Ka Nupepa Kuokoa, Volume XV, Number 28, 8 July 1876 — Page 2
KA NUPEPA KUOKOA, ME KE AU OKOA I HUIIA.
MA KE KAUOHA.
NA LUNA HELU.— Ua hookohoia na poe malalo iho i mau Luna Helu no na apana ohi auhau o ke aupuni :
Oahu.
Honolulu .......................C. H. Judd.
Ewa and Waianae..........John K. Unauna.
Waialua.........................S. M. Naukana.
Koolauloa.....................J. L. Naili.
Koolaupoko..................W. C. Lane.
Hawaii.
Hilo...............................Edward Hitchcock.
Puna..............................L. Kaina.
Kau...............................Chas. E. Richardson.
S. Kona........................K. Kamauoha.
N. Kona........................J. W. Makanoanoa.
S. Kohala......................S. H. Mahuka.
N. Kohala......................J. Wright.
Hamakua.......................G. W. D. Halemanu.
Maui.
Lahaina.........................Thomas W. Everett.
Wailuku........................Thomas N. Birch.
Makawao.....................J. W. Ukumea.
Hana............................E. Helekunihi.
Molokai and Lanai........D. W. Kalae.
Kauai.
Hanalei.........................A. S. Wilcox.
Anahola........................H. J. Wana.
Lihue............................S. W. Wilcox
Koloa...........................P. Puhiula.
Waimea........................S. K. Kuapuu.
Niihau...........................J. Kauai.
JOHN S. WALKER,
Minister of Finance. Department of Finance, June 30, 1876. 533
AHA KIEKIE.— Ke haiia aku nei ka lohe, ua kohoia o FRANK BINDT Esq. i keia la i Kakauolelo no ka Aha Hookolokolo Kaapuni Apana Elua, ma kahi o George N. Wilcox i waiho mai. Ma ke kauoha a ka Aha.
WALTER R. SEAL
Kakauolelo o ka Aha Kiekie.
Honolulu, Iune 24, 1876 761 3ts 763
I KULIKE Ai me ka Pauku 231 o ke Kanawai Kivila e kukulu a e hookaawale ia ana kekahi Pa no na holoholona aea wale no ka Apana o Kona Akau, Mokupuni o Hawaii, ma kahi i kapaia o Puuanahulu. W L MOEHONUA.
Kuhina Kalaiaina.
I KULIKE ai me ka Pauku 232 o ke Kanawai Kivila, ke hoonoho a ke hookohu aku nei au ia A Kahukula i Luna PA No na holoholona aea wale no ka Apana o Kona Akau, Mokupuni o Hawaii ma kahi i hoolahaia ae la maluna.
S KIPI, Kiaaina o Hawaii.
KE HOIKE ia aku nei i ka lehulehu, aia ma ka Pa ma Makahonu. Ke hookaawaleia nei, oia kahi e hoopaa ia ai na holoholona helehewa no ka Apana o Kohala Hema, Mokupuni o Hawaii.
W L MOEHONUA,
Kuhina Kalaiaina.
O KA PA hoopaa no na holoholona helehewa no ka Apana o Kohala Hema, Mokupuni o Hawaii. Ke hoonee ia nei mai Puuloa mai a i ka Pa i hoolahaia ae la maluna.
S KIPI, Kiaaina o Hawaii.
Ka Nupepa Kuokoa
— ME —
Ke Au Okoa
I HUIIA.
Published every Saturday, $2 a year
HONOLULU, IULAI 8, 1876.
NO KA NUI loa o ka hilinai ia o ko kakou pepa o keia manawa, nolaila, ua nui ka poe hookomo nui mai i na olelo hoolaha a me na kanikau no ka hoolaha akea aku mai kela a me keia pea o ka aina. Ua oi aku mamua o ka akahi hapaha o ko kakou waa e paa mau nei no keia mea. A nolaila ke kumu e puka koke ole aku ai kekahi mau manao a ko makou poe kakau mai Mai kunukunu ko makou mau makamaka no keia mea.
KA PUNI ANA.
— O KA —
Haneri Makahiki ia Amerika Huipuia.
1776 1876
Ka La 4 o Iulai ma Honolulu.
E like me ke ano mau o na puuwai Amerika, he hikiwawe ma ka laukahi ana i na kokua a me na manawalea, pela no na Amerika ma Honolulu nei i hapai ae ai i na hebedoma aku nei elua i hala i ka lulu ana i mau makana e hiki ai ia lakou ke olioli palena ole no ka la i puni ai na makahiki he hookahi haneri o ka noho aupuni kuokoa ana o Amerika Hui, oia hoi ma ka la 4 iho nei o Iulai.
Ma na halawai elua i malamaia e na puuwai oiaio o ke kulanakauhale nei, ua kohoia na komite o kela a me keia hana pakahi e makaukau pono ai na hana o ia la ano nui o ia lahui. Ua makaukau pono keia mau komite i hookaawaleia ai na hana, a he pono e mahaloia lakou.
KA AHAAINA INUKI
Ua weheia na hana lealea me ka ahaaina inuki maloko o ke Keena nui paina o ka hotele Hawaii i ke ahiahi o ka la 3 o Iulai. He ahiahi hoalohaloha ia a ka poe ipo e puana ae ai, oiai ua kokoke e poepoe ka mahina a ua hele no hoi a konane pono, me he mea la, ua kahiko pau ka moiwahine o ka po i kona aahu oia kulana a pali ke kua mahina ke alo. A o kahi o aniani makani a Laamaomao i hookuu mai ai no ia ahiahi, ua lawa ia no ka peapeahi kiani ana i na wela a me na hahana o ia po. Ua lilo ka hokele ia ahiahi i wahi hoakoakoa no ke anaina akea i hele a " Le-i Kohala I ka nuku na kanaka."
Ua hoomalamalamaia o mua iho o ka Hotele a malalo hoi o na kumu kiawe me na ihoiho kuikui a me na mea kani a na Poe Puhi Ohe me ka lakou mau lamalama.
Aia no hoi maloko o ke keena nui o ka Hotele he anaina nui o na haole i hele ae e ike kumaka i na hiohiona o ka poe i hoano e ia lakou a like me na helehelena o na wa kahiko he haneri makahiki o ko na Amerika kupuna, oia hoi na la o Keoki Wasinetona a me ke ano o kona alo alii, iaia i noho ae ai i alakai no ka Repubalika.
Aia iloko o ke Keena nui hookipa o ka Hokele kahi i hoonohoia ai o na hiohiona o Generala Wasinetona, ma o ke kino la o ke Kuhina Noho o Amerika, a o ka Lede Wasinetona hoi, ma o ke kino la o ka wahine a ke Kanikela Amerika. Ua kahiko wale ia a uluwehiwehi ke keena i na lau nahelehele o ka liko waokele a me na hae Amerika a me Hawaii e kakau ana ma na paia. He mea ano hou loa a eehia no hoi ka ike ana aku i na kino i hoano e ia na aahu a like loa me na kahiko o na kupuna i ka wa he kanahiku a kanaiwa makahiki i hala aku. O na mea ku loa i na kii o na kupuna i hala e, oia no ke Kuhina noho a me ka wahine a ke Kanikela Amerika, Burua opio a me kana wahine, Kauka Kamika a me kana wahine, Mr West, ke Kanikela Amerika a me Hopemana wahine. O ko Hopemana wahine mea oi loa, oia kona kumu ana he paa kamaa kahiko he haneri makahiki, a ua malamaia iloko o kona ohana no na makahiki he kanalima. Mawaena hoi o na keonimana, hookahi wale no oi, o ke Kanikela Italia, ka mea i hoohalike iho iaia me he lala la o ke alo alii o Lui XVI. Ua hoohanohano ae na alii na Moi kane a me wahine, na lala o ka ohana alii me na luna aupuni kiekie o na aina e, i ka hana o keia ahiahi. O kekahi o na mea akaaka, oia no ko Keoki Wasinetona hoomanao ana ae i kahi kaao o ke oki ana ia ai o ka laau me kana wahi koi. Eia kana " E na lede a me na keonimana, i na makahiki loihi i hala aku, kokoke paha e haneri kanalima makahiki, e wahi keiki uuku ana no au aole paha i oi aku mamua o umi makahiki ko'u nui ; a i kekahi la puka aku la au i waho, a hele iho la mawaena o ka malapua o ko'u makuakane, a oki iho la me ka'u wahi koi i kekahi kumu laau. Ua lohe paha ka hapa nui o oukou i keia wahi moolelo, a malia paha e makemake ana oukou e ike i ua wahi koi la, ke hoike aku nei au, eia ua wahi koi la."
I ka makaukau ana o ka paina, ua kuikuiia aku la o lede Wasinetona e ka Moi, o kai Moiwahine hoi me Generala Wasinetona, o ke Kama Aliiwahine Keelikolani me ke Kanikela Amerika, ka Hooilina alii me ke kaikaina o ka moiwahine, alaila o na poe e ae i konoia mahope aku. Mahope o ka poai ana a puni ke keena, ua noho iho la ka Moi ma ke poo o kekahi pakaukau e lawelaweia ana e Mrs West. Oiai e hookomoia ana na mea ai o ke ano o kela wa kahiko, aia hoi, ua mele mai la ka poe o ka papa himeni o Kaukeano, ua aahu lakou i na kapa o kela wa a me na leo mele o ia ano a na makua e mele ai. O ka papa kuhikuhi o na leo mele o kela wa kahiko a ka papa i mele ai i keia po, ua paiia maluna a o kekahi pepa kahiko pupuka o ka nanaina. Ina he olelo Hawaii, ina ua kuupau aku makou, aka, no ka olelo ano malihini loa, nolaila, ua kapae ae makou.
Oiai e meleia ana o Yankee Doodle me ka maikai, aia hoi ua hui ae la ke anaina ma ka leo hui.
I waena o keia luana paina ana, komo ana kekahi mea i kahiko iho iaia me he koa Ilikini la. Mai na hulu mai o kona papale a hiki i na manea ooi o kona mau kapuai, aole loa e hiki ia makou ke hoohalike ae, o Paohatana paha a o kapena Jack. paha o na Ilikini Modoca.
KA HUAKAI KUIKUI.
Aole i loaa i na opio Amerika a me na opio Hawaii ka hiamoe i ka po o ka la 3, no ka mea, i ka hora 12 no o ka wehe ana ae o ka la 4, ua puka ae la lakou me na ihoiho kuikui mai ke kuea ae o ke kaawai Helu 2, a hele pololei aku la i ka Hotele Hawaii, kahi a lakou i apo aloha ia mai ai e ke Kanikela Amerika me na hueolelo hookipa e pili ana i keia mua aku o Amerika a me Hawaii nei. Ua hoihoi aku na kamalii i na hoomaikai ana i ke Kanikela me na huro ana ekolu.
Ua iho ka huakai ma ke Alanui Rikeke a pii ma Alanui Moi, a mawaho iho o ka puka nui o ka pa alii, makai, ku iho la ka huakai a haawi aku la i na huro ana ekolu.
Mahope o ka haalele ana i ka pa alii, ua hele loa aku no lakou a hiki i ka uwapo maluna aku o Kawaiahao a pelu hou, pii aku la ma ke alanui Puowina, huli ma ke alanui Beritania, pii ma ke alanui Papu a huli ma ke alanui Kukui a pii loa i uka o Maemae, a laila pelu hou i hope a hoi hou i kahi i hoomaka mai ai. Ua ekolu a eha paha haneri i komo iloko o ka huakai kuikui. Aia mawaena o na ihoiho kuikui na pahu a kela a me keia i hookelakela iho ai no ka mahaloia mai o kana.
KA HUAKAI HOAKAAKA.
Mawaena o na hora 6 a me 8 o ke kakahiaka, ua puka ae keia puali me ke kahiko a kela a me keia i anoi ai nona iho o kona like ia, maluna o na lio, hoki, miula a me na kaa. Mamua o ka huakai he kaa me ka pukuniahi maluna iho, ma ke ano hoohalike me ke ano o ka po i lilo pio mai ai ma Yorktown i ka 1776. Alaila, he wahi kaa lio kahiko uuku iho mahope, e hoike ana i ka noho ana o ka " wa nele loa," o ka Aea haukae nui Hawaii ka mea nana nui ia o ua wahi kaa la, me na huaolelo ma na aoao o ua wahi kaa nei, " Kuikahi" a "aole Kuikahi ;" ilaila o na mea hoakaaka e ae mahope mai, e like la me ka bele nui, na poe mele a pela aku. O ka mea hu loa paha o ka aka, oia no ka puulu negero i paeleia a ua hoonohoia maluna o kekahi wahi kiekie i kapiliia maluna iho o ke kaa kikane a na ka lio e kauo ana. E mele ana lakou ma na leo i paanaau ia lakou, a e hookauaheahe wale mai no ka na mea kani hoomaauea i hoomakaukauia i mau mea akaaka. Iloko o keia huakai, aia he kupua, he akua hana keaka, he mau keko mapu a me kekai i mau ano like ole e ae, no lakou ka huina i hiki aku paha i ke 45 ka nui.
I ka puka ana ae o ka huakai mai ka Hotele ae, ua loheia aku keia mele hou loa, akahi no a meleia.
" Ua haule o Hawaii, Ua lilo ka aina i ka pake." Ua hookahakaha iho keia huakai ma na alanui a lakou i koho e ai, a hiki aku la i kahi o ka ona nona keia nupepa, ka pahu hopu o na makaikai ana o keia huakai i na makahiki e puka ai. Malaila, ua oluolu i kana lede ka hoohainu ana mai i na bola kope. Mahope o na ki paumaia ana o kekahi mau leo mele laulaha, ua kai aku ka huakai a hiki a iho ma ke Alanui Nuuanu, pii ma Alanui Moi, a mawaho iho o ka Pa Alii, ua haawiia he ekolu mau huro no ka Moi, oiai oia a me Kana Moiwahine e kali mai ana e ike i ua huakai nei. Mailaila aku i kahi o Samuela Kaaka, a hooluana malaila no ka ukemu liilii alua ana, hoi a hookuu ka huakai ma kahi i hoomaka mai ai. Ua lealea no na opio a me na hapuea i keia huakai hookahakaha.
NA HANA MA KAWAIAHAO.
Mamua iho o ka hora 11, ua haiamu ae la na puuwai Amerika a me ka poe i komo pu iloko o ka lealea pu ana me na Amerika, maloko o ka luakini o Kawaiahao, no ka hoolohe ana i na hana malaila. Ia makou i komo aku ai, aia hoi, ua hoonohoia ka Poe Puhi Ohe ma ke kihi hikina o loko, ka Papa Himeni, ma kahi o ka ogana, a o na kanaka, ua hoonohoia ma na aoao maluna o ka hale makai a mauka. Ua kakauia na wahi maile ma na pale o mua a ma na kau ipukukui, a ua owaowaka mai na hoku wai gula he 38 mamua iho o ka pale o ka Papa Himeni, i poaiia e na lau nahelehele. O ka awai hoi, ua kukuluia he elua mau kumu he-i, me ka lau o me na hua no, ua hikiikiiia a paa i na ku o ka awai.
I ka makaukau ana o na mea a pau, aia hoi, ua hoomaluia ke anaina e ka Peresidena o ka la, oia ke Kuhina Noho o Amerika a hoomaka e like me ke kuhikuhi ana o ka papa kuhikuhi hana. Maikai na leo puhi ohe, kau ke ano no hoi o na leo o ka poe o ka papa himeni; a o ka haiolelo o ka la, oia o Kauka G. W. Wood, o ka manuwa " Lackawana," ua halawai mai kana haiolelo me na pai-pai lima a me na hehihehi olioli no ka maikai o kana mau olelo i haku ai, ku i ka ii o na puuwai nona ka la e kulaia ia ana. Na Rev. H H Pareka i wehe me ka pule, a na Rev. M Kuaea i hookuu me ka pule hookuu i ke anaina. Ua hoohanohanoia keia anaina, ma ka hiki kino ana ae o ka Hooilina Moi a me na kaikuahine alii o ka Moi. Mahope o ka pau ana o na hana ma ka luakini, ua haawi ae ke Kuhina noho, he ahaaina ma kona home mauka, a malaila i ikeia aku ai ia e Ka Mea Kiekie ke Alii W P Leleiohoku, na Komisina o Beritania Nui a me Farani, ka poai o na Kanikela a me na Kiaaina o na apana kiaaina o Maui, Oahu a me Kauai. Malaila i inuia ai kekahi mau ola a me na pane ana no kela a me keia. Ua luana a lawa.
NA HANA MA KE KAHUA AHAAINA.
O ke keu a me ka oi loa no paha o na hana lealea o ia la nui, oia no ka ahaaina nui i haawi manawaleaia ma Kahehuna, ka lealea Europa ma ke Keena kula, ua heihei eke a me na kukini, ka puaa i hamo ia a pakika i ka aila a me ka pou laau pakika i hamoia i ka aila.
Maloko o kekahi lanai loihi he 150 kapuai ka loihi a me 50 kapuai ka laula i hoomoeia ai he elima mau pakaukau loloa, lawa paha no ka hoonoho ana i 1500 ka nui o ka poe ai i ka wa hookahi. Ua kahikoia no hoi ka lanai me na wehi o ka nahelehele. Ma ka puka o mua aku o ka lanai e komo aku ai, e kau ana keia mau huaolelo : " 1776 — Keneturia 1876."
He mau haiolelo pokole kekahi i kukaiia maloko o ka lanai mamuli o na leo kahea mai. Ua haiolelo pokole ka Loio Kuhina a me ke Kanikela Amerika, a na ka Luna o Kona Akau i pane aku ma ka inoa o ka Ahaolelo.
Ua malamaia na heihei, na puhi ohe a me na lealea Europa, e like me ko lakou mau manawa i hookaawaleia.
O ka panina loa o na lealea, oia na hoolele ahi kao lele oiai ka hora 8 P. M. aku a me ka lealea haole mai ia wa aku.
O ka mea hilu loa, o ka loaa ole o kekahi ulia poino, ka mea kuluma mau i na la nui o keia ano.
Ua uku ia ka hana.
[Kakau ia no ke Kuokoa.]
Ma ka Poaha iho nei, ua waiho ia imua o ka Ahaolelo he olelo hooholo mai ka luna o Kona Akau mai, e kauoha ana i na Kuhina o ka Moi, aole e haawi i mau oihana luna helu, luna ohi, luna makai, luna alanui, a mau oihana e ae e loaa ai ka ka uku ia mai e ke dala o ke aupuni i na lunamakaainana.
Oiai ka olelo hooholo e hoopaapaa ia ana e ka Hale, a ia wa no, i komo mai ai kekahi nupepa haole, a aia maloko o laila he 10 o ko kakou mau lunamakaainana he mau luna helu, a o ka Mea Hanohano o Puna ka mea nana i hoike ae na inoa o ua poe la imua o ka Hale.
He mea ana iho i ka ia la noke loa mai i ua la nei, aka, he hauoli iloko no ka hoi puolo i kuaaina.
He mea no keia a makou i koho mua ai e loaa ana ia lakou he mau oihana o keia ano i ua poe la. Ua manao pu no makou, o oukou pu no kekahi i koho, e hoi aku ana lakou me ua mau oihana la. Mawaena o na hoopaapaa ana a pau, ma ka aoao Kuhina, a me ka na makaainana na ike pono ia aku la kekahi poe nui o ko kakou mau lunamakaainana, ua hookuke aku la lakou ia lakou iho, imua o na poo aupuni, me he mea la, e i aku ana, eia makou ma ko oukou aoao e kokua nei ; a e hoomanao mai hoi oukou ia makou. Ua like ia halialia manao me na hoailona i hoike ia mai nei
He mea ku ole keia i ke aloha i ko lakou poe nana i koho mai. Ua hele mai la a huli ke alo ia hai, a o ke kua ka oukou e nana mai nei ; a na oukou ia e noonoo iho no ka wa mahope aku.
Ma ke ano makua o ko kakou mau poo aupuni, he mea hiki no ia lakou ke manao iho, o ke kaana pu ina wahi pomaikai i kana poe keiki ka hana kupono a lakou e hana ai. Aole hoi he hana kupono i na Kuhina ke lawe i ka hai na lakou ; e like me ka lakou i hana iho nei i keia poe o ko na makaainana aoao, i mea no lakou nei e haalele ai i ko lakou kulana i noho ai he mau hoa no ko kakou Hale Hanohano. O keia hana ia ana me keia, he mea e hoonele ia ai na waha olelo o ka lahui i ke kuokoa, e like me ke alakai a ka luna manao kuokoa a ke Akua i makana mai ai no kela a me keia mea uhane.
Ua pihi ka aina i ka poe naauao, a ano maikai no hoi aole i pau loa mai iloko o ka Ahaolelo. O ka hana maikai — e mahele aku i na oihana i ko waho poe, i nui ka ke aupuni mau mea e hoopomaikai ai o kana mau keiki.
Eia mai ma ka kakou Kilohana na inoa o ua poe la.
Nu Hou Kuloko.
Ua hoonee aenei o Pikekona (R F Bickerton) i kona Keena Loio aia maluna o ka Hale Kauka o Minuteole.
Ua hoi hou mai nei o Akiu mai kona holo hou ana aku nei i Kina, a ua wehe hou aenei i kona hale humuhumu kamaa a hana noho lio.
Eia iloko o ka Hale Ahaolelo kekahi bila e papa ana i na kanaka maoli a me na haole i hookupa ia aole e inu wai ikaika. He kokua ikaika keia no na hui hoole wai ona.
Ke kono aku nei makou i ka lehulehu, mai poina oukou i ka leha mau ae ma na kolamu olelo hoolaha o kakou. Aia he mau waiwai nui iloko o lakou ina e hoomaopopo ia.
Ua hoi mai nei kekahi o na alii Ahaolelo mai kona wahi mai i hoopaa ia ai ma ka Kalaupapa, Molokai a eia oia iwaena o kona mau makamaka ponoi. I ka po Poalua iho nei kona hiki ana mai maluna o ka moku " Wauwiki," kapena Keoni Bulu.
Ua haiolelo kekahi kahunapule haole malihini maloko o ka luakini o Kawaiahao i ke ahiahi Sabati aku nei i hala, imua o ka anaina Hawaii, no ke kumumanao nui hookahi e olohani ia nei, oia ka waiona. Eia wale no na wahi huaolelo, "he mea henehene ka waina." I ke kuu ana mai, ua poliuliu no na mea i huna ia maloko o ka polikua o kona noonoo.
WAHINEAUA KUAI HAU PAA.— I ka la 4 iho nei o Iulai oia ke kahua ahaaina o Kahehuna, ua kuai aku ke kanaka nona ka inoa maluna ae i na kiaha hau paa i ka poe hele mai e noi. Aka, eia ka mea kupanaha, ua haawi ia i ua Wahineaua nei ka mana haawi wale aku i ka poe makemake hau paa me ka uku ole, eia nae kau mai no kela i ka uku. Ua hoihoi hou ia iho nei na kenikeni a ka poe i lawe ia e Wahineaua a ua hoopaahao ia oia eiwa malama.
SYLVESTER ZABLAN.— Ma ke kakahiaka Poakolu iho nei, ma Puiwa, Honolulu, make iho la o Petero, ke paniolo kuai lole kahiko loa o ka hale kuai lole o Ake Ma, o Alanui Nuuanu. O Petero kona inoa maa mau i na kanaka Hawaii, a he paniolo oluolu i na mea a pau. Ua waiho iho oia mahope nei he wahine a he mau keiki. He eha mau ma kona poo kona mai i make ai. I ke ahiahi Poaha iho nei, ua ukali ia kana huakai hope e na hoa o ka oihana kinai ahi a me na ahahui hoole wai ona, ua hui ana i noho lala ai me ke kupaa.
KA HOKUAO NO MAIKONISIA.— Ua holo keia kialua misionari no ka Paeaina maluna ae, i ka Poaha iho nei, mahope o ka pau ana o ke anaina pule ma kona oneki. Ua huli hoi aku nei o Rev J. W. Kanoa a me kana wahine opio no ko laua kihapai hana ; a o ke keiki hoi o ia aina mai i lawe ia mai e kokoa ia Binamu, ua hoi pu aku. O Mr E. Bailey o Wailuku, oia ka elele a ka Papa Hawaii i hoouna aku nei e holo e ike i na kihapai. Ua haawi makana aku nei hoi o Mrs Scott ia Rev. H. J. Taylor i hae Amerika a na na makamaka e ae he pahu-hae loihi.
KA HOEMI IA ANA O KA WAIWAI IO — Ua puiwa ke anaina o Honolulu ma ka Poaha koke iho nei, mamuli o ka hoemi hikiwawe loa ia ana e ka Banako o Bihopa ma, o na waiwai io o na dala malalo iho nei, a he 10 keneta ka haule me ka hoolaha ole e mai mamua. E nana pono iho i ua mau dala la, i ole e kuhihewa :
Na dala paa a me na hapalua kala Mekiko hou loa mai nei.
Na dala paa Kile Ua sol.
Na dala paa Mekiko Pesso.
HILAHILA OLE NO HOI !— Ma ko makou ano, he Hawaii ponoi, ua hilahila loa makou i ka lohe ana mai, i ka wa i ae ia ai na kanaka Hawaii e komo a noho e ai ma ka papa aina o ka la 4 iho nei ma Kahehuna, aia hoi, ua hao ae la kanaka i na mea ai, ho o iloko o na pakeke a puolo iloko o na hainaka, ku ae la a hoi aku Auhea oukou, he hana ino loa maoli keia. O ke ano koko no paha keia o na kupuna o kakou e hookoe la no i kau wahi waowaoikinaaupo iloko. Aole na oukou ia ai, aka ua ae laelae ia mai nae oukou e ai wale, aole e aihue me na lima menemene ole. Ma na aina naauao ina e kono ia kekahi e hele i ka ahaaina, hele ia, ai a maona, ku ae no hoi, aole hoihoi puolo. Ke hopohopo nei makou aole paha auanei e kono hou ia na Hawaii i ua ahaaina o keia ano.
Ua lawe aku ke Akua, i ke ola o kekahi kanaka o Kahanu kona inoa. Ua loaa kona kino iloko o ka nahelehele i kana ewa. Ua nalowale oia i ka la 26, a i ka la 27 ua loaa oia. Ua olelo aku oia i kana wahine me ka moopuna, e hele ana oia i ka weo no ka hale. I ka hele ana, ua hele loa no. Ua loaa kona kino kupapau, ilalo ke poo a o ka hope iluna, a i manao, he lua koko kona i make ai i ka nahele makai iho o ka pali o Haa-o i Honokohau. Aloha ka uhane ka hoa pili o ke kino ; lele ka hulu i ka makani, hoi aku a i kona kumu o ke Akua. Aloha ino ! Aloha ka leo o kana wahine i ka i mai, " hele ke kane ka aoao ikaika ka mea nana e lawe mai kela mea keia mea." Aloha nui wale ! J. K. KEALOHA. Kona Akau, Hawaii, Iune 29, 1876
MAI KE ANU MAI O HUAILIKI.— Aohe no he mau mea hou o keia wahi, o ke anu he kamaaina ia no keia wahi. Elua malama ikaika o ke anu, (Dekemaba a me Ianuari.) Ma ka hapa mua o Feberuari, pakele wau mai noho i ka opu o ka muliwai. I ko maua lawe ana i ka ukana maluna na miula ma kekahi aoao o ka muliwai, oiai e paa ana ka wai i ka ice, i ko maua hiki ana ma keia aoao aku o ka muliwai, ku na lio me na hoki ; i mai la ka mea nana ka ukana i'au, (he Olelo e,) "e hoao kaua i ka hele ma kela aoao, he manoanoa paha ka hau (ice) ua lahilahi paha ?" I aku la au, pono ke hoao kaua me ona mau laau loloa." Hopu aku la wau i kekahi laau loihi a hele aku la, me kuu hoao hele ana i ka hou iluna o ka hau ; i kuu hiki ana i waena-kona o ka muliwai, ua paholo aku la no hoi ka hau o kau wahi e ku ana, a noho ana wau iloko o kona opu ana ole. I kuu ea ana ae, aia hoi aole e hiki i kuu poo ke ea ae iluna o ka ili o ka wai, no ka mea, ua paa i ka hau ; i kuu nana ana'ku imua o kahi a ka wai e kahe mai ana, aia malaila kahi malamalama uuku, no na kapuai 8 a 9 ke kaawale mai o'u aku, me kahi ikaika uuku i koe ia'u pela wau i au aku ai a kupono i kahi malamalama, ea ae la, hopu aku la i ke kae o ka hau paa (ice) hai mai la, a pela iho la ko'u kupaka ana iloko oia maeele nui, me kuu kahea aku i ko'u koolua, Peter ! Peter !! e haawi mai oe i kekahi laau loihi."— Holo aku la kela i kula, a loaa ka laau, holo mai la a haawi ia'u i kekahi poo, a huki aku la kela iluna o ka hau, a pela i pakele mai ai au. I ko'u hiki ana i kula ua maeele kuu kino i ke anu ; me ia anu i hoomanawanui aku aia ka hale o ka haole, pumehana. Mai ala mai i lohe ai wau, hookahi haole i make ma ia wahi no. G. B KAHINANO, Moose City, Idaho Territory.
Ke Kau Ahaolelo M. H. 1876.
LA HANA 50 — Poalima, Iune 30.
[Ua aua ke Kakauolelo o ka Ahaolelo aole e haawi mai i ka moolelo o ia la i ua poe kakau nupepa. L. H ]
LA HANA 51.— Poaono Iulai 1.
HOIKE A NA KOMITE.
Hoike mai ka hapa nui o ke Komite Wae no ka noonoo ana i kekehi mau olelo hooholo, e pili ana no ka lawe ana mai i na kanaka o na aina e, ua apono ke komite i ka lawe ana mai i na kanaka mai Inia a me Iapana mai, e like ana ka nui o na kane me na wahine, a na ke aupuni e uku aku i ka uku moku o na wahine, a na mea makemake limahana e uku i ka uku moku o na kane. Waihoia ka hoike a lawe mai ka hapa uuku o ke Komite i ka lakou hoike.
Ma ke noi, ua kapaeia na rula, a heluhelu mai o Mr Kalaukoa he hoopii mai na mai lepera mai e hoopaaia nei ma ka Hale Wai, e noi mai ana e nana mua aku o Kahui ia lakou mamua o ko lakou laweia ana. Waihoia a hiki mai ka Peresidena o ka Papa Ola.
Heluhelu mai o Mr Kalaokoa he olelo hooholo, e kauohaia o Kahui e nana mua i na mai lepera e hoopaaia nei ma ka Halewai, mamua o ko lakou laweia ana, ina paha e hiki iaia ke lapaau ia lakou. Mahope o ka noonooia ana, ua hoopanee loa ia.
Heluhelu mua mai o Mr Halstead he bila e hoololi ai i ka pauku 48, 50 a me 55 o ke Kanawai Kivila. Ma ke noi, ua kapaeia na rula, a ua heluhelu aluaia ka bila ma ke poo. Waihoia no ka heluhelu akolu.
Heluhelu mai ke Kiaaina Kapena he olelo hooholo e kauohaia ke Komite no ka noonoo ana i ka bila e pili ana i ke kuai ana i na wai ikaika e hoike mai i ka lakou hoike. Hooholoia.
Heluhelu mai o Mr Aholo he olelo hooholo e hapaiia ka noonoo ana no na bila e pili ana i ka oihana aopalapala o ke aupuni a e waihoia imua o ke Komite o ka Hale ma ka Poakolu. Hooholoia 1 Heluhelu mua mai o Mr Naili he bila e hoopau ai i na pauku 118, 119 a me 120 o ke Kanawai e pili ana i na lio ke-a. Waihoia no ka heluhelu alua.
Heluhelu mai o Mr Birch he olelo hooholo e kauoha ana i ke Komite o na Aha hookolokolo e hoike mai i ka lakou olelo hoike no ka hoopii a Kona Hema, e hoonoa ana i ke kohoia ana o K Kamauoha. Ua hooholoia e hoike mai ia Komite i ka Poakahi.
Nui mai o Mr Pilipo e waiho muaia ka bila haawina imua o ke Komite Waiwai. Hooleia.
Heluhelu mai o Mr Barenaba he olelo hooholo, e hoikeia mai ke kumukuai o na aina aupuni o Kailua ma Oahu. Hoike mai ke Kuhina Kalaiaina he $735.00. Hoopanee ka Hale.
LA HANA 52 — Poakahi Iulai 3
Halawai ka Ahaolelo e like me ka mau.
NA PALAPALA HOOPII.
Heluhelu mai o Mr Aholo he mau hoopii mai Lahaina mai. 1 I $5,000 no na alanui a me na uapo o Lahaina. 2 E hoemi ia ka uku o na luna aupuni mai ka Moi mai, a koe aku na lunakanawai apana. 3 E hookaawale ia i $3,000 no ka makeke o Lahaina. Waiho ia a noonoo pu me ka Bila Haawina. 4. Aole noho kekahi i luna aupuni ke ole i ike i na olelo elua. Waiho ia a noonoo pu me ka bila e pili ana no ia mea.
Noi mai ke komite o na aha hookolokolo no ka hoopii a ko Kona Hema e pili ana ia Kamauoha i manawa hou a ka Poakolu hoike mai. Ae ia.
Hoike mai ke komite wae no ka noonoo ana i ka bila e haawi ana i ka uku makana no na makua hanau nui i na keiki, ua kanalua ia ka bila mua, a waiho mai he bila hou. Apono ia ka hoike.
Hoolaha mai o Mr Mahoe he mau bila, 1 lunakanawai okoa no Hilo Akau. 2 Luna Auhau okoa. 3 Luna Helu okoa no ia apana no.
Hoolaha mai o Mr Birch he mau bila, 1 hoololi i ka pauku 392, 2 me ka pauku 761 o ke kanawai kivila, 3 e hoololi i ka pauku 2 o ka mokuna 48 o ke kanawai karaima.
Heluhelu mai o Mr Birch he olelo hooholo e kauoha ia ke komite no ka noonoo ana i ka bila e pili ana i na kai lawaia, e hoike mai i ka lakou hoike ma ka Poakolu. Hooholoia.
Hoike mai ke komite wae i koho ia no ka ninaninau ana i keia mau pake i lawe ia mai nei, a noi mai aole e haawi ia kekahi puu dala no keia mau pake.
Waiho pu mai o Mr Birch he hoololi e kauoha pu ia ke kapena o ka moku e hoihoi aku i keia mau pake i Kapalakiko.
Noi mai o Mr Pilipo e hana mua mai na Kuhina he mau palapala e hookuu mai ana i ke aupuni, aole e komo pu aku iloko o na hoohihia ana mai a Aseu mahope aka, maluna iho no o lakou na pono ke koi ia mai. Mahope o ka noonoo ia ana, ua hoopaneeia a noho hou ma ka hora 1.
Halawai hou ka Hale ma ka hora 1 o ka auina la. Hapai hou ia ka noonoo ana no ka hoike a ke komite wae e pili ana no keia mau pake i hoouna ia mai nei e Aseu.
Mahope o ka noonoo ia ana ua apono ia ka hoike a ke komite, Hoolaha mai ke'lii Kaai, he bila e hookapu ai i na manu, O-o, Iiwi, Apapane.
Hapai ia ka hana i hoopaneeia. Oia ka hoololi i ka pauku 65 o ke Kumukanawai, ma ka heluhelu alua ana. I ka ninau ia ana, ua kakau ia na ae me na hoole. Ua hoopanee loa ia. He 22 oia ka hoopanee loa, a he 13 ma ka hoole.
Hapai ia ka nono ana no ka bila e hoololi ai i ka pauku 25 o ke kanawai e pili ana i ka uku o na kumu kula i apono ia ma ka makahiki 1865 imua o ke komite o ka Hale, ma ka heluhelu alua ana.
Kamailio mai ke'lii Kapena Loke ma ka aoao e hoopanee loa i ka bila e kamailio ia nei.
Hoololi mai o Mr Lilikalani i hookahi dala ka uka haahaa no ka la o na kumu kula aupuni.
Eia ka poe i kamailio ma ka aoao kokua i ka bila, e hoomahuahua ana i hookahi dala no ka la. Hons. Birch, Lilikalani, Kalaukoa, Nawahi, Kanealii, Kahuila.
Eia na mea i kamailio ma ka aoao kue i ka hoomahuahua ana i ka uku o na kumukula. Na'lii Kapena Loke, Kamika mahope o ka noonoo ia ana, ua hoopau ia ke komite me ka hai aku i ka Hale, ua hooholo ia ka bila no ke kakaupoepoe ana. Hooholoia.
Noi mai ke'lii Kaai e hapai hou ia ka noonoo ana. Hooholoia.
Hoopanee ka Hale a halawai hou ma ka hora 10 Poakolu.
LA HANA 53.— Poakolu, Iulai 5.
Halawai ka Hale ma ka hora 10 A. M. e like me ka hoopanee ana mai ka Poakahi mai.
Mahope o ka pau ana o ka pule, nonoi mai o Mr Aholo, e hoopanee a noho hou ma ka hora 1 auina la. Hooholoia.
Halawai ka Hale i ka hora 1 P. M.
HOIKE A NA KOMITE MAU.
Hoike mai ke Komite o na Aha Hookolokolo, no na hoopii mai ka apana mai o Hilo, e hookaawale ana i Apana Hookolokolo okoa no Hilo Akau, e noi mai ana, e waiho i ka hoopii ma ka papa, a noonoo pu me ka Bila Haawina. Aponoia.