Ka Nupepa Kuokoa, Volume XIV, Number 3, 16 Ianuali 1875 — Page 4

This text was transcribed by:	Lori Faleafine
This work is dedicated to:	ELIZABETH MA'IHU'I BROWN-PARK

Ka Nupepa Kuokoa

KE KILOHANA POOKELA NO KA LAHUI HAWAII.

Ka Papa Kuhikuhi Mana wa o na mea Kaulana o Hawaii nei.

Ka Mookuauhau a he Papa Hoomanao, i na mea Kaulana o na Moolelo o Hawaii nei.

Ua hoomakaia keia moolelo ma o kekahi Alii a Moi kaulana hoi, o Kualii ka inoa. Ua olelo ia he akua, he mana, a he koa, a he lele, a he mama. Elima puni o Oahu i kala hookahi. Ua aloha oia ia Oahu wale no, aole makemake i kekahi aupuni e ae. Ua oleloia, ua loihi kona ola ana, ua kanikoo, kau i ka puaaneane, Eha kanaha umikumamalima makahiki, ua like me (175.)

1555 Hanau o Kualii ma Kapalawai i Kailua Koolaupoko.

1567 Hoomaka ka mama o Kualii ma ke koi ana mai o Alala ma, mai Mololani hoi mai, mai Alala a Kalapueo hoi mai hookahi hoa kukui.

1583 Hoomaka o Kualii i ke koa ma Puuala ma Kahuku. Mai Alala aku, elua no hora hiki hou i Kailua.

1587 Make o Kauakahiakahoowaha a lilo o Kualii i Moi ao Oahu.

1664 Hanau o Kekaulike, i Kamaniula, ma Honolua i Maui.

1669 Hanau o Peleioholani ma Haleula, ma Koolaupoko.

1700 Hanau o Kamehameha Nui, me Kekaulike laua o Kekuiapoiwa Nui, i Paiki ma

Pakaalana, mauka o Nuu Kaupo Maui.

1706 Hanau o Kahekili ma ka po i o Akua, ma Alenuibaba.

1716 Hanau o Keaulumoku, he kanaka haku mele akamai: a he kalai aina.

1720 Hanau o Kameeiamoku laua o Kamanawa ma Apee, he mau mahoe kapu ua Kekaulike.

1720 Halawai o Lonokahikina me kona kaikaina me Kekuiapoiwa, ma Kiheipukoa.

1730 Make o Kualii, ka Moi o Oahu, a noho alii iho la o Kapiiohookalani i Moi no Oahu.

1735 Hoonoho a Kahekili, ia Kameeiamoku, me Kamanawa i Hawaii, i mau makua no kana

keiki.

1736 Hanau o Kamehmeha 1., ma Kokoiki ma Kohala.

1736 Make o Kekaulike, i Halekii, i Kukahua, ma Kapuhau.

1736 Make o Kapiiohookalani ka Moi Oahu ma Kawela, i Molokai ia Alapai ke Alii o

Hawaii .

1736 Pae mai o Alapai ma Oneawa, a kaua me Kanahaokalani.

1736 Lilo o Kamehameha Nui i Moi no Maui.

1737 Hoi mai o Peleioholani mai Kauai mai, ekaua me Alapai.

1737 Ike o Peleioholani me Alapai i Naonealaa i Kaneohe, a pau wale ke kaua ana.

1737 Make o Kanahaokalani i ka ia i ka pohaku ma Pauoa.

1737 Lilo o Peleioholani i Moi no Oahu.

1737 Kipi o Kauhiaimokuakama ia Kamehameha.

1738 Kokuaia o Kauhiaimokuakama ke ‘lii kipi e Peleioholani.

1738 Kaua o Peleioholani me Alapai ke Alii o Hawaii, o Kaleiopuu, a me Keona na pu kaua.

Ike o Peleioholani me Alapai ma Honokaua, o Puunene ka inoa oia kaua.

1739 Ua loaa o Kauhi, na Holomahana me Hikianakala, a ua lawe pio ia, a Huakini, pepehi ia, a ua moku ia i ke kai o Puhele (oia ka inoa o Kalaimoku.)

1740 Ua wawahi hana inoia na kuapa o Molokai, a ua pau kaulu nui o Oneuli, i Honuaula, a ua puhi ia o Kauki i ke alii e Peleioholani.

1749 Ua make o Keoua ma Wailoa Hilo.

1749 Ua kipi o Kalaiopuu, a me Puna, ia Alapai a kaua i Kalepolepo, i Paiei, i Mahinaakaka.

1750 Hee o Kalaiopuu ia Alapai, a lilo ia i alii no Kau a me Puna.

1752 Make o Alapai ma Kikiakoi, ma Kawaihae. Lilo ke Aupuni o Hawaii ia Keaweopala

ke keiki a Alapai.

1753 Kipi o Keeaumoku ia Keaweopala a hee, moku Kohekohe i ka moana.

1753 Halawai o Keeaumoku me Kalaiopuu ma Kailua a haawi i ka aina.

1754 Make o Keaweopla ia Kaniopuu ma ke kaua i Pookiilili.

1755 Makia ia ke Aupuni ia Kaleiopuu.

1759 Holo o Kalaiopuu e kaua ma Maui Hikina, alilo o Hana, Koolau, a me Kipahulu i

apana no Hawaii.

1764 Kaua o Kamehameha ia Puna ma Makaolehua. Ua make o Kamakaukii ia Kaohele ke

Kamaeu o Molokai. Ua loku ia na’lii o Hawaii, aole nae i hee ka Puu kaua o Kauiki.

1764 Lilo o Molokai ia Peleioholani, a ua luku ia na’lii o Kaolohaka a Keawe, o Kanealii, o

Kanealai, o Kaohele ka mea kaulana i ke kea; ua kaulai ia na iwi i Halawai.

1765 Noho alii o Kumahana ke keiki a Peleioholani no Molokai.

1765 Kipi o Keeaumoku ia Kalaiopuu i Pohaku o Manao; a hole i Maui.

1765 Hanau o Peleioholani na Kamehameha Nui me Namahana.

KA NUPEPA

1765 Hanau o Kaiioewa na Kaiana me Kekikoola.

1766 Make o Kamehameha Nui; Kanoha ke Aupuni i Nenewepua ia Kahekili, a ua noho ‘lii

o Kahekili.

1767 Kipi o Keeaumoku ma ia Kahekili, a ua kaua ma Kalaeiliili i Waihee, a pau lakou i ka

hee.

1767 Hoouka kaua o Kahekili ma Molokai Hee o Keeaumoku ma, ma ka moana, a pae i Hana; o Kalauonakukui ia kaua.

1768 Hanau o Kaahumanu ka mea kaulani, na Keeaumoku me Namahana, ma Ponohakeone, Kapueokahi.

1768 Hanau o Kalaimoku, na Kekuamanoha me Kamakahukilani, ma Makaopalena Kauiki.

1768 O Mahihelelima ke alii o Hana me ka puu kaua.

1769 He hula kaulana ma Oahu a puni ma ke kula o Alele na Peleioholaioi.

1770 Make o Peleioholani ma Wailea, a hoihoi ia ma Kailua.

1770 Ua noho alii o Kumahana ma ke Kauoha a Peleioholani.

1773 Wailana ia o Kumahana no ke pi a me ka hiamoe.

1773 Kauoha ia o Kahahana i Maui a ua hooliloia i Moi no Oahu.

1774 He alii lokomaikai o Kahahana, i ka mua o kona noho’lii ana; i ka hope o kona noho’lii

ana; i ka hope o kona noho’lii ana, he ‘lii hookuli.

1774 E noho ana o Keaulomoku me Kahahana ma Molokai.

1775 He kaua iwaena o Kahekili me Kaleiopuu.

1775 E kokua ana na koa o Kahahana mamuli o Kahekili.

1775 Hoouka kaua o Kalaiopuu me Kaneolaelae, ma ka L@ o Kailio. Pilikia o Kalaiopuu.

Ilaila o Kamehameha i kuu pau ai i kona koa (a me Kekuhaupio.)

1775 He mau koa kaulana o Kamehameha a me Kekuhaupio na Kalaiopuu.

1776 Holo mai o Kalaiopuu me Kiwalao i ka hoouka kaua nui loa ma Wailuku.

1776 Hoouka kaua a na Alapa, ilaila i make ai na’lii kaua, o Iuaina, Kuaana, o Kahehailua, a

a me Keawehano, a ua luku ia na koa e Kahekili.

1776 Halawai o Kiwalao me ke kapu alii me Kahekili a pauwale ke kaua; o Kakanilua, me

Kamokuilima na inoa oia kaua.

1776 Hanau o Hoapili kane na Kameeiamoku me ke alii o Kahekili.

1777 Hoouka kaua o Kalaiopuu ma Kaupo, a ua kapaia ia kaua o Kalaehohoa.

1777 Hoouka kaua o Kalaiopuu ma Lahaina, a ku o Kekuhaupio i ka Pololu a Pua maluna o

ka puu kaua o Kahili; ma ka opi o ka opu, a waiho no le la a hiki i kona make ana i ke

Au ia Kamehameha.

1776 Kaua o Kalaiopuu i Lanai; a ua hee ka puu kaua o Hookio; a ua luku ia o Keliaa ma, ua

hoomaewaewa ia na makaainana, a ua kapa ia o Kamokuohi.

1777 Hilahila o Keaulumoku i ka olelo ino ia o Kamehameha, a hoi i Hawaii.

1778 Ua ike mua ia ka moku mawaho ae o Waialua.

1778 Ian. 14. Ku mai o Lono (Kapena Kuke) ma Waimea Kauai.

1778 Hanau o Hoapili wahine, na Keeaumoku me Namahana Keopuolani.

1778 Kaua o Kalaiopuu ma Koolau o Maui. Ua kapaia ia kaua o Kamakamimi.

1778 Kokua o Kahekili i ko Koolau, a kaua me Kalaiopuu.

1778 Nov. Kipa ae Lono (Kapena Kuke) ma Maui Hikina.

1779 Ian. 17. Ku ka moku o Lono (Kapena Kuke) ma Keal@akekua.

1779 Feb. 14. Make o Lono ma Kaawaloa Hawaii.

1781 Hakaka o Nuuanu-paahu me ka mano ma Kauhol.

1781 Make o Imakaloa kekahi alii kipi, a ua amo ia e Kiwalao @ me Kamehameha oia hoi o

Amamalua.

1782 Make o Kalaiopuu ma Waioahukini Aperila.

1782 Ua panipaa ia ka Pukaua o Kauiki e Kahekili i ka makahiki okoa.

1782 Ua hee ka Puu Kana o Kaniki no ka wa ai ole, a ua lukuia na’lii a ua kapaia Kapikao.

1782 Iulai. Kaua o Kiwalao me Kamehameha ma Keomo, a lanakila o Kamehameha o

Mokuohai ia kaua.

1782 Lilo o Keoua i alii no Puna me Kaua o Keawemauhili no Hilo.

1782 De@. Kaua o Kamehameha me Keoua, Keawehauhili. Ilaila na koa o Kahekili

oia hoi o Kauaawa.

1782 Holo o Kahekili i Oahu i ke Kaua me Kahahana. O Kaopu a Kiikii ia Kaua.

1782 O Makaioulu me Pupuka na koa ia hoouka mua; a make o Kauhikoa kekahi ‘lii o Maui.

1782 Ekolu hoouka ana i ka ha o ka hoouka nui ana ma Kaheiki. Ua hee o Kahahana a hele

pio elua makahiki. Ua auwae aina la.

1782 Make o Kanekoa De@/

KUOKOA, ME KE

1783 Laupahoehoe mua Mar.

1783 Ku mai na moku o Kapilihakela me Alomakani.

1784 Make o Kilo Haea kekahi ‘lii i ka powaia ma Waialua.

1784 Pakele o Kahekili me Kauakapekulani Kalaikupule me Koalaukani i ka powa ia.

(Aole i pau.)

HE HIMENI!

Never turn back. Royal Diadem p. 66.

Mai huli hope na koa o Iesu,

Paa mau malalo o ko ia la hae;

Kupaa a koa i hoolanakila;

Nauwe hauoli hahai i ke ‘Lii.

Cho – Kai i ka nani, kai i ka nani,

Ma ka Baibala e kai aku ai;

Kai i ka nani, kai i ka nani,

Iesu ka Luna e lanakila’i.

Mai huli hope na hoa haumana,

Nauwe imua i ike oukou;

Hele a mau la, mai ae e haalele;

Paio i hee la koonei naaupo.

Cho. – Kai i ka nani, kai i ka nani, &c.

Mai huli hope na kumu ao kula,

Mau mau ke aho, a nee aku no;

Malama ea o kau hoa ka pouli,

Mai hiamoe, e ala oukou.

Cho. – Kai i ka nani, kai i ka nani, & c.

Mai huli hope na Kahu kahuna,

Paipai a mea i na hoahanau;

Hai a hai mau i ka euanelio,

Imi a mau i ka poe hoolalau.

Cho. – Kai i ka nani, kai i ka nani, & c.

Mai huli i hope na hoa hooluhi,

K@koo a mau i ka lei ma ke ao;

Koa ikaika a hiki i ka hope,

I kau ia lei la a olino mau.

Cho. – Kai i ka nani, kai ika nani, & c.

Hawaii .

HAAWINA KULA SABATI.

Helu 4. Sabati, Ianuari 24.

KUMUHANA – Ka Hoomakaukau ana no ke kaua.

Pauku Baibala. Iosua 5:9 – 15.

9 OLELO mai la o Iehova ia Iosua, I keia la ua olokaa wale aku au, mai o oukou’ku, i ka hoino ana mai o Aigupita. Nolaila, ua kapaia ka inoa o ia wahi, o Gilegala, a hiki mai i keia la.

10 @ Hoomoana no na mamo a Iseraela ma Gilegala, a malama iho la lakou i ka moliaola, i ka la umikumamaha o ka malalama, i ke ahiahi, ma ua wahi papu o Ieriko.

11 I ka la mahope iho o ka moliaola, ai no lakou i ka ai o ka aina, a ia la no pulehu lakou i ka ai o ka aina, a ia la no pulehu lakou i ka berena hu ole.

12 @ Ia la iho, mahope iho o ka lakou ai ana i ka ai o ka aina, oki iho la ka mane, aole mane hou na na mamo a Iseraela. A ai no lakou i kaai oka aina ma Kanaana ia makahiki.

13 @ Eia hoi kekahi, i ko Iosua noho’na imua o @@@, alawa’e la kona maka iluna, nana aku la, aia hoi @ ku mai la kekahi kanaka imua ona, me ka pahikaua i unuhiia ma kona lima. Hele aku la o Iosua i ona la, i aku la, Ma o makou nei anei oe, ma ko makou enemi paha?

14 I mai la kela, Aole, ua hele mai nei au i alii koa no ko Iehova puali. Moe iho la ko Iosua alo ma ka honua, hoomana aku la, i aku la iaia, Heaha ka kuu Haku e olelo mai nei i kau kauwa?

15 Olelo mai la ke alii koa o ko Iehova puali ia Iosua, E wehe ae oe i kou mau kamaa, mai kou kapuai aku, no ka mea, he wahi hoano kau e ku nei. A hana no o Iosua pela.

PAUKU GULA. “E nana aku ana hoi ia Iesu, i ka mea nana i hookumu, nanan hoi e hoohemolelo ko kakou manaoio. Hebera 12:3.

MELE. Mele hou. 6 – 7 Leo – Hosana Kamalii.

1 E ala, e na koa,

Na koa kamalii,

Hoomakaukau e nana

I kahi kaua e.

Ke ku la na Kanaana

E nana wiwo mai.

Kaoi i na puhaka,

E na e kaua ae.

PULE i ala na koa, na kumu, na haumana, a hoomakaukau e kaua aku i ua @@.

NA NINAU A NA KUMU.

p 9. Heaha ka i olokaaia’ku ia la? nawai i olokaa? mai ia wai aku? ma ke aha? Ka hoiao ana o Aigupita, heaha ia? Eia paha ke ano, No ka auwana wale ana o ka poe I@@raela ma ka waonohel@ iloko o na makahiki he 40, ua manao paha ko Ai, gupita poe, na haalele ke Akua ia lakou, me ka hiki ole paha e alakai ia lakou iloko o ka aina maikai o Kanaana, e like me kona hoohiki e aua.

KE AU OKOA

Nolaila, hoino ko Aigapita poe i ka poe Iseraela, me ke Akua po, hoaikola. A ma ka hoomaloo ana ia Iuredane, a ma ke kauoha ana e okipoepoeia ka poe i oki poepoe ole ia mamua, a e malama i ka anaaina berena ha ole, e ike ana ko Aigapita poe, e hooko ana ke Akua i kona hoouiki, a malaila e pau ai keia hoiool ana. A kapaia ia wahi owai? No ke aha? Aia mahea Gilegala? E huli i ike.

P 10. Hoomoana lakou mahea? A malama i ke aha? Ma ka la ehia? owai ka malama? mahea ka malama ana? Mahea ka malama mua ana? Mahea ka lua o ka malama ana? Nab 9: 1-5. Ehia makahiki mai laila mai? 38 me ka hapa paha.

P 11-12 Ia la hea? oki ke aha? a ai i ke aha? Ehia makahiki ka ai ana o ka mane? No ke aha ke oki ana? Heaha ka manao pili?

P 13-15. Ka mea a Iosua i ike ai, me he aha la? heaha maka lima? Heaha ka Iosua i ninau aku ai iaia? Pehea oia i pane mai ai? Pehea Iosua? a ninau hou pehea? a pane hou mai pehea? A, pehea hoi o Iosua? Heaha kekehi mau olelo a keia kanaka? mok 6:2-5 Ua hewa ke oki ana o ka mokuma 5 ma ka pauku 15. Me ka pauku 5 o ka mokuna 6 ka pono. O ka pauku i o ka mokuna 6 e komoia iloko o na apo, pepei ( ). Owai keia kanaka? Mahea kekahi mea like? Puk. 3:2-5

Mele. Mele hou. 7-6 Leo.

1 Na mea hoowalwale,

Satana, ko ke ao,

Lakou na Kanaana,

Na pa o Ieriko,

E eu a kaua aku,

Paolele ia Iesu,

Oia ka Alihikaua,

A lanakila no.

NA NINAU A KE KAHU.

Na Kane Heaha ke kumuhana? Heaha na hana e pili ana i ka hoomakaukau ana no ke kaua? 1 Ke oki poepoe ana. 2 Ka malama i ka ahaaina moliaola. 3. Ka hoomakaukau ana i na pu puhi. Owai ka poe i pono ke okipoepoeia? Ka poe i hanau ia ma ka waonahele. Me ke aha i okipoepoeia’i? Heaha na pahi Hawaii mamua? Ma ke aha ke okipoepoe mua ana?

Na Wahine. Mahea ka ahaaina moiaola mua? Mahea ka lua? mahea ke kolu? Ehia makahiki mawaena o ka lua a me ke kolu? Heaha ka hana mua mamua o ka ahaaina ana? Pono anei ke ahaaina mamua o ke okipoepoe ana? Ehia la makahiki o kekahi hapa o keia poe i okipoepoe hope ia? 38 paha. No ka mea; no ke aha? Pehea ka loihi o ka malama ana i ka ahaaina berena hu ole? ma ka malama hea? la ehia?

Na Keikikane. Hai mai i na hana hoomakaukau. Pehea ka pili ana ia oukou? E poe koa makou no Iesu. Owai na enemi? Pehea ka hoomakaulkau ana e kaua aku? E hoohiki e – e bapetizoia e ka Uhane Hemolele. E ai i ka berena oke ola, i ka olelo a Iesu, a e pili aku iaia.

Na Kaikamahine. Ua hoinoia ka poe Iseraela e ko Aigupita poe a me ko lakou Ajua, no ke aha? Ma ke aha i pau ai? Hoinoia anei oukou e ko keia ao? No ke aha? Ma ke aha e pau ai? Hoinoia anei ke Ajua e kekahi poe? No ke aha? Ahea pau? Ma ke aha?

Na Pokii. Hai mai i na mea i maopopo ia oukou ma keia Haawina, 1 Ke okipoepoe ana me na pahi pohaku. 2 Ka malama ana i ka Ahaaina Moliaola. 3 Ke oki ana o ka mane – Ka ai ana a ka poe Iseraela i ka ai maoli o ka aina. Ka anela a Iosua i ike ai.

Ai ka poe Iseraela i ka mane no na makahiki ehia? 40 paha. A oki no ke aha? no ka loaa ana o ka ai maoli o ka aina. Heaha ka ai na ka uhane? Owai kela Anela a Iosua i ike ai? O Iehova. Heaha kana kauoha ia Iosua? E wehe i ke kamaa, & c. Maha kahi hoano i keia wa?

Na Kumu. Ua hoopaneeia ke okipoepoe ana me ka malama ana i ka Ahaaina moliaola ma ka waonahele ane 40 makahiki. No ke aha? Heaha ke kumu o ko Aigupeta hoino ana? Ma ke aha i pau ai? Ma ka hoopili ana peha? Heaha kana imua o kakou? Heaha na hana pili i ka hoomakaukau ana? Heaha na pani no ke okipoepoe ana, a me ka ahaaina moliaola? Heaha na pu, a nawai e hookani? A owai ka Luna kaua? Heaha ka hope?

Mele, Mele hou. 6 – 8 Leo.

1 E makaukau na pu,

Na mea hookani e;

A lohe i ke kani ae,

Ku a nauwe awiwi.

2 E nana ia Iesu,

Ka Luna kaua no,

Me kakou ia a mau a mau,

E pau na Ieriko.

Pule i ala like a hoomakaukau a nauwe aku e wawahi i na Ieriko, & c.

Hawaii.

HAAWINA KULA SABATI, Helu 5, Sabati Ianuari 31.

Kumuhana. Ka lawe pioia ana o Ierike.

Pauku Baibala, Ioasua 6:12 – 20.

12 @ Ala mai la o Iosua i ke kakahiaka nui, a hapai ae la na kanaka i ka paha o Iehova.

13 A o na kahuna ehiku e lawe ana i na pu kiwi hipa ehiku, mamua o ka paha o Iehova, hele ae la lakou me ke puhi i ka pu; a o ka poe i makaukau i ke kaua, hele ae lakou mamua o na kahuna, a o ka hooapae, hele ae la ia mahope o ka pahu o Iehova, a hele lakou me ke puhi i ka pu.

I HUIIA.

14 Hookahi no ko lakou poai ana i ua kalaoakauhale ia, i ka loa o ka lo; a hoi mai la lakou i kahi i hoomoana’i; a pela lakou i hana’i i na la eono.

15 A i ka hiku o ka la, ala lakou i ka wanaao, a ehiku ko lakou poai ana i ke kulaoakauhale, e like me ka mea mamua; ehiku hoi ko lakou oai ana ia la.

16 A i ka hiku o ka poai ana, i ka wa i puhi ai na kahuna i ka po, alaila, olelo ae la o Iosua i kanaka. E hooho oukou; no ka mea, ua haawi mai o Iehova i ke kulanakauhale no oukou.

17 @ A e laa kela kuianakauhale ia Iehova, oia, a me na mea a pau iloko. O Rababa, o ka wahine hookamakama, oia wale no ke ola, oia a me na mea a pau iloko o ka hale me ia, no ka mea, nana no i huna i na elele a kakou i hoouna aku ai.

18 E malama hoi oukou ia oukou iho i na mea i laa, o laa oukou i ko oukou lawe aua i na mea laa, a hoolilo oukou i ka Iseraela i mea laa, a hoopilikia hoi ia lakou.

19 A o ke kala a pau, a me ke gula a me na ipu keleawe a pau, a me ka hao, e kapu no ia mau mea no Iehova. E komo no ia iloko o ka waihona kala o Iehova.

20 A i ko lakou puhi ana i ka pu, hooho aku la na kanaka; a lohe na kanaka i ke kani ana o ka pu, a me ka hooho nui ana a na kanaka i hooho ai, alaila hiolo ka pa ilalo, a pii aku la lakou i ke kulanakauhale, o kela kanaka keia kanaka ma kona alo iho, a pio ke kulanakauhale ia lakou.

Pauku Gula. “ No ka manaoio i hiolo ai na pa o Ieriko i ka pau o ka hoopuni’na i na la ehiku.” Hebera 11:30.

Mele. Mele hou, 8-7 Leo.

Ala, ala, na kahuna,

Me na koa o Iesu,

Lawe i na pu hookaoi,

Nauwe, a hookani pu.

Poai, poai, a pahiku

I koonei mau Ieriko,

E hooho, e paulele,

A hiolo iho no.

Pule no na kahuna, na kumu, na haumana i ala a naue a poai a hooho, a hoohiolo, i na pa o Ieriko ma ka manaoio.

NA NINAU A NA KUMU.

p 12-14. Owai ka i ala? i ka wa hea? A aha na kahuna? Pahu aha keia? Ehia kahuna i lawe i na pu? ehia pu? pu aha keia? lawe mahea? hele me ke aha? Owai ka i hele mamua o na kahuna? Owai mahope o ka pahu o Iehova? hele me ke aha? Ehia poai ana ma ka la? A hoi lakou i hea? Ehia la ka poai pakahi ana?

P 15, 16. Heaha ma ka hiku o ka la? Ehia poai ana? Ma ka hiku o ka poai ana, heaha ka Iosua kauoha? No ke aha e hooho ai?

P 17. E aha ke kulanakauhale o Ieriko, Laa, heahaia? Laa no ke aha? i hoopau loa ia ke kulanakauhale me na mea ola a pau maloko. Owai ka mea e hoopakeleia ana? me ke aha? mok. 2:4 A no ke aha hoi keia hana a Rababa? Heb. 11:31

P 18. Heaha ke kauoha? a malama ole heaha ka hope? Pilikia loa, ea.

P 19. Heaha kekahi mau mea aole e hoopauia ana? E komo ana ke dala, &c. iloko o ke aha? No ke aha? Aole paha i hewa ke dala, &c.

P 20. Hana anei lakou e like me ke kauoha? A pehea ke kulanakauhale? Ma ke aha e hiolo ai? Heb. 11:30.

Mele. Mele hou, 7 Leo.

1 Nui no na Ieriko,

Na kauhale hewa no,

Me ua aina @@@upo,

Na ohana o kakou.

2 Ku, poai a pule pu,

E paolele ia Iesu,

I hiolo e na pa,

A pau ae na mea laa.

3 I hookoeia nae

Na Rababa aloha e.

Na ohana lelepau

Ia Iehova ke Lii mau.

NA NINAU A KE KAHU.

Na Makua. Heaha ka hana kupanaha ma keia Haawina? Hai mai i ka nui o na mea i pili I keia hana? 1 Ka Iosua kauoha mai ke Akua mai, p. 3-5, 10. 2 Kahele ana, ke puhi ana, ka poai ana, ka hoolio ana.

Na Keikiana. Ma ka poai ana ia Ieriko, heaha ka i hele mamua? Owai ka i halihali i ka pahu berita? Mahea na hunapaa? Penei paha ka poai ana: 1 Na @@@@lewa. 2 Na kahuna 7 me na pu 7. 3 Na kahuna o halihali ana i ka pahu berita. 4 Na hanapaa. No ke aha ka hele ana pela? I malama pono ia ka pahu berita, kapu a ano nui.

Na Kaikamahine. Pehea ka nui o ka poai ana? Ma ka la ehia ka pahiku o ka poai ana? Ka la 7. Ka Sabati ane ia? Pela paha. Ka Sabati ka la @@@@ nui no ke Akua. Ma ka poai ehia i puhiia i na pu a hooho nei na kanaka? A i ka wa e hooho nui ana kanaka, pehea na pa o Ieriko? Mahea ka mana i hiolo ai @ pa? Mana anei ka hooho wale ana? me ke puhi wale ana i na pu 7? Mai ke Akua mai ea, ka mana. Hai mai Heb. 11:30.

Na Poku. Owai keia kulanakauhale? Ieriko. Ua poai i ke aha? I ka pa pohaku kiekie loa. Kahale owai maluna o kekahi kihi o ka pa? Ka hale o ka Rababa Heaha ka Rababa aloha i na @@ elua? Hookipa, a hoopakele ia laua i ka make ma ka huna ana ia laua. No keia hana aloha, ua ana ia Rababa me kona ohana? Ua hoopakeleia i ka make. I ka wa hea? I ka wa i hoohioloia’i na pa o Ieriko. Pehea i maopopo ai kahi i ka ai ka hele o Rababa? He lipine ulaula i @@@@? Heaha ka mea i hiolo ai ma pa o Ierito? Hai mai i ke ano o ka poai ana. Ehia pu puhi? Heaha ka hana a na kanaka? Hooho nui a hiolo wale na pa. Ma ke aha e hiolo ai na mea hewa? Ma ka pule, &c.

Na Kumu. Heaha ka manaoio ko Ieriko poe i ko lakou poai ana i na puka o na pa? Owai ka poe hoohalike? Ina manao ke Akua e luku, pakele anei ke hoole aku? Pehea na kanaka i ka wa ia Noa? Pehea hoi ko Sodoma ma? ko Parao ma? ka poe Iseraela hookuli ma ka waonahele? Heaha kekahi hana like me keia puhi ana i na pu i ka wa ia Gideona?

Maloko o ke aha ka mana i hiolo ai na pa o Ieriko? Mahea ka oi o ka mana, ma ka poai wale, puhi i na pu, a hooho nui o kanaka anei? ma ka pule, a paipai, a himeni paha? Ua like pu anei? Heaha ka Iesu olelo no ka manaoio ma Mareko 11:22-24? Nolaila, nohea mai ka mana? Heaha ka hana mahope o ka hiolo ana o ua pa o Ieriko? Heaha ka kakou hana mahope o ka pule, me ka paipai a me ka himeni? Hai mai i na Ieriko na Rababa o keia wa, a me ua hana e hana’i.

Mele. Mele hou, 8 Leo.

1 Ua pau na pa o Ieriko,

Na mea ola ua pau pu.

Pakele nae Rababa ma

Ma kona kihi o ka pa.

2 Makau oukou, na hoomalau,

O hoopaiia me Ieriko.

E hoohalike kakou nei

Me ia Rababa aloha e,

3 Kau i ke koko o Iesu

Me ia lipine ula no,

Malaila e pakele ai,

A kala, ia a pomaikai.

Pule no na Ieriko me na Rahaba, &c.

HAAWINA KULA SABATI NO Feb. 7.

Iosua 16:26. Pauku Gula Luka 12:15.

Hawaii .

KE KUOKOA NO 1875.

E ike auanei na kanaka a pau, mai Hawaii @ Kauai, ma keia, ke hoike aku nei ao, e hoomauia aku ana no ke pai ana o ke KILOHANA POOKELA O KA LAHUI HAWAII i ka makahiki 1875; a e hoounaia aua na pepa i ka mea a mau mea i uju mua wale no maloko o ke op@ a ma ka wahi pakahi paha e like me ka makamake o ka mea i hookaa mai. O ka uku nupepa o ka makahiki, e mau ana no ia e like me ko keia wa, he

ELUA DALA WALE NO!

ma ke kuike nae, oia ka rola.

KII MAKANA O KAMEHAMEHA 1!

No ka poe hookaa mua iloko o Ienuari, he Elua Dala o @@ kope no ka makahiki, e haawi makana wale aku ana makou i ke kii o ka Na-i Aupuni Kaulana Kamehameha I. Aia ma Nu Ioka kahi i hoomakaukauia ai a nani loa, aka, e hiki mua mai ana maanei mamua o ka hoomaka ana o ka makahiki hou. Aole loa e hooanaia’na i kekahi mea ina aole i hookaa mai, aole hoi i kekahi kauoha me ke dala pu ole mai.

E hoomaopopo ka poe lawe nupepa, ina aole e ukuia kekahi nupepa e hoonoaia ana mamua iho o ka la 1 o Feberuari, alaila, e hoopaaia ana ia pepa me ka hooloihi ole. O ko makou rula keia i lohe ka lehulehu, no ka mea, aole e hiki ia makou ke pai i na nupepa me ko oukou uku ole.

E hoonaniia ana ka pepa me na wehewehe manao maikai, naauao, na hou o na Aina e, na ao hou kuloko, na palapala ano naauao, na kaao a me na mea ano like. E hooikaika ana makou e oi ae ko keia makahiki mamua o kela i hala. A oiai hoi, e hoihoi ia mai ana ia makou ka hooponopono o ka Aoao 4, ma ka la 1 o Ianuari, nolaila, ke manao nei makou, e nui loa ana na mea heluhelu i keia makahiki 1875 ae, a e makepoao ana ke dala ke lilo ao ka ai a ka noonoo.

Ke paipaiia aku nei na Luna a me ka poe Lawe Kuokoa, o keia makahiki 1874, e hookaa mai i ko lakou mau koena aia i keia manawa me ka hookauloa ole, o nele auanei lakou i ka nupepa ole no ka makahiki hou. H. M. WINI,

Loaa Hoopuka.

KA NUPEPA “KUOKOA!”

Hoopuku mau ia

I KELA POANO KEIA POAONO.

$2.OO no na mahina Umikumamalua

$1.00 No na mahina @

ME KA HOOKAA MUA MAI.