Ka Nupepa Kuokoa, Volume XV, Number 48, 25 Nowemapa 1876 — Page 4
KA NUPEPA KUOKOA, ME KE AU OKOA I HUIIA.
ONLY CHRIST.
Gospel Singer 29. 1
Iesu kuu ala e hele ai,
Iesu kuu hoa launa mai,
Iesu ka mana lani na'u,
Iesu kuu makamaka mau. Cho.— Iesu kuu waiwai no a pau, Kuu hilinai a mau a mau, Iesu ke Lii a nona au, Iesu ke Akua mau loa no'u.
2
Iesu kuu mea e paa ai, Iesu kuu pale kokua mai, Iesu kuu Haku e malama'i, Nana e kii ke auwana'e. Cho.— Iesu kuu waiwai no a pau, &c.
3
Iesu ka mea i make no'u, Iesu ke Kalahala o'u, Iesu ka lole ulii ia'u, Iesu kuu koo, pau kuu makau. Cho.— Iesu kuu waiwai no a pau, &c.
4 Iesu ka Lama olino mau, Iesu ke Kaula a Kumuao, Iesu ke Kahu nona mai Ka oli ka malu a pomaikai. Cho.— Iesu kuu waiwai no a pau, &c.
HAWAII.
HAAWINA KULA SABATI.
HELU 11, SABATI DEC. 10.
KUMUHANA.— Ka hoolahaia ana o ka Auanelio.
PAUKU BAIBALA.— Oih. 11 : 19 — 30
19 Nolaila, o ka poe i hoopuehuia i ka hoomaau ana i puka mai no Setepano, hele no lakou a hiki i Poinike, a i Kupero, a i Anetioka, e hai aku ana i ka olelo i na Iudaio wale no.
20 Kekahi poe o lakou, he mau kanaka no Kupero a no Kurenaio kekahi, a hiki lakou i Anetioka, ao mai la lakou i ko Helene, e hai mai ana i ka inoa o ka Haku o Iesu.
21 O ka lima pu o ka Haku kekahi me lakou ; nui loa iho la ka poe i manaoio aku, a huli i ka Haku.
22 Kaulana aku la ia mea a hiki i na pepeiao o ka ekalesia ma Ierusalema ; hoouna ae la lakou ia Barenaba e hele i Anetioka.
23 A hiki ae la ia, a ike ae la i ka hoomaikaiia e ke Akua, olioli iho la ia, a hooikaika mai la oia ia lakou a pau, e hoopili lakou i ka Haku me ka manao ikaika o ka naau.
24 No ka mea, he kanaka maikai ia, ua piha hoi i ka Uhane Hemolele, a me ka manaoio; a nui loa ae la ka poe i huiia ma ka Haku.
25 Alaila, aole aku la o Rarenaba i Tareso, e imi ia Saulo.
20 A loaa iho la, alakai mai la iaia i Anetioka. A puni no ko laua makahiki malaila, e hoakoakoa ana me ka ekalesia, a ao mai la i kanaka he nui loa. Ma Anetioka i kapa mua ia mai ai na haumana, o na Karistiano.
27 Ia mau la, hele mai la kekahi mau kaula, mai Ierusalema mai a Anetioka.
28 Ku mai la kekahi o lakou, o Agabo kona inoa, hoike mai ia ma ka Uhane, he wi nui e hiki mai ana ma na aina a pau ; a hiki io mai no i ke au ia Kelaudio Kaisara.
29 Alaila paa ka manao o na haumana, o kela mea keia mea e like me kona pono, e hoouka aku i ka manawalea na ka poe hoahanau i noho ma Iudea.
30. A hana io no hoi lakou ia mea, a hoouka aku la na ka poe lunakahiko, ma ka lima o Barenafla laua o Saulo.
Pauku Gula p. 21.
Mele. Him. 482. 8 — 6 Leo. 1 He nani no na kapuai
Ma ko Ziona puu, Ke ku nei e hoike mai
He ola no kakou. 3 Pomaikai no na pepeiao
I keia leo hou ; Na maka nei, pomaikai pu I keia nani mau.
Pule, i hoolaha nuiia aku ka olelo o ke ola ma na wahi a pau i loheia huli nui mai. Na ninau a na Kumu.
P 10. Nolaila, no ke aha ? Mok 8 : 1. Owai ka poe i hoopuehuia ? no ke aha ka hoopuehuia ana ? Hele kekahi i hea mamua ? i Samaria. A hele i hea mahope ? Mahea Poinike ? Ma ke komohana akau o Galilaia. Nolaila na kulanakauhale o Sidona me Turo. Mahea Kupero ? He mokupuni ia ma ka aoao hikina o ke Kaiwaenahonua. Mahea Anetioka ? He kulanakauhale ia ma Suria, e pili ana ia Galilaia. Hai lakou i ka olelo ia wai wale no ? No ke aha ? Mat 10 : 5, 6. Pehea ka Iesu kauoha ma Mat 10 : 7, 8 ? mokuna 28 : 19, 20.
P 20. Nohea kekahi poe o lakou ? Mahea Kurenaio ? Ma ke komohana o Aigupita. Ua lilo lakou i poe haumana na Iesu mamua, a mahope haiolelo lakou ia hai i na Helene. Pela ka pono, aia a huli mai kekahi, e ao koke aku ia hai.
P 21. Heaha pu kekahi me lakou ? Nui anei, uuku paha ka poe i manaoio a huli mai ? P 22. Heaha ka mea kaulana ? a hiki
aku ihea, Owai kai hoounaia e hele i hea ? Owai Barenaba ? mok. 9 : 27.
P 23. A hiki Barenaba i Anetioka, heaha kana i ike ai ? a aha oia ? A hooikaika ia lakou e hoopili ia wai ? me ke aha ? pili anei keia kauoha ia oukou ?
P 24. He kanaka aha Barenaba ? ua piha i na mea ehia ? Ka poe aha kai nui ? Pela anei maanei ?
P 25, 26. Hele Barenaba i hea ? e imi ana ia wai ? Mahea Tareso ? Nolaila anei Paulo ? A loaa Paulo, alakai oia iaia i hea ? Pehea ka loihi o ko laua noho pu ana ma Anetioka ? Heaha hoi ka hana ? Owai ka inoa hou i kapaia'i na haumana ? mahea mua ? No ke aha i kapaia'i he poe Karistiano ? Owai na inoa mamua ? Na haumana, na haipule, ko Nazareta, ko Galilaia. Mau anei keia inoa ? He poe oiaio anei na Kristiano a pau ?
P 27, 28. Ia mau la, owai ka i hele mai i Anetioka ! mai hea mai ? Owai ka inoa o kekahi kaula ? Heaha kana i hoike mai ai ma ka Uhane ? Ua hookoia anei ia wanana ? I ka wa hea ? Kaisara ehia Kelaudio ? Elima. Owai Kaisara mua ? Iulio. Owai ka lua ? Augusato. Owai ke kolu ? Tiberio. Owai ka ha ? Caligula. Owai ka lima ? Kelaudio. mak 41. Ma ka makahikiki 44 ka wi.
P 29, 30. Heaha ka manaopaa o kela o keia e hana no ka poe pilikia i keia wi ma Iudea ? Heaha ke ano o ka manawalea ? E like me kona pono, kona waiwai. Pela hoi kakou e hoohalike ai ke kokua i ka poe ilihune, a i ko na aina e. Ua hookoia anei ia manao paa ? Ma owai la i hooukaia'ku ai keia manawalea ? I owai la hoi ? Owai na lunakahiko ? Oia paha na diakona, e like me kela poe ehiku ma ka Mok. 6. Lakou na puuku o ka waiwai o ka ekalesia, ka waiwai manawalea, a na lakou e puunaue aku i ka poe ilihune. Elua hoi oihana i kekahi poe lunakahiko, oihana puuku, oihana haiolelo, oia hoi ka oihana Kahunapule me ke Kahu ekalesia.
Mele Oli na lilia, Robina Gula — Mele 37.
1 Oli na lilia,
Oli nahe nae, " Ole makou milo,
Ole luhi ae, Aloha ka makua, Nana i hanai." Na pua lilia nei,
Na pua lilia nani nei, O oli ae lakou, O oli pu hoi oukou.
(me ka pauku 5). Na Ninau a ke Kahu. Na makua. I ka hoi ana o Petero mai ka hale aku o Korenelio a Ierusalema, he wahi ohumu a hoohalahala o na Lunaolelo e ae no Petero, no ke aha ? Pehea Petero i wehewehe ai a hoapono ai, a hooluolu ai i na hoa ona ? Mok 11 : 1 — 17. A pehea lakou mahope iho o kona wehewehe ana ? p 18. Ua hoopuehuia na haumana, no ke aha ? mai hea aku ? a hele i hea ? i hea mua ? Hele lakou a aha ? Nui anei ka poe hoolohe a huli mai ? Nohea na haumana i ao aku i na Helene ? Na Keiki. Hai mai i kekahi mau aina a kulanakauhale iloko o keia Haawina. Poinike, Kupero, Anetioka, Kurenaio, Tareso, Iudea. Aia mahea ia mau wahi ? Owai ka i imi ia Paulo, a alakai aku iaia i Anetioka. Owai kekahi kaula i wanana no ka wi ? Ua hookoia anei kana wanana ? I ke au ia wai ? Owai kekahi kanaka i hai e mai, he mau makahiki ai ehiku, a he mau makahiki wi e huki ? Ua hookoia anei ?
Ke kula a pau. Hai mai i ka puku gula. Ina he wi, he pilikia nui ma kauwahi, heaha ka pono o ka poe pilikia ole ? Heaha ke ano o ke kokua manawalea ? Heaha ka pono o ka poe i lohe i ka olelo, a huli mai ? E ao aku ia hai. Kapa mua ia na haumana na Kristiano mahea ? Ehia ano o na Kristiano ? Hai mai i na Kaisara elima.
Mele, Marching Home, Robina Gula Mel 4. Ku a naue i ka home e, &c.
(Pauku 1, 2, 3).
Pule no na keiki, na kanaka a pau, i lilo lakou a pau i poe Kristiano oiaio. Haawina no Dec. 17 — Oih 12 : 1 — 17.
Mai Molokai mai.
E KA NUPEPA KUOKOA E ; Aloha oe :—
Mamuli o ke kauoha a ka Aha Mokupuni o Molokai, e hoike akea aku ka nupepa Kuokoa ma na palena a pau o keia Pae Moku i a J. Kanakokai he Komite huli dala no ka luakini o Kaluaaha, i hoomaemae hou ia iho nei e J. Kauo kamana. Ua hiki mai ka lono i keia Aha Luna me ka palapala pu mai a J. Kanakokai, e hoike mai ana i kona hookuia ia ma kana huakai, e hoole ana i kona mana ma ia hana komite. Ke hoakaka piha nei makou imua o ka lehulehu a pau, na makou no i koho a hoouna i a J. Kanakokai i Komite huli dala, no ka aie o na hoahanau i ka laau o ka luakini o Kaluaaha Molokai ma ka Mokupuni o Oahu ; na makou no i koho a hoouna i a J Kaoo i Komite huli dala ma ka Mokupuni o Maui ; ua hana makou a hooholo iloko o ko makou halawai mau o ka Aha Luna, a me ka halawai a ka Aha hoahanau o keia Ekalesia, no keia mau kumu malalo nei.
1. Ua haalele iho mai ke Kahu Ekalesia ia makou o E Kekoa, ka mea nana e alakai pono i na hana o keia aha.
2. Ua loaa mai ia makou ka laau o keia luakini, ma ke dala hookaa aku i kela hapaha keia hapaha makahiki, e like me ka mea e loaa ana ia makou
3 O na Apana o keia Ekalesia i keia wa, ua mokumoku liilii, a ua emi mai malalo o kona huina mua.
4. O ka loihi o ka manawa e noho ai ka halawai Lunakahiko o na Mokupuni o Maui, kahi e loaa mai ai ka mana komite o keia ano
O ka nui o ka aie i hoikeia, ua hiki aku kona huina i ka $962.10 O ka manawa hookaa, oia kahi kumu i hoikeia'ku la maluna. O ka manawa e pau ai, aole e oi mamua o ekahi makahiki
O keia aie i hoikeia'ku la, he koena ia o na mea i hookaaia e makou, a oia koena, ke huli ikaika nei makou e hoopau aku i na palapu o ia ano, a o ka nui o na pilikia o kela a o keia ano i keia makahiki. " Kauliilii na pua, I ka nui o na manu."
O ka emi o na hoahanau, no ke kaawale ana o kahi mau Apana, oia kahi kumu e pupu iki ai.
O ke dala ole kekahi o ko makou Mokupuni, aia no ke dala i Maui e hele ai e huli. (Makau mai ka moana.)
He nui aku no na mea e keakea mai ana i ko makou hooikaika i ka huli no keia pilikia nui.
Ua hewa makou i ka uhaki ana i ka rula a me ka mana o ka Aha Mokupuni o Maui. Pela io no.
Eia hoi, he wahi ninau i ka poe heluhelu.— Ina paha i Kaleponi ke Kauka lapaau o na mai o keia lahuikanaka i loaa ka laikini mai ka Papa Ola Hawaii aku, a he poe ike Kauka e ae no hoi kekahi e noho ana ma Hawaii nei ; a i loohia kekahi i ka mai nalulu, a nahu paha ma ka opu, a laoa i ka iwi o ka i-a, a okupe ma ka wawae ; e kali no anei ka lehulehu o ka mea pilikia a hoi mai kela Kauka mai Kaleponi mai ? He mea maopopo loa, e nui ana ka pilikia a me ka eha, a o ka make ka hope.
Eia ka pono, e huli aku, e imi i kahi mea makaukau e hiki ke hoola ia mau ano mai i loohia ia mai maluna o ka mea pilikia, a ina ua kupono ka ike me ka laau kupono, e ola ana kela pilikia, a e lana ana ka manao o ka lehulehu a me kona ohana ponoi no ke ola ana.
Pela no keia pilikia luakini. Aia i o loa ka halawai lunakahiko o ka mokupuni o Maui, ke kauka e loaa mai ai ke ola, oia hoi ka maua komite Ina hoi e kali aku ana ia kauka, alaila, e hoopaaia ana paha ka luakini o Iehova no ka moraki, no ka aie.
Nolaila, ua hana olelo hooholo na ohana o keia mai nui. " He loaa i ka laau a ka haole no ka luakini o Kaluaaha," nolaila, ua hoouna i a Kanakokai i komite, e hele aku ma ka mokupuni o Maui, e huli aku i kahi poe aloha karistiano, e haawi mai i kahi mau wahi laau ola no keia mai. (He wahi dala.)
A ina e loaa mai ia poe uhane ike, uhane alohi ka laau ka laau maikai. E ola mau loa ana ! E ola mau loa ana !! A e hoonani nui ia ka inoa o ke Akua ma na lani kiekie loa. He malu ma ka honua. He aloha i na hunahuna lepo. Me ka welina pau ole i na keiki o ka hale pai.
J W M POOHEA. Kakauolelo o ka P. K. M. W.
Make i aloha nuiia.
E KA NUPEPA KUOKOA E, Aloha oe :—
E oluolu paha oe a me kou kapena e lawe aku i keia puolo kaumaha, i ike mai na kini makamaka o makou mai Hawaii o Keawe a Kauai o Mano. Ma ka la 22 o Okatoba, 1877, make emoole aku la o Iokewe Kauhiahiwa me ka mai ole. Ua haku iho makou i wahi kanikau nona oia keia malalo iho :
He kanikau he aloha keia nou e Iokewe Kauhiahiwa,
Kuu kane mai ka la wela o Waianae, Mai ka hau anu o Kaala. Kuu kane mai ka makani kaiaulu o ka aina Aloha ia wahi a kaua e noho ai
Auwe kuu kane — a. Kuu kane mai ka ia kahea i ka pali, Kuu kane mai ka malu o ka inia, Aloha ia wahi a kaua e noho ai,
Auwe kuu kane — e. Kuu kane mai ka la wela o Kamakalii, Mai ka po anu o ka hooilo, Kuu makua o kahi makua ole
Auwe kuu kane — e. APIKAIIA. He kanikau aloha keia no Iokewe Kauhiahiwa,
Kuu kane mai ka makani kaiaulu o Waianae,
E wehe aku ana i ka poli o ka hoa, aole ke kane, Ka hoa ohumu o kahi mehameha.
Auwe kuu kane. Kuu kane i ka hau anu o Kaala Mai ka uka anu o Kanewai, Aloha ia wahi a kaua e noho ai,
Auwe kuu kane.
Kuu kane, mai ka ea wela o Puea, Hoomaha'ku kaua i ka malu o Kaima Aloha ia wahi a kaua e noho ai,
Auwe kuu kane. ANA MAHIAI.
Kuu kaikaina mai ka pono a ke Akua, Kahi a kaua i iini ai i ka naauao a hala oe noho au,
Auwe kuu kaikaina aloha oe mahalo iho nei AKAMU KAULEHUA. Kuu makuakane aloha oe i hala aku nei I ke ala hoi ole mai. Noho iho nei makou na keiki me ka u me me ka minamina ia oe,
Auwe kuu makuakane.
IOKEPINE KAMAKA. Kanikau la he aloha Nou no e papa,
Kuu makuakane mai ka la wela o Waianae Mai ka pii'na ikiiki o Kolekole, Mai ke kula loa o Puhawai Aloha ia wahi a kana e hele ai, Kuu makuakane hoi — e. Kuu makuakane mai ka makani olu he kaiaulu E wehe ana i ka lau niu o Poka-i Mai ka ia mili lima o ke Kaha, Alo aku o ke kula loa o Maili Ilihia iho nei loko i ko aloha, Ke noho nei au me ka u me ka minamina, Kuu makuakane ho — i. Kuu makuakane mai ka huikau o na lio, E hai nua ana i ka uka o Mikilua. Kuu makuakane ohumu o kahi mehameha, Mehameha ka hale ua hele oe, Hele oe i ke ala hoi ole mai. Hopu hewa au i ke kino wailua,
Auwe kuu papa e
Kuu papa hoi — e. PULE opio. He kanikau aloha keia nou e Iokewe Kauhiahiwa
Kuu kaikuaana mai ka ua liilii la o Halona Aloha ia wahi a kaua i noho ai, Kuu kaikuaana mai ka la wela o Puuliilii Aloha wale ia wahi a kaua e hele ai,
Auwe kuu kaikuaana — e. KAIWIAKEA. He u he aloha la ia oe e Iokewe Kauhiahiwa Kuu kane mai ka la wela o Puea Aloha ia wahi a kakou e noho ai Kuu kane aohe oe he kane, he makua no kahi makua ole,
Auwe kuu kane — e. Kuu kane mai ka ihu o ka lio Mai ka pii'na ikiiki la o Mikilua, Aloha ia wahi a kakou e hele ai i ka ua me ka makani, Hoomaha aku i Kahalahala, Hala aku nei oe ma ka poli o ka Haku Manaloa
Auwe kuu kane — e. KELIIMAHIAI.
Aloha wale kuu makuakane mai ke ahe a ka makani he Moae,
Kuu makuakane mai ka malu hau o Puea, Ke noho la ka mea nui a kuu makuakane owau Aloha wale oe i nalo aku la I ke ala hoi ole mai,
Auwe kuu makuakane — e.
KELIIMAHIAI liilii.
ANOAI I KA LEHULEHU,
E kipa mai a e nana
i kumaka ka ike i na waiwai na-
ni i loaa mai nei iloko o na
La Kulaia iho nei.
Penei ke ano o ua mau waiwai la :
Na Wati a me na kaula Gula,
a na Lede a me na Keonimana !
NA KAULA OPELE A NA LEDE
NA KOMO GULA NANI O KELA A ME KEIA
ano o na Lede a me na Keonimana !
NA KUPEE GULA,
NA LIPINE GULA,
Na gula pepeiao o na wahine !
e oaka ai i na pepeiao, a e hulali ai
hoi na manamana lima, a e
kilipohe ai hoi na a-i.
Na komo humuhumu gula a me ke kala,
Na pihi pulima gula wahine a kane,
Na laketa gula lei wahine nani,
Na komo daimana o na Lede.
Na kaula laketa,
Na pine omau kihei,
Na laketa aniani,
Na huka gula wahine.
NA LAKO HALE.
NA PUNA,
NA PAHI,
NA KIAHA, KALA,
NA APO KALA,
NA KAWELE holoi lima,
NA O DALA o kela a me keia ano,
a me na mea nani e ae no he nui wale.
E kuaiia aku ana no
ma ke kumukuai haahaa loa i ko
na wahi e ae o ke taona nei.
UA MAKAUKAU NO HOI NA
mea nani no kanaka makua
a me na kamalii.
Na Kamaa Paa Loa,
e loaa no maanei e like me ka
makemake ; a ina e loaa
koke ka ino, he hiki
no ke hoihoi mai.
M. McINERNY.
Kihi o Alanui Papu a me Kalepa. 775 3m 787
*
Ua nui na Mea Maikai ma keia Hale, Maka-aniani, Waki, Waki,
KAULA WAKI DALA, KAULA WAKI GULA. PU, PU, PU, NA PU WAHA-LUA, NA PU WAha-kahi. Paula, Paula, Lu, Lu, o na ano a pau. Kukaepele Pu, Kukaepele Pu.. Huila Hanahana, Kui, Lopi, Aila, a me na mea a pau no na Huila. Na mea Gula Maikai, Pihi Palule, Pihi Lima, Kula Pepeiao, o kela ano keia ano, Pahi, Pakeke, Upa, Upa, Hale Manu, Kanana Ti, Kanana Kope, Eke Liilii, a me na Eke Nui, etc., etc.
EMI LOA NO KEIA MAU MEA A PAU NO KE KUAI KUIKE.
A. L. KAMIKA Opio.
Helu 73, Alanui Papu. 780 2m 787
KA AILA BALAKI A PINKHAMA !
— He Mea —
OLE KA WAI I KELA AILA HAMO ! Palupalu Maikai na Ili Hooluu.
Ke noi haahaa ia'ku nei oukou, e hoao iho i keia
Aila Balaki, Hamohamo Palewai, Hoopalupalu lli.
E kuai a e hoao i na Buti, Kamaa. Ili Kauo Kaa, a i na mea ili hooluu e ae paha i loaa ia oukou. Ua lana loa ka manao, ina oukou e hoao ana pela, e mahalo ana oukou, a hoomaikai aku auanei me ke kanalua ole. Ina e hamo pinepine ia i keia
AILA BALAKI HOOPALUPALU ILI,
E mau no ka palupalu maikai o na ili, me ka nakaka ole. Aole hoi no ka wa ua wale no e pono ai keia Aila, aka, no ka wa la kekahi. He 30 keneta no ke tini.
Aila Inika Balaki Hoomau Ili a PINKHAM.
He mea maikai loa, i hanapaka maoliia no ka hoopalupalu ana i na ili kaa lio, na kaulawaha lio, na noho lio, a pela aku. E hoao oe — Kumukuai no ke kini 75 keneta.
Na Olelo Mahalo.
HILO, Nov. 5. 1875.
Ua hoao pono wau i na Aila Hamo Kamaa e ae, a ua hoao pono no hoi i ka Aila Hamo Balaki a G. S. Pinkham ; a ua hiki ia'u ke olelo me ke kanalua ole, o keia Aila ka helu akahi, a me ka oi o ka maikai, o na Aila Balaki a pau a'u i hoao ai. A. O. FORBES.
Ua hoao maua i na Aila Hamo Kamaa a G. S. Pinkham & Co., a ua oi aku ka maikai mamua o na Aila Hamo Kamaa mai na aina e mai. R. A. LYMAN, S. KIPI. Hilo. Nov. 10, 1875. Kiaaina o Hawaii.
HILO, Nov. 10, 1875.
Ua hoao pinepine au i na Aila Hamo Kamaa a G. S. Pinkham & Co., a ua manao no au oia ka Aila Balaki Kamaa maikai mamua o na aila e ae a'u i hoao ai mamua, a he oiaio keia.
C. K. HAPAI.
HILO, Nov. 10, 1875.
No ko'u ike oiaio loa o ka Aila Hamo Kamaa a G. S. Pinkham he Aila maikai loa no ka Hoowaliwali i ka ili. D. KAMAI.
Hanaia e G. S. PINKHAM & Co., ma Hilo, Hawaii. E kuaiia aku no e BOLLES & Co., Agena, ma Honolulu. 780 3m 791
KA HUNT'S LAAU OLA
(HUNT'S REMEDY)
HE LAAU LAPAAU HOU, MAI AMERIKA MAI !
He Laau Maikai keia no
Na mai pehu o ka opu,
Na mai o ka puupaa a me ka opu mimi,
Mimi-paa, Mimi-eha, Mimi-helelei,
Ka lepo gravel iloko o ka opu-mimi,
Ka mana ole, kapalili, hui ono ole ka ai.
Na Mai Wahine,
NAWALIWALI O KE KINO,
LEPO ULA ILOKO O KA WAI MIMI,
MANOANOA PAHA KA WAI E like me keokeo o ka huamoa,
Like paha me na kaula silika keokeo, eleele, lenalena paha ; a i ole ua like paha me
ka lepo i anaiia i na iwi keokeo, a i ka mimi ana, ua wela oioi ka
mai, me ka eha nui o ke kikala a me ka puhaka.
HE NUI NA HOIKE e ola nei, ka poe i loohia i keia mau mai i haiia maluna ae,
ua pau lakou i ke ola maikai, no ka inu ana i ka
HUNT LAAU OLA. ("HUNT REMEDY)!"
UA HAAWI mua ia keia laau, e kekahi kahuna lapaau naauao, i ke kanaka mai
pehu o ka opu, e noho ana me ka ohana a Mr. Hunt ; John Hunt kona inoa, he 45 kona
mau makahiki, he kanaka nui poepoe, ua loohia i ka mai pehu. Ua haawiia kela me
keia laau no keia mai, aole nae oluolu ; ua mahuahua mau kona pilikia, ua pau loa ke
kino a me na wawae i ka pehu ; ua kokoke paa loa ka mimi ; kokoke pau loa ka hanu
ana ; a ua mahuahua loa ka wai iloko o ke kino. Aole hiki iaia ke moe ilalo ma ka
moe, nolaila, ua noho wale no iluna i ka po a me ke ao. Pela mau kona popilikia a hi-
ki i kona hoao ana i keia laau, a ke kahuna i kuhikuhi mai ai. A i kona inu ana i ke-
ia laau, ua hoomaka koke ka oluolu. Ua paipai koke ia ka puupaa i ka laua oihana ;
ua puka hou ka wai mimi a nui wale ; ua emi koke mai la ka pehu o na waewae ; a ua
oluolu hou ke ake-mama i ka hanu ana ; ua oluolu a maikai ka io o na lala, a e hoi nui
mai ana ke ola maikai, alaila, me ke kuhihewa, ua waiho oia i ka laau i kekahi mau
la. Ua pono ole nae ka waiho ana ia manawa, no ka mea, aole i ola io maoli kona mai
pehu. Ua molowa hou na puupaa i ka laua oihana, a ua mahuahua hou ka wai iloko o
ka opu, a ua popilikia hou e like me mamua. Alaila, ua inu hou oia i ua laau la, a ma
ka hoomanawanui ana, ua lanakila hou auanei maluna o ka mai, a ua ola io maoli, a
ua hoomaka hou oia i kana oihana mawaho o ka hale.
Oia ka lapaau mua ana me keia laau ; a mai ia wa mai, (he 25 makahiki) ua ha-
hanaia keia laau e like me ka hana ana o Mr. Hunt, a ua haawi na kahuna lapaau i ke-
ia laau i ka poe mai pehu a me na mai like.
Mai ia manawa mai, ua ikeia, e mahaloia hoi keia laau, mai o a o, e na kana-
ka, a ua inu ia hoi ma ke ao ana a me ke ao ole ana mai o na kahuna lapaau ; oia ka
mea i hoola mai i na kanaka he nui, ka poe pilikia i ka mai pehu, a kokoke i ka make.
Na kuhikuhi no ka inu ana :
E INU I KE PUNA TI PIHA, a hala na hora 4, alaila, e inu hou. E mahuahua
liilii nae a hiki i elua puna ti piha — a hiki hoi auanei i puna nui piha.
NO KE KEIKI hookahi makahiki a hiki i na makahiki eono, e haawi 5 kulu, a hi-
ki i na kulu 20 ; eha hora nae mawaena o ka haawi ana.
KUMUKUAI, he - - $1.50 no ka omole.
DILLINGHAM & CO.,
762 3m 774 Na Agena no ka Pae Aina Hawaii.