Ka Nupepa Kuokoa, Volume XIV, Number 22, 29 Mei 1875 — Page 3
| This text was transcribed by: | Keoki Maguire |
| This work is dedicated to: | Jonah N. (Namakawewehi) Na'iwi'elua o Nalua, |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA KUOKOA, ME KE AU OKOA I HUIIA
NA PALAPALA I KE KUOKOA
O kau leta e Z. Kalei o Kohala akau, e pane ana ia E. Kekaula o ia wahi hookahi no, ke hoopuka ia aku nei maanei: “O ka pono anei ia o ka Luna Ekalesia ? Oia hoi no ke kokua aoa i na lawehala i mua o ka Lunakanawai, ma ke ano pale. O ka nui no o ka pouli o ka naau i manao ia ai, aia ma ke poo, ke kumu i alu mai ai ka ninau naaupo. I na paha he wahi malamalama iki, ina la hoi, hoomanao, o ka oihana Loio, he oihana maikai ia, manao ae no la hoi, i poe hoopono ka poe nana e malama ia oihana. Pehea la kou manao ia Aukina loio i hui aku nei iloko ?
[ Kekaula ] Pehea hoi kou manao ia Porter Green, he kahunapule ia ? Pono ole paha ea ? I pono oe i ka paa o kou manao mamuli o ka poe ona e like me oe la ea ? I poe manuahi e like me lakou la oe ? Kuhi au aia no ia hoi i ka Lunakanawai ka haokua “
O kau palapala e Samuela W. Kaai o Kawaipapa, Maui e ninau ana, “ O kekahi kumu io anei ia o ka emi ana o ka lahui o ke awa ?” Ua loaa mai. A oiai ua wehewehe nui ia na ino o keia mea, a ua hala paha i kou ike ana, nolaila, ke manao nei makou, ua loaa aku la ia haina.
Ua hiki mai kau mea hou e D. S. Hopeni o Kealia, Kona Hema, e hoike mai ana i ko la Lunakanawai apana mau honi ana elima i ka hula ma ka la 11 o Mei oia ka la ahaaina i weheia e J. Kahunaaina. Oia hana no ka ia a ka Lunakanawai ? O ka mea mau iho la no hoi ia i kekahi poe Hawaii, ina e hanohano ae, pii pu mai la na lealea a nui.
Ua imi mai nei kau leta e C. K. Kepanila o Waimea, Hawaii a loaa ke keena o ke Kilohana Pookela o ka Lahui Hawaii, e hoike mai ana i ka make ana o Iosepa Opunui ma ia wahi, ma ka la 5 o Mei. Ua lawa ka huaolelo pokole nona, aloha ino.
O kou lima kakau ma ka eleele o ka inika a me ke keokeo o ke kanana, e C. H. Po o Kaohe, Kona Hema, ua kipa mai nei ; a malaila makou i ike iho ai i ka hanee ana o ka hale nani o Iosepa Kahunaaina mamuli o ka hana hemahema ana o ke kamaua nana e hapai ae i kiekie ka hale.
NU HOU O NA AINA E.
Ma ke ku ana mai o ka moku kalepa M. Nottenbohm, i ke kakahiaka Poakahi iho nei, iloko o 18 la mai Kapalakiko mai, ua loaa mai ia makou keia mau mea hou maloko iho nei.
NO AMERIKA.
Ke hoike mai nei kekahi lono mai Wasinetona mai no ka mea e pili ana i ka lono mua, oia hoi ka waiho mai o ke Kuhina Nui Ia ( Fish ) i kona noho ana kuhina, a e ae ana Ia i ka noho Kuhina Noho ana ma ke alo alii Beritania nui, ma kahi o Schenek i waiho mai. Ua hoolilo aku nei ke Kuhina Ia i kona hale noho a me kona aina ma Hudesona i ka hoolimalima, a ke liuliu nei e haalele i kona wahi.
Ua hiki loa ke kapili emi loa ia na moku ma Amerika Huipuia e like me na wahi e ae o ka honua nei. Ua hoikeia mai, ua hiki loa ke kapiliia ka moku mai ke $60. a i ke $65. o ke tona hookahi. Ma Beremana, no ka hapa o na kanaka kapilimoku, ua pii aku a i ka $100 o ke tona hookahi.
Ua hoounaia aku he mau moku kaua Farani a me Enelani ma na kapakai o Nufounalani no ka hopohopo o kahaka mai ka poe lawaia malaila o na lahui like ole.
I ka la 1 o Mei, he ewalu mau mokuahi lawe ohua nui i haalele iho ia Nu Ioka a holo aku no Europa, me ka lawe pu aku i na ohu a hope he 679 a me na ohua omua he 1180. He pii mahuahua ana keia o ka poe haalele iho.
Ua ae aku ka Lunakanawa Kiekie Barrett o ka mokuaina o Nu Ioka i ka hoopii @ ia mokuaina iho ia W. T. Tweed no na $6,000,000.
Ua hiki aku ma ke kulanakauhale o Ladana kekahi mau haole Amerika oia o Moody a me Sankey, na haiolelo Euanelio ma ka laua hana he hoohuli ma ka pono. Ma na halawai o na la noa, he 27,000 ka nui o ka poe makemake e hele mai e loihi ia laua ; a ma na la Sabati, aia i ke 45,000. He keu ko laua makemakeia ma ka laua hana.
NA OLELO NAAUAO O KA POE
OLELO E.
He pono ia kakou ke hoe me na hoe i loaa ia kakou, a oiai aole e hiki ia kakou ke kauoha aku i ka makani e pa mai, ua konoia kakou e holo me ka makani a ke Akua e haawai mai nei.
O ka hoomanawanui a me ka makaala, he mea ia e halihali ana ia kakou i kahi mamao. Ina e kali loihi ka popoki i ko ka iole punana, aole loa e pakele aku ana ka iole mai kona maino aku.
E ao i ka hiamoe me hookahi maka kaakaa. A i ka wa e hele ai ka moa e oo, oia iho la ka wa maikai no ka alopeka.
He hoouluhua ka poe naaupo i ka ninau pinepine a ka manawa hea keia, aka, o ka poe naauao, ua maopopo ia lakou ko lakou wa iho.
E wili i ka wa makani maikai a ina hoohemahema oe, alaila mai noho a imihala aku i ko ke Akua lokomaikai.
Na ke Akua e hanai nei i na manu o ka lewa, aka aole nae nana e lawe mai e ka punana ; ma ia ano hookahi, ke haawi mai nei ia i kela la keia la i ai na kakou, ma ke ano nae e ko kakou hana la ana.
O ke alaula o ka la, he gula ma kona waha.
O ka mea ae lohi ana mahope o ke alanui, kahi he nui na hele ana, e punia auanei oia i ke ao o ka lepo.
Mai noho a keehi i kou mau kapuai maluna o ka lepo a me ke alanui kekee no ka makemake i ka dala. No ka mea, he hana ia e hoihoi mai ana i ke ino mahope.
Ina makemake oe e ai pu me ke diadolo, alaila, i puna loihi kau e kioe ai ilokoo o ia umeke hookahi.
E pii ana ke kanaka paa oo palau i luna a i lalo, a heaha ae ia hana ana e hana ai, aohe mea e ae aka, o keia kuamoo wale no, ka hana i ka hana a maikai.
UA MAKE I LOHE MUA OLE IA.
Ma Kawaihao Honolulu, Maraki 14, 1875, make aku la o Koko, ka’u kane aloha: Ua hanau ia oia ma Napoopoo, Kona Hema, Hawaii, Iune 8, 1841, 31 mak. 9 malama, me na la keu, o kona kaapuni ana i keia mau mokupuni. Ua mare ia maua, e H. H. Pareka, a ua loaa mai i ko maua mau puhaka mai, 4 keiki, a ua haalele iho nei ia’u me ua keiki a maua, na’u e paiauma aku i kona aloha me ka haluku mau o ka waimaka a’o e maluna nei.
Nolaila, na ke aloha o kuu kane e loiele nei i kuu nui kino a ui ai a, a na ia auoano aloha i kono mai ia’u e haku iho wahi kanaenae aloha no kuu kane.
He kanikau aloha keia no kuu kane,
Aloha o Koko ka muo o ka Lehua,
Ka hiwahiwa nui o Papalauahi,
Oia ka o Ku-e hoopio ka la.
Ka la, ka la i ke kula o Ahuena,
Komo i ka Lai o Kailua la –e, o Kona,
No Kona kuu kane no ke kai malino a Ehu,
No ka pohu a ka lawaia i ka malie,
Ua pulu ke oho i ke kai,
Ke luu poo la i Waipiele – e,
Kuu kane –a, o oe ia –e,
O oe ka ia e Nau la kamalii,
E kohi la i ke kukuna o ka la,
I pumehana ia hale malu Kiawe,
Kuu kane –a, o oe ia –e,
O oe no ia e Palekaluhi –e,
E ku la i ka pali o Puuohaamio –a,
E walea ana na maka i ka nana,
I ka po a ke ehu kai o lalo o Haliilua,
Elua laua i ka moana –e,
I ka welelau ahiuhiu makani Eka –e,
Oia la owai ? o laua no a elua,
Me ka luhi, me ka lei ona me Kapau,
E kohokoho ana i ka holo a ka waa-pea,
I ka holo ma ka moana, holo – e,
Ua holo kuu kane, haalele ia’u e. Auwe!
Aia kuu kane ke hia alo i ke oho o ka Palai,
E palepale ana i ka lau Awapuhi,
He wehi ia no na kino he kapa aloalo kuana,
Palepale koekoe no Waioahukini –e
He kini, he lau, he mano ke aloha a’u e lei nei –a,
Ua aloha au-e,
E a-a mai ana ia’u ke ku a ka maulu pali o he –a,
E hoonalonalo ae ana i kona aloha aole e nalo,
Ua ike ku maka iho nei au i ka hana a ke aloha,
Aloha ka ua o Alanapo,
E nihi ae la i ke alo o na pali,
He ua hoopala ai ia ua ka manu,
He koena i ai pu ia no e maua me kuu aloha,
Kuu kane i ka uka nahele o Kamalo,
E inu ana i ka mapuna wai a Kanaloa,
He wai, he milimili ke kupukupu,
Na ia lau nahele i kanu lima ole ia,
O oe ka ia e hole Waimea i ka Ihe a ka makani
E hao nei na ale aloha a ke Kipuupuu,
I e –o i ka houpo o Mahiki –a ua hiki,
A hiki mai no ko aloha e uwe no au –e,
E uwe ae ana ia oe e Waiopuamakani o Wailua,
I huli hia ka wahine ke kane –a,
Kuu kane-a o oe ia -e.
Mrs. Kaaua
Kawaihao, Mei 17, 1875.
Kula o Binamu. Ua lohe mai makou, e hoike ana ke kula keikamahine o Binamu maloko o kekahi o ko lakou pa, maloko o ka malumalu o ka Hale Lole, ke hiki aku i ka la 16 o Iune. Malaila e hoikeia na mea naauao a me ka hooikaika kino. Ua makemake ia ka poe makaikai e hele ae.
E KU AI kudala ia ana na lio 3 ma ka Pa Aupuni ma Wahiawa, Ewa, ke hiki aku i hiki aku i ka la 3 o Iune, ma ka hora awakea. Eia ke ano o na lio me na hao kuni maloko nei.
Lio k. ulaula hauliuli laekea, kuapuka, 3 wawae keokeo, uha hope ak. [brand] uha hem. mua K. hao ehu e e pili pu ana mahope, uha hope hem. [brand] ma kekahi hao ano e.
Lio w. ulaula hauliuli laekea, 3 kapuai keokeo mua ak, hope hema, hao ano e, uha hope hema.
Lio k, ulaula laekua a ka ihu 3 kapuai keokeo mua a hope ak. $
Lio k, ahinahina keokeo, hao UMI uha hope hema NUI me kekahi hao ano e mahope iho uha hope ak.
Ma ka la 3 Iune Poaono kudalala na lio.
J. KAHAUOLONO Luna Pa Aupuni Waiawa $
LIO HELEHEWA
EIA ILOKO o ka Pa Aupuni o Koholaloa Apana o Honolulu, kekahi holoholona helehewa i laweia mai, I lio k eleele 3 w. keohao hem
B H KAHANUI
Luna Pa Aupuni
OLELO HOOLAHA
Kuai a na Luna Hooko Kauoha
I KA WAIWAI PAA
I KULIKE AI AE KA OLELO HOOHOLO I hoopuka ia ma ka la 11 o Mei MH 1875 e ka Hon. A. F. Judd, kekahi o na Lunakanawai o ka Aha Kiekie o ko Hawaii Pae Aina, e ae ana o J. Moanauli a me Maria Kahai, na luna hooko kauoha o ka palapala Kauoha hope loa o J. Kahai o Honolulu i make, e kuaiia aku no ma ke kudala akea na aina o ka mea i make, ma ka hola 12 awakea.
O Ka La 3 o IULAI, M. H. 1875
ma ka puka komo o ka Hale Hookolokolo ma Honolulu, no kakou no lakou na inoa malalo iho:
Ka aina ma Kamoiliilii, Waikiki, Oahu.
NONA KA INOA
“ K A L A E P O H A K U “
He 396 paha Eka. a oi aku a emi mai.
ME KA
Aina he 100 Eka aia i Waikiki
Kekahi hapa o ka aina i kapaia o “ P A H O A “
Me ka APANA AINA
mauka o ke Alanui Aupuni o Waikiki e kokoke la i ka Hema noho o ke Kuhina Kalaiaina nona paha na Eka Elima
Me ka APANA AINA
e waiho la ma Waikiki, ma ke aoao makai o ka loko ia i kapaia Opukaala he 3 Eka ka nui.
HE MAIKAI KE KILA. O ka Ilio o na palapala na ka mea kuai.
No na mea i koe, e ninau ia J. PORTER GREEN, MA KONA Keena hana ma Alanui Kalepa, Honolulu, a i ole ia J MOANAULI, Honolulu
J. MOANAULI me
MARIA KAHAI,
Na ko laua Loio
J. PORTER GREEN
Honolulu, Mei 24, 1875.
CANTON HOTEL
( LILIIKAWAI )
UA WEHE ae nei ke kupa Hawaii, he OMA PUHI PALAOA ma hotele LILIIKAWAI, a malaila no e loaa mau ai na ano palaoa mea e like me ka makemake o na makamaka, a me ka mau no o ka hana mea ai, inu kope, lau ki i na manawa a pau..
Alanui Hotel Helu 46
Honolulu Mei 26, 1875 3m 805
KALO KALO
Ma Ke Kudala.
Ma ka Hora 12 awakea o ka Poalima, Iune 4.
E kuai Kudala aku ai ke oo Kaio ma na Lei Kalo elua ma ke alanui Kauka, Kahi noho o J. Porter Green, he 7000 paha huli i kanu ia. Ma ka hale kudala e kuai ia aku ai
E. P. ADAMU, Lana Kudala
E IKE anei na kanaka a pau, owau o ka mea nona ka inoa malalo iho, ke hookapu ia aku nei ka hele ana o na holoholona, lio, pipi, miula, hipa, kao, maluna o kuu apana aina, oia o KAMILOLOA, e Waiho la ma Molokai, aole e hookuu wale i na holoholona I hai la ae la maluna o ua apana aina ia a ke papa pu ia aku nei no hoi ka hele ana o na kanaka ke kai lawaia o ua apana aina ia, i na o ka mea a mau mea e malama ole i keia leo, a loaa i kuu luna a’u i hoonoho aku ai, oia o KELIIAA, e hopu ia no eia a me ia wale aku no ka hana o ia, a o na holoholona e hele ana ma ua apana aina ia a ina e loaa ia Keliiaa e uku no i $1.00, ina o ka mea kue mai, e hoopii ia no e like me ke Kanawai. Na’u na KAMAI w.
Piliamoo Kona Oahu, Mei 25 1875 2t 703
E IKE auanei na mea a pau loa, owau o ka mea nona ka inoa malalo iho nei, ke hoolaha aku nei au i ka poe makemake kuai upena lawaia, e naue mai ma ko’u hale kuai ma Waiawa nei. Eia ke ano o na upena.
Malua, Makolu, Maha.
E kuai no au me ka makepono loa. Me ke aho olona o Kina, e wiki e uleu mai oukou, e kipa mai e ike.
Ko oukou makamaka ALILNA ( Pake )
Waiawa Oahu, Mei 23, 1875 2t 705
OWAU o MRS, AUILI, ka wahine mare a Niauhoe no kona haalele kumu ole ana ia’u, no na makahiki ekolu a oi aku ka maua kaa wale ana , nolaila, ke kauoha aku nei au ia Niauhoe kuu kane i mare ia, e hoi mai oia me a’u, a ina aole oia e hoi mai ma hope o ka puka ana o keia hoolaha, ua oi aku ka hookaawale ana o ko maua mare ana, ua oki au maanei, ke hoi nei ke kaikamahine e ka makani kololio o Waikapu, ahiahi.
MRS. AUILI NIAUHOE
Waikapu Maui Mei 21 1875.
E IKE auanei na mea a pau ma keia palapala, o maua o na mea nona na inoa malalo iho, ke hoolaha aku nei, ua kapu loa keia mau aina Lei Alii o WAIOMAO a me PUKELE e waiho ia ma Palolo, Mokupuni o Oahu, i lilo mai ia maua ma ka hoolimalima ana, aole loa e ae ia kekahi kanaka, haole, pukiki, pake a pela aku, e kii wale i na mea a pau maluna o kela mau aina, a o ka mea kue i keia, e hoopii ia oia e like me ke Kanawai. A eia hoi, ina o ka mea a mau mea paha, he holoholona ko lakou e holo nei maluna o na aina i hai ia ae la, ano ka manawa no oukou e kii koke mai, a ina oukou e lohi a hala na la he umi mai kela la aku, e hopu no maua i na holoholona a lawe i ka Pa Aupuni, ke uku ole ia mai e like me ke Kanawai. E like kela i Kanawai paa mai keia la aku a i ka pau ana o ko maua manawa. KALEOHANO,
Palolo Mei 24, 1875 4t 707 KAAI HONUA
MOKUAHI KILAUEA
O KA POE a pau e hooili ana i ka lakou mau ukana i Hilo maluna o ke Kilauea, ke kauohala aku nei lakou, ua loaa i ka Agena ka pono e hookomo i na ukana maloko o ka Hale Papaa o ke Aupuni, ina he ino, a i ole, ke ku hope aku paha ka mokuahi. Ua manaoia he pono ke hana pela. E haawiia aku no na ukana i ka la mahope iho, ke malie. Ua hiki no i na mea ukana a pau ke lawe mai ka Hale Papaa aku, aole nae e hoemiia ka uku moku.
E haawiia aku no ka palapala ae loaa o ka Hale Papaa no kekahi waiwai i hookomo ia iloko o ka Hale Papaa no ka hoouna ana a e kaa na poino maluna o ka Agena ina ua kauia na ukana maluna o ka mokuahi, koe wale no na poi no pau ahi a kai hoee paha. S.G. WAILA, Agena
Hoolaha i ka poe i Aie aku ai.
MA KA waiwai o JNO. D. Robinson, o Honolulu i make.
Ke hoike ia aku nei ka lohe i ua mea a pau, ua aela ka Palapala Kauoha hope loa a J D Robinson imua o ka Aha Hooponopono Waiwai Hooilina ma ke Keena e Hon. A F Judd, kekahi o na Lunakanawai o ka Aha Kiekie, a na Haawiia na palapala ia Elizabeta M Robinson a me J B Keliikanakaole, na L. H . Kauoha i paa maloko o ka palapala kauoha, wa ka la 7 o Mei, nolaila, o ka poe a pau he mau waiwai ko ka mea i make ma ko lakou mau lima, a ua ale paha ia e hoike koke mai i na Luna Hooko Kauoha ; a o ka poe a pau he mau ale ko ka mea i make ia lakou, ina paha ma ka moraki a ano e ae, ke kauohaia aku nei e hoike koke mai me na hooiaio kupono i na Luna Hooko Kauoha, ma ka Hale Hana o ka mea nona ka inoa malalo iho, keia wa aku, a i ole ia, e hoole loa ia. EDWARD PRESTON,
Loio no na Luna Hooko Kauoha
Honolulu Mei 12 1875 4t 704
E IKE auanei na kanaka a pau ke nana mai lakou i keia olelo hoolaha. Owau o ka mea nona ka inoa malalo iho, ua nalowale ma Manoa kuu lio w. kalakoa, nona ka hao kuni ma kekahi uha (M.) ma kekahi uha ka mea e loaa ana a hoihoi pono mai ma ko’u wahi ma Ulakoheo, e haawi no au iaia i 15 Dala. PETERO
Honolulu Mei 10 1875
MA KA WAIWAI o OOPA k. o Honolulu mokupuni o Oahu i make.
Oiai ma ka la 30 o Aperila, ua ae la e ka Aha Kiekie ka palapala kauoha o Oopa a ua hoopukala no ka mea nona ka inoa malalo ka Luna Hooko Kauoha.
A i kulike ai me ke kauoha a ka Aha, nolaila, ke hoikela aku nei ka lohe i ka poe a pau i ale ako ai e hoike koke mai me ka hoolalo kupono ma ko’u wahi noho ma Kalawahine Honolulu, Oahu, maloko o na malama pono mai keia la aku, a i ole ia e hoole loa ia. KAONO w.
Honolulu Mei 6, 1875 Lunahooko Kauoha
O WAU o ka mea nona ka inoa malalo nei, ka wahine mare a Pipa k. ke hai aku nei au ma ke akea, he kuleana oiaio no ko’u maluna o ka aina o kuu kane mare a me ka aina o kuu makuakane Nakiaha k. ma Kohala Hawaii, nolaila o na kue a me na hoole, e pono no e hele mai a launa pu me a’u ma Honolulu nei.
KAMAEWAEWA w kona X kaha
Honolulu Mei 18, 1875
NO KA MEA, ua hoaponoia ka mea nona ka inoa malalo iho e ka Aha Hooponopono waiwai hooilina Apana Ekolu I Luna Hooko Kauoha maluna o ka waiwai hooilina o Kekualiilii k. i make o Kohala Akau Hawaii. Nolaila ke kahea ia aku nei ka poe a pau i aie mai i ua
Kekualiilii k. nei e hoakaa koke mai, a o ka poe hoi ana i aie aku ai, e pono e hoike koke mai lakou i ko lakou mau koi ana, i hooiaio ia iloko o na malama eono, a hala ia manawa e hoole loa la. NALIIELUA, Luna Hooko
Kohala A. Hawaii Mei 7, 1875
UA WEHE AE NEI KA MEA NONA ka inoa malalo nei, he HALE KUAI HOU Ma Waimea, o Makalala kona inoa e kokoke ana i ka hale Hookolokolo. Eia maanei na waiwai o kela ano, keia ano, ua mea a ka maka e anoi ai a e kuai ai hoi o ka puuwai. Ke konoia aku nei na poe puni nani, e naue mai e ikemaka no oukou, he kuai makepono me ka manuahi no hoi. Eia hoi kekahi, o ka poe i aie i kuu hale kuai ma Hamakua, e hookaa ae lakou ma ka lima o J W Kalea. Ko oukou makamaka
G. C. Akina.
HALE KUAI LOLE.
O MAKOU o ka poe nona ka inoa malalo iho, ke wehe nei i Hale Kuai Lole ma Kahaluu, Kona akau Hawaii, i ka la o 22 Mei a na Akuna pake e malama. Malaila na waiwai o kela a me keia ano nani a maikai loa. Eia maanei na papale wahine a me na papale kane o kela ano keia ano. Nolaila, ke ko oia aku nei oukou e naue ae i ike kumaka i ke kuai makepono loa. E hele mai e hoao ike pono. GOOKIM & Co.
Kahaluu Kona, A. Hawaii. 703 6m
OLELO HOOLAHA
EIA KA MANU HOU
E HOOPUKAIA aku ana ma ka la 15 o Iune, he Buke Mele Hawaii Hou nona ka inoa
“ Robina Gula, “
ua 110 ka nui o na mele haipule a hoonanea o keia Buke Hou.
He 15 keneta no ke kope, a i ole ia, he $10 no ka 100 kope. E kuaai la e {3m 804}H. M. WINI.
WING SING & CO.
Puhi Palaoa,
E waiho mau ana na palaoa a me na berena palupalu. Kihi o na huina alanui Nuuanu a me Beritania. { 703 1y
MEA HOU MAIKAI.
NA PEPA kakau Farani me na wahi leta o kela ano keia ano. I hanaia maloko o kekahi pahu iliili. O ke kumukuai o keia pepa ano hou, he hapaha a hookahi dala. Aia ma ka hale kuai buke o
1m – 705 H. M. WINI.
KUAI A KA LUNAHOOPONOPONO
WAIWAI.
E KUAI ia ana ma ke kudala i ka Poaono, Mei 29, ma ka Hale Hookolokolo ma Waimea, Hawaii, na waiwai pilikino a pau e pili ana i ka waiwai o G HUEU DAVIS o Waimea, Hawaii i make, oia hoi na iako hale, na upena, na iako aniani, na laau kahiko, na lio ma loko mai o na welo maikai loa, a me na pipi hihiu e holo ana ma na mauna a pela aku.
Kuike ke dala. D.F. Sanford.
702 3t 704 Lunahooponopono Waiwai o G H Davis.
E IKE auanei na mea a pau ke nana mai i keia owau o ka mea nona ka inoa malalo iho, ke hookapu i loa aku nei au i ko’u aina kuleana e waiho nei ma Niumalu Lihue Kauai, nona kela mau palena e pili ana, o Pahunui ka inoa, a o kona palena ma ka akau, o ke alanui e pii ana i kahi o Kaiu, ma ka hikina, ka loi o Ku, ma ka hema, ke kahawai, a ma ke komohana o Waihi, a ma kela mau palena, ke hookapu loa ia nei na kanaka a me na holoholona, aole e hele maluna o ua aina ia, aole hoi he mea ia waia ma ka loi, a me kahawai, ua kapu loa, a o na kanaka a me na holoholona i komo maluna aina ia, e uku pakahi dala ia no ke poo. E lilo kela i Kanawai mai kona ia e laha aku ai ma ka nupepa Kuokoa J W Kahele
Niumalu Kauai Fei 11 1875 702 4t 705
E HOIKE ANA ke kula hanai o Wailua Oahu, iloko o Iune 16. Ma ke kakahiaka, ahiahi, a me ka po. Ma ia po no hoi e hoikeia ai na kii nani lua ole mai na aina e mai, a e mele ana na haumana, e haiolelo ana, a pela aku. Uku komo, he hapaha no na makua, he hapawalu, no na keiki. E hio ana kela mau dala no ka hoonee ana i ka hale kula a pili me ka hale noho 701 4t 704
Hoolaha a na Luna Hooko Kauoha
OIAI UA HOOKOHUIA mai na mea nona na inoa malalo iho e ka Hon A. Fornander, I mau luna Hooko Kauoha no ka waiwai o EDMUND SAFFERY o Honuaula Maui, i make, nolaila ke noi ia aku nei ka poe a pau i aie iaia a e hookaa koke mai a o ka poe a pau he mau koina ka lakou, e hoike koke mai iloko o ka malama eono mai kela la aku. WILLIAM SAFFERY
JAMES SMYTH
Ulupalakua Maui Mar 30 1875 Na Luna Hooko Kauoha
HE PAPA KUHIKUHI MANAWA HOLO
O KA
MOKUAHI HAWAII
KILAUEA
KAPENA MARCHANT!
Mei 31 Poakahi… hora 5 pm No Hilo me Kaunakakai malalo a maluna mai
Iune 7 Poakahi.. hora 5 pm Kaapuni ia Hawaii
Iune 14 Poakahi.. hora 5 pm No Hilo
Iune 21 Poakahi.. hora 5 pm No Hilo me Kaunakakai malalo a maluna mai
Iune 30 Poakolu.. hora 5 pm Kaapuni ia Kauai,
I ka huakai hoolele pipi ole a Kilauea i ka Maalaea, alaila, e hoaoia ana e hiki i Honolulu i ke ahiahi Poaono.
Ma na huakai a pau a Kilauea e hoi mai ai mai Hawaii mai, aole e haalele ana ia Makena a hiki i ka hora 7 AM a mahope iho paha ; aole hoi ia Maalaea a hiki i ka hora 9 A.M. a mahope iho paha.
Uku Eemoku mai Honolulu aku
A hiki i Kaunakakai, a pela maluna mai….. $ 5.00
“ Lahaina “ “ ….. 6.00
“ Maalaea “ “ 7.00
“ Makena “ “ 8.00
“ Mahukona “ “ 10.00
“ Kawaihae “ “ 10.00
“ Kailua “ “ 10.00
“ Kaawaloa “ “ 10.00
“ Hilo “ “ 12.50
“ Kau, “ “ 12.50
Aole aie no ua uku ohua.
Ma ka Hale Oihana e loaa’i na palapala.
Aole keena o hope e lilo, ala wale no a kaa mua mai ka uku moku- Aole e ili ka hewa no ka paiki, ukana a puolo paha, ke ole e kakauia ka loaa ana mai
E hookaala ka uku ukana i ka wa e noiia aku ai.
SAMUEL G. WILDER ( Waila ) .
Agena
Keena ma ka Hale Kuai Papa o Waila ma, kihi o Alanui Papu me Moiwahine.
696 3m 709
KOLOA & WAIMEA.
OIAI, UA HIKI MAI I O MAKOU NEI Kekahi lono, na hoolaulaha hewa ae ia kekahi poe i ike ole ia e makou, me ka olelo ana o ka holuholu mau ana o ke kuna KAMAILE mawaena o na awa o Honolulu a me Koloa a me Waimea Kauai, ke kokoke nei e hoopau ia ka holoholo ana ma ia mau awa, nolaila, ke hoike oiaio loa aku nei makou me ka maopopo, o kela moku kuna, ua hoopaa aelikeia me ka Mahiko o Koloa no ka makahiki hookahi mai ka la mua mai o Novemapa, 1874 ; a nolaila ma ia mea, e hoomau aku ana no oia i ka holoholo ana ma na awa o Koloa a me Waimea, e like me ka hoolaha , koe wale no na poino ulia.
Ke hoao aku nei hoi makou i ka poe nana i hoolaha i keia lono, e hoopa ia no lakou no na lilo a me na poho e ili mai ana ma kela ano hoolaha hewa a lakou.
BOLLES & CO. Agena
Honolulu Apr 3 1872 696-tf
OLELO HOOLAHA HOU
E IKE AUANEI NA KANAKA a pau loa, na Pake, Haole, Pukiki a kanaka maoli ia
AHI PAKE
Hale kuai ma Alanui Nuuanu, Helu 63, Hale Paikii malalo, e loaa no ia oukou na mea a pau loa me ke kumukuai e emi loa, me ka makepono loa no hoi. E loaa no hoi
Na MAMALU, MOE KOA, PAHU LOLE, PAHU KUPAPAU, PAKAUKAU,
PELA ULUNA, KAMAA MAIKAI, PAIKII
Nolaila e hele mai oukou ma ko’u hale hana i ike pono i ka emi loa o ke kumukuai o ko’u hale.
Honolulu Mar 12 1875 691 6m 707
E. STREHZ, ( AILUENE, )
HAAWI A KUAI
LAAU LAPAAU.
AIA MA MONIKAHAAE, KIHI O NA HUINA o na Alanui Papu a me Hotele. Aia malaila na Wai Ala a me na Wai Rukini maikai loa e loaa ai.
E hamama mau ana i na ahiahi Poaono a pau
689 1y
CECIL BROWN
Loio a he Kokua ma ke Kanawai !
A HE AGENA NO KA HOOIAIO ANA I NA Palapala no ka mokupuni o Oahu.
Helu 8 Alanui Kaahumanu, Honolulu, H.P.A.
668 1yr
KA KAUKA KILA LAAU OLA
KUPANAHA
KA HOOLA NUI NO NA NALULU
A me na Eha – Rumatika, no na mai i puka mai ma ke ano e o ka Opu, no ke Ake a noke Koho paha.
Oiai he laau kupono keia ae ka ohana e malama ai ma ka hale, a he oi ae hoi ke ola i na Laau lapaau e ae, kona pakele, hilinaiia a me ka maopopo loa. He mau lau nahele maoli wale no keia a me ka Huaale Ola Kupanaha, eia ma na Hale Kauka a pau.
O GEO. C. McCLEAN oia ka Agena aui no keia Pae Aina. 684 6m
KO KALEPONI
LAAU KUNU OLA
A ME KA MAI HANO
He nui na Palapala mai na Haole e ae e hooiaio mai ana i ke
Ola io maoli o keia Laau Kuna a Hano.
O KEIA KA LAAU OLA A MR. F.L. SUCH NO NA MAI
- MA KE –
Ake – Mama, ka Ha o ka Leo, Ke Anu, ke Kunu, Kunu Kalea, Na Eha a pau ma ka Puu.
E OLA NO HOI NA MAI HANO IKAIKA, KA UMII I KA HAUPO
A o ka poe Mai Ai – ake e loaa no ka oluolu nui ia lakou, ke ai i keia Laau.
NO LOKO MAI O NA LAU NAHELE KEIA LAAU, AOHE MEA INO O LOKO
NA KA POE E LAWE ANA E IKE I KA OIAIO
Na Rula o ka inu ana.
No Kanaka Makua – 2 puna nui, i ekolu inu ana i ka la
No Kamalii – 1 puna nui, i ekolu lau ana i ka la.
No Kamalii Aiwalu – 1 puna ti, i ekolu inu ana i ka la
A ina e mau ana no ke koii o ke Kunu, inu iki no mawena o na inu ana ekolu.
No ka hanu – E inu i ka wa e hiki ai ka ho, a mahope iho.
No ke Anu – aia no i ka wa e inu ai, o ka po a me ke ao.
No ka Puu Eha – E hoonui a e inu pinepine a hiki i ka emi ana o ka eha.
No ka Ehaeha – E inu liilii me ka hoea mau nae.
No ke Kunu Kalea – E inu ae e like me ka ikaika o ke Kunu.
No ke Kaniai Eha – He pono inu ao, a aole e emo o ka pau no ia o ka eha, a poha maikai ka leo
E loaa no keia laau lapaau ma ka Hale KuaI o
DILLINGHAM & CO.,
AHIKOE ANO HOU.
Ma ka Hale Kuai Mea Hao o Dillingham
& Co., e loaa ai keia Ahikoe maikai.
He Hookahi Tausani a me ua Haneri keu no ka KENIKENI. Nani maoli no keia
Nuhou o ka Haole.
DILLINGHAM & CO.
636 3m 709 Alanui Alii
OLELO HOOLAHA
A. S. HARTWELL, ( HAKAWELA )
LOIO !
UA MAKAUKAU AU E HANA, A E HOOponopono hoi i na Palapala Hooilina, Palapala Kuai, Palapala Moraki a me na mea a pau e pili ana i ka Oihana Loio. 670 1y
EDWARD T. O’HALLORAN
LOIO !
UA MAKAUKAU I KE KAKAU Palapala Hooilina a kuai, me ka hoaie dala pu no ka uku panee haahaa no ka moraki aina ; me ka kuhikuhi pu aku ma na Kanawai ke makemakeia, no ka hooponopono ana i na waiwai paa.
Keena Hana, ma Alanui Papu, ma o mai o ka Hale Kuai o Mr. Ira Richardson, Honolulu…
696 3ru 709
J. PORTER GREEN,
“KEIKI O KAUAUKIUKIU. “
LOIO !
E HELE MAI NA MAKAMAKA A PAU IO’U nei a na’u no e kokua ia oukou imua o ka Aha Hoomalu a me ka Aha Kiekie, me ka uku haahaa makepono loa. Aia kou Keena hana ma kahi o ka Lunakanawai Hoomalu o Honolulu nei, ola ka “Aiko,” ma Alanui Kalepa 634 1y
KO DR. TROUSSEAU,
( KAUKA FARANI. )
HALE KAUKA A KEENA OIHANA,
ula ma ke kihi o na huina o na Alanui Papu a me Kalepa. 681 1y
FREIL & LAINE ( Alani ame Laiue. )
NA MEA KUAI MEA AI o na lako ai a pau na mea ulu, a me na mea hoomomona lio. Halekuai malalo o ka Hale Mu, Alanui Papu, Honolulu. 670 1y
NO KE KUAI
BERENA PAILATA
makepono.
BERENA PULUKAI
ai a ka Moa.
PAAKAI o KAKAAKO,
ma ke eke a tona paha.
WAHIE o ke ano maikai, oki a liilii ke
makemake.
NA POHAKU, Pou.
KIMO PELEKANE
( Jas. I . Dowsett ),
Kihi o Alanui Moiwahine a me Papu 696 3m 709
KA B. H. LAIANA
LAAU LAPAAU AWILI OLA.
A o na mai ino, e laa ka
Rumatica, Ka Hano, Ka hei o ke kino, Ka Pohapoha o ka ili, Nawaliwali o ke kino, Na mai wahine, Na mai o ke puu, ke ake a me ka puuwai !
E nana i ke kuhikuhi
E loaa no ma ka Hale Kuai e
Dillinghama ma,
Honolulu Oct 1874 Agena
696 3m 709
OLELO HOOLAHA.
Lole Makepono ke Kuike !
E LOAA NO IA MA KAHI O
KAKELA ME KUKE
E LAA NA
AHINAHINA, KALAKOA, KEOKEO, LEPONALO, Pena, Aila, Aniani, Na Mea Piula, Kopa, Kaula, Noho lio, Hulu-palaki, na Palumi.
A he Agena no hoi no na Mokupuni o Hawaii nei no na
LAINAKINI-NAO, LAINAKINI-MAOLI, PALULU KALAKOA, ALAPIA, KELEPA, KILISA,
Na lole kupono i ka wawae, Palule $Holuholu, Holuholu, Na Lole ao ka hoohehelo ana
Lipine, Lihilihi, a me ia mea’ku
A HE
MAU MEA AI KAHI
Ka Palaoa, Kopaa, Raiki, Pia, Hoohu, Paakai Hoohu, Paakai, Huaala, Pia Kuliaa, & c.
A HE
LAAU LAPAAU KAULANA LOA
A DR. JAYNES
Laau Kunu, Laau Hoomaemae Koko, Laau hoopau naio, Peaikila, Huaale,
A me na Laau Hamo, aipela ‘ku.
656 1y