Ka Nupepa Kuokoa, Volume XVI, Number 13, 31 March 1877 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XVI. HELU 13. HONOLULU, POAONO, MARAKI 31, 1877.   NA HELU A PAU 800.

 

MAIKAI KA HOI KA PAPA!

A ME

Ka Laau o kou Hale!

No Hea la?

KA I NO HOI NO KAHI O

WAILA MA!

 

Nana aku no hoi ia la,

OHI KA IO o KA LAAU o MAKAWAO

i ka ua mea o ka nani o

Na Papa, Na Laau.

A ME

Na PONO KUKULU HALE

O NA ANO NO A PAU,

MA KE KUHI O

Na ALANUI PAPU a me MOIWAHINE,

Honolulu

MALAILA E LOAA AI E LIKE ME KA

makemake no ke

Kumukuai makepono loa

 

PAPA, PAPA, PAPA

Na PAPA huluhulu, Na PAPA manoanoa, Na PAPA i kahiia, Na PAPA kepa, PAPA hole keokeo, PAPA hole ulaula

NA LAAU! LAAU!

NA KUA, NA KAOLA, AAHO, MOLINA, PEAPEA, PINE HULUHULU, PINE I KA@IIA, Na Papa a me na Laau Ulaula!  PILI ULAULA PILI KEOKEO, PANI PUKA, PANI PUKA ANIANI, IPUKA ANIANI, OLEPELEPE!

 

PENA O NA ANO A PAU

Hulu Pena mai ka liilii a ke nui

AILA PENA!

AILA HOOMALOO, WANIKI, PATE.

NA LAKO o kela a me keia ano.  NA AMI-PUKA HALE, NA AMI-PUKA PA

 

ANIANI!

 

Pepa aale me na lihilihi.

E LOAA NO MALAILA

Paakai Helu 1.

O KAKAAKO a me PUULOA

            No ke Dala kuike, e loaa no na mea a pau i haiia ae la no ke kumukuai emi loa.

            O na kauoha a pau mai Hawaii a Niihau, loaa'ku ana ia lakou, e hooko koke ae mai ana no ia me ka lawa pono.

            E kipa nui ilaila, i ike ik oiaoa 788  799

 

HE IWAKALUA TAUSANI LEGUE MALALO O KE KAI! NA MEA KUPANAHA O KA MOANA! KE ALA O KA MEA HUNA, A O KA MEA POHIHIHI O KA 1866! MAHELE II. MOKUNA III

HE MOMI O UMI MILIONA.

            MA ka hora eha o ia kakahiaka ae, hoala ia mai la au e ke kuene, eleu koke ae la au i ke ala a komo i ko'u aahu a puka aku la a komo iloko o ke keena hoolauna.

            A ninau mai la o Kap. Nimo ia'u, "ua makaukau anei oe e Aronaka no ka hele?" "Ae, ua makaukau," i pane aku ai au.  "A aohe mea i koe o ka hele wale no." "A pehea o'u mau hoa?"  Ua hai mua ia ka lohe ia laua, a aia laua e kali mai la."  "A pehea la hoi, aole anei e komo ana kakou i na kapa luu o kakou.?" i ninau aku ai au.

            "Aole i keia wa, oiai, eia no kakou i waho loa mai ke kapakai mai o Manaara.  Aka, ua makaukau no nae ka waapa no kaku, a maluna o laila kakou e holo ai, ahiki ma kahi e hele ai i uka, a pela e pakele ai kakou mai ka luhi o ke kaikaikuhele ana me na kapa luu o kakou.  Aka, he hiki no nae ia kakou ke lawe pu me na kapa luu; no ka makemake ae e hele ma ka papaku o ka moana, e waiho ana no."

            Ko Kap. Nimo kona mai la no ia ia'u e iho aku ma ke alanui.  Ua miki e aku la no o Kosila a me Nede Lana ma ke alanui, me ka hauoli nui i ka manao o ka puali lealea.  Aia hoi iluna o ka waapa elima mau sela me na hoe e kali ana no ka ee aku o makou.

            He mea e no hoi ka pouli oia po.  Alai ia na lani e na ao pouliuli, aohe ike ia aku o ka nui o na hoku o ka lewa.  Ia po no hoi, hoi hou ka Nautilo ma ke kahakai komohana o Kilona.

            O ka ee aku la no ia o makou maluna o ka waapa, a holo ma ka hema.  Oia holo o makou ia po, ahiki i ke owehewehe ana mai o kaiao, ike lea ia aku la ka aina, e ulu ana ka laau ma o a maanei.  Ia Kap. Nimo no hoi ka ike i kahi kupono e kuu ai ka pohaku hekau o ka waapa o makou, o ko ia la hoolale ae la no ia e kuu.

            A pane mai la o Kap. Nimo ia'u "eia ua wahi nei, a e komo kakou i na kapa luu o kakou.  Iloko o hookahi malama i koe, e paapu loa ai keia wahi i na waapa lawaia, a e ike aku ai oe i na poe luu i ka luu mai i na mea a lakou e makemake ai.

            Iloko o keia wa a Kap. Nimo e kamailio nei, aole o'u pane aku, lilo aku la au i ka nana i ka ale o ke kai.  A no ka nui makemae e ike ia lalo; nolaila, ua awiwi wale ke komo ana i ko'u kapa luu, a pela no hoi o Kapena Nimo, Nede Lana, a me Kosila, a koe na hoewaa o makou.

            Oiai makou e hawele nei i na kapa luu, i mai la o Kap. Nimo, he mea makehewa paha ia kakou ka lawe ana i na kukui: no ka mea, aole keia he wahi hohonu loa e nele ai ke komo ana o na kukuna o ka malamalama iloko o ke kai.

            No keia mau olelo, ua pane aku au "maikai loa kakou e lawe pu i na ipukukui, i mea e pale aku ai i na pilikua o ka moana; malia, o lilo ia malamalama, i mea e makau ai, holo, alaila, hala ia pilikia.  No keia mea, ua lawe pu ia na kukui  O na pahi na mea eha a makou i lawe ai, a koe na pu ea.

            Ia hawele ana a paa na kapa o makou, o ka au hela aku la no ia iloko o kai, a o ka hohonu o ke kai he 2 kapuai he alualua ka papaku o lalo.  A ma kahi a Kap. Nimo e kuhikuhi ai malaila aku makou e uhai ai, a pela wale ka makou hele ana, ahiki i ko makou nalowale ana malalo o na ale o ka moana.

            O na mea ola o ke kai i halawai koke mai me ko makou mau maka, oia no na ia loloa me he puhi la ke ano i ka nana aku, a ma kahi hoohalike ana ua like me na moo nahesa, he 2 1/3 kapuai ka loihi; aka, he mau mea ono loa ma ka ai ana, ua kapaia ia puhi, he Karawade.

            A ma ka hora 7 o ke kakahiaka, hiki makou i ka papaku e noho ai na papaua.  I ka hoomaopopo ana iho, aole no hoi o kae mai mai na papaua he mau miliona ka nui.

            A elike no hoi me ko Nade Lana ano mau o ka eleu, o ko ia la huki ae la no ia i ka upena e paa ana ma kona hope, a o ka hoohei aku la no ia i ka papaua a ma kahi mau mea nani e ae o loko o ke kai.

            O ka hele loa o Kap. Nimo, ua hiki ole ia makou ke noho iho ma na wahi nei i ike ia ai ka nui, a o ko makou uhai aku no ia ia Kap. Nimo, ke alakai nui o ka hohonu.  O ke ano oia wahi a makou e hele nei, he ano piiku; a no ia mea, o wale ae la no au i ko'u lima iluna, aia nae puka loa ae la maluna o ka ilikai.  Aia ma kahi wahi o keia wahi e hele ia nei, he mau pali pohaku nui me na pouliuli i ka nana aku, me ka weli mai o na maka o kamaaina oloko o ia mau ana.  A mamuli o ko'u malihini ia mau mea, nolaila, ua hiki ole ia'u ke ku iki iho e nana pono loa aku i ke ano, no ka mea, aole kaukaulua iho o Kap. Nimo.

            Oia hele no o Kap. Nimo a ku ana kela ma ke alo o kekahi pali nui me kahi ana nui pouli.  A i ko makou akoakoa like ana aku, hoomaka koke aku la o Kap. Nimo i ke komo iloko o ua ana nei, a o makou aku no hoi.  Iloko oia komo ana, aole hiki i ka malamalama o na kukuna o ka la e komo iho iloko o ua ana nei; a ninau iho la au iloko o'u, heaha la ka hana o keia komo ana mai nei iloko nei.  Aka, a liuliu ko makou hele ana, aia hoi, moakaka mai ana o mua.  A hoomanao ae la au o ke alanui ka keia e hiki aku ai i kekahi wahi i manao ia.  Oia hele ahiki i kahi i ku ai o Kap. Nimo, awiwi loa aku la makou a hiki, kuhikuhi mai la ko ia la mau lima malalo pono o kahi ana e ku ana.  I nana aku ka hana, he papaua nui, 2 iwilei a me ka hapa ka palahalaha.  A ma ko'u hoomaopopo iho, he 600 paona ke kaumaha.

            Ia wa a makou e nana nei, ua oaka ae la ua papaua nei, a ike aku la au he momi nui me he niu la ka nui, a o kona kumukuai i ko'u manao he $500,000.

            A hala na minute he umi o ko makou nanea ana i keia waiwai, o ko Kap. Nimo peahi mai la no ia e nee aku a ku kokoke ma kona aoao, me ke kuhikuhi ana ma kekahi wahi mamao aku, a haka pono loa aku la ko'u mau maka malaila.

            A hala na minute elima, malu ana keia mea, o ko'u manao koke ae la no ia he mano, a i ole o kahi pilikua e ae la o ka moana: eia ka he kanaka.

            He ilikini lawaia i hele mai i ka luu papaua, he mau kapuai wale no ke kaawale o ke kikala o ka waa mai ke poo ae.  Aole o ia la ike mai ia makou, ua paa makou i ka malu o ka pali, o ia la nae he waiho wale loa i ko makou mau maka.  O na papaua i loaa ma kana luu ana, aole he momi o loko elike la me ka makou.

            I ka lima o ka luu ana o ua kanaka nei, hoea ana kekahi mano nui, e holo pololei loa mai ana i ua ilikini nei.  No keia mea, ua piha loa mai la au i ka weliweli; oiai, aole e makemake ka mano ma ko'u manao iho.  Aka, aia o Kap. Nimo e unuhi ana i kana pahi a holo aku la imua o ua mano nei.  Ia ike ana mai o ua mano nei he kanaka hou keia e holo aku ana, o ke alualu mai la no ia o ua mano nei i ke Kapena koa.  I wehe ae ua mano nei i ke a luna me ke nahu mai, e pahu aku ana o Kapena Nimo i ka pahi a ku ma ka aoao o ka ia.  Loihi ko laua nei hakaka ana, a hiki hoi o Nede Lana me kana hapuna, ia haalele ana no a Nede Lana i kana mea make, o ka make no ia o ka mano, a manao ae la ua ilikini nei he ola, a hoihoi aku la lakou nei ahiki ma ka pohaku hekau, me ke kuhikuhi aku o lakou nei e hoi koke e loaa hou mai i ka mano no ka mea, ua hele a hohono ke kai i ke koko o ka mano.

            Ia hoopakele ia ana o ka ilikini hoi ia, a hoi mai la no hoi makou ahiki i ka waapa o makou, huki ia ae la makou a kau iluna o ka waapa, a wehe ia ae la na kapa o makou.

            Hoomaikai mai la o Kap. Nimo ia Nede Lana i ka i ana, "he nani loa ia'u kou kokua ana ia'u ma ka pepehi ana i ka mano.

            I aku la o Nede Lana, "pela kakou e pono ai e kokua kahi i kahi."

            "Ae ua aie loa au ia oe no ia mau hana au," wahi a Kap. Nimo.

            "Aohe mea i koe, o ka hoi wale no i ka Nautilo," i pane hou aku ai o Kap. Nimo.

            Ia hoi ana o makou iluna o ka Nautilo, halawai aku la makou me ka mano make a Kap. Nimoma i pepehi ai a make.  I ko'u hoomaopopo ana iho i kona loa he 25 kapuai.  He pau okoa ka hapakolu o kona kino iloko o ka waha, i ka ua mea o ka nui launa ole.

            Puni makou i na mano no ka hanu ana mai i kela mano make, a noke nui mai i ke aumeume.

            A ma ka hapalua o ka hora 8 A. M. kau makou iluna o ka Nautilo.  Ia kau ana aku, hoomanao loa ae la au i na mea apau a'u i ike ai i ke kapakai o Manaar.

            Elua mau mea nui loa a'u e hoomanao ai.  Ka mua: O ka wiwo ole o Kap. Nimo; a o ka lua, o ka pakele ana o ka ilikini.

            I ko'u kamailio ana aku ia Kap. Nimo i keia mau mea.

            Pane mai kela, "O keia kanaka he kanaka ia no ka aina pilikia, a owau oia malie wale iho la no, a pela mau ahiki i ko'u hanu hope loa ana.

            (Aole i pau.)

 

Ke ano o na hana a ka Haku ma ka Pae Aina o Maikonisia ma ka MOKUPUNI O MILE.

 

            1 Aole hoauau ia ma kahi kokoke ma na wahi kapu.  2 I ka wa e pau ai ka hoauau ana o ke keiki, alaila, aole e ai ka ohana o ke kane a o ka wahine, a hiki wale i ka wa e maloo ai ka wai o ke keiki, alaila, ai kela a me keia i na mea ai.  3 I ka wa e hamo ia'i ke keiki i ka aila niu, i kakahiaka, aole loa e hele kekahi ohana, a aole hoi e ai a po ka la.  4 I ka wa ua, aole e lawe ia na keiki mawaho o na hale, o pulu auanei i ka wai o luna iho o ka niu.  5 A ina e pulu ke keiki i ka wai o ka niu, alaila, ua kapu, a ua laa loa ia niu no ke keiki, a nana e ai, inu, oki, o na makua a me na ohana e ae, ua kapu loa.  Eia ke ano ma ka olelo Makala, "mai jien," olelo Hawaii, "ka'u makahiapo." He nui aku no na kapu i koe.  O keia mau kapu a pau, ua pau i ka hoohioloia e ka mana o ka Euanelio.

            25. No ke pale keiki ana.-He mau pale keiki no ko lakou, i ka wa e kea ai ke keiki, e hoololiloli no e like no me ko Hawaii nei, a he mau pule no hoi.  A ina e paa loa, e hopu aku i ka mea i hapai a i nahunahu, e lulu, a ina e hemo ole, moe ilalo iluna ke alo, a e lalau i na wawae, a e huki mai me ka lulu, a pau, ala'e a noho iluna, a kalo no ke kuakoko, ia wa, o ka hemo no ia a palekana.  He hana oiaio keia, a ua ike no wau, oiai, ua hanaia wau i ka wa o ka'u "mai jien," makahiapo.  Aole wau i ike he mau kapu ko ke pale keiki ana, oiai, ua hana ia wau i ko'u wa hanau keiki, a ua oiaio maoli no.

            26. No Nalu, a me ke ao ana o ka'u kane.- O Nalu, aia oia ma ka akau o Mile, eha a elima mile ka loa mai Mile aku.  Aole oia he moku i kuokoa aku, aka, he ano i ku lalani mai Mile aku, he ano kohola, a ku aku ana he aina, he kohola, a he aina ku aku ana, i like ke ano me Kahakaaulana.  I ka wa a maua e noho pu ana, ua hele ka'u kane e noi aku ia Drue, ke alii nui o Mile, e helo oia e ao i ko Nalu mau kanaka e noho ana iloko o ka pouli, a ua ae mai ke alii, me ka haawi pu mai i kona hale ponoi, i wahi e noho ai o S. Kahelemauna.  I ka wa i hele ai o Kahelemauna a hiki i Nalu, a hui me ko laila poe, a eia na hana i hanaia nona.  I ka hiki ana a noho, hoomaka no oia e ae a e hoolaka mai.  A ia wa, aole makemake o na kanaka e aoia, aole nae he mau kumu e like me ko Mile, aka, no ka makemake ole no e aoia.  A no ia ano makemake ole, ia wa i hele mai ai ke alii a puliki ia S. Kahelemauna, me ka pe-a ia o na lima i ke kua, me ka lulu a luaiele ia i o a ia nei.  Eia ka lakou olelo ma o na kanaka huhu la.  E hoi oe, mai hele mai oe e ao ia makou, o ke aha kau mea e ao mai ai?  O ke Akua oiaio ka'u mea e ao aku ai, wahi a Kahelemauna.  He Akua no ko makou, ka mea nana i hana ia makou a me ko makou paemoku, a o ke Akua hea kau e olelo mai nei?  O ke Akua oiaio, aole he Akua ko oukou, oiai, he hoopunipuni, a aole no ia o ke Akua nana i hana i ka lani a me ka honua a me na mea a pau i piha'i, aole no hoi o ke kanaka, wahi no a ia nei.  Pehea ua Akua la o oukou i hana'i i ke kanaka?  Wehewehe aku la keia ma ka Baibala a nui.  Mai hea mai ia Baibala, a nawai i kakau?  Mai ke Akua mai ka Baibala, a na na Kaula i kakau ma o ke kokua ana mai o ka Uhane Hemolele ia lakou.  He poe hewa ole ka paha lakou?  Aole lakou he poe hewa, oiai, ua kokua mai ka Uhane Hemolele ia lakou.  He kanaka pono hoi o Aberahama, a heaha hoi ka mea i lawe ai i elua ana wahine?  a pela no hoi o Iakoba.  Ua hoike aku keia ma ka mokuna 16:17 o Kinohi, no Aberahama, a ua pili pu lakou.  Pela no hoi o Iakoba ma ka mokuna 29: 30 o Kinohi, a ua pili pu hou no.  Mahope o keia mau hoopaapaa hahana ana, kipaku ia mai la keia.  E ku oe a hoi i Mile.  Ia wa kii ia'ku la ko ia nei wahi puolo a kau ia'ku la iluna o ka waa, a hapai ia'ku la ka waa a lana i ke kai, a olelo hou mai penei.  E hoi oe i Mile, a ina aole oe e hoi, pepehiia oe e a'u a make.  Eia ka S. Kahelemauna, e pepehi mai no, ua makemake no au e make, oiai, o ko'u hoopopilikia ia ana ma ka inoa o Iesu, oia ka mea e nani ai.  A no keia mau hana ino a ke alii, hele mai la he kanaka okoa a olelo mai la i ke alii, e oluolu oe a me makou, e noho mai no oia ia nei e ao ai, a o ka poe makemake no i ke ao, e hele no, a o ka poe makemake ole no, aole no lakou e hele.  Aole no he oluolu o ua alii nei, aka, ma ka naau aloha i komo ia e ka Uhane o ke Akua iloko o kela kanaka iaia nei, eia hou kana olelo ma o S. Kahelemauna la, e hoi kaua i ko'u hale, a me a'u oe e noho ai, a e ao oe ia'u a me ko ka hale o'u.  Ae aku la keia, a kii ia'ku la ka waa ame kahi puolo, a lawe ia'ku la i ka home o ua kanaka opu aloha nei.  E ninau mai paha oukou, no hea ka ike o keia poe i hoopaapaa mai ai no Aberahama ma?  Ae, eia no ka haina, no ko lakou lohe i ka olelo ia e na kanaka o Mile a me kekahi mau enemi no e noho ana ma ia wahi, oia ka oiaio.  Iloko no o ia wa ua hoomaka no ke ao ana ma o ua kanaka nei a me ko ka hale ona.  He mau pule wale no, ua holo loa ka ike iloko o keia ohana.  Aka, i ka lohe ana o ua alii nei, ua ike a ua akamai ua ohana aloha nei, eia hou kana hana, kii hou oia e pepehi i na keiki i ao ia, a i ike i ke Akua oiaio.  I ka wa i kii ia'ku ai, e holo iho ana ua mau keiki nei, holo loa kahi a kau ma ka moku, a holo loa i Ebona, a o kahi, holo no e pee iloko o ka nahelehele.  Aka, i ka lohe ana o ke alii nui o ka mokupuni holookoa e noho ana ma Mile no keia mea, nui kona huhu no ka hana a keia kaukaualii, ua holo mai keia alii nui e hoopau i ka manao o keia alii a o ka palekana no ia.  He oiaio ka Iesu i olelo mai ai, "Aia hoi, owau no me oukou i na manawa a pau, a hiki i ka hopena o keia ao.  Amene."  Ma ia hope mai, ua holopono na hana, a ua nui na haumana a me ka poe makemake mai i ke ao ia.

            27. No Enijet a me ke komo ana o ka Euanelio.- O Enijet, he apana no ia no ka moku holookoa o Mile, aka, ma na inoa aina i loaa'i, e like me Ewa, Waianae a me Waialua, pela ke ano o keia.  He wahi ia i ae mua ia o ka Haku, oiai, aole mea nana i keakea ka Euanelio; no ka mea, oia ka mana o ka Euanelio a me ke Akua, ka waele e ana i ala no kana mau kauwa.  E hoonani, a e hiilani mau ia ke Akua.

            28. No Lukanwar.-O Lukanwar, aia oia ma ka akau o Mile, a ma ka hema o Ailineo, kahi o Etao i noho ai.  Ua like keia aina me Nalu, nui na keakea a me na hoina.  Eia ka mea e maopopo ai.  E hele ana oukou i hea? wahi a lakou. I hele mai nei makou e ao aku ia oukou.  I ke aha?  I ka Euanelio, ka olelo a ke Akua, ka olelo hoi o ke ola.  Aia i hea ke Akua, a heaha ia, a owai ia mea?  Aole o makou makemake i ke ao, a ua ike no makou i ka pono a me ka hewa.  Aka, aole no i hoolohe aku o Kahelemauna; aka, ua hoomaka aku oia e kukulu i hale no maua; a iaia no i eli ai i lua no ka pou a pau, a hookomo i ka pou iloko o ka lua, holo mai ke alii o ua wahi nei a huki i ka pou mai ka lua ae, kii no keia a hookomo hou; a pela no ka hana ana a hiki wale i ka wa a ke alii i lele mai ai a hope me na lima ikaika, a hana ino mai la, aole nae i hanaia'ku, a hookuu wale mai la no.  Olelo aku la ka poe i holo pu me maua i ua alii hana ino nei, na ke alii nui no i hoouna mai nei ia Kahelemauna, aole no he ae mai o ua alii nei.  Aka, noho no nae maua, oiai, ua ae mai no o Drue, ke alii nui, aka, ua nui no ka huhu o kela alii.  A hala he mau la, holo na alii nei a me kona kaikaina a me ko laua mau kanaka i ka po i ka lawaia malolo, a eono ka nui o na waa.  Ma ia la he malie, aole i ike ia he wahi o ka ino; a iloko no oia la, ke hele mai nei no ua alii nei me ke kipaku no ia maua, a he kohu puaahae, ke kepa ma o a maanei, me ka aa o na maka, a nau na kui.  Aka, ma ia holo ana a lakou i ua po la, ua loa i na pilikia, oia keia, ua ka ua, kui ka hekili, olapa ka uwila, ino ka moana; a iloko o keia ino mai ka aina mai, ia wa i huki ai ke kia o ka waa o ua alii huhu nei, a nahaehae na pea, ia wa mai, o na waa e ae, kii mai la a nakii me na kaula, me ka manao e huki i uka o ka aina, ia makaukau ana, hoomaka lakou e kolo, aka, nui loa mai ka ino, aole o kanawai, mahope iho, puhi ia'ku la lakou e ka makani a nalowale loa ka aina, a pau ae la na waa a pau i ka huli, a au lakou a pau i ke kai.            (Aole i pau.)

 

Hana Hupo!

            E ka Nupepa Kuokoa; Aloha oe:-

            Ua kono ia mai au e hoikeike aku i ka hana hupo a kekahi Maki i kapaia kona inoa o Kahawaii, i ike ai na hoa makai ona, i ka hakihaki kanawai o keia hua o lakou, a makau iho.

            Mawaena o ka hora 3 a me ka hora 4 P.M. o ka Poakahi iho nei, ua hopu ia iho la kekahi keiki opiopio i manao ole ia, he mai kona i makau ia e ka lehulehu, ua hele mai la oia me kona mau maka, i hele a me he maka la no ke kanaka inu awa, a heluhelu mai la i ka palapala hopu, me ka olelo pu, o keia palapala, he palapala hopu keia nou, no kou loaa ana i ka mai lepera. (mai pake)

            Ia wa ua puiwa au, no ka mea, aole i oiia mahiko o ka palapala hopu ka inoa o ka mea i hopu ia, a no ka awiwi loa o keia hana hupo, aole o'u wa e pale aku ai no kuu hoa aloha maikai, i hilinaiia, o ko ia la wa no ia i kena koke ae ai e komo i ka "Halewa" o ka pau ana ia o ko'u ike ana iaia, a hiki i ka hora 6, o ua ahiahi Poakolu la, hookuu ia mai la e ke kiuka aupuni.

            Me ka manao pilihua, ua au ae la au i kahi e ike hou aku ai i kuu makamaka oiaio, o na manao ia e luku ana i kuu puuwai lohea ana ka leo hoolana ua hookuu ia mai la ko hoa'loha, ua pau ka pilikia, ua hookuu loa ia mai la e ke kauka, akahi no a mama, hoi mai la ka oolok@ ana o ka puuwai a me he wai la.

            E Kahawaii, mai hana hou (e elike me keia, o-pa auanei ko lae i ka pohaku a Pio.

            Ina owau kau i hopu ai, me kou hoike ole i ka inoa o ka mea i hopu ia, i na o oe no hoi ka'u luahi.

            Nolaila, e na makai, mai puni i keia bana puni dala a Kahawaii, a i na oe e pane mai ana, no keia hana hupo au, alaila, e halawai auanei ko lehelehe me na oioi wela o Pakaalana.  E kali au a pane mai oe.

            Me ke aloha i ka Luna Hooponopono, a me na keiki hoonoho hua o ka Papa Pai.

            Welina aloha. S.P. KANOA, Kaakopua, Mar. 22, 1877.