Ka Nupepa Kuokoa, Volume XV, Number 8, 19 February 1876 — Page 1

NUPEPA KUOKOA
Ke Kilohana Pookela no ka Lahui Hawaii.
BUKE XV. HELU 8. HONOLULU, POAONO, FEBERUARI 19, 1876. NA HELU A PAU 742.

E Pau na Pupupu Kahiko!
E pani me na Hale Laau.

                    PAPA, PAPA, PAPA O KELA ME KEIA ANO, A ME NA LAKO KUKULU HALE O KELA ME KEIA ANO, MA KA PA-PAPA O S. G. WAILA MA ! KIHI O ALANUI PAPU me ALANUI MOIWAHINE, no ke Kumukuai HAAHAA LOA I ae like ka nui me ka makemake. LAAU NOUAIKI ! NA LAAU KAOLA, NA PAPA MANOANOA, NA PAPA HELE, NA KUA, AAHO, AAHO LIILII, &c LAAU ULAULA ! NA LAAU KAOLA, NA PAPA MANOANOA, NA PAPA HELE, NA KUA, AAHO, POU, AAHO LIILII, MOLINA, &c Pili Cida keokeo, Pili Laau ulaula, Na Puka Hale, o na ano a pau, Na Puka Aniani, o na ano a pau, Na Olepelepe Puka, o na ano a pau. Pepa Hale me na lihilihi. NA LAKA PUKA NA AMI-PUKA, NA AMI-PUKA LIILII. NA KUI NAO PENA, AILA-PENA, VANIKI, WAI HOOMALOO. PAAKAI Helu 1, O PUULOA. E lawe wale ia no na mea i kuai ia keia Pa Papa aku a i kahi o ka mea i kuai mai, ina ma ke kaona nei, a me na Awa o keia Paeaina e like me ka aelike. Aia maanei ke Keena o ka MOKUMAHU " KILAUEA." L. MARCHANT, Kapena.
S. G. Waila ma.
709 3m 721

HE
IWAKALUA TAUSANI LEGUE
MALALO O KE KAI !
— NA MEA —
KUPANAHA O KA MOANA !
KE ALA O KA MEA HUNA,
— A O KA MEA —
POHIHIHI O KA 1866 !
MAHELE l. MOKUNA VII.
MOBILI I KA MOBILISI.

                    HE kanakolu kumamalima anei na makahiki o keia kanaka, a i ole, he kanalima paha, aole e hiki ia'u ke olelo ae. He loihi kona kino, he nui hoi kona lae, he pololei ka ihu, a he maikai ka waha ; me na lima palupalu maikai e hoike mai ana i ke ano kainui ole o ka lawelawe ana me ia mau manamana. O keia kanaka ka oi o na kanaka a'u i mahalo ai ma na ouli a me na hiona o na haawina maikai a pau, ma ka nana ana aku. I hookahi nanaina iaia mailuna a lalo, ua lawa iho la no ka hoike ana mai he kanaka kamahao oia. Aka hookahi mea anoe i ikeia ma kona mau maka, he kaawale loa kekahi onohi mai kekahi onohi mai a me na maka o ia ano — ke leha aku, ua ike ia ka hapaha holookoa o ka huina aouli i ka wa hookahi.
               O keia mana ike i loaa iaia,— (he mea keia na'u i hoohalike pinepine ai mahope mai me ko Nede mau maka) ua oi loa aku ia mamua o ko Nede ike. I ka wa e haka pono ai na maka o keia kanaka anoe maluna o kekahi mea, e aneane hoohuiia ana na kuemaka, a e pipili no hoi na lihilihi, a e nana aku oia me he la he makalii na mea ana e ike ana ma kahi mamao, a me he la hoi e hou aku ana kona ike iloko o na kolamu wai e like me ka maka kuikele iloko o ka pepa, a e heluhelu aku ana hoi i ke ano o na mea huna o loko o ka hohonu.
               O ua mau malihini nei, aole, he pono au e puana ae, he mau kamaaina ia, aka hoi, he malihini nae ia makou, ua kahikoia laua me na kapa hulu otera mailuna a lalo, me na kamaa buti i hanaia me ka ili sila. O ka mea loihi o laua, me he la o ke alii ia o ua moku nei, a me ke kamailio ole mai i kauwahi huaolelo ia makou ; ua makaikiu mai la ia makou, alaila, huli ae la i kona hoa, me ka olelo aku iaia ma ka olelo ano okoa loa.
Ua pane aku la kekahi me ka luliluli ana iho i kona poo, elua a ekolu paha ana mau huaolelo anoe i puana ae ai. Ia wa, ua nana mai la ia'u, me he la e i mai ana ia'u, e olelo mai oe i keia wa.
               No keia mea, ua olelo aku la au iaia, me ka moakaka ma ka olelo Farani, no ka mea, aole au i ike i ke ano o kana olelo ; aka, ina e nana aku iaia, me he la aole he lohe i ka'u olelo, nolaila, ua aneane hoka loa ia au, no ka loaa ole o ka mea pono ia'u e kamailio aku ai.
               I mai la o Kosila, " E hai aku oe i ko kakou moolelo, malia paha, he lohe no keia mau Keonimana i kekahi mau huaolelo."
               A ma keia mau olelo a Kosila, hoomaka koke aku la au e hoike i ko makou moolelo o ka holo ana mai, me ka hookaawale pono ana i kela a me keia hopunaolelo me ka maopopo lea, me ke koe ole o ke kau wahi lihi uuku o ka makou huakai, a me ke ano i holo mai ai o ka moku Aberahama Linekona, e huli i ke a-u nui. Hoike pu aku la no hoi au i ko makou mau inoa a me ko makou kulana, e hai aku ana ia'u iho, o ke kumu Aronaka, o kana kauwa hoi o Kosila, a me Mr. Nede Lana ka mea o i-a.
               Hoolohe malie mai la ke kanaka me na maka onaona a palapala no ka'u mau olelo, me ke ano oluolu hoi o kona mau helehelena, a me he la hoi he lohe no i ka'u olelo aku ; aka nae, ma kona mau hiohiona a pau, me he la aole i lohe a i hoomaopopo i ka'u mau olelo. I ka pau ana o ka'u olelo, aole oia i pane mai he wahi huaolelo hookahi.
               Hookahi alanui e ae i koe e hoolauna olelo aku ai me ia, oia hoi ka namu ana aku me na huaolelo Beritania. Malia paha, ua ike laua i keia olelo laha puni o ke ao nei. Ua ike io au i ka olelo Beritania a me ka olelo Geremania — ua hiki ia'u ke heluhelu pahee loa ma ia mau olelo a elua, aka, he wahi ano paoioi no ma ke kamailio ana.
               I mea hoi e pau ai ia pilikia, ua haawi ae la au na Nede Lana e kamailio, i ka i ana aku, " Ia oe aku hoi — e kamailio aku oe i kou akamai a pau ma ka olelo Anegolo-Sakona, a e hoao no hoi e hookela ae i ka maikai o kau olelo ana mamua o ka'u."
               Uu olelo koke aku la no o Nede me ka ui hou ole mai — ua hoomaka hou oia e hoike aku i ko makou moolelo mai ka mua a i ka hopena, e like me ka'u olelo ana. Aka, e like me ko'u hoohokaia, pela no hoi ua o ia nei ; pau pu maua i ka hoonaukiuki no ko laua lohe ole mai. Aole i neeu, aole hoi i aui ae ua mau malihini nei iloko o na wa o keia kamailio ana. I ka nana aku ia laua, he mea akaka lea, aole laua i hoomaopopo i ke ano o ka olelo Arago, aole hoi i ko Farade. Ma keia hoohoka hou ia o makou, aole e hiki ia'u ke hoomaopopo, pehea la e hoolauna aku ai makou ia makou iho me ua mau kanaka nei o ka moku. Pane mai la nae o Kosila, i ka i ana mai : " Ina hoi e ae maiana kuu haku, e hoao iki ae la hoi au e kamailio ma ka olelo Geremania." Ua ae aku la au me ka oiaio.
               A ia wa, kakahele koke aku la no oia ma ka olelo Geremani, me ka pakika launa ole, no ka mea, he Geremania kuu kauwa paulele ma ka hanau ana. A i ka hiki ana hoi i ka hopena o kana mau olelo, ua lawa like ia makou ka haawina o ka nele. Ua like ka makou olelo ana me ka mea e kamailio ana imua o ke kii pohaku, a i ole, imua o na kuli.
               He ehiku olelo o ka honua nei i loaa ia'u, eha i kuu kauwa, a ekolu ia Nede ; a me keia mau olelo like ole a pau o na lahui he umikumamaha o ka honua nei, aole hookahi o lakou i hookoe ia e makou, ua pau wale no i ka olelo ia, aka, na ka pepeiao hea e hoolohe mai keia mau olelo manamana ? Ua like pu no laua me he mau kuli la. Mai ka aina hea mai keia mau kanaka ? Mai ke Aupuni Po mai paha.
               Mahope loa iho, ua hoomanao ae la au i ka'u mau haawina ma ka olelo Latina, no ia mea, ua hoomaka iho la au e kamailio ma ka olelo Latina, no ko makou moolelo o ka hele ana mai, aka, i ka panina hope loa o ka'u mau huaolelo, ua huli ae la ua mau malihini nei kekahi i kekahi, me ke kamailio ana i ka olelo ano e i ike ole ia e makou, a nalo aku la. Paa mai la ka puka, noho hou iho la makou me ke kahaha a me ka haohao nui.
               Puana ae la nae o Nede, " He hana hoohilahila ino loa keia, olelo aku nei kakou i keia mau kanaka ino lapuwale, ma na olelo i loaa ia kakou, a hiki i ka olelo Latina, aole no laua i pane mai." Olelo aku la au iaia, " E hoomalielie ia oe iho, aohe maikai ke hana aku me ka huhu."
               Pane koke mai la no ko maua hoa piena, (Nede) " E ke Kumu, aole anei oe i ike, e hooki i ia ana kakou e pololi iloko o keia lua hao ?"
               I mai kahi Kosila, " Alia oe e olelo ae pela, e hiki no ia kakou ke hoomanawanui me ka pilikia ole i ka pololi no kekahi manawa"
               " E o'u mau hoaaloha," wahi a'u, " he oi aka ka maikai o keia wahi, mamua o ko kakou au ana i ke kai, me ka loaa ole o kahi e ku iho ai na wawae. E haawi mai olua i manawa no'u e noonoo ai, mamua o ko'u hooholo ana i ko'u manao no ke Kapena a me kona mau luina."
               Pane koke mai la o Nede me ke ano huhu, " Ua hooholo au i ko'u manao, he poe kolohe keia."
               " Ua pono ! a mai ka aina hea mai la lakou ?"
               " Mai ka aina mai o ka poe ino !"
               " E kuu Nede wiwo ole, aole i hoakaka pono ia kahi i ku ai o kela aina ma ka palapala aina o ke ao nei ; aka, he pono au e olelo ae, he mea ano hiki ole ia'u ke hooholo iho i ko'u manao no ko laua ano lahui. He mea maopopo, aole laua he Pelekane, aole he Farani, aole no hoi he Geremania. Aka nae, ua manao wale au, ua hanauia ke Kapena o keia moku a me kona kokoolua maloko o na palena o na latitu haahaa. He ano koko o ka hema kai loko o laua. Aka, aole e hiki ia'u ke koho i ke ano o ko laua mau helehelena, ina ua like me na Paniolo, Tureke, Arabia a me na poe Ilikini. Ma o ka laua olelo, he ano okoa loa, i akaka ole ia'u."
               Pane mai o Kosila, " Malaila ka pono ole, o ka ike ole ana i na ano olelo a pau a me ka pilikia maoli no ka hookahi ole ana o ka olelo a ko ke ao a puni."
               Iaia e puana ana i keia mau huaolelo, hemo mai la ka puka, a komo mai la he kuene. He mau lole komo kana i lawe mai ai no makou, he mau kuka a me na lole wawae — aka, me ke aha la i hanaia ai keia mau ano kapa, aole au i ike. A owau nae, awiwi iho la no au i ke komo i ko'u mau lole i haawiia mai ai, a pela no hoi i ko'u mau hoa. A iloko o ia manawa, ke hoomakaukau mai nei ke kuene kuli (ina he kuli io oia) i ka hana ana i ka papakaukau, me ka waiho iho i na pa ekolu.
               Puana ae la o Kosila, " He ano keia i like, me he mea la e paina ana kakou."
               " Ba," i uilani ae ai o Nede me na ano huhu : " heaha kau i manao ai no na mea a kakou e ai ai maanei ? He ake honu, he lala mano, a me na io koalaia o ka Ilio-holoikauaua."
               Pane hou mai o Kosila, " Nana ia aku paha."
(Aole i pau.)

Aole i ku i ka hanohano a me ka maluhia ka la koho Balota ma Pukoo, Molokai.

E KA NUPEPA KUOKOA E ; Aloha oe :—
               Ma ka lokomaikai o kou kapena, a me ke ahonui o na kela, e hiki ai ke hookele pono aku i keia wahi ohua ee pakeke, a kau aku ma na kapakai o keia mau aekai.
               Ma ka la 2 o Feberuari iho nei oia ka Poakolu, la koho balota ; ua ikeia ka haunaele maloko o Ka Hale Hookolokolo ma Pukoo, Molokai, hora 8 kakahiaka.
               Mamuli o ka hookele pono ana mai a kekahi hoa o ka Papa Nana, oia o J. W. M. Poohea ; imua o na Luna makaainana malalo o ka pauku 61 o ke kumukanawai e pili ana i ke kuleana nui o na Luna makaainana ma ka hapa hope o ia pauku. Ua pii ino ke kai o kekahi mau hoa holo balota oia o J. Kaluapihaole a me J. Nazareta ; ua lilo ia kumu i mea e haunaele ai na hana a ka Papa Nana, a olohio aku la ua puupuu lima nunui o J. K. i na maka o J. W. M. P. i amo malie wale ia mai no hoi e kela wahi taata iti ; mai like iki paha me Goria a me Davida.
               Aole no i ikeia keia ano i na makahiki i hala'ku mamua, oiai paha na Luna Nana o keia Papa ia manawa, ua hiamoe na maka i ke kanawai, a he ano hoopilimeaai paha i na Luna makaainana o ia wa.
               Ma ke alakai a J. Nazareta ma ke kanawai e pili ana i ke kuleana ole o ka Papa Nana e keakea aku i ka makemake o na kanaka i ke koho ana i ka mea a lakou i makemake ai imua o J. W. M. P. Aole kela i luli ae ma ia alakai ana a ka Lunakanawai o Molokai.
               Pane mai la kela me ka leo nahenahe moakaka loa, " aole au e hoole aku ana i ko lakou makemake, aka, e hoole aku ana au i ka mea kuleana ole i kauohaia e ke kanawai o keia Aupuni i mea e ike mai ai ka Ahaolelo o keia makahiki ua pono ka makou mau hana malalo o keia oihana."
               Ia manawa no, maalo hou mai la na puupuu lima o J. K. i na maka o J. W. M. P. me ka olelo ana mai he naaupo loa o J. W. M. P. Pane mai la o J. W. M. P. kiekie loa ka ike o ka Papa Nana o Molokai nei i keia makahiki, akahi no a hoala ia mai keia kanawai i keia makahiki, a no ke ano lolo o kona mau hoa o ka Papa Nana oia o S. Kekahuna hope Peresidene, ame Keoni Ii hope Luna auhau ; a no ke ano kupilikii o ka haunaele, nolaila, puana ae la lakou me ka leo nui. " E na Makai, e pale aku i keia haunaele i waho a pau koke ae la."
               Ma keia haunaele mua, elua kumu nui, o J. K. a o J. N. No ka hoopaapaa kumu ole imua o ka Papa Nana ; he hilahila ole keia mau Luna makaainana o Molokai, ua manao wale makou, ina paha o ia ka Lunakanawai o keia apana, aole e pohole aku ana ka alualu ka i na mea o ka paakiki loa, a no ke kokua ole ana o kona mau hoa o ka papa, ua haule wale kana noi.

NO KA HOOKOMO BALOTA ANA.

                    I ka wa i hookomoia ai na balota iloko o ka pahu balota, i ka hiki ana'ku i ka helu elima paha ; lawe mai la kekahi kanaku i kona palapala hookaa auhau kekahi balota i owili pu ia, i ka wehe ana o J. W. M. Poohea e holoi i na huaolelo kupono ke koho balota ike iho la oia he balota maloko, ia manawa no opiopi ae la o J. W. M. P. a hoihoi aku i ka mea nona kela palapala hookaa auhau me ka olelo ana'ku iaia, e wehe oe i kela balota a kaawale, alaila, e haawi hou mai oe ia'u, i ole paha e manaoia mai na'u i hookomo i kela balota ma loko.
               Ia manawa no, ike hou aku la makou i ua liona hae la e hae hou mai ana mawaho o ka puka o ka Hale Hookolokolo, kuhihewa makou he hoki. " Ka hau opi o ka waha i ka makani," eia ka o J. Kaluapihaole, komo mai la ke la a olohio mai la i kona mau puupuu lima i na maka o J. W. M. P. a hoahewa mai la i a J. W .M. P. no ka hana ana pela i ka owili hou ana a hoihoi hou aku i ka mea nana i lawe mai ia ino. Pane aku o J. W. M. P. " O ko'u naauao kiekie loa ia, o ko'u hoihoi aku i kona palapala me ka balota pu, a nana no e haawi aku i ka balota i ka mea nana e hookomo iloko o ka pahu balota, a o ka palapala hookaa auhau ka'u e holoi." Mahalo aku makou i a J. W. M. P. ua hanaia me ka naauao loa a kapulu ole.
               Pane ae la ko makou hoa makaainana oia o Kuakala, " E waiho malie no pela a& na keia kanaka no e hookomo i ka pahu" ia wa no, lele mai la o J. K. e pepehi ia Kuakala me kona mau lima kakauha, lalau mai la o S. K. Kupihea e uwao ae, huli ae la o J. K. a kui aku la i na maka o S K K a pale mai la kela i kana puupuu, o ka halakika koke iho la no ia o na puupuu lima o laua a elua, aole nae i loaa laua i ka poino o ia hana ana ; i ko makou nana ana a hoohonihoni ana'ku ia J K. " Puia paoa ke ala o Malamanui." Hilahila ole keia puuku o Kaluaaha ; ua ao ia no paha e kona hoa paa balota pu, pau pu ina pela ke ano. I ka wa i nui loa ai keia haunaele, kahea aku la ka Papa Nana i na Makai e pale aku i keia haunaele iwaho, a ua pau ae la, aka, ma ia kahea ana a ka Papa Nana i na Makai, aole i lohe mai na Makai, no ka nui loa o ka pioloke oloko o ke keena, kena ako la ka Lunakanawai e hopu na Makai i na mea hoohaunaele a ua hooko no na Makai, lawe ae la ka Lunakanawai i ka mana o ka Makai Nui. Kupanaha keia hana ma Molokai nei.
               I ka aneane ana'ku i ke ahiahi, komo mai la kekahi wahi kanaka me J N pu mai a me ka balota o J N ka paa pu ana mai, o Mikapalena ka inoa i kamaaina ia makou.
               Nonoi mai la o J W M Poohea i kona palapala hookaa auhau, kuhikuhi mai ke la aia no i ka Luna auhau, oiai aole i komo kona inoa iloko o ka Papa Inoa. Hoole mai la ka Luna auhau, aole au i haawi i palapala nona, oiai, aole i piha na makahiki he 20, oiai hoi ua pee keia kanaka i ka Luna Helu a ua loaa ia'u, wahi a ka Luna Auhau.
               Ia manawa no, o ka haunaele koke iho la no ia mawaena o J Nazareta a me S. K. Kupihea a aneane no e hoike aku i na puupuu lima o laua elua, a kena koke ia i na Makai e hoopau koke ia haunaele mamuli o ke kauoha a ka Papa Nana, lohe aku la makou i ka leo o S K Kupihea. " Ua pau ! Ua pau keia hana !"
               Ma keia mau hana ana a keia poe, aole i ku i ka hanohano, oiai, he poe naauao wale no keia poe, a he mau Puuku Ekalesia kekahi i komo iloko o keia holo balota ana.

MA KA POAHA LA 3 O FEB.

                    Ma keia la, ua kali ka Papa Nana o Pukoo, Molokai, i ka hoike a ka Papa Nana o Lanai a me Kalaupapa ; a ua hiki mai no ia la.
               Ua noho hou ka Papa e houluulu i ka huina o na balota o na Papa a pau, oia manawa mamua iho o ka houluulu ana, ku mai la o M Kane a kauoha mai la i ka Papa Nana e pale aku i ka houluulu ana i na balota o Kalaupapa, oiai, aole i ku i ke kanawai ke la koho ana, a ua ku-e hoi i na pauku kanawai 780 — 782 a me 789 paha o ke Kanawai Kiwila. Kokua mai la o J N i ke noi a kona hoa holo balota.
               Kokua nui mai la o Rev. E Kekoa ma ka hooikaika ana i ka aoao ku-e, a e kauoha ikaika loa mai ana i ka Papa Nana e hoole aku i ka hoolaoa a ke Kuhina Kalaiaina no ka apana koho o Kalaupapa, oiai, wahi a E. Kekoa, he kue ke Kuhina Kalaiaina i ua kanawai o keia Aupuni, aohe mana iki o ke Kuhina Kalaiaina ma keia hoolaha ana. Kiekie no hoi keia naauao. Haahaa loa na'Lii o ke Aupuni Hawaii. Pela io paha, aka, aole paha he kanawai i kauohaia i ka Papa Nana e hoole aku i ka mana o ke Kuhina Kalaiaina.
               Ku mai la ka Hon. D Kaiue, a pane mai la i ka Papa Nana. " He mana anei ko oukou e hookolokolo aku i na hana a ke Kuhina Kalaiaina i hoolaha'i no ke koho ana ma Kalaupapa ? He mana anei ko oukou e hookolokolo a hooholo i na paewaewa o ka la koho i nehinehi. No. Never."
               E ia wale no ka oukou hana, o ka hoohui mai i na koena o ka oukou mau hana o ke koho i nehinehi, oia wale no ka la a ke kanawai i kauoha'i e hooponopono oukou ma ia la, aole ma keia la i kauoha ole ia e ke kanawai ia oukou. A i na he mana ko oukou e like me ke alakai hewa a ke kahunapale o Kaluaaha, alaila, owai la ka Lunakanawai nana e hookolokolo i na paewaewa o ka la koho balota ? O oukou anei ? Aole.
               Ke manao nei au o ke kahunapule naauao o Kaluaaha paha ? Aole. O ka Ahaolelo no. Aole o ke kahunapule hoopunipuni o Kaluaaha e alakai hewa nei i ka Papa Nana o Molokai, hilahila ole keia kahunapule, ua manao paha ke kahunapule e pale ae i kuu mau balota, a e hookomo aku ia M Kane. I na pela ka Papa Nana e hooholo ai, alaila, e lawe ana au i ka hoike o na Papa Nana a i ekolu imua o ka Ahaolelo a na lakou e ahewa ia'u, nolaila, mai puni ka Papa Nana i keia alakai hewa ana, e hana oukou e like me ko oukou noonoo pono, a e waiho aku i na hana paewaewa a lakou nei e alakai hewa nei ia oukou imua o ka Ahaolelo.
               Ku mai la na hoa o ka Papa Nana a hoopuka i ka lakou olelo hooholo. E hoohui ana makou i na balota a pau loa a e hoike aku i ke Kuhina Kalaiaina, a na oukou no e hoopii aku imua o ka Ahaolelo no na paewaewa a ke Kuhina Kalaiaina i hoolaha'i no ka apana koho o Kalaupapa.
               Hui ia na balota a pau mai Lanai mai, Kalaupapa, Pukoo, iloko o ka huina.
               Hoike pakahi, no Pukoo. D W Kaiue 122 balota, S K Kupihea 118, J Nazareta 220, M Kane 132, E Kekoa 80. J Kaluapihaole 73. Mahoekaahalihi 5, K P Kamaipelekane 2.
               No Kalaupapa mai. D W Kaiue 51, S K Kupihea 51, J Nazareta 8, M Kane 8 No Lanai mai D W Kaiue 31, S K Kupihea 30, J Nazareta 36, M Kane 35.

HOIKE NUI O NA BALOTA.

J Nazareta..................... 264.
D W Kaiue.....................204.
S S K Kupihea ..............199.
M Kekoa........................175.
E Kekoa...........................80.
J Kaluapihaole..................75.
L Mahoekaalihi..................5.
E P Kamaipelekane............2
               Oia ka lawa o ka'u mau mea i ike pono ai no keia mau la kanaka nui.
               Ina paha e manaoia mai e hoike pu aku i na papa ahaaina a lakou, kahaha ! Kupai aku la i kai o Makena. Ua lawa paha kakou maanei. B. W. KALAIAKAMANU.
               Ua hoike waha aku nei na luna aupuni o Sepania e noho ana ma na aupuni e i ko Sepania manao, aia mahope iho o ke pio ana o na poe kipi i ke aupuni, e like me ka lakou e manaolana aku nei, alaila ia wa e hiki ai ia Sepania ke hoopio i na kipi kuloko ma Cuba ma o ka hoonahuahua loa ana aku i na koa.