Ka Nupepa Kuokoa, Volume XIV, Number 20, 15 May 1875 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XIV. HELU 20.         HONOLULU, POAONO, MEI 15, 1875.    NA HELU A PAU 702.

PAU NA PUPUPU KAHIKO!
E pani me na Hale Laau!
PAPA! PAPA! PAPA!
O KELA ME KEIA ANO,
---A ME---
NA LAKO KUKULU HALE
O KELA ME KEIA ANO, MA KA
PA-PAPA O S. G. WAILA MA!
---KIHI O---
ALANUI PAPU me ALANUI MOIWAHINE, no ke Kumukuai HAAHAA
LOA! ae like ka nui me ka makemake.
-----
LAAU NOUAIKI!
NA LAAU KAOLA,
                         NA PAPA MANOANOA,
                       NA PAPA HELE,
                       NA KUA,
                                       AAHO,
                                        AAHO LIILI, &c.
           LAAU ULAULA!
LAAU KAOLA,
NA PAPA MANOANOA,
NA PAPA HELE,
NA KUA,
AAHO, POU,
AAHO LIILII,
MOLINA, &c.
Pili Cida keokeo, Pili Laau ulaula,
Na Puka Hale, o na ano a pau,
Na puka Aninni, o na ano a pau,
Na Olepelepe Puka, o na ano a pau,
--------
Pepa Hale me na Lihilihi.
--------
NA LAKA PUKA!
NA AMI-PUKA,
                       NA-AMI PUKA LIILII,
                  NA KUI NAO.
----- ---
PENA, AILA-PENA, VANIKI,
WAI HOOMALOO.
---------
- PAAKAI Helu 1,
O PUULOA.
-----
E lawe wale ia no na mea i kuaiia mai keia Pa-papa aku a i kahi o ka mea kuai mai, ina ma ke kaona nei, a ma na Awa o keia Paeaina e like me ka aelike.
-----
Aia maanei ke Keena o ka
                 MOKU MAHU "KILAUEA,"
         D. TAYLOR, KAPENA.
-----
S G. Waila Ma.
614-3m
683 3m 696

HE KAAO ARABIA!
NO KE
KANAKA LAWAIA!
KE KUMU O KA POMAIKAI.
Unuhiia no ke Kuokoa, mai ka Buke Arabian Nights mai, a i ka Olelo Hawaii.
KA MOOLELO O KE ALII HELENE―KANA KUHINA―ME KE KANAKA NAAUAO DUBANA.
HELU 3.

            MA KEKAHI po mai, noonoo nui iho la o Dubana iloko ona, no kana mau mea i lohe ai. A i ka o ana mai o na kukuna malamalama piha o ka la maluna o na mea a pau o ka honua me ka lewa, hoomaikai ae la oia i ka nani o ka inoa o ke Kaula Mahometa, a kahiko iho la oia iaia iho i kona aahu nani maemae, i kupono no ka hoike ana aku iaia iho imua o ke alo alii, a hele aku la imua o ke Alii a kulou hoohaahaa iho la oia imua ona, a haawi ae la oia i kekahi pule, e noi ana i ka Hake e haawi mai i ka mana a me ka pomaikai, e hoomaikai ana iaia ma ke ano pono e makaukau ai ia, a olelo aku la, E ke Alii, ua lohe iho nei au i kou mai pilikia a kou poe kanaka e lele ino nei me ka pihoihoi, a he nui no hoi na kahuna i ike ole i ke ano maoli o keia mai ou e ke Alii, a aole hoi hookahi o na kahuna o kou kulanakauhale ponoi nei e hiki ke hoola i kou mai; nolaila, ua komohia mai iloko o'u ka ehaeha welenia o ke kaumaha, a ke noi haahaa aku nei au i kou lokomaikai e ka mea hanohano, ina he  mea oluolu i kou manao ka hookuu ana mai ia oe malalo o ka'u mau alakai ana a pau, alaila ke manaopaa nei au, he hiki loa ia'u ke hoola ia oe, me kuu haawi ole aku i kekahi laau hooinu, aole hoi i kekahi laau hamo mawaho o kou ili e ke Alii.
            I ka manawa i lohe ai ke Alii i keia mau olelo a Dubana, kahaha iho la o loko o kona naau, a olelo ae la, Pehea la e hiki ai ia oe ke hoola i keia mau mea? ma o Alahe la, ke i aku nei au ia oe, ina e hiki ia oe ke hoola i keia mai o'u, alaila e hoowaiwai aku no au ia oe a i kau mau keiki a me na keiki a kau poe keiki, a e noho oluolu pu hoi oe me au, a o kau mea a pau e makemake ai e loaa no ia me ka hakalia ole, a e lilo no hoi oe i hoaaloha maikai no'u a mau loa aku.
            I ka pau ana o kana kamailio, hoolei aku la oia i ke kaula gula o ka hanohano maluna o ke kanaka naauao Dubana, me ka ninau hou aku, E ola io ana anei keia mai o'u ia oe me ka lapaau ole ia me kekahi laau?
            Olelo aku la o Dubana, Ae, he hiki loa ia'u ke hoola ia oe me ka hoopilikia ole aku i kekahi o kou mau kanaka.
            Ai ka lohe ana o ke Alii i keia mau olelo a Dubana, pihoihoi loa iho la oia, a olelo aku la, E ke Kanaka Naauao akamai, i ka wa hea a i ka la hea hoi e hiki ai ia oe ke hoauhee aku i keia pilikia nui o'u. E wiki e kuu keiki, oiai, ke hoolohe nei au ma kau mau kauoha a pau.
            Alaila, hoi aku la o Dubana mai ke alo aku o ke Alii, a hoolimalima iho la i kekahi hale mawaho o ke kulanakauhale, i wahi e waiho ai kana mau buke kauka a me kana mau laau lapaau.
            Mahope iho, wae ae la oia i kekahi o kana mau laau lapaau, a hana iho la o kekahi laau maoli, ua hana hakahakaia nae o hope o ua laau nei, a malaila oia i waiho ai i kana mau laau lapaau, a hana pu iho la no hoi oia i kekahi popo nui me ke akamai lua ole. A i kekahi la ae, mahope iho o kona hooponopono ana i keia mau mea, hele aku la oia imua o ke Alii, a kulou hoohaahaa iho la imua o kona alo, a olelo aku la, e kau oia (ke Alii) maluna o kekahi lio holomaikai a e holo aku me na laau nei me ka paani ana me ka popo nui.
            Kauoha ae la ke Alii i kona mau Kuhina, na Kiaaina, na Luna Koa a me na alii koikoi o ka aina a pau, e hele mua ma kahi o Dubana i hoomakaukau au i kana mau mea kupanaha, a i ka hiki ana aku o ke Alii ma kahi i hoomakaukau ia ai nona, haawi mai la o Dubana i ua laau nei i ke Alii a olelo mai la, E lawe oe i keia laau ma kou lima, a e hoopololei oe i ka holo ana a kou lio ma kahi i waiho ia ai ka popo, a e hahau iho oe me ka laau au e paa la me kou ikaika a pau, a hiki i ka wa e hoomaka mai ana kou poho lima a me kou kino holookoa e ma-u i ka hou, a ia wa no auanei e holo ai ka laau a puni kou kino holokoa; a i ka wa e pau ai kau hana ana i keia mau mea a'u e hoike aku nei ia oe; alaila, e hoi aku oe i kou hale auau, a e auau oe me ka wai huihui me ka hoomaemae ana i kou kino holookoa a puni, a i ka wa e pau ai kau auau ana, alaila, e hoi aku oe maluna o kou wahi moe, a malaila oe e hooluolu ai ia oe iho no kekahi mau minute pokole; mahope iho o ka hala ana o ia mau minute, e ike auanei oe ua nalowale keia mai ino mai kou kino aku, a e loaa ana no hoi ke ola maikai ia oe i like me mamua.
            Ia wa puliki ae la ia a paa iloko o kona lima, a hoomaka aku la ia e holo me kona lio, a iaia e holo ana maluna o kona lio, hoolei aku la o Dubana i ka popo a hoopololei aku la ke Alii i ka holo ana mahope o ka popo a hahau iho la me kona ikaika a pau, mahope iho o ka pau ana o ka ke Alii hana ana pela, hoi aku la oia a kona Hale Alii a komo aku la iloko o kona hale auau, a hoomaemae iho la iaia, a hoi aku la iloko o kona hale a hiamoe iho maluna o kona wahi moe, aia nae, iaia e moe ana maluna o kona wahi moe no na minute he iwakaluakumamalima, ala ae la oia mahope o ka hala ana o ia mau minute, a nana iho la i kona ili, ike iho la ia ua nalowale kona mai a ua pau hoi kona pilikia, ua aiai mai kona ili e like me ke aiai o ka wai dala, a i kona ike ana i keia mea, piha loa iho la oia i ka hauoli me ka mahalo ana i kona hoola.
            I kekahi kakahiaka ae, komo aku la ke Alii iloko o ka Hale Alii a noho iho la maluna o kona Noho Kalaunu, alaila, hele mai la na alii na Lunakanawai a me na Kuhina imua ona, me ka haawi ana mai i ko lakou hoomaikai palena ole imua ona no kona pakele ana mai na lima aloha ole o ka make. A hoike pu mai la no hoi o Dubana imua ona, a i kona ike ana aku iaia, holo aku la oia me ka mama loa a paa iho la i kona mau lima a lawe mai la iaia a hoonoho iho la iaia ma kona aoao.
            A kauoha ae la ke Alii e hoomakaukau ia kekahi papaaina nui me na mea ai o kela a me keia o na ano a pau, a i ka makaukau ana o na mea a pau, noho iho la lakou e ai me ka olioli nui. A i ka uhi ana mai o na eheu o ka po maluna o ka honua, haawi aku la ke Alii i elua tausani apana gula ia Dubana, a kau ae la ia maluna o kona lio a huli hoi aku la no kona home.
            I ka wa i hala aku ai o Dubana, olelo aku la ke Alii imua o kona mau alii me ka i ana, E o'u mau alii, ua hoola mai keia kanaka ia'u mamuli o ke kokua a ke Akua, me ka lapaau ole mai ia'u me kekahi laau lapaau ma o Alahe la ka mea kiekie, ua hookoia ka hana a keia kanaka naauao nui wale, a ua loaa mai ia'u ka pono, nolaila, e like me ka maikai o kana mau hana i hana mai ai maluna o'u, pela no hoi au e haawi aku ai i ka hanohano pau ole maluna ona; a e hoolilo aku no hoi au iaia i hoaaloha no'u a mau loa aku, e like me ka loihi o ko'u ola ana ma keia ao.
            I ka pau ana o kana olelo, hoi aku la oia ma kona rumi a noho iho la me ka hauoli nui no ke ola ana o kona mai, a me kona ala hou ana mai ka lua o ka make mai. I ka hoike ana mai o na kukuna wela o ka la hoi hou aku la oia a noho iho la maluna o kona Noho Alii, akoakoa mai la na Kuhina a me na alii a pau imua ona, a pela no hoi ma kona mau aoao elua, ua hoonoho iho la nae oia i na kuhina ma kona aoao akau a me ka hema, a hele mai la o Dubana a kulou hoohaahaa iho la imua ona, a ike mai la ke Alii iaia, olelo mai la oia, E ko'u hoaaloha e hookokoke mai oe ma ko'u aoao, a hele aku la oia ma kona aoao me ka hanohano piha, a hoonoho iho la iaia ma kona aoao. A hoomakaukau mai la na kauwa lawelawe a ke Alii i na me ai maikai loa, a waiho mai la imua o lakou, a ai pu iho la lakou me ke Alii; o ka lua hoi keia o ka Dubana ai pu ana me ia, me kona haawi hou aku no hoi iaia i kekahi makana makamae. Mahope iho o ka luana oluolu ana me ke Alii a hiki i ka napoo ana o ka la, olelo hou aku la oia iaia, e haawi hou aku ana no ia i kekahi mau makana hou me na apana gula he hookahi tausani, a hoi aku la.
            Ma kekahi kakahiaka ae, hele hou aku la no ke Alii ma kona Noho Alii e like me ka mau. Akoakoa mai la na Kuhina a pau imua ona. Aia nae mawaena o kekahi o kona mau Kuhina, kupu ae la ka manao ino iloko ona, me ka manao huwahuwa lokoino ia Dubana no ka hoopunahele ia e ke Alii, me ka hoohanohano ana aku iaia a me ka hoolawa ana aku i kona mau iini a pau, nolaila, ua hoopihaia ua Kuhina nei i ka ukiuki, me ka hoike ana aku i na olelo pahele imua o ke Alii, e pili ana no ko Dubana ano a me kona kulana, i hoohalikeia me ka wanana kahiko e olelo ana, Aole he mea i nele i ka inaina; eia hou hoi kekahi, O ka inaina, aia no ia iloko o ka naau kahi i waiho ai, o ka ikaika ka mea nana e hoike mai, a o ka nawaliwali ka mea nana e huna aku.
            Ia manawa ku ae la oia a hele aku la imua o ke alo o ke Alii a kulou hoomaikai iho la imua ona; a pane aku la, E ke Alii, ka makua o keia lahui holookoa, ka mea nana na pomaikai me na waiwai he nui, i haawi manawalea wale aku ai i na kanaka he lehulehu. Ua loaa mai ia'u kekahi olelo ao kupono e hoike aku ai ia oe e ke Alii, ina paha wau i manao e huna i keia mea, he oiaio, e kuia mai ana me oe kekahi pilikia. Aka, he mea paha ia no'u e lilo ai i mea hoomanao ole ia e ko ke ao nei, a i mea uuku loa hoi imua o kou alo e ka mea hanohano, a kapa ia mai paha au he kipi kiekie a hehena lapuwale o keia malamalama nani a me keia noho ana maluhia. Nolaila, ina ua iini kou puuwai a me kou mau aa-koko no ia mea, he hiki loa ia'u ke hoike aku ia oe me ka hakalia ole.
            Ua hoopihoihoi nui ia ae la ko ke Alii manao no keia mau olelo a kona Kuhina. Nolaila, ninau aku la ia, Heaha ia mea nui a'u e hoolohe aku ai ia oe? Ia wa olelo aku la ke Kuhina iaia, E ke Alii nani hookahi, ua oleloia e ka poe kahiko, O ka mea e nana ole ana mamua, aole no ia e hoopomaikai ia mai ana. Ano ua ike au i ke Alii, aole oia i hahai mahope o ke alanui pololei; no ka mea, i kona wa i haawi aku ai i ka pomaikai me ka hanohano nui maluna o kou enemi, ka mea e imi mai ana i wahi nou e haule ai mai kou noho ana hanohano a maluhia hoi, ua hana aku oe me ke aloha iaia, me ka hoolei ana aku iluna ona i ka hanohano piha me ke kiekie, me ka hoolilo ana iaia i hoaaloha a hoa kuka hoi no na wa a pau; a nolaila, ke lelele nei ko'u oili no ke Alii i ke kumu o keia mea.
            A lohe ae la ke Alii i keia mau huaolelo, ku iho la ia me ka makau nui a ano e ae la kona mau helehelena, a pane aku la, Owai keia mea au e olelo mai nei he enemi no'u, a ia wai hoi au e haawi nei i ko'u aloha, a e hoohanohano nei hoi?
            Alaila pane aku la ke Kuhina, Ina ua hiamoe ke Alii, e pono ia e ala mai! E olelo ana au no ke kanaka naauao Dubana, i kona ano kona kulana a me kona makemake i hiki mai ai ianei.
(Aole i pau.)

O KA MALAMA PONO IA ANA O NA MEA LIILII, HE MEA IA E LILO AI I MEA NUI.

            Eia wale no ka mea i makemake ia ma keia kumumanao, o ka lilo ana o na mea liilii i mea nui; i na pela ka manao, alaila, he pono no ke olelo ia iho, pehea la e lilo ai na mea liilii i mea nui? Eia, o ka malama pono ia o na mea liilii, pela e lilo ai i mea nui. He mea maopopo keia a akaka lea ke lawe i mai a hookahua ia na hoike no keia mea, i na e hoomanao ia ana, o ka hua kulina a ke kanaka mahiai i kanu ai ma kana mahinaai, he mea liilii no ia, aka nae, i na e malama ponoia i mea kanu ma ka hana ana i ka paa puni, i maluhia na holoholona, aole e komo ma kahi i kanuia ai keia hua ma ka lepo, alaila, he malama ana keia e lilo ai keia mea makalii i mea nui a hoohua mai mahope maluna o keia mau kino lehulehu na hua he paapu, i pookela aku i kona manawa i kanuia ai i kinohi keia anoano ma ka honua, mamua o ka wa aole i kano ia.
            Ke hoomanao nei a'u ma keia ano i kela mala kulina, ma ka aoao hema ponoi aku o kakou e noho nei maloko o keia hale ano! Kekahi mau anoano i lu ia ma ke Kulaokahua e pili pu nei i keia Kulanakauhale alii o ko Hawaii nei Pae Aina. Ua ike a'u ma na la mua o keia malama, ua ulu alipolipo na lau oia mala kulina, e hoohoihoi mai ana i ka mea mahiai, a e ohi mai auanei oia i na pomaikai he nui mai loko mai o na mea liilii. Oia maoli no ka oiaio.
            Pehea hoi, aia ka hale aupuni e ku nei ma Mililani, ma ka ike pono ana o kela a me keia o na kinohinohi o na mea liilii ona paia o ka hale he nui wale ke ano, ua lilo he mea nui a kaulana, ma keia mau la e neeu nei i mua, ma ko kakou aupuni nei, a hala loa aku paha mawaho aku o na poai mai o kakou aku nei pela maoli no ke ano.
            Ke haohao nei paha oukou no keia hoohalike, i na pela, e hoopau ia manao, oiai, o ka iliili liilii i hoohui ia me ka puna, ua lilo he pohaku o ka pohaku hoi i hookuikuiia e ka noonoo akamai o ke kanaka, ua lilo i mea nui a maikai; a o na laau hoi o kela a me keia ano, i ulu mai a akoakoa ma kahi hookahi, a lilo i mea palahalaha, a laula loa, a nui no hoi, ua maopopo o ka hoohui ia ana o na mea liilii, pela e lilo ai i mea nui ke malama pono ia.
            Mai ke kulana hea i loaa ai ke kulana kiekie loa, o ka mea e noho poo ana maluna o ka oihana koa, i kapa ia mai kona pani inoa, he Alihikaua nui? Ke manao nei a'u, mai ke kulana haahaa loa, ka hoomaka ana o ka pii malie ana, ma na mea makalii, me ka malama pono, a pela e hiki ai i ka panepoo oia oihana; oia hoi keia o ka Alihikaua nui: aole ma na mea e ae e lilo ai kekahi i mea nui, aka, mai na mea makalii mai no e lilo ai i kumu, i kino nui, i lala, i lau, i pua, i hua, a lilo i mea nui loa.
            Pela no ka haumana kula e hele ana i ka imi naauao, he liilii loa kona noonoo ana, a he palupalu, nawaliwali, a no ia mea, ua hoomaka ia no oia ma ke kahua mua o ka ike ma na mea liilii, mai ka A a hiki i ka W, e hoomaa ia ai a hiki ke pau ana mai i ka inoa ponoi o kela a me keia inoa oia hua, alaila, pela e nee aku ai i na hua palua a pakolu, a pela aku. A akamai oia ma ka ike ana ma na mea liilii me ka malama pono ia i lilo loa, pela e hoomahuahua ia ai a lilo i mea nui ma na lala a pau o ka ike, ma ka heluhelu, no ka mea, he Ki ia e wehe ai i na paia paakiki o ka waihona nui o na ike he lehulehu o ka naauao, mai na mole makalii mai ka hoomaka ana, e waiho huna ana ma ka poli o kanaaupo, a i hue ia mai loko mai o na buke he nui wale ke ano, a mahope e lilo ia i mea pookela ma na ike palena ole, ke malama pono ia, no ka mea, he ukali ka ike mea helu, kakaulima, palapalaaina, a nui aku, mai loko mai o ka mole o na hua mua he 12 o na mea makalii mai, ke malama pono ia, e lilo ana ia mea nui, e like me ke Kumumanao.
            He mea makehewa paha ia'u ke helu kuapapa nui aku no keia mea oiai, he nui na kokua e hooia mai ana no keia Kumumanao, imua o kakou i keia wa ano? A ke hooki nei ka maka sila maluna o keia pepa.
S. ANAPU.
Kumukula o Waikiki kai.

[O kekahi keia o na haiolelo i haiia ma ka luakini o Wainee, i ka la haiolelo o na keiki o ke kula kiekie o Lahainaluna, e D. W. P. Laahiwa, he keiki e puka ana.]
KUMUMANAO.
KA NANI PAU OLE.

            I ka hulihuli ana ae a na lono ike a ka maka mai o a o, ua ikeia he nui ke ano o na mea nani, ka nani o ka la, oia kona hoolele ana mai i kona mau kukuna malamalama maluna o ka honua, ka nani hoi o ka mahina a me na hoku ua hoike mai lakou i ka po.
            Pela no hoi na mauna kiekie e ku ana maluna iho o ka honua, ua hoike mai lakou i ko lakou nani piha; oia ke kau ana o ka lakou maluna o lakou. Aka, iloko o keia nanehai i keia la, elua mahele nui ma ka hoomaopopo ana, ka nani mae wale a me ka nani pau ole. Penei kakou e hoomaopopo ai i kekahi mau nani pau wale, ina e kanu ke kanaka i kekahi anoano iloko o kona kihapai, a i kona kupu ana mai a mohala kona pua a nani ke nana aku, aka, i ka pa ana mai o ka welo ka la maluna o kela pua; o kona mae noia a paupu me kona nani, ua ike ia me kekahi olelo mimino ka mauu a wae wale ka pua.
            A pela no hoi ka wahine nani o kona mau papalina i ka wa opiopio, ua nani kona mau helehelena ke nana aku, aka, ina e hala he mau makahiki, alaila, o ka pau noia o kona nani, pela no na mea nani a pau maluna iho o ka honua; e like me ke gula, dala, keleawe, na hale nui i hoonaniia a me na mea nani a pau o kela a me keia ano he mau nani pau wale no lakou: Aka, o ka iini piha o ka mea e ku nei no ka nani pau ole, a heaha la ia nani pau ole?
            1. O ka naauao me ka hoopono. O ka naauao a me ka hoopono; oia ka mua o na nai pau ole a ko'u manao e lia nei, e hai aku imua o oukou e keia anaina holookoa i akoakoa mai i keia la, ua ike ku maka kakou, o ka naauao a me ka hoopono, aole ia he mau mea kino e hiki ai ke lalau lima a nana iho  i kona ano maloko a mawaho i hiki ai ia kakou ke kaena e iho me ka maalahi a koho iho he nani pau ole keia; aole, aka, ma ka hoomanawanui a me ka hooikaika e maopopo ai ke ano o ka naauao oia ka ikaika o koke kanaka uhane ma ka noonoo ana, a o ka hoopono oia ka hoonee ana o ke kanaka i kona uhane ma kana mau hana imua ma ka lalani pololei.
            O keia mau mea oia kekahi mau haawina i loaa mai i kanaka, aka, ua ike no kakou he mea palaho wale ko kakou mau kino, aole e mau kona nui, aka, e mae wale ana ia e like me na pua o ke kula, aka, o ka ikaika o ko kakou mau uhane i ka hapai ana i na hana nui oiaio o ke ola ana me ka hoopono, he nani pau oleia.
            Ke kilohi aku kakou i ka naauao o ke kuhikuhi puuone kaulana o Aigupita i ke Keneturia 17 mamua o Iesu, ma kona noho kiaaina ana a me ka hoopono ma kana mau hana i haawiia iaia, ua ike o Iosepa aia no iloko o kona lima na mea a pau i haawiia mai e kona haku; oia ka mea nana e hoohana a e malama i na mea nui a me na mea liilii, aka, i ka wa a ka wahine a kona haku i koi mai ai iaia e hookui me ka halawai, a e hooko aku mamuli o kona makemake. Eia kana i olelo aku ai i ka wahine a kona haku, ua haawi mai kau kane ia'u i na mea a pau mai ka iki a ke nui; a o oe, oia wale no koe ma kona lima. Nolaila, aole au e ae aku ana i kou manao, a pehea la hoi au e hiki ai ke hana i keia hewa nui a hoino aku i ko'u Akua. Nolaila, e na makamaka e hoomanao kakou mai ko Iosepa ku ana aku i na ihe wela a keia wahine a hiki i keia la aole i emi iho ka akahi hapa tausani o kona manao a me ka hoopono, aka, ke ola mau nei oia a hiki i keia la, a hiki i ka hopena.
            Ina e nui hou ae kakou a nana aku ia Solomona ka akeakamai kaulana o ke au i hala, ua olelo ia aohe kanaka i like aku me Solomona ka piha i ka naauao a me ka noiau, ke mau nei ke kaulana no kona naauao. He oiaio o ka hoomanawanui ana o ke kanaka e loaa keia nani iaia, alaila, oia ke alapii kaulana e hiki ai i ke kanaka ke pii a loaa ke anuu o ka noho pomaikai, mai ka ilihune a ka waiwai, mai noho naaupo; a i ke au malamalama, ke hooia mai nei o Solomona, o ka naauao me ka hoopono oia ka mea e loaa ai ka pomaikai ole.
            2. Ka olelo a ke Akua. O keia ka lua o