Ka Nupepa Kuokoa, Volume XIV, Number 38, 18 September 1875 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

Ka Nupepa Kuokoa

HE HIMENI

LIVE FOR SOMETHING

Songs for to day, p 91.

1.

Hana mau, mai noho wale,

Imi no i hana nau,

Ma ke kula, ma ka mala,

Hana no a oli mau,

Pau, a pau ke @kuaakana,

Pale i ka molowa,

Nui no na hana pono,

Hana oe a pau kou la.

Cho. - Hana mau, mai noho wale,

( Na lalani mua eha.)

2.

Hoopomaikai i na hoa,

Hoomama i na @luuluu,

Lulu i na hoa aloha,

Hoona i ka poe u.

Nauwe oe me ka oli,

Hoohauoli ia hai,

Ina no he hoa i haule,

Kii a e hoala mai.

Cho. - Hoopomaikai i na hoa, &c.

(p2 na lalani mua eha.)

3.

E hoolako i na hune,

E ao i na naaupo;

Lulu i na huna lama,

Ma ke ala hele ou.

Hana mau, mai papauaho,

No na hoa, no Iesu.

A pau ae na hana aloha,

Loaa mai ka uku mau,

Cho. - E hoolako i na hune, &c.

(p3, na lalani mua eha.)

Hawaii.

 

HAAWINA KULA SABATI.

HELU 1. SABATI, OKATOBA 3.

KUMUHANA - Kaulia 'na o Iesu iluna.

PAUKU BAIBALA - IOANE 12:23-33

            23 Olelo mai o Iesu ia lakou, i maila, Ua hiki mai ka hora o hoonaniia'i ke Keiki a ke kanaka.

            24 Oiaio, he oiaio ka'u e olelo aku nei ia oukou, Ina e make ole kekahi hua palaoa i haule ma ka lepo, ina ua waiho hookahi wale no ia; aka, ina e make ia, e hua nui maai no ia.

            25 O ka mea makemake nui i kona ola, e lilo aku no ia: aka o ka mea hoowahawaha i kona ola ma keia ao, e ola mau loa ako no ia.

            26 Ina e hookauwa mai kekahi na'u, e hahai mai ia ia'u; a ma ko'u wahi e noho ai, malaila pu no hoi ka'u kauwa: ina e hookauwa mai kekahi na'u, hoomaikai ka Makua iaia.

            27 Ano ua kaumaha kuu naau, a heaha ka'u e olelo aku? E ka Makua, e hoopakele ia'u i keia hora? aka, no keia mea i hiki mai nei au i keia hora.

            28 E ka Makua, e hoonani i kou inoa. Alaila pau mai la ka leo mai ka lani mai, Ua @, hoonani hou iho no hoi au.

            29 I ae ia ka poe kanaka e ku ana, a e lohe ana, @ ia. Olelo ae la kekahi poe, Ua olelo mai kekahi anela iaia.

            30 Olelo mai la o Iesu, i mai la, Aole no'u i pae mai ai keia leo, aka, no oukou no.

            31 Ano e hoohewaia ai ko keia ao; ano e kipakuia aku ai ke alii o ko ke ao nei.

            32 Ina e kaulia au iluna, mai ka honua aku, e kauo auanei au i na kanaka a pau io'a nei.

            33 Olelo mai la oia i keia, hoomaopopo ana @ ano o ka make e make ai oia.

Pauku Gula. Pauku 32.

@ Leo - Hosana @:

1          Aloha au ia Iesu,

Inoa maikai e,

A na anela i na mele,

A o hosana mai;

Iaia la e oli nei,

A noho au ao la,

Me kona mau wawae.

            Pule hoomaikai i ke akua no ke komo ana iloko o keia hapaha hope o ka makahiki, a e noi aku iaia e kokua ma na Kula Sabati.

NA NINAU A NA KUMU

            P 23. Aia mahea Iesu? Owai ka poe makemake e ike iaia? Owai ka i hai aku ia Iesu no keia poe Helene? Pehea ka lewa pane ana? Ka hora hea kai hiki mai? Ka hora e hoonaniia'i owai? Ma ke aha e hoonaniia'na Iesu? Ma kona make a ala hou ana a lilo i alii, i Hoola no ko ke ao nei. Ehia la makahiki mai ka wa i wanana mau ia'i a hiki i ka wa e hookoia'na? 4000 a oi.

            P 24. E haohao ana, e hoole ana, e hoohalahala ana kekahi poe i ka lohe ana e make ana Iesu ka Mesia, pehea Iesu i wehewehe ai ia pohihihi? Pehea ka hua palaoa i haule ma ka lepo ke make ole? Lilo paha i mea ole. Pehea hoi Iesu ke make ole oia? A make ka hua palaoa ma ka @lope pehea? kupu mai, ulu ae, hua mai a nui. A make Iesu pehea? E ala hou ana, a lilo i mea nui.

            P 25. Owai ka poe makemake nui ana i ke ola kino? Ka poe paulele nui i ke kino, minamina, makau i ka hoomaauia, i ka pep@ no ka malama ana ia Iesu. A, pehea ko lakou ola? lilo ao, make no ke kino, make hoi ka uhane. Owai ka poe hoowahawaha i ke ola kino? Ka poe malama nui ia Iesu a makou ole i ka make nona. Pehea hoi ko lakou ola? Nana ia Mataio 10:39. 16:25. Luka 9:24. 17:33.

            P 26. Heaha ka pomaikai o ka poe hookauwaia na Iesu, a hahai mamuli ona? Ma hea ko Iesu wahi? Ioane 14:23. 17:24. I Tes. 4:17.

            P 27.-30. Ko Iesu kaumaha, heaha ke kumu? nona iho anei? Keia hora, ke hora aha ia? Ka hora o kona make ana. Heaha kona ninau iaia iho no ke ano o ka pule? E pule anei au i ka makua e hoopakele i ka hora make? Aole paha. Ua hele mai nei au i keia ao e make, a ua hiki mai hoi ka wa make. A pule oia pehea? E ka Makua, e hoonani i kou inoa ma ka mea au e hana mai ana ia'u. A pehea ka Makua i pane mai ai? A lohe na kanaka i ka mea ano leo, kuhi lakou heaha? He hekili, he anela. Nawai i pane mai ai ia leo, wahi a Iesu? He leo hoolana i ka makemake o na haumana, a o ka poe i makemake a ike ia Iesu.

            P 31. Ano e hoohewaia'i ko keia ao, he aha ke ano? Elua paha ano. 1 Ma ko Iesu make ana, ua maopopo, ua hoahewaia na kanaka a pau o keia ao e make, pono no ke make lakou no ko lakou hewa. E kau ana hoi ka hoahewaia maluna o ka poe e kokua ana e pepehi ia Iesu. 2 Ma ko Iesu make ana e pakele ai i ka hoohewaia ka poe i manaoio ia Iesu, a make ka poe manaoio ole. Ano e kipakuia ai ke Alii o ke ao nei. Owai ia alii? ka diabolo kona kipakuia'na heaha ia? E kipakuia ana oia iwaho o keia ao. Ua kipahu ia oia mawaho o ka lani mamua no ka kipi ana, a hoohaunaele i ka lani. Eia hoi oia ma ke ao nei e kipi ana, e hoohaunaele ana, e imi ana e kinai i ka pono e pepehi i ka poe pono, e huki i na kanaka ilalo i ka po. Aka, e paopaoia ana kona poo, e kipakuia ana i waho o ke ao, Hoik. 12:9,10. 20:1,2,3.

            P 32, 33 lua kaulia Iesu iluna, heaha ia? kona make ana ma ke kea; He mea ahaia? he mea mana, he mea e kauo ai i na kanaka i o Iesu la. O ka hai ko Iesu make ma ke kea ma kela a me keia wahi, oia ka mea e huli nui ai kanaka ma ka pono, e like me ka Penetekona. Oih. 2: a ma Hawaii nei no hoi. Nana ia Ioane 3:14,15.

Mele Him. 29 8-7 Leo Hawaii.

He aloha ko Iehova

Ina kanaka a pau,

Hai mai oia i ke ola,

Olioli no kakou,

Luaole ke aloha

O Iehova ia kakou.

NA NINAU A KE KAHU

            Na Makua. Ke kumuhana, heaha? Ka pauku gula heaha? Pehea e hiki ai ia Iesu ke kauo i na kanaka, i na kamalii, i ona la? Ma owai la e hiki ai? Pono anei ke noho wale na haumana? Noho wale anei Petero ma, Paulo ma? Ehia hana pili ia oukou? Pule-kokua-haiolelo-hele.

            Na Keiki. Ua kaulia Iesu mahea? i mea aha? Pehea e hiki ai ke ola ma o Iesu la? Ina minamina oukou i na mea o keia ao, minamina i ke ola kino, makau i na pilikia, i na luhi, i na ino no Iesu, ola anei? Ina make ka uhane no ka malama ole ia Iesu, ola hou anei?

            Ke Kula a pau. Owai ke alii o keia ao? E aha ia ana? Ma ke aha? Nawai e kokua i kipaku ana?

Himeni 488. 807. Leo Aia hoi.

            Auhea la ka mana hiki

Ke hoohuliia mai

Ko na aina pouli wale,

A loaa ka pomaikai?

Nou ka mana, e ka uhane,

Nou ka mana, e huli ai.

            Pule i hiki wawe mai ka huli nui ana o kanaka mamuli o Iesu.

HAAWINA KULA SABATI, Oct. 10. Ioane 12:1-9. Pauku Gula, Pilipi 2:5.

Hawaii.

KA POPILIKIA.

O ka manawa ou e ke kanaka

He hapa wale no kou mau la,

A ua piha pono i ka ino

A me ka Popilikia. - HUAA.

            INA e hahai ana ka popilikia mahope o kekahi mea, o kana ukali loloa iho la no ia ma na wahi a pau o ke ao nei. Aia i kekahi wa kahiko, ua ili maluna o kekahi kanaka ka haawe a ka ilihune. Ua auwana hele ia ma na kuaaina mai kahi ona i noho mau ai, e imi pomaikai, aka, loaa no iaia kahi hana, no ka nui uhauha neo no. I kekahi la, iloko o kona wa maka @poaiuaia ai ole, komo aku la ia iloko o ka ululaau e lapulapu wahi wahie ai. Iaia i hapai ae ai i kana koi e oki, ike aku la ia i ka pua holoholona hihiu e hele mai ana, nolaila, haalele ino iho la ia i ke koi a holo mama aku la no ka makau. Iaia e holo ana, hiki aku la ia i kekahi alahaka; a iaia i hehi iho ai maluna o ke alahaka, aina ae la na koo a haule iho la iloho o ka wai. Heaha la kana hana? Ina i ku malie iho, ina no ua pau i ka holoholona hihiu; nolaila iloko o kona pihoihoi, lele aku la ia iloko o ka wai, a no kona ike ole i ke au, hoomaka iho la ia e pi-bopi-ba. Aka, mamuli o ka ulia, ike mai la he elua mau kanaka lawaia ma kela aoao o ke kahawai, au mai la hookahi o laua a lawe aku la ia ia nei ma ka aoao o kekahi pa pohaku e olala ai. Aka, iaia i hoi hou mai ai kona ikaika a e hoomaka ana e aloha aku i na lawaia, o ka hiolo mai la no ia o ka pa pohaku a pepe liilii loa iho la.

MAKE I ALOHA IA.

Ma ke kahahiaka o ka la 27 o Aug. AD 1875. Make iho la o Maria, he wahine i aloha nui ia, he heahea, he hookipa, he malama keiki. Ua hanau ia oia i ka AD 1845; ua loaa iaia na makahiki piha 30; ua waiho iho oia ia makou i kaukana luuluu he aloha. Nolaila, ua haku iho makou i wahi kanikau nona.

Kuu makuahine mai ka la wela o Makaha,

Mai ke kula wela la e Kuemakahina;

Aloha ka lau la e Kuemakahina.

Mai ke kai lana malie la e Kahaloko.

Oia kai a kaua e hele ai;

Kuu makuahine mai ka wai kapipi la i ka ili,

Oia wai huna lepo ke inu aku;

Kuu makuahine o ka hale makua nui,

Hookahi makua e noho nei o ko aloha;

Aloha ka ia lamalama la i ka pali.

Na ka laau me ke kaula i lawe mai,

Oia ia hooluhi mai i ke kino,

Kuu kino kai pulu i ko aloha,

Au-we! kuu makuahine-e.

            M AOAOLOA.

Kuu makuahine mai ke kula e Hiwaili,

Me ke kehau anu la e Kaala;

ALoha ka lae la e Kepuhi,

Me ke kahai palila e Kaheka,

Oia pali a kaua e noho ai;

Aloha ka pali la e Kealahina,

Me ke ala pali e Pahau,

Oia pali a kaua e noho ai;

Kuu makuahine mai ke ala kuukuu i ka pali,

He kaula ke ala e hiki ai

Hiki mai no ko aloha e uwe no au;

Aloha ka ia waha nui o ka aina,

Oia ia kahea mai i ka pali,

Aia ka hiki ana i ka pili o ke ao,

Au-we! kuu makuahine-e.

            G M KANEAPUA

Kuu makuahine mai ka la ikiki o Hiwaili,

Oia kula panoa a kaua e noho ai,

Aloha ka ihu o ka Bipi i ka hanu mai i ke kula,

Me ka maka o ka palau i ka eku mai i ka lepo,

Oia kula wela a kaua e hana ai;

Kuu makuahine mai ke kai hone mai la i ke one,

Mai ka ia hukihuki la i ka lima;

Aloha ka nalu hai muku la e Maihiwa,

Me ke one loa la e Kahihi,

Oia one a kaua e noho ai;

Aloha ka wai la e Kaanalike,

Oia wai haluku mai i ke kino.

Kuu kino kai haluku i ko aloha,

Au-we! kuu makuahine-.

            L KALUNA

Kuu kaikuahine mai ka la wela o ka Makalii

Mai ka ua anu la o ka hooilo;

Aloha kawai la o Waihonu,

Oia wai a wili pu me ke kai;

 Aloha kai-a lamalama o ka aina,

Oia ia haaheo mai ka maka;

Aloha ke kula la e Hiwaili,

Oia kula a kaua e hana ai,

Hoolaukanaka i ka leo o ka huipa;

Aloha ka lau o ka niu holu i ka makani,

Me ke one la la e Niuiole,

Oia one a kaua e noho ai;

Aloha kai-a ka mokoi i ka pali,

Na ka pauka me ka poka e lawe mai;

Aloha kai-a haha lima o ka aina,

Me kai-a uhai a holo i na pali,

Oia ia mahikihiki mai i ke pa;

Kuu pokii mai ka ai lauoho lolo o ka aina,

Oia ai hoomalule mai i ke kino.

Kuu kino kai luuluu i ko aloha;

Aloha ka ua kuahine o Waiula,

Ke halii mai la la i kanahele,

Hele aku la oe i ke ala ula a Kane,

Me ke ala aloha lua a Limaloa,

Au-we! kuu kaikuahine-e.

            G B KAINANU.

 Kuu kaikaina mai ke kula hana la e Hiwaili,

Aloha ia kula a kakou e luhi ai;

Kua kaikaina mai ka wai hukakai la e Koula,

Aloha ia wai a kaua e auau ai;

Kuu kaikaina mai ka ia pakui i ka pali,

Na kehu o ke kai kaua e hoopulu mai,

Pulu au maeele i ko aloha;

ALoha ka ia hopuhopu lima o ka aina,

Me ka i-a lamalama ia i ke one,

Kuu kaikaina mai ke kai hawanawana e Niniole,

Oia kai a hana e lawaia ai,

Na ke aho a me ka makau ka i-a e lawe mai,

Aia ka hoina i ka alu ana o ke ahiahi,

Hoolaukanaka i na keiki;

Aloha ka lae o ahiu i ke kai,

Me ke one loa la o ili,

Oia one a kaua e hele ai;

Kuu kaikaina mai ka la wela o Kahaloko,

Mai ka piina loa la e Puuiki,

Oia kula a kaua e hele ai,

He iki ke aloha paila i ke kino,

Luaiele ia loho e noho nei;

Aloha ka piina ikiiki e @Kahakumaka,

Hoomaha aku kaua i ka olu o Halerose,

Au-we! kuu kaikaina-e.

            L KAHAWAII

Kuu kaikuahine mai ka @hauana la o Kaula,

Mai ke ohu haliilua mai i kanahele,

Hele aku ia oe i ke ala hoi ole mai,

I kahi hiki ole ia'u ke a ua aku;

Kau kaikuahine mai ka wai @huilua la e ka Mapuna,

Oia wai halii loa mai i ka lau o ke kuikui;

Kuu kaikuahine mai ka i-a haha i ke kahawai la he oopu,

Hookahi upena o na lima;

Kuu kaikuahine mai ka i-a leo nui o ua @palila he kao,

Na ka leo o ka poka i kii aku,

Oia wahi a kaua i hele ai;

Kuu kaikuahine o ka lau lipolipo o ka inia o Laukinui,

Ke hulilua mai la i ka makaoi,

Oia wahi a kaua i noho ai,

Ipili ai i ka ua me ka makani,

I ke anu me ke koekoe,

Kuu kaikuahine mai na la lealea la o Halerose,

Oia wahi a kaua i pili ai,

Kuu kaikuahine  o ka la wela ulili la e Hiwaili,

Oia wahi a kaua i noho'i me na keiki

Kuu kaikuahine o ka makaoi ana la o Kolokalina,

Ke nihi kokolo ae la i na pali;

Kuu kaikuahine o na mea 'la o ke kuahiwi,

Aala ka mokihana noho i Kaula,

Aala ke kupukupu i ke kula o Lihue,

Aala ka iliahi i noho i kanahele,

Aala ka lauae noho i na pali,

Aala kamaile laulii o Koiahi,

Aala ka lipoa i ka ili o ke kai,

Aala ka wai rose na ka haole ia,

Au-we! kuu kaikuahine-e.

            T. KANI.

Kuu aikane i ka makani hulilua o Makaha,

Oia la wela a kaua e noho ai,

E hoolohe aku ai kaua o ka nehe mai a ke kai,

Akahi la a ko aloha i hiki mai ai,

HIki mai no ko aloha e uwe no au;

Kuu aikane mai ke kula loa o Kumanomano

Oia kula loa a kaua e lei ui me koluhi,

Kuu makamaka o keia aina makamaka ole,

Hookahi makamaka o oe o ke aikani,

Kuu hoa kulolia o ka po loloa o ka Hooilo,

Hoolaukanaka i ka leo o na keiki;

Kuu aikane mai kahi wai awili pu me ka lepo,

Oia wai hauna lepo ke inu aku;

Kuu hoa hele o ka olu o ka niu o Poka-i,

Mai ka makani kaiaulu la o Waianae,

Aloha ahiu i ke ahe lau makani uaulu,

Aloha ke one o Niniole i ke ehu kai,

Oia one kaua e hele ai,

Aloha ka lae o Kaneilio au i ke kai,

Aloha Monikahaae ka olali o ka laeloa,

Aloha ka huikau lua o Ulakoheo,

Aloha na alanui kapekepeke o Kuwili,

Me kahi wai la o Keawehala,

Aloha o Kapalama i ka makani hoolua,

Me ka opae mahikihiki o Pahau,

Au-we! kuu aikane-e.

            A. NAWILIOKALANI.

Aloha mai ke hoa he wahine,

Kuu wahine i ka ua peepee ua,

Ua halii mai i ke pili o ka aina,

Aina kehau koekoe anuanu,

Ua anu au ua hele oe, auwe!

Ua hele ka paku ke alai,

Ke ko-koolua o kahi pilikia,

O ka imi pu ana i na pono kino,

Auwe no hoi! kuu hoa he wahine,

Mai ke'lo o na hanau mua o kaua,

A kaua e no-no-noho ai-a,

Ua piliia hoi na wahi a paum

Ua pii ia na mauna pali kiekie,

Na pali lae lua o ka aina e waiho nei,

E holoholo ai iuka i kai,

Iluna ilalo i ke a-lu kahawai,

He kao ka i-a mana nui,

Ka i-a holehole iwi o ua aina nei,

Auwe! Ke uwe hoomaha ole nei au ia oe,

Ke pai-auma nei i o ia nei,

E hopu ana i ka i-a he alamihi,

Ua mihi au i ka hele o kuu wahine,

I ka lilo i ka ulaia a ka make,

Noho aku la i kaulu makani,

I ka ulu ohia loloa o Panaewa,

Ua maewaewa au e noho nei,

Ua kuewa i ke ala me ka wai-maka,

AUwe! O kuu mea aloha he wahine,

Kuu hoa pupuu hoi o ke anu,

Oia oka anoano wao kanaka ole,

Hoolaukanaka i ka leo o na manu,

I ka uhene a-ka he-he i ka pua lehua,

Huli aku kaua nana ia Kaala,

Ia ka halii mai a ka ohu i na pali,

He pali lele ka-ke aloha e ikea nei,

Ka hai malule i ke kino a luhi,

Eha maeala loku i ka iwi,

Auwe! Oia 'loha i ka ua ula ua hala,

Ua hele kuu wahine a-lo-alo ua,

A-lo makani holo pali o ka aina kula,

O ka aina kuleana ole ke noho,

Hookahi no kuleana o na limalima,

I noho hoomanawanui ia a kaua,

Me kuu wahine i ka la nui hao-a enaena,

O ka la ko luna a maua ko lalo,

Haawe mai hoi na keiki ma ke kua,

Ki aku peti mai hoi na bipi,

O ka ihu o ka palau ka hoa olelo,

Auwe! kuu wahine i ka hale kai olalo e,

He kai halihali one, he moena e moe ai,

Moe aku hoolono o ka ne mai a ke kai,

I ka hawanawana mai hoi me he kanaka la,

Aloha ka i-a lamalama o ka aina,

Ka i-a hoahoa mai i ka ili me he kui la,

A pa iho i ka lima la lele,

Auwe! kuu wahine i ka makani kaiaulu,

E wehe mai ana i ka lau o ka niu,

Maha i ke aheahe a ka makani Koolau,

He lau he kini he mano ke aloha e hana nei,

Kuu wahine i ka ihu o ka lio,

I hele ai kaua a puni ka moku,

Ike i ko-a mokumoku o Heeia,

A me ka uka anu o Kaliuwaa,

Pae mai i ke ehu kai o Waialoa,

Au ana ka lae o Kaena i ke kai,

E hoi ana i ka pohu o ka aina,

I kou one apaa one hanau,

O Makaha ka aina ua la-i,

O Laukinui i ka home e noho ai,

Auwe! O kuu ipo'loha aole ae nei,

Ua huna i na maka ua pee,

Ua hele i ke'la malie ole mai.

            GABERIELA.

 

KA BURT LAAU OLA!

NO NA

Mai e loaa mai ana no ka holopono ole o ka ai iloko o ka Opu, A me ka mea hooikaika i ke Akepaa!

O KEIA LAAU E LOAA MAI AI KE OLA A E PAKELE AI HOI!

He mea io no ia e pau ai na mai i loaa mai mamuli o ka

Holopono ole o ka ai iloko o ka Opu,

Ka Paapu, na Io ulu wale,

Na waikahe wale mai, na mai Nalulu,

Na mai o ke Akepaa, a me

KA PONO OLE O NA PAAHANA O KA WAIHONA AI

E LOAA KOKE NO KA OLUOLU KE INU I KEIA LAAU MAI KA AKAhi a i ka eono omole, (e like me ka nui o ka mai, pela e nui ai ka laau).

            He mea nui loa ka malama ana i ke kino iloko o ke kulana o ke ola maikai me ke kokua ana i ka mana o ka hooholopono ana o ka ai iloko o ka opu, a me ka hooikaika ana e puliki a e hoomau ma na hana e kokua ai i ke ola oluolu maikai, a mamuli o ia mau mea e makala ai na mea ino mai ke kino ae, me ka ai ole ana i na laau awaawa. I mea e maopopo ai, e lawe i ka Laau Ola a Burt, e loaa ai ka ikaikai a me ka mea hooikaika i ke akepaa, he LAAU noloko mai o na MEA KUPU. Ma ka ikaika o keia laau a me ka holo o ka hana maluna o na PAAHANA o ka WAIHONA AI, me ka hooikaika ana i ka opu a me ke kokua i na mea o ke kino, a ma ia wa no e kaawale aku ai na mai o ke akepaa, a ma ka hoonaha kupono ana, e loaa mai ai ka @aluela ma ka pau ana aku o na wai ino. Aole laau maikai e au i ike ia, e like me ka Burt L@ Ola no na mai @lone mai ana no ka holopono ole o ka ai iloko o ka opu, a me ka mea hooikaika i ke akepaa a e lanakila nui no keia laae maluna o na mai i loaa mai no ka holopono ole o ka ai iloko o ka opu, ka paapu, na io ulu wale, ka wai kahe wale mai, a me na ino e pili ana.

            He lehulehu ka poe i ike ole i ke kumu i hiki mai ai na mai no ka holopono ole o ka ai iloko o ka opu; a nolaila, ua manao ia he mea pono ke hoike aku, i kahi wa, @a loaa ka eha ma ka waha o ka opu ai ai, o ke kumu o ia, o ka holopono ole o ka ai iloko o ka opu, a lilo ia i mea pohapoha, loaa mai ka nalulu, ka wela o ka umauma, wela o loko o ka opu, ka umii ma ka aoao a iloko o ka umauma, ka molea o ka waha, palaai o ke alelo, awahia o loko o ka opu, ka hiamoe ole a me ka ono ole i ka ai, ka molohai, paupauaho, ka niua, ka moku honua, ka lia o ka ili, a o ka moku ana o na aa lolo. Nolaila, o na paahana a pau o ke kino i loaa i ka nawaliwali, ua loaa mai ia mai ka holopono ole o ka ai iloko o ka opu.

            O KA LAAU OLA A BURT, he laau ia e kipaku aku ana i na mea make; a o ka mea i loaa'i nei mau ano mai a hoomanawanui i ka ai ana no kahi manawa, o ke ola kona hope. Ina he paa ka mai o kahi a inu i keia laau, e loaa koke no ka oluolu maikai, a loaa no ke ola hou. O na ino a pau o ka io ulu wale, he ola wale no ia i keia laau.

            He nui na hoike e ola nei no ke ola ana i keia laau, mahope iho o ko lakou mai ana no kekahi mau makahiki, a i ka ai ana i keia laau ua ola koke. He hiki no hoi ke hoomaemae ia ke koko me keia laau ola a Burt, a pela no hoi na mai mawaho o ka ili, he lilo loa ia i ka ole ke ai i keia mea maikai. A he laau maikai no ma ka inu ana.

            O keia laau, ua loaa mai ia mailoko mai o ke kuhikuhi a kekahi kauka lapaau kaulana, nona ka lapaau ana i kona ohana iho, a ua loaa no ke ola maikai. Ke waihoia aku nei keia laau imua o ka lehulehu, me ka lana o ka manao e hahai ia ana no e na pomaikai na poe e ai ana, ina paha he nui mai, e ola ana no.

            O KEIA LAAU A BURT, KA LAAU MAIKAI MA KE AO NEI, nolaila, he pono i na poe mai ke hono i loaa ke ola. E loaa no keia ma ko makou Halekuai.

 

KO KALEPONI LAAU OLA!

A ME KA MAI HANO.

DILLINGHAM & CO.,

720 ly              Na Agena no ka Pae Aina Hawaii.

Lole Makepono ke Kuike !

E LOAA NO IA MA KAHI O

KAKELA ME KUKE,

E LAA NA

AHINAHINA, KALAKOA, KEOKEO, LEPONALO,

Pena, Aila, Aniani, Na Mea Piula, Kopa, Aila Honua, Aila Hoomaloo,

Kui Kakia, Pakeke, Tabu, Kaula, Noho lio, Hulu-palaki, na Pulumi.

A he Agena no hoi no na Mokupuni o Hawaii nei no na

LAINAKINI-NAO, LAINAKINI-MAOLI, PALULE KALAKOA,

ALAPIA, KELEPA, KILISA,

Na Lole kupono i ka wawae, Palule Huluhulu, Na Lole Huluhulu,

Na Lole no ka hoohehelo ana

Lipine, lihilihi, a me ia mea'ku

A HE

MAU MEA AI KAHI

Ka Palaoa, Kopaa, Raiki, Pia, Hoohu, Paakai, Huaala, Pia KUlina, &c.

A HE

LAAU LAPAAU KAULANA LOA

A Dr. JAYNES.

Laau Kunu, Laau Hoomaemae Koko, Laau hoopau naio, Penikila, Hunale, A me na Laau Hamo, a pela'ku.

707 ly 758

 

EIA KA MANU HOU

HE BUKE MELE HOU NONA KA INOA

"Robina Gula,"

ua 110 ka nui o na mele haipule a hoonanea o keia Buke Hou.

He 13 keneta no ke kope, a i ole ia, he @19 no ka 100 kope. E kuai ia e @3m 504 H.M. WINI.

NO KE KUAI

BERENA PAILATA

makepono.

BERENA PULUKAI

ai a ka Moa.

PAAKAI o KAKAAKO,

ma ke eke a ton paha.

WAHIE o ke ano maikai, oki a liilii ke makemake.

NA POHAKU, POU.

KIMO PELEKANE @Dowsett.

Kihi o Alanui Moiwahine a me Papu. @

KA B. H. LAIANA

LAAU LAPAAU AWILI OLA.

A o na mai ino, e laa ka

Rumatica, Ka Hano, Ka hui o ke kino, Ke pohapoha o ka ili, Nawaliwali o ke kino, Na mai wahine, Na mai o ka puu, ke ake a me ka puuwai!

E nana i ke kuhikuhi.

E loaa no ma ka Hale Kuai o Dilinahana ma, Agena.

Honolulu, Oct 6, 1874. @

 

KA NUPEPA KUOKOA

E HOOPUKA MAU IA MA HONOLULU,

I KELA POAONO KEIA POAONO

$2.00 no na mahina Umikumamalua

$1.00 " ""         @E.

ME KA HOOKAA MUA MAI

NA OLELO HOOLAHA - aole e oi mamua o 10 laina no ka hoopuka hookahi ana, $1.00; alua puka ana he $1.50 hookahi malama, $2.00. E uku mua ia mai ke dala o na Olelo Hoolaha e hoounaia mai ana e pai.

O KA UKU A PAU E @MOEKAA MUA MAI NO - aole e kau la ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono e hiipoiia@ keia mau @mia, no ka mea, he emi no ka auhau no keia nupepa.

AIA KE KEENA O "KE KUOKOA" MA KA

HALE LETA HOU.

            H.M. WINI.

            Luna Hoopuka.