Ka Nupepa Kuokoa, Volume XV, Number 18, 29 April 1876 — Page 4
KA NUPEPA KUOKOA, ME KE AU OKOA I HUIIA.
CLOSER, STILL CLOSER.
Crown of Life p 7.
1 Pili, e pili no au ia Iesu,
Pili a hui a lokahi pu ;
Ma kona lima e malu ai au,
Ma kona poli e kaa ai kuu poo.
Cho. Pili, e pili, e pili a mau,
Pili i ou la, pili a mau.
2 Pili ia Iesu ke ao ae ka po ;
Pili ia Iesu ke po ae ke ao ;
Pili ia Iesu mao a maanei,
Aole he malu ke kaawale ae,
Cho. Pili, e pili, e pili a mau ae.
3 Pili ia Iesu ke ola, ke mai.
Ke ilihune, ke waiwai no nae ;
Pili ia Iesu ke hana a po,
Pili ia Iesu ke maha a ao.
Cho. Pili, e pili, &c.
4 Pili ia Iesu, na kamalii hou,
Nana e wehe a ike oukou ;
Hele a mau i ke kula a ao,
Pili ia Iesu i loaa a mau.
Cho. Pili, e pili, &c,
5 Pili ia Iesu ke puni ae au
I na wai make, aole makau ;
Pii mai na nalu, e mele nae au,
Pili, e pili ia Iesu a mau.
Cho. Pili, e pili, e pili a mau, &c.
Hawaii.
HAAWINA KULA SABATI.
HELU 7, SABATI, MEI, 14,
KUMUHANA — Karistiano wiwo ole. PAUKU BAIBALA — Oihana 4 : 8 — 22
8 Alaila olelo ae la o Petero ia lakou, me ka piha i ka Uhane Hemolele, E na alii o na kanaka, a me na lunakahiko o ka Iseraela.
9 Ina i hookolokoloia mai maua i keia la, i ka mea maikai i hanaia'ku ai i ua kanaka nawaliwali la, i ka mea ona i ola'i ;
10 E ike pono oukou a pau, a me na kanaka a pau o ka Iseraela, ma ka inoa o Iesu Kristo no Nazareta, o ka mea a oukou i kau ai ma ke kea, o ka mea i hoalaia mai e ke Akua, mai ka make mai, oia no ka mea i ku ola mai ai keia kanaka imua o ko oukou alo.
11 Oia no ka pohaku a oukou a ka poe hana hale i haalele ai ; ua lilo ia i pohaku kumu no ke kihi.
12 Aole loa he ola maloko o ka mea e ae ; no ka mea, aole inoa e ae i haawiia mai malalo iho o ka lani, iwaena o na kanaka, i mea e ola'i kakou.
13 A ike aku la lakou i ka wiwo ole o Petero ame Ioane, a ike aku la no hoi, he mau kanaka ao ole ia, a he mau kuaaina, kahaha aku la ko lakou naau ; a hoomaopopo iho la lakou, ua noho pu laua me Iesu.
14 A ike aku la lakou i ke kanaka i hoolaia, e ku pu ana me lakou, aole hiki ia lakou ke hoopohala aku.
15 Kena mai la lakou ia laua e hele mawaho o kahi hookolokolo, alaila kukakuka iho la lakou.
16 I ae la, Heaha ka kakou e hana aku ai i keia mau kanaka ; no ka mea o ka hoailona mana kaulana a laua nei i hana'i, ua maopopo no ia i na mea a pau e noho nei ma Ierusalema ; aole nae e hiki ia kakou ke hoole aku.
17 Aka, o palahalaha hou aku ia iwaena o na kanaka, e olelo hooweliweli aku kakou ia laua, i ole laua e olelo hou aku i kekahi kanaka ma keia inoa.
18 Hea mai la lakou ia laua, papa mai la, mai olelo iki aku, aole hoi e ao aku ma ka inoa o Iesu.
19 Olelo aku la o Petero laua me Ioane, i aku la ia lakou, E noonoo pono oukou ; e pono anei imua o ke Akua ke hoolohe aku ia oukou, aole i ke Akua ?
20 No ka mea, aole hiki ia maua ke olelo ole aku i na mea a maua i ike ai, a i lohe ai.
21 Olelo hooweliweli hou aku la lakou ia laua ; alaila kuu aku la ia laua, aole nae i loaa ia lakou kekahi mea e hoopai aku ai ia laua, no na kanaka ; no ka mea, ua hoomaikai aku na kanaka a pau i ke Akua no na mea i hanaia.
22 No ka mea, ua kanaha a keu na makahiki o ua kanaka la, maluna ona i hoikeia mai ai keia hoailona mana e ola'i. Pauku hoopaanaau, p 12.
Mele — Him 303, 8. Leo —
1 E hilahila anei au
I kuu Alii, i kuu Iesu,
Ka Haku nani o ke ao,
Ke kumu o ke ola mau ?
3 E hilahila ia Iesu ?
Kuu makamaka aloha mau,
Kuu koo e hilinai paa ai,
Kuu kumunui e ola'i ?
Pule i wiwo ole, a hilahila ole na haumana, na kumu i ka hoopili mau ana ia Iesu, a i ka hana ino ia nona, &c.
NA NINAU A NA KUMU.
Haalele kakou ia Petero ma e haiolelo ana no Iesu, no kona make ana i na Iudaio, no kona ala hou ana, a lilo i kalahala, a paipai ia lakou, e mihi, e huli mai, e malama ia ia, ke Kaula i wanana kahiko ia, a i ole, e okiia lakou.
A i ka laua olelo ana i keia mau mea, kahu loa na kahuna, ka laua o ka luakini, me na Sadukaio, a hopu ia laua, a hahao iloko o kahi paa. Manaoio nae na kanaka a nui, 5,000 ke heluia.
A ia la ae, laweia Petero ma imua o ka aha hookolokolo, a ninauia. No ka mana hea, a no ka inoa hea i hana'i olua i keia ? He ninau naaupo anei keia ? Aole anei i maopopo ke kumu o ka mana, &c ?
P 8 — 12. Ka Petero pane ana. Pane wale anei ? Me keaha i piha'i ? Heaha ka mea maikai i hanaia'i i ke kanaka nawaliwali ? owai ia kanaka ? ma ka inoa o wai kona ola ? Ka mea a lakou i kau ai mahea ? Ka mea a wai i hoola mai ai mai ka make mai ? Ka pohaku keia awai i haalele ai ? a lilo oia i pohaku aha ? Mahea ia wanana ? Hal. 118 : 22. Isaia 28 : 16. Ka poe hana hale, oia na Iudaio, ka hale ka ekalesia Iudaio. Iesu ka pohaku kihi ma ka hoohalike ana. Ua kapaia kekahi pohaku o ka luakini maoli, he pohaku kihi no ke aha ? A o Iesu, oia ka pohaku kihi o ka ekalesia oiaio. Epeso 2 ; 20. I Pet 2 : 4 7. Mat 16 : 18. Ua haalele nae na Iudaio i keia pohaku. Ua pepehi ia Iesu. Aka, aole inoa he ae e aha'i kakou ? Hai paanaau mai p. 12.
P 13. I ko lakou ike ana i ka wiwo ole o Petero ma, a he mau kanaka laua i ao ole ia, he mau kuaaina, pehea ko lakou naau ? a heaha ka lakou i hoomaopopo ai ? A kaka ka ke ano o Iesu, he naauao oia, a nana e hoonaauao ia Petero ma a nana mai ko laua wiwo ole ? A no ke aha ka ninau. No hea ko olua mana ? A i ka ike pu ana hoi i ke kanaka i hoolaia, e ku ana imua o lakou, pehea iho la ? Nana ia Mat. 11 : 25. I Kor 1 : 27.
P 15 — 18 Heaha ka mea i hooholoia ma keia aha hookolokolo ? Aole hiki ke hoole ia ka hana mana a Petero ma. Ua kaulana loa. Aka, i ole e hoolaha nui ia'ku ka laua hana. Ua aha lakou ia laua ? ua like ia me ka papa ana i ka la, aole make e puka hou mai ia, o mahana hou, a ulu hou na mea kanu.
P 19 — 20. Pehea Petero ma i pane aku ai ? E noonoo pono — pono anei imua o ke Akua ke hoolohe ia wai ? ia lakou anei ? i ke Akua paha ? Hiki anei ke noho a olelo ole i na mea a laua i ike ai, a lohe ai ? Nani ea ka wiwo ole !
P 21 — 22 Ua hoopai anei ka aha ia laua ? Ua'ha wale no ? No ke aha ka hoopai ole ? Ehia makahiki o ka mea i hoolaia ? He kanaka makua loa. Ua oolea na iwi. Ua kekee loa. Ua hoopololeia nae a ola. Mana Iesu.
Mele. " Aole o'u makau." Hae Hoonani p 29
1 Aole o'u makau e hai no Iesu,
I ka olelo o ola'i,
Aole o'u makau e paa no Iesu,
Nana i aloha mai.
Cho. Aole o'u makau, ole o'u makau,
Ole, ole, ole,
Iesu no kuu hoa aloha,
Aole ioa o'u makou.
3 Aole ou makuu e kai no Iesu
I na ino o ke ao ;
Ahonui au e hoao ia,
Ahonui no Iesu.
Cho. Aole o'u makau, &c.
NA NINAU A KE KAHU.
Ke kula a pau. Hai like i ka pauku hoopaanaau. I na aole he inoa e ae e ola'i na kanaka, o ko laua inoa wale no, heaha ka pono ? E manaoio ia ia, a e kokua i ka hoolaha ana i kona inoa ma na wahi a pau. Ina aole inoa e ae e ola'i pehea na miliona i lohe ole ia inoa ? Pehea hoi ka poe i lohe aole nae i manaoio a malama ? Nowai ka make nui ? no ka poe i lohe ole anei ? no ka poe i lohe, aole nae i malama ? Pehea Mat. 11 : 23, 24 ?
Na keiki. Heaha ke kumu i hooleiia'i Petero laua me Ioane iloko o kahi paa ? Ka hoola ana i ke kanaka oopa, ka hai ana i ko lakou hewa i ka pepehi ana ia Iesu, a me kona ala hou ana mai ka make mai a lilo i kalahala, i mea e ola'i, me ka paipai ana, e mihi, e huli mai, i kalaia ka hewa, i ola.
Hewa anei keia mau hana ? a pono anei ke huhuia a hooleiia iloko o ka halepaahao no ia mau mea ? Aole anei e hai mau ana ka oukou mau kumu i keia mau mea ia oukou ? A pehea ? ukiuki anei oukou ? Pela no kekahi poe, a o kekahi poe, manaoio no a hoomaikai ia Iesu a hahai no mamuli ona. Ua hookolokoloia Petero ma, a olelo hooweliweli, a pehea ? makau, a wiwo wale anei laua ? Heaha ka laua olelo makau ole. E noonoo pono oukou — pono anei ke hoolohe ia oukou, aole i ke Akua ? Heaha ka pono ? E hoolohe i ka ke Akua me ka makau ole i ka hoopaiia. Hai mai. Mat. 10 : 28. Aka, ke makau nei oukou i na makua, i na kanaka, i na haole. Ina kenaia e hana i kekahi mea pono ole, hana no oukou, makau i ka hoopaiia — aole makau i ke Akua.
Na makua. Aole anei pela — he poe hoopilimeaai kekahi, mea ola — makau i ka hoole i ka hoole i ka hewa, i ka hehi Sabati, i ka hana i ka ka Haku hana — Ma ka nana'ku, uuku loa ka poe makau i ke Akua. Nui ka poe makau i ke kanaka ; a imi e hoolealea i kanaka. Aole pela Petero ma.
Ma ke aha e maopopo ai ko kakou launa pu ana me Iesu me ke aoia e ia ? Ma ke aha e maopopo ai ka mana o Iesu, a o kana olelo ? Nui anei na hoike ma Hawaii nei no kona mana ? Nui anei na kanaka i noho lolo, oopa ma ka uhane a kanaha makahiki a hoolaia ma ka mana o ka Iesu olelo ? Pela paha ma ke kauwahi — aka, ma ko'u wahi uuku paha. Ka olelo aha a Iesu i hookoia ma ka hooleiia'na o Petero ma iloko o ka hale paahao ? Mat 10 : 17, 18.
Mele. Him. 339 6 — 8. Leo.
1 E ku na koa e,
Kaei i makaukau,
Ma o Iesu la e koa'i,
E koa ikaika mau.
2 Ma kona mana no
E hilinai mau ai,
A ma o na la no oukou
E lanakila ai.
PULE i kupua mau ka poe pono, i kokua mau i ka hoolaha ana i ka inoa o Iesu, ka mea wale no e ola ai.
HAAWINA KULA SABATI NO MEI 21. Oihana 4 : 23 — 37 HAWAII.
NO GILIBETA KA IKAIKA !
KA LUA OLE O KE KOA,
A ME KA PUUWAI KINA OLE.
HE MOOLELO KAHIKO NO ALABIONA !
MOKUNA XI.
KE KA-KA LAAU ANA.— KA PANA PUA AKAMAI
LOA — KA PEPEHIIA ANA O TETA.
KA PAKELA ANA O KA MEA NANA I PEPEHI.
UNUHI ae la oia i kekahi pua hou o lena ae la i kana kakaka, a i ke kuu ana aku ua pololei aku la ka pua a ku i ka pahu hoailona, e like me ka Walata i pana ai.
Ua aneane io e lilo ka makana nau," i hooho ae ai oia. " Ina i maikai pono ka hana ia ana o ka hulu o kela pua, aole e halahu kona ku ana i ke keokeo." A iloko o kona ukiuki no ke ku pololei ole ana, hehi iho la oia i ka weuweu me ka ikaika.
Aka, ia wa no, ua lele hou aku la ka pua a Walata a ku pono i ke kae o ke keokeo. No keia mea, ua hooukiuki nui iho la o Wili me ka nau o na kui. Me ka nana ole ae i kona hoohenehene ia mai e ka lehulehu, ua lena hou ae la ia i ke kakaka a pana aku la, ua ku pololei aku la ka pua i ke kiko waena keokeo.
" Ha ! ha !" i hooho ae ai o Wili me ka hauoli nui, me ka lele ana iluna, " e ke keiki, o Robina Huda kou hoa e like ai ina e ku pololei e like me kela. Pehea kou manao i keia wa ? E hoao hou anei oe e oi ae mamua o kela ?"
Me ke ano hooio i alawa ae ai oia i ka lehulehu nana oia i hoohenehene mai i na wa mamua iho, me ke ake nui e lilo ia ia ka makana e paa ia ana e ka Lede Beta.
Aole i pane aku o Walata ia ia, aka nee aku la oia i hookahi kuina wawae imua, a pana aku la me ka hooponopono ole, ua lele aku la kana pua maka kila, me ka pololei loa, a ku pono i ka pua a Wili, nahae ae la ka pua a Wili iloko o na apana elua, a komo pono aku la ke poo kila iloko o ke kiko-waena o ka hoailona maka-bipi.
Ua huro olioli hou mai la ka lehulehu no ka pololei loa o keia pana ana, a oi aku i ko na wa mua. O ka oi keia o ka huro loihi ana, o me ka paiakuli, no ia mea, ua poholopu iho ka leo huhu o Wili iloko o keia mau leo wawalo hauoli.
Huli ae la o Wili, a olelo aku la imua o Sir Keoni ; " O ke diabolo ka mea nana i alakai kela pua, aole no ke akamai io. Ina aole oe e haawi mai i ka makana na'u, o oe kekahi i huipu me Satana. E nana i kela pua, e hiki anei i kekahi kanaka ola ke alakai pono i kana pua e like me kela, ina aole he mana kilokilo pu kekahi me ia, a ina hoi aole kokua ia e na mana o ka pouli ?"
" E hoomalu ia oe iho," i pane mai ai ka makua Eustace. " E oki kou olelo ana i ua mea pelapela."
"Aole, i olelo hou aku ai o Wili me ka makau ole. " Ua pana ia kela pua me ke kokua ia e ka mana kilokilo, na'u ka makana e pono ai. A ina aole e haawi ia mai ka makana na'u, ua hiki ia'u ke kapa aku ua pili pu ke alii mahope o ka Satana mau hana, oia hoi, ua paa oia malalo o ka mana kilokilo o keia keiki opio. E hiki anei i kekahi kanaka ola ke pana pololei loa i kana pua e like me kela ?"
" Ae, e hiki no !" i kahea mai ai o Gilibeta me ka leo nui mawaho mai o ka lina, a ia wa i lele mai ai oia iloko o ka lina me ke kakaka i kona lima, ua lenaia. " Aole he mea e ae i ku ai o kela pua me ka pololei o ke akamai wale no. Aole mamuli wale no o na mana kilokilo e hiki ai ke pana me ka pololei loa, i lohe oe. O ke akamai a me ka maa kekahi i ka pana ana."
Na keia leo o Gilibeta i huli mai ai o Wili i ona la, a o ka lehulehu kekahi i nana mai la ia ia me ka pihoihoi nui. Olelo mai la o Wili. " E hiki anei ia oe ke kapa he keiki keia i maa i ka pana pua ? O na makahiki he iwakalua kumamalima i hoohalaia me ka pana pua, e kapa anei oe ia aole i maa ma ia hana. Ehia hoi makahiki i hoomaamaa ai keia keiki ma ia hana ? oiai aole i oi aku kona mau makahiki mamua o ka iwakalua."
" No ka poele o kou ike a me ka paakuku o kou lolo i nele ai oe i ke akamai, loihi ka manawa o ka hooikaika ana, aole nae i oi aku ke akamai. I mea e pau ai kou kuhihewa, e nana i keia. Ua lawa keia i kumu hoohalike na na mea a pau e manaoio ai, he hiki no i kekahi mea ola ke alakai i kana pua ma ka pololei loa. E nana iluna !"
Ua alawa ae la na maka o na mea a pau i loaa.
He manu koraka ke lele ana iluna lilo, i ka lewa iu anoano, ua like oia me ke kiko eleele la ke nana aku.
Unuhi mai la o Gilibeta i kana kakaka me ka ikaika, a pau ka loa o kona lima, hookuu aku la i ka pua me ke oeoe kani i loheia, oiai ka pua e mahele hikiwawe ana i ke ea. He manawa ole ua ku pololei aku la ua kiko eleele nei i ka lewa iuiu, a iho pakaawili mai la i ka hoona me ka poanaana ana i o a ianei, a hiki i ka haule pono ana ma na wawae o Wili.
Ua puiwa ka lehulehu a pau i ka ike ana, me ka hoomaopopo ole i ke ano o ka mea a lakou e nana nei ; a iloko o kekahi mau minute pokole, ua hoalii iho la ka eehia maluhia mai o a o. Aka i ka wa i pa ai ka manu i ka lepo me ka pua e paa ana iloko o kona kino ; ua kupinai hou ae la ka lewa i na leo wawalo huro, a hiki i ka wa ana o ka nahele.
Me ka piha i ka hauoli nui o Sir Keoni i ku ani ai iluna, a kahea mai la ; " Nau ka makana, e hele mai e lawe aku."
I aku la o Gilibeta. " Aole pela. Aole au i pana no ka makana. I pana au i mea e hooiaio ia ai, aole me ka mana kilokilo e kokua ia mai ai ke akamai o ke kanaka ma ka pana pua ana. Ua eo mua ka makana i kuu hoaaloha maikai, oia hoi o Walata Fiti Rue."
Kulou mai la o Sir Keoni, me ka peahi mai ia Walata e hele aku. Hele aku la oia a pii ae la iluna o ka aleo, a pela i loaa ai ia ia ka pua mai ke kaikamahine ulii Beta mai.
Eia o Wili ke hoomau nei i ka nana ana i ka manu i ku ai i ka pua. He mau manao inoino loa ke nune ana iloko ona, ua aneane e pehu kona umauma i ka paila i ka inaina, aka, no kela apo ili ma kona opu ka mea i hoopaaia ai. Ua kunahihi kona mau helehelena ke nana aku. Me ka nau o na kui i hoomohala ae ai oia i kona mau lima, a puiki ae la me ka ikaika. No ka nele i ka maa ole e hoona ia ai kona inaina, ua keehi iho la i ka manu e kapalili ana, a pepe iho ia malalo o kona kuekue wawae.
Ua auwe ae la o Belaneke no keia hana hoomainoino me ka pani iho i kona mau maka. O na kanaka e ku ana a puni o Wili aole e hiki ia lakou ke uumi i ko lakou akaaka no ua kanaka nei.
" Ho ! ho !" i kahea mai ai kekahi kanaka o ka poe e hene nei i ka aka, me ke kuhikuhi mai i ka manu. " He mana kilokilo iho la paha ke ku ana o ia manu i ka pua."
Nana ae la ua o Wili iluna, me ka ula i ka inaina, a haka pono aku la me he tiga la i ka poe e ku puni mai ana ia ia, me he la e imi ana i kana mea e hoopai aku ai i kona inaina.
I ka ike ana mai o na mea e ae a pau i kona holoholona huhu, ua hoomalae koke ko lakou mau lehelehe, aole hoi he heneaka i ikeia ana ma ko lakou mau papalina.
Aka, o Teta, ka mea hana pua, oia wale no ka mea hookahi i koe e hoopahenehene nei. No ka mea, aole i poina iki ia ia na hana ino ana a Wili, a me kona kolohe ana i kana mau pua ; no ia mea ua henehene mai la oia imua ponoi o kona mau maka.
Hailiili koke aku la o Wili ia ia me ka olelo pu aku.
" Ke aa mai nei anei oe e henehene mai imua o'u ?"
" Ae," i pane mai oi o Teta, " manao anei oe no kou mau hoohoka ia ana ke kumu o kuu hoohilahila ana ia oe ? Aole, no kou aihue ana i kuu mau pua. Ina aole oe i hana apiki mai ia'u, owau kekahi e minamina no kou mau hoohoka ia i keia la. Aka, ua olioli loa au no ka loaa ole ana o ka makana ia oe."
" No ia mea, e lawe aku no i ua mau pua la au, a me lakou pu kuu mau hoino ana nou !" I ka wa ana e olelo nei pela, ua unuhi koke ae la oia i kekahi pua mai kana aa-pua ae ; a me ka hikiwawe o ka anapu uila lena ae ai oia i ke kakaka a pana aku la i ke kanaka hana pua. Me ka hikiwawe loa i lele aku ai ka pua a ku i ka aoao hema o Teta, kapoo pu aku la a hiki i ke koe uuku ana o ka hulu iwaho.
Ua malama koke ae la na lima o Teta iluna a haule iho la i ka honua, aole no hoi i liuliu, ua make loa iho la ia.
Auwe ae la ke kaikamahine a hina iho la ma na wawae o ka makuakane, a ia wa i haulehia like ia ai ka lehulehu e ka eehia manaonao. Aka, mamua ae o ko lakou manawa i noonoo pono ai no kona mea nana i pepehi, ua puhalahio aku la o Wili mawaena o ka lehulehu me ka pahikaua i unuhiia ma kona lima. Me he mea la ua kuka mua ia keia mea mawaena o Wili a me kona mau ukali, oiai, i ua wa la, ua hookaawale koke ae la kekahi poe kanaka i alanui no Wili e holo ai, a mawaena aku o lakou kona holo ana a hiki i ka puka ana mawaho o ka poai o na kanaka.
Me ka leo nui i kahea mai ai o Sir Keoni. " E hopu ia ia."
Kahea mai la no hoi o Gilibeta me ka unuhi ana i kana pahi. " E hoopaa ia ia ! E ka powa aole oe e pakele ana."
" Ma o na lani la, o kou koko ka ukupanai no keia koko !" pela o Walata i hooho ae ai, a lena ae la i kana kakaka e pana aku mahope o Wili.
(Aole i pau.)
KA HUNT'S LAAU OLA
(HUNT'S REMEDY)
HE LAAU LAPAAU HOU, MAI AMERIKA MAI ! He Laau Maikai keia no Na mai pehu o ka opu, Na mai o ka puupaa a me ka opu mimi, Mimi-paa, Mimi-eha, Mimi-helelei, Ka lepo gravel iloko o ka opu-mimi, Ka mana ole, kapalili, hui ono ole ka ai. Na Mai Wahine, NAWALIWALI O KE KINO, LEPO ULA ILOKO O KA WAI MIMI, MANOANOA PAHA KA WAI E like me keokeo o ka huamoa, Like paha me na kaula silika keokeo, eleele, lenalena paha ; a i ole ua like paha me ka lepo i anaiia i na iwi keokeo, a i ka mimi ana, ua wela oioi ka mai, me ka eha nui o ke kikala a me ka puhaka.
HE NUI NA HOIKE e ola nei, ka poe i loohia i keia mau mai i haiia maluna ae, ua pau lakou i ke ola maikai, no ka inu ana i ka HUNT LAAU OLA. ("HUNT REMEDY)!"
UA HAAWI mua ia keia laau, e kekahi kahuna lapaau naauao, i ke kanaka mai pehu o ka opu, e noho ana me ka ohana a Mr. Hunt ; John Hunt kona inoa, he 45 kona mau makahiki, he kanaka nui poepoe, ua loohia i ka mai pehu. Ua haawiia kela me keia laau no keia mai, aole nae oluolu ; ua mahuahua mau kona pilikia, ua pau loa ke kino a me na wawae i ka pehu ; ua kokoke paa loa ka mimi ; kokoke pau loa ka hanu ana ; a ua mahuahua loa ka wai iloko o ke kino. Aole hiki iaia ke moe ilalo ma ka moe, nolaila, ua noho wale no iluna i ka po a me ke ao. Pela mau kona popilikia a hiki i kona hoao ana i keia laau, a ke kahuna i kuhikuhi mai ai. A i kona inu ana i keia laau, ua hoomaka koke ka oluolu. Ua paipai koke ia ka puupaa i ka laua oihana ; ua puka hou ka wai mimi a nui wale ; ua emi koke mai la ka pehu o na waewae ; a ua oluolu hou ke ake-mama i ka hanu ana ; ua oluolu a maikai ka io o na lala, a e hoi nui mai ana ke ola maikai, alaila, me ke kuhihewa, ua waiho oia i ka laau i kekahi mau la. Ua pono ole nae ka waiho ana ia manawa, no ka mea, aole i ola io maoli kona mai pehu. Ua molowa hou na puupaa i ka laua oihana, a ua mahuahua hou ka wai iloko o ka opu, a ua popilikia hou e like me mamua. Alaila, ua inu hou oia i ua laau la, a ma ka hoomanawanui ana, ua lanakila hou auanei maluna o ka mai, a ua ola io maoli, a ua hoomaka hou oia i kana oihana mawaho o ka hale.
Oia ka lapaau mua ana me keia laau ; a mai ia wa mai, (he 25 makahiki) ua hahanaia keia laau e like me ka hana ana o Mr. Hunt, a ua haawi na kahuna lapaau i keia laau i ka poe mai pehu a me na mai like.
Mai ia manawa mai, ua ikeia, e mahaloia hoi keia laau, mai o a o, e na kanaka, a ua inu ia hoi ma ke ao ana a me ke ao ole ana mai o na kahuna lapaau ; oia ka mea i hoola mai i na kanaka he nui, ka poe pilikia i ka mai pehu, a kokoke i ka make.
Na kuhikuhi no ka inu ana :
E INU I KE PUNA TI PIHA, a hala na hora 4, alaila, e inu hou. E mahuahua liilii nae a hiki i elua puna ti piha — a hiki hoi auanei i puna nui piha.
NO KE KEIKI hookahi makahiki a hiki i na makahiki eono, e haawi 5 kulu, a hiki i na kulu 20 ; eha hora nae mawaena o ka haawi ana.
KUMUKUAI, he - - $1.50 no ka omole.
DILLINGHAM & CO.,
735 3m 748 Na Agena no ka Pae Aina Hawaii.
J. PORTER GREEN,
" KEIKI O KAUAUKIUKIU."
LOIO !
E HELE MAI NA MAKAMAKA A PAU IO'U nei, a na'u no e kokua ia oukou imua o ka Aha Hoomalu a me ka Aha Kiekie, me ka uku haahaa makepono loa. Aia kuu Keena ma kahi o ka Lunakanawai Hoomalu o Honolulu nei, oia ka " Aiko," ma Alanui Kalepa. 741 ly 792
C. H. DICKEY (Kalekika).
LOIO !
MA HAIKU, MAUI.
UA MAKAUKAU E HANA PALAPALA Kuai, Palapala Moraki a me na mea a pau e pili ana ma ka Oihana Loio. 743 1y 794
WING SING & Co.
Puhi Palaoa,
E waiho mau ana palaoa a me na berena palupalu. Kihi o na huina alanui NUUANU A ME BERITANIA. 703 1y 755
KE HOIKEIA aku nei i na kanaka a pau, aole lakou e komohewa ma ka Aina o ke Kula, ma Wahiawa, Waialua, Oahu, ma ke kua ana i na laau, a pepehi hoi i na Bipi hihiu, a alualu i na holoholona ma ua aina la ; aole hoi lakou e hookuu wale i na bipi a me na holoholona e ae maluna o ua aina la. W C JONES,
Honolulu, Novem. 29, 1875 731 tf
NO KA MEA, ua koho mai ka Aha Kiekie ia'u i Kahu Malama Waiwai no HOOMOEAPULE w, i pupule, nolaila, ke papa nei au i na mea a pau loa, aole e hoolimalima aina me ia a me kana keiki me Hanaumaikai k. Aole pono e hookaa aku ia laua ka uku hoolimalima, aka, e lawe koke mai ia'u.
J. PORTER GREEN,
Luna Malama Waiwai no Mele Hoomoeapule.
Honolulu, Dek 22, 1875. 734 6m
NA MEA NANI E HIEHIE AI
NAUWE MAI * NAUWE MAI
MAHEA LA E LOAA AI NA PAPALE WAHINE AUlii kolomanu ano hou loa, a me na pua nani e kinikohu ai e kau ai ka iwa, he la makani e hao ai na polena o Haupu, kapakahi manuia o Keokoi ka moku, ma kahi o L. ASEU, Aia pu no malaila na HAINAKA SILIKA liilii LEI AI kae weluwelu, a me na LIPINE SILIKA puapua weluwelu, e kuwelu ai i ka makani. NA KALAKOA ANO HOU LOA i like oleia mamua, Na KAEI SILIKA Nani, NA MAKALENA KALAKOA me ka PUAKEA, na ALAPIA HULUHULU o na ano a pau, na KIHEI UHI hou a kohu ai ka lino ana, na mea ala waianuhea, e ku ai ka hoomau, a me na aila lukini e puia ai ka lauoho i ke ala. Na lilina ume naau o kela ano keia ano, na kamaa wahine o na ano a pau. Na lole kane o kela a me keia ano, na palule kalakoa a me ke keokeo, i humuia me ka mikioi loa. He makepono loa no hoi ke kuai i na mea i hoikeia ae nei maluna ke kuike. I mea e pau ai ke kuhihewa, e naue mai no e na makamaka ma kuu Hale kuai HIKIKIIKAUOENA. L. ASEU.
Kihi ma Ewa o Alanui Nuuanu mauka o Alanui Moi.
Honolulu, Aug. 27, 1875, 717 lyr 768
E. STREHZ, (AILUENE,)
HAAWI A KUAI
LAAU LAPAAU.
AIA.MA MONIKAHAAE, KIHI O NA HUINA o na Alanui Papu a me Hotele. Aia malaila na Wa Ala a me na Wai Rukini maikai loa e loaa ai. E hamama mau ana i na ahiahi Poaono a pau.741 1y 792
E naue mai ! E naue mai !!
KE POLOAI IA AKU NEI OUKOU E NA keiki lalawai o na pali hauliuli, a me na kaikamahine puukani nohenohea o na pali Koolau, e naue mai ma ko makou mau Hale Kuai ma KAALAEA a me KANEOHE, malaila e loaa'i oukou na nuhou o na ano a pau. Na Lole Kane, Wahine a me na kamalii, Na Kamaa Na Hou. Na ano Papale a me na mea liilii o kela ano keia ano he nui wale. E loaa no ia oukou ke kumukuai makepono loa. E naue mai ! E naue mai !! E hoao i pau ko oukou kuhihewa. AKANA & KONGER & Co.
Koolaupoko. Maraki 23, 1876. 747 6m* 771
ANOAI I KA LEHULEHU,
E kipa mai a e nana i kumaka ka ike i na waiwai nani i loaa mai nei iloko o na La Kulaia iho nei.
Penei ke ano o ua mau waiwai la : Na wati a me na kaula gula, a na Ledee a me na Keonimana ! NA KAULA OPELE A NA LEDE NA KOMO GULA NANI O KELA A ME KEIA ano o na Lede a me na Keonimana ! NA KUPEE GULA, NA LIPINE GULA, Na gula pepeiao o na wahine ! e oaka ai i na pepeiao, a e hulali ai hoi na manamana lima, a e kilipohe ai hoi na ai. Na komo humuhumu gula a me ke kala Na pihi pulima gula wahine a kane, Na laketa gula lei wahine nani, Na komo daimana o na Lede. Na kaula laketa, Na pine omau kihei, Na laketa aniani, Na huka gula wahine.NA LAKO HALE. NA PUNA, NA PAHI, NA KIAHA, KALA, NA APO KALA, NA KAWELE holoi lima, NA O DALA o kela a me keia ano, a me na mea nani e ae no he nui wale.
E kuaiia aku ana no ma ke kumukuai haahaa loa i ko na wahi e ae o ke taona nei. UA MAKAUKAU NO HOI NA mea nani no kanaka makua a me na kamalii. Na Kamaa Paa Loa, e loaa no maanei e like me ka makemake ; a ina e loaa koke ka ino, he hiki no ke hoihoi mai.
M. McINERNY.
Kihi o Alanui Papu a me Kalepa. 750 3m 749