Ka Nupepa Kuokoa, Volume XIII, Number 45, 7 November 1874 — Page 4

This text was transcribed by:	Harriet Miyasaki
This work is dedicated to:	Awaiaulu

Ka Nupepa Kuokoa

KE KILOHANA POOKELA NO KA LAHUI HAWAII.

Ka Nupepa Kuokoa

Sounding the Watch Cry.

Royal Diadem, p. 18.

Hookani kaua, naue pu,

Kau i na hana no Iesu,

Na hoa koa, ku, ku, ku,

E naue oli ae, a mele pu.

CHO. E kanikani kaua, nane oli no,

Kanikani kaua, a e kaua pu,

Kani kaua mau la, kaua ikaika o

I loaa ka lei.

Paipai a naue, naue pu,

Hoonani aku ia Iesu,

Hauoli ae ke ao a pau,

Homana ia Iesu, i ke Lii mau.

CHO. E kanikani kaua, &c.

Mai kanalua, mai makau,

Hoopili aku ia Iesu,

Nona mai no na pomaikai,

E ku a hoomaikai a mau loa’e.

CHO. E kanikani kaua, &c.

Paipai a nane, na pokii,

Kau i na hana o ke Lii;

Oukou na koa o Iesu,

E kana nona mau, a alii pu,

CHO. E kanikani kaua, &c.

HAWAII.

HAAWINA KULA SABATI.

HELU 47, SABATI, NOV. 22.

KUMUHANA—Ka poni ana ma Betania.

PAUKU BAIBALA Mareko 14: 3-9.

3. ¶ A i kona noho ana i Betania, iloko o ka hale o Simona ka lepera, e ai ana ilaila, hele mai la kekahi wahine me ka ipu alabata, he mea poni ko loko, he aila ala, he mea kumukuai nui; a wehe ia i ka ipu, a ninini iho la ia iluna iho o kona poo.

4 Huhu ae la kekahi poe iloko o lakou iho, i ae la, No ke aha la i hoomaunaunaia’i keia aila?

5 Ina paha i kuaiia’ku ia, ekolu, haneri hapawalu a keu aku paha i loaa mai, i mea haawi aku no ka poe ilihune. Ohumu iho la lakou i ua wahine la.

6 I mai la o Iesu, Uoki , no ke aha oukou e hoino aku nei ia ia? He mea maikai kana i hana mai nei ia’u.

7 Ua mau loa ka poe ilihune me oukou, a e hiki no ia oukou ke hana maikai aku ia lakou i ua manawa a pau a oukou o makemake ai; aka, owau, aole au e mau loa ana me oukou.

8 O ka mea hiki ia ia nei, ua hana io mai ia; a ua hele mua mai e poni i ko’u kino, no ko’u kanuia.

9 He oiaio ka’u e olelo aku nei ia oukou, Ma na wahi a pau loa ma ke ao nei e hai ia’ku ai keia euanello, e hai pu ia’ku no hoi ka mea ana i hana mai ai, i mea e hoomanaoia’i oia.

PAUKU GULA. Pauku 9. Hoopaanaau.

MANAO NUI. Minamina ole ke aloha i ka waiwai o keia ao.

MELE. “Because He loved me So.” The P@ize p. 12.

E oli a hoonani

I kuu Iesu maikai,

I iho mai ka lani

I ola e ola’i.

He keiki hewa au la,

Ua lilo nae Iesu

I Kalahala no’u la,

No kona aloha ia’u.

He oli ko’u ke mele

I kona aloha mai,

Hoolohe olu kela

I kuu hoomaikai ae.

Ua ae e hele au la,

Ke pono no a mau,

E mele me na anela,

No kona aloha ia’u.

PULE—i mau ke aloha ia Iesu, a oi aku ia i ke aloha i na mea e ae a pau.

NA NINAU A NA KUMU.

P 3. Mahea Iesu? Mahea Betania? Owai ka ohana aloha ia malaile? Aia Iesu loko o ka hale owai? Owai keia Simona? He lepera oia mamua, ua hoolaia nae e Iesu. Ma kekahi mooolelo, o Simona ka makuakane o Lazaro ma-a ma kekahi, ke kane keia a Mareta. He pili kine no oia no Lazaro ma. He aha ma kona hale? Ioane 12:2 Owai kekahi hoaai? Ua aha Lazaro mamua? Owai ka i lawelawe? Owai he kaikaina o Mareta? Heahe kana i lawe mai a ninini mai mahea? Ma ke p@ w@ o Iesu? Ioane 12:3. Ipu alabata, houha ia? He pohaku keokeo maikai @ (al@) o @ o @ pop@? @pa @kahi wahine @? L@:3@, @. Ok@?

P 4. Pehea kekahi poe? A ninau pehea? Owai ka haumana mea i hoopuka i kona hoohalahala? Ioane 12:4-6. No ke aha i hoohalahala ai Iuda Isekariota? Ioane 12:6.

P 5. Ina kuaiia keia mea poni, loaa mai ke aha? 300 denari a oi, ua like paha ia me 45 dala. A kumakaia Iuda ia Iesu no na dala ehia? 11 paha. Ua hui anei na haumana a pau ma keia ohumu ana? Aole anei he poe ohumu maanei no ka haawi ana i ke dala no na aina e; oiai, he nui ka poe ilihune maanei?

P 6. Pehea Iesu? oluolu anei? hoahewa paha i ka wahine? Owai ka i ohumu mamua ia Maria? Luka 10.39, 40. A hoapono Iesu ia wai? Luka 10:41, 42.

P 7. Owai ka poe i mau me kakou? a hiki ke aha i ka poe ilihune? Owai ka mea e noho mau ole ana me na haumana? Ma ke ano hea o Iesu e noho mau ole ana me lakou? A ma kona ano Akua, e aha ana oia? Mat. 28:20.

P 8. Ua aha keia wahine? Ua hana oia ia Iesu e like me ka mea i hiki. He wahine ilihune no, aka, hiki no ke hana i keia mea poni, ma ke kuai aua, hana maoli ana pahe, a lawe a ninini maluna iho o ko Iesu kino, he mea aala, he mea hoike i kona aloha ia Iesu. Minamina ole i ka mea i lilo.

No KUU KANUIA. Me he la, ua ike Maria e aha ana Iesu? A poni e anei oia I kona kino mamua o ka make a kanuia’na? Owai ka i hoomakaukau a lawe i na mea aala e wahi ai i ke kino make o Iesu? Mat. 16:1.

P 9. Heaha ka wanana maikal no Maria ma keia pauku? Ua hookoia anei? Ua hookoia no ma na wahi i hiki ai ka Baibala, a peia no ma keia hope aku. Ina hoohalike oukou me keia wahine, e aha ia’na ka oukoa hana maikai?

MELE.-“Mele Hana.” Leo Hoomana, p.11.

Hana no Iesu i kahea mai,

Hana e ola no.

Hana a mau i keia wa maikai,

Hana a koa pu.

CHO. Launa Iesu a alu pu,

Kiai pono a kupaa mau,

E ka Makua, e hoomalu mai,

Lohe no ke pule ae.

Hana no Iesu, hana aloha no,

Hana a oli pu;

Hana a imi i ka nani mau;

Hana ikaika no.

CHO. Launa Iesu a alu pu, &c.

NA NINAU A KE KAHU,

NA MAKUA. Heaha ke kumu hana o keia Haawina? Owai ka i poniia? Nawai i poni? Ma ke kauhale hea? Ma ka hale owai? Simona hea keia? Owai oia ma kekahi mau mooolelo? He poni ano like mamua, mahea? Ma ka hale owai? Nawai i poni? Ka poni ana o Maria, ehia la ia mamua o ka ahaaina moliaola? E huli i loaa.

NA KEIKIKANE. Heaha ma ka hale o Simona? Owai kekahi ma ia ahaaina? Lazaro, owai kona mau kaikuwahine? Ke kaikuwahine hea ka i lawelawe? Owai ka i kii aku i aila poni, a kuai, a lawe mai a ninini maluna o Iesu? He mea aha? Maloko o ke aha ia aila poni? Heaha ka alabata? He ipu maikai loa anei keia?

NA KAIKAMAHINE. Ma ke aha i heomaopopo ai Maria i kona aloha ia Iesu? Ma ke aha e maopopo ai ko oukou aloha ia Iesu? Peha ka nui o na dala i lilo i kela ipu alabata mea poni? Minamina anei Maria ia mau dala he 45? Pono anei ia oukou ke minamina i na mea maikai, a haawi ole aku ia Iesu? Nui paha na mea maikai ia oukou, na lei, na lipine, na kihei, a hainaka, a apo gula, a komo lima, na lole aahu he nui wale, he mau holoholona paha, a pahea? aole anei i hiki ke haawi aku i kekahi o keia mau mea i maopopo ko oukou aloha ia Iesu?

NA POKII. Owai keia wahine aloha is Iesu? Maria. Owai kona kaikuaana? Mareta. Owai kona kaikunane? Lazaro. Ua aha oia mamua? Ua make a nalo eha la, a na lesu i hoala mai? Owai ke kulanakauhale o Lazaro ma? Betania. Aia no ia ma ke hikina o Ierusalema-ua kokoke no. Ua hanaia kekahi ahaaina ma Betania ma ka hale o Simona, he lepera mamua, ua ola nae ia Iesu. He ahaaina aloha ia no Iesu, a no Lazaro. Nawai i lawelawe ma ia ahaaina? na Mareta. Heaha ka hana aloha a Maria? Ua lawe mai i ipu aila mea aale, a wawahi, a ninini iho ma ke poo, a ma na wawae o Iesu. Ehia dala kekuaiia’ku? 46 paha. Oia hoi 300 denari a oi aku. Nui kona aloha. A pehea ko oukou aloha ia Iesu? Aole paha o makou aloha, aohe manao ia Iesu. Ma ke kino, ma ka lole, ma ka lealea, ma na mea ono ko makou manao. Kahaha ! pono anei ia? Nui ko Iesu aloha ia oukou. E aloha aku oukou iaia.

KU KULA A PAU. Hai mai i ka hoohalahala ana o na haumana i ka hana ana a Maria-ko Iesu hoopono ana iaia, a me ka wanana maikai nona, me ka hoopili ana ia kakou i keia wa

MELE “Mele Lanakila.” Leo Hoommana, p. 5

Nauwe pu, nauwe pu,

Mele a oli halelu,

Mele i ke Akua mau,

Mele i kona aloha ia’u,

Mele i kona maikai’e,

Mele i kona kiai mai.

CHO. Mele o oli, mele a mau.

Nauwe pu i ka nani ma o.

Nauwe pu! Nauwe pu,

Mele a oli halelu.

Pule i aloha nui kakou ia Iesu, a haawi aku ia kakou iho, me na mea a pau none.

HAAWINA KULA SABATI no NOV. 29, Mareko 14:42-50. HAWAII.

O ka mea i hoopaaia i ke kaulahao,

lilo ka oia i mea hookipa.

He wahi moolelo oiaio keia no kekahi mau kaikamahine elua o Lisi kekahi, a o Meri kekahi. Ehiku makahiki o Lisi, a elima o Meri.

Ua make na makua elua, o ka makuakane mamua, a o ke makuahine, akahi no ia a make. No ka aoao komohana o Irelani keia ohana. He wa pilikia loa keia, he wa wi loa ma ia wahi. Ua pilikia like na ohana a pau.

Nui ke aloha o na ohana i keia mau kaikamahine, aole nae i hiki ke malama no ka nele like. Ua ike na makamaka, he makuakane no ko laua ma kekahi kaona aole i loihi loa aku; he

kaikuaana paha ia no ka makuakane ponoi o na kaikamahine. He waiwai no kana, ina me ia na kaikamahine e malama ia’na paha laua.

Ae, maikai ia, wahi a kekahi, na’u no laua e lawe ma ko’u kaa a hiki i kahi kupono e haalele. Hooeeia laua maluna o ke kaa, a laweia ma kahi e haalele ai. Ka iho no ia o laua ilalo. Ua awakea paha. A kuhikuhi ka mea kaa i ke alanui i na kaikamahine me ka olelo, e hele pololei aku olua, a i Kilibana, kahi o ko olua makuakane. Elua paha hora a hiki olua ilaila.

Aloha laua i ka mea kaa, a nan’ku i hope a nalo aku ke kea. Ka hoomaka no ia o ka uwe o laua. Oki mua Lisi i kona uwe ana, a olelo oia i kona kaikaina ia Meri; E ku kaua a hele aku, aole pono ke noho ma ke alanui, e hoao kaua e hiki aku ia Kilibana. Pane mai Meri, aole hiki ke hele, ua pololi loa au, aole au i ai iki i keia la. Ua pololi like no hoi o Lisi. Uwe pu iho la laua. Ku nae laua a hui na lima a nauwe kulanalana aku. Aole liuliu a hoaea mai la he hale; a i ka hookokoke ana’ku, ike laua he hale no ka mea mahiai. A lohea he leo nui e hoahewa ana i kekahi paahana. Makau loa laua. Hoi ka mea hoahewa ana iloko o ka hale me ka hoomau no i ka leo hoahewa.

Aa nae laua e komo iloko. Ai hoi ua kanaka hoahewa nei e noho ana iloko o ka noho nui ma ke kapuahi. Ninau huhu oia, heaha ka olua maanei? No ka nui o ka makau, aole hiki ia laua ke pane aku. Ka, aole anei e hiki ia olua ke pane mai?

A liuliu iki, aa o Lisi e pane akahai ma ka ninau ana, aole anei oe e oluolu e haawi mai i wahi ai iki na mamua, he mamala berena, he mau uala?

Ae, he oiaio ko’u kuhu ana, he mau makilo olua, no kahi e mai nae, aole noonei. Nui na makilo maanei. He wa pilikia keia. Aole e loaa ana kahi mea ai maanei. Ku olua ano, a hele pela ‘ku. Ka hoomaka no ia o ka uwe nui o laua. A pane oia, makehewa ko olua uwe ana. Aole keia he mea hou ia’u. Na na makua o olua e hanai ia olua. Malama nae o ko laua makemake no ia e ola olua ma ka makilo ana, a noho hana ole laua.

Ua make ko maua mau makua elua, pane Lisi. Hookamani! ke ano ia o na makilo, e olelo ana, ua make na makua i mea e ko ai ka makemake. Aole, ku a hele aku ano.

Ua pololi loa maua, aole i ai iki i keia ia, aole hiki ke hele hou aku. I na he wahi apana berena iki, pololi loa maua. Aole au e haawi ana ia olua.

A ku oia a nana ino mai, me he ia e hana ino mai ana. Makau loa laua, a puka o Lisi iwaho, a huki pu ia Meri me ia. Ku laua ma ka pa o keia kanaka mahiai me ka maopopo ole o kahi e hele ai.

Ma ka nana ana ma kekahi aoao o ka pa, ike laua he wahi ilio, ua hoopaaia i ke kaulahao; a o kana ai, e waiao ana no ia ma kahi pa laau imua ona, aole i ai ia. Lalau koke iho la laua, a ai i ka ilio. He mea hou keia i ka ilio, nana haohao oia ia laua, a ae oluolu no e ai laua i kana ai a pau. Aole emo, a ike ka ona i keia mea kupanaha. He ilio huhu hae loa keia, nahu mai ke hookokoke aku, makau na mea a pau ia ia. Eia ka na kaikamahine me kona alo me ka makau ole. Hooho oia me ka leo nui, Ea, aole anei olua i ike i kela ilio i paa i ke kaula, ina lele mai, pau koke olua i ka haehae liilii ia. Nana oia i ka ilio, ku ia iluna a nana mai i kona haku, me ka luliluli o kona huelo, a me he ia ua makemake oia e olelo, mai kipaku aku i na kaikamahine, na mea a’u e hookipa mai nei.

Ke ano hou iho ia no ia o ke kanaka mahiai. Kali me ka noanoo ma keia mea kupanaha. Akahi no a oluolu ia ilio hae nei i na mea hookokoke aku. Ku na kaikamahine me ka hopohopo loa e hoopai mai na kanaka nei ia laua no ka ai malu ana i ka ai a ka ilio.

A olelo oia, oiaio anei, pela Ko olua pololi, a ae e ai i ka ai a ka ilio? Ina pela, komo mai olua iloko o ka hale, a na’u e hanai aku a maona loa olua. Lalau oia i ko laua mau lima, a alakai ae iloko, a kona i ke kuke e lawe mai i ai mehana na laua, a noho pu oia me laua ma kapapa aina, a ninau, owai na inoa o olua? A pane ka mua, o Lisi au; a pane ka lua o Meri au.

Inahea ka make ana o na makua? Elua makahiki i hala mai ka make ana o ka makuakane, a ano mai la ao ka make ana o ka makuahine. A uwe nui iho la laua. Mai uwe olua, na ke Akua olua e malama. Nohea mai olua? No Lourea. Pehea? No Lourea anei? Owai ka inoa o ko oiua makuakane? O Matina Sulivana, pane Lisi. Pehea? Matina, Matina Sulivana, hooho ua kanaka nei, u lele iluna, a nana polulei ia laua, a makau Ioa Iaua. Ka ula mai la no ia o kona mau make, a haloiloi, a uwe nui iho la ia. Lalau oia ia Meri, a hii, a hoopili i kona pol@, a honi aku, a hookuu iho; a lalau ia Lisi, a hana pela ia ia. Makau Meri, makau iki hoi Lisi. Haohao loa nae laua i keia hana kupanaha.

A ninau oia, Ua ike anei olua i ko’u inoa? Hoole Lisi, aole. No ke aha la ko olua hele ana mai i o’u nei? Ua hoouna mai anei kekahi ia olua i o’u nei? Hoole Lisi, aohe mea i hoouna mai ia maua i ou la.

E hele ana maua i Kilibana. Ua lohe maua, aia ilaila kekahi makuakane o maua, ke kaikuaana o ko maua makuakane ponio. Olelo mai na makamaka, E hookipa olioli oia ia maua, ke hiki maua io na la. Aka, aole maua i paulele ma ia olelo, no ka mea, olelo mai ko maua makuahine, He kanaka naau oolea, paakiki oia, aole ona manao i na hoahanau ona.

He oiaio no ia olelo a ko olua makuahine, wahi a ke kanana mahiai. A pane Lisi, ina pela, e make ana maua i ka pololi. Aole, aole, panekoke mai ua kanaka nei, aole pela, aole olua e make ana i ka pololi. Ua hoomanao ke Akua lokomaikai i ko olua pilikia, a ua hoolilo oia i ka ilio hihiu hae, i mea nana e hoopalupalu i ka naau oolea o ko olua makuakane, a, nolaila, aole oia e haalele ia olua, aole loa.

Pilipu loa iho la na kaikamahine, akaka ole keia mau hua olelo. A, na ua kanaka nei i wehewehe i ka pohihihi ma ka olelo ana, E hele ana olua i Kilibana, i-o Patesika Sulivana. Eia no olua ma Kilibana, a owau hoi ko olua makuakane.

Ano ua ike au he mau kaikamahine olua na Matina ko’u kaikaina. E hui pu mai olua me au, a na’u no e malama ma keia hope aku. UNUHIIA E HAWAII.

Ka ohana o Pehea.

He ohana kahiko keia, a he ohana nui, lehulehu na lala. Ka inoa nui o keia ohana, o Pehea; ua hoopuka pinepine ia ma ke ano ninau, a Pehea? Hiki paha, hiki ole paha, Pehea la e hiki ai? He ohana ano lua nae keia, elua no mahele, o Kanalua ka luna o kekahi mahele; a o Koa ka luua o kekahi mahele. Nui no na hope luna o laua.

Ua ikeia, ma ka nana’ku, he lahuikanaka uuku ko Hawaii nei ; he lahui nui mamua aka, ua nuku ia i keia wa. O ka ninau nui keia, A Pehea? hiki anei ke nui hou ae? A pane mai o Kanalua, ae paha, aole paha, pehea la e hiki ai? auhea la hoi na mea e hiki ai? Ua luwahine, a kanikookoo, a haumaka iole, a palalauhala. Pehea la e hiki ai ke hanau hou i na keiki? Ua pa loa ka makuahine, ua hala paha ka manawa.

Pane mai nae o Koa; Ae, hiki no ke nui hou ae. He luwahine loa no o Sara, pa hoi mamua, ua hanau no nae i keiki kane, he hooilina ano nui. Hiki no ia Hawaii ke hanau hou i mau keiki hou, ano hou, a lehulehu hoi. Pehea e hiki ai? Ma ka manaoio i ke Akua, a ma ka hana ana i ko ke Akua makemake. A pehea ka Moi? I na e ninau ia ‘ku ka Moi, Pehea la e ulu hou ai Hawaii nei? Pane mai oia, Ma ka malama pono ana o na makua i na keiki. Aole pela, aole e malama pono ana na makua i na keiki; aole i malama pono ia na keiki e na makua ma Amerika, a ma Beritania, mau no nae ka mahuahua ana o kanaka. Ma ke aha? ma ka manaoio i ke Akua o ka lehulehu, ma ka malama ana i kona makemake. He mau aupuni, hoomana i ke Akua laua. Hoomana na lii, na luna i ke Akua. Hoomanao lakou i ka la Sabati; aia no lakou ma ka luakini o Iehova ma ia mau la.

Ma ka hoohalike ana o na lii oonei, o na luna aupuni me lakoa la e ulu hou ai Hawaii nei. E manaoio ka Moi i ke Akua, e hana i kona makemake, e malama i ka la Sabati, e hele mau i ka hale o Iehova, e kinai i na hewa, e papa’ku i ka ona, i ka hula, i na hana lapuwale, e paipai i na luna aupuni. i na kanaka, e makau a malama i ke Akua, e noho pono, a hana pono mau. A e lilo ka Moi, me na luna aupuni a pau i poe alakai i na kanaka ma ke pono. Pela e ulu hou ai keia lahui uuku. Maikai ka pane ana a Koa, e mahaloia oia.

Ua emi na kula maoli, me na kula Sabati. Nui a maikai mamua, ane poho loa ma ke kauwahi i keia wa. A ke ninau aku nei, hiki anei ke ala hou ae? A pane mai o Kanalua, Ae paha, aole paha, pehea la a hiki ai? auhea la ua mea e ala hou ai? Ua palaka na kahu, na luna, na kumu, na makua, ua emi na keiki, ua nui na mea hoowalewale, na mea lealea, ua hoowahawahaia ka ike, ua makemakeia ka naaupo.

Pane mai nae o Koa, Ae, hiki no ke ala hou ae na kula, a piha hou i na haumana. Pehea e hiki ai? Ma ka hoopau ana i ka palaka, ma ke ala ikaika ana o na kahu, o na luna, o na kumu, a o na makua. E hooano hou ia na kumu; naaupo paha kekahi mau kumu, molowa, kula hapa, hoopai pinepine i na haumane, hoopai ino me ka laau nui i kekahi manawa, huhu hala ole, nuku wale, oluolu ole, a lealea wale paha kekahi, a paani pu me na haumana, a hoowalewale kekahi i na kaikamahine. E hoopauia keia, e noho maikai na kumu, e ao maikai, e hooponopono, e hoomalu pono, e pule mau iloko o na kula, e heluhelu i kekahi mau pauku Baibala e pili pono ana i na haumana. E hoolako i na kula i na palapala, i na papa eleele, i na himeni maikai. E hookoia na kanawai kula, e huliia na keiki hele ole i ke kula, e hoopaiia na makua ke hewa lakou, na keiki ke hewa lakou. E hana mau ka Papa kula apana.

A o na kula Sabati, e piha hou ana no, ke hana mau na kahu ekalesia, kahu kula Sabati, me na kumu. I na ua palaka kekahi mau kahu, mau kumu paha, a molowa i ka hana, i ka hoomakaukau e ana, a hawawa i ke ao ana, a aloha ole, a kii ole aku i na haumana; e hoopauia paha lakou, a e hoaoia i mau kahu, a kumu hou. E halawai pinepine na kahu me na kumu me ke alakaiia e ke kahu ekalesia. E pule pu, a kuka pu, a imi mau, a hoao mau i na mea e ala hou ai na kula Sabati. E hoolako ia na kula i na Baibala, na buke himeni, &c, e pono ai ua haumana.

Maikai hou o Koa ma kana pane ana. E hana ia e liko me kaua kuhikuhi ana.

Na luakini kekahi. Mamua, piha na luakini i kanaka me kamalii. I keia wa nae, na hakahaka, waiho wale ia kekahi mau noho okoa. He mau ohana okoa ka i haalenoho okoa. He mau ohana okoa ka i haalele i na hale o Iehova. Na kanaka ui, aia ihea? i ka holoholo lio paha, i hale paha e hiamoe ana, e hana lealea ana paha. A mehameha na luakini. A ke ninau ia ’ku nei, Pehea? hiki anei ke piha hou ae na luakini? A pane mai o Kanalua, Ae paha, aole paha. Pehea la e piha hou ai? Auhea la hoi ka poe e piha ai? Ua pau paha i ka make, i ka hele, i ka hoomaloka; ua auaia e na haku hana; ua haaleleia paha e ke Akua.

Pane mai nae a Koa, ae, e piha hou ana no na luakini. Aole pau na kanaka i ka make, i ka hele, i na haku, i ka haalele ia e ke Akua. Nui na kanaka, na kamalii ma kauhale. Pehea la nae lakou e komo ai iloko o na luakini? Ma ka manaoio i ke Akua, a ma ka hana ana i kona makemake, oia hoi o ka hana mau a na kahu ekalesia, a na luna hoahanau, me na hoahanau pu; pule mau, paipai mau, kii mau, hooke ai, aloha nui, uwe waimaka, hokoko me ka Uhane, hoole, aole e hookuu aku ke hoomaikai ole mai. Aole o ka haiolelo wale iho no ka hana a ua kahu, aole o ka pule wale iho no a na luna, a na hoahanau, aka, o ka hele e ike, e launa, e hoala, e pule a heluhelu Baibala ma na hale, e ala mai ai kanaka, kamalii, a huli mai a komo iloko o na luakini, o na hale halawai, a o na ekalesia, a o ka lani hoi.

Maikai loa kau pane ana mai, e Koa. E hana oe me kau e kuhikuhi mai nei, a e hana hoi makou, a e ikeia auanei ka piha hou ana o na luakini i na kanaka, me kamalii, a o na ekalesia i na hoahanau.

“Me kau e manaoio aku ai, pela e hana ia mai ai ia oe,” wahi a Iesu. “E hiki no na mea a pau loa i ka manaoio.

HAWAII.

Auhea ku puuhonua no ka poe moekolohe?

“E mahaloia ka mare no na mea a pau, a e hoopaumaele ole ia hoi kahi moe, no ka mea, e hoahewa mai ana no ke Akua i ka poe hooipoipo, a me ka poe moekolohe.” Heb. 13:4. Nolaila, o ka mare, a noho pono ke kane me kana wahine, na makua me na keiki, oia ka mea e pono ai, a e mahuahua ai ka lahui kanaka.

“Mai kuhi hewa oukou, aole ke Akua e hoomaewaewaia’ku; no ka mea, o ka ke kanaka i lulu, o kana@hoi ia e ohi mai. No ka mea, o ka mea e lulu ma kona kino iho, no ke kino ia e ohi auanei i ka make; aka, o ka mea e lulu ma ka Uhane, no ka Uhane ia e ohi auanei i ke ola mau loa.” Gal. 6:7,8.

Aka, ua manao kekahi poe, ina i hookolokoloia lakou no ka noho pu me ka mare ole, e holo koke aku i ka ekalesia Katolika, a i ka Moremona paha, me he mea ia, he mau puuhonua laua, kehi e hookipaia i, a e hoaponoia’i, ke hehi mau aku lakou i ke kanawai Ehiku, ka mea e papa ana; “Mai moekolohe oe.” Pukaana 20:13.

Nohea mai ka mana o kekahi ekalesia e kala wale aku i ka hewa o ka poe e nohe mau ana iloko o ka hookamakama, a e hehi mau ana i na kanawai o ke Akua?

A auhea hoi oukou, e ha poe hoomaloka? Manao anei oukou e hiki i kekahi kahuna lapaau ke hoola, a hoomaemae, a hoapono i ka poe pela, a haumia, ke hoomau aku lakou i ka moe ipo, a me ka moe kolohe? Nani ko oukou kuhi hewa ke manao pela!!

Ka inoa he pono e makau i na kanawai, a me na kauoha a ke Akua. Ke olelo mai nei o Paulo ia Timoteo penei; “Aole i kauia ke kanawai no ke kanaka hoopono ; aka, no ka poe pono ole, ke poe hoolohe ole, ka poe aia, ka poe hookamakama, ka poe hoopunipuni, ka poe wahahee, a me na mea e ae i kue mai i ka pono oiaio.” 1 Timoteo 1:9, 10.

Eia ka Paulo i ko Korineto. “Mai kuhi hewa oukou; aole ka poe moe ipo ; aole ka poe hoomanakii, aole ka poe moe i ka hai, --aole e loaa ia lakou ke aupuni o ke Akua.”

“Aole no ka moekolohe ke kino, no ka Haku no; a o ka Haku no ke kino.”—“Aole anei oukou i ike, o ko oukou mau kino, oia na lala o Kristo? E lawe anei au i na lala o Kristo, a e hoolilo ia mau mea i lala no ka wahine hookamakama? Aole loa.”

“Aole anei oukou i ike, o ka mea hoopili aku i ka wahine hookamakama, hookahi o laua kino?”

“E holo hoi oukou mai loko aku o ka moekolohe.”-”O ka mea moekolohe, ua hana hewa ia i kona kino iho.” I Korineto 6: 9-18.

Eia ka Paulo i ko Epeso. “Ua ike oukou i keia, aole ka mea moekolohe, aole hoi ka mea haumia;-aolo loa o lakou noho ana i ke aupuni o Kristo, a o ke Akua. E ao o hoopunipuni kekahi ia oukou i na olelo wahahee; no keia mau mea e hiki mai ana ka inaina o ke Akua maluna o na keiki o ka hoolohe ole.” Epeso 5:5, 6.

Eia ka ke kumu o ka emi ana o kanaka ma Hawaii nei. Ua puni lakou i ka wahahee. Ua hiki mai ka malamalama, a me na oihana, a me na kanawai e pono ai, aka makemake na kanaka i ke pouli, ka ino, ka haumia, ka noho mare ole; nolaila, ua hiki mai ka inaina o ke Akua maluna o keia lahui. Ina makemake ka Moi, a me kekahi Aha he 13 e hooulu hou i keia lahui, pono ke ao i na kanaka e hoolohe i ka ke Akua, - e oki i ka hookamakama, a me ka moekolohe, a e malama pono i ke kanawai mare.

Eia hoi kekahi. “Ua kokoke mai ka manawa, o ka mea hewa, e mau no kona hewa; o ka mea paumaele, e mau no kona paumaele; o ka mea pono, e mau no kona pono; a o ka mea hemolele, e mau no kona hemolele.”

“Eia hoi, e hele koke mai au, (wahi a ka Haku), a eia no ia’u ko’u uku, a e haawi aku au i kela mea a i keia mea e like me kana hana ana. Pomaikai ka poe malama i kona kanawai, e hiki ke loaa ia lakou ko ka laau o ke ola, i komo aku hoi ma na puka iloko o ke kulanakauhale.”

“Aia mawaho na ilio, a me na mea hooipoipo, a me na moekolohe, a me na pepehi kanaka, a me ka poe hoomanakii, a me ka poe a pau i makemake e hana aku hoi ma ka wahahee.: Hoikeana 22:10-15.

NA BUKE

I HOOLAHAIA E KA PAPA HAWAII

-ME KE-

KUMUKUAI O KELA ME KEIA.

BAIBALA HEMOLELE NUI ILI GULA NANI me na kuhikuhi ma na aoao…… $12 00

Baibala Hemolele Nui ili eleele kaekae wai gula. 5 00

Baibala Hemolele uku iki iho kae wai gula… 8 00

Baibala Hemolele pananaiki iho ili eleele…….. 4 00

Baibala Hemolele ili eleele................................... 2 00

Kauoha Hou ili gula nani me na kuhikuhi……… 3 00

Kauoha Hou ili eleele kaekae wai gula………… 1 00

Kauoha Hou ili eleele………………………….. 75

Kauoha Hou Hapa Haole ……………………… 75

Lira Hawaii 1848 me ke kanawai …………….. 25

Lira Hawaii 1855 ……………………………… 25

Moolelo Ekalesia ……………………………… 50

Haiao ili lahilahi ………………………………. 10

Hele Malihini ana ……………………………… 25

No ko ke Akua ano……………………………… 25

Lira Kamalii ……………………………………. 25

Hoike Palapala Hemolele ………………………. 20

Moolelo o Heneri Opukahaia …………………… 25

Hoike Akua …………………………………….. 15

Wehewehehala …………………………………. 10

Ninau Hoike ili manoanoa ……………………… 20

Ninau Hoiki ili lahilahi …………………………. 05

Kumumua Kula Sabati …………………………. 20

Buke Lawe Lima ……………………………….. 20

He Buke no ka Pope ……………………………. 15

Ui Kula Sabati Helu 3 ………………………….. 25

Ui Kula Sabati Helu 4 ………………………….. 15

Ui Kula Sabati Helu 5 ………………………….. 25

Buke Euanelio a Ioane …………………………. 10

Himeni Hawaii ……………………………….. 1 05

Himeni Hawaii ili nani ……………………….. 1 75

Kumu Leo Mele ……………………………… 10

Kumu Leo Mele ili nani ……………………… 50

NA KAUOHA HOU PAKEKE.

Ili gula nani …………………………………… 1 50

Ili eleele kaekae nani………………………….. 50

Ili eleele ………………………………………. 35

KAUOHA HOU PAKEKE ME NA HALELU.

Ili gula nani …………………………………….. 1 70

Ili eleele kaekae wai gula ……………………… 65

Ili eleele .………………………………………. 50

Buke Wehewehe Huaolelo Baibala, elua ano …..

Buke Wehewehe Ano Mataio ………………….

NA HALELU PAKEKE.

Ili Gula nani …………………………………… 50

Ili eleele kaekae wai gula ……………………… 30

Ili eleele ……………………………………….. 20

Ka Hae Hoonani (Buke Mele) ………………… 25

NA BUKE MELE HOU.

Himeni Hawaii ili nani ………………………… 1 75

Himeni Hawaii ………………………………… 1 00

Kumu Leo Mele ili manoanoa ………………… 50

Kumu Leo Mele ……………………………….. 10

Lira Kamalii …………………………………… 25

Lira Hawaii 1848 ………………………………. 25

Lira Hawaii 1855 ………………………………. 25

Hae Hoonani …………………………………… 25

Leo Hoomana ………………………………….. 20

EIA NA BUKE HAAWI WALE.

PALAPALA LIILII-

Helu 4-Makemake anei oe i ke ola?

Helu 6-E hele i o Kristo ia.

Helu 7-Ka hoi ana mai o ke Keiki Uhauha.

Helu 11-No ka hoohiki wahahee i ke Akua.

Helu 16-Ka Kehia ana o ka Ahaaina a ke Haku a me ka Bapetizi ana.

Helu 17-Mai hana ino i na holoholona.

Helu 18-No ka mahi ana, kuai ana a me ka inu ana i ka Awa.

Ka Davida Malo Kumumanao.

Ka Moolelo o Batimea Puaaiki.

He elua mau ano Buke Mele Hou ma ke Keena Kuai

Buke o ka Papa Hawaii. He mau Buke nani no. Kupono hoi no na Kula Sabati o kakou. E nee mai-e nana-a e kuai.

Aia ke keena kuai buke o ka Papa Hawaii ma ka huina o Alanui Betela me Alanui Kalepa, e kokoke ana i Hale Leta.

Kakauleta o ka Papa Hooko o ka Ahahai Kuaalio o ko Hawaii Pae Aina.

KA NUPEPA “KUOKOA!”

Hoopuku mau ia

I KELA POANO KEIA POAONO.

$2.00 no na mahine Umikumamalua

$1.00 “ “ “ Eono.

ME KA HOOKAA MUA MAI.