Ka Nupepa Kuokoa, Volume XV, Number 10, 4 March 1876 — Page 1

Page PDF (1.58 MB)

NUPEPA KUOKOA
KE KILOHANA POOKELA NO KA LAHUI HAWAII
BUKE XV. HELU 10. HONOLULU, POAONO, MARAKI 4, 1876. NA HELU A PAU 744.

E Pau na Pupupu Kahiko !
E pani me na Hale Laau.

                PAPA, PAPA, PAPA O KELA ME KEIA ANO, A ME NA LAKO KUKULU HALE O KELA ME KEIA ANO, MA KA PA-PAPA O S. G. WAILA MA ! KIHI O ALANUI PAPU me ALANUI MOIWAHINE, no ke Kumukuai HAAHAA LOA ! ae like ka nui me ka makemake. LAAU NOUAIKI ! NA LAAU KAOLA, NA PAPA MANOANOA, NA PAPA HELE, NA KUA, AAHO, AAHO LIILII, &c LAAU ULAULA ! NA LAAU KAOLA, NA PAPA MANOANOA, NA PAPA HELE, NA KUA, AAHO, POU, AAHO LIILII, MOLINA.&c Pili Cida keokeo, Pili Laau ulaula, Na Puka Hale, o na ano a pau, Na Puka Aniani, o na ano a pau, Na Olepelepe Puka, o na ano a pau. Pepa Hale me na lihilihi. NA LAKA PUKA NA AMI-PUKA, NA AMI-PUKA LIILII. NA KUI NAO PENA, AILA-PENA, VANIKI, WAI HOOMALOO. PAAKAI Helu 1, O PUULOA. E lawe wale ia no na mea i kuai ia keia Pa Papa aku a i kahi o ka mea i kuai mai, ina ma ke kaona nei, a me na Awa o keia Paeaina e like me ka aelike. Aia maanei ke Keena o ka MOKUMAHU " KILAUEA," L. MARCHANT, Kapena. S. G. Waila ma, 709 3m 721

HE
IWAKALUA TAUSANI LEGUE
MALALO O KE KAI !
— NA MEA —
KUPANAHA O KA MOANA !
KE ALA O KA MEA HUNA,
— A O KA MEA —
POHIHIHI O KA 1886 !
MAHELE 1. MOKUNA X.
KE KANAKA O NA KAI.

                O KA mea nona ua leo la i pae mai, no ke Kapena no ia o ka moku. I ka wa no hoi i pae mai ai o keia leo, ua ku koke ae la o Nede iluna ; o ke kuene keia, ua ala ae la oia me ka nawaliwali mamuli o ke kauoha a kona poo, me ke kuhi wale ana ae no o kona lima. Oia iho la ka lua ole o ke akamai o keia Kapena, aole i hoike mai kona mau helehelena i kau wahi ano huhu no ka Nede hana. Ua mumule au, a o Kosila, ke ku loha mai la oia, e kali malie ana no ka hope o keia hana a Nede Lana.
            Hilinai mai la ua Kapena nei i ka papakaukau, me ka pea ae o na lima i ka umauma, a nana pono mai la ia makou. Ua hopohopo anei oia i ka olelo mai ? Ua minamina anei oia no kona hoopuka hewa ana i na huaolelo Farani ? Pela la iho la ko'u manao koho wale.
            Mahope iho o ka hala ana ae o kekahi mau minute o keia noho mumule ana, ekemu mai la ia me ka olelo malie loa, ma ka olelo Farani, penei : " E na Keonimana, ua hiki ia'u ke kamailio ma ka olelo Farani, Enelani, Geremania a me ka Latina me ka moakaka. Ua manao au e pane aku i ko kakou wa i launa mua ai, aka, no kuu makemake e ike mua i ko oukou ano, a e noonoo pono i ka mea kupono a'u e hana ai, nolaila, ua kakali au a loaa ka wa kupono. O ka moolelo a kela a me keia mea pakahi o oukou i hoike mai ai, ua kulike wale no ma na mea nui, a no ia mea, ua akaka ia'u ko oukou ano. I keia wa, ua hiki ia'u ke kahea aku i ko oukou mau inoa pakahi, a ma ke ano ulia wale i hiki mai ai oe imua o'u e Mr. Piere Aronaka, ke kumu o ka moolelo o na mea kino ma ka Museuma o Parisa, a o ka mea i haawiia aku ai ke kauoha e hele e huli i na moolelo o na mea ulu, na minerala, na holoholona, na manu a me na mea e ae ma na wahi he nui o ka honua nei ; a pela me Kosila kau kauwa, a me Nede Lana, ka mea o-ia o ka moku kaua Aberahama Linekona, o na aumoku o Amerika Huipuia.
            Kunou aku la au me ke ano e hooia aku ana i kana mau olelo. A no ka ninau ole mai o ke Kapena, nolaila, aohe a'u mea e pane aku ai. O ka olelo ana a keia kanaka i ka olelo kamaaina o kuu aina, he neepu wale no, aole i hoopiiia ka leo ma kauwahi, a hooiho hoi ma kahi kupono ke iho ka leo. Ua mahele ponoia nae na hopunaolelo, ua puka pono na huaolelo, pahee maikai hoi ke kamailio ana, aole nae au i ike iloko ona, he kamaaina kupa oia no kuu aina.
            Me keia mau huaolelo, i hoomau hou mai ai oia ma ke kamailio ana :
            " He mea maopopo ia'u, ua kakali loihi oukou e halawai pu me a'u, aka, o ke kumu o ko'u noho liuliu ana a hiki i keia wa, no kuu makemake e kaupaona like i ka mea pono e hanaia ai no oukou. Ua kuihe mau au no na mea e hana aku ai, pehea la ia ? Elua mau mea i manaoia e hana aku ia oukou. O ka mua, e hookaawale ia oukou mai ka moku aku. A o ka lua, e hoolilo ia oukou me he poe la no luna nei o kuu moku. No ka mea hoi, ma ke ano o na ouli hiki wale, i halihaliia mai ai oukou imua o'u, he kanaka i hookaawale iaia iho mai na hipuu mai o ke aloha kanaka.
            Ua hiki mai oukou e hoopilikia wale i ko'u aupuni a me ko'u noho ana."
            " Me ka manao mua ole," wahi a'u.
            " Aole anei i manao mua ia ?" i pane mai ai ka malihini me ka hookiekie ae i kona leo. " I holo wale mai anei ka moku kaua Aberahama Linekona e huli ia'u ma na kai a pau me ka manao mua ole ia ? I kau anei oe iluna o ua moku la me kou manao mua ole ? I ki wale mai no anei oukou i ka poka a ku i ka pale hao o kuu moku, me ka manao mua ole ? A no keaha la hoi i hou ai o Nede Lana ia'u me kana o, ina aole oia i manao mua ?"
            Ua ike au i ke ano ikaika loa o keia mau olelo. Aka, no ua mea ana i ninau hoahewa mai ai, ua pane aku au me ke kupono :
            " Ea, he ike ole maoli io no kou no na mea e noonoo nui ia nei e ko Amerika a me Europa nou. Aole oe i ike i ka ulupuni ana o na manao pihoihoi o na aina paniolo elua, no ka nui o na moku i poino ma ka hookui pu ana i kou moku aumoana, Me kuu kapae ae i na manao koho wale he nui i noonooia no keia mea huna hookahi i loaa ia oe, he pono au e hoike aku i ka oiaio. I ka wa i holo mai ai ka moku kaua Aberahama Linekona e huli ma na kai a pau, aole i manaoia nou, aka, no ka manaoia ana he a'u nui ikaika no ka moana nei, i oi aku mamua o ka ikaika o kekahi mau kupua e ae o ka hohonu i ike ia."
            Mino aka iki iho la ua kanaka nei, a me ka leo akakuu iho i pane mai ai :
            " E Mr. Aronaka, e hiki anei ia oe ke hooiaio mai,— no ka ia wale no anei oukou e alualu ai e kipu, a o hoi, aole hoi e alualu pu ana oukou i kuu moku, a ki pu paha, ina i ike mua oukou he moku holo keia no loko o ke kai ?"
            Ua mumule iho la au, a hakanu, me ka ane hiki ole e pane aku, no ka mea, ua akaka ia'u, aole e kuihe iki ana o Kapena Faraguta, ke ike oia he moku holo moana. E alualu ana no ia e hoopio, no ka mea, o kana hana ia i hoouna ia mai ai, e hoopio i na enemi hoopilikia wale o keia ano, ina he moku a he i-a paha.
            " Nolaila," i pane mai ai ka malihini, " ua maopopo ia oe, he kuleana ko'u e hana aku ia oukou, ma ke ano he mau enemi no'u."
            Aole no au i pane aku, a heaha la ka waiwai e hoopaapaa aku ai i keia manao ? i ka wa e hoopepeia ai na manao maikai e ka ikaika o keia olelo. Ina wau e pane aku, e ala mai auanei he paio ikaika.
            Olelo hou mai la oia, " No kekahi manawa, ua kanalua loa au no ka'u mea e hana ai no oukou. Aohe mea nana i kono mai ia'u e hana i ka mea i ku i ke aloha no oukou. Ina wau e koho ma ka manao e hookaawale ia oukou mai o'u aku, e hookau hou au ia oukou mawaho o ka moku, me kuu makemake ole e ike hou aku. I ka wa e luu ana kuu moku iloko o na wai, aole au e hoomanao ana no oukou. Ua poina oukou mai kuu mau hoomanao ana. Aole anei he kuleana ko'u e hana ai pela ?"
            Puana ae la o Mr. Aronaka, " O ke kuleana ia i loaa i ka mea naaupo, aole i ke kanaka naauao."
            Pane koke mai la ke Kapena, " E ke Kumu, aole au o ka mea au i kapa mai la he kanaka naauao ! Ua pale aku au i ka hui ana me ko ke ao a pau, no na kumu i kupono, owau wale no ke ike. No keia mea, aole au e hoolohe i ko lakou mau Kanawai, a nolaila, aohe o'u makemake, e hoopuka hou mai oe ia mea imua o'u !"
            Ua olelo pono mai la keia me ka huna ole. A ia wa no hoi, naholo ae la ke koko ma na aa o kona lae, a hulili ae la na maka o ua Mea-Ike-ole-ia nei, e hoike mai ana, ua kau iho la ka uhane o ka huhu a me ka inaina maluna ona, aka, nowai kana i inaina ai ? Aole ia no'u, aole no hoi no kuu mau hoa. A ma ia mau ano, ua hiki ia'u ke heluhelu aku i kekahi mea weliweli i hanaia iloko o ke ola ana o keia kanaka no na wa i hala. Aole o na kanawai pili lahui wale no kana i kaupale aku ai : ua hoolilo maoli no oia iaia iho, he haku kuokoa no kona mau manao, i kaa loa aku mawaho o na palena a ko ke ao i apono ai, a mawaho hoi o na palena o ko lakou mana ! Owai ka mea hiki e aa e alualu aku iaia iloko o ka opu o ka moana, oiai i kona wa ma ka ili o ka moana, aole oia i hopo i na mea e kue aku ana iaia ? Heaha ka moku e pakele i ka hookui ana a kona moku kiwi hao ? Heaha la hoi ka palekaua manoanoa e poino ole i na hookui ana a kona mau kuia pepeekue ? Aohe kanaka nana e papa mai i kana mau hana, aohe luna, aohe alii, aohe haku maluna iho ona ; o ke Akua hookahi wale no, ina he hilinai kona iaia — a o kona lunaikehala hoi, ina iaia kekahi haawina o ia ano — oia wale no na Lunakanawai nana e hoomoakaka lea mai kona manao.
            O keia iho la na nune i kupu hikiwawe ae iloko o'u, oiai ka malihini e noho hamau ana, me he la e lumilumiia ana iloko o kona mau noonoo iho. Ua nana aku la au iaia me ka hopohopo i awili pu ia me ke kahaha nui, aneane paha e like me Edipusa ia Sepenika.
            Mahope iho o ka noho hamau ana no kekahi manawa, ua hoomaka hou mai la ua Kapena nei e kamailio, penei : "He ano kanalua ko'u no oukou, aka nae, ua noonoo nui au i mea e malu ai ko'u pono, e like me ke kuleana o kela a me keia kanaka e noonoo ai no kona pomaikai iho. E noho ana oukou iluna o kuu moku, oiai ma ke ano ulia wale i komo mai ai oukou. E kuuia oukou e hele lanakila ma o a maanei, a no keia pono e loaa ia oukou, e kukaiia no ia ma o kekahi kumu hookahi a'u e noi aku ai. Ua lawa ia kumu hookahi ma ko oukou ae ana mai,"
            " E hoike mai," wahi a'u, " manao au ua kupono no ia kumu i ko ke kanaka hanohano, e hiki ai hoi iaia ke apono aku."
            " Ae, eia no ia ; no kekahi mau kumu maopopo akaka lea no kona mau hopena e hiki mai ana, nolaila i manao ia ai he pono e hoopaaia oukou ma ko oukou keena no kekahi mau hora, a no kekahi mau la paha, e like me ka hiki, oiai aole o'u makemake e hana ino aku ia oukou, a pela wau i manao wale ai, e hoolohe ana oukou i ka'u kauoha e like me na poe e ae maloko o keia moku. I ko'u hana ana nae pela, ua lawe au i ke kaumaha a me na hewa o na wa e hiki mai ana maluna iho o'u. E hookuu akea ia oukou, e hele a e ike, a e nana hoi i na mea i kupono ole no oukou e ike. E ae mai ana no anei oukou i keia ?"
            Me he la o na mea maluna o ka moku kana i olelo mai ai, oia ka makou e nana ai, a e ike, ka mea kupono ole e ike ia e na poe e ae i komo ole malalo o na rula a me na kanawai poaeae o keia poe.
            " Ke ae aku nei makou," i pane aku ai au : " Ke nonoi aku nei au, i hookahi wale no a makou ninau i koe — i hookahi ponoi."
            " E ninau mai," wahi a ke Kapena.
            " Ua olelo mai nei oe, e hookuu akea ia makou maluna nei o ka moku."
            Pane mai ke Kapena, " Oia no."
            " Alaila, eia ka ninau, ma na ano a me na kumu hea e hookuu akea ia ai makou maloko nei ?"
            " O ko oukou puka lanakila aku mawaho nei, a hoi mai iloko ; o ka hele ana e nana, a e ike maka i na mea e hanaia ana maanei — koe kekahi mau hihia e ae i hoea mai mawaena o oukou — a o ka pokole, e kuu lanakila ia oukou e like me makou nei, kuu mau hoa hoi a me a'u."
(Aole i pau).

            Ua manaoia e noi aku o Bisimaka e haawi pio mai o Italia ia Coun Von Arnim malalo o kekahi Kuikahi kahiko. Ua hoike ae kekahi nupepa Italia, ua ninau aku o Bisimaka ma o ke Keena la o Ko na Aina e i ka manao o ka Ahakukamalu no na mea e pili ana i ka mana pili kanawai mamuli o ka hoolaha akea ana o Couna Von Arnim i na palapala pili aupuni.

He paulele no ka lehulehu i ike maopopoia.

E KA NUPEPA KUOKOA E ; Aloha oe : —
            I ka la elua aku nei o Feberuari, oia ka la i ike ponoia'ku ai ka paulele o na makaainana koho balota o ka apana o Lihue nei; i ka mea nona ka inoa malalo iho. No ka mea, i na malama elua mamua iho o ka malama o Feberuari, ua lohe nuiia ka olelo ana o na kanaka no ko'u inoa ; ma ke ano e koho ana ia'u i Lunamakaainana, a maia manawa no, ua hele mai na mea ekolu ma ko'u hale i na manawa like ole ; elua kanaka Hawaii, a hookahi haole ; ua ninau mai lakou. " E holo balota ana ka oe ?" I aku la au, aole au e holo balota ana ; I mai la lakou, " Nui ka olelo ana o na kanaka e koho ia oe i Lunamakaainana," I aku la wau, pela paha aole au i maopopo ia mea. Ma na wahi e ae, nui na makamaka i ninau mai la no keia mea hookahi no ; aka, ua pane aku wau ia lakou e like aku la me ke la. Mahope mai, noonoo iho la wau i ka mea pono a'u e hana aku ai imua o na makamaka, a malalo oia noonoo ana, ua koho wau, e haiolelo akea aku imua o ke akea ma ke sabati, ua hooko ponoia ia manao ma ke sabati la 23 o Ianuari, a mawaena o na Olelo Hoolaha e pili ana no ka hana mau, ua hoolaha pu aku la wau i ua manao nei ; Penei :
            E na makamaka, ua lohe mai wau i keia mau la, nui ko oukou kamailio ana uo ko'u inoa, ma ke ano e lawe ana oukou i ko'u balota a e koho ia'u i Lunamakaainana, mamua aku nei ua hele mai kekahi maka maka ma ko'u hale, a ninau mai la no keia mea, ua hoole aku wau ia lakou, a pela no wau i hoole pu aku ai i kekahi poe ma na wahi e ae. Ua noonoo iho wau i mea no'u e ninau hou oleia mai ai e na makamaka ma kahi mehameha a wahi e ae ; nolaila, ua hooholo au e hoolaha aku i ko'u manao i mua o oukou i keia hora, oia keia :
            Aole au e holo balota ana ; hookahi wale no a'u balota e hana ana oia ka balota o ka mea a'u i makemake ai. He okoa ka poe e holo balota ana aole o wau ; a mai kuhihewa oukou &c. Ua kuhi au o ko'u hoolaha pono ana'ku imua o lakou, he mea la ia na ko lakou makemake e aui ae ai i ka mea okoa a waiho mai la hoi ia'u ; eia ka auanei aole no ia mea, ua ike wau ua paulele io lakou maluna o'u.
            Eia na mea e maopopo ai :
            1. Aole loa a'u mea hookahi i paipai e koho ia'u i Lunamakaainana : a i oleia e hooikaika no'u : ole loa. O ko Lihue nei a me ko Koloa na hoike oiaio no keia a o na lani ke hooia mai.
            2. Aole au i hoike manao aku imua o lakou : e like me ka hana i maa mau i ka poe e holo balota ana mai mua mai, e lohe ai lakou i ka'u mau kumuhana no ko lakou pomaikai paha, no ko lakou poino paha ; e kupono ai la hoi ka makemake ke kanu pono iho ma ka naau. Ma ka la 28 nae o Novemaba aku nei, ua haiolelo aku wau ma ke anaina hoomana e pili ana no ka'u hana mau, a me ka moolelo o ke kuokoa ana o keia aupuni. Maloko oia haiolelo ana, ua hoike aku wau i kuu manaoio hookamani ole Penei :
            Mamua aku nei ua kamailio nuiia ke Kuikahi Panailike mawaena o Amerika a me Hawaii nei, a ua hoike manao ae kahi poe naauao o kakou e olelo ana, " Ua pono e haawiia kekahi lihi o Hawaii nei ia Amerika i kumu e ae ia mai ai ona Kuikahi Panailike," ua i aku la wau, ina wau e ninau ia mai no keia mea, e olelo wiwo ole aku no wau ma ka inoa o ka lahui a me ka lehulehu. Aole o'u makemake e hanaia kekahi Kuikahi Panailike e like me ia ke ano, a ina eia iloko o keia anaina ka mea e lilo ana i Lunamakaainana no kakou no keia makahiki ae a i hapaiia ka noonoo no keia manao, eia ka'u noi iaia e ku ae oia a pololei a e hoole wiwo ole aku. Oia iho la, a na keia hai manao ana ka i ho-o aku i ka makemake iloko o na kanaka, a pela lakou i kukulu ai i ka manao paulele paulehia ana maluna ou. Oia ko'u lohe mai
            3. Ua lawe iho la no lakou a hana i balota ma ko'u inoa ; e hoike ana i ka mana o ko lakou makemake.
            4. Ua hoike hookamani ole aku la na paahana o Lihue nei, i ka lakou mea e koho ai ma ke alo ponoi o ko lakou haku ; mahope iho o ko lakou ninauia ana mai, a i ka hoololilolia ana'ku o ko lakou manao e koho i ka mea okoa, ua kupaa mau mai la lakou ma ka hoole ana. O ko'u lohe o alo mai keia.
            5. O ko lakou luna hooikaika a lakou i koho ai no'u, ua hele kino aku au loaa'la ekolu la mamua iho o ka la koho, a ua hoole ikaika mai oia imua o'u no ko'u papa ana'ku iaia.
            6 O kekahi mau makamaka ponoi o ka poe holo balota, ua haalele aku la i koiala. a lawe ae la i ko ka malihini, aole no ka noho kue mawaena o lakou aole ia mea i ikeia ; aka, no ka mea mana nui wale he makemake. O ko'u lohe keia.
            7. Ua nukunuku iho la kekahi mau paahana i ko lakou luna hana, no ka hoopaaia ana o lakou i ka hana a pau ka manawa koho balota. He lohe mai keia. Ma kuu noonoo malie ana i ka manao o na makamaka, he oiaio he makemake io ko lakou a no kuu manao e ike ka lehulehu i ko lakou makemake, nolaila au e uhola akea aku nei a palahalaha.
            I kuu mau makamaka makaainana o ka Apana o Lihue nei ka poe nona na balota he 95 ma ko'u inoa. Aloha oukou :
            Aole au i hoike pono aku i ko'u mahalo no ko oukou paulele ana mai maluna o'u he alo a he alo. Ua manao wau i hookahi o oukou manawa e ike pu ai me ka lehulehu mai o a o ; nolaila, ua hooili aku au maluna o na Nupepa Hawaii a kakou, a na ko laua mau kino lahilahi e hai ae i ko'u mahalo nui ia oukou.
            He oiaio no, he mana ka makemake i na manawa a pau ; oia ka Moi e noho nei maoko o ke kanaka ; no ka mea, aia iaia ka mana hooko o ko ke kanaka mau manao a pau. Me he lolo ala o hoounauna ana i ka noonoo o ke kanaka ma kona mau aa iho a no ia mea, e hikiikii ae oukou i ka makemake oiaio a paa i lilo ia i heleuma ; ka mea i komo loa ae iloko o ka pale. A ma ua kohoia kuu mau hoa lawehana o ka hana nui he Hoola i puka mai nei i mau Lunamakaainana, alaila na pono, ua pono, a ua pono loa ko oukou kohoia ana ; a ina ua kohoia oukou ma ka rula mau o na Lunamakaainana e puka mau nei ke hopohopo nei au no ia mea. Me ka mahalo,
Owau no me ka oiaio. G. PUULOA.
Lihue, Kauai, Feb. 21. 1876.

Lou i ka makau a Manaiakalani.

                Aia ma ka papa Konane o ka Lahui Hawaii Helu 8 ua olelo Legeona 6,000, a makaainana, nona ke poo :
            " Koho balota paani wale ia." Ua oaka mai nei ka waha, " o ka la koho balota ma Waianae," ua haule ka mana o ka Papa Nana malalo o ka ulu mahiehie ana o kekahi hoa o ka Papa e hoohaunaele, oiai ua haawe iho la ua tausani Legeona maluna ona a ua ano paani wale ia ka noho ana o ka Papa ia la.
            E kuu hoa makaainana, i mau oe pela, ua manao anei oe e ka makamaka, aole au e hoouna aku ana i ka makau o Manaiakalani, i mea hoolou i kou waha e ka mea alapahi, me ko a-a e hoike akea i ka mea aole oe i ike maku, i Ewa no oe kahi i ae-a haukae ai.
            Ke rula aku nei au i ka laina pololei, o ka noho ana o ka Papa Nana o Waianae, ua oi ae ia i kona la koho o na manawa i hala, mai kona hookumu ana e koho balota, aole i ikeia he haunaele iwaena o ka poe koho, aole no hoi iwaena o ka Papa. O ka Papa, ua makaala lakou e like me na kuhikuhi a ke kanawai, ua noho lakou mai ka hora 8 A. M. a hiki i ka hora o 5 P. M. aole i paani wale ia ke koho ana, aole no hoi i hoohaunaele kekahi hoa o ka Papa, he oleloa no, he hoike o Rev. P. W. Kaawa & Samuel Andrew, a me ka aha no a pau, mahea ko wahi i noho ai, i a-a ai oe e hoouna mai i kau mau akua lapu, 6,000 maluna o ka Papa Nana makaala, aole anei i Ewa no oe me kekahi hoa Hanohano koho o ia la.
            Hoike hou mai oe, " ua kapae ka Papa i ka mana o ke kanawai, i ka ae ana i na inoa Karaima e koho, owai ia poe inoa Karaima ? i nui ke'no e hai mai, i pokole na hana. Owai ka mea i alakai hewa ia oe," a komo oe me he i-a 'la i ka maka-ha wahi a Kaleopuupuu ia Kahekili ka Moi o Maui. Mai a-a e hapai i ka lima ka-kauha e hoike me ka ike ole, a hooili hewa i ka inoa hupo maluna o ka Papa. Ua oki oe, mai lawelawe, a i hoopaakiki oe, alaila e kuka i auanei ka ila o Puapuakea.
Me ka mahalo. Ka Nupepa Kaiaulu.
Waianae, Feb. 14, 3876.