Ka Nupepa Kuokoa, Volume XV, Number 30, 22 July 1876 — Page 1

NUPEPA KUOKOA :
KE KILOHANA POOKELA NO KA LAHUI HAWAII.
BUKE XV. HELU 30. HONOLULU, POAONO, IULAI 22, 1876. NA HELU A PAU 764.

MAIKAI KA HOI KA PAPA !
— A ME —
Ka Laau o kou Hale ! No Hea la ?

                KA I NO HOI NO KAHI O WAILA MA ! Nana aku no hoi ia la, OHI KA IO O KA LAAU O MAKAWAO, i ka ua mea o ka nani o Na Papa, Na Laau A ME NA PONO KUKULU HALE O NA ANO NO A PAU, MA KE KIHI O Na ALANUI PAPU a me MOIWAHINE, Honolulu MALAILA E LOAA AI E LIKE ME KA makemake, no ke Kumukuai makeponoloa. PAPA, PAPA, PAPA Na PAPA huluhulu, Na PAPA manoanoa, Na PAPA i kahiia, Na PAPA kepa, PAPA holo keokeo, PAPA holo ulaula. NA LAAU! LAAU! NA KUA. NA KAOLA, AAHO, MOLINA, PEAPEA, PINE HULUHULU, PINE I KAHIIA, Na Papa a me na Laau Ulaula ! PILI ULAULA PILI KEOKEO, PANI PUKA, PANI PUKA ANIANI IPUKA ANIANI, OLEPELEPE. PENA O NA ANO A Pau Hulu Pena mai ka liilii a ka nui ! AILA PENA ! AILA HOOMALOO, WANIKI, PATE NA LAKO o kela a me keia ano. NA AMI-PUKA HALE, NA AMI-PUKA PA. ANIANI ! Pepa Hale me na lihilihi E LOAA NO MALAILA KA PAAKAI Helu 1, O KAKAAKO a me PUULOA No ke Dala kuike, e loaa no na mea a pau i haiia ae la no ke kumukuai emi loa.
            O na kauoha a pau mai Hawaii a Niihau, e loaa'ku ana ia lakou, e hooko koke ia mai ana no ia me ka lawa pono.
            E kipa nui ilaila, i ike i ka oiaio
761 3m 773

HE
IWAKALUA TAUSANI LEGUE
MALALO O KE KAI !
— NA MEA —
KUPANAHA O KA MOANA !
KE ALA O KA MEA HUNA,
— A O KA MEA —
POHIHIHI O KA 1866 !
MAHELE 1.
MOKUNA XIV.

                " UA PONO e Kapena Nimo ; a pehea ke ea au e lawe pu ai me oe, aole anei e pau e i ke omoia, no ka mea, he umi kumamalima hapahaneri wale no o ka ea okikene ka nui e pau ai iloko o keia pahu, a aole e liuliu, e lilo koke ana keia ea i mea inoino."
            " Pela no ! aka, e Mr. Aronaka, ua hai mua aku au ia oe, he mau pauma ko ka Nautilo nei nana e hoolako mai i ke ea no'u : malalo o na kaomi ana, hoonee ana a me ka paki ana a lilo i mea paa ; ma o keia mau ano la, ua hiki ke hoopihaia ka pahu ea o ke kapa luu, me na ea e lawa ai no ka hanu maikai ana iloko o na hora eiwa a he umi paha."
            I aku la au, " Aohe a'u mau mea hou e ae e ninau aku ai, i hookahi wale no, e ke Kapena — pehea e hiki ai ia oe ke hoomalamalama i kou alanui malalo o ke kai, oiai oe e hele ana i ka lipolipo o ka hohonu ?"
            " E Mr Aronaka, ma ko Ramekofa kapa luu, elua ona mau ipukukui, hookahi ma ke kua, a hookahi ma ke alo, i hoopaaia ma ka umauma. He kukui ano puu Bunesena, a o ka mea e a ai, o ka bikiromate o ka potasa ; aole nae pela ka'u, ua hookomo au ma ia wahi i ke sodiuma. He uwea i hooioiia ae, malaila kahi i hoiliiliia ai na mea e hoopuka mai ai i ka uila, a e kupono ana ua uwea uila la i kekahi ipu aniani, i like me ka ipukukui ke ano. Maloko o ua ipukukui nei kekahi aniani mimilo, pakaawili, a aia iloko olaila, he wahi lanahu gasa uuku. I ka wa e hoohanaia ai na mea paahana o ke kapa luu, ia wa e lilelile ae auanei ke gasa, a e hoopuka mai hoi he malamalama aiai keokeo pio ole. Oia iho la ko'u kukui lamalama o loko o ke kai, a me ko'u alanui ; a pela no hoi e hiki ai ia'u ke hana a ke ike."
            " E Kapena Nimo, o kau mau haina a pau no ka'u mau ninau, ua koikoi loa, e lilo ai na mea e ae a pau i hoohuahualauia i mea ole ; a i keia wa, aohe o'u kanalua i koe. Aka, i ko'u wa i konohia ai e komo i ke kapa luu o Roukuairola a me Ramakofa, he pono e ae mua ia mai au e nana i kekahi mea e pono ai au ke lawe e like la me ka pu."
            Pane aku la o Kapena Nimo, " Aole o ka pu e kiia nei me na pauda."
            " Aole ia he mea e kanalua ai ! Aka, pehea no la hoi oe e manao ai, he hiki ia'u ke hana i ka pu pauda maluna o ka moku nei, oiai aole he paakai (saltpetre) a aole hoi he lepo pele a me ka lanahu. Eia no hoi kekahi, ina e kiia ka pu pauda malalo o ke kai, mawaena o ka pa ewalu haneri a me kanawalukumamalima ka paapu i ko ke ea maoli, alaila, aole e loaa ana he pomaikai ia kakou, e like la me ka holo o ka hana i na pu ea."
            " Aole ia he mea pohihihi. O na pu i hanaia mamuli o na kuhikuhi a Fuletona, i hoolahaia ma Enelani e Pilipo Kole a me Bale ; ka Fareki o Farani a me ka Lanadi o Italia i hoolaha ai, oiai ua hanaia ia mau pu me ke kupono loa, na na wahi paapu loa e like me keia wahi, a he hiki loa ke kiia malalo o keia mau wahi. Aole loa e ki ia me ka pauda, aka, me ke ea e pale ikaika ana, i hoopihaia e na pauma o ka Nautilo."
            " Alaila, me ke awiwi e hoohanaia ai keia ea."
            " Pela no ka hoi paha, oia ae ka ohe ea o ka mea luu a Roukuairola, e loaa koke ai ka ea i ka wa e makemake ai. Ina no he ohe liiliii, ua hiki no. Eia no hoi e Mr Aronaka, e hoomanao iho oe i ko kakou wa i hele ai i ka uhai holoholona, he uuku wale no ke ea a me na wahi poka i pau ia kakou ma ia hele ana."
            " Aka, ma ka'u ike iloko o keia liula, a iwaena hoi o keia ohu wai, ua paapu loa ia, ke hoohalikeia me ke ea e hoopuka ana i ka honua, aole loa e hiki i na poka ke lele a loihi, aole no hoi e make na holoholona i kiia." Aka, o kela mea keia mea i ku i ko keia mau pu, e make loa ana no ia ; ina no hoi **ma wale no ka pa ana aku i ka holoholona, e hina koke no oia ilalo me he mea la i pa i ka uina nakolokolo o ka hekili." " No keaha la ?" wahi a Mr Aronaka.
            " No ka mea, o na poka o keia ano pu, aole no ia i like me ko na poka maoli, aka, he mau holowaa liilii aniani (i loaa ma ke akamai o Lenieboroke, he akeakamai no Auseturia), a he nui wale no hoi ia'u keia mau poka. O keia mau holowaa aniani, ua waihoia iloko o ka holowaa kila, a ua ho-o ia o loko me ka poka kepau, aia hoi iloko ka uila, ka mea nana e hoolele ka poka. Ke pa iki no, o ka lele no ia o ka poka, a ina hoi e ku aku i ka holoholona, e haule no ia ilalo a make loa. A he mea pono no hoi ia'u ke hai aku ia oe, he helu eha ko lakou mau helu, a oia ka piha pono no keia mau pu."
            " Ua pau ae la ko'u nieniele ana, a eia wale no ka mea i koe, o ko'u lalau i ka'u pu. A ma kau wahi e hele ai, malaila aku no au," i pane aku ai au, me ko'u ku ana iluna ma ke pakaukau."
            " Alakaiia aku la au mahope o ka moku e Kapena Nimo, a i ka hiki ana i ke keena a Nede Lana a me Kosila e noho ana, kahea koke aku.la au ia laua, a hele mai la laua me ka hookaulua ole. A o ko makou hele koke aku la no ia a hiki ana i kekahi keena e kokoke ana i ka rumi mikini, a maloko o ia wahi makou i komo ai i na kapa no ka hele ana."

MOKUNA XV.
KA PAPAKU O KE KAI.

                O ke keena i oleloia maluna, oia no kahi e hoahuia ai na mea kaua a me na kapa aahu o ka Nautilo. Aia iloko o keia keena, he 12 kapa luu e kakau ana, i hoomakaukauia no makou.
            I ka ike ana o Nede Lana i ua mau kapa luu nei, hoike mai la kona mau helehelena i ka hoowahawaha.
            " E kuu Nede Lana maikai, mai kuhi oe i na ululaau o ka mokupuni o Kere sepo, he ululaau maoli, aka, he mau ululaau moana,"
            " Nani kela ! A o oe hoi e Mr Aronaka, e komo ana anei oe i kela mau kapa ?" Pela o Nede i pane aku ai.
            " E Mr Nede e, e lawe no oe i kau kapa i makemake ai."
            Pane aku o Nede, " Aia no ia i ka mea i oluolu i kou manao e ka haku ; aka, ina ma ko'u makemake maoli, aole au e komo i kekahi kapa, ke ole au e hookikinaia."
            Pane mai o Kapena Nimo ; " Aole no paha ou mea nana e hookikina aku e Mr. Nede."
            Ninau aku la no ua o Nede, " A o Kosila no auanei kekahi e hele ana ?"
            Pane koke mai la no o Kosila, " Ma kahi e hele ai ko'u haku, malaila pu no wau."
            Ma ke kahea ana a ke Kapena, hele mai la elua mau luina o ka moku, e hookomo ia makou iloko o ua mau kapa kaumaha nei, (me he kuahao la ke kaumaha) he mau kapa opea lio, aole hookuina, i mea e komo ole mai ai ke kai. A he kuhihewa mai no paha kahi mea, he kapa kana, no ka like loa. He wawae a he palaka ko keia mea luu ; a he kamaa puti o lalo o ka wawae, a ua kapiliia o lalo i ke kepau, i kaumaha ai, aole hoi e hulipu, aka, i mea e hiki ai ke hele ku iloko o ke kai ; a ma ka puhaka o ke palaka, ua hoopaa loa ia me ke apo keleawe. No keia mea, ua hiki i ke akemama ke hanu e like me ka mea mau. O ua lima hoi, ua hoopaaia me ka miki-lima. He nui wale no hoi na ano iwaena o keia mau mea luu a me ka paleumauma pani huewai kahiko, ke palaka a me kekahi mau mea e ae he lehulehu wale, i hanaia me ke akamai, iloko o ke Keneturia umikumamawalu.
            O Kapena Nimo a me kekahi hoa ona, owau no hoi a me Kosila, o makou wale no kai komo i na kapa luu. A paa na kapa, a koe hoi ka papale e hoopulou iho ai i na poo o makou.
            Mamua ae o ko makou hoopulouia ana iho i na papale, ninau mua aku la au i ka makou mau pu e lawe ai, a ua haawi koke mai la kekahi kanaka o ka Nautilo ia'u, he pu moakaka wale no o ka hana ana. Aia ma ke kumu o ka pu, ua hoopaaia me ka papaa kila hakahaka mawaena, a malaila e malamaia ai ke ea maoli. Aia hoi ma ka waha, he pani me he haku la ke ano, a na ka uwea pakaawili e hoohana i ua pani nei ; a ma ia hana ana, e hookeia ai ke ea maoli iloko o ka ohe metala. Aia hoi he wahi pahu ua hoopiliia ma ka mawae, iloko o kahi manoanoa o ke kumu o ka kumu o ka pu, he iwakalua ka nui o na poka uila, a na ka uea pakaawili e pale aku i ua mau poka nei iloko o ka pu. A e like me ka hikiwawe o ka lele ana o ka mea mua, pela no e komo koke aku ai ka lua, a pela aku no a hiki wale i ka pau ana.
            A no ko'u ike i ka maikai o keia pu, i aku la au ia Kapena Nimo, " He pu maikai loa keia, he akaka wale no ka hana ana ; a he mea pono ke hoaoia. Eia hoi, pehea la auanei kakou e hiki ai i ka papaku o ke kai ?"
            Pane mai o Kapena Nimo, " I keia wa, eia ka moku Nautilo iloko o na anana elima mai ka papaku ae o ke kai, a o ka mea i koe, o ka hoeu no, no ka hele ana."
            I aku la hoi o Mr Nede, " Pehea auanei kakou e puka aku ai ?" Pane mai o Kapena Nimo, " E nana mai paha oukou ia'u."
            O ka hoopulou iho la no ia o Kapena Nimo i kona poo me ka papale luu, a pela no hoi o Kosila a me a'u. O ka hapa luna o na kapa o makou, he a-i kala keleawe, a maluna iho o ua kala nei, i hoopaaia ai ka papale me ke kuinao ; ekolu mau puka, a he mau aniani makapuu manoanoa, ke pani o ua mau puka nei, ua hooioi ia aku iwaho, a malaila e ike aku ai i na mea a pau e maalo mai ana ma ke alo ; oiai ua kaawale wale no ke poo o makou, ke huli i o a ianei.
            I loa no i ka paa ana o ua mau aahu apoo nei o makou, o ka hana koke iho la no ia o ka mea paahana a Roukuairola maluna o na kua o makou ; a ma ko'u hoomaopopo iho i ko'u, ua maikai loa ia'u ke hanu me ka oluolu maikai.
            A hoopaaia iho la he kukui lamalama ma ko'u apo opu, a o ka pu no hoi ma ka lima, me ko'u makaukau loa no ka puka aku. Aka, ma ka oiaio maoli, ua lilo makou i poe pio iloko o keia mau aahu kaumaha ; o na wawae hoi, ua pipili paa i ka papahele, me he mea la ua koluia a paa, i ka ua mea o ke kaumaha o ke kepau o lalo ae o ko'u mau kamaa.
            Aka hoi, ua hanaia keia mau mea a kaumaha, i pono ai ka hele ana maloko o ke kai. A ma ko'u hoomaopopo ana ae, me he mea e kulaiia ana au iloko o ke keena e pilipu ana me ka rumi waiho kapa, a ukali mai ia no hoi ko'u mau hoa hele, me ke kolo hele no hoi e like me ko'u. A lohe ae la no au i ka hoopaaia iho o ka puka wai me ke pani, a paa iho la makou i ka wahiia me ka wahi eleele o ka pouli.
            I ka hala ana o kekahi mau minute, he hihio ikaika ka'u i lohe aku, a pii mai la ka huihui mai ko'u mau kapuai mai a i kuu houpo. O keia mea, ua loaa mai no ia mai kekahi wahi mai o ka moku, maloko mai o kekahi ohe liilii i hoohamamaia ka waha, i komo mai ai ke kai a loaa makou, a me ia kai i hoopihaia ai ke keena. A okiia no hoi he puka a hamama ma ka aoao o ka Nautilo, a ike aku la makou he uwiki malamalama. Aole no hoi i emo, a ku ana na wawae o makou i ka papaku o ke kai.
            Ano, pehea la wau e hoihoi hou ai i ka manao i hooiliia mai maluna o'u, no ka huakai hele wawae malalo o na wai ? Ua aneane hiki ole ke hoike aku i keia mea kamahao, ma na huaolelo ! A hele ae la o Kapena Nimo mamua, a o kona hoa aku mahope ona. A o Kosila a me a'u, noho iho la maua ma kahi kokoke i kekahi me kekahi, e hiki ai ke lohe ia na kukai olelo ana. Aole i liuliu, hoomaopopo ae la au i ke kaumaha o ko'u aahu, na kamaa, kuu waihona ea, ka papale manoanoa kaumaha, e nakeke wale ai no kuu poo iwaena konu, e like me he hua kukui kaa la.
            O ka malamalama e hoomalamalama ana i ka lepo, he kanakolu kapuai malalo o ka ili o ka moana, a he mea haohao loa ia mea ia'u, i ka ka mea o ka ikaika launa ole o ka malamalama. O na kukuna o ka la, ua hiki iaia ke hoomalamalama i na mea kino lahilahi a moakaka hoi, a he hiki no hoi ia'u ke ike i na mea he lehulehu wale ma kahi mamao, he haneri me kanalima iwilei ka loihi. Ua oiaio, o ka wai e hoopuni ana ia'u, he mea kaomi ea okoa ia, i ko ke ea maoli e hoopuni ana i ka honua. Aia hoi maluna o'u ka ili pohu pu o ke kai. A e hele ana hoi makou maluna o ka ili laumania o ke one o ke kai, aole hoi he anuunuu e like la me ko na kahaone, i ka paia e na aekai, a lapaku ae la ke kapakai ; aka, o keia wahi a makou e hele nei, he like loa me na kahua kaulai kapa, i ke ia a like. Eia no hoi kekahi mea kupanaha i keia papaku, ua like me ka mea hoopelu malamalama (reflector) i ka peluia o na kukuna o ka la, a komo mai la ka malamalama iloko o kela a me keia hunahuna wai. E like me ka hiki ia'u ke ike i kela a me keia mea i ke awakea, pela no hoi ko'u ike ana i ka nani o keia papaku, nona hoi ka hohonu he kanakolu kapuai ; A he mea hoomauakala na'u ia i ka manao ana o ka poe e hoolohe mai ana i ka'u mau olelo.
            A hala paha he hapaha hora, hoao aku la au e hele maluna o ke one i lulu ia a paapu me na iwi pupu. O ka moku Nautilo hoi, ua kaawale loa aku la ia, a me he papa kahola loihi la ia ke nana aku ; a o ka malamalama o kona mau kukui lamalama, ke hele mai a loaa makou iloko o ka pouli, a oia malamalama ka mea e pololei ai makou ke hoi aku iluna o ka moku.
(Aole i pau.)

Ke Kau Ahaolelo o M.H. 1876.
LA HANA 60 — Poaha Iulai 13.

                Hoomaka na hana e like me ka mau.
            Heluhelu mai o Mr Aiwohi he olelo hooholo i $2,000 no ke awa a me ka palekai o Honoipu ma Kohala, Hawaii. Waihoia a noonoo pu me ka Bila Haawina.

NA HANA O KA LA.

                Heluhelu akoluia ka bila e hooluli ai i ke kanawai e kauoha ana i na mea a pau e lawelawe i ka oihana aupuni, e hookupa ia.
            Noi o Mr Birch, e heluhelu akolu ia ka bila ma ke poo wale no. Hooleia.
            Heluhelu akolu ia ka bila a hooholoia.
            Heluhelu akolu ia ka bila e papa ana i ke Kuhina Waiwai aole e haawi i kekahi dala o ke aupuni i kekahi luna aupuni i hele i na aina e ma kona makemake iho. I ka ninauia ana no ka hoopanee loa, ua kakau ia na ae me na hoole. Eia ka poe e makemake ana e hoopanee loa i keia bila : Leleiohoku, Kanoa, Kapena, Green, Moehonua, Walker, Kakela-opio, Parker, Waila, Kuihelani, Kahanu, Martin, Ake, Kamika, Kaai, Isenberg, Komauoha, Barenaba, Halemanu, Wana,—huiia he 20 poe e uhauha wale ia mau dala no ka ole. Eia ka poe e aua ana ia mau dala, aole lu wale aku : Kakela-makua, Aholo, Kahuila, Kanealii, Kaiue, Pilipo, Lilikalani, Kauai, Birch, Naili, Halstead, Gay, Helekunihi, Kalaukoa, Aiwohi, Nawahi, Mahoe, Waterhouse, Nahaku, Naukana, Nakaleka, Preston, Mahelona, Kaina — huiia he 23, nolaila ua hooleia ka hoopanee. Noi mai o Mr Birch e noonoo pakahiia na pauku. Hooholoia.
            Heluhelu ia ka pauku 1 o ka bila. Noi ke'lii Kakela e waihoia keia pauku a me na pauku e ae o ka bila ma ka lima o kekahi komite wae.
            Noi ke Kiaaina Kapena e kapae loa i keia pauku.
            Oiai e kamailio'na ua hoomaha ka hale a halawai hou i ka hora 1.
            Halawai hou ma hora 1.
            Hoike mai ke Komite Pai, ua paiia kahi mau bila, aponoia ka hoike a ke Komite.
            Mahope o ka noonoo loihi ana, ua waihoia i ke Komite Wae : Green, Kanealii, Aholo, Walahauki, Pilipo.—
            Heluhelu akoluia ka bila e hoololi ai i ke kanawai e hoohaiki ana i ka lawe ana mai a me ke kuai ana aku i ka opiuma i aponoia ma ka la 8 o Augate, 1874.
            Kamailio loihi mai ka Loio Kuhina ma ka aoao e kokua ana i ka hoopanee loa i ka bila.
            Kamailio loihi mai hoi o Mr Birch, ma ka hooholo loa aku i ka bila me ia e waiho nei. I ka ninauia ana, ua hooholoia ka hoopanee loi i ka bila.
            Heluhelu aluaia ka bila e hoololi ai i ka pauku 673 o ke Kanawai Kivila. Hooholo ia no ke kakau poepoe, a e heluhelu akolu ia ma ka Poakahi.
            Heluhelu aluaia ka bila e hoopau ana i ka mokuna 50 o ua kanawai o 1874.
            Noi mai o Mr Birch e hoopanee loa ia keia bila. Hooleia.
            Noi mai o Mr Preston e hooholo loa ia keia bila no ke kakau poepoe, a e heluhelu akolu ia ma ka Poakahi Hooholoia.
            Noi mai ke'lii Kaai e hapai hou ia ka noonoo ana no ka bila e pili ana no ke koho balota Lunamakaainana. Hooholoia, e kakau poepoe ia.
            Heluhelu alua ia ka bila e hoololi ai i ke kanawai e kau palena ana i ka manawa e koi ai no na aie i ka waiwai o kekehi mea i make, a e hoololi ana i ka pauku 1274 o ke Kanawai Kivila i hoololiia.
            Noi ka Loio Kuhina e hooholoia keia bila no ke kakau poepoe.
            Noi mai o Mr Birch e noho ke Komite o ka Hale no ka noonoo ana ano. Hooleia.
            Ninauia ka hooholo e kakau poepoe a heluhelu akolu ma ka Poakahi. Hooholoia.
            Heluhelu alua ia ka bila e hoololi ai i ka pauku 239 o ke Kanawai Kivila.
            Noi mai o Mr Kalaukoa e hoopanee loa. Hooleia.
            Noi mai o Mr Birch, e waihoia i ke Komite Wae nana e noonoo nei kekahi bila e pili ana ia pauku hookahi. Hooholoia.
            Hoopanee ka Hale.

LA HANA 61 — Poalima, Iulai 14.

                Halawai ka Ahaolelo e like me ka mau.
            Hoike mai ke Komite Pai, ua paiia ka bila e kauoha ana ina e kuaiia ana na aina aupuni, alaila, e kuaiia ma ke kuai kudala. Aponoia.
            Heluhelu mai ke Kuhina Kalaiaina he olelo hooholo, e hookaawaleia i $7,000 no ke kope ana i ka moolelo o na Buke Moolelo a na luna hoona kuleana. Waihoia a noonoo pu me ka Bila Haawina.
            Heluhelu mai o Mr Kanealii he olelo hooholo, e hookaawaleia i $125 no ka lawe leta mawaena o Waihee, Wailuku, a me Kahului. Waihoia a noonoo pu me ka bila haawina.
            Ma ke noi, ua hookuu ia o Mr Nahaku no ka pilikia o kona ohana i hookahi la.
            Hoolaha mai o Mr Birch he bila e hoololi ai i na pauku 1, 2 o ka mokuna 53 o ke Kanawai Hoopii Karaima.
            Hoolaha mai ka Loio Kuhina he bila e hoololi ai i ke kanawai e pili ana i ka lawe ana mai, a me ke kuai ana aku i ka opiuma.
            Heluhelu mai o Mr Kahuila he olelo hooholo, i ka wa e noonooia ai ka Bila Haawina ma na Poakolu a me na Poalima a pau, e hoemiia ka 1 — 5 o ka uku o na luna aupuni mai ka Moi i hiki aku i lalo. Hoopanee loa ia.
            Ma ke noi, ua kapaeia na rula, a hoike mai la ke Komite Waiwai no ka olelo hooholo e kauoha ana e helu ia na dala e waiho ana ma ka waihona, a e hoomaopopoia ko lakou waiwai io, a me ka mea nana i hoopae mai ma keia aupuni. E hoahewa ana i ke Kuhina Waiwai no ka helu ana o ke Kuhina Waiwai he $35,000 o keia ano dala emi he 90 keneta ua helu ia e ke Kuhina he 100 keneta.
            Kamailio loihi mai ke Kuhina Waiwai no kekahi mau mea maloko o ka hoike, a oiai oia e kamailio ana, ua hoomaha ka Hale a halawai hou ma ka hora 1.