Ka Nupepa Kuokoa, Volume XIII, Number 49, 5 December 1874 — Page 1
| This text was transcribed by: | Trinette |
| This work is dedicated to: | ku`u kaikamahine, Hokuaoka`ale |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XIII. HELU 49. HONOLULU, POAONO, DEKEMABA 5, 1874. NA HELU A PAU 679.
E Pau na Pupupu Kahiko!
E pani me na Hale Laau!
PAPA, PAPA, PAPA
O KELA ME KEIA ANO,
A ME
NA LAKO KUKULA HALE
O KELA ME KEIA ANO, MA KA
PA-PAPAO S. G. WAILA MA!
KIHI O
ALANUI PAPU me ALANUI MOIWAHINE, no ke Kumukuai HAAHAA LOA! ae like ka nui me ka makemake.
LAAU NOUAIKI!
NA LAAU KAOLA,
NA PAPA MANOANOA,
NA PAPA HELE,
NA KUA,
AAHO,
AAHO LIILII, &c
LAAU ULAULA!
NA LAAU KAOLA,
NA PAPA MANOANOA,
NA PAPA HELE,
NA KUA,
AAHO, POU,
AAHO LIILII,
MOLINA, &c
Pili Cida keokeo, Pili Laau ulaula,
Na Puka Hale, o na ano a pau,
Na Puka Aninni, o na ano a pau,
Na Olepelepe Puka, o na ano a pau.
Pepa Hale me na Lihilihi.
NA LAKA PUKA
NA AMI-PUKA,
NA AMI-PUKA LIILII.
NA KUI NAO
PENA, AILA-PENA, VANIKI
WAI HOOMALOO.
PAAKAI Helu 1,
O PUULOA.
@ E lawe wale ia no na mea i kuai ma ai keia P@ P@p@ aku a i kahi o ka mea, kuai mai, iha ma ke kaona nei, a me na Awa @ keia P@ @ like me ka aelika
Aia maanei ke K@ o ka MOKUMAHU "KILAUEA,"
L. MARCHANT, KAPA@.
S.G Walla ma.
670 3@
"Lei Kalaunu."
1.
No Kauli lua i ke anu,
O Kawaihau o na moku,
O Liliu la o Kapili,
Na hiwahiwa o ke Aupuni.
Cho. --- Hoonani nui i ke `Lii,
Ia Kawaihau o na moku,
Lei nani o ke Kalaunu ;
E ola, e ola ka Moi.
2.
No lakou nei Pae Moku,
Me na kai e pili ana,
Mai luna no a lalo,
A kau a mau loa.
Cho. --- Hoonani nui i ke `Lii, &c. &c.
3.
Malalo o kou malu
Na `lii no a pau,
Me na makaainana,
O ke Aupuni Hawaii.
Cho. --- Hoonani nui i ke `Lii, &c. &c.
4.
E mau loa e ka welo ana,
O ka Hae Kalaunu,
Malalo ou e Kalani,
Wehiwehi o ke Aupuni.
Cho. --- Hoonani nui i ke `Lii, &c. &c.
ALE & NIC
Honuakaha, Nov 26, 1874.
HE
KAAO ARABIA
NO NA
Huakai Holomoku Ehiku
A
SINIBADA KA LUINA
Unuhiia no ke "Kuokoa" mai ka Olelo Arabia a i ka Olelo Haole, a mai ka Olelo Haole a i ka Olelo Hawaii.
HELU 5.
I KO`U ike aku, me he mahinaai nani la ka aina holookoa i hoopihaia i na hua ai. Hoopiha iho la au ia loko iho o`u me na hua ai i loaa ia`u, a hina aku la au e hookuu i ka makemake o ko`u mau maka, a moe iho la. I kekahi la ae, ala mai la au me ka maluhiluhi ole, aka, ua kaumaha loa ia nae au no ka pau loa ana o ko`u mau hoa hele i ka make.
No ka oluolu o ka aina, hooholo iho la au i ko`u manao, e komo lea loa aku iloko o ka aina, e huli ai i kahi o kanaka e noho ana. Aole au i komo lea aku iloko o ka aina, hiki aku la au ma kapa o kekahi kahawai, a ike aku la au he wahi kanaka elemakule uuku, a me he la i ka hoomaopopo aku, ua nawaliwali oia a oopa. Aloha aku la au iaia, a hoihoi mai la no kela i ka`u aloha ana aku, me ke kunou ana mai o kona poo, a kuhikuhi mai la na lima, me he mea, la e i mai ana, e hapai iaia maluna o ko`u hokua, a lawe aku ma kela kapa o ke kahawai. A no ko`u manao hoi, ua makemake oia e loaa ona kokua nana e hapai iaia ma kela aoao, a he kanaka maikai la oia, nolaila, ae aku ia, a lawe aku la au iaia a kaa ma kela aoao, a kulou iho la au ilalo, i mea e hoholo aku ai la hoi oia mai luna aku o ko`u ai me ka maikai, aole nae oia i hana pela, aka, hoomaka koke ae la ko ia la mau wawae e puliki i kuu kania-i. Ike iho la au, ua like kona ili me he hao la; [uliki ae la kela ia`u a paa ma na kipohiwi, me kuu manao e hoohina ana la kela ia`u.
He keu aku ko`u makau a me ka haalulu, i ka ike ana iho i ko`u kulana ia wa. Ke noho la no ka elemakula iluna o kuu ai. A iaia i ike ai, ua mao ae la kuu makau nui, e hahau mai ana kela ia`u me kona mau wawae pokopoko, alaila, ku ae la au a lawe aku la iaia ma kahi ana e makemake ai e hele. I ka po ana iho, kuhikuhi mai la oia ia`u e moe ilalo, me ka mau no o ka hauhili o kona mau wawae ia`u ; a i ke kakahiaka ae, iaia i makemake ai e ala, hahau mai la ia`u me kona mau wawae, me ke ano he koailona ia e ala ai, me ia no maluna o kuu a-i.
Ma keia ano au i noho kauwa ai na keia wahi tanta ino no kekahi manawa loihi, me ka hookuu ole mai i wahi manawa pokole no`u e hele ai me kona kau ole ma ko`u a-i.
I kekahi la hoi, loaa iho la ia`u kekahi umeko ma ke alanui, a i ko`u holoi ana ae iaia a maemae, a hoopiha iho la au me ka waina hua i hele a pala maikai, a waiho aku la ma kekahi wahi. He manawa mohope iho, hele aku la au e nana i ua umeke waina nei, a i ka hoao ana ae, aia ka ua maikai. Inu ae la au me ka lealea, a pii mai la na hoi ka manaoio ikaika, hoomaka ae la ka waha i ka himeni, a lelele ae la na wawae ma ke alanui kahi e hele aku ai.
I ka ike ana iho o ua elemakula mei, ua komohia au e ka waina, kuhikuhi mai la na lima ma ke ano e nonoi mai ana, e haawi aku nona kekahi mea e inu ai. Haawi aku la ai i ka umeke holookoa, a i kona hoao ana, ua makemake loa oia, a nolaila, ua hoopapau loa kela e nui ka inu ana. Aohe no i liuliu iho ia inu ana, ona iho la oia, a noho iho la me ka hio i o ianei, a poina iho la kona noonoo ana no`u, a hemo ae la ka puliki ana a kona mau wawae ia`u. Lana ae la ko`u manao, o ko`u wa pono ia e kiola ae ai iaia. Ku ae la au a maloeloe, a kiola iho la iaia iluna o kekahi puu lepo, a pili iho la kona houpo, a hiki ole ke hanu ae; kii aku la au i kekahi pohaku nui, a paki iho la maluna o kona poo, a make iho la oia.
Olioli loa iho la au i ko`u pakele ana, a hoi hou aku la i kapakahakai, kahi hoi o`u i halawai aku ai me kekahi moku, ua hookuu iho ka heleuma, a e holo mai ana ka waapa e ukuhi wai.
Mai a lakou i lohe mai ai au, o ko`u kulana ia wa, ua oi aku ia mamua o na pilikia e ae a`u i ike ai mamua. "Haule aku la oe," wahi a lakou, "iloko o na lima o ka elemakule oloko o ke kai, a o oe wale no ka mea i pakele mai la mai kona puliki ana ; a oiai, aohe mea e pakele ana ke paa mua mai iaia i kinohi, nolaila, e oi loa aku ana kona ukiuki i ka poe e hana ino aku iaia, a e make koke ana lakou, ahoe mea e pakele ai, a he keu wale aku la no oe."
Hookipa aloha aku la ke Kapena ia`u, a kena mai la e lawe i ke awa kahi a kona moku e holo aku nei. Aole i haalele mai ia`u ko`u pomaikai.
Ia makou hoi i ku aku ai i ka aina, mua ae ia mai au e ka lokomaikai o ke Kapena, e hui pu aku me ka poe aukai. Haawiia mai la ia`u he eke nui, me ka hoonaauae pu mai, e hahai au mahope o ke alakai ana a ko`u mau hoahele, a mai noho a haalele ia lakou.
Hele pu aku la makou i ka ulu nahele e ku koke mai ana, nona na kumu laau nioniolo loloa, a ua hele no hoi a pahee hiki ole i ke kanaka ke pii iluna. A ia makou hoi i koke aku ai, ike aku la makou he anaina keko nui, aka, i ko lakou ike ana mai ia makou, pau nui aku la lakou i ka naholo, a pinana aku la iluna o na laau, e imi i wahi no lakou e pakele ai. Nou aku la makou me na pohaku i na keko, a pehi mai la hoi na keko me na hua niu ; ma keia ano huhu o na keko, i hoohalawaiia ai makou me na hua ai waiwai nui, a makou la paha e loaa ole aku ai, ina o ka pii maoli ae mamuli o ko makou ma@a wale iho.
Mamuli o ka houluulu akahele ana i na niu i koilaia mai ai e na keko, i ku ai he puu ahua nui. Lawe pu aku la au maluna o ka moku i keia heluna niu lehulehu, i kekahi awa ku moku e aku, kahi hoi a`u i piepiele aku ai, ma ka nioi mai ka lakou, a he niu aku ka`u ; a mahope o kekahi manawa, ku aku la makou i Balasora me ka waiwai nui.
Haawi hou aku la o sinibada i ka aipuupuu i kana makana mau, me ke kauoha pu aku, e hele hou mai i ka la apopo, e hoolohe i ka
HUAKAI HOLOMOKU EONO A SINIBADA.
I kekahi manawa mahope iho o ko`u ku ana mai, hooholo pu iho la ko`u mau hoa kalepa e holo hou; a aole lakou i hoopau wale a hiki i ka wa a`u i ae aku ai e holo pu me lakou.
Kau aku la makou maluna o kekahi moku, a holo aku la me ka makani maikai i kekahi wa, me ka ike aina ole ia, aka, no ko makou hilinai i ke ola o ka moku mamuli o ka ike o ke Kapena, nolaila, aohe mea e makau ae ai. A mahope loa, i ka wa a ke Kapena i ike ai, ke lawe ia nei ka moku e ke au, hooho ae la ia me ka leo puiwa, "Auwe! pau kakou i ka make e!" Kanoha ae la ia, e huki na pea a pau o ka moku, a e hooholo ma kahi e pakele ai. Eia nae, aohe mea e pakele ai, mokumoku wale mai na kaula.
A iloko hoi o ko makou hooikaika nui ana e pakele ka moku, ke huki nei no ke au a hoopili aku la malalo o kekahi pali kahakai kiekie, kahi o ka moku i ili iho ai a nahaha liilii.
Pau aku la i ka make ka nui o makou, a koe ke Kapena a me elua luina a me a`u; a ua poholehole wale no hoi na ili o lakou la, a owau wale no ka mea i paholehole ole. Hai mai la ke Kapena ia makou, aohe o kakou manaolana, e pakele ana kakou ke noho maanei, no ka mea, aohe moku e hiki ke hookokoke mai maanei, no ka ikaika o ke au o keia wahi i ka huki i ka aina.
Ma keia olelo a ke Kapena, ua komo like iloko o makou ka manao mihi; a ma ka makou ike pu no hoi, ua hiki ia makou ke hooiaio pu aku. O kahi hoi a makou i pae aku ai, ua paapu i na wae o na moku i ili mua malaila, a e ahu mokaki mai ana na iwi o ka poe i make olulo malaila.
O ka waiho wale ana mai o na waiwai makamae kahi e ika ia aku ai e ka nalu, he hookanaho wale mai no ia i ke kaumaha i loaa ia makou, no ka hiki ole ke hoopakele.
I kekahi la ae, make aku la na luina elua mai na palapu mai paha i loaa ia laua, a mai kekahi mai e ae paha, aka, aole au i ike; a mahope iho, make aku la ke Kapena, a koe wale iho no owau iloko o keia kulana kupilikii. Aka, no ko`u maa no paha i na popilikia i hala e aku mamua, hoomaka koke iho la no au e hele aku e nana i ke ano o ka aina, me ka imi i kahi e pakele ai. I ka huli ana aku i na mauna, aohe wahi e hiki aku ai ke pii; aole no ke kiekie wale no, aka, no ka hele a maumania. Loaa pono no hoi ia`u ma ka hakilo ana, he au hoihoi i ka aina ko laila, a oia ka ke kumu o ko makou pilikia ana.
Ua aneane au e hoopau i ko`u manao lana no ka pakele, aka, olaa e iho la ia`u he kahawai e kahe ana ma ke kumu o ka mauna, a na keia kahawai i houluulu mai i na laau pae, a hiki ae la au, loaa he waapa maoli. I ka paa ana o keia, imi hele aku la au i ai na`u e kau iho ai. Loaa koke no ia`u na leho a me na opihi; halihali mai la au i keia mau mea ai a hookau iho la maluna o kuu waapa nui kupono, me ka hilinai au na ke au e lawe aku ia`u ma kahi e loaa ai ka pakele ana.
Mamua o kuu kau ana, hoiliili e mai la au i na daimana, na pohaku waiwai nui, na momi a me na waiwai makamae he nui, a hauhoa iho la au ia mau mea a pau iloko o ke kukaa hookahi, a hikiikii mai la a paa i kuu waa apana laau, a oki iho la i ka hekau a`u i hoopaa ai, me ka mana e pomaikai ana no au.
Lawe ae la ka ikaika o ka wai kahe ia`u, ma kekahi wahi ololi malalo o ka mauna, i hele a aaki ka poeleele. Ua holo au maluna o keia wahi waa no kekahi mau la lehulehu, me ka ai pakiko i ka`u wahi mea ai i hoolako ai. A mahope loa, pau iho la ka`u wahi ai, a noho aku la me ka pololi, a poniuniu mai la, haule iho la moe. O ka loihi o ia hiamoe ana o`u, aole au i hoomaopopo, aka, ia`u i puoho ae ai, ua pae aku la kuu wahi waa i kahakai. a e poai puniia ana au e na negero.
Aia nae i ko`u ala ana ae, aloha aku la au ia lakou, a kamailio mai la lakou ia`u, aka, aohe nae o`u lohe aku; a no kuu piha loa i ka olioli, hooho leo nui ae la au ma ka olelo Arabia, penei, "E kahea aku i ke Akua Mana Loa, a e kokua mai no kela ia oe; aohe a`u mea e makau ai, no ka mea, o ke Akua ka mea nana e hoano e i kou popilikia i mea maikai."
Eia kahi mea i kanaho iki ae ai au, o kekahi o na negero, ua lohe wahi olelo Arabia; a mai a ia mai, i lohe mai ai au, i loaa kuu wahi waa ia lakou ma ka muliwai, kauo ia e lakou i kula, aka, moe no nae me ke ala ole, a kakali no lakou a hiki i kuu wa i ala ae ai. Ninau mai la nae oia, "Ma ke ano hea la oe i komo ai iloko o keia kulana pooilikia?" Hahai aku la au i ko`u moolelo, a na ka paele hoi i unuhi aku i ka nui paele o lakou.
I ka pau ana o kuu hahai ana aku i kuu moolelo, nonoi mai la lakou ia`u, e ae aku e lawe ia`u e hoikeike i ko lakou Moi, i hai hou aku ai au i ko`u moolelo i ka Moi ponoi. Ae aku la au ia noi, a na lakou no i hoolako mai ia`u me ka lio no`u e holo ai i kahi o ka Moi; a oiai kekahi poe o lakou e alakai nei ia`u, aia hoi kekahi poe e ae o lakou, ke kauo malu mai nei i kuu wahi waa mahope a me kuu ukana pu no kekahi e alakoia mai la.
I ko`u hiki ana aku i ke alo alii, ua apo aloha mai la ka Moi, a ae mai la i kekahi keena kaawale o kona Halealii, i wahi no`u e hooluolu ai i ko`u maluhiluhi. Iloko o ia wa a`u e moe ana, aia hoi, na hele malihini aku la au i kahi o Adamu i hoopaaia ai, mahope iho o ke kipakuia ana mai ka Paredaiso mai.
(Aole i pau.)
E KE KUOKOA E; Aloha oe:-
No ko`u ike ole i ke kumu noonoo naauao, i punukuia ai na mole o ka ike ma ke ao ana ma ka himeni, nolaila, ua ulu mai ko`u haohao no keia ninau, e like me ka mea i hoikeia maluna ae. A no ka maopopo ole ia`u o ka haawina kupono, nolaila, ke waiho nei au ma ke akea, malia o loaa ka haina o keia ninau, no ka mea, o kekahi keia o na ike e ao ia nei i na keiki o Kona, Oahu nei, aka, aole nae me ka mole pu o ka ike ke kahi.
Ke nana nei au i na kumu kula la, ua ike au, ke ao meu lakou i ka mole o ka ike, mai ka A--W, a mai ke 1--0, a pela aku no e pii ai a loaa na hua palua, pakolu, a pela aku, nolaila, naloaa ka ike a me ka maauao i na keiki, ma ko lakou alakai ana, mai ka mole mai o ka ike heluhelu a i na mea helu. Aka, o keia ike e ao ia nei i keia manawa, aole no pela, oiai aohe ao ia o na mole o ia ike. Ua kuhi hoi au, e ao ia ana e like me na manao hoolaha a na Komite hoike kula o ka M H 1874, o ka malama o Iune, e ao ia ma ka mole o ka ike Himeni, i mea e hoonui ae ai hoi i ka ike, eia ka aole! No ka mea, o kekahi keia o na ike kupono e ao ia ai i ka hanauna opio o kakou, a malaila e ulu mai ai kekahi mau hua maemae, ke ao kuponoia ma ka mole mai o ia ike; a heaha la hoi ka mea e ao ole nei ke kumu Himeni kaapuni o Kona, Oahu nei, ma ka mole o ia ike?
Ma keia ano, ulu mai la ko`u hoomanao ana i ka wa a Limaikaika e noho Peresidena ana no keia oihana, ua eleu loa na kula ia wa, me ka waiho ia ma ka lima o na kumu kula la na hooponopono ao ana a pau, aka, aole nae pela i keia wa, no ka mea, ke hele nei kekahi kumu ao himeni e ao i na keiki ma na hale kula m@ na himeni haku wale iho no, aole me ke kahua pu o ia ike. Heaha la ka waiwai e loaa ma ia ao ana? Aole loa. A no ko ko`u ike, ke hele nei kekahi kumu kula himeni e ao i na keiki ma na hale kula, nolaila, noonoo iho la au, no ka ike ole paha o na kumu kula la i ka himeni, ka mea e hele nei keia kumu kula himeni, e ao i na keiki maloko o na kula aupuni. Ina pela io, aole i loaa ia lakou ia lala o ka ike, e pono e ao ia lakou iloko o na kula kumu, a loaa ia lakou ia ike e ao aku ai i na haumana, alaila, kupono ke kahe ana o ka loaa Waihona Hoonaauao ma keia lala o ka ike himeni. Aka, ina aole e ao ia ana na kumu kula ma keia ike, alaila, he hoohaiki ana ia i na kumu kula aupuni. Aka hoi, ina e weheia ana na kula kumu me ke ao pu ia o ka ike himeni, alaila, e kanu ana na kumu i ko lakou ike iloko o na haumana, a e kahua ana ka ike iloko o lakou, e like me ka mea maa ia lakou, a hookahi no ia lilo ma ka aoao o ka Papa Hoonaauao, a e lilo ana me ka pomaikai like.
Aka hoi, ina no e ku ana me ia, a e hana ana no me keia hemahema, me ka hoopilikia wale no i ka manawa kula o na kumu. Ke i nei au, aohe pomaikai o keia hoopilikia ana, no ka mea, ina e ninau ia na haumana o na kula no ke kahua o keia ike, i na wa hoike, ke hai nei au, aohe e loaa ana ka haina. Nolaila, ua hiki no paha ia`u ke hoohalike ae i keia ao ana ma keia lala o ka ike, me ka olelo a ka manu Aloha, oiai aole oia i ike ke ano o kana mea i olelo ai, pela no na keiki e ao hemahema ia nei. Ua hiki no i na keiki ka hoopili ana mai, aka, aole nae i ike i kahi e loaa mai ai ka puana ana o ka leo. Aloha wale.
Eaie keia: ina e ao ia ana keia ike ma ke kahua e loaa mai ai keia ike himeni, alaila, e hoomauia aku no ke ao himeni ana, aka, ina aole, e hoopau loa ia keia ao hemahema ana, a e lilo no na na kumu o ia mau hale kula e hoomakau no ka lakou mau kula iho.
KANAKA HAWAII.
Make i Alohaia.
E KA NUPEPA KUOKOA E, Aloha oe :-
E oluolu kou Luna Hooponopono, e hookomo iho ma kahi kaawale o kou mau kolamu, i kela mau wahi huaolelo e kau kehakeha ae la maluna, i ike mai ai na kini a pau o kuu wahine aloha, i hala aku la ma kela aoao o keia ola @. Ua make o Mrs. Kaaiohelo, ma Kalaepohaku, honolulu, Oahu, ma ka la 8 o Novemaba, M H 1874. Ua hanauia oia ma Kahaluu, Kona Akau, Hawaii, i ka malama o Maraki 4, 1840. A ma ka M H 1856, i ka la 3 o Iune, ua mareia me a`u, kanakane i aloha nui ai. O ka nui hoi o kona mau la ma keia ao, he 33 mak., 7 mal. a me 29. He 17 hoi makahiki me 5 malama o ko mau noho pu ana, a kuu aku la kona luhi. Ua haalele mai oia ia`u a me kona ohana a pau, e noho me ke aloha a me ke kanikau@ku iaia ma keia aoao. He wahine oluolu keia, he heahea i na makamaka, a he wahine hoi i aloha nui ia e ka poe a pau i launa oluolu mau me ia; he wahine eleu a me ka lokomaikai. Ua noho loihi oia me a`u kana kane, e kiai a e malama i na pupule iloko o na makahiki ekolu, a haalele mai la oia i ka pili aloha me ke kane a me ka ohana. Ke noho nei makou me ka u a me ka minamina pau ole nona. A no ka nui o ko makou aloha nona, nolaila, ua haku iho la makou i wahi kanikau aloha nona, a oia keia malalo iho:
Kanikau aloha keia nou e Kaaiohelo,
Kuu wahine mai ka makani anu la he Eka,
E wehe mai ana i ka lau o ka niu o Helani,
A he lani nui ko aloha na`u e h@poi nei,
E kuko mau ai o ka po me ke ao,
Kuu wahine mai ka la wela o Kona e,
Aloha wale ia wahi a kaua e noho ai,
E noho pu ai hoi kaua me ka ohana,
Aloha ko kaua mau kaikuaana i ka ike ole
Aloha ka luhi o kaua he keiki, [ia oe,
Pau kou olelo ana mai ia`u i na mea kino,
A haalele i ka pili aloha la he kane,
Noho iho nei au me ka u me ka minamina
pau ole nou,
Auwe kuu hoa pili o kuu wahine--e!
Kanikau aloha keia nou e Kaaiohelo,
Kuu wahine mai ka ua kuahine la o Manoa,
Mai ka ua hehi haaheo mai i na pali.
Aloha ia wahi a kaua e noho ai e, [noa,
Kuu wahine mai ka piina loa la o puu Ma-
Hoomaha aku kana i ka wai olu o Kawai-
Lele mai ana ko`loha ia`u me he ipo`la, [lele
E hookaumaha`i i kuu manao--a,
Kuu wahine mai ka la wela o ke taona,
Mai ka pihe kanaka la o Ainahou,
Aloha ia wahi a kaua e luana ai,
Aloha no hoi oe ka hoa hele,
Ua hele wale ia no e kaua na moku a pau,
Auwe kuu hoapili o kuu wahine--e!
Kanikau aloha keia nou e Kaaiohelo,
Kuu wahine hooponopono o ke kino,
Hoa hoomanawanui o ka aina makuaole,
Hookahi no makua o na lima,
Ke kuleana hoi o ka aina makamaka ole,
Pau kou lohe ana i ka leo o na keiki a ka-
Aloha ka leo e kau mau kane, [ua,
I ka ninau iho. "Auhea o Kaoiohelo ?"
Kuu wahine a ka hale kanaka nui,
Kuu wahine o ka la kanaka nui,
Hoolaukanaka i ka leo o na pupule,
Kuu wahine mai ke u maka uliuli o Kalaepohaku,
E hoopeepee`e ana i ko aloha e nalo e,
Haina mai e ka waimaka e,
I ikea no i ka uwe ana iho--e,
Auwe kuu hoa pili o kuu wahine--e!
WM. NAKAULA.
Kanikau aloha keia nou e Kaaiohelo,
Kuu kaikaina mai ka wai pukaiki o Helani
Mai ka wai awili pu me ke kai,
Aloha ia wahi a kaua e noho pu ai e,
Kuu kaikaina mai ka makani anu he ke hau
Mai ka uka anuanu la e Waohale,
Aloha ia wahi a kaua e hele pu ai e,
Ua pihia e kaua ka ua me ka la
Ke anu hoi me ke koekoe, [kauhana,
Kuu kaikaina mai ka pihe uwalna o Ma-
Mai ka la kanaka nui la o Hanaliilii,
Aloha wale ia wahi a kaua e noho pa ai e,
Auwe kuu kaikaina hoi--e!
MARY HALAUWAI.
Kanikau aloha keia nou e Kaaiohelo,
Kuu makuahine mai ka la wela o Kona,
Mai ka wai kuihui o Waiakapo,
Aloha wale ia wai a kaua e auau ai e,
Kuu wahine mai ke malu niu o Waikuaala
Mai ka malu hale la o Mahihale,
Aloha ia wahi a koua e noho pu ai a!
Pau kou hoomanaa ana mai ia`u,
Ke au nei au aole e loaa,
Ua haalele mai oe i ka pili aloha la me a`u,
Auwe kuu makuahine, kuu minamina
pau ole ia oe a!
CEALARAINA KAAIOHELO.
Kanikau aloha keia nou e Kaaiohelo,
Kuu kaikamahine mai ke kai malino a E@
Mai ka ua nana i ka maka o ka opua,
Kuu kaikamahine hoi e!
Kuu kaikamahine mai ka nalu haimuku e
Mai ka ai hoomanalo i ka wai e, [Kapu@
Kuu kaikamahine e!
Kuu kaikamahine mai ka ia weli i ka po e,
Mai ka ai lewa mai i ka makani,
Mai ka wai ula la o ka aina.
Kuu kaikamahine o kuu wa keiki ole,
Auwe! kuu kaikamahine hoi--e!
L. HOA.
Kanikau aloha keia nou e Kaaiohelo,
Kuu kaikaina mai ka wai lamalama i @
Mai ka uka a@ o Konalele, [kukui,
Kuu kaikaina hoi e!
Kuu kaikaina mai ke @ @ uliuli @ Awa-
Mai ka piina loa o Ka@ [@
Aloha ia wahi a kaua e hele ai e!
Kuu kaikaina hoi e!
Kuu kaikaina mai ka m@le o ke kukui,
Mai ka ua olelo mai iluna o la @,
Hoolaau mai ana au i ke aloha aole @,
Auwe! kuu kaikaina hoi--e!
@