Ka Nupepa Kuokoa, Volume XV, Number 6, 5 Pepeluali 1876 — Page 4

This text was transcribed by:	Marti Steele
This work is dedicated to:	R. Dwayne Nakila Steele

Ka Nupepa Kuokoa

KE KILOHANA POOKELA NO KA LAHUI HAWAII.

KA NUPEPA KUOKOA, ME KE AU OKOA I HUIIA.

HAAWINA KULA SABATI

HELU 8. SABATI, FEB. 20.

KUMUHANA----Hooaliiia Davida.

PAUKU BAIBALA----II Sam. 5:17-25

17 A lohe ae la ka poe Pilisetia, ua poni iho lakou Davida i ahi malona o ka Iseraela; pii nui mai la na Pilisetia, a pau e imi ia Davida; a lohe ae la Davida, a iho iho la ia ma ka pakaua.

18 Hele mai la hoi ka poe Pilisetia, a hoomoana aku la ma ka awawa o Repaima.

19 Ninau aku la o Davida ia Iehova, i aku la, E pii aku anei au i ka poe Pilisetia? E hoolilo mai hoi oe ia lakou i kuu lima? I mai la o Iehova ia Davida, E pii aku oe, no ka mea, e oiaio no e hoolilo au i ka poe Pilisetia i kou lima.

20 Hele aku la o Davida i Baalaperazima, a luku aku la o Davida ia lakou malaila, i iho la ia, Ua poha aku o Iehova maluna o ko'u poo enemi, e like me ka poha ana o ka wai. Nolaila, kapa aku la ia i ka inoa o ia wahi, o @ Baala-pesazima.

21 Haalele lakou i na kii o lakou ilaila, a lawe aku la o Davida a me na kanaka ona ia mau mea.

22 Pii hou mai la ka poe Pilisetia, a hoomoana iho la ma ke awawa o Reaima.

23 A ninau aku la o Davida ia Iehova, i mail la kela, Aole oe e pii pono aku; aka, e hoopuni ae oe mahope mai o lakou, i kahi e kupono ana i na laau silika.

24 A lohe oe i ka halulu o ka hele ana ma na welau o na laau silika, alaila oe e lalelale: no ka mea, alaila e hele aku ana o Iehova imua ou e pepehi aku i na Pilisetia.

25 Hana aku la o Davida e like me ka Iehova i kauoha mai ai ia; a luku aku la ia i na Pilisetia mai Geba aku a hiki oe i Gazera.

Hoopaanaau p. 24.

Mele----Him. 115. 8-6. Leo Hoaliiana.

Hookani i ke Lii maikai,

E moe na anela;

E lawe mai i lei alii

No Iesue ke Lii mau.

No kanaka mai o a o,

Na aina hoi a pau,

E hoalii mau ia ia no,

E hapai i ke Lii mau.

Kakou no hoi e ola nei,

E oli me lakou;

E kau i lei alii maikai

Ia iesu ke Lii mai.

Pule i lilo koke na aupuni a pau o ke ao nei ia Iesu ka mamo a Davida.

NA NINAU A NA KUMU.

Ua make Saula ke lii me Ionatana ke keiki hooihua no ke aupuni. Owai ka i poni e ia mamua i pani o Saula? Ina make ka Moi, a ua akaka e ke pani, pehea ke pani? Lawe koke paha i ke aupuni i na aohe mea keakea. Pehea Davida, he mea keakea anei i kona lawe koke ana i ke aupuni? He mea keakea no, oia hoi owai? Mok. 2:8-10.

Ua koho nae kekahi hapa ia Davida i alii no lakou, owai ia hapa? 2:4. Hookahi ka ohana i hele mamuli o Davida. E hia ohana mamuli o Ierebota? p. 7. Mahea ko Ierebota, noho alii? p. 8. Aia Mahanaima ma kahikina o Ioredane e pili ana i ka muliwai o Iaboka. Nohea kona inoa? Kinohi 32:1, 2. Mahea ko Davida noho alii? 2:11. E hia makahiki i alii ai oia ma Heberona? p. 11. Aia Heberona ma ka hema o Iuda, 20 paha mile mai Ierusalema aku.

He mea keakea o Ierebota, ma ke aha i pau ai ia mea keakea? Mok. 4:28. Oluolu anei Davida i keia mau Kanaka elua no ko laua pepehi ana ia Irebota? p. 9-12. Ua ahaia hoi Abenera ka Iuna koa o Ierebota? mok. 3:26, 27. Oluolu ane Davida i ko Ioaba pepehi ana ia Abenera? 3:28, 29, 33, 37-39.

Mahope o ka make ana o Ierebota, pehea ka poe Ieseraela, a pau? Mok. 5:1-3. Ka poni ehia keia? Mahea ka mua? 1 Sam. 16:12, 13. Mahea ka lua? 2 Sam. 2:3, 4. Mahea ke kolu o ka poni ana? 5:3.

Aia Davida ma Hebesona, aka, aole oia he wahi kupono no ka noho alii. Mahea ka hi kupono? 5:6. Aia, ia wai Ierusalema ia wa? Pehea i lilo ai ia ia Davida? p. 6-10. 1 Oihana 'Lii 11:6. Owai ka inoa mua o Ierusalema? Iebura. Nohea na Iebura? Kin. 10:15, 16. Owai ke lii mua o Ierusalema? Kin 14:18, o Salema ka inoa mua loa paha. Owai ko i kokua ia Davida? p. 11. Heaha ka Davida i ike pono ai no ka hana a Iehova nona? p. 12

P 17-21. Ke kaua mua o na Pilisetia i ka poe Iseraela mahope o ko Davida lilo ana i alii, mahea ia kaua? Aia ke awawa o Repaima ma ke komohana hema o Ierusarema mawaena o Ierusalema me Betelehema. Hele wale anei Davida i ke kaua me ka ninau ole aku ia Iehova? Ma owai la kana ninau ana ia Iehova? 1 Sam. 30:7, 8. A pehea o Iehova i pane mai ai? Mahea ko Kavida loku ana ana i ka enemi? Bealapesa-sima he inoa hou ia, kapaia pela no keaha? E pili ana no ia wahi ia Repaima. Pehea na kii hoomana o na Pilisetia? mana anei?

P. 22-25. Kaua hou ka na Pilisetia. Mahea ia kaua? Ninau hou anei Davida ia Iehove? A pane mai oia pehea? Heaha ka hoailona e haawi ia mai ana i mea e lalelale ai Davida e hele i ke kana? Heaha ka hope o ia kaua? Geba, Geresa, aia ma ka palena akau o Iuda o Geba, a ma ka palena hema o Garesa; Geresa ka pololei.

Mele. "Koa maikai" Hae Hoonani, p. 28.

Koa maikai, koa mau ae,

Nou kau e hana, aole na hai,

Koa ikaika, aloha pu nae,

Na na anela e apono mai.

Cho.----Koa koa koa maikai,

Koa koa koa mau ae

Koa mae ae, koa mau ae.

Koa maikai, koa mau ae;

Eia imua ka Luna kiai,

Nana e helu na hana maiakai,

Nana e uku ke koa mau ae.

Cho.----Koa, koa, koa maikai, &c.

NA NINAU A KE KAHU.

Na makua. Olioli anei Davida i ka lohe ana, ua make Saula, laua me Ionatana? He kanikau kana i kakau ai no Iau, owai ka inoa? Ke Kakaka. A kauoha oia i na mamo a Ieda e hoopaa naau ia kanikau. 2 Sam. 1:17-27.

Ma ke kauoha a ke Akua nowai i ke aupuni mahope o ko Saula make ana? A ma ka manao, a me ke kaua ana o Abenera ka luna koa o Saula, nowai ke aupuni? Pehea ka loihi o ke kaua ana o Abenera no Ierebota ke keiki a Saula? Ma ke aha i huhu ai Abenera ia Ierebota a haalele ia ia, a huli mamuli o Davida? Ma ke aha i ea ai Davida i ko Abenera manao? Ua hoihoiia mai anei Mikala ia Davida? A ma ke aha i ko ole ai ka manao o Abenera? Ua oluolu anei Davida i ko Ioaba pepehi ana ia Abenera? Elua kumu no Ioaba pepehi ana ia Abenera heaha ia mau kumu? O ka lili paha ke kumu nui.

Na keiki. Ierebota, owai ia? Ko keiki a Saula, ke alii hoi o ka hapa nui o ka poe Iseraela. Nowai kekahi hapa? No Davida. Aole anei no Davida ke aupuni? Pela no, aka, ua keakea Ierebota. Mahope iho, make Ierebota, nawai ia i pepehi? He mau luna koa elua, Baana laua me Rekaba, kona mau kanaka ponoi no. No ke aha ka pepehi ana? No ke kuhi ana, ka mea keia e oluolu ai Davida a haawi i oihana nui no laua. Me iuda Isekariota ea, e kumakaia ia Iesu no ke aha? Ko anei ko laua manao? I ka ike ana o Davida i ke poo o Ierebota, a me ke ano o ko laua pepehi ana ia ia, keua oia i kekahi e aha ia Laua? e pepehi.

Hewa loa ea ka hoopili ana i kekahi i mea e waiwai ai. Ka makeewaiwai ka molo ia o ke aha? o na hewa he nui wale, a mo ka make. Lilo Davida i alii, ma ke kauoha a wai? Owai ko oukou alii nui? Iesu, ka mamo ia owai?

Ke kula a pau. Na mea keakea i ko Davida lawe ana i ka noho alii, ehia? ua pau anei ia mau mea i ka laweia'ku? No ke aha kona lawe koke ole ana i ke aupuni mahope iho o ko Samuela pono ana ia ia i alii no ka poe Isersela? A make Saula, ua lilo koke anei Davida i alii no ka poe Iseraela a pau? No keaha? Owai ka ohana mua i hoalii ia Davida? Mahea? ma ka ae ana owai? Ehia ohana mamuli o Ierebota? Ehia makahiki i alii ai Davida ma Heberona a mahope, lilo i alii no ka poe Iseraela a pau? Mahea hoi ka noho alii? No lawe ia mai Heberona a i hea? Nowai Iebosa, oia hoi Ierusalema, mamua? A pehea ia i lilo ai ia Davida? Heaha hoi kekahi olelo i lilo i olelo mau mahope iho? Na makapo, ua oopa, aole e aha? Ehia kaua o na Pilisetia me Davida mahope koke iho? Owai ka i lanakila? Ma ke aha ka lanakila ana,

Na manao pili.

1 E hooko liiliiia'ua na manao o ke Akua ma kaua mau wanana. Aole lilo koke Davida i alii. aole e lili ana na aupuni o keia ao no Iesue.

2 Ma ka hana e pau ai na mea keakea, a e loaa'i ua pono. Iakobo 2:26. Aole e loaa ka lani ke hana ole, &c.

Mele. "Koa liilii o Iesu" Hae Hoonani p. 32

Eu na koa, koa o Iesu,

Koa liilii o Iesu.

Eu a koa no Iesu,

Paa ka hae, a paio pu

Me ka wiwo ole no. [nani?

Cho----Ku, ku, ku a naue mau i ka nani, i ka

Nui no na enemi, Paio e, e hooauhee,

Iesu no ka LUna mana ke kokua.

Pule i ala a kaua aku i na enemi i na hewa, i hiki koke mai hoi ke aupuni o Iesue.

HAAWINA KULA SABATI, NO FEB. 27. 2 SAM 6:1-15.

Hawaii.

He Kanikau no Kahekili.

He awe la he aloha,

He u he minamina ia oe

E olilani na malie

Ka pane poo o ke kuahiwi

Kau malie wi aleale la-e

Aloha kaua kuu keiki hoi

Aia la oe i hea i haalele mai nei

Aia paha oe i ka ulu o ka makani

Ma ka pea kua o na moku la

Hoi mai hoi kaua.

Kuu keiki i ka lai o Lele,

Mai ka makani aloha la he Maao,

E wehe ana i ka lau o ka ulu,

Uluku wau i ko aloha e,

Kuu keiki hoi

Kuu keiki mai ka na lilelehua e,

Ua palahea i ke pili o Honokawai

He waiwai nui ka ko aloha e hana nei ia'u la,

Ke o e nei la i ka iwi hilo,

Ke aloha o kuu keiki,

Auhea iho nei oe.

Hoi maui kana e pili

I ke ana o ka u ap@upili

E pili no wau me ko aloha.

Kuu lei hoi he keiki----e,

Kuu hoa pili i ke anu----e

Oia makani la he kiu

Kuu hoa hoolohe i ka leo o ka wai,

E hone mai ana i ke kulu aumoe,

Oia wai o Koloa i Maulili la,

He liliha he kena i ko aloha

Ko haalele ana mai nei ia'u la

Hele oe i ka ala muku a kanaloa,

Loa hoi ka hele ana hoi la

E ku o pu Haupu ke la i ka lani,

Oni e like me ke Olewa i lunae

Ka halau ka poli ke alo kaipoli-a

Ma ko poli wau ma kahi mahana,

Ua piha ia maua o ke aloha,

Aloha hoi kaua----e.

Kou keiki i ka hale malu a ke ao----e,

Oia hale kukui lau nui o lalo.

Hoomalu aku la i ke kaho o Mane----e,

Ke hoonana nei wau i ko aloha----e,

I hea la auanei e loaa ai oe ia'u la

Kuu keiki i k apolii o Lehua----e,

Mai ka ia hoopa ili kanaka o ka aina.

E pupuu ai i ke anu o ka wai pao

Hoomahana aku i ka poli o ka makua,

Kuu keiki hoi kuu aloha pau ole la,

Kuu keiki mai ka ua olelo mai i luna o ka lauhala,

Ke nihi ae la makai o Luia,

Luia iho nei loko e ko aloha----e

Kuu hoa makaikai wai----e

Ia wai lele mai iluna o Namalokama,

Ua kama ia wau e ke aloha a paa,

Oia wau e u wale nei no.

Aloha kaua----e.

KAUMAKAAMANO.

He kanikau la he aloha

Nou e Luluhiwalani,

Nou paha ka uhane

I niau hookahi aku nei

I na hola o ke aumoe.

Ka pilina la o ke ao,

Haalele mai nei oe

I ka pili me ka makua;

He aloha kuu hoa pili,

I ka po nee ke ao;

He aloha wale ko leo,

O ka pane ana mai,

Auhea iho nei oe?

E ia hoi au la,

E ua haku lani nei:

Moe aku paha ka uhane,

I ka moe ana huihui,

He aloha kuu hoa pili,

Lu ana o ke awakea,

He u he aloha no kuu haku----e.

Kanikau la he aloha

Nou e Luluhiwalani,

Aia paha ka uhane,

I ka paha ka uhane,

I ka malu ulu o Lele;

E kilohi ana i ka nani,

I ka hono o aa moku;

Ike aku la pah aka uhane,

I ko aloha pili alo,

Nou no ke aloha,

E ua haku lani nei,

Aohe ukali o ke hope,

Hui aku la paha oe,

Me ou pokii lani;

I walea paha ka uhane,

I ka nani o ka lehua,

He u la he aloha,

No ku haku----e.

EMELY

Ho u la he aloha,

Nou no e Kaukuna,

Nou paha ka uhane

I naue hookahi aku nei,

Aohe lua aohe kolu,

Aohe ukali o ka hope,

Oia hookahi wale no,

I niau kololani aku nei.

Ka helena a kuu alii.

Aia paha ka uhane,

Ka ua koko i ka moana,

Punohu ula i ke kai,

Kuu minamin apau ole,

I kuu haku lani----e.

KAHONUA.

Kanikau la he aloha,

Nou e Luluhiwalani,

Ua hala e aku oe,

I ke ala hoi ole mai,

Aia oe i manua,

I ke alanui malihini,

Alo hookahi ka uhane,

Aohe kokoolua,

Aia paha ka uhane,

Ke noho mai la i luna,

I ke ao ike ole ia,

He u he aloha ia oe e kuu haku.

Kanikau la he aloha,

Nou e Luluhiwalani,

Ke noho nei makou,

Ma ka u me ke aloha.

Ke uwe helu aku nei,

Kou kini a pau.

Noho nani mai ka uhane,

I ka olu o ia home,

E wale ana paha oe,

Me Hiku i ka wao lipo,

Hooipo ana ka uhane,

Me Lilinoe i ke anu,

Me ka wahine noho kuahiwi,

I ka luna o Poliahu,

Aahu i ke kapa hau

Kahiko o Maunakea,

Pa ke la aku ke aloha,

No ua haku lani nei,

He u la he aloha,

He minamina ia oe.

SUSAN.

He kanikau no Luluhiwalani,

Aloha ino no Luluhiwalani,

I ka hele hookahi ana aku nei,

Hele loa no, hoi ole mai,

I ke alanui makamaka ole.

Cho.----Auwe! auwe! aloha.

Auwe! auwe! aloha.

Ke uwe helu mai nei o Kalola,

Aloha ino kuu keiki,

Kuu hoa alo o ka moana,

O na ale o Paoilolo,

Cho.----Auwe! &c.

LEVI.

ke ninau nei o ka Lani,

Auhea iho nei o Kahekili,

E i aku nei paha oe,

Me ka makua mana loa.

Cho.----Auwe! &c.

Ke uwe kanikau nei,

O kealalaina,

Auwe aloha ino no,

Kau haku lani na hala.

Cho.----Auwe! &c.

ILIHIA.

Ke noho nei no hoi wau,

Me ka u me ka minamina,

I kou haalele a na mai,

I ka pili a kaua.

Cho----Auwe &c.

Auwe no koa, ike ole hoi,

I kuu haku lani ua hala,

Kuu mea minamina,

I oiau iho nei.

Cho.----Auwe! &c

KANAANA.

Ke uwe hele nei Kawika,

Auwe no kuu kaikuaana,

Kuu hoa o ka wa kamalii,

E holoholo ai maua.

Cho.----Auwe! &c.

E ka makua e aloha mai,

I na pua alii i koe,

E mau ko lakou ola ana,

A kau i ka pua aneane.

Cho.----Auwe! &c

LEVI.

Kanikau no Luluhiwalani,

Kanikau he aloha keie,

Nou e Luluhiwalani,

I hele ko hana akula,

I ke ala hoi ole mai.

Cho.----Auwe! &c.

ILIHIA.

Aloha ino o Luluhiwalani,

I hele kohana aku la,

I ke ala hoi ole mai,

Ke uwe hela mai nei,

O Honolowailani,

Auwe kuu keiki,

Kuu mea minamina.

Cho.----Aloha ino &c.

LEVI.

Kanikau he aloha keia,

Nou e Luluhiwalani,

I niau iho nei,

I ka hola o ke aumoe.

Cho.----Aloha ino &c.

KANAANA.

Moe aku la paha oe,

I ka moe Kau moe Hooilo,

I ka alanui malihini,

A kane me Kanaloa.

Cho.----Aloha ino &c.

LEVI.

HE NANI.

ALOHA OE: Ka ouli ku Kamahao i waena o ka welelau makani, ka hoa haihai olelo o k a poe akamai, a noelo ike, ka elele mama i ka lawe i ua makana e waena o keia mau poe moku.

E ka ana he 12 opua ma kekahi moana kai; a o ka poe e noho ana ma loko o ia mau opua, ua hookelakela ae lakou e oi ka nani o kekahi opua i ko ke kahi aole nae i holo lea ia hana.

A i ke kahi manawa, ua hoonoho ia ae 7 Kapena ma ka welau o luna o ke kahi opua; aole nae i hoonoho ia lakou no ka manawa hookahi; e hookele ai ma ka hooponopono ana, i lai ai ka noho ana.

Ua hoonoho ia ka mua e like me ka manawa i kupono iaia ma kona ola ana, a pau ia, pela aku no ka lua, ke kolu, a i ka 7 o lakou. a ua kau ia maluna o lakou ke kahi kilohana, a, aole no i kau ia ke ia kilohana ia lakou i ka manawa hookahi; ua kau ia e like me ka manawa o ke la kapena ke ia kapena e hookele ai i na opua 12.

A i ke kahi manawa, halawai mai la o Luluupuaikawao me ke kahi o lakou; i mai la ia. "O ke kilohana i kau ia maluna o oukou: i na e hoonui ia oia me ka Lauwahine, a oia huina, i hui pu ia me Robinaro, a oia huina houluulu, i puunane ia na Mailekaluhea, ua like no ka hua loaa me Ladana. Heaha la ke kilohana? O ka hua 2, 4, ua like, like ole ka hua 1, 3, 6 ua like ka hua 5, 7." Heaha na opua? Owai na Kapena? Owai ka opua i noho ia ma ko na welau, e na Kapena 7? A i hemahema au ma ke ia kua nane ana ea, e kala mai, a i ku pono iki hoi e kamau iho.

Me ka laua o ka manao e loaa no i ua keiki omo waiu. Ke huli hoi nei ke keiki o na pali hauliuli, ua kau ka la i na pali o Kahooleinapea.

Me ka mahalo i ka Luna Hooponopono, a me na keiki ulele hua kepau.

KEALAKUHILIMA.

Laie, Jan. 3, 1876.

Hookahi hipuu na kakou.

E uana mai, hookahi nipuu na makou a pau, ka Ekalesia Maramona a me ka Ekalesia Hoole Pope ma Kahana nei. a e ninau paha auanei ka mea ninau mai, heaha ia hipuu hookahi iwaena o makou, ka Ekalesia Moramona, me ka Ekalesia Hoole Pope o Kahana? eia ka haina loaa, hookahi, Ekalesia makou, ekalesia Hui Moramona o Kahane, Koolauloa, Oahu. Malalo ponoi o ko kakou makamaka Iesu Kristo aole malalo o Karevina, aole malalo o Moramona, he mau inoa kanak wale no laua. Ua loaa keia inoa ia makou mai ka haiolelo mai a Rev. Kekiokalani ma ko makou luahini hale-pili ma Kahana, a me na olelo paipai mai a Kiaaina, mahope iho o ka Kekiokalani haiolelo ana, a me na poe paipai e ae.

O ke Poo olelo i hai ia ai iwaena o makou, e Kekiokalani, aia ma Halelu 119:63 hapa mua, penei: "He makamaka au no ka poe a pau i makau aku ia oe." A pau ka pule kakahiaka, a i ka pule ahiahi iho i ko mua koaoao ka haiolelo, a ia makou a pau iloko: o ka luakini Hoole Pope ma Kahana nei. Ia Makuakane ka haiolelo a me na hoa paipai e ae he nui.

O ka la i hoomaka iho nei keia mau ha na o ka la 23 o Ianuari nei, a eia makou la hookahi hipuu e paa nei, a he poe makamaka no ka poe a pau i hoino ia mai, a e makau aku ana ia ia 'la ma-o, maluna.

Owao no, P. PUUOMAHIA.

Kahana, Koolauloa, Oahu, Ian. 24 1876

ko ka Moiwahine Isabela o Sepania. He mai puupuu liilii, a me ke ano mai e ae kona.

KA BURT LAAU OLA!

NO KA

Mai e loaa mai ana no ka holopono ole o ka ai iloko o ka Opu,

A me ka mea hooikaika i e Akepaa!

O KEIA LAAU E LOAA MAI AI KE OLA A E PEKELE AI HOI!

He mea io no ia e pau ai na mai i loaa mai mamuli o ka

Holopono ole o ka ai iloko o ka Opu

Ka Paapu, na Io ulu wale,

Na waikahe wale mai, na mai Nalulu,

Na mai o ke Akepaa, a me

KA PONO OLE O NA PAAHANA O KA WAIHONA AI

E LOAA KOKE NO KA OLUOLU KE INU I KEIA LAAU. MAI KA AKAhi a i ka eono omole, (e like me ka nui o ka mai, pela e nui ai ka laau).

He mea nui loa ka malama ana i ke kino iloko o ke kulana o ke ola maikai me ka kokua ana i ka mana o ka hooholopono ana o ka ai iloko o ka opu, a me ka hooikaika ana e puliki a e hooma ma na haua e kokua ai i ke ola oluolu maikai, a mamuli oia mau ana e puliki a e hoomau ma na hana e kokua ai i ke ola oluolu maikai, a mamuli oia mau mea e makala a ina mea ino mai ke kino ae, ma ka ai ole ana i na laau awaawa. I mea e maopopo ai, e lawe i ka Laau Ola a Burt, e loaa ai ka ikaikai a me ka mea hooikaika i ke akepaa, he LAAU noloko mai o na MEA KUPU. Ma ka ikaikai o keia laau a me ka holo o ka hana maluna o na PAAHANA o ka WAIHONA AI, me ka hooikaika ana i ka opu a me ke kokua i na mea o ke kino, a ma ia wa no e kaawale aku ai na mai o ke akepaa, a ma ka hoonaha kupono ana, e loaa mai ai ko oluolu ma ka pau ana kau o na wai ino. Aole laau maikai e ae i ike ia, e like me ka Burt Laau Ola no na mai e loaa mai ana no ka holopono ole o ka ai iloko o ka opu, a me ka mea hooikaika i ke akepaa, a o lanakila nui no keia laau maluna o na mai i loaa mai no ka holopono ole o ka ai iloko o ka opu, ka paapu, na io ulu wale, ka wai kahe wale mai, a me na ino e pili ana.

He lehulehu ka poe i ike ole i ke kumu i hiki mai ai na mai no ka holopono ole o ka ai iloko o k aopu; a nolaila, ua manao ia he mea pono he hoike aku, i kahi wa, na loaa ka eha ma ka waha o ka opu ai ai, o ke kumu o ia, o ka holopono ole o ka ai iloko o ka opu, a lilo ia i mea pohapoha, loaa mai ka nalulu, ka wela o ka umauma, wela o loko o ka opu, k aumii ma ka aoao o iloko o ka umauma, ka mulea o ka wah, palaai o ke alelo, awahia o loko o ka opu, ka hiamoe ole a me ka ono ole i ka ai, ka molohai, paupauaho, ka niua, ka moku honua, ka lia o ka ili, a o ka moku ana o na aa lolo Nolaila, a na paahana a pau o ke kino i loaa i ka nawaliwali, ua loaa mai ia mai ka holopono ole o ka ai iloko o ka opu.

O KA LAAU OLA A BURT, he laau ia e kipaku aku ana i na mea make; a o ka mea i loaa'i nei mau ano mai a hoomanawanui i ka ai ana no kahi manawa, o ke ola kona hope. Ina he paa ka mai o kahi a inu i keia laau, e loaa koke no ka oluolu maikai, a loaa no ke ola nou. O na ino a pau o ka io ulu wale, he ola wale no ia i keia laau.

He nui na hoike e ola nei no ke ola ana i keia laau, mahope iho o ko lakou mai ana no kekahi mau makahiki, a i ka ai ana i keia laau ua ola koke. He hiki no hoi ke hoomaemae ia ke koko me keia laau ola a Burt, a pela no hoi na mai mawaho o ka ili, he lilo loa ia i ka ole ke ai i keia mea maikai. a he laau maikai no ma ka inu ana.

O keia laau, ua loaa mai ia mailoko mai o ke kuhikuhi a kekahi kauka lapaau kaulana, nona ka lapaau ana i kona ohana iho, a ua loaa no ke ola maikai. Ke waihoia aku nei keia laau imua o ka lehulehu, me ka lana o ka manao e hahai ia ana no e na pomaikai na poe e ai ana, ina paha he imii ka mai, e ola ana no.

O KEIA LAAU A BURT, KA LAAU MAIKAI MA KE AO NEI, nolaila, he pono i na poe mai ke hoao i loaa ke ola. E loaa no keia laau ma ko makou Halekuai

Na kuhikuhi no ka inu ana:

E inu i hookahi puna nui i ke kakakahiaka a me ke ahiahie, hoonui aku paha a hooemi mai paha, i mea e hemo maikai ai oloko, elua a hookahi manawa paha o ka la. Mai inu i ka wai iloko o umikumamalima minute, mamua a mahope o ka inu ana.

KUMUKUAI, $1.25 no ka omole.

KO KALEPONI LAAU OLA!

A ME KA MAI HANO.

DILLINGHAM & CO.,

720 3m Na Agena no ka Pae Aina Hawaii.

J. PORTER GREEN,

"KEIKI O KAUAUKIUKIU."

LOIO!

E HELE MAI NA MAKAMAKA A PAU IO'U nei, a na'u no e kokua ia oukou imua o ka Aha Hoomalu a me ka Aha Kiekie, me ka uku haahaa makepono loa. Ala kuu Keena hana ma kahi o ka Lunakanawai Hoomalu o Honolulu nei, oia ka "Aiko," ma Alanui Kale@ pa. 688 1y 12@

WING SING & CO.

Puhi Palaoa,

E waiho mau ana na palaoa a me na berena palupalu. Kihi o na hina alaoni Nuuanu a me Beritania. 303 ly 755

E. STREHZ, (AILUENE,)

HAAWI A KUAI

LAAU LAPAAU.

AIA MA MONIKAHAAE. KIHI ON NA HUINA o na Alanui Papu a me Hotele. Ala malaila na Wa Ala a me na Wai Rukin maikai loa e loaa ai.

E hamama mau ana i na ahiahi Poaono a pau. 687 1y 741

Mea HOU Maikai.

NA PEPA kakau Farani me na wahi leta o kela ano keia ano, i hanaia maloko o kekahi pahu liilii. O ke kumukuai o keia pepa ano hou, he hapaina a hookani dala. Aia ma ka hale kuai buke o

1m----705 H. M. WINI.

He Hoolaha i ka Poe Aie!

OIAI, ma ka la 18 o Ianuari 1876, ua aeia ka palapala kauoha hope loa a KALUAHI, o Honolulu, Oahu i make, maloko olaila, ua hookaawaleia ka mea nona ka inoa malalo iho, i hoolilina no kona niau waiwai a pua, nolaila, ke kauohala aku nei ka poe a pau ana i aie aku nei, e hoike mai i na bila oiaio ia'u, iloko o na malama eono mai keia la aku. KALEI.

Honolulu, Ian 22, 1876 73s 4t@ 741

EIA KA MANU HOU

HE BUKE MELE HOU NONA KA INOA

"Robina Gula,"

ua 110 ka nui o na mele haipule a hoonanea o keia Buke Hou.

He 13 keneta no ka kope, a i ole la, he $10 no ka 100 kope. E kuai la e (3m 804) H. M. WINI

KA NUPEPA KUOKOA

E HOOPUKA MAU IA MA HONOLULU,

I KELA POAONO KEIA POAONO

$2.00 no na mahina Umikumamalua

$1.00 " " " Eono.

ME KA HOOKAA MUA MAI.

NA OLELO HOOLAHI----aole e oi mamua o 10 laina no ka hoopuka hookahi ana, $1.00: aina puka ana he $1.30 hookahi malama, $2.00. E UKU MUA ia mai ke dala o na Olelo Hoolaha e hoounaia mai ana e pai.

O NA UKU A PAU E HOOKAA MUA MAI NO----aole e kau ia ka inoa o kekahi haole a kanaka maoli paha, ma ka luoa o ka poe lawe pepa ke ole e hookaa e mai mamua. E pono e hiipoila keia mau rula, no ka mea, he emi no ka auhau no keia nupepa.

AIA KE KEENA O "KE KUOKOA" MA KA

HALE LETA HOU.

H. M. WINI,

Luna Hoopuka.

Lole Makepono ke Kuike!

E LOAA NO IA MA KAHI O

KAKELA ME KUKE,

E LAA NA

AHINAHINA,

KALAKOA,

KEOKEO,

LEPONALO,

Pena, Aila, Aniani,

Na mea Piula,

Kopa, Aila Honua,

Aila Hoomaloo,

Kui Kakia, Pakeke,

Tabu, Kaula, Noho lio,

Hulu-palaki, na Pulumi.

A he Agena no hoi no na Mokupuni o Hawaii nei no na

LAINAKINI-NAO,

LAINAKINI-MAOLI,

PALULE KALAKOA,

ALAPIA, KELEPA, KILISA,

Na Lole kupono i ka wawae,

Palule Huluhulu,

Na Lole Huluhulu,

Na Lole no ka hoohehelo ana

Lipine, lihilihi, a me ia mea'ku

A HE

MAU MEA AI KAHI

Ka Palaoa, Kopaa,

Raiki, Pia, Hoohu,

Paakai, Huaala,

Pia Kulina, &c

A HE

LAAU LAPAAU KAULANA LOA

A Dr. JAYNES.

Laau Kunu,

Laau Hoomaemae Koko,

Laau hoopau naio,

Penikila, Huaale,

A me na Laau Hamo, a pela'ku.

707 ly 759