Ka Nupepa Kuokoa, Volume XIV, Number 29, 17 July 1875 — Page 4

This text was transcribed by:	Diane Poche
This work is dedicated to:	Langues Tirees Translation

Ka Nupepa Kuokoa

KE KILOHANA POOKELA NO KA LAHUI HAWAII.

Ka Nupepa Kuokoa

HE HIMENI!   AT THE CROSS THERE'S ROOM.

Royal Diadem p 91.

E ka mea kanikau,

Nana ia Iesu,

Lawe i kou mau luuluu,

Nana ia Iesu,

Hai i kona pepeiao

I kou hewa, kou makau,

Nana ia Iesu.

E ka mea auwana e,

Nana ia Iesu,

Wiki oe, mai kaukai,

Nana ia Iesu ;

Luhi a kaumaha e,

Nana no e hoona mai,

Pili ia ia i maha'e,

Nana ia Iesu.

E ka lawehala nei,

Nana ia Iesu,

Paipai mai ka Uhane e,

Nana ia Iesu,

Ano no e hele ai,

Hele i ka punawai,

Iau i ka wai maemae,

Nana ia Iesu.

Lana oli ka manao,

Nana ia Iesu,

Make oia, make nou,

Nana ia Iesu ;

Kahe kona aloha mau

Nou a no na mea a pau,

Huli e ko keia ao,

Nana ia Iesu.

Hawaii.

HAAWINA KULA SABATI.

HELU 5. SABATI, Augate 1.

KUMUHANA---Ka wai o ke ola.

PAUKU BAIBALA---IOANE 4:5 15.

5 A hiki aku la ia i kekahi kulanakauhale o Samaria, o Sukara ka inoa, e kokoke ana i ka aina a lakoha i haawi aku ai no kana keiki no Iosepa.

6 Ilaila ka punawai o Iakoba. No ka maluhiluhi o Iesu i ka hele ana, noho iho la ia ma ua punawai la : o ke ono paha ia o ka hora.

7 Hele ae la kekahi wahine no Samaria e huki wai : i mai la o Iesu ia ia, Ho mai no'u e inu.

8 No ka mea, ua hala ae la na haumana ana i ke kulanakauhale e kuai i ai.

9 Alaila ninau aku la ka wahine no Samaria ia ia, no ke aha la oe, he iudaio, e noi mai nei ia'u, i ka wahine no Samaria, i mea inu ? No ka mea, aole e launa pu na Iudaio me ko Samaria.

10 Olelo mai la o Iesu ia ia, i mai la, lua ua ike oe i ka makana o ke Akua, a i ka mea hoi e olelo ana ia oe, Ho mai no'u e inu : ina na noi mai oe ia ia, a ua haawi aku ia i ka wai ola nou.

11 Olelo aku la ka wahine ia ia, E ka haku, aole ou bakeke, a ua hohonu ka pu. nawai; nohea la e loaa'i ia oe ua wai ola la?

12 Ua oi aku anei oe mamua o Iakoba o ko makou kupuna, nana i haawi keia punawai no makou, a nana hoi i inu i ka wai, a me kana poe keiki, a me kana poe holoholona?

13 Olelo mai o Iesu, i mai la ia ia, O na mea a pau e inu i keia wai, e makewai hou aku no ia.

14 Aka, o ka mea e inu i ka wai a'u e haawi aku ai ia ia, aole loa ia e makewai hou aku; aka, o ka wai a'ue haawi aku ai ia ia , e lilo ia i wai puna iloko ona e pipii ana i ke aola mau loa.

15 Olelo aku la ka wahine ia ia, E ka Haku, ho mai no'u ua wai la, i ole e makewai hou aku au, i ole hoi e hele hou mai ia nei e huki.

PAUKU GULA. Isaia 12 ; 3. "E huki no oukou i ka wai me ka olioli mailoko mai o na punawai ola."

Mele---"Ka wai e ola'i." Hae Hoonani, p. 36.

1 Na Iesu mai ka wai e ula'i,

Inu, inu, inu,

Na Iesu mai ka wai e ola'i,

Inu na hoa'loha

Hele pu mai i ke kumu wai,

Inu, inu, inu,

Hele pu mai i ke kumu-wai,

Inu a ola mau loa.

Ke hea nei Iesu, hele mai,

Inu, inu, inu,

E hele pu mai na make-wai,

E inu i ka wai e ola'i

Cho. Ke kahe ka wai hoola.

Kahe, kahe, kahe,

Ke kahe ka wai hoola,

Ke kahe nei nou a no'u pu.

Pule i hele kakou a pau a imi i ka wai e ola'i.

NA NINAU A NA KUMU.

P 5. No wai keia pauku ? mahea Iesu mamua ? p. 3. No ke aha ka halele ana ia Iesu ? E hele aku ana oia i hea ? Mahea Galilaia ? Owai ka aina mawaena ? Samaria, nohea ia ? malea ke kakau mua ana ? I Na Lii 13:32 16:24. Mamua, o ke kulanakauhale wale no ka i kapaia, Samaria, a mahope, ua kapaia ka aina e hoopuni ana o Samaria. Sukare, heaha ia ? Aia mahea ? ka inoa mua, owai ? Kin. 33:18, 19. Aia no ia mawaena o na mauna hea ? Ebala me Gerisima. E kokoke ana i ka apana aina hea ? Iosua 24; 32

P 6. Heaha malaila ? He punawai no Iakoba, no Iakoba anei i eli ia punawai ? Pela ka manao o ka poe kahiko a hiki i ka wa o Iesu, a mailaila mai no paha a hiki i keia wa. Maluhiluhi Iesu, ma kona ano aha ia ? Ma ke aha i maopopo ai he kanaka maoli no Iesu e like me na kanaka e ae? Hora eono, ka hora ehia ia ia kakou ?

P 7, 8. Nohea keia wahine ? Heaha ke kumu o kona hele ana ia punawai ? Heaha ka Iesu i noi aku ai ia ia ? No keaha kona noi ana ia ia, aole i na haumana ? Iesu wale no anei ka i koe ma ka punawai ? Mahea na haumana ?

P 9. Pehea ka wahine i pane aku ai Iesu ? No keaha ka launa ole o na Iudaio me na Samaria ? no ka like ole o na lahui a me ka hoomana ana. Na samaria he hapa Iudaio, a he hapa Pegana. he hoomana naaupo ka lakou.

P 10. Pehea Iesu i pane aku ai i ka wahine ? Heaha ka makana a ke Akua ? Owai hoi ka mea e olelo ana i ka wahine ? Ua ike anei ka wahine o Iesu ia ? I na ua ike, ina ua aha oia ? a loaa mai ke aha ? Heaha ka wai ola ? Mahea na pauku kuhikuhi ? Isaia 12; 3 44; 3. 5; 1.

P 11, 12. A pane hou ka wahine pehea? Pehea ka hohonu o ka punawai ? 35 kapuai pha ia wa. Heaha ke kuhihewa o ka wahine ? a no ke aha kona ae ole e lawe Iesu i kona akeke, a bika wai paha i mea e loaa'i ua wai ola la? Heaha ka ninau a ka wahine ia Iesu ma ka p 12 ? He ninau aha keia ?

P 13, 14. Pane aku Iesu pehea ? Heaha ke ano o ka wai maoli ? Heaha ke ano o ka wai a Iesu e haawi mai ana ? nana mok. 6; 35, 58, 7; 38. Mahea ka muliwai o ka wai ola ? Hoike. 22; 1.

P 15. Heaha ke noi ana a ka wahine, ke kumu, me ke kuhihewa ana ? Kuhi oia he wai maoli ia, ina inu hookahi, pau ka make-wai maoli, aole luhi hou i ka hele i kahi loihi e huki ai i ka wai. Naaupo maoli, ea.

No ka uhane keia wai, aole no ke kino.

No ka uhane ka make-wai hou ole, aole no ke kino. E pomaikai ana ka uhane ma keia ao a ma ka lani ke malama i na olelo a Iesu.

Mele. Him.---133, 8-7 Leo. Malawaina.

1 Mai ke kea kahe mau la

Ko ke ola wai maikai ;

Ma ko Iesu uwao ana

Loaa wale ia wai.

Wai hoola, hoopohala,

Wai hooluolu mai.

Hea ko Iesu leo aloha,

Inu, e na make-wai.

2 Puai mau ua punawai la

No kakou ka huakai,

Ma ka mauna, ma ke awawa,

Kahe no ia wai maikai,

Inu, inu, i hauoli,

Inu, inu, i maemae,

Inu hoi i maule ole,

Inu i maha pomaikai.

NA NINAU A KE KAHU.

Na makua. Hai mai i na mea i loaa ma keia Haawina e pili ana i ko Iesu ano kanaka. 1 Kona haalele ana i ke kauwahi a hele i ke kauwahi e i pakele i ka hoopilikiaia. 2 Kona hele wawae ana. 3 Kona maluhiluhi ana. 4 Kona make-wai ana. 5 Kona kamailio ana, &c. hai mai i na mea e pili ana i ko Iesu ano Akua---Na oukou e noonoo. Hai mai i ke ano o keia wahine no Samaria ; kona ano mua, kona ano hope.

Na keiki. Heaha kekahi kumu o ko Iesu hele ana i Samaria, a i kapunawai o Iakoba ? O ke aloha i ka wahine lawehala, anaupo, a ao oia ia ia, a huli mai oia a manaoio ia Iesu, a lilo oia i mea e huli nui mai ai na Samaria e ae.

He poe auwana oukou, he naaupo, he lawehala aloha mai ai no oukou ? Kona io, kona koko, kona ola. Ka wai aha kana e haawi mai ai ? Ma ke aha e loaa'i ? Loaa anei ke noi ole, ke makemake ole, a lawe ole ? Heaha ka wai o ke ola? Ka pomaikai, ka hauoli, ka maluhia, ka waiwai io, mae ole ma ke lani, &c. Ua lawe anei keia wahine Samaria ia wai? Ae. A lawe ole oukou, e lilo auanei oia i mea aha no oukou ma ka la hookolokolo ? i hoike kue, a hoahewa ia makou.

Ke kula a pau. Samaria, nohea ka inoa? Hai mai i kekahi mau mea kaulana nona ? Hai mai i ka like ole o na Samaria me na Iudaio. Hai mai i na inoa hou o Samaria me Sukara, Sebarte---Nablaus.

Na manao pili. 1 E hoohalike me Iesu. E haalele i na wahi hoopilikia. E aloha i ka lawehala hookali. E imi, e ao e kuhiku hi i ka wai o ke ola. e ku a lawe i ka wai o ke ola i na aina make-wai ? E lawe a inu kakou a pau ia wai o ke ola.

Mele. Him.---234, 6-8. Leo---

1 Owai ke make wai,

A ane maule no ?

Eia ke kumu wai maiki

Ke koko o Iesu.

2 He wai ia e ola'i,

No luna o ke ao ;

Ke poe inu ia wai,

Ua ola mau lakou.

Pule no na makewai he nui wale ma na aina e.

HAAWINA KULA SABATI no Aug. 8.

Ioane 5: 5-15. PAUKU GULA, Puk. 15:26.

HAWAII.

KA PEPEHIKANAKA NAIHEHAU

O ka mea nona ka inoa alina e kau ae la maluna, ma ka la 28 o Aperila o keia makahiki, ua hoeha ino loa iho la oia ia Haliaka w., ma Waialeale Kapulena i Hamakua Hawaii, a ua make loa iho la ua wahine la ma ke ahiahi poeleele o na la la i hoeha ia ai oia, no na alina maewaewa i loaa iaia mai kalima mai o ka mea manao kanaka ole. Mamuli o na olelo ike a na hoike i akaka ai, he wahine kapae o Haliaka na ua Naihehau nei, a ua noho pu ma ia ano no kekahi manawa loihi ; a na loaa hoi he mau keiki ; a iloko o kona wa i pepehi ai a make aku la, ua hapai oia i ke keiki iloko o kona opu, aneane paha eono malama, a ua make pu aku la ia hua o ko laua noho mare ole ana me ka makuahine ; nolaila, na aneane papalua ia na pepehikanaka iloko o keia hihia hookahi. Aka, i ka noho ana ke Jure e noonoo ma keia hihia ma ka la 7 o keia malama, na hooholo ka elua hapakolu o lakou, na ku kona hewa ma ke degere akahi o ka lawe ola. He olelo hooholo koikoi no ka lakou i hooholo ai i aneane like kona kaumaha me ka liia i ka amana ; aka, ua pakele nae kona ola,---aole nae i lilo ia pakele ana o kona ola he mea e manalo ai kela inoa hewa o Kaina. Ma ka nana ana i na kumu nui i ala mai ai keia hewa, ua akaka no noloko mai o ka heano e ia ana o ko ke konaka noonoo e kekahi mea awaawa i hanaia, i me e hookela ae ai i na manao, na hana, a me na lawelawe ana ma mua ae o kona kulana mau, a me ka noho huikau ana.

Malalo iho nei e loaa ai na olelo ike a na hoike imua o ka Aha Kiekie o ke Kau Jure o Iulai ma Honolulu nei, i noho ai ma ka la 7 o keia malama ; e like me ia i hoolakoia mai ai e ko makou mea kakau kuikawa :---

KE ANO NUI O NA OLELO IKE A NA HOIKE O

KA AOAO O KE ALII.

KAOPUA.---Ua noho au ma Waialeale i Hamakua Hawaii, a ua ike ia Naihehau, a ua ike hoi iaia ma ka la 28 o Apr. o keia makahiki, a me Haliaka (w) i make. Ua ike i ka make ana o Haliaka ma ka hora 4 P. M. o ka la 28 o Apr. (o keia manawa, aole paha ia o ka manawa i make maoli ai, aka, o ka wa no ia o ka pepehi ana, aole nae he mea nui loa ia) I kuiia a i peku ia hoi ma ka aoao akau o ke poo e kupono ana i ke kumu pepeiao, a ua ike i ka puka ana mai o ke koko ma ka waha a me ka ihu. E hiamoe ana au, a na ka'u wahine i kii mai e hoala ia'u, a lohe hoi i ka lea huhu o Naihehau e nuku ana, me ka olelo aku "he wahine hoomake, a hookananuha." Ia wa, hele aku la au a paa ia naihehau, oiai oia e kui ana a e pepehi ana noi ia Haliaka---He wahine manuahi oia na Naihehau, a ua hapai i ke keiki eono paha malama---Mawaho ma ka lanai o ka hale kahi i pepehiia ai o haliaka e Naihehau, a o kana mau olelo nui mahope iho o ka pe pepi ana, he wahine hookananuha, a me ke koi ikaika aku, e hoi i ka hale (i ko laua hale ponoi, no ka mea o kahi i pepehiia ai he hale okoa aku) O haliaka ka mea i holo mua aku ilaila a mahope mai o Naihehau.---I kona wa i hopu ai iaia, ua lawe aku oia a me kahi mea e ai i ua Naihehau nei, i kahi e hoopaa ai.

MAMAKA w.---Ua noho au ma Kapulena i Hamakua Hawaii. Ua ike au ia Naihehau a me Haliaka w. i make. Ma ka la 28 o Apr. e noho ana au ma ko'u hale ma Waialeale, Kapulena Hamakua Hawaii. Ua hele mai o Naihehau a hopu i ka lauoho o Haliaka w., oiai oia e noho ana ma ka puka o ko makou hale, a huki aku la, hoohina ia ia ilalo, a pa kona poo i ka pohaku o ka papalina a peku pu i ka wa e waiho ana ilalo. O keia wahine, he wahine manuahi oia na Naihehau a ua hapai hoi i ke keiki. Ua holo aku la au e uwao me ka olelo ana, "Ua oki ua eha iho la ka wahine." Mahope iho ua puka mai la ke koko ma ka ihu a me ka waha. Ua olelo aku o Naihehau ia ia, oia wale no ka mea mana maluna o Haliaka, a ina e make ana oia, oia (Naihehau) no ke ke pani.---Ua holo mai o Haliaka i kona hale no ka makau i ke kane ; ---maluna o ka lio ka holo aua mai, aole noho, aole pale, aole hoi he kaulawaha. I kona wa i lele iho ai ilalo, a noho ma ka puka o ka hale, ua hiki mai la o Naihehau mahope, a huki aku la i kona lauoho a pepehi hoi ia ia. Ua olelo mua mai o Haliaka iaia, "E eha ana au." O ka Naihehau olelo mau mahope iho o ka pepehi ana, he koi e hoi laua i ka hale.

KEONI MILA. Ua noho au ma Waialeale i Hamakua Hawaii. Ua ike au ia Naihehau a me Haliaka w, i make. Ma ka la 28 o Apr. o keia makahiki i ka wa i pepehi ia ai o Haliaka, oia ka auwina la e hiamoe ana au, a no keia hakaka ana i kiiia mai ai au e hoala. Ala ae la au, a ike ia Naihehau e pepehi ana ia Haliaka w. me ka lima a me ka ka wawae, a holo aku au a me Kaopua e hopu ia ia. O kana olelo ma ia wa e kapa ana i ka wahine "he wahine lapuwale." a e koi ana e hoi i ka hale.---Ua nonoi mai i pahi, ua holo au e huna i na mea oi a pau.---I ko'u manao he pahi paha e hou ai iaia iho.

HAAHEO---(He wahine ano kino nawaliwali)---Holo mai no o Haliaka, a mahope mai o Naihehau o ka holo ana mai a huki i ka lauoho, hoohina ilalo, pepehi, kui, a hehi ma ka aoao akau o ke poo, a he pohaku ma kekahi aoao ae. O ka'u mea ia i ike.

KE ANO NUI O NA OLELO IKE A NA HOIKE O

KA PAAHAO.

HOKII. Ua noho au ma Waialeale, Kapulena, i Hamakua Hawaii. Ma ke kakahiaka Poakolu (oia ka la i pepehi ia ai o Haliaka) ua hele au mai ko makou hale aku (kahi i pepehiia ai) i ka waena ai e uhuki ai na makou, a no ka ne, ua hele loa aku la au i kahi o Naihehau ma ; aia hoi e inu uala awaawa ana lakou, aole nae au i ike ua ona. A ia makou e noho ana, olelo aku la o Naihehau ia Haliaka w, aole oia e ike hou me ka pake, a pela hoi o Haliaka i olelo mai ai, aole e hoi hou me kekahi wahine e aku. He ano hoopaapaa lili keia olelo ana mawaena o laua.

NAHEANA w.---Ua ike au ia Naihehau a me Haliaka. I ka la i make ai o Haliaka, ua hele aku au i ka hale o Naihehau ma. He inu uala ka hana malaila,---ua pau nae ka uala i ka inu ia mamua o ko'u hiki ana aku, aole nae au i ike na ona. O ka wa o keia inu uala mamua ae no ia o ke awakea.

KAHANANUI w.---Ua noho au ma Hamakua, Hawaii. Ua ike no au ia Naihehau a me Haliaka, a ua ike ia laua ma ka la i make ai o Haliaka ua ona, a ano e ka olelo a Naihehau. Mamua aku ua noho oluolu pu laua, a m ua la nei, ua ona oloke na olelo ana a Haliaka, a pela hoi o Naihehau.

MAKAAEAE.---He kamaaina au no Hamakua i Hawaii, a ua ike no hoi ia Naihehau a me Haliaka i make. Ua ike au ua ona a alalau ke laua mau olelo.---Ua noho maikai laua mamua aku.

KEKAULA. Ua noho au ma Waialeale i Hamakua, Hawaii. Ua ike au ia Naihehau a me Halia w. i make. Ma kona la i make ai, na ike au ia Haliaka e holo ae ana ma ka lio, maloko o ko'u pa, aohe noho lio, pale, a me ke kaulawaha. a mahope ae o Naihehau maluna no o ka lio, aole pale, kaulawaha, a me ka noho lio.Ua ike au he wahine manuahi o Haliaka na Naihehau.

I ka nana ana i na olelo ike maluna ae, ua akaka elua wale no kumu nui o keia hewa i puka mai ai. O ka noho huikau a me ka malu pono ole o ke kane a me ka wahine ; a o ka inu i ka mea e ona ai. E nana i ko makou manao pepa o keia la, no na mea e pili ana i keia.

MOOLELO O KA AHAHUI KULA SA-

BATI O KO HAWAII PAE AINA.

Kawaiahao, Iune 10, A. D. 1875 hora 1 P. M. o ka Peresidena C. J. Laiana ma ka noho, na ka Peresidena ka pule. Na lala i hiki mai.

NO HAWAII.---Kahu Elele, Kalapana Puna, G. W. Kaikuahine, Laupahoehoe Hilo, G. W. Moo. Hamakua Hikina, Hamakua Waena, hamakua Komohana, Waimea Hawaii, Kamaihoolewa.

NO MAUI---Honokohau S. L. Kalama, Honuaula Rev. L Kaiwi, Lahaina B W. Kekapa, Kipahulu J. L. Kekaulike, Molokai me Lanai aohe Elele.

NO OAHU---Kawaiahao S. B. Dole, Kalihi me Moanalua Kanikahoe, Waimanalo C. Apela.

NO KAUAI---Koloa Nakapaahu, Lihue Hosea Kahele, Anahola G. B. Meheula, Koolau G. M. Keone. Na Kahu Ekalesia i hiki mai i ka halawai.

NO HAWAII---Hilo Rev. A. O. Forbes; Hakalau Rev. S. Kukahekahe ; Kohala Hema Rev. S. Aiwohi ; Kona A. Kekaha Rev. G. P. Kaonohimaka ; Kona H. Helani me Kailua Rev. J. Waiamau; Kealakekua Rev S. W. Papaula; Kalapana Rev S. Kamelamela.

NO MAUI HIKINA---Hana Rev E. Helekunihi; Kipahulu me Kaupo Rev D. Puhi ; Honuaula Rev L. Kiwi; Lahaina Rev A. pali. No Molokai, Pelekunu N. Pali.

NO OAHU---Kawaiahao Rev H. H. Pareka ; Kaumakapili M. Kuaea ; Kalihi me Moanalua S. Paaluhi ; Waialua J. N. Paikuli ; Kahana D. Kekiokalani ; Waimanalo S. Waiwaiole.

Hapai ka aha no ke Komite Hoomakaukau Buke Himeni Hou, oia o S. B. Dole, a hooholo ka aha e hoomau aku ia S B Dole, a e pani ia Rev. M. Kuaea ma kahi o Rev. P W Kaawa, a ia C J Laiana ma kahi o Rev H H Pareka. A ma ka manao o ka aha, i hapalua dala ke kumukuai o ka Buke Himeni hookahi, a hooholoia i elima haneri dala ($500 00) e lilo no ia hana.

Hapai ka aha. No ka Hoike o na Kahu Kula Sabati Nui o na aha mokupuni.

Hoike waha mai o Rev J Waiamau no na kula Sabati o Hawaii Komohana.

No Maui Hikina Rev. E. Helekunihi ; Hoike waha mai oia no na kula Sabati oia apana.

Maui Komohana me Lanai Hoike mai o Rev. M. Kuaea aohe lakou i lawelawe ia hana.

No Oahu---Hoike mai o C. J. Laiana no kekahi hapa o na kula Sabati Oahu

Hoike mai o S Waiwaiole ka hope Peresidena no ke kula Sabati o Waianae a me Waialua.

Hoike mai o A. O. Forbes no ke kula Sabati o ka Ekalesia haole o Hilo.

Heluhelu mai o Nakapaahu no ke kula Sabati o Koloa i Kauai.

Hoike waha mai o Rev S. Kamelamela no ke kula Sabati o Kalapana me Opihikao

Hoike mai o Hosea Kahele no ke kula Sabati o Lihue i Kauai.

Hoike mai o L. Kaiwai no ke kula Sabati o Honuaula i Maui. Hoopaneeia.

La Hana elua---Halawai hou ka aha e like me ka hoopanee. Ka peresidena ma ka noho pule o G. Puuloa, Heluhelu mai ke Kakauolelo i ka moolelo o ka la mua. me ka moolelo o ka makahiki i hala me na hooponopono a hoaponoia.

Heluhelu mai o C. J. Laiana he palapala e pili ana i ka Buke Himeni Hou. mai a H. M. Wini mai, Heluhelu mai ke Kakauolelo he Palapala hookohu mai ke kula Sabati o Kipahulu Maui, no J. L. Kekaulike.

Heluhelu mai o C J Laiana he Palapala Hoike no ke kula Sabati o Waimea Hawaii.

Hoopanee na hana no ka Hoike o na kula Sabati. hapai ia ka hana ma ka heluhelu ana mai o ke Kakauolelo i ka moolelo o ka halawai o ka A. D. 1874. Hooholo ka aha e hoopanee ka halawai akea o ke kula Sabati o kela makakiki aku.

Hapai ka aha no na papa Helu, o na kula Sabati. A hooholoia na ka Peresidona e hoomakaukau na papa Helu o na kula Sabati. A hooholoia. na ka Peresidena e hoomakaukau na papa Helu, o na kula Sabati a hoouna aku i na kahu kula Sabati Oahu, e lawe ia aha i na lilo no na papa pani hakahaka.

Hapai hou ka aha no na Buke Himeni e hoihoi hou aku ia H. M. Wini, a e kuai aku kela hoa keia hoa ia buke e like me ka makemake me ka mahalo pu aku ia H. M. Wini.

Hapai ka aha ke koho ani i Peresidena, a ma ka manao o ka aha, na ke Ka kauolelo e haawai aku ma ka balota, a nolaila, ua koho pono ia o C. J. Laiana i Peresidena, a o Rev. S. Waiwaiole ka Hope Peresidena, Koha ka aha ma ka balota ana i ke Kakauolelo a ua koho ia o S. Paaluhi i Kakauolelo.

Hapai ka aha no ke koho ana i mau kahu kula Sabati nui no na aha mokupuni.

No Hawaii Hikina, Hon. J. Nawahi, ke kahu kula Sabati nui, o Rev. S Kamelamela kona Hope. Hawaii Komohana J. Waiamau ; Hawaii Akau, S. Aiwohi :

Maui Hikina, E. Helekunihi; Maui Waena P. W. Kahale, Maui Komohana me Lanai, A Pali ; No Molokai E. Kekoa ;

No Oahu, M. Kuaea ; No Kauai W. H. Rice.

Na Komite Hooko---H. H. Pareka, S. B. Dole, Z. P. Puli, W. L. Moehonua, M. Kuaea Ka Puuku, S. B. Dole.

I ekolu la halawai o keia aha i ka makahiki hookahi tausani ewalu haneri kanahiku-kumamaono. Komite Pai moolelo, C. J. Laiana, S. paaluhi, a e hoolaha ia ma na nupepa elua o kakou.

Ma ka manao o keia aha e pono e lawe like na kula Sabati a pau i na haawina i hoomakaukauia e ka makua Rev. L. Laia. na no na haawina kula Sabati i paiia ma na nupepa Hawaii o kakou.

E hoopanee keia halawai a hui hou i ka malama o Iune, makahiki hookahi tausani ewalu haneri kanahiku-kumamaono ma Honolulu nei. Pule o Rev. P. W. Kaawa me ka himeni---Pule o S Kakahekahe.

S. PAALUHI,

Kakauolelo.

MAI LILO MAU WALE KE OLA.---Ma ke kakahiaka Poalua iho nei, ua hoao iho la kekahi kanaka o Mauiloa kona inoa, e hooki pokole i kona ola makamae, ma ka li ana i kona puai iho me ke kaula, mai holo pono kana hana hoopakalaki, e ole e ike e ia e kahi poe e ae, na lakou i hele aku e hoopakele. Ua hai ia mai makou o ka mai kau loihi ke kumu o kona hana naaupo ana i kona ola, a huipu ia hoi me na oleo@ike me kana wahi ewa ia kakahiaka, lawa loa ai na koii koi a ka hupo o kona ake hoonaauauw ia ia iho.

KA NUPEPA KUOKOA

E HOOPUKA MAU IA MA HONOLULU,

I KELA POAONO KEIA POAONO

$2.00 no na mahina Umihumamalua

$1.00 " " " Eono.

ME KA HOOKAA MUA MAI.

NA OLELO HOOLAHA---aole e oi mamua o 10 laina no ka hoopuka hookahi ana, $1.00 ; alua puka ana he $1.50 hookahi malama, $2,00. E UKU MUA ia mai ke dala o na Olelo Hoolaha e hoounaia mai ana e pai.

O NA UKU A PAU E HOOKAA MUA MAI NO---aole e kau ia ka inoa o kekahi haole a kanaka maoli paha. ma ka inoa o ka poe lawe pepa ke oie e hookaa e mai mamua. E pono e hiipoiia keia mau rula, no ka mea, he emi no ka auhau no keia nupepa.

AIA KE KEENA O "KE KUOKOA" MA KA

HALE LETA HOU.

H. M. WINI,

Luna Hoopuka.

KO KALEPONI

LAAU KUNU OLA!

A ME KA MAI HANO.

He nui na Palapala mai na Haole e ae e hooiaio mai ana i ke

Ola io maoli o keia Laau Kunu a Hano.

O KEIA KA LAAU OLA A MR. F. L. SUCH NO NA MAI

---MA KE---

Ake-Mama, ka Ha o ka Leo,

Ke Anu, ke Kunu, Kunu Kalea,

Na Eha a pau ma ka Puu.

E OLA NO HOI NA MAI HANO IKAIKA, KA UMII I KA HAUPO

A o ka poe Mai Ai-ake e loaa no ka oluolu nui ia lakou, ke ai i keia Laau.

NO LOKO MAI O NA LAU NAHELE KEIA LAAU. AOHE MEA INO O LOKO

NA KA POE E LAWE ANA E IKE I KA OIAIO.

Na Rula o ka inu ana:

No Kanaka Makua--2 puna nui, i ekolu inu ana i ka la.

No Kamalii--1 puna nui, i ekolu inu ana i kala.

No Kamalii Aiwalu--1 puna ti, i ekolu inu ana i ka la.

A ina e mau ana no ke koii o ke Kumu, inu iki no mawaena o na ina ana ekolu.

No ka Hano--E inu i ka wa e hiki ai ka he, a mahope iho.

No ke Anu--Aia no i ka wa e inu ai, o ka po a me ke ao.

No ka Puu Eha--E hoonui a e inu pinepine a hiki i ka emi ana o ka eha.

No ka Eheehe--E inu liilii me ka hana mau nae.

No ke Kunu Kalea--e inu no e like me ka ikaika o ke Kuna.

No ke Kaniai Eha--He pono inu no, a aole e e@ o ka pau no ia o ka eha, a poha maikai ka leo.

E loaa no keia laau lapaau ma ka Hale Kuai o

DILLINGHAM & CO.,

Ahikoe Ano hou.

Ma ka Hale Kuai Mea Hao o Dillingham

& Co., e loaa ai keia Ahikoe maikai.

He Hookahi Tausani a me na Haneri keu no ka KENIKENI. Nani maoli no keia

Nuhou o ka Haole.

DILLINGHAM & CO.

709 @m 721 Alanui Alii