Ka Nupepa Kuokoa, Volume XIV, Number 34, 21 ʻAukake 1875 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

HE HIMENI
TEACHERS SONG.

Song of to day p 90.
1.
Palau ka mea mahiai,
Hoowali a maikai,
Hoowaha no ke kanu ae,
Hookahe i ka wai.
Pela ke kumu e hana'i,
A mahi me ka uhane e.
Ho, ho!---ho, ho!
[:He mahi oi nei:]
2.
Ka mea lalo, a kanu no
Ma kona mala ai,
Kii i ka hua a lulu,
Lulu ma o, maanei.
Pela ke kumu, lawe no
Ka hua o ka naauao,
Ho, ho!---ho, ho!
[:A lulu no a mau:]
3
Ka mea ohi, lawe ae
I kona pahi e,
A oki, ohi, a pua'e
Pua a nui ae,
Pela ke kumu, ohi ae
Na hua na ka Uhane nae.
Ho, ho!---ho, ho!
[:Na hua maluna'e:]
4.
Ao no ke kumu, ao a mau,
Ao no a po ka la,
Ao ma ka heluhelu no,
A ma ka P--a--pa.
Ao ma na kula aupuni nei,
A ma na Kula Sabati.
Ho, ho!---ho, ho!
[:Ao no i ola mau:]
Hawaii.

 

HAAWINA KULA SABATI.

HELU 10. SABATI, SEPAT. 5.

KUMUHANA---Iuse ka malamalama o ke ao nei.
PAUKU BAIBALA---IOANE 9: 1-11.

A I kona hele ana ike no ia i kekahi kanaka i makapo mai ka hanau ana mai.
            2.  Ninau aku la kana poe haumana iaia, i aku la E Rabi, owai ka i hewa, oia nei anei, a o kona mau makua anei, i hanau makapo mai ai ia?
            3  I mai la o Iesu, Aole i hewa oia nei, aole hoi o kona mau makua : aka, o ka mea ia e ikeia'i na hana a ke Akua iaia.
            4  He pono no'u e hana i na hana a ka mea nana au i hoouna mai, oiai ka la; e hiki mai auanei ka po, aohe kanaka e hiki ke hana ilaila.
            5  Ia'u e noho ai i ke ao nei, owau no ka malamalama o keia ao.
            6  A pau ae la kana mau olelo ana ia mau mea, kuha iho la ia ma ka lepo, a hokahokai iho la i ke kuha me ka lepo, a hopala ae la i ka lepo ma na maka o ua makapo la;
            7  A i mai la iaia, E hele oe e holoi ma ka wai auau o Siloama, ma ka hoohalike ana, O ka hoounaia :  nolaila, hele aku la ia a holoi iho la a hoi mai la o ike ana.
            8  No ia mea, ninau ae la na hoalauna, a me ka poe i ike iaia mamua he makapo Aole anei oia nei ka mea i noho e nonoi ana?
            9  I mai la kekahi poe, Oia no ia; a o kekahi poe, Ua like oia me ia; aka, i mai la oia, Owau no ia.
            10  Nolaila, ninau aku la lakou iaia, Pehea la i hookaakaaia'i kou mau maka?
            11 Olelo mai la ia, i mai la, He kanaka i kapaia o Iesu, nana i hokahokai ka lepo a hopala i kuu maka, a i mai la ia'u, E hele i ka wai auau o Siloama, a holoi.  Hele akulau au a holoi, a loaa ia'u ka ike.
Pauku Gula.  "E hookaakaa mai oe i ko'u mau maka, alaila e ike aku au i na mea kupanaha noloko mai o kou mau kanawai."  Halelu 119:18.
            Mele Him. 131 8 palua.---Leo---Babulona.
            1  He poe auwana a lalau
            Kakou na kanaka a pau;
            Ua makapo a pouli no,
            E hele ana i ka po,
            Mahea la kakou e nana'i
            I loaa mai ke Alakai?
            E haka pono ia Iesu,
            Ka Hoku nani o ke ao.
            Pule no na wahi pouli, i hiki aku ka malamalama ilaila, &c.
NA NINAU A NA KUMU.

            P 1-3 I ko Iesu hele ana mai hea mai? a no ke aha hoi? mok 8:59 Heaha kana i ike ai ma ke alanui?  Mai hea mai ka makapo ana?  He kanaka opiopio anei?  he kanaka oo paha?  p 23.---Heaha ka ninae a na haumana?  He ninau aha ia?  He ninau lalau, a kuhihewa.  Heahe ke kuhihewa?---Pehea ko Iesu pane ana?  manao anei e hoole loa, aole i hewa na makua.  aole hoi i hewa na keiki? Aole paha Ua hewa no na kanaka a pau, na makua, na keiki.  Aka, aole ao ka hewa o keia mau makua, i hanau makepo ai ka laua keiki.  A no ke aha i hanau makapo ai keia kanaka?  Na hana aha a ke Akua ke ikeia maluna ona?  1  Kona hana mana, he mana ko ke Akua e hoohanao i ke keiki km ua maka ike, a maka ike ole.  2  Ko ke Akua aloha hoolilo ana i keia makapo i haumana na Iesu, i mea e hoonani ia'i Iesu, i mea e huli ai, e paulele ai, e hahai ai na kanaka ia Iesu.

            P 4 Heaha ko Iesu pono?  nawai oia i hoouna mai?  Heaha ia mau hana?  i ka wa hea e hana ai?  Oiai ka la, la aha keia?  ka wa pokole e koe ana no Iesu, no kona noho kino ana ma ke ao nei.  Pili hoi iaia kakou.  Pono ke hana i ka wa e ola'na ke kino.  O hiki mai auanei ka po, po aha keia?  ka wa e make ai ke kino; a make ke kino o Iesu, a o kakou hoi, aole hiki ke hanau hou me ke ola kino.
            P 5  Heaha ka Iesu olelo nona iho, mahea na pauku like?  mok. 1:5,9. 3:19. 8:12, 12:35, 46.  Iesu ka malamalama o ke ao nei i ka wa hea?  A pau ko Iesu noho kino ana ma ke ao, pau anei kona noho malamalama ana no ke ao nei? &c.  Pehea ka la ke napoo, aole anei e puka hou mai ana?

            P 6, 7  Ehia hana a Iesu i hana ai i kaakaa na maka o keia makapo?  1  Kuha ma ka lepo.  2 hokahokai i ke kuha me ka lepo  3 hapala i ka lepo ma na maka.  4 olelo e hele e holoi ma ka wai auau o Siloama.  Heaha ka hana a ka makapo?  1 ka noho malie, 2 ka ae i ka Iesu mau hana, aole oni ae, a pale ae, 3 ka hooko ana i ka Iesu olelo e hele, a holoi.  Heaha ka hope o keia mau hana?  Nohea kona ike?  nohea ka mana i ike ai?  He mana anei ke kuha, ka lepo, ka wai o Siloama?  lua he mana, nohea ka mana?  mai hea mai ka mana?  Siloama, heaha ke ano?  aia mahea ia wai?  Aia ma ka hikina o Ziona, o ke kumu nae, aia no ia malalo ae o ka luakini; kona wai, he hapa ono, ane like me ko kakou wai kai, he heahea ka wai.  Ua kapaia Hoouna, no ka mea, ua hoouna mai oia i kona wai mailalo mai o ka luakini.
            P 8-11  heaha ka ninau o ka poe i ike i keia makapo mamua, a mahope ua ike?  Ninau kekahi i kekahi, a olelo, o ua makapo la paha oia nei, a i ole he mea ano like no.  Ma ke aha i maopopo ai oia ponoi no ia?  Nana no i hai.  A ninau lakou iaia pehea?  A pehea kona pane ana?  p11.  Ua pau anei ko lakou kanalua?
            Mele---Mele hou  8-7 Leo Bently.
            1  Ma ka wai o Siloama,
            Auau no ka makapo
            Ma ko Iesu hoouna ana,
            Hoi me ka ike no.
            2  Ma na aina pouli wale
            Nui no na makapo;
            Ko lakou la Siloama
            Ka olelo a Iesu.
            3  Hoouna, e hoouna koke
            Ia olelo ia lakou,
            I lohea, a i ike,
            A pau ae ka makapo.
NA NINAU A KE KAHU.
            Na makua.  He mau keiki ka oukou, he mai, he lolo, he kuli, he makapo, he kuapuu, he naenae, heaha ke kumu, pehea e pau ai?  heaha ka pilikia nui?  Pehea e pau ai ka hewa, ke kolohe, ka hookuli, ka makapo o ka naau?  Mahea ka wai o Siloama e pau ai?
            Na keiki.  Pilikia anei oukou?  makapo, lolo, kuli  mai ma ke kino, ma ka uhane?  Heaha ka pono?  E nonoi aku ia wai?  Mahea e holoi ai?  Ahea hoi?  A paipai ia oukou, e mihi, e hele io Iesu la, e hahai mamuli ona, heaha ka pono?  E hookuli e hoolohe koke aenei?  Owai ka malamalama o ke ao nei?  Heaha ko oukou pono i ka wa e ola ana?  A make me ka mihi ole, hiki anei ke mihi mahope?
            Ke Kula a pau.  Na manao pili.  1 Hana mau oiai e kau ana ka la.  2 Hoopili mau ia Iesu ka malamalama o ke ao nei.  3 Hoouna aku i ka malamalama i na aina pouli.

Mele.  Him. 137. 7-Leo Rock of ages Hoku loa ano e, Lama no na aina a pau, Lilelile a maikai Hokuloa, Hoku mau, Kau iluna ma ke ao  E kokua ia makou.

Pule i ala a hoolohe ko na aina e i ka leo o Iesu.
            HAAWINA KULA SABATI, Set. 12 Ioane 10:1-11. PAUKU GULA, Isaia 40:11.
HAWAII.

 

HE AHULAU NUI MA AINAHAU.

            Ua hiki ae ma Ladana kekahi mea hou hoomokumokuahua naau i ka la 12 o Iune, e olelo ana penei:  Kokoke paha e aono hebedoma i hala aenei, ua haule iho na lehu ahi a me na momokuahi pio ma ka aoao akau loa o Norewai, e uhi paa ana maluna o ka aina he mau kapuai ka hohonu Ua hoomaopopoia ma ka hu'i ana, o keia mau huna lehu i haule mai, ua lele mai ia mai ka aoao komohaoa mai me he mau ao la e ponaha ana maluna o ka eo, he mau lehu ahi pele no ia.  Ia wa, na hapaiia kekahi manao malia paha, ua aleale ae la ka lua pele o Mauna Hecla ma Ainahau.  Ua hoounaia he mokuahi mai Kopenahegena aku, a ua hoi mai nei ua mokuahi la mai Rejkjavik me ka nu hou weliweli lua ole.  Me he mea la, ua hoomaka ke kahe ana o ka pele ma ke ahiahi o ka la Karisimaka, a ua hoomau mai pela me kekahi wahi mea hoohikilele ole.  He ehiku hebedoma mamua iho o ke Karisimaka, ua hopohopo na kanaka, no ka haluiu me he hekili la a kokoke e puni ka elua hapakolu o ka mokupuni.  I na la mua o Ianuari, hoomaka na hoonaueue olai ma na wahi a pau, a o ke mea hope loa, o ka hamama wale ana mai o ka lua pele i pio kahiko ma kahi e kokoke ana i Vatrayskud, a no na pule eha, ua hoomau ka hooleleia ana o na lapalapa a me na huna ahi.  Ua lukuia na kauhale a me na pupupu a me na mahinaai e ku koke ana mawaena o na mile he iwakalua, a ua oi aku mamua o ke tausani kanaka i holo e imi pakele i ko lakou mau ola iho.
            Mahope o keia mau pule eha, pio iho la keia lua pele, aka, ia wa no nae, puka mai la kekahi lua pele kahiko, he haneri mile paha ka mamao, e kokoke ana i Myvatu.  Ua hoomauia keia a ana o ka lua pele no kekahi mau hebedoma, a ua lilo ke kauhale o Myvatu i mea hehi na na maiuu o keia mea, o ka aina holookoa e kokoke mai ana, ua hooneoneoia.  Ua oi aku mamua o ewalu haneri kanaka i hooneleia i na home ole.  I na le mua Maraki, ua hoomaka ka puehu wale ana mai o ka lepo o waenakonu o ka aina, puka hou ae he mau puu nona ke kiekie he mau haneri kapuai maluna ae o ka ili honua, a he tausani kapuai a oi aku ke anawaena o lalo o ka puu, a e halulu ana malalo ae o ka honua.  Hamama wale ae la o luna o na puu, a luai mai la i na luai pele enaena maluna iho o ka aina, me ka uhi iho i ka aina he 200 mile ka loihi.  Ua oleloia mai, he umi tausani na kanaka i pau loa ko lakou mau lakou pilikino iho, i ka lilo, a o ke koena, ka poe e noho ana ma na kapakai, he 40,000 paha ko lakou nui, na ilihune e no lakou no ke kokua ana aku i ka heluna nui o ka poe i hoopoinoia ma ka lako pilikino.  Ke hoike pu ia mai nei, he mau haneri o ka lahui kai make.  O ka lua kaulana keia o Geysers, ua pio wale iho mai ka wa mai o keia a pele nui ana, a ua pii ae ka uwahi eleele o keia mau lua pele, me he mau kia ao la iluna o ka ea, i ikeia aku e kakau mai ana mai na mile mamao aku he mau haneri.  Ua oleloia, aole he a pele nui a ahulau nui i ikeia ma na wahi e ae o ke ao nei, e like me keia, ka nui o ka aina i uhiia, ka hamama wale ana mai o kekahi mau lua pele a me ka loihi o ka manawa o ka a ana.  Ua hoopuka aenei ke aupuni o Denemaka, he hoopii imua o ka lehlehu e pahola aku i na kokua no ka poe i hoopoinia.

 

HE MAU KANAKA KUHIHEWA.

            Elua mau kanaka e holo ana maluna o ko laua waa i ka po, mai Kona a i Kapalilua nei, a ia laua mawaho ae o ka Lae o Namakaiki, halawai mua laua me ke kohola, a puiwa laua no ka makau, a holo pili loa i kumu pali, me ko laua ike aku no i ka hahai mai o ke kohola, a liuliu nalowale.  Holo mai la laua a he mile okoa paha ke kaawale, alaila hiki i kahi i kapaia o Kaalae, aia malaila he moku pohaku iloko o ke kai, ua kokoke loa nae ma ka ihu o ko laua waa.  "Eia hou no ua kohola nei,"  wahi a ke kanaka mamua o ka waa, a ua ike pu aku la no laua i ka mimiki ana iho o ke kai, ahu wale ka lae o ka pohaku, eia aku ka lea o ka lana mau olelo:  I aku ke kanaka mahope i ke kanaka mamua i kokoke i ka lae pohaku; e uhau oe i kau hoe i ke poo o ke kohola i make, hahau kela i kana hoe, elua hahau ana, a hai ae la kana hoe; i aku la ia i ke kanaka mahope, hai ka'u hoe, a pau pu ae la i ka hai, a nele iho la i ka hoe ole, a hoka wale iho la no.  Hapapa iho la na lima i na apana hoe, pa ana ka lima i ka pohaku, pane aku la kekahi; Auwe!  he moku pohaku ka keia a kaua e hakaka nei!  pau e na hoe i ka haihai.  Ua kapaia ka ino o ia wahi moku pohaku o "Kakakohola".  Me ke aloha no. J D B KUAKAHELA.
Honomalino, Kona H.H.  July 29, '75
[Mai nahaha paha ia moku pohaku ina e lele laua iluna olaila e noke ai i ke nahu, a mai make pu me ke kohola, ke luu lana e iniki aku.  Aole o makou hoihoi iki i ka hana naaupo a keia mau kanaka hele i ka moana e lalau ai, e imi make ai no laua.]

 

KE KUMUKANAWAI HOU O SEPANIA.

            Ua hookaawale ke Kumukanawai hou o Sepania penei:  O ka Ahaolelo Senate i 300 ka nui o na Luna Sente.  O na Lunamakaainana o ka Hale o lalo, e kohoia i hookahi Lunamakaainana no kela a me keia 5,000 kanaka, a no ka manawa he elima makahiki.  Na ka Moi ka mana e hoopau i ka Ahaolelo o lalo a me ke koho ana i na hoa kohoia o ka Aha Senate ma ke ano pakahi a huina nui paha, aka, ua hiki nae iaia ke kahea e halawai ka Ahaolelo iloko o ka ekolu malama mahope iho o ke kohoia ana o na luna.  Na ka Moi ka mana koho i ka Peresidena a me ka Hope Peresidena o ke Senate, a he mana kona e hoole i na bila.  O kela a me keia kanaka e hopuia, e laweia imua o ka aha hookolokolo kiekie loa e hookolokoloia ai, a i ole ia, e hookuu iaia iloko o kanahiku kumamalua hora.  He mana no ko na Ahaolelo a o ke aupuni paha e kau kanawai e kapae ae i na pono kumukanawai i hoopaaia, aka o ke kipaku ana i na kanaka Paniolo mai ka aina aku, ua papa loa ia.

 

NU HOU!  NU HOU!
HE NU HOU HOU LOA!
---MA KA---
HALEKUAI O
AKE MA!
MA KE ALANUI PAPU.
AKAHI NO A LOAA
HOPE NUI LOA MAI
NEI IA MAKOU NA
LOLE NANI HOU LOA
O NA ANO A PAU.
---NOLAILA---
E KUAI MAKEPONO LOA'KU
Ana makou i na waiwai a pau
Me ke KUMUKU AI HAAHAA
---I NA LOLE---
Kilika Pua Nani HinuHinu!
HOU LOA O NA ANO WAI LIKE OLE I IKE OLEIA MAMUA E HAWAII NEI.
Na lole LILINA halua ano hou,
MAKALENA lilina pua,
KALAKOA panio ano hou,
ALAPIA nani,
HULUHIPA o na ano like ole,
KIHEI KILIKA pua nani,
KIHEI HULUHULU hou,
MUUMUU lihilihi keokeo,
PALEKOKI pukapuka anuunuu,
LIHILIHI HOU ano like ole,
MAMALU KILIKA!
Na PUA a me na hulu pale,
PAPALE o na ano Paikini hou,
LEI PUA NANI a me na Uhi
Kilika o ka Poe Mare,
UHI KANIKAU
Ano Hou
A me na Wehi e ae no o na
Lede e Kohu ai ka hookikaha ana o ke
Kaona Lai.
A PELA NO HOI
Na Lole Nani
O na Kane,
A LOLE MA KA APA,
O NA ANO A PAU LOA.
---A ME---
Na Mea Kohu e ae no hoi e
HAKAL-I AI
NA KEONIMANA,
E hao auanei a Linohau!

NOLAILA, ke konoia aku nei oukou a pau, e hele mua mai ma ko makou Halekoai ma MONIKAHAAE, a e wae, a Ikemaka i ka nani a me ka MAKEPONO no oukou iho, mamua o ko oukou kipa ana ae i na Halekuai e ae; a na na Keiki no o o ia Halekuai e paki mai i na MAKANA a me na LAKO MANAWALEA, me he Manuahi la, e like me ka hiki, a me ka nui o ke kuai ana.

Mai Lohi a Hookaulua!

ME KA MAHALO.

A. S. CLEGHORN & Co.,

Kihi o Alanui Papu me Hotele.

Honolulu, Aug. 5, 1875.  714 3m.

 

KO KALEPONI

LAAU KUNU OLA!

A ME KA MAI HANO.

I KA LEHULEHU!

            He nui na Palapala mai na Haole e ae e hooiaio mai ana i ke Ola io maoli o keia Laau Kunu a Hano.
O KEIA KA LAAU OLA A MR. F.L. SUCH NO NA MAI MA KE
Ake-Mama, ka Ha o ka Leo,
Ke Anu, ke Kunu, Kunu Kalea,
Na Eha a pau ma ka Puu.
E OLA NO HOI NA MAI HANO IKAIKA, KA UMI I KA HAUPO
A o ka poe Mai Ai-ake e loaa no ka oluolu nui ia lakou, ke ai i keia Laau.
NO LOKO MAI O NA LAU NAHELE KEIA LAAU, AOHE MEA INO O LOKO NA KA POE E LAWE ANA E IKE I KA OIAIO.
Na Rula o ka inu ana:
No Kanaka Makua – 2 puna nui, i ekolu inu ana i ka la.
No Kamalii – 1 puna nui, i ekolu inu ana i ka la.
No Kamalii Aiwaiu – 1 puna ti, i ekolu inu ana i ka la.
A ine e mau ana no ke koii o ke Kunu, inu iki no mawaena o na inu ana ekolu.
No ka Hano – E inu i ka wa e hiki ai ka ho, a mahope iho.
No ke Anu – Aia no i ka wa e inu ai, o ka po a me ke ao.
No ka Puu Eha – E hoonui a e inu pinepine a hiki i ka emi ana o ka eha.
No ka Eheehe – E inu liilii me ka hana mau nae.
No ke Kunu Kalea – E inu no e like me ka ikaika o ke Kunu.
No ke Kaniai Eha – He pono inu no, a aole e omo o ka pau no ia o ka eha, a poha maikai ka leo.
E loaa no keia laau lapaau ma ka Hale Kuai o
DILLINGHAM & CO.,
644 3m Alanui Alii.

 

Lole Makepono ke Kuike!

E LOAA NO IA MA KAHI O

KAKELA ME KUKE,

---E LAA NA---

AHINAHINA,

  KALAKOA,

    KEOKEO,

      LEPONALO,

Pena, Aila, Aniani,

  Na Mea Piula,

    Kopa, Aila Honna,

      Aila Hoomaloo,

Kui Kakia, Pakeke,

  Tabu, Kaula, Noho lio,

    Hulu-palaki, na Pulumi.

A he Agena no hoi no na Mokupuni o Ha-

waii nei no na

LAINAKINI-NAO,

     LAINAKINI-MAOLI,

          PALULU KALAKOA,

ALAPAI, KELEPA, KILISA,

Na Lole kupono i ka wawae,

  Palulu Huluhulu,

    Na Lole Huluhulu,

      Na Lole no ka hoohehelo ana

Lipine, lihilihi, a me ia mea'ku

---A HE---

MAU MEA AI KAHI

Ka Palaoa, Kopaa,

  Reiki, Pia, Hoohu,

    Paakai, Huaala,

      Pia Kulina, &c

---A HE---

LAAU LAPAAU KAULANA LOA

A Dr. JAYNES.

Laau Kunu,

  Laau Hoomaemae Koko,

    Laau hoopau naio,

      Penikila, Hunale,

A me na Laau Hamo, a pela'ku.

707 ly 759

 

EIA KA MANU HOU

HE BUKE MELE HOU NONA KA INO

"Robina Gula,"

ua 110 ka nui o na mele haipule a hoonanea o keia Buke Hou.
He 15 keneta no ke kope, a i ole la, he $10 no ka 100 kope  E kuuai ia e H.M. WINI.

 

NO KE KUAI

BERENA PAILATA

makepono.

BERENA PULUKAI

ai a ka Moa.

PAAKAI o KAKAAKO,

ma ke eke a tona paha.

WAHIE o ke ano maikai, oki a liilii ke

makemake.

NA POHAKU, Pou.

KIMO PELEKANE
Jas L Dowsett

Kihi o Alanui Moiwahine a me Papu. 7093m 721

 

KA B. H. LAIANA

LAAU LAPAAU AWILI OLA.

A o na mai ino, e laa ka

Rumatica,

  Ka Hano,

    Ka hui o ke kino,

      Ke pohapoha o ka ili,

        Nawaliwali o ke kino,

          Na mai wahine,

Na mai o ka puu, ke ake a me ka puuwai!

E nana i ke kuhikuhi.

E loaa no ma ka Hale Kuai o

     Dilinahama ma,

          Agena.

Honolulu, Oct 6, 1874. 7093m 721

 

KA NUPEPA KUOKOA

E HOOPUKA MAU IA MA HONOLULU,

I KELA POAONO KEIA POAONO

$2.00 no na mahina Umikumamalua

$1.00  "    "       "      Eono.

ME KA HOOKAA MUA MAI.

NA OLELO HOOLAHA--aole e oi mamua o 10 laina no ka hoopuka hookahi ana, $1.00; alua puka ana he $1 50 hookahi malama, $2.00. E UKU MUA ia mai ke dala o na Olelo Hoolaha e hoounaia mai ana e pai.
O NA UKU A PAU E HOOKAA MUA MAI NO--aole e kau la ka inoa o kekahi haole a kanaka maoli paha.  ma ka inoa o ka poe lawe pepa ke ole e hooka e mai mamua.  E pono e hiipoiia keia mau rula.  no ka mea, he emi no ka auhau no keia nupepa.
AIA KE KEENA O "KE KUOKOA" MA KA HALE LETA HOU.
H.M. WINI,
Luna Hoopuka.