Ka Nupepa Kuokoa, Volume XIV, Number 39, 25 September 1875 — Page 4
| This text was transcribed by: | Marti Steele |
| This work is dedicated to: | R. Dwayne Nakila Steele |
KA NUPEPA KUOKOA, ME KE AU OKUA I HUIIA.
HE HIMENI
CHRISTMAS CHIMES.
Nine O'clock in the Morning p. 164.
1.
Mele e, a mele hou,
Mele me ka olioli,
No ka wa kahiko no,
Wa maikai, a hoohauoli,
No ka wa i kai mai ai
Na pouli o ka lani
I ka hanau ia mai
O Iesu la ke Lii nani.
Cho:----Penei no ia mele e,
Malu ma ka holua nei,
E hoonani nui ia'e
O Iehova ke Lii e.
[: He mau! Mele, mele, mele e!! :]
E hoonani nui ia'e
[: O Iehova ke Lii e; ]]
2.
Moe ma kahi haahaa e
Ke keiki ka Mesia,
Oiai he hoku lai
I kiai i maluhia.
Loa no ka wa i pau,
Kau mau nae ia Hoku ula.
Hoku nani no ke ao!
E alohi a mau loa.
Cho.----Penei ne ia mele e, &c.
3.
Mele e, a mele hou,
Hai a nui a hookani
I ka au kahiko no,
No hauoli mai ka lani,
La no nei e hoomanao
I ko Iesu hanau ia.
Kona aloha i ke ao,
Kona lilo i Mesia.
Cho. - Penei no ia mele e, &c.
Hawaii.
HAAWINA KULA SABATI
HELU 2 (SABATI, OKATOBA 10.
KUMUHANA.----Ko Iesu holoi ana i na wawae o na haumana.
PAUKU BAIBALA----IOANE 13: 1-9.
MAMUA o ka ahaaina moliaola, ike iho la o Iesu, ua hiki mai kona manawa e hele aku ai ia i ka Makua mai keia ao aku, i ke aloha ana i kona poe ponoi i ke ao nei, ua aloha oia ia lakou a hiki i ka hope.
2 A i ka ahaaina ana, ua hookomo ka diabolo iloko o ka naau o Iuda Isekariota na Simona, e kumakaia ia ia;
3 Ike no o Iesu, ua haawi mai ka Makua i na moa a pau i kona lima, a ua hele mai ia mai ke Akua mai, a e hoi hou aku no ia i ke Akua.
4 Ku ae la ia mai ka ahaaina ae, a waiho aku la i kona aahu; a lawe ae la ia i ke kawele, a kaei i ho la ia ia iho.
5. Alaila ninini iho la ia i ka wai iloko o ka pa holoi, a hoomaka iho la e holoi i na wawae o ka poe haumana, a holoi maloo hoi me ke kawele ana i kaeiia'i.
6. A hiki mai ia io Simona Petero la; ninau aku la oia ia ia. E ka Haku, o holoi mai anei oe i ko'u hau wawae?
7 Olelo mai la o Iesu, i mai la ia ia, O ka mea a'a e hana nei, aole oe e ike i keia wa; aka, e ike auanei oe mamuli aku.
8 I aku o Petero ia ia, Aole loa oe e holoi mai i ko'u mau wawae. I mai la o Iesu ia ia. Ina e holoi ole aku au ia oe, aole ou wahi kuleana pu me au.
9 I aku la o Simona Petero ia ia, E ka Haku, aole o na wawae wale no o'u, o na lima a me ke poo kekahi.
Pauku Gula. "I hookahi ka manao ana iloko o oukou me ia iloko o Kairto Iesu." Pil. 2:5.
Mele. Him. 355. 8-6 Leo.
1 Aloha o na hoahanau
Iloko o Iesu:
Hauoli ko kakou naau,
A launa pono pu.
3 Auhea ke Lii maikai e ae?
Auhea ka like pu?
Maanei kakou e kupaa ai
Mamuli o Iesu.
Pule i like kakou me Iesu, e aloha ana kekahi i kekahi &c
NA NINAU A NA KUMU.
P. 1. Heaha ka ahaaina moliaola? Owai kekahi mau moa? Berena hu ole, Pasoa. Heaha ka Iesue i ike ai? Kuna manawa aka ka i hiki mai? Mai hea mai oia? A e hoi aku ana i hea? Ua akaka e anei kona manawa e make ai? Ae, mai ka wa kahiko loa mai no. Ua pale pinepine aku Iesu i ka make a hiki i ka manawa pono e make ai.
Owai kona poe ponoi? Ua aha oia ia lakou? A e aha ana hoi? E mau ana ke aloha.
P. 2. Ua hoomaka Iesu i ka hana, i ka ahaaina ana, ua paa kekahi hapa, mamua o ka paa loa ana. Heaka ka ke Diabolo i heokomo ai iloko o ka naau o Iuda Iaekarieta?
P. 3. I ke Iesu ike ana i ke uka? Heeha ae mea a pau i haawiia ia loaa o ka Makua. Na mea a pau e pono ai na haumana, kona aupuni, na mea e hoihoi la mai ai ke aupuni i ke Akua, a ola na kanaka, a pu ka mana o Satana.
P. 4, 5. Heaha ka Iesu i hana'i mamua o ka pau ana oka ahaina? Kupanaha keia hana haahaa a Iesu, he hana e pili ana i na kauwa?
P. 6---9. Owai ka i hoole, aole e holoi Iesu i kona mau wawae? No keaha kona hoole ana? Pehea Iesue i Pane au ai ia Petero? Ua ae anei Petero mahope? Pehea Petero i hooi ai i ka hana a Iesu? Aole o ko'u mau wawae wale no, aka, o ko'u mau lima me ko'u poo kekahi. Minamina oia i kona kuleana me Iesu, aole loa ona makemake e hoonele ia. Ua akaka anei ia wa ke ano o keia hana e Iesu? Mahea ko Iesu wehewehe ana?
Pauku 12---17. Heluhelu---Ua waiho Iesu imua o na haumana i kumu hoohalike. Aole Iesue i hilahila i ka hana ana i na mea haahaa loa. he mea nui loa Iesue. Pehea i olelo ai Ioane Bapetite nona? Mat. 3:11. Luka 3:16. Pehea ka Iesu olelo nona iho? Mat. 11:29. Heaha ka Iesu olelo ma Mat. 18:3, 4. Mat. 5:3. 23:12
Ke hana nei anei oukou e like me ka Iesu kauoha? A hana ole, hiki anei ke hui pu me Iesu ma ka lani?
Mele Try to liae like Iesus----Hae Hoonani p. 8.
1. Noho ma na la a pau
Me ko Iesu ano,
Oluolu no,
Kuikahi pu,
A nana no e alakai,
A nana e hoomaikai mai,
A oli pu kakou kakou,
A oli pu kakou.
NA NINAU A KE KAHU.
Na makua. Hai mai i ka pauku gula. Ma keia Haawina heaha ka manao o Iesu i hoikeia mai? 1 Ka manao aloha. Ua aloha oia ia wai? Owai na haumana ponoi? He poe haumana ponoi na Iesu maanei? Ke ano o ko Iesu aloha, mea mau anei? he mea pokole paha? Lalau na haumana a kuhi hewa pinepine a manaoio ka pekepeke, hoomanawanui anei Iesu me lakou, a mau no ke aloha? 2. Ko Iesu manao haahaa. Ma ke aha i hoike ia'i ko Iesu manao haahaa?
Na keiki. He kumu hoohalike Iesu ma ke aha oukou e hoohalike ai me Iesu? 1 Ma ke aloha o kekahi, i kekahi. 2 Ma ka hoole i ko'u pono iho no ka pono o kuu hoa. E ae e lilo ka mea maikai i kouu hoa a na'u ka mea ino. 3 Ma ke kokua ana i kuu hoa i ka halihali ana i kona mau kaumaha, kokua i kana mau hana, e oluolu e hana i na mea haahaa loa, na hana kauwa, holoi lole, mahiai, kii i ka ukana halihali i ka ukana, e ao i ka poe naaupo, ilihune &c---Ke hana nei anei oukou pela? Ke hoohaahaa nei anei oukou ia oukou iho a ae e hookauwa na na hoa, a na ka poe pilikia, ilihune, mai poloi, &c? Hilahila paha ea, ke ike ia e hana ana e like me na kauwa haahaa loa. A i like ole oukou me Iesu, hiki anei ke noho pu me ia ma ka lani?
Ke kula a pau. Ma ke la Sabati lohe kakou na Iesu me kana olelo e hookuu i na kauwa na ka hewa, a na ka diabolo, ke manaoio lakou a malama i ka Iesu mau olelo. Ma keia Haawina e hookauwa ana Iesu i kana poe haumana, pehea keia hookauwa ana? E lilo na haumana i kauwa, kekahi na kekahi, e hookauwa aku nu ke ao nei, ma ka hoole ana ia lakou iho, i ko lakou mau pono, a hele i o ianei e ao aku, e hoohuli, e hoohaumana, e ae e make i mea e ola'i kanaka.
Owai ka mea i oi, ke kawa? ka Haku? Owai ke kauwa nui? Iesu. Ina aole Iesu i lilo i kauwa, pehea kakou? Heaha ko kakou pono? E hoohalike me wai? ma keaha?
Mele. Try to be like Iesus.----Hae Hoonani p. 10.
2. Hoao kakou i like
Me ko kakou Iesu,
Maemae e hemolele,
Haahaa a akahele,
A lokomaikai pu,
Cho.----Hoao, hoao kakou la
Na keiki o ke kula,
I like me Iesu la
Ke Hoa makamae.
Pule i hana mo ka haahaa me ke kauoha a Iesu.
Haawina Kula Sabati, Oct 17.
Ioane 14:1-7. PAUKU GULA, Hebera 11:16.
Hawaii.
Aha Hookolokolo Kiekie o ko Hawaii Pae Aina. Ma ke Kau o Iulai M. H. 1875
Kini Maka (w), kue ia Ah Fai (pake). Olelo hooholo a ka Lunawai C. C. Harris
Ua waiho mai ka mea hoopii, he wahine Hawaii, i palapala noi e hoopau ia kona mare ia ana me ka mea i hoopii ia, he Pake, me ka olelo ua mare ia oia me ka mea i hoopiiia maloko o keia Aupuni ma ka la 15, 0 Dec. 1870, aka wahi ana, ua mare mua ia ke mea i hoopiiia, Ah Fai, ma Canton i Kina, a o ia wahine ana i mare ai malaila aia noke oia mai nei aole hoi i okiia a nolaila o kana wahine no ia ma ke kanawai.
Ke noi nei ka mea hoopii e lilo kona mare ana me ka mea i hoopii ia i mea ole mamuli o ka Pauku 1315, o ke Kanawai Kivila, a peni ka heluhelu ana o ia pauku "E hiki ho ke hooholo, ua lilo ka mare ana i mua ole, ke maopopo ke wahine ka ke kane, a he kane paha ka ka wahine, i oki ole ia, ma ka hoopii ana o kekahi o na mea i mare hopeia, oiai e ola ana laua elua; a ma ka hoopii ana paha o ke kane mua, a o ka wahine mua paha."
Penei ka heluhelu ana o ka Pauka 1284 o ke Kanawai Kivila. "Aole e paa ka mare ana o ke kane me ka wahine . . .ina he wahine ka ke kane e ola ana."
Ua ike maopopo ia ma ke ano o keia hihia, ua makemake nui na aoao a elua e hemo ae mai na kaumaha i ili paha maluna o laua mamuli o keia mare ana i olelo ia. A i mea e hiki ai, ua waiho akau ka mea e hoopii ia nei i keia mau mahina i hala iho nei he palapala hoopii e ke ana i ka mea hoopii i keia wa, aka ua hoole ia kana noi e ka Lunakanawai Judd no na kumu ana i manao ai he kupono, a o kekahi o ia mau kumu, ua ike no keia pake i kona mare mua ia ana, ina ua mare io ia, i kona wa i mare hou ai maanei, a aole hoi e pono e hookuu ia ae oia mai kona hewa ponoi ana i hana ai. Nolaila ua maopopo aole e hele mai ana kekahi o na aoao elua e pale aku i keia hoopii, a no ia mea ua ili maluna o ka Aha ka nana ana me ke akahele i ka pono ma keia hana
Ma ka la 20 o Mei 1874, ua hooholo ka Ahaolelo i keia kanawai ano e iki no. "E hooholo ia, a pela aku -
Pauku 1. Aole no i lilo ka mare ana o kekahi wahine Hawaii me kekahi Pake i mea ole no ka mare ia ana o ke kana mamua ma Kina, ke maopopo ole nae i ka wahine Hawaii i ka wa mare, ka mare mua ia ana o ke kane.
Pauku 2. O na kanawai a pau e kue ana i keia ua hoopauia."
Ua hoike mai ka Lunakanai Harris i ka hoolohe ia ana imua ona ua mano oia ua lilo keia kanawai i mea ole no ke kue i ka pono o ka lehulehu a me ka noho maikai ana. Ua maopopo nae ina he maua ko keia kanawai alaila e hoole ia ana ke noi, a oiai e noho koke iho ana ka Aha Kiekie ma ka Banco, ua manao oia he mea pono no ka pono o ka lehulehu e hoole aku i ke noi a ka mea hoopii mamuli o keia kanawai, a hiki hoi ke hoohalahala ia ia olelo hooholo, alaila maopopo ka mana a me ka mana ole paha o keia kanawai; a he mea makehewa ke komo hononu loa ana aku iloko o keia hihia no ka mea ina e hooholo ia mai e ka aha piha he mana no keia kanawai, alaila, he hana makehewa wale no ia. Nolaila ua ae oia e lawe i ka olelo o na hoike ma ka hihia mua i hana ia mawaena o keia mau me, me he la ua lawe maoli ia mai imua ona alaila hoole aku i ke noi mamuli o keia kanawai, a ninau aku i ka Aha Kiekie no ka mana o maua ole o keia kanawaia Ua maopopo i na mea a pau ina he mana ka mare ana o n Pake a he mana pu no hoi ko keia kauawai, ue hiki i na Pake ke malama i elua wahine ma keia aupuni, no ka mea, ina holo mai kona wahine Pake mai Kina mai a hiki i nei a olelo mai o kona kane keia, alaila he mare maikai ia ona i na e hoomauia ka olelo hooholo ma ka hihia o Wai See a me Ching See kue ia Young Sheong a me kahi poe e ae; a ma keia kanawai aole no e lilo ka mare ana o ka wahine Hawaii me ka Pake i mea ole. Nolaila, ua ae ia na Pake e mare lehulehu. A i na o na Pake wale no ka i ae ia aole o kekahi ano kanaka e ae, alaila, ua kue maopopo loa ia ka Pauku 13 o ke Kumukanawai, penei ka heluhelu ana oia pauku. "Ke hoomalu nei ka Moi i kona Aupuni, no ka pono o na kanaka a pau malalo ona; aole hoi e imiia ka pono a me ka hanohano a me ka waiwai o ka mea hookahi, a o ka ohana hookahi paha, a o ka poe ano hookahi paha o kona lahuikanaka."
Oia hoi e hooholo ia na kanawai e pili like ana maluna o na kanaka a pau. A ine he maua ke Pauku Elua o keia kanawai, alaila ua hoopau ia ka Pauku 1284, i hai ia maluna, no kamea, ua kue loa i keia kanawai e noonoo ia nei, a ina pela, aole e manao ia ma keia aupuni ua paa ka mare ana o kekahi kanaka ina aole ana wahine e ola ana, ua hiki no iaia ke lawe ae i wahine nona oiai e ola mai ana no kana wahine mua; ua kue no hoi keia kanawai i ka---Mokuna 13, Pauku 1, o ke Kanawai Hoopai Karaiwa e pili ana i ka Mare Lehulehu, a e ana hoopau ana i keia mokuna.
Aole paha keia ka manao o ka Ahaolelo. Ua kue keia Kanawai i ke Kumukanawai a me ka pono o ka lehulehu a me ka noho maikai ana, a mamuli o ka mana i haawi ia i keia Aha, ma ke Pauku 824, o ke Kanawai Kivila e hooholo ia ua pau a lilo i mea ole, a pela no ia e hooholo ia nei. Ua hoihoi houia ka hihia imua o ka Lunakanawai i lawe ia mai ai keia hana e hoolohe ma na mea e pili ana, a nana no e lawe i ka ike a na hoike ma keia hihia, me ka nana ole ina ike o na hoike ma na hihia e ae mawaena o keia mau mea.
J. P. Green ao ka mea hoopii,
A. S. Hartwell " " hoopiiia
ELISHA H. ALLEN.
CHAS. C. HARRIS.
A. FRANCIS JUDD.
Honolulu, Iulai 28, 1875
HE WELINA ALOHA UA HALA.
E KA NUPEPA KUOKOA E: Aloha oe:
Ka pua Neleau hone o ka nahele, e hoonele ana i ke aloha i ke hoa, Eia mai kahi ka naenae la he Welina aloha ua hala, he oiaio, o Kananioewa ua hala mawaho o na palena o keia ola ana, he wahi opio no keau Hooulu Lahui iho nei, o ke kii koke a mai nei noia e ka mea nana i haawi mai, a nana no i lawe aku. Nolaila, ua haku iho makou i wahi kanikau nona.
Kanikau he aloha noi'la,
No Kanaoioewa ua hala,
Kuu hoa o ke kual la wela,
Na po hau anu Ewa,
A o Ewa kai ula i ka lepo,
I ka i-a kuhi aku kuhi lima,
A e kuhi ana no paha oe,
A he pono mau ilaila,
Haalele ia iho maua,
Na hoa kuwili o ka hale,
Nalowale aku nei hoi oe,
Pono ole maua ke noho,
Ke hihio iho maua e moe,
Hone ana ko leo ia nei,
Pela wale no ka apa ana,
Au e kolele nei,
Luaiele i ke kino,
A hea oe la e maliu mai,
Eia maua la ua anu.
G. H. KAHIAMOE.
Kanikau he aloha no Kanani,
O Kauanioewa he inoa,
Moe iho wau a huli ae,
O ke ku mai a ke aniani,
Ko waho e kilohi ai,
I kuhi no wau o oe ia,
Nui, nui kuu aloha nou,
Pii ae au a luna o ka lapa,
Hula au nana mauka,
O ka nee mai a ka ohu i Uao,
O ka paa mai a ka ua i Laukoa,
I kuhi no wau o oe ia,
Nui, nui kuu aloha nou,
Huli ae hoi au nana makai,
O ke ku mai a Haleaukai,
O ka haki mai a ka nalu o Keaalii,
O ka lana mai a ke kai o Piihao,
I kuhi no wau o oe ia,
Nui, nui kuu aloha nou,
Pii aku au a Kapukeki,
Huli pono kuu alo ma Honolulu,
O ke kilakila o Iolani Hale,
Ka pulelo a ka Hae i Halealii,
Hone ana o Pele i ka uapo,
Au ana hoi Laeahi i ke kai,
I kuhi no wau o oe ia,
Nui, nui kuu aloha nou
LULUHIPOLANI.
Kanikau la he aloha,
Nou e Kananioewa,
Ua hala e aku oe,
I ka hora elua o ka po,
Noho iho nei makou,
Me ka u me ka minamina,
I kou nalowale ana,
I ka pili o ke aumoe,
Moe au a huli ae,
Aole ke kino uhane,
Ua lilo i ka enemi,
Hoopau ana i ka nani,
Auwe! kuu kaikamahine--e.
MR. KAUALOKU
Kanikau la he aloha,
Nou e Kananioewa,
Ke uwe helu mai nei,
Mama Makaehukai,
Aloha ino no hoi,
Ka luhi o kakou,
Ka lei Lose mae ole,
I mohala kakahiaka,
Ke au ae nei au,
I kuu minamina pau ole,
Aole hoi e hihi,
A he lawe na ka mea mana,
Auwe! kuu kaikamahine--e.
MRS. MAKEHUKAI.
Kanikau la he aloha,
Nou e Kananioewa,
Nou uwe hela mai nei,
O Kekoa he makuahine,
He aloha kuu pepe,
Kuu minamina pau ole,
Ka leo ka'u aloha,
I ka heahea mai, a he ua la,
Auau aku ka uhane,
I ka wai o Ka Hawai,
Hoopumehana wau i ka uhane,
I ko kino wailua,
E kiloho ana ka uhane,
I ke aka o ke aniani,
MRS. KEKOA
Kanikau la he aloha,
Nou e Kananioewa,
Ke uwe hela mai nei,
Kahaolenui ke kupuna,
Aloha ino kuu moopuna,
Kuu hoa pupuu o ke anu,
O ke kau ma ka hooilo,
Mapu mai ana kou aloha,
Huihui i ko'u puuwai,
Hone ana i ko'u nui kino,
Loku ana i ka manawa,
Kou manawa paha keia,
O ka hele ana aku nei.
Haalele mai nei oe,
I ka nui i ka lehulehu,
I ka makua i ke kupuna,
Auwe kuu moopuna.
MRS. KAHAOLENUI.
Kanikau la he aloha,
Nou no e Kanaoioewa,
Aia paha ka uhane,
Iloko o ke ao uli,
Nana ana ko uhane,
I ko oho o ka palai,
Lipolipo i ka waokele,
Waianuhea i ka pali,
Pali mai nei ke aloha,
Kaumaha i kuu kino,
Luuluu launa ole,
Ka hele ana a kuu rose.
MRS. MAKAHONU.
Kanikau la he aloha,
Nou e Kananioewa,
Ke awe hela mai nei,
Kaope no he kupuna,
He aloha kuu moopuna,
I ka wai o Kulani,
A he lani nui ke aloha,
A'a e hiipoi nei,
Ke kau me ka hooilo,
I ke anu me ke koekoe,
Auwe kuu moopuoa e!
MRS. KIOPE.
Kalauao, Ewa, Sept. 20, 1875
KA BURT LAAU OLA!
NO NA
Mai loaa mai ana no ka holopono ole o ka ai iloko o ka Opu,
A me ka mea hooikaika i ke Akepaa!
O KEIA LAAU E LOAA MAI AI KE OLA A E PAKELE AI HOI!
He mea io no ia e pau ai na mai i loaa mai mamuli o ka Holopono ole o ka ai oloko o ka Opu,
Ka Paapu, na Io ulu wale,
Na waikahe wale mai, na mai Nalulu,
Na mai o ke Akepaa, a me
KA PONO OLE O NA PAAHANA O KA WAIHONA AI
E LOAA KOKE NO KA OLUOLU KE INU I KEIA MAI KA AKAhi a i ka eono omole, (e like me ka nui o ka mai, pela e nui ai ka laau).
He mea nui loa ka malama ana i ke kino iloko o ke kulana o ke ola maikai me ke kokua ana i ka mana o ka hooholopono ana o ka ai iloko o ka opu, a me ka hooikaika ana e puliki a e hoomau ma na hana e kokua ai i ke ola oluolu maikai, a mamuli o ia mau mea e makala ai na mea ino mai ke kino ae, me ka ai ole ana i na laau awaawa. I mea e maopopo ai, e lawe i ka Laau Ola a Burt, e loaa ai ka ikaika a me ka mea hoo. olaola o le akepaa, he LAAU noloko mai o na MEA KUPU. Ma ka ikaika o keia laau a me ka holo o ka hana maluna o na PAAHANA o ka WAIHONA AI, me ka hooikaika ana i ka opu a me ke kokua i na mea o ke kino, a ma ia wa no e kaawale aku ai na mai o ke akepaa, a ma ka hoonah kupno ana, e loaa mai ai ke oluoluma ka pau ana aku o na wai ino. Aole laau maikai e ae i ike ia, e like me ka Burt Laau Ola no na mai e loaa mai ana no ka holopono ole o ka ai iloko o ka opu, a me ka mea hooikaika i ke akepaa, a o lanakila nui no keia laau maluna o na mai i loaa mai no ka holopono ole o ka ai iloko e ka opu, ka paapu, na io ulu wale, ka wai kaha wale mai, a me na ino e pili ana.
He lehulehu ka poe i ike ole i ke kumu i hiki mai ai na wai no ka holopono ole o ka ai iloko o ka opu; a nolaila, ua manao ia he mea pono ke hoike aku, i kahi wa, ua loaa ka eha ma ka waha o ka opu ai ai, o ke kumu o ia, o ka holopono ole o ka ai iloko o ka opu, a lilo ia i mea pohapoha, loaa mai ka nalulu, ka wela o ka umauma, wela o loko o ka opu, ka umii ma ka aoao a iloko o ka umauma, ka mulea o ka waha, palani o ke alelo, awahia o loko o ka opu, ka hiamoe ole a me ka ono ole i ka ai, ka molohai, paupauaho. ka niua, ka moku honua, ka lia o ka ili, a o ka moku ana o na aa lolo. Nolaila, o na paahana a pau o ke kino i loaa i ka nawaliwali, ua loaa mai iamai ka holopono ole o ka ai iloko o ka opu.
O KA LAAU OLA A BURT, he laau ia e kipaku aku ana i na mea make; a o ka mea i loaa'i nei mau ano mai a hoomanawanui i ka ai ana no kahi manawa, o ke ola kona hope. Ina he paa ka mai o kahi a inu i keia laau, e loaa koke no ka oluolu maikai, a loaa no ke ola nou. O na ino a pau o ka io ulu wale, he ola wale, no ia i keia laau.
He nui na hoike e ola nei no ke ola ana i keia laau, mahope iho o ko lakou mai ana no kekahi mau makahiki, a i ka ai ana i keia laau ua ola koke. He hiki no hoi ke hoomaemae ia ke koko me keia laau ola a Burt, a pela no hoi na mai mawaho o ka ili, he lilo loa ia i ka ole ke ai i keia mea maikai. A he laau maikai no ma ka inu ana.
O keia laau, ua loaa mai ia mailoko mai o ke kuhikuhi a kekahi kauka Iapaau kaulana, nona ka lapaau ana i kona ohana iho, a ua loaa no ke ola maikai. Ke waihoia aku nei keia laau imua o ka lehulehu, me ka lana o ka manao e hahai ia ana no e na pomaikai na poe e ai ana, ina paha he nui ka mai, e ola ana no.
O KEIA LAAU A BURT, KA LAAU MAIKAI MA KE AO NEI, nolaila, he pono i na poe mai ke hoao i loaa ke ola. E loaa no keia laau ma ko makou Halekuai
KO KALEPONI LAAU OLA!
A ME KA MAI HANO.
DILLINGHAM & CO.,
720 1y Na Agena no ka Pae Aina Hawaii.
Lole Makepono ke Kuike!
E LOAA NO IA MA KAHI O
KAKELA ME KUKE,
---E LAA NA---
AHINAHINA,
KALAKOA,
KEOKEO,
LEPONALO,
Pena, Aila, Aniani,
Na Mea Piula,
Kopa, Aila Honna,
Aila Hoomaloo,
Kui Kakia, Pakeke,
Tabu, Kaula, Noho lio,
Hulu-palaki, na Pulumi.
A he Agena no hoi no na Mokupuni o Ha-
waii nei no na
LAINAKINI-NAO,
LAINAKINI-MAOLI,
PALULU KALAKOA,
ALAPAI, KELEPA, KILISA,
Na Lole kupono i ka wawae,
Palulu Huluhulu,
Na Lole Huluhulu,
Na Lole no ka hoohehelo ana
Lipine, lihilihi, a me ia mea'ku
---A HE---
MAU MEA AI KAHI
Ka Palaoa, Kopaa,
Reiki, Pia, Hoohu,
Paakai, Huaala,
Pia Kulina, &c
---A HE---
LAAU LAPAAU KAULANA LOA
A Dr. JAYNES.
Laau Kunu,
Laau Hoomaemae Koko,
Laau hoopau naio,
Penikila, Hunale,
A me na Laau Hamo, a pela'ku.
707 ly 759
EIA KA MANU HOU
EIA KA MANU HOU
HE BUKE MELE HOU NONA KA INO
"Robina Gula,"
ua 110 ka nui o na mele haipule a hoonanea o keia Buke Hou.
He 15 keneta no ke kope, a i ole la, he $10 no ka 100 kope E kuuai ia e H.M. WINI.
NO KE KUAI
BERENA PAILATA
makepono.
BERENA PULUKAI
ai a ka Moa.
PAAKAI o KAKAAKO,
ma ke eke a tona paha.
WAHIE o ke ano maikai, oki a liilii ke
makemake.
NA POHAKU, Pou.
KIMO PELEKANE
Jas L Dowsett
Kihi o Alanui Moiwahine a me Papu. 7093m 721
KA B. H. LAIANA
LAAU LAPAAU AWILI OLA.
A o na mai ino, e laa ka
Rumatica,
Ka Hano,
Ka hui o ke kino,
Ke pohapoha o ka ili,
Nawaliwali o ke kino,
Na mai wahine,
Na mai o ka puu, ke ake a me ka puuwai!
E nana i ke kuhikuhi.
E loaa no ma ka Hale Kuai o
Dilinahama ma,
Agena.
Honolulu, Oct 6, 1874. 7093m 721
KA NUPEPA KUOKOA
E HOOPUKA MAU IA MA HONOLULU,
I KELA POAONO KEIA POAONO
$2.00 no na mahina Umikumamalua
$1.00 " " " Eono.
ME KA HOOKAA MUA MAI.
NA OLELO HOOLAHA--aole e oi mamua o 10 laina no ka hoopuka hookahi ana, $1.00; alua puka ana he $1 50 hookahi malama, $2.00. E UKU MUA ia mai ke dala o na Olelo Hoolaha e hoounaia mai ana e pai.
O NA UKU A PAU E HOOKAA MUA MAI NO--aole e kau la ka inoa o kekahi haole a kanaka maoli paha. ma ka inoa o ka poe lawe pepa ke ole e hooka e mai mamua. E pono e hiipoiia keia mau rula. no ka mea, he emi no ka auhau no keia nupepa.
AIA KE KEENA O "KE KUOKOA" MA KA HALE LETA HOU.
H.M. WINI,
Luna Hoopuka.