Ka Nupepa Kuokoa, Volume XV, Number 25, 17 June 1876 — Page 1
NUPEPA KUOKOA :
KE KILOHANA POOKELA NO KA LAHUI HAWAII.
BUKE XV. HELU 25. HONOLULU, POAONO, IUNE 17. 1876. NA HELU A PAU 759.
MAIKAI KA HOI KA PAPA !
— A ME —
Ka Laau o kou Hale ! No Hea la ?
KA I NO HOI NO KAHI O WAILA MA ! Nana aku no hoi ia la, OHI KA IO O KA LAAU O MAKAWAO, i ka ua mea o ka nani o Na Papa, Na Laau A ME NA PONO KUKULU HALE O NA ANO NO A PAU, MA KE KIHI O Na ALANUI PAPU a me MOIWAHINE, Honolulu MALAILA E LOAA AI E LIKE ME KA makemake, no ke Kumukuai makeponoloa. PAPA, PAPA, PAPA Na PAPA huluhulu, Na PAPA manoanoa, Na PAPA i kahiia, Na PAPA kepa, PAPA holo keokeo, PAPA holo ulaula. NA LAAU! LAAU! NA KUA. NA KAOLA, AAHO, MOLINA, PEAPEA, PINE HULUHULU, PINE I KAHIIA, Na Papa a me na Laau Ulaula ! PILI ULAULA PILI KEOKEO, PANI PUKA, PANI PUKA ANIANI IPUKA ANIANI, OLEPELEPE. PENA O NA ANO A Pau Hulu Pena mai ka liilii a ka nui ! AILA PENA ! AILA HOOMALOO, WANIKI, PATE NA LAKO o kela a me keia ano. NA AMI-PUKA HALE, NA AMI-PUKA PA. ANIANI ! Pepa Hale me na lihilihi E LOAA NO MALAILA KA PAAKAI Helu 1, O KAKAAKO a me PUULOA No ke Dala kuike, e loaa no na mea a pau i haiia ae la no ke kumukuai emi loa.
O na kauoha a pau mai Hawaii a Niihau, e loaa'ku ana ia lakou, e hooko koke ia mai ana no ia me ka lawa pono.
E kipa nui ilaila, i ike i ka oiaio
749 3m 760
NO GILIBETA KA IKAIKA !
KA LUA OLE O KE KOA,
A ME KA PUUWAI KINA OLE.
HE MOOLELO KAHIKO NO ALABIONA !
MOKUNA XIII.
KA HAAWI IA ANA MAI O KA OIHANA A ME KA AE ANA.— ELUA A HOOKAHI.
" AE, OIA kuu manao maoli, a nolaila maua e hele nei me kuu hoaaloha, e huli i kahi o ka hana e loaa ai i kulike me ko'u makemake."
" Aohe au hana o keia wa e noho nei ?" wahi a Keoni i ninau aku ai.
" Aole ; e ka Naita maikai."
" Ua ike au i ka luaole o kou akamai ma ke kakalaau a me ka pana pua ; aole anei e hiki ia oe ke lawelawe mikioi i na mea paahana o ka hana gula ana ?"
" Aole, e ke alii."
" Nolaila, ua maopopo ia'u ke kumu o kou hoowahawaha ana ia oihana. Aole anei ou makemake i ka'u hana ? oia hoi ma ka hoonoho ana ia oe he luna nui maluna o ko'u mau koa ?"
" E Sir Naita maikai, o ka'u hana ia i makemake nui ai, a me ka iini ana o kuu manao ; aka, aole i ae iki mai kuu makuakane e komo au iloko o ka oihana koa, a nolaila i haalele aku ai au i kona home no ka hele ana e hooko i na koii a loko, a me ka iini o kuu puuwai," pela aku o Gilibeta.
" Nolaila, ke hoohiki nei au ma na iwi o Sana Toma, e hooko au i kou iini, a e hoonoho ia oe ma kahi e ike ia ai e ko ke ao, aole kou he mau io a me na olona o ke kanaka, aka, he mau olona kou o ka liona : aole o oe wale no ka'u e lawe ana, e lawe pu au i kou kokoolua me a'u, ina e makemake ana oia pela."
Hoomaikai aku la o Gilibeta i ka naita no na halia o ka pomaikai ana i hoikeike mai ai.
A ia wa hoi, ua hohola ae la he mau hene aka o ke ano waipahe maluna o na helehelena wainohia o ke kaikamahine alii Beta, e hoike mai ana, ua oluolu loa oia no ka mea i hooholo ia mawaena o kona makuakane a me ka kakou koa.
Pane hou mai la o Sir Keoni. " E hele pu mai oe me makou a hiki i Eletama, a e hoonoho koke no au ia oe i keia la ma kekahi kulana maikai."
Kulou hou aku la ka kakou kamalei e hoomaikai i na'lii nei, alaila emi hope ae la i kona wahi mua i ku ai ; aka iloko o ia mau wa a pau, e ukali pu ia ana kana mau onina me na leha ana mai na maka mai o ke kaikamahine alii, a me he la, aole oia i makemake e hookuu aku i na manawa e hoohiki, me ka leha ole aku maluna o ke koa opilo.
Kauoha aku la o Keoni i na kanaka ona, i ka wa e paa ai o Wili Ahiu i ka hopu ia, e lawe koke ia mai imua ona ; me ka olelo pu aku i na kanaka a pau he hoopai kaumaha loa ko ka mea nana e malama a huna paha i ua kanaka la o ka hewa. Ma ia manawa no hoi i kukala ae ai oia, ua pau na lealea o ka la, a hoomakaukau iho la ka huakai alii e haalele iho i ua kahua lealea nei. A oiai lakou e kamoe ana i ke ala e hiki aku ai i Eletama, aia no o Gilibeta e ukali aku ana mahope.
Mamua ae o ka wa e hoomakaukau ana ka huakai alii e hoi, ua hoouna aku la o Gilibeta i ka lono ma o kekahi keiki la, e hoike aku i kona hoaaloha, e huli ae oia ia ia a hiki i ka hale kakela o Sir Keoni ; malaila e halawai pu ai laua mamua ae o ke kapoo ana o ka la. He nui wale na wa a ka nohea o Keneti i kilohi aku ai mahope o ke keiki ui loihi, a i ka wa a kona maka e halawai aku ai me ko ua keiki ui la, puia ae la kona mau papalina e ka ula kuhohonu.
Oiai, aole he ike iki o ka Naita i keia mau mea, aka aole ia i nalowale aku mai ko ka makua moneka Eustace aku ike ana, ka mea i luli iho i kona poo me ka ehaeha, iaia, e heluhelu ana i ka moolelo ahi-ahi weno ula.
I ka hiki ana aku i ka hale kakela, hoouna aku la ka Naita ia Gilibeta e hele mai imua o kona alo.
Hoolohe mai la ke keiki ui i ke kena.
" Ua noonoo iho nei au i ka mea pono e hana aku ai nou," wahi a Haku Keoni, " a ua hooholo iho nei au e haawi aku ia oe i ke kuleana o oe ke poo o ka poe park.
Hoomaikai aku la o Gilibeta ia ia.
" I keia manawa hope mai nei," wahi ana, " ua hoonaukiuki loa ia au mamuli o na hana ino a ka poe kolohe. O kuu mau dia keia, ua aihue ia a ua pepehi ia, no ia mea, e malama loa oe no ka poe hana ino.
" Aole loa au e haule hope ana ma ka'u hana," wahi a Gilibeta.
" E nana pu no hoi oe i kuu kaikamahine ke hele oia i ke alualu holoholona, a ke paa nei ou ia oe no kona pakele."
" Ke pane aku nei au no kona pakele ma ko'u ola," wahi a Gilibeta, me ka ouli pa ae e nana maluna o ua kaikamahine la, ka mea hoi nana i uauwai loa ae i ka wai hooinu a hiki loa aku i na aa o kona mau lauoho.
" No kou hoaaloha e imi aku no au i kulana e aku noua ko manao ia e ae mai i ka'u hana e haawi aku ai."
A ia laua e kamailio ana, kunou aloha aku la ia me he mea la e hookuu ana i ke kamakamailio ana.
Haalele iho la o Gilibeta me ka piha i ka olioli no kona kulana hou a me ka moeuhane ana no na pomaikai ana e lia ana, aka malia paha he mau manaolana kuhihewa ke hookioio ana iloko ona iho.
Kakali hoomanawanui o Gilideta o ka hiki mai o kona hoaaloha, aka no ka holo o ka manawa a me ka holokiki ana mai o no aka o ka po, a aohe no hoi he hiki mai o Walata.
MOKUNA XIV.
HAAWI io ia aku la ka elele ia Walata Gilibeta, no ka mea, ua ike oia i ka ui e kamailio ana me ia a oi aku.
Hoomakaukau iho la o Walata e pane ia ia i noho iho ai me Haku Keoni. Heaha ka mea e aua nei ia ia ? Aole oia i kuhihewa no kahi i koho ia ai e halawai, no ka mea, ua maopopo lea loa ia ia ka hale kakela o Haku Keoni.
Hoomaka iho la o Gilibeta e anoninoi ka manao.
Ua halawai anei o Walata me ka ulia poino ?
Ua hoomakakiu ia a ua hoopilikia ia anei e na kokua o ka powa Wili, a i ole e ke kalohe paha i pakele ai ?
Aka i ka mao ana ae, mino aka iho la o Gilibeta i kona maka'u.
" He puupuu oolea a ikaika ka Walata ka enemi ke ku kokoke," wahi ana i namunamu iho ai, " a ina he enemi i kahi mamao aku o ka pua me ka pana. Eia ke keakea nei kekahi mau mea ia ia maanei, aka aole o'u kanalua, ua hiki pono aku ia ia.
Me keia mau manao kohokoho iloko o Gilideta ua oluolu no ia, aka no ka hala loa o ka manawa, aole i hiki ia ia ke hoolei ae i na manao o ka pilikia maluna o kona hoaaloha, ka mea e oni ana iloko o kona puuwai.
Me keia kakali loihi a me ka manao haohao, hookomo ia mai la iloko ona ka manao e imi ia ia.
Ia Gilibeta e hoomaka ana e komo hou aku iloko o ke kakela e huli ai i kana pana a me ka pua, he o ana o ke kila kana mea i lohe ma kona mau pepeiao.
Ku iho la ia e hoolohe, unuhi ae la i kana pahi kaua mai ka pale ae, a hele aku la imua ma kahi o ke o ana i lohe ai.
Me kona mama a pau i holo aku ai ia, a haule iho la maluna o ekolu mau kanaka e hakaka ana, hookahi o lakou me ka pahi pepehi kanaka e hakaka hoomaha ole ana me elua kanaka i lako i na pahi kaua elua.
(Aole i pau.)
Ke Kau Ahaolelo o M. H. 1876.
[Koena o ka Poaha.]
Heluhelu mua mai o Mr Preston, he bila kanawai e pili ana no ka mare ana o na wahine Hawaii me na pake. Waihoia no ka heluhelu alua ana.
Nana no i heluhelu mai he bila e pili ana no ka olelo hooholo e apona ana i na hoolilo waiwai paa ana kahu a me na lunahooponopono. Waihoia no ka heluhelu alua. Nana no i heluhelu mai he bila e hoololi ai no ke kanawai e kauoha ana i na mea e lawelawe ana i ka oihana aupuni e hookupa, ma ke noi ua kapaeia na rula a heluhelu aluaia ka bila, a waihoia i ke Komite Hooponopono Bila Kanawai.
Hoolaha mai o Mr Birch, e lawe mai ana oia he bila e hoopau ai i ka pauku 16 o ka mokuna 41 o ke Kanawai Hoopai Karaima.
Hoolaha mai o Mr Kalaukoa e lawe mai ana oia he hoololi no ka pauku 61 o ke Kumukanawai.
Na Mr Kaiue he olelo hooholo i $1,000 no ka muliwai o Waialua ma Molokai.
Ma ke noi ua kapae ia na rula. Heluhelu mai o Mr Mahoe he mau hoopii mai Makawao mai. 1 E uku ia na kumukula o ke aupuni i hookahi dala no ka la. 2 E hoopau ia na laikini awa. 3 E uku ia na la hana alanui ma ke dala. 4 E hoopaa ia i hope ko na luna alanui. 5 E hopu ia na poe moekolohe me ka palapala hopu ole.
Heluhelu mua mai ka Loio Kuhina he bila e hoololi ai i ka pauku 18 o ka mokuna 86 o ke kanawai hoopai karaima. Waiho ia no ka heluhelu alua ana.
Heluhelu mai ka Loio Kuhina no ka manawa mua, he bila e hoololi ai i ke kanawai e hoololi ai i ke kanawai no ka pili waiwai i apono ia ma ka makahiki 1870 Waiho ia no ka heluhelu alua ana.
Hoolaha mai o Mr Halstead, e lawe mai ana oia he bila e hoololi ai i ka mokuna 35 o ke kanawai hoopai karaima.
Noi mai ke Kuhina o ko na aina e ma ka olelo hooholo e noho ke komite o ka Hale no ka noonoo ana i na mea e pili ana no ka hoopae limahana. Hooholo ia.
Olelo hooholo na Mr Naili i $400 no ka Hale Hookolokolo a me ka Hale Paahao o Koolauloa. Waiho ia a noonoo pu me ka bila haawina.
Heluhelu mai ka Loio Kuhina he olelo hooholo, e noho keia Hale i na la a pau ma ka hora 1 auina la a ma ka Poaono ma ka hora 10 a ma ka hora 12 e pau ai. Ua hooholo ia ka olelo hooholo.
NA HANA O KA LA.
Hapaiia ka bila e pili ana no ka hookaawale ana i 30 kapuai o na luna hooikaika balota aole e komo malaila. Ma ka heluhelu alua ana, waihoia i na komite wae. Koho ka noho ia Mssrs Nahaku, Preston, Kuihelani, Waterhouse, Wana.
Hapai ia ka noonoo ana no ka bila e hooluli ai i ka pauku 25 o ke kanawai e hoopau ai i ka mokuna 10 o ke kanawai kivila e pili ana i ka uku o na kumukula o ke aupuni i hooholo ia i ka makahiki 1864, ma kona heluhelu alua ana. Mahope o ka hoopaapaa ana, ua waiho ia ma ka Poalua e noonoo hou ai.
Hapai ia ka noonoo ana no ka bila e hoololi ai i ka pauku 1, 3, o ke kanawai i hooholo ia i ka makahiki 1863 a me ka pauku 1, 3, o ke kanawai i apono ia ma ka makahiki 1874, e pili ana no ka pepehi ana i na pipi ma kona heluhelu alua ana. Waiho ia ma ka lima o ke komite wae. Koho ka noho ia Mssrs Birch, Nahaku, Green, Kamauoha, S K Kaai.
Hapai ia ka noonoo ana no ka bila e hoololi ana i ke kanawai e pili ana i ka auhau holoholona ma kona heluhelu ana. Waiho ia ma ka papa.
Hapai ia ka noonoo ana no i ka bila e hoololi ana i ka pauku 1417 o ke kanawai kivila, ma kona heluhelu alua ana. Waiho ia ma ka lima o kekahi komite wae. Koho ka noho ia Kakela, Aholo, Preston, Birch. Hapai ia ka noonoo ana ka bila e hoololi ana i ka pauku 1418 o ke Kanawai kivila. Waihoia ma ka lima o ia komite hookahi no, bila e ae ana i ke kuai ana i ka opiuma. Waiho ia ma ka papa.
Hapai ia ka noonoo ana i ka bila no ka hooulu lahui o Hawaii ponoi, a me na hapa. Waiho ia ma na lima oia komite wae no. Hapai ia ka noonoo ana no ka bila e hoololi ai i ka pauku 11, 12, 13, o ke kanawai e hoopau ana i ka mokuna 10 o ke kanawai kivila. Ma ka heluhelu alua ia ana. Waiho ia ma ka papa.
Hapai ia ka noonoo ana no ka bila e hoololi ai i ka pauku 101 o ke kanawai kivila e pili ana no na laikini waapa. Waiho ia no ke kakau poepoe ia. Hoopanee ka Hale.
LA HANA 35 — Poalima, Iune 9.
Halawai ka Hale i ka hora 1 P M. Noi mai o Mr Nahaku e hapai hou ia ka noonoo no ka hoike a ke Komite Wae e hoonoa ana i ke kohoia ana o S M Kamakau. Hooholoia.
Kamailio mai o Mr Nahaku ma ka aoao hoopanee loa i ka hoike a ke Komite me kona olelo pu mai, ua ku-e keia hoonoa ana i ke Kumukanawai o ka aina.
Kamailio mai hoi o Hon Kaai ma ka aoao apono i ka hoike.
Noi mai o Mr Preston e hoihoi hou ia ke ia hoike ma ka lima o ke Komite, a e hele aku lakou e ninau i ka manao o na Lunakanawai Kiekie no ke kue a me ka ole, e waiho pu aku hoi ia Komite me ka hoike a ke kauka i nana ai ia Mr Kamakau.
Hooholoia.
HOIKE A NA KOMITE.
Hoike mai ke Komite Pai, ua pau kekahi mau Bila Kanawai i ke paiia. Apono ia ka hoike a ke Komite.
Hoike mai ke Komite o na Ahahookolokolo no na bila a me na hoopii e hoololi ana i na pauku 1417, 1419 a me 1420 o ke Kanawai Kivila, e waiho ma ka lima o ke Komite Wae. Aponoia ka hoike a ke Komite.
Hoike mai ka hapa uuku o ke Komite Hoonaauao no na hoopii lehulehu e pili ana no ka hoopau ana i ke Kahukula Nui. E hoopau i ke kula o Keoneula. E hoomahuahua i ka uku la o na kumukula i 1 dala. E hoopau ia ka hana lima iloko o na kula aupuni. E hoololi i ke ao ana o na kula aupuni ma ka olelo Beritania. E hoohana hou aku i na keiki mahope o na hora kula elima.
Ua waihoia kekahi mau hoopii a noonoo pu me na bila e waiho nei imua o ka Hale, o kekahi ma ka lima o ke Komite Wae, o kekahi ma ka lima o ka Papa Hoonaauao, a ua kapaeia kekahi. Waihoia ka hoike a noonoo ia e ka Hale ma ka Poakolu Iune 21.
Heluhelu mai ka Loio Kuhina he olelo hooholo, e kauohaia ka Papa Nana o Honolulu e kali iki i ka lakou olelo hoolaha no ke koho balota hou ana i pani ma kahi o Kamakau, a puka mai ka pane a ka Luna Kanawai Kiekie imua o ke Komite Wae.
Hoololi mai ke 'Lii Kiaaina Kapena na ka Makai o ka Hale e hele koke aku e hai i ka Peresidena o ka Papa Nana. Hooholo ia.
Heluhelu mai o Mr Kalaukoa no ka manawa mua i kana hoololi no ka pauku 61 o ke Kumukanawai. Waihoia no ka heluhelu alua.
Heluhelu mai ka Loio Kuhina no ka manawa mua he bila e pili ana no ke kuai ana i ka opiuma. Waihoia e pai no ka heluhelu alua ana.
Hoolaha mai ke Kuhina Waiwai e lawe mai ana oia he bila e hoololi ai i ka pauku 773 o ke Kanawai Kivila.
Heluhelu mai o Mr Halstead he bila e hoololi ana i ka pauku 237 o ke Kanawai Kivila. Waihoia e pai no ka heluhelu alua ana.
Heluhelu mai o Mr Kanealii he olelo hooholo e hookomoia ma ka Bila Haawina i $1,000 no ka uwapo eli o Waihee. Hooholoia.
Hoolaha mai ke Kiaaina Kapena, e lawe mai ana oia he bila e hoololi ai i na pauku 276 a me 279 o ke Kanawai Kivila. Waihoia no ka heluhelu aluaia ana.
Heluhelu mai o Mr Mahoe he olelo hooholo, e hoomaha ka Hale ma ka la apopo no ka Hoike Hui o na Kula Sabati o Honolulu, a ma ka Poalua e noho ai ka Hale. Hooholoia.
Hoolaha mai o Mr Preston e lawe mai ana oia he mau bila e hoopau ai i ka mokuna 50 o ke Kanawai o 1874, a me ke Kanawai i aponoia ma ka la 28 o Iune, 1863, a me ka mokuna 21 o na Kanawai o 1874 a me ka mokuna 18 o ke Kanawai Hoopai Karaima. Waihoia no ka heluhelu aluaia ana.
Heluhelu mai o Mr Preston he olelo hooholo, e kauoha ana i na luna aupuni e noonoo nui no ka Hoopae Lima Hana. Hoopanee ia, a noonoo pu me ka olelo hooholo a ka Loio Kuhina no ka noho ana i ke Komite o ka Hale i keia la e noonoo no ka Hoopae Lima Hana.
Heluhelu mai o Mr Kanealii no ka manawa mua, he bila e papa ana i ke Kuhina Waiwai aole e haawi waleia na dala mai ka waihona o ke aupuni i na luna aupuni e hele wale ana i o a ianei me ka haalele wale i ka hana. Waihoia no ka heluhelu alua ana.
Hoolaha mai o Mr Mahelona e lawe mai ana oia he hoololi no ka pauku 50 o ke Kumukanawai. Waihoia malalo o na rula.
Nana no he olelo hooholo e hookomoia ma ka Bila Haawina $7,400 no na alanui a me na alahaka o Ewa a me Waianae.
NA HANA O KA LA.
Hapaiia ka noonoo ana no ka Hoopae Lima Hana i mua o ke Komite o ka Hale. Noho o Mr Birch ma ka noho. Mahope o ka noonoo ua hoopano ka Hale a halawai hou ma ka hora 1 auina la Poalua.
LA HANA 36.— Poalua, Iune 13.
Halawai ka Ahaolelo e like me ka mau
HELUHELUIA NA HOOPII A WAIHOIA.
Heluhelu mai o Mr Kaina he hoopii no Molokai, e hookaawale i $1,000 no ke alahaka ma Waialua, Molokai.
Na Mr Nahaku, mai Kaanapali mai, e kohoia na alii hanau o ka aina i mau alii ahaolelo, ma kahi o na haole. Nana mai no, i $800 no ke alanui pali o Kahakuloa ; nana mai no, i $200 no ona lawe leta mai Lahaina a Kahakuloa.
Na Mr Kauhane mai Hilo mai, e kapili ia i ona mokuahi hou a e hoopau i ko Kilauea holoholo ana ; nana mai no, mai Honolulu, i $1,000 no ke alanui mai ka Waipilopilo a i Kalihi.
Na Mr Barenaba mai Koolaupoko mai, i $2,500 no ka palekai ma Waiahole a me kekahi mau noi e ae.
Noi mai o Hon J P Parker e hookuu aku iaia no hookahi hebedoma. Ae ia.
NA OLELO HOOHOLO A ME NA BILA.
Waiho mai o Hon G Rhodes he olelo hooholo, e hoomanaia ke Kuhina o ko na aina e, e ninau aku i he Kuhina Beritania maanei, ina paha he hiki ke laweia mai na kane a me na wahine mai Inia Hikina a me na mokupuni mai o Azore. Waihoia a noonoo pu me ka Hoopae Lima Hana i ke ia la. Waiho mai o Hon S K Kaai he olelo hooholo, aole e ae hou ia kekahi o na hoa e hookuu, aia a hoi mai ka pue i holo mua. Hoopanee loa ia.
Waiho mai o Mr Barenaba he olelo hooholo e noiia aku ke Kuhina o ko na aina e, e hai mai i mua o ka Hale i ke ano o ka olelo aelike i hanaia me Chulan ma no ka lawe ana mai i na pake lima hana me ka puu dala he $10,000 : a ina paha e hoihoi ia mai ana kauwahi dala i ke aupuni.
Pane mai ke Kuhina, Aole wahi dala e hoihoiia mai ana. Waihoia a noonoo pu me ke Kumumanao no ka Hoopae Lima Hana i keia la.
Waiho mai o Mr Kahuila he olelo hooholo, e kauohaia ka Loio Kuhina, e hooko koke aku i ke kanawai Sabati. Hooholoia. Noi mai ke alii Kakela, e hookau aku iaia i elua hebedoma. Ae ia.
NA HANA O KA LA.
Komite ka Hale no ka noonoo ana i ke Kumumanao no ka hoopae lima hana. Kaheaia o Mr Kauai ma ka noho.
Mahope o ka hoopaapaa loihi ana, ua waihoia i kekahi Komite Wae. Hoopanee ka Hale.
LA HANA 37.— Poakolu, Iune 14.
Hoike mai ke Komite Pai, ua pau i ke pai ia na bila e hoololi ai i ka pauku 237 o ke Kivila a me ka hooponopono ana no ke kuai aku i ka opiuma.
Hoolaha mai o Mr Kauai, he bila e hoopau loa ai i ka mokuna 10 o na kanawai o 1870. Waihoia ma ka papa, a noonoo pu me ka Bila Haawina.
Waiho mai o Mr Kauai he olelo hoohoholo, e hookaawaleia i $500 no ka halepaahao a me hookolokolo ma Waimea, Kauai. Waihoia a noonoo pu me ka Bila Haawina. Waiho mai o Mr Nakaleka he olelo hooholo, e hookaawaleia i $100 no ke awa o Pelekunu, Molokai. Waihoia a noonoo pu me ka Bila Haawina.
Hoolaha mai o Mr Halemanu, he mau bila elua, e hoololi ana mai ka pauku 1 a hiki i ka pauku 4 o ka mokuna — o ke Kivila, a hookuu ana i ka auhau o na haumana kula i hiki aku na kakahiki i ka 17.