Ka Nupepa Kuokoa, Volume XV, Number 32, 5 ʻAukake 1876 — Page 4

This text was transcribed by:	Malialani Cabaniss
This work is dedicated to:	Awaiaulu

Ka Nupepa Kuokoa

KE KILOHANA POOKELA NO KA LAHUI HAWAII.

Light of My Soul

Royal Diadem, p. 96

Ke Akua o ' u, ke kahe mau,

Ke aloha ou i bama no ' u

He punawai ma kou aoao

Malaila au e inu mau.

Cho.--Kuu Lama e, kuu Lama e,

Aole po ke launa oe me au.

Kuu Lama e, e launa me au,

Me oe au e pili, pili mau.

Kuu Lama e, ka olelo au

Ka lama no ' u a mau a mau

Malaila no e ike ia ai

Ke aloha nani e ola ai.

Cho.--Kuu Lama e, &c.

O oe kuu oli, kuu Kiai

Kuu Koo paa mau, kuu Alakai;

A, me ka hau mai luna mai,

Pa mau ia ' u na pomaikai.

Cho.--Kuu Lama e, &c.

Hoopaa mai ia ' u kau keiki nei,

He keiki palupalu e;

O mai kou lima i paa au,

I ole hina a make mau.

Cho.--Kuu Lama e, &c.

HAWAII.

HAAWINA KULA SABATI

[Hooponopono e Rev. L. Laiana.]

Ka Hapaha Ekolu.

Helu 7--Sabati, Aug. 13, 1876

Kumuhana.--Ke kahea ana o ka naauao.

Pauki Baibala.--Solomona 1; 20-33

20 He ae la ka naauao mawaho; Pane mai kona leo ma ke alanui

21 Ma ka welelau o na ala oia e kahea mai ai: Ma na kahua o na puka kulanakauhale kana olelo ana, I mai la,

22 Pehea ka loihi e ka poe ike ole, E makemake ai oukou i ka naaupo? A o oukou hoi, e ka poe hoowahawaha E makemake ai i ka hoowahawaha ana? A o oukou, e ka poe naaupo, e inaina au ai i ka naauao?

23 E huli mai oukou i ka ' u ao ana; Aia hoi, e ninini aku au i ko ' u Uhane maluna o oukou, E hoike aku hoi ia oukou i ka ' u mau olelo.

24 I ko ' u wa i hea aku ai, hoole mai oukou; Kikoo aku la au i ko ' u lima, aohe mea i manao mai;

25 Haalele oukou i ko ' u mau manao a pau, Aole hoi oukou i makemake i ka ' u ao ana.

26 No laila, i ko oukou popilikia e akaaka au, E hoowahawaha au i ka hiki ana o ko oukou makau;

27 A hiki mai ko oukou makau me he mea mo la, A hookokoke mai ko oukou popilikia me he puahiohio la, A loohia oukou e ka pilihua a me ke kaumaha;

28 Alaila, e hea mai lakou ia ' u, aole au e pane aku; E imi koke lakou ia ' u aole e loaa mai;

29 No ka mea, hoowahawaha lakou i ka ike, A o ka makau ia Iehova, aole lakou i koho mai ;

30 Aole o lakou makemake i ka'u ao ana; Manao ino hoi i ka'u mau olelo a pau.

31 Nolaila, e ai lakou i ka hua o ko lakou aoao iho, A ma ko ka manao ana o lakou e maona ai.

32 No ka mea, o ka haalele ana aku o ka poe naaupo, oia ko lakou pepehiia mai, A o ka noho nanea ana o ka poe lapuwale, o ko lakou make ia.

33 Aka, o ka mea hoolohe mai ia'u, e noho oluolu no ia, E noho no ia me ka makau ole i ka poino.

Pauku Gula. Sol. 1; 7. "O ka makau ia Iehova, oia ka hoomaka ana o ka ike, a o ka naauao, a me ke aoia mai, ua hoowahawaha e ka poe lapuwale."

Pauku hoopaanaau, p. 32-33.

Na Mahele. 1 Ka ninau hoohalahala ana o ka naauao, p. 20-22.

2 Ke kauoha a ka naauao, p. 23.

3 Ka hooweliweli ana i ka poe make make ole, a hoowahawaha i ke ao ia mai, a me ko lakou hope. p. 24-32.

4 Ka pomaikai o ka poe hoolohe i ke ao ia mai. p. 33.

Mele.--Him. 247. 8-8-6. Leo--Sinai

Haalele, e ka hawawa,

I kau mau hana, kau aia,

E huli koke mai:

Kokoke mai ka make ou,

I keia la, e hoomanao,

Ano, o make e

Pehea la kou uhane mau--

Kou hewa lehulehu no,

Ua kiekie e;

Auhea kou waiwai oia mau,

A komo i ka hale po

Kou kino make nei?

Pule no na haumana, ka poe huli ole, hoowahawaha i ka pono, hoopanee &c.

Na ninau a na kumu.

Mahele 1. P. 20-22. Ka naauao, ua hoohalikeia ma keia pauku me ka makuahine, he mau keiki haua e hele lalau ana mawaho, ma na alanui, ma na welau o na ala, ma na kahua o na puka kulanakauhale, a hele oia ilaila, a kahea ia lakou. Heaha kana ninau ana i ka poe ike ole? 2 a makemake i ke aha? 3 a hoowahawaha i ke aha? 4 a ninau i ke aha? Loaa anei keia mau poe maanei? Nui paha. Aia lakou iwaena o ka poe hele ole i na halawai, a me na kula Sabati; a iwaena o ka poe pili i na hale inu rama, i na hale lealea, halahala, pepa piliwaiwai, aia na uapo, &c.

P. 23. Mahele 2. Heaha ke kauoha a ka naauao? heaha hoi kana haawi mai nei? Ua like ka naauao ma keia pauku me Iesu, me kana olelo ma Ioane 7; 38, 39. Me ka wanana hoi ma Ioela 2; 28.

P. 24-32. Mahele 3. Ae anei ka poe i kahea ia e huli ika naauao? Ua aha lakou? Ka poe i kikoo ia, pehea lakou? Ua haalelo lakou i ke aha? Ua makemake i ke aha? Nolaila, heaha na olelo hooweliweli? 1 A kau mai ka pilikia akaaka ka naauao; ua like ka akaaka me ka hoolohe ole, kokua ole. 2 A kau mai ka makau me he aha la? a me ka popilikia me he aha? A loohia i ke aha? Pehea oia ke hea mai lakou? Pehea hoi ke imiia? Haalele loa ea ka naauao ia lakou. No ke aha? No ka hoowahawaha i ke aha? No ke koho ole i ka makau ia wai? A makemake ole i ke aha? a manao ino i ke aha? 3 Heaha ka lakou e ai ai? Heaha ka hua o ka hewa? Rom. 6; 23. Isa. 3; 11. Ier. 6 19. A ma ke aha e maona ai lakou? Ma na manao ino, a lapuwale ea. He maona aha ia? He maona i ke ahi o ka make, i ka ilo nahu maha ole. Poino loa ea. Na ke aha lakou e pepehi a hoomake? Na ka huli ana mai ka pono aku, a i ka hewa, a na ka noho nanea wale me ka manao ole i ke Akua, a i ka mea e pono ai.

P 33. Mahele 4. Pehea ka poe hoolohe i ke leo o ka naauao? Hal 25; 14, 13. 112; 7:

Mele.--Robina Gula. Mele 75.

Na keiki, na keiki

I auwana wale nei

Ma na awawa, ma na ala,

Ma na uwapo kahakai,

Ke owala ma na lua,

A pii pii i na laau.

Ino, lepo a pololi,

E aloha ia lakou.

me ka pauku 4.

Na Ninau a ke Kahu.

Na makua.--No keaha ka lele ana o keia Haawina mai na 'Lii a i Solomona? No wai ka haawina no kela Sabati i hala aku la? No Solomona ea, no ka mahaloia o kona naauao e wai? A pili anei keia haawina ia Solomona? Nawai i kakau ka Buke o Solomona? Ua piha ia Buke i ke aha? He Buke e ae anei i paapu i na olelo naauao e like me ka Solomona? Ma keaha ka oi ana o kekahi mau olelo a Iesu ma Mataio?

Na keiki--Nui aenei na olelo ma Solomona e pili ana ia oukou? Hai paanaau mai Mok 1; 10. E kuu keiki, ina e hoowalewale mai ka poe hewa ia oe, mai ae aku oe. Hai mai hoi i ka puku gula. Me Ioba 28;28. Halelu 111; 10. Sol. 9; 10. Kekahuna 12;13. Ua loaa anei ia oukou ka maka'u ia Iehova? me ka malama i kana mau kauoha? Pili ka haawina o keia la ia wai? I ka poe hoowahawaha a makemake ole i ka naauao, i ka pono, i ke ola o ka uhan ma o Iesu Kristo la. Nui anei ia poe ma Hawaii nei? Aia lakou mehea? Ma na kula Sabati anei? Aole paha, makemake no makou i ka naauao, i ka pono, i ke ola. A heaha ko oukou manao i ka poe hoowahawaha i ka pono a hele lalau, a lilo i na mea lapuwale? Aloha anei oukou ia lakou? a kii aku? a hoao e alakai mai i ke kula Sabati? A pule anei no lakou?

Ke kula a pau.--Heaha ka ninau &e, ma Solomona 8;1-5? Owai la keia naau ao? Me wai oia mamua loa? 8; 22-30. Ua like anei oia me ka Logou ma Ioane 1;1? Pehea ka poe hoolohe ole a hoowahawaha i ke ao ana a keia naauao? me he aha la e hiki mai ai ka popilikia maluna o lakou? Nana hoi ia I Jes. 5; 2, 3, 2. Pet. 3;10. Hoikeana 6; 16, 17. Owia ka i kapaia, he naaupo ma Luke 12; 19. 20? Nui anei ka poe naaupo? Pehea kela poe naaupo ma Mataio 25: 2, 3, 8, 10-12? Pehea la kakou e hoohalike ai me Naauao? E hele i waho ma na alanui ma na puka kauhale, ma na hale inu rama, hana lealea, e kahea, aka, pehea ka loihi? A hea huli mai? E huli mai ano. E haalele i na ino, i na lealea, i na hewa. No ke aha la oukou e make ai?

Mele.--Far out upon the Prairie.

Leo--Hosana kamalii.

Ma o ma kahi pouli,

Ua nui kamalii,

Aole he Baibala,

A kula Sabati.

Hoea ka la hoano,

Kula maikai kakou,

A pule a memele,

Auwana nae lakou.

E ake au e lilo

I kumu na lakou,

E ao a kuhikuhi

I kahi ola mau,

I ko Iesu aloha

I na pokii liilii,

A make no lakou la

I ola maluna ae.

Pule no ka poe auwana, hookuli, hoomaloka, naaupo &c, i huli koke, mai i pakele i ka make e kau mai ana, &c.

Haawina no Aug. 20, Sol. 3; 1-19.

Ma Kawainui, Hilo, Hawaii, i ka la 20 aku nei, oiai kekahi kane a wahine manuahi nanea ana i ka ona a ka rama, aia hoi, iloko o ko laua wa kulipolipo loa, ua apakau ae la ka wahine i ka pahi e oki, a no ko ke kane ikaika, ua lanakila oia ma luna o ka wahine. Ua mokumoku ka ili opu a me ka papalina o ka wahine, Ua mauaoia, aole e make ana,

I ka Mea Hanohano, Ka Ahaolelo Kau Kanawai o ko Hawaii Pae Aina.

E NA LII A ME KA POEIKOHOIA:--

Ua hooholo iho nei oukou ma ka heluhelu ana i kekahi bila e loaa ai ka lapaau pono ana, e oi aku i ka mea e noho nei i ka oukou manao.

Aka, o makou, na Kauka lapaau o Honolulu, ke manao nei makou, aole no ke koana ka makemake o ia bila, no ka mea, aole no e hiki ke hooko ia, oiai he kaulike ole a he hoinoino ia makou.

Ke iini nei makou, ma ke ano makamaka a me ka haahaa no hoi, e waiho aku imua o ko oukou hale hanohano, i ko makou mau kumu no ia mea i haiia ae la maluna, e ike ai oukou, o ka hooholo loa ana o kela bila kanawai, he hana akahele ole a naauao ole.

1. Ma ko makou manao, he bila ia i kue i ke Kumukanawai, a nolaila he makehewa. Aia hoi, me ka lima kakauha e lawe ana i ko makou waiwai, e laa ko makou ike a me ke akamai, a e haawi wale ia i kela mea keia mea e makemake ana, me ka hoomaopopo ole nae i ke ano kupono e uku ia mai ai makou. O keia kanawai, i ko makou noonoo ana, me he mea la ua pili i kekahi ano hookahi o na kanaka, a oia ka makou e kue loa, me ka ikaika i loaa ia makou malalo o ke kanawai. Aole o na pauku o kela kanawai ke hoololiia, aka, o ke kumu manao okoa, oia ka makou e kapa nei he kue i ka pono a me ke kaulike.

2. Me he mea la, aole i hoomaopopo ia e ka noonoo o ko oukou hale hanohano i ke ano o ko makou kulana oihana. Ke hoopaa nei makou i na palapala laikini lapaau iloko o keia aupuni. Aole makou i hoolilo ia he poe kauka mamali o ia palapala laikini, aka he mea wale no ia e hoapono ana maanei i ko makou palapala hookohu kauka, i loaa mua mai na kula nui o na aina e. A o keia mau palapala a me na laikini, he ano mau loa aku ko lakou, i hiki ole ke hoopau ia, aia wale no a loaa i kekahi hihia i like ole nae me ka mea i olelo ia ma keia bila. Ano, ke hoao nei oukou e hoanoe i ko makou poe laikini, a nolaila, o keia hana, i ko makou manao, he kue i ke Kumukanawai, a he pili i kekahi hana i hala mamua, a he kumu nui e kue ia'i.

3. He ano mahalo ole ko keia bila i ka makou oihana. I ka hoomakaukau ia ana aole no i ninaninau ia a kuka pu ia paha me ka poe i pili loa, ka poe hoi i kauoha ia e haawi lilo i ko lakou manawa, ka lima ikaika a me ke akamai, oia hoi ko lakou waiwai ponoi, a haawiia i kela mea keia mea, i kela a me keia hora o ka po a me ke ao, o hoopai kaumaha ia.

I ko makou manao, i ka wa i haawi ia kekahi bila i kekahi komite, alaila ua pono na ia komite e kuka pu me ka poe i pili ia lakou na mea i olelo ia ma ia bila, a na ia poe e hoomaopopo ae i ke komite e like me ko lakou ike. He mea ia i ku i ka mahalo a me ke kaulike, aola nae i hana ia pela ma keia bila.

Ma Farani, Beritania, Geremania, a me Amerika, kahi hoi i mahalo nui ia ko makou oihana, aole loa i imi ko laila mau aupuni a me na Ahaolelo, i mea e hoohaahaa ai ia oihana, elike me ka mea i ike ia maloko o keia bila, aole hoi ma ia mau aina i hoonoa ia ke kulana o ka oihana kauka me e kuka ole me ka poe e lawelawe ana ia oihana.

4. Ke olelo aku nei makou me ka haahaa, aole no he pono ke wae ia makou a kau ia keia kanawai kuikawa maluna iho o makou. O makou wale no, i waena o keia lahui, ke haawi mau nei makou i kela la a keia la, i ka manawa, ke akamai a me ka lima ikaika, no na kanaka Hawaii, e laa me na kanaka e ae, me ka manao ole e loaa ana i kekahi uku. Aole no i hiki i na kanaka ke hele ae ma na hale kuai a ohi i ka waiwai me ka uku ole; aka, o ka mea a makou i hana ai no ke aloha a no ka manawalea, oia no ka ka mea e koi maoli nei ke kanawai, a oia ka ke kumu e kaili hou ai.

Mamua iho nei, ua oluolu makou e lapaau wale aku me ka uku ole, aka nae, ina e hooholoia keia bila, e hooki ana makou ia hana, aole no hoi e hiki ke koi wale ia makou ma ia mea.

E olelo mai auanei oukou--"Ua olelo ia ma keia bila, na ka Papa Ola e uku no ka lapaau ana o ka poe ilihune, a e hooholo ana makou i kekahi haawina no ia mea."

He oiaio paha ia, aka, ke kaulei nei oukou maluna o makou ka hana, e hooiaio ae, ua hiki ole ia mea, a o mea, e uku i ke kauka, a nolaila, e komo mau ana makou iloko o na hihia a me na hookolokolo, a ke hoole aku nei makou aole no e hiki ke lawelawe i ka makou oihana malalo o na rula i kania ma keia bila.

5. Ua olioli nae makou i ka ike aku i na hoa hanohano kanaka Hawaii o ko oukou Hale Hanohano, ua hikilele a ano e ko lakou makemake i ko makou lapaau ana. I loko o na manawa i hala, me he mea la, aole lakou i manao he waiwai nui keia mea. Ua hiki no i kela a me keia o makou i noho a kamaaina ma Hawaii nei, k hoomanao i na manawa i haawi ia ai ka lapaau ana a ua hoole ia, a ina paha na lawe nae i ka laau, ua hoolilo ia i mea ole mamuli o ke kauoha o na kahuna maoli, ka mea i hilinai nui ia e na kanaka, oiai hoi ua hoomalamalama ia lakou.

Eia kekahi mea hoomanao, ua hoike pinepine ka Papa Ola imua o na poo aupuni no na hana a ka poe kauka hawawa i ao ole ia ma ka oihana, a ua hai ia mai. aole no he kanawai e kaohi ai ia lakou. A nolaila, ma kea mea e loaa auanei he kumu e hana kanawai ai.

Ano, ua hiki ia makou ke noho malie, a hooholoia e kau ia ua kanawai la, me ke kuihe ole, no ka mea, ua akaka no, aole no e ko ana, ke ole e ae ia e makou. Aka, aole pela ko makou manao. He aloha ko makou no na kanaka Hawaii, a ua makemake makou e kokua ia lakou. E aho no e hoomano iho makou, aole no i hoinoino ia makou no ka manao ino maoli, aka, no ka noonoo akahele ole o na hoa hanohano Hawaii i ko lakou koho ana ma keia bila.

Nolaila, oiai ke olelo nei makou he bila ua hiki ole ke hooko ia; ke hoike aku nei, ua makaukau makou e kokua e hooholo ai i kekahi bila kupono, e loaa ai ka lapaau ana me ka maikai, i oi aku mamua o ka mea i hala, ke makemake nae oukou i ka bila o ia ano. Eia no me makou ka bila i hoomakaukau ia, a ina i ku i ko oukou manao e waiho ia ana imua o oukou.

A eia wale no ko makou manao hope loa ke noho makaukau nei makou e hele ae i mua o oukou, a imua paha o kekahi komite, e noonoo pu ai i na mea e pili ana i ka pomaikai o ka lahui, a i kupono no hoi i ke kulana maikai o ko makou oihana. Me ka mahalo ia oukou e na 'Lii a me ka Poekohoia.

(Signed) E. HOFFMANN, M.D.

G. THOUSSEAU, M.D.

F.B. HUTCHINSON, M.D.

R. MCKIBBIN, M.D.

S.W. SHIPLEY, M.D.

C.B. RODGERS, M.D.

J.S. MCGREW, M.D.

H. STANGENWALD, M.D.

Make i aloha nui ia

Ua make o B Kauakahi k. ma Kawaiahao la 30 o Iune, 1876. Ua hala aku oia ma kela aoao o ke ala hoi ole mai; ke noho nei kona lehulehu me ka @, a me ka minamina nona. O keia kanaka o B K, he oluolu, he heahea, he launa oluolu, he iike, a pela aku. Ua hanau ia oia ma Waikahekahe, Puna, Hawaii, 1837; aole au i hoomaopopo i ka la a me ka mahina i hanau ai ia. Ua noho pu au me keia kanaka i ka makahiki 1871, oia hoi elima o mana makahiki i noho pu ai, a hela wale aku la ia i ka make. Nolaila ke kakau nei au i wahi kanikau nona, a penei no ia:

He kanikau he aloha nou no e B Kauakahi

Ua haalelo mai oe i ka pili a kaua,

Noho iho nei au, me ka u, me ka minamina nou,

E B Kauakahi, kuu kane--e,

Kuu kane he--i a.

Kuu hoapili o ka ua nihi i na pali,

Ke loku mai la ka ua i Namahele,

Walaau ka ua i ka nahele,

Ke nihi ae la i na pali,

Lokuloku i ka ili laau, [kane--e,

Hone ana i ka iwi aoao o ke aloha o kuu

Kuu kane ho--i a. [makani,

Kuu kane, kuu hoapili o ke anu a me ka

Oia makani pehi mai mamua me ka ua,

Aloha ia uka a kaua e noho ai,

I noho kaua, hoolohe i ka leo o ke koi la,

Oia uka lohi a kaua i noho ai--a,

Kuu kane ho--i a. MRS WAIKULONO.

Kuu kane mai ka ai nana i kai ke ola--la,

Mai ka makani huli loa o Kilohana la, [la,

E nihi ana ma ke kua, e iho ana ma ke alo

Kuu kane, mai ka ua poai o Kalihi-uka la,

Ke iho ae la ma Kuaiula, aia ka huina o ka ua i Kapalikapa--la,

Kapu mai la ka leo pane ole mai--la,

Ke noho nei au me ka luuluu kaumaha i ko aloha--la,

Kuu kane ho--i a. WAIKULONO.

Kuu keiki ho-i a.

Kuu keika mai ka makani o Kalihi-uka,

Mai ka ai lauoho loloa a ka nahele,

Kuu hoa hoomanawanui o ka la pololi,

Aia ke ola i na ihu hanu o ma miola.

Kuu keiki mai ka i-a huki ku o Ulakoheo,

Hookahi no makau, he koi,

Pau ka mano, ka bipi, ka amaama--la,

Ekolu io o ka bipi aia i ka uka--la,

O ka luau, o ka hoi-o, o ke kikaawioa--la,

Kuu keiki ho--i a. KEALAKAIPO

Kuu kane ho--i,

Kuu kane mai ka ua kipu mai i na pali,

Ke halii mai la i ka nahele,

Mai ka hale kulu a kaua e noho ai, [na,

Kuu hoapili mai ka ua halii mai o Kiloha-

Kuu kane mai ka wailelele o Popoulu,

Kela wai haki mua mai i na pali,

Aloha kuu kane, kuu hoa hele o ka nahele,

Oia pali nui a kaua e pii ai,

Kuu kane pane ole mai i ka'u olelo,

Hele mai ka ua, noa mai ka makani,

Aloa kaua o ke anu me ke koekoe,

Kuu kane mai ke kula la o Komooloa,

Oia alanui a kaua e hele ai i uka, i kai,

Kuu kane mai ka po lai o ke kaone,

Mai ka bele kuilua o Kaukeano,

Mai ka huina kanaka o ka Nekina, [li,

Mai ka bele kani ke, kui ke o Kaumakapi

I pili ia e ka ua, ka makani, me ke koekoe,

Koekoe ka poli ua hele oe,

Ua haalele mai oe, i ka pili a kaua,

Auwe! Auwe!! kou kane ho--;--a.

Kuu kane ma ka piha kanaka o Ainahou,

Oia wahi a kaua e hele ai,

Kuu kane mai ka huikaulua o Ulakoheo,

Kuu kane mai ka hale kuilua o K puakolo,

Oia wahi a kaua e noho ai,

Kuu kaue mai ka malu kiawe o Leleo,

Aloha ia wahi a kaua e noho ai,

Auwe! Auwe!! kuu kane--e.

MRS. WAIKULONO.

KA WANANA HOOPUNIPUNI--I ka malama aku nei o Mei, ua wanana ae o Mokulehu (w.) o Honomalino, Kona Hema. 1--E iho ana ka Pele; 2--E olai nui ana a lele kanaka iluna me ke kao me he manu la; 3--He kai mimiki nui, o ka mimiki no ia hala i ke kei uli; a ina e pii mai, o ka pili no ia hala i ka mauna. O ka la 3 nae o Iulai, ka la e hiki mai ai ia hiohiona. Pela mai nei o J. Kamaewaewa ia makou. I ka hiki ana mai o ua la nei, aole he wahi ko iki. Hooheneheneia a o kona mai e noho la, he hilahile. I hewa no hoi paha kekahi i ko oukou hoolohe wale aku no.

KA HUNT'S LAAU OLA

(HUNT'S REMEDY)

HE LAAU LAPAAU HOU, MAI AMERIKA MAI!

He Laau Maikai keia no

Na mai pehu o ka opu,

Na mai o ka puupaa a me ka opu mimi,

Mimi-paa, Mimi-eha, Mimi-helelei,

Ka lepo gravel iloko o ka opu-mimi,

Ka mana ole, kapalili, hui ono ole ka ai.

Na Mai Wahine,

Nawaliwali o ke kino,

Lepo ula iloko o ka wai mimi,

Manoanoa paha ka wai e like me keokeo o ka huamoa,

Like paha me na kaula silika keokeo, eleele, lenalena paha; a i ole ua like paha me ka lepo i anaiia i na iwi keokeo, a i ka mimi ana, ua wela oioi ka

mai, me ka eha nui o ke kikala a me ka puhaka.

HE NUI NA HOIKE e ola nei, ka poe i loohia i keia mau mai i haiia maluna ae au pau lakoa i ke ola maikai, no ka inu ana i ka

HUNT LAAU OLA, ("HUNT REMEDY)!'

UA HAAWI mua ia keia laau, e kekahi kahuna lapaau naauao, i ke kanaka ma pehu o ka opu, e noho ana me ka ohana a Mr. Hunt; John Hunt kona inoa, he 45 kona mau makahiki, he kanaka nui poepoe, ua loohia i ka mai pehu. Ua haawiia kela me keia laau no keia mai, aole nae oluolu; ua mahoahoa mau kona pilikia, ua pau loa ke kino a me na wawae i ka pehu; ua kokoke paa loa ka mimi; kokoke pau loa ka hana ana; a ua mahuahua loa ka wai iloko o ke kino. Aole hiki iaia ke moe ilalo ma ka moe, nolaila, ua noho wale no iluna i ka po a me ke ao. Pela mau kona popilikia a hiki i kona hoao ana i keia laau, a ke kahuna i kuhikuhi mai ai. A i kona inu ana i keia laau, ua hoomaka koke ka oluolu. Ua paipai, koke ia na puupaa i ka laua oihana; ua puka hou ka wai mimi a nui wale; ua emi koke mai la ka pehu o na wawae; a ua oluolu hou ke ake mama i ka hana ana; ua oluolu a maikai ka io o na lala, a e hoi nui mai a na ke ola maikai, alaila, me ke kuhihewa, ua waiho oia i ka laau i kekahi mau la. Ua pono ele nae ka waiho ana ia manawa, no ka mea, aole i ola io maoli kona mai pehu. Ua molowa hou na puupaa i ka laua oihana, a ua mahuahua hou ka wai iloko o ka opu, a ua popilikia hou e like me mamua. Alaila, ua inu hou oia i ua laau la, a ma kahoomanawanui ana, ua lanakila hou auanei maluna o ka mai, a na ola io maoli, a ka hoomaka hou oia i kana oihana mawaho o ka hele.

Oia ka lapaau mua ana me keia laau; a mai ia wa mai, (he 25 makahiki) ua hahanaia keia laau e like me ka hana ana o Mr. Hunt, a ua haawi na kahuna lapaau i keia laau i ka poe mai pehu a me na mai like.

Mai ia manawa mai, ua ikeia, a mahaloia hoi keia laau, mai o a o, e na kanaka, a ua inu ia hoi ma ke ao ana a me ke ao ole ana mai o na kahuna lapaau; oia ka mea i hoola mai i na kanaka he nui, ka poe pilikia i ka mai pehu, a kokoke i ka make.

Na kuhikuhi no ka inu ana:

E INU I KE PUNA TI PIHA, a hele na hora 4, alaila, e inu hou. E mahuahua liilii nae a hiki i elua puna ti piha--a hiki hoi auanei i puna nui piha.

NO KE KEIKI hookahi makahiki a hiki i na makahiki eono, e haawi 5 kulo, a hiki i na kala 20; eha hora nae mawaena o ka haawi ana.

KUMUKUAI, he - - $1,50 no ka omole.

DILLINGHAM & CO.,

762 3m 774 Na Agena no ka Pae Aina Hawaii.

Lole Makepono ke Kuike!

E LOAA NO IA MA KAHI O

KAKELA ME KUKE,

---E LAA NA---

AHINAHINA,

KALAKOA,

KEOKEO,

LEPONALO,

Pena, Aila, Aniani,

Na Mea Piula,

Kopa, Aila Honua,

Aila Hoomaloo,

Kui Kakia, Pakeke,

Tabu, Kaula, Noho lio,

Hulu-palaki, na Pulumi.

A he Agena no hoi no na Mokupuni o Hawaii nei no na

LAINAKINI-NAO,

LAINAKINI-MAOLI,

PALULE KALAKOA,

ALAPIA, KELEPA, KILISA,

Na Lole kupono i ka wawae,

Palule Huluhulu,

Na Lole Huluhulu,

Na Lole no ka hoohehelo ana

Lipina, lihilihi, a me ia mea'ku

---A HE---

MAU MEA AI KAHI

Ka Palaoa, Kopaa,

Raiki, Pia, Hoohu,

Paakai, Huaala,

Pia Kulina &c

---A HE---

LAAU LAPAAU KAULANA LOA

A DR. JAYMES.

Laau Kunu,

Laau Hoomaemae Koko,

Laau hoopau naio,

Penikala, Huaale,

A me na Laau Hame, a pela'ku.

759 ly 811

ANOIA I KA LEHULEHU.

E kipa mai a e nana,

i kumaka ai ka ike i na waiwai nani

i loaa mai nei iloko o ka

La Kulaia iho nei.

Penei ke ano o ua mau waiwai la:

Na Wati a me na kaula Gula,

a na Lede a me na Keonimana!

NA KAULA OPELE A NA LEDE

NA KOMO GULA NANI O KELA A ME KEIA

ano o na Lede a me na Keonimana!

NA KUPEE GULA,

NA LIPINE GULA,

Na gula pepeiao o na wahine!

e oaka i na pepeiao, a e hulali ai

hoi na manamana lima, a e

kilipohe ai hoi na a-i.

Na komo humuhumu gula a me ke kala,

Na pihi pulima gula wahine a kane,

Na lakela gula lei wahine nani,

Na komo daimana o na Lede.

Na kaula laketa,

Na pine omau kihei,

Na laketa aniani,

Na huka gula wahine,

NA LAKO HALE,

NA PUNA, NA PAHI,

NA KIAHA, KALA,

NA APO KALA

NA KAWELE holoi lima,

NA O DALA o kela a me keia ano, a me na mea nani e ae no he nui wale.

E kuaiia aku ana no

ma ke kumukuai haahaa loa i ko

na wahi e ae o ke taona nei.

UA MAKAUKAU NO HOINA

mea nani no kanaka makua

a me na kamalii

Na Kamaa Paa Loa,

e loaa no maanei e like me ka

makemake; a ina e loaa koke

ka ino, he hiki

no ke hoihoi mai

M. McINERNY.

Kihi o na Alanui Papa a me Kalepa. 763 3m 774