwai, a pau ke ku ko ma na mea o keia ae, &c.
Na ninau a na Kumu.
Owai ka lepera i ola ia Elisai? Ma ka hana aha ke ola? A ike Naamana, ua ola oia, heaha kana i noi aku ai ia Elisai e la we? A ike hoi o'a, mahea wale no ke Akua? Ma keaha kona ike ana ia? Aole anei ke Akua ma na wahi a pau? Ae, pela io no, aka, ma ia manawa, maloko o ka Iseraela wale no paha, kahi i hoomanaia'i ke Akua oiaio. Ma na wahi e ae, he hoomana akua kii wale no paha. Ua ae anei Elisai e lawe i ka makana? Aole anei oia i ae mahope ma ko Naamana koi ana? Aole no. No keaha ko Elisai hoole ana i ka makana? A mahope iho o keia hoole, heaha kekahi mau hua olelo a Naamana? A pane Elisai pehea? 5:15-19.
P 20. Heaha ka manao o Gehazi no keia makana a Elisai i lawe ole ai? Heaha ke kumu o keia manao?
P 21. Hooko anei oia i kona manao? A ike Naamana i keaha? pehea iho la ia? a ninau pehea?
P 22. A pane aku Gehazi pehea? Heaha hoi kana mau olelo hoopunipuni i mea e loaa'i kekahi hapa o ko Naamana makana? Heaha kana noi ana?
P 23. A pane mai Naamana pehea? kuhi anei oia, he oiaio ka Gehazi mau olelo? Heaha hoi ka Gehazi i lawe ai? Gehazi wale no anei ma keia hana apaka?
P 24. A hiki i Opela, aha Gehazi i ka makana? lawe a waiho mahea? Opela he wahi pu paha ia, he wahi kiekie iki mawaena o ka hale o Elisai, a me kahi e ku ana o Gehazi. Kuhi oia, aole ike mai Elisai.
P 25. Ia ia i komo ai iloko o ka hale, heaha ka Elisai i ninau mai ai? A pane aku Gehazi pehea? oiaio anei?
P 26. A pane mai Elisai pehea? A ninau mai pehea? Ma keaha ko Elisai ike ana i ka hana a Gehazi? Ike maka paha; a i ole, ua hoike mai ke Akua ia ia. He manawa anei keia e aha ai? heaha ke ano? Eia paha, he kanaka hoomana kii keia, akahi no o Naamana a lohe i ke Akua oiaio. He kauwa o Gehazi na ke Akua o ka Iseraela. Pono ke hana maikai, hana aloha, hana oiaio i manao maikai aku Naamana i keia Akua. Nohea na oliva, na pawaina, nahipa, na pipi? Manao paha Gehazi e kuai ia mau mea me keia mau talena elua.
P 27. Heaha ka hoopai i hooiliia mai maluna o Gehazi no keia hana hoopunipuni a makee waiwai? Hai mai Iakobo 1:15. Nana---Nahelu 12:10. I Tim 6:10.
Mele. Mele hou, 8-7. Leo.
1
Makee waiwai o Gehazi,
Loaa ma ka wahahee,
Wahahee la ia Naamana,
Wahahee ia Elisai.
2
Loaa nae ko ia la hewa,
Kau maluna ka hoopai,
Lilo oia i lepera,
Keokeo ino e.
3
Mai makee a kuko wale,
Mai hoopunipuni mai,
O kau mai ka mai lepera,
Me na mea hoopai e ae.
Na ninau a ke Kahu.
Na makua. Heaha ka pauka gula? Owai ka i hana ino i ka poe Iseraela a pau ma ka makee waiwai ana? Ma keaha i hana ino ai o Gehazi ia ia iho, a i kona ohana? Heaha ka hoopai maluna ona? Heaha ka hoopai maluna o Akana? Owai ke kaikuahine i lilo i lepera no ka ohumu ana? Owai hoi na mea elua i hoopaiia i ka make no ka makee waiwai a wahahee hoi?
Na keiki. Hai paanaau mai I Tim. 6:10. Iak. 1:15. Pono anei ia oukou ke wahahee i na makua, i na kumu, i na hoa, i loaa ka waiwai, ke dala, ka lole, ka ai? Kuhi Gehazi, aole ikeia kana hana apuka, ua hunaiia malalo ae o ka puu, ua nalo anei? Hiki anei ke hana kolohe me ko ke Akua ike ole? Aia mahea na maka o Iehova?
Ma keaha oukou e lilo ai i poe hoike no ka maikai o ke Akua Ma ka hana maikai ana paha, olelo aiaio, hoopunipuni ole.
Ke kula a pau. Ua mihi anei Gehazi mahope, a laweia'ku kona mai lepera? Ina hoopai mai ke Akua ma keia ao, heaha ka pono? A pehea ke hoopaiia ma kela ao?
Mele.---Him. 17, 8. Leo.
1
Ua ike mai ke Akua ia'u,
Ko waho me ko loko pu,
Kuu ala, me kuu moe no,
Kuu kino pu me kuu naau,
5
E paa mau ia i kuu manao
Ma kahi nani, maha o'u,
Mai aa e hana hewa hou,
Maanei ke Akua, a ma o.
Pule i makaala a makau i ka hana hewa ma kahi malu, &c.
Haawina 5. II Na Lii 6:8-18.
Hoike Kula Aupuni ma Waimea
HAWAII, MA KA LA 13 O MARAKI.
Ma ka Hale Hookolokolo ka Hoike ana Akoakoa na kula elua ma ka hora 9 1/2.
Ua 30 paha na haumana He mau keiki kane wale no ma kekahi kula, a he mau hapa haole ka nui. Eono wale no kaikamahine ma ka lua o ke kula. Na keiki kane ka nui.
Ua 50 na la kula iloko o keia hapaha. Ua ao ia na haumana ma na mea a pau e pili ana i ua kula la.
1 Ma ke Kumumua, ua pono iki, aole pono loa. He wahi keiki kuli i hele mau i ke kula, ua ku oia me ka papa Kumumua; kii ke kumu a hookaawale ae; ka uwe nui na ole o na kuli nei. E hoihoi ia ia, wahi au i ka papa.
Ma ka hoike ana, eia ka ua ike oia i na hua a pau, a heluhelu no ma ke kuhikuhi ana o na manamana lima, me na lima pa. Haohao makou a mahalo nui. Ikaika ke kumu i ke ao ana ia ia.
Hemahema nae ka papa Kumumua no ka buke ole. Eono paha malama i nele ai i ka buke. Aole ka ma ka hale oia ka Papa Hoonaauao. Ua nele like na kula a pau ia buke, a ke ao ia nei na keiki nuku ma ka buke aha? Ahea la e loaa hou mai ke Kumumua.
2 MA KA HELUHELU. Makaukau iki kekahi poe i ka heluhelu, ka lele, hoomama ma kahi kupono, akaka ka leo. Hawawa nae kekahi. Eia ke kupanaha, na keiki nui aole ka lakou i ao ma ka Buke Ao Heluhelu ma na la kula. me he la ua hemolele ko lakou heluhelu ana. Aole nae i hemole, hawawa no. E heluhelu mau ka pono.
3 MA KA HELUNAAU. Ua holo no na haumana ma ia buke a hiki i ka ninau 149. mok. 15, aoao 193 Paa ilaila, a hoopaneeia ka imi ana a i ka Hoike nui ma Iune.
MA KA ARIMETIKA, holo pono no ka Papa 2 ma ka Houluula, paa nae ma ka Hoolawe. Ka Popa I ma ka mokuna 9 no na Dekimala, ua loaa kekahi, loaa ole kekahi Pohihihi loa ka puunaue ana. Pohihihi loa ka puunaue ana. Puhihihi hoi ia i na kanaka makua nianao.
5 Ma ka Buke Honua, a Palapala Aina, aole mahalo nuiia, ua loaa no kekahi mau ninau, loaa ka nui ke nana ole ia ma ka Buke. O na koli nei, hiki ka ia ia ke kuhikuhi i kalii o Hawaii nei Ka hemahema nui keia o na kula aupuni, ka hoopaanaau ole i na haawina, ka hiki ole ke wehewehe ke naua ole i ka Paiapala Aina. E ala ka hoopaa pono.
6 Ma ke kakau lima. Ua mahaloia kekahi kula no ka nui o ki poe kakau luna ma ka buke pepa, a no ka maikai hoi o na hua.
A ma kekahi kula, aole kakau lima ma ka pepa, ua kakou paha ma ka papa pohaka. O na kuli nei kekahi i kakau i na hua me kekini mau olelo ma ka papaeleele:
7 MA KA HIMENI. Ua aoia no ka himeni ma na kula elua. Ua himeni no a mahaloia laua a elua. Hookahi nae kula i ao nuiia a makaaukau loa. Mahaloia ke kula o na hapahaole no ke ao ana o ke kumu i ua keiki uuku i kekahi mau leo mele. Oiai, aole pela ma kekahi kula. Aole i aoia na keiki hilii i kekahi mau leo no ka Hoike. Mahope aku paha E manao nui na kumu i na keiki hihi, e hoomakaukau ia lakou no na wa Hoike i lana ko lakou manao.
Ekolu mele maikai i himeniia e ke Kula o Waikoloa.
1 Our Dear Daisy Darling
2 Sweet By & By.
3 Star Spangled Banner.
Eia no malalo iho.
Star Spangled Banner.
1
E ku na keiki o uka, o kai,
E ku a hoike, hoike a like;
Ma ka A, ka Hookui na keiki liilii;
Ma ka Helu, ke mele ka poe i ike;---
Ma ka Helunaau, ma na buke apau,
Ku, e ku a hoike, a oli pu no.
Cho.---E pulelo ka bana, ka bana maikai
O ka Hae Hawaii, e kau a mau ae.
2
E hui aloha, a lokahi pu,
Memele a nahe, a hoowani oli;
E oli hanoli, e kai haiamu,
Hoolei i na ino, e hee ka pouli.
E imi a mau, a e hoonaauao,
Hoomau ma na pono, na pono apau.
Cho.---E pulelo ka bana, &c
3
E hui a lilo na haumana nei
I puali hoohiki e haalele like
I ka rama, ka awa, ka paka pu e,
Na mea moino, kue i ka ike.
Ma ka wai no kakou, ma ka wai wale no,
Malaila ka paa, me ka paio a mau.
Cho.---E pulelo ka bana, &c.
4
Ua pau no ke kula, e hoomaha e,
Hoomaha a holo a paani oli;
Hoomanao no nae i ka Haku maikai,
E makau i ke Akua, a hana aloha.
Aloha kakou, ku a hoi pu no
Alha na hoa mai nei a hui hou.
Cho---E pulelo ka bana, ka bana maikai,
O ka Hae Hawaii, e kau a mau ae.
He mau manao paipai o ka Papa Kula. Hoopaneeia a Iune. Pule ka Luna Kula, a hookuu aku Hawaii.
No Delehi, Kona Papu, me ka Hale Alii, &c.
[Unuhiia no ke Kuokoa.]
Aia ma Hinedu, ma ka hema o Asia, o Deleh, 600 mile a oi ae, ma ke komohana Akau o Kalekato, e pili ana i ka muliwai o Iumena, he lala paha ia no Genegi. Ke kulanakauhale alii keia.
Ke ano o ka Hale Alii, he ano Papu no ia. na ka Emepora, Sa Iehana, i hoomaka e kukulu i keia Hale, elua haneri makahiki mamua aku nei. Ua pili keia hale i ka muliwai o Iumena, hookahi mile a oi ka loa. He pa pohaku ma na aoao ekolu, he 40 kapuai ke kiekie. Ke kae o ka muliwai ka aoao eha. Elua ona puka nui nani, Lahose, Delehi, na inoa.
Ka puka Lahose, he puka pio nui ia, a maluna iho he hale, he mau puoa, he alanui po i hoonaniia e na kii pua, &c. Kahi keia e komo ai iloko o kekahi pa nani i nohoia e na koa i keia wa.
O ke keena alii, he rumi nui ia e kau ana maluna o na kia pohaku maikai. Ua hoonani nuiia mamua, i keia wa nae, ua hapa ka nani He alapii mahala ma keia keena, kahi e pii aku ai i ka noho alii. Ua umi kapuai ke kiekie o keia noho mai ka papa lalo ae. Maluna'e he kanopi, he uhi nani e kau ana maluna o ua kia mahala keokeo eha i hoonani maikai loa ia.
Aia malaila na keena liilii o ka Emepera o ka paia mahope o ka noho alii, na kahakahaia a hoonaniia i na kii nani o na pua, o na hua, o na holoholona, o na manu, a nani lua ole. Ua koloheia nae kakahi hapa o ka nani, o na pohaku maikai loa. he wahi keena nuku a nani loa kahi i hookipaia'i na hoa kuka o ke alii.
Maluna'e o keia Hale, he kupola (lanai) gula i hoonaniia ko loko i na mea nani o ke gula, a me ke dala. A ua kakauia maloko, Ina he Parediso ma ka honua nei, keia hale no ia, keia hale no ia.
Ma keia kena nui, he noho alii i kapaia, Ka noho alii o Pikaka. He mau kii pikaka elua e ku ana ma ke kua me na huelo i hoopalahaia, a hoonaniia i na pohaku Sapeisa, na rabi, na emeralda, na momi, me ua pohaku nani e ae. Eono kapuai ka loa o keia noho alii, a eha kapuai ka laula. e ku ana maluna o na wawae eono; he gula wale no ka noho, me na waewae, a ua hoonaniia hoi i na rubi, na emerala me na daimana. Maluna'e, he uhi gula i kooia e na kia nani he 12 me ka pihapiha momi nani. He kii parota i kahakahaia ma ka pohaku emerala hookahi mawaena o na pikake elua.
He mau mamalu gula elua e pili ana i keia noho, ma ka aoao akau kekahi, a ma ka aoao hema kekahi; ewalu kapuai ke kiekie. He mau daimana ko loko.
He hoailona alii ka mamalu, a o ke kumu kuai o keia mau mamalu elua, he mau miliona dala ia.
O Nada Sa, ke lii kea nui o Peresia, ua pepehi oia i 100,000 kanaka o Delehi, a lawe pio aku i kona mau waiwai he 350,000 000 dala, me keia no ho alii. Pikake kekahi. Ka nani keia o Delehi mamua loa aku paha.
Ua pili i ka Hale alii he moreka manu he luakini Mahomeda ia, a he mau hale wai auau o ke lii. Ua hoopuniia ka moreka i ka mabala aiai. He ulaula na paia, a he mau hale poepoe nani maluna'e. Ka pa hale, ua 150 kapuai kuea ia a kipaepaeia i ka mabala aiai maikai. Nui a nani na hale wai auau o ke lii, me kona ohana, me kaua mau wahine. he mau panawai piipii mau kekahi.
Ma kekahi aoao o keia Hale alii, he wahi puka e komo ana iloko o ka paia, a he alanui pokaa wili ke iho ana ilalo loa, i kahi malamalama ole. he mau lua ma na aoao o keia alanui. Malaila i hooleiia'i a hoopaaia'i ka poe i hoonaukiuki i ke lii nui He mau puka no malalo kahi o hooleiia'i na paahao iloko o ka maliwai malalo iho. Haahaa ahaiki loa kekahi mau la, a hiki ole i na paahao ke moe malalo. Ua hale paha ia manawa ino loa. HAWAII.
Halwawai kuikawa o ka Ahahui Hoola Lahui a Hooulu Lahui
MA LAIE-WAI, KOOLAULOA.
E KA NUPEPA KUOKA E; Aloha oe:---
Ma kou opu ahonui pauaho ole i ka hokipa ana i na maihini e kipa aku ana ma kou ipuka, eia he malihini la hookipa ia aku, a nau ia e hoomakikai aku iaia ma ka oili pulelo ana a ka la i Haehae, a ka welo palemo ana a ka la i ka mole olu o Lehua.
Malia o ike mai ou mau kini makamaka e noho ana mai kela pea keia pea o ka aina, no ke au Hoola a Hooulu Lahui o na Lani ihikapu. Oia hoi keia aia ma ka hora 2 P. M. o ka la Sabati, Mar. 4. ua haiamu ae na Lede a me na Keonimaoa o na wai-elua nei ma ka Luakini Moremona Na alakai pu mai hei o ka Ekalesia, W. E. Pack, S M. Mollen, H. S. Woolley, J S. Woodbury. Jacob. Gates.
Ua akoakoa pau ae malaila, no ke koha ana i Peresidena, Kakauolelo, Puuku, a he hooko ana keia i ka iini o ko kakou makuahine Moi, elike me ke kumukanawai o ka Ahahui Hoola a Hooulu Lanui. Na hana o ka halawai. Ua kohoia o W. E. Pack i L Hoomalu no ka halawai, ia M. K Kou i kakauolelo. Hapai mai ka Luna Hoomalu e hookaawale ia na Komite elima na lakou e koho i Peresidena, Kakauolelo, Puuku; Hooholoia, Hapai mai o H. S. Wooley i na inoa o na komite elima, H. S. Woolley, L. B. Nainoa, Lucy Kehaulelio, Ana Hauhau, Mrs. Loisa N. Hanakaea; Hooholoia, a komo aku la lakou ma ka rumi no ka noonoo ana. Ua koho mai ka Peresidena ia J. W. Kahaiao i haiolelo no ka manawa, a ua kamailio oia no na mea e pili ana i na rula, oiai na pohihihi no kekahi poe, a he nui aku.
Ma ke noi a J. L. Kealakuhilima e heluhelu ia ke kumukanawai, ua heluheluia. a mahope oia wa, ua puka mai na komite a hoike mai i na mea i hooholoia ma o kekahi komite la, H. S. Woolley. Eia na mea i hooholoia. Ua koho lakou ia Mrs Loisa N. Hanakaea i Peresidena, a o Mrs. Lilia K. Kahaiao i kakauolelo, o Mrs. L, Kahaulelio i Puuku, ma ka waiho ana a ka Peresidena imua o ka hale, ua haule wale ka inoa hope ma kahi o ka Puuku. Hapai mai o H. S. Woolley i ka inoa o Lilia K. Kuakaha i Puuku, a ua hooholo ia. Ku mai ka Peresidena Mrs L. N Hanakaea, a waiho mai i ka noonoo ana nana komite elima. Ua koho ia keia komite elike me ka moe ana o na apana.
Apana 1. O Kokololio & Laimalo; Mrs. A. kaakau a me Mrs Kaohi@. Apana 2. Puuahi. Ana Hauhao. Apana 3. Paakea. Mrs. Hariata. Apana 4. Kapuna Mrs. Lucy Kahauleio, o lakou na komite e hele e nana i na mea i loohia i ka pilikia, e like me ka makemake o ke Kumukanawai.
Oia na mea nui i hana ia ma keia halawai ku i ka wa o na makaainana o Laie. he mau olelo hoolana hope no ka ka Peresidena o keia A. H. i ke anaina, a pau ia ua ku aku oia a hoopenee i ka halawai mau o keia A. H. a Poakolo Maraki 7, hora 5 1/2 P. M. a hookunia ka halawai ma ka pule a M. K. Hawaii. Me ka aloha no.
J. W. KAHALAO
Laie-wai, Mar. 8, 1877.
KA AILA BALAKI A PINKHAMA!
---He Mea---
OLE KA WAI I KEIA AILA HAMO!
Palupalu Maikai na Ili Hooluu.
Ke noi haahaa ia'ku nei oukou, e hoao iho i keia
Aila Balaki, Hamohamo Palewai, Hoopalupalu Ili.
E kuai a e hoao i na Buti, Kamaa, Ili Kano Kaa, a i na mea ili hooluu e ae paha i loaa ia oukou. Ua lana loa ka manao, ina oukou e hoao ana pela, e mahalo ana oukou, a hoomaikai aku auanei me ke kanalua ole Ina e hamo pinepine ia i keia
AILA BALAKI HOOPALUPALU ILI,
E mau no ka, palupalu maikai o na ili, me ka nakaka ole. Aole hoi no ka wa na wale no e pono ai keia Aila, aka, no ka wa la kekahi. He 50 keneta no ke tini.
Aila Inika Balaki Hoomau Ili a PINKHAM.
He mea maikai loa, i hanapaka maoiia no ka hoopalupalu ana i na ili kaa lio, na kaulawaha lio, na noho lio, a pela aku. E hoa oe---Kumukuai no ke kini 75 keneta.
Na Olelo Mahalo.
HILO, Nov. 5, 1875.
Ua hoao pono wau i na Aila Hamo Kamaa e ae, a ua hoao pono no hoi i ka Aila Hamo Balaki a G. S. Pinkham; a ua hiki ia'u ke olelo me ke kanalua ole, o keia Aila ka helu akahi, a me ka oi o ka maikai, o na Aila Balaki a pau a'u i hoao ai. A. O. FORBES.
Ua hoao maua i na Aila Hamo Kamaa a G. S. Pinkham & Co., a ua oi aku ka maikai mamua o na Aila Hamo Kamaa mai na aina e mai.
R. A. LYMAN,
S. KIPI.
Hilo, Nov. 10, 1875. Kiaaina o Hawaii.
Hilo, Nov. 10, 1875.
Ua hoao pinepine au i na Aila Hamo Kamaa a G. S. Pinkham & Co., a ua manao no au oia ka Aila Balaki Kamaa maikai mamua o na aila e ae a'u i hoao ai mamua, a he oiaio keia.
C. K. HAPAI.
HILO, Nov. 10, 1875.
No ko'u ike oiaio loa o ka Aila Hamo Kamaa a G. S. Pinkham he Aila maikai loa no ka Hoowaliwali i ka ili. D. KAMAI.
Hanaia e G. S. PINKHAM & Co., ma Hilo, Hawaii.
E kuaiia aku no e BOLLES & Co., Agena, ma Honolulu. 790 3m 792
Lole Makepono ke Kuike!
E LOAA NO IA MA KAHI O
KAKELA ME KUKE,
---E LAA NA---
AHINAHINA,
KALAKOA,
KEOKEO,
LEPONALO
Pena, Aila, Aniani,
Na Mea Piula,
Kopa, Aila Honua,
Aila Hoomaloo
Kui Kakia, Pakeke,
Tabu, Kaula, Noho lio,
Hulu-pakaki, na Pulumi.
A he Agena no hoi no na Mokupuni, o Hawaii nei no na
LAINAKINI-NAO,
LAINAKINI-MAOLI,
PALULE KALAKOA,
ALAPIA, KELEPA, KILISA,
Na Lole kupono i ka wawae,
Palule Huluhulu,
Na Lole Huluhulu,
Na Lole no ka hoohehelo ana
Lipine, lihilihi, a me ia mea'ku
---A HE---
MAU MEA AI KAHI
Ka Palaoa, Kopaa,
Raiki, Pia, Hoohu,
Paakai, Huaala,
Pia Kulina &c.
---A HE---
LAAU LAPAAU KAULANA LOA
A Dr. JAYNES.
Laau Kunu,
Laau Hoomaemae Koko,
Laau hoopau naio,
Penikila, Huaale,
A me na Laau Hamo, a pela'ku
788 3m 801
Papa! Papa!
---NO---
ALLEN A ME ROBINSON,
Ua wehe ae nei maua i
PA KUAI PAPA!
---MA KA---
UWAPO O PAKAKA.
Na Papa Ulaula o na ano a pau.
Na Papa Paina o na ano a pau.
Na Pili Hale Ulaula.
Na Pili Hale Keokeo.
Na Pepa Hoonani Hale.
Na Pepa Molina.
Na Pena a me na Aila Pena!
NA KUI O NA ANO A PAU!
Na Pani Puka a me
Na Pani Puka Aniani.
Na Pani Puka a me
Na Olepelepe.
Na lako kukulu Hale
---O NA ANO A PAU---
E kuaiia ma ke
Kumukuai Haahaa Lou!
o keia Makeke.
ALLEN & ROBINSON.
Honolulu, Aper 13, 1876. 788 3m 801
ANOAI I KA LEHULEHU,
E kipa mai a e nana, i kumaka ai ka ike i na waiwai nani i loaa mai nei iloko o na La Kulaia iho nei. Penei ke ano o ua mau waiwai la:
Na Wati a me na kaula Gula, a na Lede a me na Keonimana!
NA KAULA OPELE A NA LEDE
NA KOMO GULA NANI O KELA A ME KEIA
ano o na Lede a me na Keonimana!
NA KUPEE GULA,
NA LIPINE GULA,
Na gula pepeiao o na wahine!
e oaka ai i na pepeiao, a e hulali ai
hoi na manamana lima, a e
kilipohe ai hoi na a-i.
Na komo humuhumu gula a me ke kala,
Na pili pulima gula wahine a kane,
Na laketa gula lei wahine nani,
Na komo daimana o na Lede.
Na Kaula laketa,
Na pine omau kihei,
Na laketa aniani,
Na huka gula wahine.
NA LAKO HALE.
NA PUNA,
NA PAHI,
NA KIAHA, KALA,
NA APO KALA
NA KAWELE holoi lima,
NA O DALA o kela a me keia ano, a me na mea nani e ae no he nui wale.
E kuaiia aku ana no
ma ke kumukuai haahaa loa i ko
na wahi e ae o ke taona nei.
UA MAKAUKAU NO HOINA
mea nani no kanaka makua
a me na kamalii.
Na Kamaa Paa Loa,
e loaa no maanei e like me ka
makemake; a ina e loaa
koke ka ino, he hiki
no ke hoihoi mai
M. MCINERNY.
Kihi o na Alanui Papu a me Kalepa. 798 3m 811
E. T. Halolani.
LOIO!
EIA HE $20,000 E MAKEMAKE ANA E hoaie aku ma ka ukupanee haahaa loa mai ka $200 aku a pii ae ma ka moraki ana i na aina. Ua hoomakaukau e no oia i na palapala aelike, hoolimalima, moraki a me na hooilina, a he hiki iaia ke hoomaikai i na aina loaa ole na Palapaia Sila Nui.
Hale Oihana, aie ma ka "Real Estate Exchange" Helu 31, Alanui Papu, Honolulu, malaila oia e loaa ai i na kanaka a pau, ina he mau aina kuai a hoolimalima ko lakou, a e hoopaaia me ka uku ole 792 3m 815
Milo Kuai.
O ka poe makemake kuai MILO laau hana ipu paka, e hele mai i ka Halekuai o
KALE LONA, (Chas. Long).
Alanui Kalepa, Honolulu. 795 3ms.
MAI KEIA LA A MAHOPE AKU NEI.
O KA UKU O KA
OHUA ONEKI O
NETI MERRILL.
Mai Honolulu aku a me ka hoi ana mai he
ELUA DALA!
E. D. CRANE (Kapena.)
Mar. 16, 1877 798 6ms