Ka Nupepa Kuokoa, Volume XIII, Number 42, 17 October 1874 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XII. HELU 42. HONOLULU, POAONO, OKATOBA 17, 1874. NA HELU A PAU 672.

 

E Pau na Pupupu Kahiko!

 

E pani me na Hale Laau!

 

PAPA, PAPA, PAPA

O KELA ME KEIA ANO,

-A ME-

NA LAKO KUKULU HALE

O KELA ME KEIA ANO, MA KA

 

PA-PAPA O S.G. WAILA MA!

-KIHI O-

ALANUI PAPU ME ALANUI MOIWA

HINE, no ke Kumukuai HAAHAA

LOA! ae like ka nui me

ka makemake.

 

LAAU NOUAIKI!

NA LAAU KAOLA,

            NA PAPA MANOANOA,

                        NA PAPA HELE,

                                    NA KUA,

                                                AAHO,

                                                            AAHO LIILII,

 

LAAU ULAULA!

NA LAAU KAOLA,

            NA APA MANOANOA,

                        NA PAPA HELE,

                                    NA KUA,

                                                AAHO, POU,

                                                            AAHO LIILII,

                                                                        MOLINA, & C

 

Pili Cida keokeo, Pili Laau ulaula,

Na Puka Hale, o na ano a pau,

Na Puka Aninni, o na ano a pau,

Na Olepelepe Puka, o na ano a pau.

 

Pepa Hale me na Lihilihi.

 

NA LAKA PUKA

NA AMI-PUKA,

                        NA AMI-PUKA LIILII.

                                                NA KUI NAO

 

PENA, AILA-PENA, VANIKI,

WAI HOOMALOO.

 

PAAKAI Helu 1,

O PUULOA.

 

            E lawe wale ia no na mea i kuai ma ai keia Pa Papa aku a i kahi o ka mea, kuai mai, ina ma ke kaona nei, a me na Awa o keia Paeaina e like me ka aelike.

 

Aia maanei ke Keena o ka

MOKUMAHU “KILAUEA,”

Ia MARCHANT, Kapena.

 

                                                            S. G. Waila ma.

                                                                        670 3m

 

HE KAAO ARABIA

..NO KE..

Keiki Alii Bedera o Peresia

..A ME..

KE KAMA ALII WAHINE GIA-

HAURE O SAMANADALA.

 

Unuhiia no ke “kuokoa” mai ka Olelo

Arabia a i ka Olelo Haole, a mai ka

Olelo haole ai ka Olelo Hawaii.

 

HELU 3.

 

            AIA NAE, o ka aipuupuu keia i kauohaia ai e hooko i ke karaima, ua makemake loa i ua keiki alii kino manu nei, nolaila, puana ae la ia, oia wale iho penei: “Pehea la auanei ka nui o ke ino o ka manao ana, e hana ino i ke keiki alii nani? Malia i kekahi la, e mihi ana oia i kona hewa.”

            O ka mana o ka olelo kauoha alii, ua haule ino ia malalo o ka manao o ua aipuupuu nei, e lawe i kahi aa kanaka ole, e hookii iaia e make i ka pololi a ka ai, a me ka ono o ka wai, aka, lawe ae la oia a hanai maoli iho la no i ua manu nei, a mahope io, hoihoi ia aku a waihoia aku la ma kekahi wahi mokupuni uuku e ku koke mai ana, oiai aia maluna o ua wahi mokupuni la na laau hua o na ano a pau, a he nui no hoi ka wai e lawa ai no ka manawa palena ole, aole he hemahema i koe ana e au ae ai.

            Oiai keia mau mea e hanaiia ana ma keia wahi, aia hoi, ua lanakila ae la ka Moi Sala maluna o ka moi o Samanadala, a ua lilo oia i pio. Aka, ua malama maikai no o Sala i kana pio me ka hanohano nui i oi aku i kana hookipa ana aku ia Sala, oiai kona mau hora i komo ole ia e ke daimonio, me ka waiho pu aku no hoi i na hooponopono ana a pau o ke aupuni maluna ona, a hiki wale i ka wa o Giahaure e hoi mai ai. Ua kohoia na luna aupuni ma na poo oihana lehulehu wale.

            A pau ka Sala hoonohonoho ana, aia hoi, i kona hoi ana aku a hiki i kona aupuni, aia hoi, e noho u mai ana na kaikamahine alii a me kona ohana, a e pioloke ana ka lahui, no ka nalowale ana o ka Moi Bedera. No ka loihi loa hoi o ka noho kaumaha ana me ka hoi ole mai, hooluola ae la lakou kekahi i kekahi, me ke kali a me ka manaolana o koua hoi mai.

            Ma keia wahi, e waiho kakou ia Sala ma e u ana, a e nana ae kakou ia Bedera, ka Moi o Peresia, ka mea i hooliloia e Giahaure i manu keokeo, a i hoonohoia e ka aipuupuu ma kekahi wahi mokupuni, a e ai ana oia i na hua o na laau, e like me ka ka manu ai ana.

            Iaia nae e noho kino manu ana, aia hoi, i keia ae la oia e kekahi kanaka akamai i ka nana manu; a no kona makemake loa i kona nani, manao loa iho la oia, e lawe malu iaia—lawe aku la ia i ua manu nei a i kekahi wahi kulanakauhale e pili koke mai ana, kahi i haawiia mai ai i ke kumukuai nui, me ka manao o ka mea i makemake mai ai e kuai, e ai i ka io momona o ua manu nei.

            A o keia noi, ua hooleia aku no ia me ke kanalua ole o ke mea nani i lawe aku i ua manu nei, oiai na lohe oia, ua makemake ka Moi, e malama i na manu ano maikai a pau. 

            O keia manao ana nae o ua wahi kauwa nei, aole no ia i kuhihewa, no ka mea, i ka lohe ana no o ka Moi, hele pinepine mai la oia e nana i ua manu nei. A mahope iho, hoouna mai la oia i kana Moiwahine e makana aku i loaa mai ai ua manu nani nei.

             Aia nae i ka wa o ua Moiwahine nei i komo mai ai iloko o ke keena kahi i malamaia ai ua manu nei, hookuu iho la ia i kona uhi maka, a olelo aku la hoi i ka Moi, “He keiki alii nani keia o ka hanau maemae ana i kuai ia ai.”

            Mamuli o ka makemake o ka Moi e ike i ka oiaio, nolaila, lawe ae la ua Moiwahine nei i kekahi kiaha, a hoopiha iho la i ua kiaha nei me ke wai, a namunamu iho la me kekahi mau huaolelo, alaila, o ka manawa no ia i ku-kuku ae ai o ka mahu. A iloko o ia wa, pipi aku la ua moiwahine nei i ka manu me ka wai, me keia mau huaolelo, “Ma ka mana o ka hemolele a me na huaolelo kupua, ke pane aku nei au, e hoi hou ae oe a kou kino mua i hanaia ai i kinohi.” Ia wa koke no, nalowale aku la ke kino manu, a hoomaikai koke mai la ua keiki alii ui nei, me na hoohaahaa ana imua o kona mau hoola alii.

            I ka lohe ana o ka Moi i ka moolelo o Bedera, apo mai la ia me kona mau lima, a hoomaikai mai la, me ka haawi mai i kona mau mana a pau maluna ona, e hookauwa nana, me ka i aku, “He oiaio, aole oe i mamao loa mai ke aupuni mai o Peresia, a o kou mana hoi o ka halihali ana ia oe, aole e hiki kupono, a nolaila, e kau ae oe maluna o kekahi o na moku e holo ana mai ianei aku, a i ka aina e kokoke aku ana i kou aupuni, i olioli ai oe me kou poe, oiai lakou e noho ana iloko o ke kanikau nou.”

            Hooiaio aku la o Bedera i na olelo a ka Moi, a kau aku la ia maluna o kekahi moku; aia nae i ka holo ana o ua moku nei a kokoke e ku i ka aina, puniaia iho la ka moku e ka makani ino, a holo aku la ma ka ihu i makemake ole ia’i, a hookokokeia aku la ka moku ma na kapakahakai o kekahi aina i  ike mua ole ia, a ili iho la a nahaha ma na kuaau o ua aina la. Pau loa iho la na luina i ka make, a koe wale no o Bedera. No kona ikaika a me ke akamai hoi i ka au ana, ua pae ola aku la oia i kula me ka pilikia ole.

            Iaia nae i kipa aku ai i ke kulanakauhale, halawai mua aku la oia me na holoholona, oia na kamelo, lio, miula, hoki a me na ano holoholona e ae, no lakou na manao e keakea mai ana mamua o ke alanui a ia nei e hele aku ana. Aole nae keia i kuemi mai, aka, hookeke loa aku la no keia mawaena o na holoholona, a hiki wale i kona hiki ana i ka piko o ke kulanakauhale, a o na alanui e hoopuni ana, he nani wale no.

            Hele wale aku la no keia, me ka halawai ole me kekahi mea, a mahope, kipa ae la oia ma kekahi wahi hale kuai nuku, a e noho ana he wahi elemakule, a aloha aku la no keia, me ka hoohaahaa pu ana iaia iho imua o ka elemakule.

            Aia nae a ike mai ua elemakule nei i na helehelena ui o ke keiki alii, puiwa ae la oia, me ke kukai ole aku i na hoomaikai a ka malihini alii, aka, kono aku la nae ia e komo kai iloko o ka hale. Ua ae koke aku no o Bedera e komo, aka, me ka haohao no nae oloko, no ko ka elemakule oluolu loa;--a i k wa no hoi a ka elemakule i hoihoi aku ai i na hoomaikai ana i ka malihini, me ka olelo pu aku, Nani ka pomaikai o ke komo e ana ma kahi e nalo ai, mamua o ka hiki e ana mai o ka pilikia maluna ona, a me ka ninau pu aku i ke kumu o kona hele ana mai ma ia kulanakauhale, a i ke kumu hoi o kona hiki ana iloko, oiai ua hoonohoia na holoholona i poe nana e keakea i ka makemake o ka poe e manao ana e komo mai iloko nei, ua kue loa ia lakou, aka, o oe, ke haohao nei no au no ke kumu o kou hiki ana mai.

            Huli pono ae la o Bedera, a hahai aku la i kona moolelo imua o ka mea hookipa, no na poino i ulia ai maluna o ka moku, a me ka pakui pu anu’ku, “aole oia i halawai iki me kekahi kanaka, aka, he mea malihini nae ko’u keakeaia ana mai e na holoholona he lehulehu o na ano a pau.”

            O Abadala, oia ka inoa o ka elemakule, aka, i kona lohe ana i ka moolelo o Bedera, i mai la oia, “O lakou aku la no hoi kou poe hoaloha, no ka mea, o keia kulanakauhale, ua kapaia, he kulanakauhale o na mea kupua; a na ka Moiwahine ka hoomalu ana maluna iho, a nona ka ino Labe, oia hoi kekahi o na wahine kupua ino loa o ke kama o na wahine; paakiki, hookano, pepehi kanaka, a hoopiopio; a o na aupuni hoi a pau i like ke ano me keia, ua lilo ae la ka wahine i poo no ke kane, a o na kane, ua hoohaahaa loa ia. O kela poe holoholona au i ike aku la, he mau kanaka ui lakou, a he poe malihini e like la me oe, aka, nana (Moiwahine) nae i hoolilo ae ma ke ano diabolo.

            He mau kiu no kana e hele ana ma o a maanei, a no ka lalau ana paha, ike ole ai ia oe, e like me ko lakou hopu’na i na malihini pae mai a me ka poe holo aku. O ka poe hopuia ana a paa, e laweia ana lakou imua o ua Moiwahine nei, a ina o kana mea e makemake loa ai, alaila, e hoaahuia auanei me ka aahu nani, a me he keiki alii la; na ka Moiwahine maoli no e nana aku me ka hooia la e hoohai, me ka manao aku nae, ua komo iho la ke aloha iloko ona, a e ola ana la hoi, eia ka auanei aole.  Oia nani, a me ia oluolu, e pailaniia la, aole no e liuliu aku ana—aia no ka palena maloko o na la he kanaha, e pau ana kona kino kanaka, a e lilo ana i kino no ka holoholona.”

            A o keia mau olelo a pau a Abadala, ke hoolohe nei ka Moi o Peresia i keia moolelo me ka pihoihoi makou, a me ka hooho nui ae, “Auwe kuu popilikia e! Ka i no hoi hookahi la popilikia i ikeia, eia ka e halawai hou ana no me ka pilikia i oi ae.” Mahope iho nae o kana olelo ana i keia, akahi no ia a huai pau aku i kona moolelo mai ka mua a i ka hope, me ka noi maoli aku, Pehea la o e pakele ai au iloko o keia pomea oluolu ia. pilikia?”

            “E ke Alii, ma na popilikia nui a pau o ke ao nei, oia ka ke kanaka naauao, a o ka ke kanaka Mahomeda, e houluulu’i i kona wiwo, a waiho aku na ka makemake o na lani e hoopakele mai. He oiaio, he mea popilikia oe mamuli o ka hiki kino ana mai ma keia kulanakauhale, aka, ua hala ae oe mai ka ike ana mai a ke poe kiu, a o kou noi ana mai ia’@, he mea oluolu ia. A ma ka’u ike, aohe no he kanaka e ae a Labe i malama maikai loa mai ai e like me a’u maloko nei o kona aupuni; a o ke kumu o ia, ua maka’u wale ia no’u. Me ka wiwo ole a me ka ikaika wale no e puka lanakila ai oe mawaho o keia kulanakauhale; e noho iho oe me a’u no kekahi manawa pokole, a na’u ia e olelo aku, he keiki oe na’u, alaila, e hoomaamaa aku au ia oe i ka noho kanaka ana o keia wahi, aole hoi e manaoia mai he malihini; aka, aole nae e pakele ana kou ola no ia mea mai ka Moiwahine mai, he wahi mea nae paha ia e ike ia aku ai kona makee mai ia oe.”

            A lohe o Bedera i na olelo a Abadala, ae aku la oia i na mea a pau i kuhikuhi ia mai ai iaia. A ia Abadala, he mea hiki ole iaia ke huna loihi iho i kana malihini, hoikeike akea ae la oia mawaho; a ma na wa a pau ana e kamailio aku ai, kahea wale no he keiki. Kokoke paha e hala ka mahina o kona huna ana, puka ae la o Bedera a ku ma ka puka, a ike aku la i ka nee ae a kekahi huakai; ninau aku la ia i kon kamaaina i ke ano o ia mea, a hai mai la kona kamaaina, “E hele mai ana ka Moiwahine,” wahi a ka haina, “e aa anei oe e ku malie me ka makau ole?”

            Hele mua mai la he tausani o ko ka Maiwahine mau koa kiai ponoi, ua aahuia i ka lole ulaula, maluna o na lio, me na pahikaua i weheia; alaila, hahai mai la mahope o ia poe, na kanaka i hoanuheia, ua hakali wale ia a paihi; alaila, mahope mai o ia poe, na wahine ui e hele wawae ana, ua kahikoia no hoi a hoonuanua, e kai malie ana, me na mana-paika liilii ma na lima; a i waena konu o lakou ka Moiwahine Labe, maluna o ka lio, ua kinohinohi wale ia i ke daimana, hele kela a anapanapa lua, o ka noho lio, he gula, a o kona pale, ua loaa ia me ke kumukuai nui. I ka wa e hele ae ana ka huakai mamua iho o kahi hale o Abadala, e aloha wale mai ana no ia ianei; a i ka wa i hiki mai ai o ka Moiwahine mamua pono iho o kahi hale o laua nei, ku iho la oia e kamailio iaia.

            I ka ike ana aku o ka Moiwahine ia Bedera, mahalo aku la ia i ka elemakule, no ka loaa ana iaia o kela kauwa kuapaa maikai loa. Olelo aku la ka elemakule, “Aole keia he kauwa na’u, aka, he keiki, no ka mea, o ke keiki ponoi no keia a ko’u mua, a ua lilo mai hoi ia’u.” Pane mai ka Moiwahine, “E hoolilo aku no au i na keiki la au, i kanaka nui a mana no kou pomaikai ma ke ano he kanaka haahaa; e ae mai oe, e komo mai ia ma ka’u huakai.”

            Ua mahalo no o Abadala i ke noi a ka Moiwahine, aka, aua ikaika aku la oia, e kala mai ka Moiwahine iaia; aka, no ko ka Moiwahine ike maopopo loa ana aku i ka nani o ke Keiki Alii, anoi loa aku la oia, me ke noi hoohua aku e hookuu mai. No ka minamina loa hoi o Abadala ia Bedera, a no ka pakela paakiki loa hoi o ka Moiwahine e lawe, ae aku la no ka elemakule, aka, nonoi aku la nae oia, e noho pu me ia i hookahi la hou, alaila, e hookuu aku no au e noho pu mau loa me oe.

            Ua pau ka hapanui o kei ala ia Abadala i ka hooluolu a me ka hookaau olelo ana me Bedera ka Moi o Peresia, ka mea nona na hiohiona i hele a luuluu i ke kaumaha, no kona lohe ana, e laweia aku ana oia iloko o na lima o ka wahine kilokilo.

            Hoomau aku la no o Abadala i ke ao ana ia Bedera, a kauoha aku la iaia, aole e hilinai maluna o na mea a pau a ka Moiwahine Labe e kuhikuhi mai ai, aka, e kiai me ka makaala loa, a ina he mea keka i e ulia mai ana maluna iho ou, e hele koke mai oe e hai mai ia’u me ke kali ole.

            I kekahi la ae, kii mai la ka Moiwahine Labe a me kona huakai hele ia Bedera, e lawe aku i ka Halealii.

            Aia nae i ko ka Moiwahine hiki ana mai a me kona huakai ma ka ipuka o kahi hale o laua nei, a ia wa i hoolauna aku ai o Abadala i ka Moiwahine, a pane aku la, “Ke nonoi aku nei au ia oe e ka Moiwahine, e waiho ae i na mea huna o kau hana kilokilo nona ka mana nui e paa nei ia oe; e manao no hoi oe i ke keiki a ko’u mau hoahanau, me he la he keiki ponoi la na’u; a he mea maule no ko’u uhane ke hana aku oe maluna ona i na hana kupua, e like la me kau hana ana aku i kekahi poe lehulehu a ae.”

            A lohe ka Moiwahine i na olelo a ka elemakule Abadala, hoohiki iho la oia, me ka i mai, “Ke maopopo loa nei ia’u kau mea e makemake nei, a ke hoohiki nei au ma ke ahi a me ka malamalama, a ma na mea malu a pau oloko o ka’u hoomana, aole loa oe e mihi ana, aole no hoi o ko keiki no ke ino o ka’u mau hana.”

            Aia iloko o ia wa, kauoha ae la ua Moiwahine nei, e lawe mai i kekahi lio no ke Keiki Alii, e like ka nani me kona lio ponoi iho, a e hookauia oia maluna iho, a hoihoi ae iaia ma ka lima hema.

            Ia Bedera hoi e pii ae ana e kau iluna o ka lio, ninau aku la ua Moiwahine nei ia Abadala no ka inoa o ke keiki, a i mai la kela, o “Bedera,” (o ke ano o ia, mahina poepoe). Pane akku la ua Moiwahine nei, “He kuhihewa paha, he pono e kapaia aku oia o Sema,” (ke ano o ia La).

            I ko lakou hiki ana aku i ka Halealii, lawe hele aku la ua Moiwahine nei ia Bedera, e hoikeike i na keena a pau o ka halealii, nona na kahiko ana i hele wale a “puia ke kula i ke ala.”

            Mamua ae o ka hiki ana mai o ka aina awakea, wehe ae la ua Moiwahine nei i kona uhi maka, a koe iho la o na hiohiona nei. O ke Keiki Alii hoi, ike aku la oia i kona ano, he ano loli ole ae, nolaila, manao iho la oia iloko ona, “aohe mea kino ui, ina ua hunaia kana mau hana.”

            I ka pau ana ae o ka paina awakea, a laweia mai la ka waina, oia no hoi ka wa a na leo mele a me na hulahula e hoomalule ana i ko ke Keiki Alii mau iini, alaila, hoomaka mai la kona makau ole; waiho ae la ia i kona manao pihoihoi malihini, aohe manao ana ae, he pilikia ke uhai mai ana mahope.

            No na la eiwa a me kanakolu i haalele ai o Bedera i na hoohialaai o na lealea iloko o kela wahi kupua; a i ke ahiahi hope loa o keia mau la, ike aku la o Bedera i ka ho-o malu ana iho o ka Moiwahine i ka pauda iloko o ke kiaha waina ana i haawi mai ai ia ianei mahope iho. Ia manawa, ala mai la na hoomanao ana a ka elemakule i ao mai ai iaia.

                                                                                    (Aole i pau).

 

Na Anoai Hoonanea.

 

            Aia kekahi kanaka kuaaina i kela wa kahiko, e palau ana i kona aina me ka paa-bipi kauo hookahi. A i kona palau ana a hiki iwaena kona o kona aina, aia hoi, ulu kupanaha ae la na kiwi o ua mau bipi nei, hele ae la a kiimanana i o a ianei, e komo ole ai iloko o ka hale hanai bipi hoihoi aku.

            Eia hoi ko ianei laki; iaia e hamohamo ana i ka mea e hiki ai ke hookomo i ua mau bipi nei, maalo ana kekahi haole lole-bipi, a iaia i haawi aku ai ua kanaka kuaaina nei, mahope o ko laua hooholo ana i ke kumukuai kupono, oia hoi, na ua kanaka kuaaina nei e lawe aku i ka hinai i hele a piha pono i na anoano mea kanu; a no kela a me keia anoano oloko o ka hinai, e uku mai ai ke kanaka lole bipi i hookahi dala. Oia iho la paha ke kumukuai makepono la ea!

            Hoi aku la ua kanaka kuaaina nei i kauhale, kau ae la ma kona poohiwi i ka hinai i piha i ka anoano; a mailoko mai nae o ua hinai nei, i haule aku ai kekahi hunahuna anoano.

            Ua maopopo no hoi i ke kanaka lole bipi, e uka ana oia he hookahi dala no kela a me keia anoano oloko o ka hinai, a ina la aole e haule kela anoano, penei no la, ua loaa no ia dala hou ana.

            Ia haule ana aku la o ua anoano nei, ulu ae la ia ma kahi i haule ai, he laau i oi loa aku o ka maikai, ulu ae la oia a kiekie, a o kona welau, ua nalowale aku la ia iloko o na ao kalelewa.

            Aia nae iloko o ia manawa, kupu ae la ka manao iloko o ua kanaka kuaaina nei, i ka i ana iho, “E aho e pii au iluna o keia la, i ike aku ai au i ka noho ana o na kanaka ma kela ao.”

            He mea manawa ole keia i ua kanaka kuaaina nei, lalama ana keia iluna o ua laau nei. A maluna o ka welau o ua laau nei, i ike aku ai oia i kekahi poe kanaka e hoiliili ota ai a ka lio ana; a iaia e nanea ana i ka nana, luli ana ka laau, a iaia i halalo iho a nana ia lalo o ua kumu laau nei, aia hoi, e oki ana kekahi i na na o ua laau nei. I iho la oia, “ina wau e haule ana ilalo, e eha loa ia ana au.” Kupilikii loa iho la keia, aole ana mea e ae e manao ana, o kona pakele wale no, o ka hikiikii i kaula ma na laau ota. O ko ia la lalau aku la no ia i ke koi, a apakau aku la i ka pakeke ota e kokoke ana malaila, a hookuukuu iho la iaia ma ke kaula.

            Eia hoi ka mea apiki, i ka haule ana no, o kona komo loa no ia iloko o ka hohonu o ka honua; a o kona laki nui, oia no kona paa pu ana me ke koi, no ka mea, me ke koi oia i kalakalai’i i wahi no ka wawae e keehi aku ai, alaila, pii ae; a pela no oia i hana liilii ai a puka ana i ke ao malamalama, me ke lawe pu mai me ke eke ota, i mea e ikeia ai ka oiaio o kona moololo.

 

No na Aina Lei Alii o Hawaii nei

 

            No ka mea o na aina Moi mai ka wa kahiko mai no ia, aole nae i kapaia ia wa, no ke au iho nei no ia o Kamehameha III. O ka inoa ia wa. “He aina no ke alii”--No ka mea, ia wa, he nui a lehulehu wale na ‘lii aina a hiki mai nei i ka lakou mau “mamo.”

            No ka mea, i ke Au o Kamehameha III, Kau ia na kanawai i mea hooponopono ai ina aina Moi, i ka makahiki 1848. A mamuli o lokomaikai o ka Moi Kamehameha III, Haawi mai la oia i kela kanaka keia kanaka, ina aina Moi, i mau kuleana pakahi, mai Hawaii a hiki i Kauai. A i ke koe ana iho, oia na aina lei alii i keia wa mai Hawaii a Kauai. A make o Kamehameha III, iho mai no ia Kamehameha IV na aina lei alii a pau—A make aku nei ia III mai nei ia Kamehameha V. A i ka makahiki 1864. Hoolilo ia ke kanawai o ka makahiki 1848 a hooponopono hou ia. Penei: E ili aku no na Aina Moi, (oia hoi na aina lei alii) ina Hooilina hope, aole e kuai ia ma ka hoolilo loa, a ma kekahi ano e ae paha, koe nae ka hoolimalima i mea e loaa mai ai na pomaikai. A ua maopopo he mau aina lilo ole, a ua pili wale iho no i na hooilina. Ma ka hoomaopopo ana ina loaa o keia mau aina, ua palua ka pomaikai i ke kino o ka Moi, no ka mea, o ka uku Moi $45,000 no elua makahiki, alaila, no ka makahiki hookahi $22,500 ke hookaa wale ia ko ka Puuku—A ina hoi e hui ana me ko na aina lei alii mai Hawaii a Kauai, aole o kana mai ka nui o ka puu o ke kino hookahi wale iho no.

            Auhea oukou e na hoa? E koho i mau lunamakaainana. E hele aku, a e wehe ae i ka puu dala nui. A e hoihoi ae no ke aupuni, i mea e pau ai ka Aie Lahui, ua ola na ka Moi i ke dala a ka Ahaolelo i Hooholo ai. I kuu manaoio ana, he puu dala nui no keia, aole emi ana malalo o 20,000 no ka makahiki hookahi. A ina hui ia na loaa aupuni a pau, alaila ua nui kupono ke dala e hoopau ai i ka Aie Lahui o kakou.

            Me ke mahalo.                                                 J. W. Keliikoa.

 

I ka Lehulehu!

 

            I na makaainana o na Lani Moi,

            Na kupa o na Lepo Kanu o Hawaii,

            A i ka poe a pau e Aloha ana,

            No ka hooulu ana ia Hawaii =nei.

                                       Me ka mahalo :--

 

            O makou o ka poe nona na inoa malalo iho he poe e ake nui loa nei e hoouluia ka Lahui Hawaii, a e kokua ikaika aku i ka Makia o ke Au o Kalakaua, he kahea aku nei i na makaainana a pau o ka Apana o Kona nei a me ka poe e se e na wahi e mai e akoakoa mai maloko o ka Luakini nui o Kawaiahao i ka hora 10 AM., o ka Poakolu la 11 o Novemaba e hiki mai ana, e huipu mai me lakou ma ka hoolala ana i kekahi Ahahui a ano e ae paha a kakou e hooholo ai e hoohanaia ona kumu e ala hou mai ai ko kakou Lahui.

            W L Meehouse,                       Abr. Kalaali,

            J Moanauli,                              J K Unauna.

            H Kuihelani,                            P Naone,

            E H Boyd,                               Keikeani,

            J U Kawainui,                         Ma@@ia,

            E Mikalemi,                             W. Ka.

                                    Z P. Poli