Ka Nupepa Kuokoa, Volume XV, Number 46, 11 November 1876 — Page 2
KA NUPEPA KUOKOA, ME KE AU OKOA I HUIIA.
MA KE KAUOHA.
O ka Poaha, la 16 o Novemaba, oia ka la hanau o ke Alii
ka Moi, e malamaia i la Kulaia Aupuni ; e pani ia na puka o na Hale Oihana Aupuni a puni ka aina.
W. L. MOEHONUA.
Keena Kalaiaina, Nov. 3, 1876. Kuhina Kalaiaina.
Ua hookohuia ka poe nona na inoa malolo iho i keia la,
Agena Hooholo Palapala Kepa i kulike ai me na hooko ana o
ke kanawai e hoololi ai i na Pauku 1 me 2 o ke Kanawai e
hoohana ana i na Palapala Kepa, malalo o ka Pauku 1417 o
ke Kanawai Kivila i aponoia ma ka la 24 o Iulai, 1872, a
aponoia i ka la 25 o Sepatemaba A. D. 1876 :
E W Wilcox....................Lihue a me Kola, Kauai.
W. L. MOEHONUA.
Keena Kalaiaina, Nov. 6, 1876. Kuhina Kalaiaina.
KE hoike aku nei ka lohe i na mea a pau, mai keia la a mahope aku nei , o ka poe a pau i loaa ka mana hoo-
kahekahe wai maloko aku o ka piula wai aupuni e Ho-
kohuia nei, ua aeia lakou e hookahekahe mai ka hora 6 ahiki i ka 8 A M a mai ka hora 4 ahiki i ka hora 6 P M. o na la a pau, aole ma kekahi wa e ae.
O ka poe a pau e a-e hewa ana maluna aku o keia olelo papaia, e hoopaaia no ko lakou mau piula wai, a e okiia ko
lakou mau wahi e loaa ai ka wai mai ka ha-wai mai mai ke alanui. ROBERT LISHMAN, Luna Wai.
Keena Hana, Honolulu, Nov. 3, 1876.
Aponoia :
W. L. Moehonua, Kuhina Kalaiaina. 730
UA hookohuia o Mr. Robert Lishman i kela la, i Luna Alanui no ka mokupuni o Oahu, ma kahi o Kapena G. H. Luce ; a ua hookohuia no i Luna Wai ma kahi o Kapena
H S Howland. W L MOEHONUA.
Kuhina Kalaiaina. Keena Kalaiaina, Oct. 21, 1876. 770 2ts 761
UA hookohuia na Keonimana malalo iho i mau Agena Haawi Palapala Ae Mare ; oia keia :
K. Kamauoha...........No Kona Hema, H.
G W Kauwenaole ........No Lanai.
W. L. MOEHONUA, Kuhina Kalaiaina. Keena Kalaiaina, Oct. 26, 1876. 779 2ts 781
I kulike ai me ka Pauku 231 o ke Kanawai Kivila, a e hookaawaleia ana kekahi Pa no na holoholona aea wale no ka Apana o Hilo, mokupuni o Hawaii, ma kahi i kapa ia o Kaakepa, ma kai o ke Alanui Aupuni.
W. L. MOEHONUA. Kuhina Kalaiaina.
Oct. 24, 1876. 779 3ts 781
I kulike ai me ka Pauku 232 o ke Kanawai Kivila, ke hoonoho a ke hookohu aku nei au i Pani i Luna Pa no na holoholona aea wale ma ka Apana o Hilo, Mokupuni o Hawaii, ma kahi i hai ia ae la. S. KIPI.
Kiaaina o Hawaii.
Hilo, Oct. 26, 1876. 779 2ts 781
NA LUNA AUHAU.— Ua hookohuia na poe malalo iho i mau Luna Auhau no na apana ohi auhau o ke aupuni :
Oahu.
Honolulu.........................George H. Luce.
Ewa and Wainae ...........A. Kaoliko.
Waialua...........................J. Armala. Koolauloa.......................Paukialani.
Koolaupoko...................John K. Wilder.
Maui.
Lahaina..........................J. O. Kawehe.
Wailuku.........................L. Aholo.
Makawao......................J. A. Nahaku.
Hana.............................J. B. Kamai.
Molokai and Lanai........J. A. Kaukau.
Hawaii.
Hilo..............................J. W. Keaomakani.
Puna............................F. H. Elderts.
Kau.............................W. T. Martin.
S. Kona.......................R. H. Nahinu.
N. Kona.......................J. G. Hoapili.
S. Kohala.....................R. P. Kuikahi.
N. Kohala ....................James Wood.
Hamakua......................C. Williams.
Kauai.
Hanalei..........................H. J. Wana.
Anahola.........................L. Kapahuelima.
Lihue.............. .............P. Puhiula.
Koloa...........................Palakaluhi.
Waimea.........................J. H. Kapuniai.
Niihau......... ..................Kaike.
J. S. WALKER — Kuhina Waiwai Oct. 24, 1876. 3ts.
UA hookohuia ka poe nona na inoa malalo iho, i mau Agena Hooiaio Palapala Kepa, i kupono ai me na hooko ana o ke Kanawai e hoololi ai i na pauku 1 a me 2 o ke kanawai i hoomanaia e ka pauku 1417 o ke Kanawai Kivila, i aponoia 1 Iulai 26, 1872, 1 i aponoia i Kepakemaba 25, 1876.
L. Severance.......Hilo, Hawaii.
J W Keaomakani...... " "
Simona K. Kaai............Kona Akau a me Hema.
G W D Halemanu }...... Hamakua, Hawaii
J K Kaunamano }
C K Kapule.................Makawao, Maui.
T N Birch.....................Wailuku, Maui.
D Aholo }..................Lahaina, Maui.
D Kamalopili }
J W Kalua................... Lanai.
W L MOEHONUA, Kuhina Kalaiaina. Keena Kalaiaina, Oct 14, 1876. 777 3ts 779
Ka Nupepa Kuokoa
— ME — Ke Au Okoa
I HUIIA.
Published every Saturday, $2 a year
HONOLULU, NOVEMABA 11, 1876.
E HIKI ANA na makahiki o ke Alii ka MOI KALAKAUA i ke kanaha i keia Poaha aku, November 16, a e hooliloia ana ia la holookoa i la kulaia aupuni, a e paniia ana no na hale aupuni a pau o ke aupuni ma
ia la. — E wehe ia ana ka puka o Halealii ma ka hora 11 A. M. a hiki i ka hora 12 M. o ka Poaha, la 16 Nov., no na keonimana a pau o ke kulanakauhale e hele aku ana e ike i ka Moi Kalakaua.
MA KE AHIAHI POAKAHI iho nei, ua kuu aku ke Alii ka Moiwahine Kapiolani, i ukaliia e kona kaikaina alii Pooloku maluna o ke " Kilauea" a holo aku la uo Hilo. Ua ukali ae ke Alii ka Moi, na Mea Kiekie na Kama Alii Leleiohoku, Kamakaeha a me Kauluohi a hiki i luna o ka mokuahi. He ola maikai ko na Moi i ka makou ike aku a pela no na kama alii. Mamua o ka hoohuli ana ae o ka mokuahi e au aku i na kai ewalu, ua haawi mai la na pu o Puowaina i ka hoailona, ke laweia la ka Moiwahine e ike kumaka i ka ua Kanilehua, e papahi mai i na lehua o Makaulele a e lei i na ohu o Puuaewa. Malia paha e hookaulua ana oia ma Olaa, a mailaila aku i ka home nona ka wahine kaulana e makaikai mau ia nei o na kamaaina a me na malihini. Malia paha e huli hoi ae ana ia ma ka " paia ala" a i Hilo a ma ka aina mai i Hamakua. Ua manao ia e hala ana, he ekolu hebedoma me
keia huakai hele a ko kakou Moiwahine
ilihia. E uhaiia kana huakai o ka malie
a me ka oluolu a na kona mau makaai-
nana e malama ma na wahi a pau, ana e
hele ai a e luana ai.
UA LONO MAI MAKOU, mamuli o ka poino ana o ke aumoku pepehi kohola o ka Arita i keia makahiki, a e hakahaka ana paha ia kula dala nui wale, nolaila, ua hoi aku nei kekahi keiki ona moku, a i ole, o kona makuakane paha he ona moku nui ia, me ka manao e hoolako hou i ona mau moku okohola hou, a hoouna mai no ka moana Arita. Ke makemake nei makou, e hooholo mua ia keia manao, a e halawai ma ia me na manao lokahi e hapai hou i ka oihana pepehi kohola i paniia ai ka makalua i poho mamuli o ka apo ana mai a ka hau puliki.
UA OLIOLI MAKOU i ka hoike aku, ke kukulu nei o Mr. Hopper he wili hoomaemae laiki ma Pakaka na ka mahu e hookaa i na wili hoomaemae laiki. Ua kupono loa keia hapai ana i na ano hana pela i mea e hoomahuahua aku ai i ko kakou poe paahana ma na hana mikiala kuloko iho. Aole makou e kala e puhi mau nei i ko makou ole no ke kokua ana i na hana e hoopii ae ai i ko kakou poe hana ole a komo ma kahi o ka noho hana ana.
UA HOOPOMAIKAI mai ko ka lani i ko ke kulanakauhale nei mamuli o kona hoouna ana mai i kokua makawalu i ke ahiahi Poaha iho nei, nona ka keia kulanakauhale holookoa i mahalo piha ai iloko o ka noho ana inea wai o keia mau la panoa aku nei, a na poe waiwai i lele ai ka oili a hopohopo.
KE HOPOHOPO nei makou i keia manawa malia e hiki mai ana he wa no kakou e wi ai. Aole no paha e liuliu ana a hiki io mai. Aole makou ma ka ano kaula keia wanana e ana i o la honua, aka ma ka ike iho, ke miki mai nei na pake i na aina mahi kalo e lilo ia lakou ma ka hoolimalima, a e hoopiha i ke kanu ana i ka laiki. Ina ua punihei aku nei oukou, e hiki io mai no ka hopena o ka wi.
He mea no hoi kekahi i maa ia makou, ina e puka ana ka ai i kekahi mau makahiki a ina hookahi makahiki e haule ai, o ka palaleha mai la no ia o na kanaka i ke kanu ana. Molowa iho la a manaka i ke kanu hou aku. No keia mea makou e paipai pinepine nei i keia mau malama elua, e kanu i ke kalo o wi auanei kakou. Ke hoolohe mai nei paha oukou, aole paha. Aka " he kuli ka make a he lohe ke ola."
UA LOHE MAI makou, he elua iho nei noho ana o ka Papa Hoopae Limahana i keia mau hebedoma elua, no ka noonoo ana i ke kumumanao nui oia ka hooulu lahui. Ua kaana lakou ia loko iho nei o ka aina, a aole i loaa ia lakou na anoano e ulu koke ai, koe wale no ko lakou nana ana aku ia waho. He makehewa wale no keia mau makahiki momona aku o kakou ehiku, ke ole ka lahui ma ka aina e pani i na makaluo o na Hawaii e make nei i kela a me keia wa. Aole no hoi e hiki i kekahi aina ke holo imua, ina aole o na lahui. He makehewa hoi kekahi lahui ina aole ona waiwai. Nolaila, o ka manaolana mua o kekahi aina, oia na kanaka, a o ka lua, ka waiwai.
Ua hooholo iho nei lakou e hoao i ka lawe ana mai i na pukiki o na mokupuni komohana, aole hoi i na pake, no ka mea, ua mahuahua iki hoi lakou ma ka aina nei. He poe maikai keia, pela ka lohe wale mai, aka, eia ka ninau, he poe mahiai anei lakou ? Aohe anei o ka lakou hana nui ka uwi waiu a kalewa aku ?
Aole no e waiwai kekaki lahui ina aole he nui o kana mea i hooulu ai ma kona
aina iho a hoouna aku iwaho. E nana kakakou i na lahui nui o kakou, aole i kana mai ko lakou lawe mai ana aku i ko lakou mau waiwai iwaho e kalepa ai, a e hoike
ai ia lakou iho he poe imi waiwai maoli no ka aina iho.
Nana aku ia Farani, aole lua o ka waiwai o ia aina. No ka paahana maoli no o na kanaka a me ko lakou hookuonoono pu, Ua oi ko lakou hookoe ana i ka lakou mau wahi loaa makahiki mamuli o na hoolilo aku. Aole pela na Hawaii a makou e mailani mau nei. Ina no he pomaikai ko ke kanaka Hawaii no kekahi mau makahiki a ulia iho ke poho i kekahi makahiki, o ka haalele loa akula no ia i kona kumu loaa. Aole pela kekahi poe lahui e ae. Ina no e poho i kekahi makahiki, hoao hou no. Aole o ka pomaikai wale no ke loaa i na wa a pau.
Eia no kekahi, ina e noho pu ana kekahi mau ohana hoaloha, he Hawaii a he malihini no na aina naauao mai e paa ana ko ka malihini home i ka pa ia, ulu na pua, malumalu na laau hua, pala maikai na hua ai, aka o ka Hawaii, e lako hapa ano, ulu hiua hinanawe na wahi mea kanu, a o ka mea hilo loa, aole e pala pono ana na wahi hua a ko ke kanaka pa, pau e no i ka alapohoia e na wahi keiki mamua o ka pala ana a ai like me na makua. He mau mea liilii no keia, aka, he pono e laweia e noonoo mawaena o na ohana Hawaii.
I KA POALUA mua iho nei o Novemaba,
ke la a ka Lahui holookoa o Amerika Huipuia, mai kela pea a keia pea o ua Repuba-
lika nui la e koho ai i na Elele e hele ai i
Warinetona e koho ai i Peresidena no la-
kou no na makahiki eha mai ka la 4 aku o
Mar. 1877. E like me ka nui o na lunama-
kaainana he 293 a me na luna Senate he
76 ma na Hale Ahaolelo nui o ke aupuni
ma Wasinetona, pela ka nui o na elele e
kohoia ai e ka lahui ma ua la nui nei. Aia
o ka mea e loaa ana he 185 balota mailoko mai o na elele, alaila oia ke lilo ana i Peresidena. Hookahi mokuaina nui o na Elele koho
oia o Nu Ioka. He 35 ona mau Elele e hele ai e koho Peresidena. O Penesilevania aku mahope ona, he 29 ; a o na wahi Mokuaina haahaa loa o na wahi Elele, oia o Deleware, Oregona, a me Colorado, ma ka 3 pakahi.
Ua manao ka hapa nui o ko kakou mau haole Amerika ma Hawaii nei, e puka'na ka Peresidena a ka aoao Repubalika a ua manao hoi kekahi poe, e aneane kokoke ana e a like a like keia koho'na balota ana. Oiai, e haalele ana ka mokuahi Kulanakauhale o Kikane ia Kapalakiko ma ka la mahope iho o ke kohoia ana o na elele, malia paha, e mahui ana kakou i na hiohiona mua o na mea puka ma ona mai, koe aku nae ka hooiaio loa ana na kekahi moku lawe leta e hai mai. He Kau koho balota Peresidena ikaika keia o kela aumeume ana no ka aoao e noho mana mai ana. Ke hele lokahi nei ka aoao akau no Hayes a me Wheeler, a o ka aoao hema hoi, no Tilden a me Hendricks. He mau inoa wale nae no keia iloko o na puuwai o na aoao elua.
I ko makou ike aku mai keia mamao'ku, he au ano e iki no keia o ka noho ana hooponopono aupuni ma Amerika Huipuia. Ke noho nei ka Ahaolelo Senate, he poe Repubalika ka hapanui, a o ka Hale Aha olelo makaainana hoi, he poe Democarata ka hapanui. O ka mana hookohu i na luna aupuni mahope koke iho o ka Peresidena, aia i ka Aha Sentane, a o ka mana kaana hoi i na lilo o ka Aupuni a me na uku makahiki o na luna aupuni, aia i ka hale olalo, he wahi ano e iki keia i ka ike, aka, aole nae paha e poho ana na manaolana no Hayes a me Wheeler, ka Peresidena a me ka hope Peresidena a ka aoao Repubalika e koho ai. E kakali kakou a lohe pono.
Na Nu Hou Kuloko,
A keia Poalua ae, e ku mai ai ka mokuahi lawe leta mai Kaleponi mai.
E holo ana ke " Kilauea" i Kona i keai Poakahi ae, i lohe oukou.
Ua hookulukulu iho he wahi kuaua nuku ma Honolulu nei i ke awakea Poakolu, aole nae mahuahua loa iho.
Ma ka huli hoi ana mai a " Kilauea" mai Kawaihae mai, ua lawe ae oia a hooolele aku no Kalawao, he 60 pipi, i ia na ka poe mai e noho la ilaila.
Ua lohe mai makou, ua hoopiiia ka uku o na paahana o Waihee a hiki i ka $13 o ka malama, a na kela a me keia paahana e makemake ana ia uku, e hoolako iaia iho i na hemahema a pau o ia hana
Eia ka moku okohola " Na hoahanau ekolu" ke hana hou ia nei e Foster ma o mua o kona iho a e kapili hou ia ana me ke keleawe. He palamaunu keia na ka hau mai o Arita.
Maluna aku nei o ka mokuahi " Ausetaralia" i laweia aku nei no ka makeke o Kaleponi, he 124,839 paona ko-paa 88,850 paona laiki, 5543 paona kope, 1165 ahui maia, 11 pahu lemi
PILIKINO.— Ma ke ku ana mai o ka mokuahi " Auseteralia" i ke ahiahi Poakahi iho nei, ua huli hoi mai ka Haku o Niihau Mr Sinclair a me kana wahine mai Kikane mai me na ola oluolu.
Ua make ka lunakanawai hoomalu o Lahaina, oia o Mr. Dickenson ma Lahaina, i ka la 29 o Okatoba i hala, mai ka eha i loaa iaia mai kona haule ana mua mai. O Lahaina kahi ana i noho ai he hapaha keneturia paha.
Ma keia hope aku, ua hoihoiia.ke Keena Oihana o ke " Kuokoa" aia maluna ae o ka Hale Kuai Buke o Wini, makai iho o ke Keena Loio o J W Aukina mamua. Malaila e loaa ai kona kakauolelo nui i na hora oihana a pau.
Eia he elua mau moku liilii e kapiliia nei ma Honolulu, a o kokoke koe e hoolanaia kekahi o laua. Aia ma ka pa kapili moku o Emmes ma kekahi, a aia ma Ainahou kekahi. Ke hoopuipui hou ia mai hoi na aumoku holoholo pili aina o kakou.
Ua ala mai nei ka mahele olelo a Kapena Nimo mai kona noho ana hone muna, a eia mai kana hana mua ma ka aoao eha o ka kakou pepa o keia la. E hoonuu iho a kena no oukou, a mai noho a hoohalahala mai ia makou. HALE KUAI BIPI HOU !— E wehe ana o Williama Auld i ka la hanau o ka Moi, (Nov. 16,) i kona Hale Kuai Bipi hou e ku la ma ka Pa Wi, Alanui Nuuanu. Ke konoia aku nei ka poe ono io bipi momona a pau e kuai ai mahope iho o ia la.
Mamuli o ke noi, e hoikeike hou ana o Mr H. L. Estrange i kana mau hana akamai i luna o ka ea ma ka Hale Pea ma Ainahou imua o ke anaina wahine a kamalii i keia auina la Poaono. I ka po iho e hoopau ai, oia i kana hana ma Honolulu nei, a e hoemiia no na uku komo ma ka hapalua a ma ka hapaha.
Ua lohe mai makou, ua nalinaliia e ka iole kekahi wahi keiki hou loa na kekahi makuahine Hawaii e noho nei ma Kaholoakeahole, Honolulu, i hoolaha mua ia ai i ka make ana o kekahi keiki mamuli o kona moe hewa ana, a hoouka maluna iho o ke keiki. Ua lalau loihi loa paha keia makuahine i nalinaliia ai e ka iole. Mai keia eha mai i loaa ai i ke keiki i make ai oia.
Ke manao nei makou o ke kuaua nui o ka po holookoa o ka Poaha iho nei a me nehinei (Poalima ) ua pahola puni aku la ia ma na wahi a pau e mihi ana no ka nele i ka wai ole. Nolaila, i noho oukou
a i nele hou i ka wai, mai hoohalahala i ka la, aka, nele hou i ka wai, mai hoohalahala i ka la, aka, e hilinai aku ma o na lani la a e pau koke no ka pilikia wai.
Ua ku mai ka mokuahi Ausetaralia i ke ahiahi Poakahi iho nei, he la mamua ae o ka manawa i ae likeia ai. A ma ka hora 3 auina la Poalua, ua holo loa aku ia no Kapalakiko me na wahi ohua uuku mai keia awa aku a me na ukana hiki ia ia ke lawe.
Aia ma ka puka aniani o ka Hale Kuai Buke o H. M. Wini kekahi kii nani loa o ke Keena o na mea hoikeike o Hawaii nei maloko o ka Hoikeike nui o Piladelapia. Ma ka nana aku i kea kii, ua maopopo loa ke ano o kela a me keia mea hoikeike i hoahuia maloko o ua keena la. Nui ko makou minamina no ka nele ana i kekahi kanaka a wahine Hawaii ole e hoikeike ana i na malihini i hele mai e ikemaka i na mea i hanaia ma Hawaii nei, a e ahu ana hoi maloko o ia keena. Hokai ua puni wale ! Ma ka hoi ana mai nei a Mr Sinclair mai Nu Kilani, ua lawe pu mai oia, hookahi lio kea o ka welo maikai loa, a me hookahi pipi kea o ia ano welo maikai i laha ma Nu Kilani. E hoihoiia ia ana i kona aina hana i holoholona ma Niihau. O ke kumukuai o ka lio he $1000 ; a o ko ka pipi hoi, he $625. O ka lilo no ka lawe ana mai ia laua, ua hiki aku no ia i ka elima haneri ($500) dala. He mau welo maikai loa keia, a aole no i poho na dala i lilo ia laua.
KEAKA NU HOU !— E haawi hou ana o Mr. H. L. Estrange i kana mau hana akamai ku i ka weliweli i keia po Poaono imua o ke anaina o Honolulu nei maloko o kona hale pea akea ma Ainahou. E hele ana oia maluna o ke kaula me ka ukaliia e na hoomalamalama lua ole i ikeia ma Honolulu nei mamua. Mawaena konu o ke kaula, e kukuluia ana he pahu mea hoopahupahu, a mailoko mai olaila e hoikeikeia aku na ahi kao-lele, na ahi wili nau, na ahi poha a pela aku. E nalowale ana ka haole hana keaka iwaena o ka pohina o keia mau mea kani lehulehu. E hele nui ae e ike no oukou iho.
HE MEA HOU ANO NUI — Ua lohe mai makou, ua loaa aku kekahi e hana kanaka ano hou loa maluna o ka mokupuni o Nu Guine, me na huelo mahope. Ua manao ka poe makaikai nana i ike mua, he poe keko lakou, aka, ma ka olelo mai a ka poe kamaaina, he kanu uala no lakou, kukulu hale noho no hoi, a me na mea ku i ka hana ana a ke kanaka maoli. O ka lakou olelo ka mea i koe a maopopo mai. Malia io hoi, he ohana kanaka hou ia no ke keneturia umikumamaiwa wale no, hoomaka mai.
FANITOMA.— I ka Poaono aku nei i hala, ua hoihoi mai keia moku kaua Beritania i ke Kanikela Beritania mai Kealakekua mai. Ua ku iki no keia moku ma ke awa nei, a huli hoi hou aku la i Kealakekua, kahi ana e ku la e hoopau loa i na hana no ke kukulu ana i kia hoomanao no Kapena Kuke. Ua pae aku la na pu nui i uka o ka aina, a ua hooia iloko o na lua i eliia ai no lakou. Ke hoomau la no nae ka hooponopono ana a paa loa ae. Ke pau keia hana, alaila, holo makaikai aku paha ia i ke awa o Hilo mamua o ka huli hoi loa ana mai i Honolulu nei. E MAU HOOULU LAHUI HOU — Me ka hauoli palena ole makou e hoike aku nei i keia mau hanau malalo iho nei :
Ua hanau mai ka wahine a Mr. Feredarika W. Beckley (Kahapula) ke kaikamahine.
— Ma ka la 2 iho nei hoi, ua hanau ka wahine a ko makou hoa paahana o ka hale pai W. H. Tell, he kaikamahine.
— Ma ka la 6 koke iho nei no, ua haunu ka wahine a ia hoa paaua o makou he hua kepau, oia o John Duncan, he keikikane.
— Ma ka la 7 iho nei, ua hanau mai ka wahine a Samuel E. Maikai, he mau mahoe, aka, make hookahi, a ola hookahi. O Keohokalole ka inoa o ka mea e Ola nei.
I kela pule keia pule makou e hai mau aku nei i ka hele loa ana o kela a me keia hoaloha mai keia ao aku. Aka i keia hebedoma, ke hai aku nei makou me ka naau ehaeha i ka make ana o kekahi keiki haole kula o ke Kula Bihopa o Kaalaa malalo o ka noho kumu ana o Mr Atkinson, oiai, ua wahi keiki nei nona ka inoa Richard P Chenery e auau kai ana ma Waikiki kai me kekahi o na haumana kula ana i ke awakea Poakahi iho nei. He wahi keiki malihini keia na ko Rev. S. C. Damon kausini e noho mai la i Kapalakiko,.a o ka hiki ana mai nei no ia ma Kaleponi i ka hoi ana mai nei o Mr. Damon. Ua manao kekahi poe o ke poholo ana iloko o ke kai ke kumu, aka, ua hoki kokeia ae no ia i kona wa i poholo iho ai me ka emoole. Me he mea la, ua loaa ia i kekahi mai hikiwawe e ae e make ai. Ua loheia ua kokua ana e hoihoi mai ai i kona ola, aka, aole nae hiki. Ua lawa loa ke Akua i kapa o ka uhane. Ua malamaia he anaina hoolewa haipule nona ma ka hale noho o Mr Damon i ka kakahiaka Poalua iho nei, a ma ka holo ana aku o ka mokuahi, ua laweia aku ka lono kaumaha i na makua, a me kona Kino lepo pu.
NA BUKE A ME NA PAPA KAKAU — Ua loaa mai nei o H M Wini na buke a me na kanana kakau hou loa mai Enelani mai
ma ke ala ae o Sueza a i Kikane. Mai laila mai maluna o ka mokuahi Auseteralia, hoohiki loa i Honolulu nei. He mau buke hoomanao kekahi no ka makahiki 1877 e hiki mai ana. Pono i ka poe malama buke oia ano, ke hoomakaukau e i o la honua.
HOIKEIKE NUI O PILADELAPIA — I ke ahiahi nei, ia makou i hoi ai e pai i ka kakou pepa, hai mai ana ke teregarapa, o kau mea hou e ke Kuokoa e hoike aku ai imua o kou lahui holooka, ua pau iho nei ka hoikeike nui ma Piladelapia i keia la 10 o Novemaba, a he 11 makana mahalo i na mea hoikeike o Hawaii. Ua kanalua o Amerika i ka Hawaii ponoi ole ma ke keena Hoikeike o Hawaii nana e hoike aku i na inoa o na mea a pau me ka leo kakana ole. Hokai ua lalau.
Mai ka oluolu mai o ka makamaka J Like ma ka la 25 o Okatoba i hala, ma ke kulanakauhale o Hilo, ua make iho la kekahi lio, ma ka hu ana o kona naau i waho ; no ka nui loa o ke aloha o ka mea nona ka lio, ua makemake oia e ike i ke kumu o keia pilikia. Ua kii ia ke kauka C H. Wetmore e hele mai e nana, a ma kana ike, ua olelo oia, he eha ma kona opu oia ke kumu o kona make ana. O ka lua iho la ka keia o kana hele ana i kauka no ka nana ana i ka pilikia o na lio, a he mea hou ia i ka ike ana a ko Hilo poe
Mai ka peni mai a G Kaluakini i lohe mai ai makou, ma ka la a ke Kama'Lii Lilia Kamakaeha i hoau ai i ka ogana o ka luakini o Wainee ma Lahaina, he tausani ka nui o ka poe i akoakoa ae maloko o ka luakini, a na ke Kiaaina J. Kapena i haawi mai na manao paipai mamua ; a mahope ka haiolelo ana mai ai ke kahu Rev. A. Pali, a ua hookuu ia aku ke anaina me ka maluhia. A ua lohe pu ia mai no hoi ua kokua pu mai ka ekalesia i na lilo a pau o kona hoi ana mai, ina pela ; " Eo no i ke keiki o Maui."
MALOO O MAKAWAO — Mai ka peni mai a Bila Kupa e hai mai ana, no ka nui loa o ka wela ma ia wahi, ua maloo loa ka wai o ko laila mau kahawai, pau na bipi i ka make, a ke huli hele la ka poe kanu ko i ka wai iloko o na kuahiwi. O ka maloo paha ia, ua ahu wale o Hokuloa, e kau haaheo mai ana iluna o ka lewa. Aole maloo nui ana o na kahawai o Makawao elike me keia, iloko o na makahiki he 30 i hala aku nei, wahi ana, a ke uwe nui la na mahiko no keia pilikia.
Aole e hiki ia makou ke uumi iho i ka nui o ka hilinaiia o ko kakou " Kilohana Pookela o ka Lahui Hawaii" i keia manawa. Ma ka pepa o keia la, ke puka aku nei ia me na kolamu olelo hoolaha he 10 ka nui. Aole mai kona hoomakaia ana mai akahi wale no. Kokoke e lilo ka hapalua o ko kakou pepa. Ke ike nei na poe a pau e hoolaha nei maloko o keia pepa i ko lakou waiwai io. Olelo mai kekahi pake kalepa ia makou, i ka puka ana o kekahi olelo hoolaha e weheia ana he hale kuai lole hou ma Kohala, ua piha e ke kahua mawaho o ka hale i na kanaka mamua o ka hemo ana o ka puka. Nolaila makemake loa ai oia e hoolaha.
Ke hoomau nei no Samuel T Ale-
kanekelo, ka Luna Nui o ka Mahiko o Haiku, i ka eli ana i kana auwai nui e makemake nei e hiki i kai o Haiku, a hoomau ia ka aina nui palahalaha mahiko o Haiku. Ua hoolimalima iho nei ia i kekahi mau olelo o ka Arita, a ua hala aku nei ilaila i hoopuipui ae ai i kona poe eli auwaha wai. Ke manao pu nei no hoi oia, e hoopokole i ka eli ma na wahi kahawai, ma ka hoomoe ana aku me ona paipu hao nunui ma kahi o ke 30 iniha ke ana waena. Ina e holopono keia hana, alaila o ka makamua paha ia o na auwaha wai loihi i eliia ma Hawaii
nei a puni, a e lawa ana ka wai mailoko mai o ia hawai ke hoomau i hookahi tausani eka, a e hoomahuahuaia auanei ka waiwai o ka eka hookahi mai ka elua tona a me ka hapa ahiki i ka elima tona, e like la me na aina mahiko o Lahaina i Maui a me Lihue i Kauai. Ke ake nei makou e holopono kana hana, a e pomaikai ka aina a pau ma kahi a ua auwai la e moe la.
HE OIAIO PAHA ?— I ka huakai hele aku nei o ke Alii ka Moi Kalakaua i Amerika Huipuia, a oiai e komo aku ana ke kaa ahi maloko aku o ke kulanakauhale o Kanasa
a me na kaona liilii e iho, e ake loa ana hoi na kanaka e kuku ana ma na wahi a pau e ku ai ke kaa ahi o ka ike mai i na maka o ka Moi, oiai, oia ka Moi mua loa i makaikai aku ma na kaiaulu o Amerika. Aia nae maloko o keia huakai kaa ahi, o Col. Barnes kekahi, he haole no a kekahi poe o Honolulu nei i ike ai mamua iho nei, a he loio nae oia no Kapalakiko. I mea e pau ai ke ake nui ana o na kanaka e ike wahi maka alii mai, a oiai hoi e ha ana ka leo o ka Moi na ke anu i loaa ai ia ia ma Omaha, nolaila, komo iho la ua Col. nei i ka aahu koa me ka papale Kapu o kekahi o na ukali o ka Moi, a ma kona ano hookuoo loa me he alii la, pii ae la oia ma kahi kiekie o ke kaa a kunou haahaa aku la imua o lakou, me ke noi mai e haiolelo aku imua o lakou, a ua hui i hooko aku ai, a puni loa mai la na kanaka o ia maoli no ka Moi o Hawaii, huro ae la lakou a olioli.
HOOLAHA HOOKOLOKOLO.
AHA Hookolokolo Kiekie o ko Hawaii Pae Aina
Ma ka hooponopono waiwai, ma ka waiwai o KAELE (k), o Kailua, Oahu i make. Ma ke Keena imua o ka Hon C C Harris, Lunakanawai o ka Aha Kiekie. Kauoha, e hoolaha i ke noi, e apono i na palapala hoike, hookuu
ana, a e mahele i ka waiwai.
Ma ka heluhelu a me ka wa waihoia ana mai o ka pala-
pala noi a me ka palapala hoike a Ioane Akina, Kahu malama o ke keiki oo ole a Kaele (k) o Kailua i make aku nei, e
noi ana, e aponoia na hoolilo, he $__, a e hookuu ana ia
ia iho, he $__, a e noi ana, e nana a aponoia keia mau
mea, a e kauohaia e mahele i na waiwai e waiho ana ma
kona lima, i na poe i kuleana malaila, e hookuu ana ia ia
a me kona mau hope, mai ka noho ana ma ia ano.
Ua kauohaia, o ka Poakahi, ka la 11 o Dekemaba M H
1876, ma ka hora 10 o kakahiaka, imua o ua Lunakanawai la, ma ke Keena, ma ka hale hookolokolo ma Honolulu, oia kahi a me ka manawa i kohoia no ka hoolohe ana i ua noi la a me na hoike moowaiwai, a o ka poe a pau i pili
malaila, e hele mai a e hoike i ke kumu, ina he kumu io
ko lakou e ae ole ia ai ua noi la, a malaila e hoike mai ai na mea i kuleana maloko o ua waiwai i oleloia. A o kela
kauoha, e hoolahaia ma ka olelo Hawaii, iloko o ke Kuo-
koa, he nupepa i paiia a hoolahaia ma Honolulu, no na hebedoma ekolu, mamua ae o ka manawa i oleloia no ka
hoolaha ana.
Kakauia ma Honolulu, ko Hawaii P A. Nov 3, 1876. CHAS. C HARRIS,
Ikeia e : Lunakanawai o ka Aha Kiekie. Jno. E Barnard, Kakauolelo. 780 3ts 783
AHA Kaapuni o ko Hawaii Pae Aina, ma ka hoo-
ponopono Waiwai. Mokupuni o Kauai, Hawaii Pae
Pae Aina. SS. Ma ka waiwai o KEOKILELE, o Hana-
lei Kauai i make. Olelo kauoha e koho ana i la e hooholo
ai ka palapala kauoha, a no ka hoolaha ana.
No ka mea , ma ka la 25 o Augate M H 1876, ua waihoia
mai imua o ka Aha kekahi palapala i oleloia, oia no ke kau-
oha hope loa o Kookilele, i make aku la, a me ka pala-
pala hoopii e noi ana, e hooiaioia kela palapala kauoha, a e
hoopuka hoi ka palapala Lunahooko no Kapalehua.
Nolaila, ua kauoha ia, o ka Poalima, oia ka la 8 o Deke-
maba, M H 1876, ma ka hora 10, ma ka Rumi Hookoloko-
lo o ia Aha, ma Wahiawa, ma Kauai, oia ka la a me ka
hora e hooiaioia i ia palapala kauoha, a e hoolohe hoi no
ia noi ana mai a me ka poe a pau i pili, e kue ana ia pala-
pala kauoha a me ka hoopuka ana i ka palapala Lunahoo-
ko. A ua kauoha hou ia, e hoolaha no ia mea no na pule
ekolu, iloko o ke Kuokoa he nupepa i paiia a i hoolahaia
ma Honolulu. A ua kauoha hou ia, e hoopukaia na palapala kena no
na hoike no ia palapala kauoha, a me na hooilina o ka mea
make, e hele mai a e kue i kela palapala kauoha i ka wa i
oleloia.
Kakauia ma Wahiawa, ko H P A Nov 3, 1876.
DUNCAN McBRYDE. 780 3ts 782 Lunakanawai Kaapuni Apana Eha.
AHA Hookolokolo Kaapuni o ko Hawaii Pae
Aina ma ka hooponopono waiwai, ma ka waiwai o KAANAANA, o Koloa, i make kauoha ole, Imua o ka
Lunakanawai Kaapuni Apana Eha. Olelo kauoha, e hoolaha aku no ke noi ana mai e koho i Lunahooponopono Waiwai.
Ma ka heluhelu a me ka waihoia ana mai o ka palapala noi a Eunie w. o Koloa, Kauai, e hoike mai ana, o Kaanaana, no Koloa, ua make kauoha ole ma Koloa, ma ka la o M H 1851, a e noi ana, e haawiia ka palapala hookohu Lunahooponopono Waiwai ia J W Smith, o Koloa, Kauai. Ua kauohaia, o ka Poaono, ka la 9 o Dekemaba M H 1876, oia ka manawa i kohoia no ka hoolohe ana i ua noi la, imua o ua Lunakanawai la, ma ke keena hookolokolo o keia Aha ma Wahiawa, a ma ia manawa a ma ia wahi no, e hele mai ai na mea a pau i pili, e hoike mai i ke kumu, ina he kumu oiaio ko lakou, e ae ole ia ai ua noi la. A o keia olelo kauoha e hoolahaia ma ka olelo Hawaii, i ekolu pule ma ke Kuokoa, nupepa ma Honolulu.
Kakauia ma Wahiawa ko Hawaii P A. Nov 3, 1876.
DUNCAN McBRYDE. 780 3ts 782 Lunakanawai Kaapuni Apana Eha.
AHA Hookolokolo Kaapuni o ko Hawaii
Pae Aina, Ma ka Hooponopono Waiwai, ma ka wai-
wai o UA, o Waipake, i make kauoha ole, Imua o ka Lu-
nakanawai Kaapuni Apana Eha. Olelo kauoha, e hoola-
ha aku no ke noi ana mai e koho i Lunahooponopono Waiwai.
Ma ka heluhelu a me ka waiho ana mai o ka palapala noi
a J Kaipu, o Koolau, e hoike mai ana, o Ua o Waipake,
Kauai, ua make kauoha ole ma Waipake, ma ka la 15 o Feberuari 1876, a e noi ana, e haawiia ka Palapala Hoo-
kohu Lunahooponopono Waiwai ia J Kaipu.
Ua kauohaia, o ka Poalima, ka la 8 o Dekemaba M H
1876, oia ka manawa i kohoia no ka hoolohe ana i ua noi la,
imua o ua Lunakanawai la, ma ke Keena Hookolokolo o
keia Aha, ma Wahiawa, a ma ia manawa a ma ia wahi no,
e hele mai ai na mea a pau i pili, e hoike mai i ke kumu,
ina he kumu oiaio ko lakou, e ae ole ia ai ua noi la. A o
keia olelo kauoha e hoolahaia ma ka olelo Hawaii, i ekolu
pule ma ke Kuokoa, nupepa ma Honolulu.
Kakauia ma Wahiawa ko Hawaii P A. Nov 3, 1876.
DUNCAN McBRYDE. 780 3ts 782 Lunakanawai Kaapuni Apana Eha.
AHA Hookolokolo Kaapuni Apana Eha o ko Ha-
waii Pae Aina. Ma ka hooponopono waiwai, ma ka waiwai o KAIHENUI, o Wailua, i make kauoha. Imua o ka Lunakanawai D McBRYDE. Olelo Kauoha e hoolaha aku no ke noi ana mai e koho i Lunahooponopono Waiwai.
Ma ka heluhelu a me ka waiho ana mai o ka palapala
noi a E Lindeman, o Wailua, e hoike mai ana, o Kaihenui,
no Wailua, ua make kauoha ole ma Wailua, ma ka la o Okatoba 1845, a e noi ana, e haawiia ka palapala hoo-
kohu Lunahooponopono Waiwai ia E Lindeman.
Ua kauohaia, o ka Poaono, ka la 9 o Dekemaba M H 1876,
oia ka manawa i kohoia no ka hoolohe ana i ua noi la,
imua o ua Lunakanawai la, ma ke Keena Hookolokolo o
keia Aha, ma Wahiawa, a ma ia manawa a ma ia wahi
no, e hele mai ai na mea a pau i pili, e hoike mai i ke ku-
mu, ika he kumu oiaio ko lakou, e ae ole ia ai ua noi la. A
o keia olelo kauoha e hoolahaia ma ka ololo Hawaii, i
ekolu pule ma ke Kuokoa nupepa ma Honolulu.
Kakauia ma Wahiawa, ko Hawaii P A. Nov 3, 1876.
DUNCAN McBRYDE. 780 3ts 782 Lunakanawai Kaapuni Apana Eha.
AHA Hookolokolo Kiekie o ko Hawaii Pae Ai-
na, Ma ka hooponopono waiwai, ma ka waiwai o
JOHN D. ROBINSON, o Honolulu, Oahu i make. Ma ke
keena imua o ka Hon. A. F. Judd, Lunakanawai Alua o
ka Aha Kiekie. Kauoha e hoolaha i ke noi, e apono i na
papa hoike, hookuu ana a e mahele i ka waiwai.
Ma ka heluhelu a me ka waiho ana mai o ka palapa-
la noi a me ka papa hoike a E M Robinson w, a me J B Ke-
liikanakaole, na Lunahooponopono o ka waiwai o John D
Robinson, o Honolulu i make aku nei, a noi ana e aponoia
na hoolilo he $6,499.85, a e hookuu ana ia laua iho, he
6,499.86, a e noi ana, e nana a apono ia kela mau mea, a
e kauohaia e mahele i na waiwai e waiho ana ma ko laua
lima i na mea i kuleana malaila, a e hookuu ana ia laua a
me ko laua mau hope mai ka noho ana he Lunahooponopo-
no Waiwai.
Ua kauohaia, o ka Poalima ka la 15 o Dec. M H 1876, ma
ka hora umi o kakahiaka, imua o ua Lunakanawai la ma
ke Keena, ma ka hale hookolokolo ma Honolulu, oia kahi
a me ka manawa i kohoia no ka hoolohe ana i na noi la a
me na hoike moowaiwai, a o ka poe a pau i pili malaila
e hele mai a e hoike i ke kumu, ina he kumu io ko lakou e
a ae ole ia ai ua noi la, a malaila e hoike mai ai na hoike
i na mea i kuleana maloko o ia waiwai i oleloia. A o keia
kauoha ma ka olelo Hawaii, e paiia maloko o ke Kuokoa
a me Hawaiian Gazette, he mau nupepa i paiia a hoola-
haia ma Honolulu, i ekolu pule mamua ae o ka manawa
i oleloia no ka hoolohe ana.
Kakauia ma Honolulu ko Hawaii P A Nov. 3, 1876. A. FRANCIS JUDD,
Ikea : Lunakanawai o ka Aha Kiekie Jno. E Barnard, Kakauolelo. 780 3ts 782
MA ke Keena o ka Lunakanawai Kaapuni Apana Elua, ko Hawaii Pae Aina. Ma ka Waiwai o KA-
LAWAIA k, o Lahaina, Maui i make. Ua heluheluia a ua waihoia ka palapala noi a Kahuhu w,
e noi ana e hooiaioia ka palapala kauoha hope loa a P Ka-
lawaia, no Lahaina, Maui H P A i make. Nolaila, ke kau-
ohaia aku nei na kanaka a pau ke pili, o ka Poaha, oia ka
la 30 o Novemaba 1876, ma ka hora 9 kakahiaka, ma ka
Hale Hookolokolo ma Lahaina, oia ka la a me kahi i koho
ia no ka hoolohe ana i ua nonoi la a me na mea kue ke
hoikeia. ABR. FORNANDER,
Lunakanawai Kaapuni Apana Elua. Lahaina, Nov 3, 1876. 790 3ts 782
MA ke Keena o ka Lunakanawai Kaapuni Apana Elua, ko Hawaii Pae Aina. Ma ka Waiwai o PU-
NIWAI k, no Laina, Maui i make. Ua heluheluia a ua waihoia ka palapala noi a Kaailau k,
e noi ana e hooponoponoia ka waiwai o Puniwai k, no La-
haina, Maui H P A i make, a e hooholoia i na hooilina. No-
laila, ke kauohaia aku nei na kanaka a pau ke pili, o ka
Poaha, oia ka la 30 o Novemaba 1876, ma ka hora 10 o ka-
kahiaka, ma ka Hale Hookolokolo ma Lahaina, oia ka
manawa a me kahi i koho ia no ka hoolohe ana i ua nonoi la
a me na mea kue ke hoikeia. ABR. FORNANDER,
Lunakanawai Kaapuni Apana Elua. Lahaina, Nov 3, 1876. 790 3ts 782
KEENA o ka Lunakanawai Kaapuni Apana Elua o ko Hawaii Pae Aina.
E ike auanei na kanaka a pau ke pili, o ka hoolohe ia ana o ka palapala noi a Keoni Kanakaole, e hooiliia ka waiwai o Kanakaole k, no Honolulu, Oahu H P A i make, i kona poe hooilina, he mea i hoolahaia no ka la 17 o Novemaba iho nei, ua hoopaneeia i ka la 30 o Novemaba, 1876, oia hoi ka Poaha hope o keia malama. Aia ma Lahaina e hana ai. ABR. FORNANDER.
Lunakanawai Kaapuni Apana Elua. Lahaina, Nov 3, 1876. 780 3ts 782
Ma ka Aha Kiekie o ko Hawaii Pae Aina. Oahu SS Kau o Okatoba 1876, he hoopii oki mare Ah Nee kue ia Rebeta w, Poaha, Okatoba 19, 1876. Ma ka hoopii oki mare maluna ae, ke kauohaia nei, e hookomoia ka huaolelo Oki Mare ma ka aoao o Ah Nee, no ke kumu ua moekolohe o Rebeka i oleloia, a e lilo kela i mea paa maa mahope iho o ka pau ana o ha malama eono mai ka la aku o keia kauoha ana, ma na kumu maopopo i waihoia mai, ke ole he kumu e ae kekahi e hooleia ai ua mau mea la.
A ua kauohaia ke mea nana ka hoopii, e hoolaha ae i kekahi kope i hooia ia e keia olelo kauoha ma na nupepa Hawaiian Gazette a me ke Kuokoa, no na hebedoma eono, a o ka hoolaha mua ana, maloko o ka malama hookahi, mai ku la aku o keia kauoha ana, a o na mea a pau ke pili, maloko o na malama eono e hoike mai ai lakou i kekahi kumu e lilo ole ai keia olelo hooholo i mea paa.
NA KA AHA. Jno. E Barnard, Kakauolelo. 778 6ts 783
MA ke Keena o ka Lunakanawai Kaapuni Apana Elua o ko Hawaii Pae Aina. Ma ka waiwai o OPUNUI w, no Hamakuapoko, Maui i make.
Ua heluheluia a ua waihoia ka palapala noi a Kuluna w, a me Kalaia w, e noi ana, e hooponopono ka waiwai o Opunui w. no Hamakuapoko, Maui H P A i make, a e hooholoia i na hooilina. Nolaila, ke kauohaia aku nei na kanaka a pau ke pili o ka Poalima, oia ka la 17 o Novemaba, 1876, ma ka hora 10 o kakahiaka, ma ka Hale Hookolokolo ma Makawao, oia ka la a me kahi i kohoia no ka hoolohe ana i ua nonoi la a me na mea kue ke hoikeia.
ABR. FORNANDER,
Lunakanawai Kaapuni Apana Elua. Lahaina, Oct 20, 1876. 778 3ts 780