Ka Nupepa Kuokoa, Volume XV, Number 51, 16 December 1876 — Page 4
| This text was transcribed by: | Leilani Lindsey-ka'apuni |
| This work is dedicated to: | 'Ahahui Siwila 'O Ke Aloha 'Aina |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA KUOKOA, ME KE AUOKOA I HUIIA.
COME NEARER JESUS.
Gospel Singer 127.
1
Laula ko Iesu aloha,
Me ka laula o ke kai;
He aloha ke hoopai la,
He aloha piha nei.
Ref.—Hea Iesu, Hee mai;
Lohe au la, hele ae.
2
Nan oia mai ka lani
I ka poe kaumaha nei,
Ike mai la a aloha
Me ke ahonui e.
Ref.—Hea Iesu, &c.
3
Oi ko Iesu aloha
I ko kanaka oonei;
Kamahao a lua ole
Ke aloha e ola’i.
Ref.—Hea Iesu, &c.
4
Palalaha ke aloha,
Ke aloha o Iesu,
Kiekie me ka lani,
A hohonu me ka po.
Ref.—Hea Iesu, &c.
5
Hele ae la i o Iesu la,
E na uhane uwe nei,
Nana no e hoohauoli,
Nana hoi e hoona mai.
Ref.—Hea Iesu, &c.
HAWAII.
HAAWINA KULA SABATI.
HELU 53.—SABATI, DEC. 31, 1876.
KUMU HANA.—Hoike makahiki.
PAUKU BAIBALA, I Sam 15 a Kekahuna 12, a Oih. 1—12.
Pauku Gula, “Ke hoolei mai nei oe i ka makahiki me kou lokomaikai.” Halelu 65: 11.
Mele. 8—6 Palua. Leo. Jesu ever near. Golden Chain p. 28.
1 Ala’e kakou a hoonoonoo,
Na Kula Sabati,
Ka la no nei e pau ae ai
Ka makahiki nei.
E hoomanao a paanaau
Na moolelo e,
Mai Ianuari a ia nei,
Ku a hoike mai.
2 Na kumuhana e hai mai,
Na puaku gula e
A hiki ole, nana hou,
Hoao i paa maikai.
Ka hana nae ka mea waiwai,
Ka malama maikai.
Ia Iesu i ke Kahu e,
Ka Haku e ola’i.
Pule hoomaikai i ke Akua no na pono i loaa mai iloko o keia makahiki &c.
Na Ninau e ke Kahu.
Na kane. Owai ke’lii o ka poe Iseraela ma ka Haawina I.? Heaha ka hewa nui i hoopauia’i ko Saula alii ana? Heaha ka pono nui o na’lii me na kanaka? A malama ole i ke Akua, pehea?
Na wahine. Haawina II. Owai ke pani no Saula? Nawai i koho a poni ia Davida? Mahea ka like ole o ko ke Akua me ko ke kanaka koho ana? Kowai koho ka kakou e ae aku ai? He Alii maikai anei Davida?
Na keiki kane. Haawina III. Owai kela kanaka nunui a Davida i pepehi ai? me keaha? Nohea ko Davida ikaika? Ma keaha kakou e lanakila’i maluna o na enemi o ka Uhane? Ma ka pule ka manaoio.
Na kaikamahine. Haawina IV. Lawe Saula ia Davida iloko o kona hale a hoohanohano ia ia, maluhia anei oia malaila? Aole, mai make no oia ia Saula. No keaha? Nawai oia i hoopakele? Nawai oukou e malama a hoomalu maikai? Keaha nae oukou i ke Akua?
Na pokii. Owai kela kanaka nunui? Golia ka luna koa o ka poe Pilisetia. Owai kela kanaka uuku i make ai Golia Davida. Heaha ka mea i make ai Golia? Owai ko oukou enemi nui? Ma keaha e pale ai ia ia?
Ke kula a pau. Haawina V. Owai ka mea i aloha nui ia Davida? Ua like laua me keaha? Owai na hoa kupono no kakou? Owai ka mea i aloha nui ia kakou, a haawi mai i kona ola iho i mea e ola’i kakou?
Na kane. Haawina VI. I ka wa i hiki ai ia Davida ke pepehi ia Saula, a kena ia oia e pepehi, pepehi anei oia i a ia? Ehia ona hoopakele ana i kona enemi? Heaha ka Iesu paipai ana no na enemi?
Na wahine. Haawina VII. Hai mai i ke ano o ko Saula make ana? Owai ka i make pu? Owai ka i haalele ia Saula no kona mau hewa? Pela mau anei, e haalele ana ke Akua i na’lii hewa, i na kanaka hewa? Owai ka i kanikau nui no ka make ana o Saula me Ionetana?
Na keiki kane. Haawina VIII. A make Saula, owai ka i poniia a hoonohoia i Alii no ka poe Iseraela? He mau mea keakea nae mamua, heaha ia mau mea, a pehea i pau ai? Mahea oia i alii mua ai? Ma Heberona. Mahea mahope? Ma Ierusalema. Ehia makahiki ma Heberona? Ehia ma Ierusalema? Hui ehia?
Na kaikamahine. Haawina IX. Heaha ka hana mua a Davida no ka pahu herita? Aia mahea ia pahu ia manawa? Ehia makahiki ma Risiatiarima? A lawe a malaila aku aihea? I Ziona.
Na pokii. Make Saula ke’lii no kona hewa, owai kona pani? Davida. Olioli anei Davida no ka make ana o Saula kona enemi? Aole, kanikau nui oia. Pono anei ke aloha i na enemi? Ae, olelo mai Iesu, e aloha aku i na enemi, e pule no lakou.
Ke kula a pau. Haawina 10—12. Hai mai i ko ke Akua aloha ia Davida me kona berita me ia. Heaha ke kumu o keia berita? Ko Davida manao e kukulu i luakini no Iehova.
Hai mai i ke kipi ana o Abesaloma, ke kumu a me ka hope, ke ano o kona make ana, ke kanikau ana o Davida ka makua. He mea maikai anei ke kipi? Heaha ka pono?
Mele. Robina Gula. Mele 2.
Hiki i na naau iki
Ke aloha ia Iesu;
Hiki i na uhane iki
Ke ao i na halelu.
Cho.—Iesu nani, e aloha,
Hoomaikai i na pokii,
Iesu nani, e hoolohe
I ko makou himeni.
Na kane. Ma ka hapaha ehia i kakau ia’i na haawina e ae e pili ana i ke Kauoha Kahiko? Ma ka hapaha ekolu. Hai mai i na kumuhana mua eono o ia hapaha?
1 Ke kauoha ana a Davida ia Solomona kana keiki. 2 Ke koho ana o Solomona. 3 Ka luakini o Solomona. 4 Ka hoolaa ana i ka luakini. 5 Ka pule hoolaa a Solomona. 6 Ka hoopomaikaiia o Solomona.
Na wahine. Heaha ka Solomona i koho ai? Mahalo anei ke Akua i kona koho ana? Heaha hoi kana olelo hoopomaikai? Heaha ka oukou e koho nei? Ka naauao, ka naaupo, ke ola, ka make?
Na keikikane. Ehia makahiki i hana’i Solomona a paa ka luakini? Mahea i kukuluia’i? Hai mai i kekahi mau mea e pili ane i ka luakini. Ka loa, ka laula, na keena, ka nani, &c.
Na kaikamahine. Ka hoolaa ana i ka luakini he mau ahaaina elua, owai? Owai? Ehia la? Lehulehu anei kanaka? A piha i keaha?
Na pokii. Owai ke Alii naauao loa? Solomona. Nawai i kukulu i ka luakini nani loa? Mahea? Heaha kekahi mau luakini? Ka luakini maoli, ka naau, ke kino, ka ekalesia, ka lani. Paulele nui anei oukou i ka luakini? Hookipa anei oukou i ke Akua iloko o ko oukou naau?
Ke kula a pau. Hai mai i na kumuhana o na haawina i koe o ka hapaha ekolu. 7 Ka leo kahea o ka naauao. 8 Ka waiwai o ka naauao. 9 Ka hana mau ana. 10 Ka ona me kona hope. 11 Ka wahine hana pono. 12 Ka noho haipule ana.
Na kane. Mahea ka leo kahea o ka naauao? Heaha hoi kona kahea ana? Sol. I. Heaha ka waiwai o ka naauao? Sol. III. E nana i keaha i mea paipai e hana mau? Heaha ka hope o ka hiamoe, ka molowa? Sol. VI. Hai mai i na ninau nona ka ona, a me kona hope? Sol. 23.
Na wahine. Mahea i kakauia’i na mea e pili ana i ka wahine hana pono? Sol. 31; 10—Hai mai i kekahi mau hana.
Na keiki. Ka noho haipule ana. Heaha ke kauoha ma Kekahuna 12;1? Ma ka wa hea e hoomanao ai i ke Akua, e huli ai, e mihi ai, e haipule ai? Heaha ka hewa ke hoopanee a elemakule, a luahine? Hai mai i na pauku 13, 14 o ka mok. 12 o Kekahuna.
Na pokii. Ua hele kekahi alii wahine e ike ia Solomona a e lohe i kona naauao, nohea ia wahine? Mahalo nui anei oia ia Solomona? A makana nui aku? Ae, owai ke Alii i oi aku ia Solomona? Mahalo nui anei oukou ia Iesu, me ka malama pono ia ia? Hai mai, Sol. 1;10. He mea nui ka naauao io, ke imi nui nei anei oukou i ka naauao oia hoi ka maka’u ia Iehova me ka malama i kona mau kanawai?
Ke kula a pau. Ma na hapaha ehia i kakauia’i ka haawina e pili ai i ke Kauoho Hou? Ma ka lua me ka ha. Hai mai i na kumuhana o na Haawina 12 o ka hapaha elua.
1 Ka pii ana o Iesu i ka lani. 2 Ka la Penetekota. 3 Ka Petero olelo pale, a paipai. 4 Ka ekalesia karistiano mua. 5 Ke kanaka oopa i hoolaia. 6 Ka mana o ko Iesu inoa. 7 Ka wiwo ole o Petero ma. 8 Ka launa karistiano. 9 Ka wahahee ana i ke Akua. 10 Na lunaolelo iloko o ka halepaahao. 11 Na lunaolelo imua o ka ahahookolokolo. 12 Ke koho ana i na diakona ehiku.
Mele. Ke’Lii Imanuela. Robina Gula. Mele 31. Elua pauku.
Na kane me na wahine. Ehia la mahope o ko Iesu ala hou ana a pii ae oia i ka lani? Mahea oia i pii aku ai, a owai hoi ka i ike? Heaha hoi ka olelo a na anela? Oih. I. Heaha ka la Penetekota, a me na hana kupanaha ma ia la? A pehea hoi e loaa’i na la Penetekota ia kakou? Heaha ka Petero mau olelo paipai, a hooweliweli ma ia la? Ehia hoi tausani i huli mai a bapetizoia ma ia la hookahi? Oih. 2.
Na keiki. He kanaka oopa, heaha ka oukou i hoomanao ai nona? Mahea i waiho ai me ke noi ana? Nawai i hoola? Ehia makahiki i moe oopa ai? Owai ka i huhu ia Petero ma no ka hoola ana i keia oopa? Ua huhuia, a papaia, a hooweliweliia, a hooleiia iloko o ka halepaahao na lunaolelo, no ka hai ana i ka Iesu olelo, maka’u anei lakou a haalele i ka haiana i ka Iesu olelo? Pono anei ia oukou ke maka’u i ke kanaka? Hai mai. Mataio 10;28.
Na pokii. He mau mea i wahahee i ke Akua owai laua? Anenia, me Sapaira. Heaha ko laua wahahee? Heaha ko laua hope? No ke dala kokua, ka make. He mea maka’u anei ka wahahee?
Ke kula a pau. Ehia diakona i kohoia? Owai? Ma ka hapaha hope, owai ka i hailukuia a make? Owai ka mea hoomaau nui, a huli ma o mahope? Owai ka lanakoa haipule i huli mai? Owai ka i pepehiia i ka pahikaua? Ewai? Owai ka i hooleiia iloko o ka halepaahao a hoopakeleia i ka make e ka anela?
Mele hou. 7. Leo—Wailuku.
I Pau ka makahiki nei,
Pau na Kula Sabati;
E hoonani ia Iesu,
Mele a hoomaikai pu.
2 No ka loaa ana mai
O na Kula Sabati
Me na aha halawai,
Me na mea hoopomaikai.
3 Mihi i na hewa e,
Na Iesu e kala mai.
Ala, a hoomaikai
No ka makahiki hou.
Pule a hookuu aku.
Haawina no Ianuari 7, 1877.—I Na Lii 12: 12—20.
NA PALAPALA I KE KUOKOA.
Kumumanao.
E KA NUPEPA KUOKOA E; Aloha oe:—
Ka wai ula iliahi a ka nui manu o ka uka i Olaa, e lawe poai nei ma na welelau o keia mau mokupuni, e ola nahe mai oe i keia wahi lau oliva, e kau kehakeha ae ma kahi kaawale o kou rumi.
I ka awakea o ka la 3 o Dekemaba, la Sabati, oiai e haiamu ana na ahahui ekolu ma Pihanarose i Laie-wai, e hoonanea ana hoi e lohe i ka haiolelo a J Kaohimaunu, kekahi lala o ka Hui Hoopololei. Ua hoomakaia ka hana me ka himeni leo nahenahe a ka Hui Opio Kaikamahine, a pau ia, pule o J W K Wailehua. Mahope oia, himeni hou; mahalo pihaia ka himeni a na lede ihu onaona o ka aina i ka mole olu o Waiapuka, a pau ia.
Ma ke noi a ke kakauoleloo kokua o ka Ahahui Hoopololei, oia o G B Kahoohua, e kapae i ke kahea ana ana o na inoa, a me ka heluhelu ana o ka moolelo o ka la i hala, aponoia ke noi.
Ma ke noi a G L Kanekapu, e hoomaka ia ka haiolelo, “No ka pono o ke kanu kalo,” aponoia. I ka Peresidena o keia aha a me na lala hanohano, a me na hui opio hoi, i akoakoa mai nei e ike i na hana o wa, aloha kakou.
No ko’ lilo ana i wahaolelo no kakou i keia manawa; auhea oukou e o‘u hoa kui lima o na alelo hoopono o ka ekalesia. Aole no paha keia ne mea e kanalua ai ko kakou noonoo ana, no ka pono o ke kanu kalo, no ka mea, oia ko kakou ai maa, mai na kupuna mai, a kau mai nei ia kakou i ka hanauna o hope nei. A he mea hoi e hookaawale aku ai i ka pololi, mai o kakou aku.
Ke noho mai nei na mokupuni o ke kai me ka hoomanao ana i nei mea he poi, mai ke kalo mai no ia. O ka ohana hea la o ka hanauna Hawaii i hiki ole ia ia ke hoomanao ana i ka poi? Aole e nele ka hoomanao ana i ka poi. A he mea pono anei ia kakou ke kapae ae i ke kanu kalo, a kanu i ka mea e ae? Aole! Aole loa no!! E kanu no i ke kalo. A no keia mea, wahi a ka olelo a kahiko “kii kalo paa i Waiahole. Eueu mai la hoi ka puapua o ko Ewa keiki, “kii kalo paa i Ewa.” E ulele iho ana ko Ewa keiki i ke kui poi, i kalo paa o Waiahole, wali a uouo ka poi. Uleu iho ana hoi ko Waiahole keiki i ke kalo paa o Ewa, aohe wali iki o ka ka puapuu, kahua o Kuanuunuu, a kahuli ke kalo paa la no Ewa. Pehea hoi kau e ka “Nupepa Kuokoa.” Uwau no me ke aloha, J. L. K. KEALAKUHILIMA.
Kumumanao.
E KA NUPEPA KUOKOA E; Aloha oe:—
Ka uwila e anapu nei mai na pea hulilua o ke ano a Kaliula, a malama aku hoi ma na welau o keia mau pukoa ku, mai Hawaii o Keawe, a ka la welo i ka mole olu o Lehua, a pulelo wale aku hoi mawaho o kou mau palena. E oluolu mai oe e kipona aku i keia wahi pua oliva, ma ka hapa waena o kou lei pua pikake, oia keia:
I ka la 26 o Novemaba, la Sabati, ua haiolelo ae o Nepai, kekahi lala o ka Hui Hoopololei ma ka luakini o Pihanarose i Laie-wai “No ka waiwai o kekanu raiki;”
Ia oukou e o‘u mau hoa kui olelo o nei mea he kula i na pauku Baibala i ke awakea o kela Sabati keia Sabati; a me na hoa kakaikahi o ka Hui opio Kaikamahine i akoakoa mai nei maanei, aloha oukou. Ua lilo ae nei au i wahaolelo no kakou i keia hora, no ka waiwai o ke kanu raiki. He mea mau, a maa hoi i ka poe imi waiwai, ke kilohi ana a halalo aku hoi i kahi o ka waiwai e ulu ai, a ua ike ia ka waiwai o ke kanu raiki.
E kiei aku kakou ma na pali hauliuli o Kailua, i Koolaupoko, nui ka poe raiki; pela mai no hoi ma Waiaholo. A ma Punaluu no hoi i Koolauloa, no ka waiwai o ke kanu raiki, ke hoomau nei keia mau aina i ke kanu ana i ka raiki.
Aole no hoi au e hoopoina i kekahi poe kanaka, i kanu raiki iho nei ma Laie-wai nei, a loaa iho nei kekahi mau palahaku ia lakou, oia o Kaio, a me Wahinealii, he haneri dala oi aku, pela no o Pupuawa &c. He mea keia e waiwai ai o ke kanu raiki.
No laila, ke olelo nei au ia oukou e ka Ahahui Hoopololei e kanu raiki ka waiwai. He mau malama wale no eono ka keia poe a‘u i hoike aku la, a pokeokoe wahi a ka pelehu lakaula.
Aka hoi, no ke kanu ana i ke kalo, he pono no ke kanu i ke kalo, o ko kakou ai makuahine no ia. A he loaa no hoi ka @e kalo, a he waiwai no hoi; lilo ae i ke kanu raiki, pololi oe me ka ohana, a lilo no hoi oe la, i ke keiki kanu kalo ka@iko i o Ewa, a nahe la.
J. L. K. KEALAKUHILIMA
Laie, Novemaba 27, 1876
Ka panina o ka Hoikeike Nui ma Piladelapia.
I ka la 10 o Novemaba, ua nui ka poe i akoakoa ae ma ke kahua o ka Hoikeike Nui o Piladelapia, no ka makaikai ana i ka hiohiona o ka panina hope loa o na ha na. Mahope koke iho o ka pau ana o ka hora 2 auina la, pii ae la ka Peresidena Kalani ma kahi kiekie i hoomakaukauia, i ukaliia e ke Kiaaina Hawley o Peniselavania, a me na Komisina o ka Hoikeike Nui, ka Papa Waiwai, na Komisina o na Aina e mai a me ka poe i konoia. Mahope o ka pau ana o ka pihoihoi nui o ke anaina i ka ike kino ana aku i ka Pereridena, ua meleia ka himeni i komo mua ia ai, a i hakuia no ka wehe mua loa ia ana o ka Hoikeike Nui ma ka la 10 o Mei. I ka pau ana o ke mele, ua pule mai o Rev Iosepa A. Reiss, alaila, meleia ka himeni i kapaia “Fogrie;” a puana mai la o Hon. D. J. Morrell, kekahi o na Komisina Hana o ka Hoikeike Nui, i ka haiolelo, a pauia, mele hou mai ka poe himeni i kekahi mau mele wae, alaila, haiolelo mai o Hon. Jno. Walch, ka Peresidena o na komite ma ka Papa. Himeni hou ia he mele, alaila haiolelo loihi mai o Generala Goshorn. A pau kana, mele hou ia he mele, alaila haiolelo mai ka Peresidena o na Komisina Hooponopono o ka Hoikeike Nui, e hahai mai ana i ka moolelo o ka Hoikeike Nui; alaila, kukala mai la o Peresidena Kalani, ua paniia ka Hoikeike Nui o 1876. Meleia he himeni a hoopauia na hana. He la ua lani pili ka la i paniia ai ka Hoikeike Nui.
Na hunahuna mea hou o na aina e.
NA UKU MAKAHIKI O NA POO KALAUNU.—Ma ka papa inoa malalo iho e ikeia na loaa makahiki o na Poo Kalaunu o Europa:
Emepera o Rusia, he $25,000 o ka hookahi la; ke Suletana o Tureke, $18,000 o ka la; Emepera o Auseturia, $10,000 o ka la; Emepera o Geremania, $8,200 o ka la; Moi o Italia, $6440 o ka la; Moiwahine o Enelani, $6,720 o ka la; Moi o Belgiuma, $1,643 o ka la; Peresidena o Farani, $500 o ka la. Ka uku makahiki o ka Peresidena o Amerika Huipuia, $137 o ka la.
O ka wahine waiwai loa ma Enelani, mailoko mai o na uku hoolimalima o kona mau aina, o Hon. Mrs. Mynell Ingram. He $200,000 na loaa ona iloko o ka makahiki mai keia mau hoolimalima.
Ke kokoke nei ka Emepera o Berazila e pai buke i ka moolelo o kona hele makaikai ana ia Amerika a me Europa. Ua paa i ke kakauia ka buke mua. Ma Parisi i Farani e paiia ai keia buke. O kana moolelo, ua kakauia ma ka olelo Pukiki, a ua unuhiia iloko o na olelo Enelani, Farani a me Geremania.
Ma na Kulanui o Yale, Harvard, a me Colombia o Amerika Huipuia, ua hoikeia ae, o na lilo o ke keiki hookahi no ka makahiki hookahi e noho haumana ai, ke hui ia kona mau lilo a pau, ua hiki aku no ia i ka $1,000. Ma ke Kulanui o Anherst, he $700 i ka makahiki. A ma na Kulanui o na mokuaina komohana, mai ka $300 ahiki i ka $350 na lilo.
O na lilo no ka hookahakaha nui o Delhi, Inia Hikina, no ke kuahaua ana aku i ka inoa hou o ka Moiwahine o Enelani, o ka “Emepera wahine o Inia,” ua hiki aku i ka puu dala nui he $1,250,000.
Ke olelo nei o Moody kela kanaka kaulana i ka haiolelo, aohe manaolana ana no ka hooponopono hou ia ana o ka poe ona rama, aia wale no a lilo io oia i karistiano.
Ke kukuluia nei ma Kikako kekahi hale nui, e hiki ai ia 8,000 poe ke noho i lalo a me 2,000 hou aku e kiei mai ai no ka hoolohe ana i na anaina haipule a Mr. Moody.
Ua hookohuia o Kadinela Simeoni, ko ka Pope Kuhina noho ma ke alo alii o Madarida, i Kuhina Nui no ka Pope ma Roma, ma kahi o Kadinela Antonelli i make.
Ua makemake loa ka poai o ka poe kalepa ma Livapulu i ka loheia ana aku o ko Mr. Tilden kohoia ana i Peresidena no Amerika Huipuia.
Elua mau kaikamahine i hele i ka Hoikeike Nui o Piladelapia me ko laua mau palapala holo maluna o na kaa ahi. A ia laua e nanea ana i ka makaikai i na hale hoikeike,me ke kuai nui i kekahi mau mea hoikeike, aia hoi, ike iho la laua, ua pokole ko laua wahi kakai, a o ka mea pilikia loa o ka haule ana o na palapala o laua. Nolaila, hooholo iho la laua, e kua i ko laua mau lauoho, a ua make no ka $3.75 pakahi, a me ia dala laua i hoohiki ia i ka home.
Ua nui na Mea Maikai ma keia Hale, Maka-aniani, Waki, Waki,
KAULA WAKI DALA, KAULA WAKI GULA, PU, PU, PU, NA PU WAHA-LUA, NA PU
Waha-kahi, Paula, Paula, Lu, Lu, o na ano a pau, Kukaepele Pu, Kukaepele Pu, Huila Humuhumu, Kui-Lopi, Aila, a me na mea a pau no na Huila. Na mea Gula Maikai, Pihi Palule, Pihi Lima, Kula Pepeiao, o kela ano keia ano, Pahi, Pakeke, Upa, Upa, Hale Manu, Kanana Ti, Kanana Kope, Eke Liilii, a me na Eke Nui, etc., etc.
EMI LOA NO KEIA MAU MEA A PAU NO KE KUAI KUIKE.
A. L. KAMIKA Opio.
Helu 73, Alanui Papu. 780-2m-787
KA AILA BALAKI A PINKHAMA!
—He Mea—
OLE KA WAI I KEIA AILA HAMO!
Palupalua Maikai na Ili Hooluu.
Ke noi haahaa ia’ku nei oukou, e hoao iho i keia
Aila Balaki, Hamohamo Palewai, Hoopalupalu Ili.
E kuai a e hoao i na Buti, Kamaa, Ili Kaao Kaa, a i na mea ili hooluu e ae paha i loaa ia oukou. Ua lana loa ka manao, ina oukou e hoao ana pela, e mahalo ana oukou, a hoomaikai aku auanei me ke kanalua ole. Ina e hamo pinepine ia i keia
AILA BALAKI HOOPALUPALU ILI,
E mau no ka palupalu maikai o na ili, me ka nakaka ole. Aole hoi no ka wa ua wale no e pono ai keia Aila, aka, no ka wa la kekahi. He 50 keneta no ke tini.
Aila Inika Balaki Hoomau Ili a PINKHAM.
He mea maikai loa, i hanapaka maoliia no ka hoopalupalu ana i na ili kaa lio, na kaulawaha lio, na noho lio, a pela aku. E hoao oe—Kumukuai no ke kini 75 keneta.
Na Olelo Mahalo.
HILO, Nov. 5, 1875.
Ua hoao pono wau i na Aila Hamo Kamaa e ae, a ua hoao pono no hoi i ka Aila Hamo Balaki a G. S. Pinkham; a ua hiki ia‘u ke olelo me ke kanalua ole, o keia Aila ka helu akahi, a me ka oi o ka maikai, o na Aila Balaki a pau a‘u i hoao ai. A. O. FORBES.
Ua hoao maua i na Aila Hamo Kamaa a G. S. Pinkham & Co., a ua oi aku ka maikai mamua o na Aila Hamo Kamaa mai na aina e mai.
R. A. LYMAN,
S. KIPI.
Hilo, Nov. 10, 1875 Kiaaina o Hawaii.
HILO, Nov. 10, 1875.
Ua hoao pinepine au i na Aila Hamo Kamaa a G. S. Pinkham & Co., a ua manao no au oia ka Aila Balaki Kamaa maikai mamua o na aila e ae a‘u i hoao ai mamua, a he oiaio keia.
C. K. HAPAI
HILO, Nov. 10, 1875.
No ko‘u ike oiaio loa o ka Aila Hamo Kamaa a G. S. Pinkham he Aila maikai loa no ka Hoowaliwali i ka ili. D. KAMAI.
Hanaia e G. S. PINKHAM & Co., ma Hilo, Hawaii.
E kuaiia aku no e BOLLES & Co., Agena, ma Honolulu. 780 3m 791
KA HUNT’S LAAU OLA
(HUNT’S REMEDY)
HE LAAU LAPAAU HOU, MAI AMERIKA MAI!
He Laau Maikai keia no
Na mai pehu i ka opu,
Na mai o ka puupaa a me ka opu mimi,
Mimi-paa, Mimi-eha, Mimi-helelei,
Ka lepo gravel iloko o ka opu-mimi,
Ka mana ole, kapalili, hui ono ole ka ai.
Na Mai Wahine,
NAWALIWALI O KE KINO,
LEPO ULA ILOKO O KA WAI MIMI,
MANOANOA PAHA KA WAI E like me keokeo o ka huamoa,
Like paha me na kaula silika keokeo, eleele, lenalena paha; a i ole ua like paha me ka lepo i anaiia i na iwi keokeo, a i ka mimi ana, ua wela oioi ka mai, me ka eha nui o ke kikala a me ka puhaka.
HE NUI NA HOIKE e ola nei, ka poe i loohia i keia mau mai i haiia maluna ae ua pau lakou i ke ola maikai, no ka inu ana i ka
HUNT LAAU OLA, (“HUNT REMEDY)”
UA HAAWI mua ia keia laau, e kekahi kahuna lapaau naauao, i ke kanaka mapehu o ka opu, e noho ana me ka ohana a Mr. Hunt; John Hunt kona inoa, he 45 kona mau makahiki, he kanaka nui poepoe, ua loohia i ka mai pehu. Ua haawiia kela me keia laau no keia mai, aole nae oluolu; ua mahuahua mau kona pilikia, ua pau loa ke kino a me na wawae i ka pehu; ua kokoke paa loa ka mimi; kokoke pau loa ka hana ana; a na mahuahua loa ka wai iloko o ke kino. Aole hiki iaia ke moe ilalo ma ka moe, nolaila, ua noho wale no iluna i ka po a me ke ao. Pela mau kona popilikia a hiki i kona hoao ana i keia laau, a ke kahuna i kuhikuhi mai ai. A i kona inu ana i keia laau, ua hoomaka koke ka oluolu. Ua paipai koke ia na puupaa i ka laua oihana; ua puka hou ka wai mimi a nui wale; ua emi koke mai la ka pehu o na wawae; a ua oluolu hou ke ake-mama i ka hanu ana; ua oluolu a maikai ka io o na lala, a e hoi nui mai a na ke ola maikai, alaila, me ke kuhihewa, ua waiho oia i ka laau i kekahi mau la. Ua pono ole nae ka waiho ana ia manawa, no ka mea, aole i ola io maoli kona mai pehu. Ua molowa hou na puupaa i ka laua oihana, a ua mahuahua hou ka wai iloko o ka opu, a ua popilikia hou e like me mamua. Alaila, ua inu hou oia i ua laau la, a ma ka hoomanawanui ana, ua lanakila hou auanei maluna o ka mai, a ua ola io maoli, a ka hoomaka hou oia i kana oihana mawaho o ka hale.
Oia ka lapaau mua ana me keia laau; a mai ia wa mai, (he 25 makahiki) ua ha hanaia keia laau e like me ka hana ana o Mr. Hunt, a ua haawi na kahuna lapaau i keia laau i ka poe mai pehu a me na mai like.
Mai ia manawa mai, ua ikeia, a mahaloia hoi keia laau, mai o a o, e na kanaka, a ua inu ia hoi ma ke ao ana a me ke ao ole ana mai o na kahuna lapaau; oia ka mea i hoola mai i na kanaka he nui, ka poe pilikia i ka mai pehu, a kokoke i ka make.
Na Kuhikuhi no ka inu ana:
E INU I KE PUNA TI PAHA, a hala na hora 4, alaila, e inu hou. E mahuahua liilii nae a hiki i elua puna ti piha—a hiki hoi auanei i puna nui piha.
NO KE KEIKI hookahi makahiki a hiki i na makahiki eono, e haawi 5 kulu, a hiki i na kulu 20; eha hora nae mawaena o ka haawi ana.
KUMUKUAI, he - - $1,50 no ka omole.
DILLINGHAM & CO.,
775 3M 787 Na Agena no ka Pae Aina Hawaii.