Ka Nupepa Kuokoa, Volume XIV, Number 27, 3 July 1875 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

NO KA OLELO HAOLE.

E KA NUPEPA KUOKOA E, Aloha oe:
            Ke noi haahaa aku nei au i kou luna hooponopono e ae mai i kekahi o kou mau kolamu haawale no ke poo o keia manao.
            Iloko o keia aupuni Hawaii, aole paha he olelo waiwai nui elike me ka olelo haole; a i kupono hoi i na hana o ke aupuni, na hana hoi o na ano he lehulehu mai o a o i ole aae au e kuhihewa.
            O na olelo waiwai nui nei wahi au, ua hapa loa ke loaa ana i na kanaka Hawaii mai o a o.  Aole i ao laulaha?  Nui loa kou ake, a minamina hoi i keia olelo malihini, he mole io nae o ke Kalaiaina.
            O ka manao o ka mea kakau, he kumu nui nou e Hawaii Ponoi, a mai hune ole hoi paha, ma hoi e like me keia e nalu wale nei, a pehea, hewa anei ke hai ae i kou manao, a e koi pu aku i ka lehulehu o kou mau tausani poe heluhelu nupepa, e kui lima pu mai me au?  A ina i koe ia mai au e oe, a e oukou hoi, ua aa no e pale nou iho, a hiki i ke auhee ana o kau peni kakau e like me ka hiki iau ke hoao.
            Ua kapa ae noi au i ka olelo haole, he olelo waiwai nui, a o ka nele o ka hapaumi o ka lahui i ka ike ia olelo, he hune maoli no ia, ua lalau paha au ea.
            E ka mea heluhelu, a ae mai oe iau, e lawe mai i mau niele.
            I.  Heaha la ke kumu o keia hune?  II. Pehea e pau ai?  III. Heaha ka waiwai nui o ka olelo haole.
            I.  Heaha la ke kumu o keia hune?  I ka manao o ka mea kakau.  Eia ke kumu.  O ke ao ole ia ana o keia lahui, i ka wa i hoomaka ai na makua misionari, i ka olelo haole.  O kau oi paha keia a ka wahaa, a mahaoi loa ea?  Aka, e ahonui mai oe iau e kamailio, a ina i eha kekahi i kou e hana nei, alaila, e ae mai e kala.
            Ua ike no kakou, o na makua misionari, nana i ao i keia lahui, oia ka io, a me ka iwi o ka mamo o ka ike olelo haole hoi, a oiai lakou, akahi a hiki mai, e ao hoi i keia lahui pegana, a hupu &c.  Aole nae i ao ia mai ka olelo haole, aka ma ka olelo Hawaii no, no keaha la i ao ole ma ka olelo haole?  Aole au i lohe pono i na kumu, aka, eia wale no kau i lohe ai, o holo ole ka olelo a kea Akua.  Pela io no, a he lehulehu paha na kumu e ae, malia paha, o ao mai oe iau e ka mea heluhelu, ina pela, pomaikai maoli au.
            E hoomanao pu hoi oe ia Henere Opukahaia, aole paha oia i ao ia i ka olelo haole i Hawaii nei, aka, i Amerika no.  Ua olelo pu ia mai no hoi, ua ike iki oia ia olelo, a ma ia olelo oia i namu ai me na kanaka mamuli o kona aoia ana.  E nana i kona beke moolelo.
            Ina i loaa ia ia i wahi ike olelo, a heluhelu, pehea, aole anei e loaa ana i na makua, na kupuna hoi o kakou i make, ina e aoia e na misionari i ka olelo haole?  I kou manao e loaa no, me kou manao ana, e paumi ka pomaikai o keia lahui i keia wa.
            Pehea, nui loa paha ka elemakule luahine, aole paha loaa ka olelo, oiai he kaumaha na lehelehe?  Pela io no, eia nae, ea, na lakou ponoi anei ia hana ka inoa na ke Akua?  ina oia, aole anei e kokua mai oia, a e hoopii i ka paahana ma ke ala apuupuu i lohi ai.
            Aole anei hoi he mau elemakule na haumana he 12 a ka Haku, pehea, oolea anei na lehelehe olelo i na olelo ano e he nui loa e like me ia i oleloia ma Oih. 2:  Ka hapaumi oia mokuna, pehea ia ea?  Ua wehe ke Akua i kana hana, me na lehelehe ano e, kela keia aina, me na olelo like ole, i hiki pono no nae i na lehelehe o Galilaia ke namu ae.
            Pehea, ia wa wale no anei e loaa ai ia ano ike namu, aole anei e like me ia, ina i hapai mua ia ke ao ana i ka olelo haole?  Owau pu no me oukou, a hiki i ko ke ao nei hopena Aole au e haalele ia oukou.
            Ua poina anei oe, i ko ke Akua hookaawale ana i ke alanui no ka oihana misionari ma o Kamehameha I. la?  Owai la o kakou i kuka pu me ka wehewehe, e hoolilo i na kana, i alanui no keia oihana?  O ke Akua Nui weliweli no.
            Ina i aoia ma ka olelo haole, lohi loa ka laha ana o ka pono iwaena o ua kanaka, ke ae like nei kaua ia, pehea hoi, aole anei he pono ka lohi, a kaa mai ka pomaikai he nui loa?
            E nana kakou i keia mau au elima Kamehameha III, a ia Kalakaua I.  Eia na mea akaka.
            I. Ua laha na kula, 2 Ua laha ka pono Karistiano.  3 Ua haawiia ke Kumukanawai, he au malamalama.  Ua mau ka ea o ka aina i ka pono.  Iloko o keia hua olelo hahia, ka uwiki ana o 55 makahiki, nui no la.  Ina i aoia i ka olelo haole i kinohi, alaila, ke manao nei au, he lahui haole maoli keia.
            Ua lohe pinepine a puni ka aina, e ohumu ana, e nune ana, i ka mea, a i ka mea, lilo na oihana i na haole, a he nuku ia oe he palaniho i ka waiho mao, mao kau wahi he makole keia, nohea mai keia?  Eia, no kou ike ole i ka olelo haole.  Ina i ike oe alaila, ia oe kuhina waiwai, Aina e, kalaiaina, &c a heaha ke kumu o kou nele?  Noi ke ao ole ia i kinohi.
            II.  Pehea e pau ai keia hune olelo haole?  E ae hou mai iau e hai i na kumu koho, 1. E hoopau loa ia ke kula Hawaii, a i kulahaole wale no, a na ke aupuni e malama.  A i ole ia.  2.  I hookahi kula no kela keia apana auhau.  3.  I kula haole ko kula hanai o Hilo.  4.  Pela hoi ke kulanui o Lahainaluna.
            I kuu nana aku, ua emi loa ka makema keia o na kula Hawaii i keia wa.  Eia kau e ike ai, mai ka mak. 1821, a i ke au o ko Kamehameha III noho Moi ana, ua kaulana loa o Lahainaluna me he hoku loa e lilelile ana i ka po pouli &c.  Nui na kanaka naauao, hanohano, a kuonoono hoi, e noho ana ma na oihana aupuni, e ka poai ana ma na aoao o ke kuahu aupuni, oia ka mea i ike nui ia iloko o ke Au o Kamehameha III.  Ua nanaia o Lahainaluna e na maka he lehulehu, a puni ka aina, me he mea la, he io a he ola no ke aupuni.  O keia ka wa e noho ana he mau kuhina Hawaii ka nui, a pela me na oihana e ae, kue nae kekahi poe haole no.
            Mai ka hapa hope oia au alii, a i keia wa e noho nei, ua lilo nui na hana pili aupuni i na haole, a oia noho wale iho la no kau &c.  Nolaila, ua emi iho ka makemake ia o ke kulanui i ko ka wa mua, oia keia i lohe mau ai, penei, makehewa ka hele ana i Lahainaluna oiai, heaha ka loaa, aheaha ka hana?  Eia ae no hoi o mea, ke eku mai nei i ka lepo, a he noho wale iho no.  Aia hoi o mea, ua lalau &c.
            I ka nana aku i na kula a pau o ke aupuni, aohe he waiwai nui, oiai, he waike ka olelo, a he namu ke ano o na poo aupuni.
            III.  Heaha ka waiwai nui o ka olelo, haole?  1. Ua kupono ka olelo haole no ke kiuo okoa o ke aupuni, a me kona mau hana a pau.  2. He olelo i haawiia ka maua oi.

            Ua mahaoi loa paha au, ea?  E nana mua kakou i ke ano o ke aupuni oiai ke Au o Kalakaua I.  He mea lohi wale no ka helu i na oihana a pau o ke aupuni, a e hai pakahi aku, aka, eia ka mea maopopo, o ka hapa nui o na hana, aia ka mano malihini a kalewa mai; ia lakou ke omo i ka waiu momona ou e Hawaii ilihune, a ia oe na wahi okaoka liilii.  Ua hoopihaia na keena oihana me na haole.

            Eia paha na lala nui, a ikaika o ke aupuni, aia no nae i na haole ia.  1. Na kuhina o ke aupuni ekolu.  2. Na lunakanawai o ka aha kiekie ekolu.  3 Ka Ilamuku nui o ke aupuni  4 Luna leta nui.  5 Luna dute nui &c, a ke ninau mai nei oukou, no keaha i hoonoho ole ia ai ia mau oihana e na Hawaii?  Eia, aole ike olelo haole.  Ina i ike kakou i ka olelo haole, alaila, na kakou Hawaii no e ku ka hoe o ko kakou moku iho.
            Pela no hoi na hana mikiala, e like me ua hana lima ike o kela keia ano  Na hana mahiai, o kela keia ano ka oihana kanawai, oihana kauka lapaau, kela keia oihana i lawelaeia e na haole.
            Eia hoi.  Aia no he mau buke o na ano he nui loa i pili like i na hana a pau, me ia mau mea e nana ai, alaila pono na hana &c  E nana ia kakou iho, O na buke mea helu, Huiuahelu mua a Helukakau, no ka buke haole mai, Helunaau, oia ano, pela ka Hoailonahelu &c.  I keia wa iho hei ka Huinahelu huo, Anahonua hou koe aku no nae na mea hohonu e ae i loaa ole ia Hawaii.
            Pela pu no hoi ka oihana kahunapule, aia na buke wehewehe naauao iloko o ka olelo haole; nohea papau no o na wahi kakai a na kahu Hawaii?  I pono ai hoi ha i elua no makahiki, alaila nee aku ana, a hiki i ka mulei ana, o ke oki iho la no ia.
            I na i manao i kahuna lapaau, e pono e ike i ka olelo haole.  I nana hoi paha i na buke, na nupepa kauka, pela kela keia oihana.  2 He olelo i haawiia ka mana oi.  O ka mana oi ae, e olelo nei, oia keia kanawai karaima mokuna 90 aoao 280.
            I.  Ina ua ike ia i kekahi manawa ua kue loa ka olelo Beritania me ka olelo Hawaii iloko o na kanawai o keia aupuni, i kauia a e kauia ana paha ma keia hope aku, alaila, e paa no ka olelo Beritania 1864 aoao.
            Aia la, ke ike nei kakou, ua ae aku ka mana o ka olelo haole i ko ka olelo kupa o ka aina.  He mea hou loa keia i ka manao o ka mea kakau, ka ae ia o ka olelo e, i olelo mana.  E ninau ae anei oe, no ke aha la ia?  eia paha, mai ia olelo mai ke ano nui o kou mau kanawai, &c.  Ua olelo nae au i keia, ma kahi like ole wahi no o na olelo.  A no ke aha la i hoomana ole ia ai ka olelo kupa o ka aina? eia paha, he wahi olelo puapuakaulei &c.
            Nolaila, mailoko mai o na mea au i kaao loihi ae nei maluna, i ulu maopopo mai ai na manao malalo nei.  1  E hooliloia ka olelo haole i olelo lahui.  Ua kumakaiai paha au i keia lahui ea, ma ka hoolilo ana i ka olelo e i olelo kupa?  No keaha la i ae ai ko kakou aupuni, i haawi ai i dala no na kula olelo haole, oiai, aole ia o ka olelo o ka lahui nana ia dala?  A oiai no hoi, aole paha pela ma na aina naauao, ae aia no?  Aka, ma Hawaii nei wale no i hana ia pela, aole no hoi elua olelo ma na lahui, hookahi wale no.
            Eia hoi.  Mai ko kakou hoonaauaoia a hiki i keia au naauao, na nui loa na mea i hoololi maoli ia; a kahaha nui hoi au, i ka loli ole ana a pau, mailoko a waho.  E like me keia mamua, he hale pili, i keia wa, he hale laau, na noho, papakaukau, na moe, o na ano no a pau, ia mea aku ia mea aku, o na ano haole he nui wale; a i ka nana pono aku, na ano e loa mai ke ano mua a i keia ano e noho nei, mai ka naaupo a i ka naauao.  Ke noho nei ka hapanui o kakou ma ke ano haole a he haole maoli no.  O na hana, na ano a pau, aia ia ma ke ano haole maoli, ua hoololiia, a me ia ano no kakou e noho nei, ina au i lalau, a kuhihewa hoi, ua oluolu no au e aoia mai.
            Pela no, ua loli na hooponopono aupuni ana ma ke ano haole okoa, na buke aupuni, na hoike o na kuhina, na olelo hooholo o ka aha kiekie, he mau mahele olelo o na aha, na kakau olelo o na keena oihana, aia lakou ma ke ano haole.
            Nolaila, i ka ike aku, he kino haole ko ke aupuni, eia nae, o ka ole o ka lahui, he like ia me ke kino Hawaii.  No ia mea au i manao ai, e hoolilo i ka olelo lahui, oiai, ua loli ma na mea he nui wale, koe wale no ka olelo; aole anei he pono e loli a pau, mai waho a loko?  I kou nana ana, he po no loa ia.
            I mai paha kekahi, he pono anei e haalele ia ka olelo makuahine, a e malama i ka olelo malihini?  Owau hoi kahi e ninau aku ia oe, he pono anei kou haalele ana i kou wahi welu paupau, polohe wale i ka ua?  Ua pono anei ko kakou haalele ana i na hana o ka wa naaupo, a ma na ano pili pili mau ilaila?
            Ke manao nei ka mea kakau, he pono ae ke hoololiia ka olelo, a haalele loa ia paha, ina pela, pomaikai kakou, a me na manao o keia lahui, mau ko kakou aupuni kuokoa, laweiawe ponoi ia na hana aupuni e na Hawaii ponoi.
            Eia hoi.  O keia lahui, aole ia he lahui ike palapala nona iho, aole ia i like me Kina, Iapana, a me na aupuni pegana e ae: o lakou, he olelo i kakau buke ia mai na kuuone mai, he naaupo ma na mea pili i ke Akua oiaio, aka, he naauao loa ma na mea hana lima, hana lole, kamaua, lapaau, kalepa ana, ia mea aku ia mea aku, pau ole i ka hai aku.  Ua ike pono no i na kanawai o na mea kino, nolaila, ua waiwai lakou i mea o kakou, oiai, he mau pegana pu kakou, a oi loa aku no lakou.
            Eia hoi.  O kau mau hua A. E, I; aoloko ia o keia A, B, C; ke olelo haole nae, aole anei pela?
            Eia hou.  O ko kakou kalepa kuwaho ana i keia wa, oia no ia me Amerika, ka makua nana kakou i hanai mai, a ke imi nei kakou i kuikahi panailike me ia.  Ina i hoololiia e like me kau i olelo mua ae nei, alaila, e holo mua no keia lahui imua, ma na mea a pau, me kou manao, o ka olelo haole, oia ke ai e wehe ai i ka waiwai no keia lahui, aole oia wale no, ka mea ia e mau ai kou kuokoa ana.
            I na e holo ana elua mau mea kalepa i Beritania, a i Amerika paha e kuai i mau waiwai kalepa no Honolulu hookahi, ua ike i ka olelo haole, a o kekahi, aole, owai o laua e loaa na waiwai maikai, eia o ka mea ike no i ka olelo haole.  Ua like ka mea ike ole, me he kii la e ku ana ma ke alanui, e kuhikuhi ana i ke alanui, me kona mau lima, aole nae i hele aku a me ke kanaka hiamoe hoi iloko o ka hale kudala, e kunou hiamoe ana, a kuhihewa ka luna kudala e ae mai ana, o kona inoa i paa a i ke ala ana ae, he bila aie nona hoi, aole nae i ike no ka hiamoe he maikai paha na waiwai aole paha?
            2.  Auhea la ke dala e hiki ai?  Oia hoi, ina i hoololiia ka olelo haole i olelo lahui, auhea ke dala e pono ai?  Me he mea la, o keia hoololi au e olelo nei, oia ka hoomana ana i ua olelo nei, a i mea e pono ai e like me kau i olelo ai maluna, e pili ana i ka hoopau ana i na kula Hawaii a pau.
            I ka nana aku, na ahuai wale ia no ke dala o ko kakou aupuni i na luna aupuni moni dala, a hoolilo wale ia hoi ke dala i na hana o ke aupuni i nui kipalale wale aku no.  Ua imi ia ka mea e nui ai ke dala e lilo ua wale no.
            E nana i keia,  Eia iwaena o ka poai o ke aupuni, elua mau hale nui hewahewa launa ole mauli o na lilo o ke aupuni, oia o hotele dala nui, me ka hale aupuni hou.  I na o na dala i lilo ia mau hale a elua, e hooliloia i mea hoomanao i ka lahui, ina ua pomaikai loa.  Pela no hoi ina i hooemi iki ia ka Moi uku i 30 tausani, oiai, aneane paha e 20 tausani dala no na aina lei alii, mai Hilo a Niihau, pela hoi, e waiho ikiia kekahi mau hana hou, a mahope aku.
            Ina pela e noonoo ponoia ai, alaila, e loaa no ke dala no keia ano.
            No ka mea aole paha i nana pono ia keia nele o ka lahui, a no ia ano, ua lilo ko kakou dala i mea hoopiha i ko hai eke, a momona o ka lele no ia, ua nui ka hulu, a hehi mai ia oe e Hawaii ilihune.  I ka manao o ka mea e kakau nei ina he aloha ko ka Moi Kalakaua i kona lahui, alaila, eia ka wa pono.  Ina e hoouluia keia lahui a 400 tausani kona nui, aole no e holo mua ma ka waiwai, a me ka naauao.  Ke ole e hooliloia i dala no keia ano.
            A manao hoi au, ina i hanaia, mai ke au mai o Kamehameha III, a i keia au, ke pane maopopo ae nei au, e auhee na haole moni mai nei i ko kakou mau wahi teniteni, e ola no ka lahui.
            Ua lohe au, ua oleloia keia lahui he kauwa kuapaa e kekahi nupepa haole ma Nu Ioka, ma pela, ke aneane aku nei no.
            Ua hewa anei au ke olelo ae, ua holo mua kakou ma na mea pili hoomana ma ka inoa, aka, ma ka naauao io, aole.  Ua kaena wale ia ka honu, he mea eheu aka, o ka oiaio, aole, a aole no hoi he lele e like me ka wanu.  Pela no o Hawaii, kaena i ka hele pu ia me na aupuni naauao, aka, o ka naauao ka ia, na na malihini e ku ka hoe, o kau hana, e! huki ia ae ia kaula, hoalu mai ho mai kou auhau, i piha ae kou eke, a lele ae au o kau, o ka ae aku, ia oe ka luhi, na ia la e hoonuu, o kou hou ke kahe, me ka inoa, ia ia nei ka pokeokeo kani a ka palahu.  Ua olioli paha kakou i ka pai ia o Hawaii i ka naauao, e like me na haumana o Lahainaluna, puka mai olelo kanaka, ka! he Lahainaluna keia, he naauao, ike &c.  Eia nae, i na he wahi ninau Helunaau liilii, haule iho la.  Pela no, i ka hiki kino ana mai a na makaikai honua i o kakou nei, ike lakou, aole na ka lahui Hawaii e malama aua ia lakou iho, aka, na ka ulili holoholo kahakai no.
            Pehea la e pono ai keia?  Eia kou manao, e aho no e noi i ka ahaolelo e hiki mai ana (1876), e noonoo i keia mea nui, a ina he aloha ko ka Moi i kona lahui, e ia ka wa.  E aho no e lu ia ke dala o ke aupuni i keia ano, mamua o kona mau hale nui kipalale, a me kona mau luna aupuni uku kiekie, Aole no e hiki wawe keia, aka, mahope no e loaa, ke ae mai ke Akua Nui weliweli.
            Ina i ae ia keia mau mea au i olelo ae nei, alaila, e ulu no keia lahui a kawowo ae, a piha na wahi i hooneoneoia, makehewa ka hooulu wale i keia lahui, me ka haawi ole i keia olelo waiwai nui; a he olelo hoi i hiki ke wehe i ka pahu waiwai, i piha i ke Daimana, me ka elua dala hoi, me na mea hao.
            A he olelo hoi, i kamailioia e na lahui pookela o ke akamai, oia o Beritania, me Amerika Huipuia, i ike ia he mau mana keikie no ke ao okoa.
            Ua mahalo nui ia o Kamehameha III, no kona kukulu ana i kula haole, no na alii opio e ao ia ai i ka olelo haole, oiai, me he kaula la kona ike ana, o ka olelo haole oia ka olelo e ola ai na iwi &c.  Pela kakou e ike nei, o na alii o kakou a pau, ua like loa no me he haole la ma ka olelo.  A ina oia hana ana, a e ao puniia me na makeainana, alaila, aole oe e Hawaii ponoi e hookaeia iloko o kou one oiwi.
            Nolaila, ke waiho haahaa aku nei au i keia manao imua o ka Lahui Hawaii, a me ka makua ka Moi, e noonoo, a ina he mea pono, e hooko mai, a i ole, o kau no ia e Hawaii o ka u, a na ka waimaka no e kulu, a pau ae na la ma keia honua punahele, a na hai e noho, a e ai i kou waiu.  A ina ua pono keia, e ike ia kakou hookauaka, o kipa hewa auanei ke aloha i ka ilio.
            Maanei, ke haawi ae nei au i kou aloha i kou poe heluhelu, a i kou Lunahooponopono hoi kau mahalo piha, me na mea laahia hoi.  “Ua mau ka ea o ka aina i ka pono.”  O Kalakaua no he Moi, owau no he makaainana haahaa loa.
WAIOHINU.

HE HIMENI!
DEW OF MERCY.
Royal Diadem, p. 70

1.
            Me ka kau o ka po, palanehe ke pa mai
            Ma na lau me na mea ulu e,
            Me ia no ke pa mai ke aloha o Iesu,
            Me ka kau i pa mai mai ke kai.
            Ref. Hau alo -- ha, Hau alo -- ha,
            Hau alo -- ha -- hoohauoli,
            Pa a mau la, pa malie mai ke ao.
            Pa, pa mau a mau mai ia Iesu.
2.
Lana e ka manao, ole lea ka naau -
            Auhee ae ke kaumaha a pau.
Nani ae keia hau i na kulu hau oonei,
            Pa, pa mau ma ka po, ma ke ao.
            Ref.     Hau alo -- ha, Hau alo -- ha, &c.
3.
Noi ae ia Iesu ma ka hora pule no,
            I pa mau keia hau olu e.
I pa mau, mau a mau, mai ka lani, mai ke ao,
            Me he bama e hoomaha mai.
            Ref.     Hau alo -- ha, Hau alo -- ha, &c.
4.
Nele no i ka hau, ua maloo a helelei
            O na lau me na pua o onei -
Paa ke ao me he hao, ole ua, ole hau -
            Hau aloha, e nakulu mai.
            Ref.     Hau alo -- ha, Hau alo -- ha, &c.
5.
Make e kamalii, ua hookuli ke heae,
            Ke auwana io a ia nei,
Paakiki, pakike, hoonunuha, nuku e; -
            Hau aloha, e nakulu mai.
            Ref.     Hau alo -- ha, Hau alo -- ha, &c.

HAAWINA KULA SABATI.
HELU 3.  SABATI, IULAI 18

KUMUHANA - Iesu ma ka ahaaina mare
            PAUKU PAIBALA.  Ioane 2: 1-11.
            1 KE kolu o ka la, he ahaaina mare ma Kana i Galaila; ilaila no hoi ka makuahine o Iesu.
            2 Ua oleloia o Iesu, a me na haumana ana, e hele i ua ahaaina mare la.
            3 A nele i ka waina, i aku la ka makuwahine o Iesu ia ia, Aohe o lakou waina.
            4 Olelo mai la Iesu ia ia,  E ka wahine, o ke aha la ia ia kaua?  aole i hiki mai ko’u manawa.
            5 Olelo aku la kona makuwahine i na kauwa.  O ka mea aha e olelo mai ai ia oukou, oia ka oukou e hana’i.
            6 E waiho ana malaila na ipuwai pohaku eono, no ka hoomaemae ana o ka poe Iudaio, he iwakalua kumamahiku, he kanaha paha na galani e piha ai ka kekahi, ka kekahi.
            7 I mai la o Iesu ia lakou, E hoopiha i na ipuwai i ka wai.  Hoopiha iho la lakou i ua mau mea la, a piha loa.
            8 I mai noi oia ia lakou, E hookahe mai ano, a lawe aku i ka lunaahaaina.  A lawe aku la lakou.
            9 A i ka hoao ana o ka lunaahaaina i ka wai i hooliloia i waina, aole oia i ike i kahi i loaa’i, (o na kauwa, nana i hookahe ka wai, ka i ike,) kahea aku la ka lunaahaaina i ke kanemare.
            10 I aku la ia ia, Lawe mua mai no kela kanaka keia kanaka i ka waina maikai, a nui ko lakou inu ana, alaila i ka waina ino: na malama ka oe i ka waina maikai, a keia manawa.
            11 Hana iho la o Iesu i keia hana mana mua ma Kana i Galilaia, a hoike ae la ia i kona nani; a manaoio aku la kana poe haumana ia ia.
            PAUKU GULA.  Pauku 11  Hoopaanaau.
            Mele Mele hou.  8-7.   Leo Bentley.
            1  Eia Iesu ke ku nei
                        Ma ka puka, a kikeke -
            Wehe ae i komo wai
                        Ma ke Kula Sabati.
            2  Komo, komo, e Iesu,
                        Hoa, Aloha, launa pu.
               Eia no na ipu wai,
                        Na Haawina kula nei.
            3  E hoolilo i ka wai
                        I wai waina ono e,
               I mea hoopohala mai
                        I na uhane maule nei.
            PULE i hele mai Iesu a launa pu a hoolilo i kana olelo i waina e pohala’i a ola’i na uhane o kakou.
NA NINAU A NA KUMU.
            P 1  I ke kolu o ka la.  Mai hea mai?  Mai ko Iesu halawai pu ana me Natanaela. 1:47-51.  He ahaaina aha keia?  Mahea?  Mahea Kana? 7 ½ paha mile ma ka hikina akau o Nazareta.  He Kana e ae anei?  Ae, aia ia ma Samaria.  Aia anei Iesu ma Galilaia? 1:43. Owai ka makuwahine ma ia ahaaina?  Owai kona inoa?  No ke aha ke hai ole o Ioane i ko inoa o Maria?  Ua hai anei oia i kona inoa iho, a me kona kaikuaana ma kona buke?
            P 2  Owai kekahi i koaoia e hele i keia ahaaina?  Owai keia mau haumana?  Anakereo, Simona, Ioane, Pilipo, Natanaela.
            P 3  Ua nele lakou i ke aha?  Nawaii i hai i ka nele?  Hai ia wai?  No he aha?
            P 4  Pane aku Iesu pehea i kona makuahine?  Heaha ke ano o ia paue ana?  Ma ko Iesu manao, owai ka i oi?  Oia anei?  O Maria paha?  Ua hoohalike Iesu i kona makuwahine me wai ma Mataio 12:48-50  Aole i hiki mai ko’u manawa, heaha ia manawa?  Manawa e hana mana ai paha.
            P 5  Heaha ka ka makuwahine i na kauwa?  Heaha hoi ke ano?  Ua manao oia e hiki no ia Iesu ke hoopau i ko lakou hemaheama oia hoi ka hoolako ana i ka waina.
            P 6  Heaha na ipu e waiho ana malaila?  Ehia?  Ehia galani ko kekahi me ko kekahi?  He wai aha keia?
            P 7  Heaha ka Iesu kauoha no na ipu?  Ua hoopihaia anei a piha loa?  He mau hoike anei no ka piha loa ana?  Aia anei ia hana ma kahi akea?
            P 8  Heaha ka Iesu mau kauoha elua?  Ua hookoia anei?
            P 9, 10  I ka hoao ana o ka luna i keia wai, heaha kona ano?  He waina maikai ka.  Heaha kona ninau hoao ana i ke kane mare?  Ua ike anei ka lunaahaaina, he wai wale no ka i ukuhiia iloko o na ipu?  Ua ike anei oia i haki i loaa’i keia waina?  Owai ka i ike?  Ua akaka loa anei i na kauwa he wai wale no ka iloko o na ipu?  Ma ke aha ko lakou ana?  Ua akaka anei ia lakou he waina ka mea i hookaheia mai mailoko mai o na ipu?  ma ke aha?  Ua ike maka lakou he wai wale no ka i ukuhi ia iloko, a he waina ka i hookaheia mai mailoko mai
            P 11  Ehia mea ma keia pauku?  1 Ke hana mana mua keia a Iesu.  2 Ka hoike ana i kona nani.  3 Ka manaoio o na haumana.  Ua manaoio no lakou mamua C aka, ma keia hana kupanaha, na mahuahua loa ka manaoio, o ka Mesia no keia.
Mele hou. 8 Leo.
1  Kupaianaha!  kamahao!
            Manao Iesu, a ko ae no!
            Aole leo, mana nae,
            Liko ka wai i waina e.
2  Paulele na haumana e,
            Akaka, ka Mesia nei.
            Manao mai oe ia makou,
            Manao, a e hoano hou.
NA NINAU A KE KAHU.
            Na Makua.  He mea kahiko no anei ka ahaaina mare?  He mea kahiko no ma kekahi mau aina.  A pehea ma Hawaii nei?  Heaha ka mare kahiko?  He ahaaina mare me ia anei?  Ma keia ahaaina mare, owai ke kane mare?  Malama he hoahanau ia no ka makuwahine o Iesu.  Owai ke kane mare nui?  Owai kana wahine mare?  Heaha ka hana kupanaha i hanaia ma keia ahaaina?  O Iesu anei kekahi i inu ia waina?  Heaha ka i kapaia ai Iesu e ka poe hoohalahala?  Mataio 11:19.
            Na Keiki.  Owai ka poe i konoia e nele i keia ahaaina mare?  Ina he ahaaina ka kakou e noi aku ia wai e hele mai?  Ae anei Iesu e hele i na ahaaina uhauha, lea lea, ino nama, hulahula
            He waina aha ka Iesu i hana ai noloko mai o ka wai?  He waina ona anei?  Malia paha, aole ia he waina ona, no ka mea, maikai wale no na mea a pau a Iesu i hana ai.  Aole paha oia i hana i ka mea ino.  Pehea ka waina a kanaka e hana nei, e inu nei?  Pono anei ke inu?  Hai paanaau mai Solomona 23: 20, 29-32.  Heaha ko oukou pono?  E waiho loa aku i na mea ona a pau.
            Ke kula a pau.  Ma ke aha i maopopo ai he mana Akua ko Iesu?  Mahea ka mana oi, ma ka hana ana i ka honua nei mailoko o ka ole anei?  Ma ka hana ana i ka waina mailoko mai o ka wai?  Heaha na hana kupanaha e hana mau ia ana iloko o ke kino?  Nohea ka io, ke koko, ka iwi?  Na mea ulu hoi, heaha ka me i ulu ai, i ano e ai kekahi me kekahi, he haahaa, ke kiekie, he ulaula, he melemele, he keokeo, a pela?
            Ina hiki ia Iesu ke hoolilo i ka wai i waina, pehea ka naau paakiki, ka pepeiao hookuli, ka maka ike ole, ke keiki kolohe?  Ma ke aha e ano hou ai?  E hai aku a noi aku ia wai?  Heaha ka manao pili i na makuwahine?  He waina kuai ole ia keia a Iesu i hana ai, he mea pau wale.  Owai ke kumuwaina oiaio?  Heaha hoi ka paipai ana ma Isaia 55:1.
            Manao paha kekahi poe aole hewa ke inu waina, ua hana ka Iesu i waina no ka ahaaina mare.  Malama he waina ona ole keia.  Aka, ka waina i keia wa, he waina ino, he mea ona, he mea hoohihia, a hoohina.  Nolaila, heaha?  Roma 14:21.  Mat. 18:6.  Pehea ka waina ma ka ahaaina a ka Haku?  Pono ia ke loaa ka waina ona ole.  Ina nae he waina ona, e waiho aku no.  Nui na mea ona ole i kupono i pani no ka waina ona.
Mele    Him. 219.   8-6  Leo-Waialua.
2  Ka poe e ai makani nei,
            A maona ole no;
E na pololi me na mai,
            E hele mai oukou.
3  Hoomakaukau mai nei Iesu
            I ahaaina mau,
   He ai, he waina, he waiu,
            E hele mai oukou.
            Pule i hoolohe ka poe i konoia e hele i ka ahaaina mare a Iesu i hoomakaukau ai i hele a loaa ke ola.
            HAAWINA KULA SABATI no Iulai 25 Ioane 3: 7-17.  PAUKU GULA,  Ioane 1:12. HAWAII

KO KALEPONI

LAAU KUNU OLA!

A ME KA MAI HANO.

            He nui na Palapala mai na Haole e ae e hooiaio mai ana i ke Ola io maoli o keia Laau Kunu a Hano.
            O KEIA KA LAAU OLA A MR. F.L. SUCH NO NA MAI MA KE
Ake-Mama, ka Ha o ka Leo,
Ke Anu, ke Kunu, Kunu Kalea,
Na Eha a pau ma ka Puu.
E OLA NO HOI NA MAI HANO IKAIKA, KA UMI I KA HAUPO
A o ka poe Mai Ai-ake e loaa no ka oluolu nui ia lakou, ke ai i keia Laau.
NO LOKO MAI O NA LAU NAHELE KEIA LAAU, AOHE MEA INO O LOKO NA KA POE E LAWE ANA E IKE I KA OIAIO.
Na Rula o ka inu ana:
No Kanaka Makua – 2 puna nui, i ekolu inu ana i ka la.
No Kamalii – 1 puna nui, i ekolu inu ana i ka la.
No Kamalii Aiwaiu – 1 puna ti, i ekolu inu ana i ka la.
A ine e mau ana no ke koii o ke Kunu, inu iki no mawaena o na inu ana ekolu.
No ka Hano – E inu i ka wa e hiki ai ka ho, a mahope iho.
No ke Anu – Aia no i ka wa e inu ai, o ka po a me ke ao.
No ka Puu Eha – E hoonui a e inu pinepine a hiki i ka emi ana o ka eha.
No ka Eheehe – E inu liilii me ka hana mau nae.
No ke Kunu Kalea – E inu no e like me ka ikaika o ke Kunu.
No ke Kaniai Eha – He pono inu no, a aole e omo o ka pau no ia o ka eha, a poha maikai ka leo.
E loaa no keia laau lapaau ma ka Hale Kuai o
DILLINGHAM & CO.,
644 3m Alanui Alii.