Ka Nupepa Kuokoa, Volume XV, Number 41, 7 ʻOkakopa 1876 — Page 1

NUPEPA KUOKOA :

KE KILOHANA POOKELA NO KA LAHUI HAWAII.

BUKE XV, HELU 41, HONOLULU, POAONO, OKATOBA 7, 1876. NA HELU A PAU 775.

MAIKAI KA HOI KA PAPA !

— A ME —

Ka Laau o kou Hale ! No Hea la ?

KA I NO HOI NO KAHI O

WAILA MA !

Nana aku no hoi ia la,

OHI KA IO O KA LAAU O MAKAWAO, i ka ua mea o ka nani o

Na Papa, Na Laau

— A ME —

NA PONO KUKULU HALE

O NA ANO NO A PAU,

— MA KE KIHI O —

Na ALANUI PAPU a me MOIWAHINE,

...... Honolulu ......

MALAILA E LOAA AI E LIKE ME KA makemake, no ke

Kumukuai makeponoloa. PAPA, PAPA, PAPA

Na PAPA huluhulu,

Na PAPA manoanoa, Na PAPA i kahiia, Na PAPA kepa,

PAPA holo keokeo, PAPA holo ulaula.

NA LAAU! LAAU!

NA KUA.

NA KAOLA, AAHO,

MOLINA,

PEAPEA, PINE HULUHULU,

PINE I KAHIIA,

Na Papa a me na Laau Ulaula ! PILI ULAULA

PILI KEOKEO, PANI PUKA,

PANI PUKA ANIANI IPUKA ANIANI,

OLEPELEPE.

PENA O NA ANO A Pau

Hulu Pena mai ka liilii a ka nui !

AILA PENA ! AILA HOOMALOO,

WANIKI, PATE

NA LAKO

o kela a me keia ano. NA AMI-PUKA HALE,

NA AMI-PUKA PA.

ANIANI !

Pepa Hale me na lihilihi

E LOAA NO MALAILA

KA PAAKAI Helu 1,

O KAKAAKO a me PUULOA

No ke Dala kuike, e loaa no na mea a pau i haiia ae la no ke kumukuai emi loa.

O na kauoha a pau mai Hawaii a Niihau, e loaa'ku ana ia lakou, e hooko koke ia mai ana no ia me ka lawa pono.

E kipa nui ilaila, i ike i ka oiaio

761 3m 773

HE

IWAKALUA TAUSANI LEGUE MALALO O KE KAI !

— NA MEA —

KUPANAHA O KA MOANA !

KE ALA O KA MEA HUNA,

— A O KA MEA —

POHIHIHI O KA 1866 !

MAHELE I.

MOKUNA XXI.

KA LEO NUI O KAPENA NIMO.

I AKU o Aronaka, " Eia, ma keia hora no o ka la apopo, he mea pono ia kakou ke wehe i na pani o ka moku, i loaa ai i ka Nautilo ke ea hou. A ina e pii mai ana na Papua a hiki ma ka oneki, pehea hoi e hiki ai ia oe ke kipaku aku ia lakou mai ke komo ana mai iloko nei o ka moku ?"

Ninau aku la o Kapena Nimo, " Pela io anei kou manao, e kau mai ana na Papua iluna nei o ka moku ?"

" Ae, ua maopopo ia mea ia'u," wahi a Aronaka.

I aku o Kapena Nimo, " Heaha la hoi auanei ka hewa oia, ina he makemake ko lakou e komo mai, komo mai no, no ka mea, ke ike nei au, aohe kuleana ia kakou e keakea aku ai i ko lakou komo ana mai. O ka mea nui i ka poe Papuana, he poe nele loa, aohe no hoi o'u makemake, e make kekahi o lakou, i uku no kou ike ana i ka mokupuni o Gueberoana."

No keia mea, hoeu ae la au e hele, a kaohi mai la o Kapena Nimo ia'u e noho aku me ia, i ninau mai ai oia i ke ano o ko makou hele aua iuka, a loaa ai ia makou na holoholona hihiu, a i ke kupono hoi ma ka ai ana.

A o kekahi mea a maua i kamailio ai, oia uo ka ili ana o ka Nautilo, ma kahi hookahi no i ili ai ka moku o Dumont d'Urville, a hahai mai la oia ia'u penei : " O keia Dumont d'Urville, oia kekahi o na holo moana kaulana o ko oukou aina. Oia hoi ke Kapena Kuke o oukou na kanaka Farani. Aka, ua poino ia kanaka akamai, mahope mai o kona makaikai hopo ole ana i na lapa haupaa o ka welau hema, na kohola o ka Okiania (aina moana), na poe aikanaka o ka Pakipika. Ina ua ola ia a hiki i kona mau la hope loa, alaila, heaha la ke ano o kona manao, i kou noonoo ana e Aronaka ?"

Aole au i hoike aku i ka haina o kana ninau, aka, waiho e mai la nae kela i ka palapala aina imua o'u, a nana iho la au i na wahi a pau a Dumont d'Urville, a ike pu iho la au ia Adelaide a a me Louisa Pilipi, a me ka hoakaka piha ana i ka ihu nui no na mokupuni Okiania.

Pane hou mai la no o Kapena Nimo ia'u, " O na hana ilo la ia a Dumont d'Urville, i hana ai maluna o ka ili o ka moana, a o ka'u hoi malalo o ke kai, me ka oi o ka oluolu imua o kana mau wahi i kaahele ai, no ka mea, o ka moku maoli e holo ana maluna o ka ili o ke kai, he luli ino kona, aka, o ko'u moku nei, oia naue malie lai wale iho la no malalo o ka moana, me ka paialewa ole ia i o a ianei e na ani ale, me ka ike ole ae hoi i na makani ino a me na ua kualau o ka moana ; a na ia mau mea no hoi i hoopoholo i kekahi poe moku, a holo a ia pu me na ohua, a mau tausani e waiho nei iloko o ka hohonu o ka moana,"

" E hoolohe mai oe, aia ma ka hora 2 a me 40 minute o ke ahiahi o ka ia apopo, e lana ai ka Nautilo nei, a e haalele iho ai oia i ke kowa o Toresa me kahi manuheu ole."

A pau keia mau kamailio ana a maua, kunou hoomaikai mai la o Kapena Nimo ia'u, no ko'u hoi mai ma ko'u keena ponoi.

I ko'u hoea ana aku no i ko maua keena, e kali mai ana no o Kosila ia'u, me ke ake nui e lohe i ka maua mau mea i kamailio ai me Kapena Nimo.

Pane aku la au, " E kuu keiki, oia hele aku nei no hoi ko'u, a halawai me Kapena Nimo, a hahai aku la au i na poino, ke hoouka kaua mai na poe aikanaka o Papuana, a ua hoole mai nei kela me ka i mai, aole ka he pilikia e hiki mai ana, e hoi no ka a moe malie.

Ninau maila o Kosila, " Aole loa iho la no he wahi pilikia e hiki ai ia'u ka hana aku nou la ?"

Hoole aku la no au, me kuu ninau pu aku, " A e aha ana hoi o Nede Lana ?" Pane mai o Kosila, " E hana pai io kanegaru ana."

Noho hookahi iho la au, a hoi aku la au e hiamoe, aohe nae he wahi mea a hiamoe iho, oiai e mau ana no ko'u lohe i ka haukawewe mai a na kapuai o na kanaka o uka mai, nolaila, hiaa wale ai au, a ano e mai la na noonoo. Ua poina pu ko'u hiamoe ana, a i puoho ae ka hana, eia ka ua ao, a hoolono aku la, o ka lohe ia mai o kekahi mea hou, eia nae, aohe mea ola o ka Nautilo i poino. O ka poe aikanaka nae, ua makaukau lakou no ka hoouka kaua.

Ma ka hora 6 o ke kakahiaka, ala ae la au, aole nae i weheia ke pani o ka puka o waena, a o ke ea no hoi o waenakonu, aole no i hoomaemaeia, aka, o ka waihona ea, ua makaukau loa no ka luu ana, a ua makaukau no hoi e kiola aku i kekahi mau kapuai paailiona o ka ea maemae Okigena iloko o ka ea maoli, e aneane pau ana e ka Nautilo.

Noho iho la no au iloko o ko'u keena, me ka ike ole ia aku o Kapena Nimo. Aole hoi he mea i hoomakaukauia maluna o ka Nautilo, no ka holo hou ana. A hoomau no au i ke kali ana, no ka hiki ae i ka hora 2 me 40 minute. Aia nae i kuu komo ana aku i ke keena nui, aia ka o ka hapalua ia o ka hora 2, a no na minute he 10 ko'u kali ana i koe, no ka mea, o ka wa ia e pii mai ai ke kai. A ina nae aole i hoomakaukau e o Kapena Nimo mamua, alaila, e lilo ana ka Nautilo i ke aumiki, mamua o ko ke kapena ike ana.

Ia'u e nalu ana iloko o'u, lohe aku la au i ke ku mai o na mea paahana, a nakeke koke ana no ke kila o ka Naukilo iluna o ke akoakoa.

A iloko hoi o na minute he 25 i koe e hiki ae ai i ka hora 3, komo mai la o Kapena Nimo iloko o ke keena nui, a pane mai la, " E holo ana kakou i keia manawa."

A i aku la au, " Auwe ! o ka holo e no ka ko kakou, a pehea ka hoi auanei ka poe Papuana ?"

Pane mai o Kapena Nimo, " Ua kauoha aku nei au, e weheia na pani o ka puka waena."

Ninau aku la nae au, " Pehea, aole anei e komo mai ana ka poe aikanaka iloko nei o ka moku ?"

Pane mai o Kapena Nimo, " Pehea la oe i hoomaopopo ai, e hiki ana ia lakou ke komo mai ?"

I aku la au, " Me ko lakou la ike mai no hoi paha ua hemo ka puka, a pela no lakou e lele mai ai a komo iloko nei o ka moku."

I mai hoi o Kapena Nimo, " Aole loa e hiki ia lakou ke komo mai, ina e weheia ana ka puka o ka Nautilo."

Nana pono aku la au ia Kapena Nimo, me ka noonoo nui i ka mea e hiki ole ai i na Papuana ke komo mai iloko nei o ka Nautilo, oiai ka wa e weheia'i kona puka.

Pane mai la no ua Kapena nei, " Aole oe i ike i kahi e hiki ole ai ia lakou ke komo mai iloko nei, a nolaila, he pono ia oe ke komo mai, i ike ai oe. Ua kauoha aku nei au i kuu mau alapii e pili ana i ke alapii waena, aia malaila o Nede Lana a me Kosila kahi i pee ai, a o na luina hoi o ka Nautilo nei, o ka huki ka lakou i ke kaula o na pani, a e haule lakou mahope ; a ia nae a uwa mai na kanaka mawaho, alaila, o ka wa ia e hukiia ai na kaula o ke pani."

I ka hiki ana i ka wa e wehe ai, o ka huki ia mai la no ia o na kaula, a haule ana na pani mawaho, a ike ia aku la he iwakalua kanaka maka ino, ano aikanaka no. Ia hemo ana ae no o na pani

puka, kau ana na lima o kekahi kanaka ilunu o ke kaupale, paia mai la mahope e kekahi mea i ike ole ia ; aole no hoi au i ike aku, aka, o ka holo ana o ua kanaka nei me ka uwe nui ka'u mea i ike aku, a he umi o kona mau hoa i hahai mai e kokua iaia, aka, papapau pu iho la lakou i ka eha i ka mea ike ole ia. (Aole i pau.)

Ke Kau Ahaolelo o M. H. 1876.

LA HANA 119.— Poaha, Sept, 21.

Halawai ka Ahaolelo e like me ka mea mau.

Heluhelu mai o Mr. Kalaukoa he Olelo Hooholo, e kauoha ana i ke Kuhina Waiwai e papa aku i ka Hui o Hackfield & Co. a me na Luna malalo iho, aole e kipaku wale i na kanaka Hawaii me ka lakou mau mea kuai mai ka uapo mokumahu aku. Hooholoia.

Heluhelu mai o Mr. Kanealii he olelo hooholo, e kauoha ana i ke Kuhina Kalaiaina, e kauoha aku i ka Egena, a Hope Egena paha o ke Kilauea, e hoihoi wale aku i na hoa Lunamakaainana i ko lakou mau home, me ka uku ole. Hooholoia.

Heluhelu mai o Mr. Martin he olelo hooholo, e hookaawale ana i $800 no ke kukulu ana i lanai kuai mea ai no na kanaka Hawaii, ma ka uapo mokuahi. Waihoia a noonoo pu me ka bila haawina.

Hoike mai ke Kuhina o ko na aina e, ua loaa mai iaia ka lono oiaio mai ka Lunakanawai Alani mai, e hai mai ana, ua hooholo loa ia ke Kuikahi Panailike ma Amerika, a o na kopaa hooili ia aku nei maluna o ka moku Lunalilo, ua komo aku ia mau waiwai me ke dute ole ia. A ua kauoha ka Moi, e kipu ma ka hora 12 awakea o keia la, no ka olioli o keia hooholoia ana.

I ka pau ana o keia hoike, ua haawi ae ka Ahaolelo ia minute hookahi, he 3 mau huro, malalo o ke alakai a Mr. Kauai.

Noi o Mr. Barenaba e hapai hou ia ka noonoo ana no ka hoopii a ke 'lii Kaai no ka olelo hooholo a ka noho i nehinei. Hooholoia.

Noi ka Loio Kuhina, e apono ia ka olelo hooholo a ka noho. Mahope o ka hoopaapaa loihi ia ana, ua hoaponoia ka rula a ka noho. He 20 ae, a he 10 hoole. Nolaila, ua hoole ia ka Bila.

Kapae ia na mea, a hoolaha mai ke 'Lii Kaai he bila e hoololi ai i ka Pauku 480 o ke kanawai kivila.

Kapae ia na mea, a hoike mai ke komite wae no ka noonoo ana i ka Bila e pili ana i na kaa kauo ukana, a lawe ohua, e noi mai ana e hooholo aku i na bila me ka lakou mau hoololi. Aponoia ka hoike. Waiho ia ka bila no ka heluhelu elua.

Hoomaha ka Hale ma ke awakea.

Halawai hou ka Hale ma ka hora 1 P. M.

Heluhelu aluaia ka bila e hoomana ana i ke Kuhina Waiwai e aie aku i na dala 300,000, ma ka ukupanee 9 keneta no ke dala, no na makahiki he 20, imua o ke komite o ka Hale. Noho ka Hon. Mr. Pilipo ma ka noho Luna Hoomalu.

Noi ke Kuhina Waiwai e hooholo loa aku i ka bila.

Noi o Mr. Waterhouse e hoopanee loa ia keia bila.

Eia na mea i haiolelo ma ka aoao kokua i ka bila. Walker, Green, Loke a me Birch.

Eia na mea i haiolelo ma ka aoao kue i ka bila, Waterhouse, Nawahi, Kahuila, Pilipo, Nakaleka. Mahope o ka hoopaapaa loihi ana, ua hoopauia ke komite, me ke noi aku e hooholo loa ia ka bila no ke kakau poepoe, a e heluhelu akolu ia ma ka la apopo. Eia ka poe ae e aie aku ke aupuni i $300,000, e hookaumaha hou ai i ka lahui Aholo, Kaiue, Baraunu, Kamauoha, Kauai, Halstead, Gay, Helekunihi, Barenaba, Halemanu, Nahaku, Wana, Naukana, Mahelona a me Kaina, hui me 12 alii like me 27 poe ae e aie hou aku ke aupuni, hui pu me ka aie mua, pokeokeo.

Eia ka poe hoole, Kahuila, Kanealii, Lilikalani, Kalaukoa, Aiwohi, Nawahi, Waterhouse a me Nakaleka, 8 wale no poe kue no ke aloha i ka lahui, e hoomanao oukou e na makaainana.

Heluhelu akolu ia ka bila e hoololi ai i ka pauku 20 o ka mokuna 41 o ke kanawai karaima. Hooholoia.

Heluhelu akolu ia ka bila e hoopau loa

ai i ka mokuna 57 o na kanawai karaima, e hoopau ana i ka hookamakama. Hoopanee loa ia. Eia ka poe ae i ka hookamakama, a e nana wale ia na wahi hilahila o na wahine o ko kakou lahui, Baraunu, Lilikalani, Halstead, Gay, Barenaba a me Kaina, hui me 12 alii, like me 18

Eia ka poe aloha i ko kakou lahui, e hoopau ana i keia kanawai, Martin, Aholo, Kahuila, Kaiue, Kanealii, Kamauoha, Pilipo, Birch, Naili, Helekunihi, Kalaukoa, Aiwohi, Nawahi, Wana, Nakaleka, Mahelona, Halemanu a me Nahaku, huiia he 18, ua koho ka Peresidena ma ka ae. Hoopanee loa ia.

Heluhelu akolu ia ka bila e hoololi ai i ka pauku 1343 o ke kanawai kivila, i hoololi ia ma ka 1872. Hooholoia.

Hoopanee LA HANA 121.— Poaono Sepatemaba 23.

Halawai ka Ahaolelo e like me ka mau.

Hoike mai ke komite wae i waihoia aku ai e noonoo i ka bila e pili ana i na lunamakaainana mai, ua hoihoi hou ia ka bila. Aponoia.

NA HANA O KA LA

Heluhelu akoluia ka bila e ae ana i na mea a pau e lapaau wale i ka mai lepela, a hooholoia.

Heluhelu akoluia ka bila hoailona pai a hooholoia e lilo i kanawai mai Iune 1 1877 aku.

Noi mai ke Kuhina Waiwai e heluhelu akoluia ka Bila Haawina ma ka hora 1 P M Haule.

Ma ke kapaeia ana o na rula, ua heluhelu mua mai o Hon S K Kaai he bila e hoemi ai i ka auhau kino i 25 keneta.

Ma ke kapae houia ana o na rula ua heluhelu aluaia ua bila nei maluna ae a waihoia no ke kakau poepoe, a e heluhelu akoluia ma ka Poakahi.

Hoopanee. LA HANA 122.— Poakahi Sepatemaba 25.

Halawai ka Ahaolelo e like me ka mau.

Noi o Mr Barenaba e hapai houia ka noonoo ana no ka bila e hookuu ana i na mai lepera e hoi i ko lakou mau home. Hooholoia.

Kamailio mai o Mr Pilipo ma ka aoao kokua i ka bila, me ka waiho pu mai he mau hoololi.

Kamailio mai o Mr Nakaleka ma ka aoao o ke kue i ka hoihoi ana i na mai lepera i ko lakou mau home, a pela no ka lakou e noho ai iloko oia lua kupapau o ka mainoino, i ka ninau ia ana, ua hoopanee loaia ka bila.

Eia ka poe hoole, Kaiue, Baraunu, Kamauoha, Lilikalani, Gay, Barenaba, Halemanu, Waterhouse, Nakaleka, Preston, Kaina, hui me 9 mau alii, like me 20.

Eia ka poe e makemake ana e hookuu i na mai lepera, a ma na apana e malamaia ai e na ohana o ka poe mai, Aholo Kahuila, Kanealii, Pilipo, Kauai, Birch, Naili, Halstead, Helekunihi, Kalaukoa, Aiwohi, Nawahi, Mahoe, Nahaku, Wana, Mahelona, hui me na'lii, Kanoa a me Kuihelani, like me 18 poe aloha ia kakou Hawaii iho.

NA HANA O KA LA.

Heluhelu aluaia ka bila e auhau ai i na loaa makahiki. Hoopanee loaia ka bila, 33 ae, a he 8 wale no hoole.

Noi ke Kuhina Waiwai e hapaiia ka noonoo ana no ka heluhelu akolu ana i ka Bila Haawina ma ka hora 1 o keia auina la, a pela ma na la aku a pau. Hooleia.

Heluhelu aluaia ka bila e hooponopono ai i ka lawe ana i na ohua a me na ukana, ma na kaa holo lealea a me na kaa ae.

Hoomaha ka Hale ma ka hora 12 awakea. Halawai hou ma ka hora 1.

I ka ninauia ana, ua waihoia ka bila no ke kakau poepoe, a e heluhelu akoluia ma ka la apopo.

Eia ka poe e makemake ana e laikini i na kaa hoolimalima, he hookaumaha wale ana aku no keia i na kanaka Hawaii, oiai, ke hoomaka mai nei na kanaka Hawaii e lawelawe i keia hana, aka, i ko na haole wa i lawelawe ai aole i laikiniia ; aka, i keia wa ke koiia mai nei e laikini. Eia ka poe aloha ole, Aholo, Kaiue, Halstead, Gay, Barenaba, Nakaleka, Preston, hui me 8 alii, like me 15.

Eia ka poe aloha makaainana, Kanoa, Kahuila, Kamauoha, Pilipo, Kauai, Birch, Naili, Helekunihi, Kalaukoa, Aiwohi, Nawahi, Mahoe, a me Mahelona, huiia he 19 wale no.

Eia ka poe i lalau aole iloko o ka rumi i

ka wa i ninauia ai, Baraunu, Kanealii, Lilikalani, Halemanu, Nahaku, Naukana, a nie Kaina.

Eia na mea kanalua, Waterhouse, a me Wana. Nolaila, ua hooholo loaia keia bila hookaumaha

Heluhelu akoluia ka bila e hoololi ana i ka pauku 480 o ke kanawai kivila ma ke poo a hooholoia.

Ma ke noi ua kapaeia na rula, a heluhelu mai o Hon Kaai he olelo hooholo, e apono ole ana i ka hana a ka Ahakukamalu, i ko lakou hooholo ana e hoihoi aku na " Un Peso," me na " Un Sol" iloko o ka waihona aupuni, me ka heluia he mau dala piha. Mahope o ka hoopaapaa loihiia ana, ua hooholoia ka olelo hooholo, he 21 ma ka ae, a he 16 hoole.

Hoopanee. LA HANA 123 — Poalua Sepatemaba 26.

Halawai ka Ahaolelo e like me ka mau.

Heluhelu mai o Mr Helekunihi he olelo hooholo e kauoha ana i ka egena e hoihoi aku i ka lunamakaainana o Hana a me kona ohana maluna o ke Kilauea, a e hoopae ae ma ke awa o Nuu, Kaupo, Maui. Hooholoia ma Makena e hoopaeia ai.

Noi o Mr Barenaba e hapai houia ka noonoo ana no ka bila e hoonoho ai i kauka ma Kalawao. Hooleia.

Noi o Mr Nahaku e hoike mai ke komite o na ahahookolokolo no ka hoopii a Kaulalii, no Kaanapali, Maui. Hooholoia e hoike mai ke komite ma ka la apopo.

Hoolaha mai o Hon Kaai, he bila e hoololi ai i na pauku 1, 2, 3, 4, 5, o ke kanawai e pili ana i ka hookamakama.

Heluhelu mai o Mr Mahoe he olelo hooholo e kauoha ana i ke komite wae i waiho ia aku ai ka noonoo ana no na bila e hookaawale ana ia Hilo Akau, i apana hookolokolo okoa. Bila e hoopau ai i ka mokuna 00 o na kanawai o 1874. Bila e hoonoho ana i na luna leta.

Hoololi mai o Mr Kanealii me na bila, e papa ana i ke Kuhina Waiwai, aole e haawi aku i ke dala i na luna aupuni e holo ana i na aina e, a me ka bila e hoololi ai i ka pauku 57 o ke kanawai kivila. Hooholoia ka olelo hooholo me ka hoololi.

Heluhelu akoluia ka bila e hooponopono ai i ka lawe ana mai a me ka opiuma ma ke poo a hooholo loaia.

Heluhelu akoluia ka bila e hooponopono ai i ka lawe ana i na ukana a me na ohua ma na kaa holoholo lealea, ma ke poo.

Noi o Mr Kalaukoa e hoopanee loa, a kamailio mai no ia mea. Mahope o ka hoopaapaaia ana, ua hooholo loaia ka bila me ka hoololi.

Ma ke noi, ua kapaeia na rula, ua hoike mai ke Kuhina Kalaiaina, ua makemakeia na hoa lunamakaaikana e kii aku i na palapala ae ma ka lima o ke kakauolelo a ka egena, no ka hoihoi ana aku i na hoa. BILA HAAWINA.

Na ka Moi ponoi, 76,000. Hooholoia.

Noi o Mr Kanealii i 35,000 no ko Moi, a i 4,000, no ka Mea Kiekie W. P. Leleiohoku. Hooleia. He 25 hoole, a he 11 wale no ae.

Hia ka poe ae, i 35,000 no ka Moi, a i 3,000 no Leleiohoku, Kahuila, Kanealii, Pilipo, Halstead, Kalaukoa, Aiwohi, Nawahi, Mahoe, Waterhouse, Nakaleka, Mahelona, o ka nui aku i koe, " ma o ka uahi he makole ka oukou."

Na Haawina hoomau, 15,000. Hooholoia. Ahaolelo & kukamalu 16,662.15 " L. K. Hoomalu, Honolulu 4,000 "

Hoomaha ka Hale ma ke awakea.

Halawai hou ma ka hora 1 P. M.

Ke ola o na koa, $60,686. Hooholoia. Na na luna leta o Hawaii, 800 " " " Maui 1,000 " " " Kauai 400 " Pa ana no Ema Kuea, 320 " Kakauolelo Kiaaina Kauai 1,000 " Koena o ka uku o ke Kuhina Kalaiaina - - - 223 " Uku o na luna alanui 7,000 " Pa a me ka lanai no ka Hale aupuni hou - - 7,000 "

Hoopanee. LA HANA 123 — Poakolu Sepatemaba 27.

Halawai ka Ahaolelo e like me ka mau.

Noi o Mr Nahaku e hapaiia ka noonoo no ka heluhelu elua ana i ka bila e haawi ana i kekahi mau aina no ka Moi. Hooleia.

Noi o Mr Halemanu e hapai houia ka noonoo ana no ka olelo hooholo e hoihoi ia Helekunihi a me kona ohana a hoopae ma ke awa o Nuu. Hooholoia.