Ka Nupepa Kuokoa, Volume XIII, Number 39, 26 September 1874 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XIII. HELU 39. HONOLULU, POAONO, SEPATEMABA 26, 1874. NA HELU A PAU 669.

E Pau na Pupupa Kahiko!

E pani me na Hale Laau!

PAPA, PAPA, PAPA

O KELA ME KEIA ANO,

-A ME-

NA LAKO KUKULU HALE

O KELA ME KEIA ANO, MA KA

PA-PAPA O S.G. WAILA MA!

-KIHI O-

ALANUI PAPU me ALANUI MOI-

WAHINE, no ke Kumukuai HAAHAA

LOA! ae like ka nui me

ka makemake.

LAAU NOUAIKI!

NA LAAU KAOLA,

NA PAPA MANOANOA,

NA PAPA HELE,

NA KUA,

AAHO,

AAHO LIILII, &

LAAU ULAULA

NA LAAU KAOLA,

NA PAPA MANONOA,

NA PAP HELE,

NA KUA,

AAHO, POU,

AAHO LIILII,

MOLINA, & c

Pili Cida keokeo, Pili Laau ulaula,

Na Puka Aniani, o na ano a pau,

Na Olepelepe Puka, o na ano a pau.

Pepa Hale me na Lihilihi.

 

NA LAKA PUKA

NA AMI-PUKA,

NA AMI-PUKA LIILII,

NA KUI NAO

PENA, AILA-PENA, VANIKI,

WAI HOOMALOO.

PAAKAI Helu 1,

O PUULOA.

E lawe wale ia no na mea i kuai ma ai kela Pa Papa aku a i kahi o ka mea, kuai mai, ina ma ke kaona nei, a me na Awa o kela Paeaina e like me ka aelike.

Aia maanei ke Keena o ka

MOKUMAHU "KILAUEA,"

L. MARCHANT, Kapena.

S.G. WAILA ma.

653 3m

HE

KAAO ARABIA

(UNUHIIA MAI KA BUKE MOOLELO ARABIA MAI, NO KE "KUOKOA.")

            MA KA make ana o Selemadina Mohameda, ka Moi o Peresia, ua noho alii mai o Saharia kana keiki hiapo mahope ona.

            O keia keiki alii, he nui kana mau hana pono, aka, o ka huhu ino hikiwawe loa ka hewa. Aia iloko ona, ua piha loa oia i ke aloha no Sahazena kona pokii hope loa; a i ka lilo ana nae o ke aupuni iaia, aole oia i alunu  i ka hanohano maluna wale iho no ona, aka, hoouna aku la oia i kona pokii, e hele a e noho alii ma Tatari, me ka hanohano kiekie a mana hoi, me he heiki alii kuokoa la.

Mahope iho nae o ka hala ana o na makahiki he umi o ko laua noho kaawale ana, me ka ike ole aku o kekahi i kekahi, a no ia mea, manao iho la lana e ike aku ike mai; a mamuli o ke noi a Saharia, ua hooholo paa iho la o Sahazena, e hele aku e ike i kona kaikuaana alii.

            Aia nae i ka wa i makaukau ai o kana huakai, a hoomaka no hoi ka hele, aole no ka hoi i kana mai ua mea he nui o o ua huakai nei, no ka nui o ka poe hahai, a oia paha ka huakai nui hookahi o ia mau la; a no ka loihi loa nae o ka hoonohonoho ana i ua huakai nei, aohe lakou i hala aku imua i kela la i hoomaka ai, a nolaila, ua pelu hou ua Moi nei i hope, i kona Halealii, me ka manao e haawi alua aku i kona aloha i kana Moiwahine, ka oi ana i aloha loa ai.

            Aia nae i kona hiki ana aku i ka Halealii, a komo aku la hoi i ko laua keena moe, me ka manao e hoohalua i kana Moiwahine ma ke ano paani, aia hoi, ua hookui koke ia mai la oia e ka inaina, a haule iho la ka puolo o ke aloha mai kona puuwai aku, no ka ike pono ana aku, e moe ana ua Moiwahine nei ma ka poli o kekahi kanaka kauwa kuapaa. A no ka ulupuni loa o na Moi nei i ka huhu, huki ae la oia i kana pahikaua, a ooki iho la ia laua elua a make.

            A make iho la ka Moiwahine a me kana ipon, hoi hou aku la ia ma kona wahi i hoi mai ai; aka, oiai oia ua piha i ka ukiuki a me ka minamina, aka, paa no nae kona manao e hele aku no ma kana huakai,

            I ka hiki ana aku o ka huakai alii i ke kulanakauhale alii o Peresia, ua hookipa mai la ka Moi me na lima aloha. Aka, e kau ana no nae ke kaumaha maluna o kona pokii Moi, me ka hiki ole ke hoomao ia ae. Ua hoikeia aku na hookipa hanohano ana a pau imua ona, aka, aole nae ia i lilo i mea nona e oluolu ai. a iloko nae o ka manawa pokole, pau ae la ke ano e o ua alii nei, hoi iho la kona mau helehelena a kona kulana mau.

            A ike nae o Saharia i ke ano hoihoi ana mai o kona kaikaina alii, olioli loa iho la oia, aka, aole nae i pau kona haohao i ke kumu i ano e ai na helehelena o kona kaikaina, aole no hoi he kumu i hoikeia mai no na hiohiona kaumaha o ke kaikaina mamua iho, ole loa aku he loheia o ka haalele koke ana mai o ke ano kaumaha.

            Aia nae a ike ke kaikuaana, ua oluolu loaia kona kaikaina, hookokoke aku la oia e ninau aku i ke kumu o kela ano kaumaha i uhi iho ai maluna ona. Aole no hoi i huna ke kaikaina i kona hai ana mai i kona pepehi ana i kana Moiwahine, aka, ua huna aku nae oia i ke kumu i mama mai ai kona kaumaha. No ka manao o ke kaikuaana, he mea nui loa aku la paha, ke hunaia la, nolaila, hoao hou oia i ka nonoi ana aku i kona pokii, mai huna i kekahi mea mai a ia aku. Ae aku no kona pokii, me ka i aku nae, "Apopo e hai aku no au, aka, e hoomakaukau nae ke alo alii no ka hele ana e alualu holoholona hihiu." Ae aku la o Saharina-a e like me ka olelo ana mai a kona kaikaina, haalele iho la oia i kona kaa lio, hele aku la a komo ma ka rumi i hookaawale ia no kona pokii, kahi kupono i ka naua ana aku i ka mala pua a ka Moiwahine.

            Mai ia wahi aku, i ulia mai ai ka ike pinepine ana aku ona i nalauna kamailio ana o ua lede la me kakahi Keonimana i makemakeia; a mai ia wa mai, i ike maka ai ua Moikane nei i kona hoohaahaaia a me ka manao ole iho o kana wahine i ko laua noho pomaikai ana ma ka hanohano piha. "O keia hana malu oluolu ole," wahi a Sahazena, "ka mea nana i hooneo mai i ko ʻ u mau ano kaumaha; a oiai aole e hiki i ke kanaka ui e like me ko ʻ u kaikuaana, ke hoomalu nona wale iho no i ka wahine, nolaila, ua hoohuliia mai au e ike, a ua kamo no ia ano iloko o ke kama o na wahine a pau, a hiki ole ai ia ʻ u ke hooloihi aku i ka hoomanawanui e noonoo i ke ano popilikia e like me ia."

            Ia wa no o Saharia i lohe ai, o ka pepehi koke iho la no ia i kana wahine a me kana ipo i ikeia; a no kona piha i ke kaumaha, koi aku la ia i kona pokii Moi, e hoonalowale ia laua mai ka ikeia ana aku e ke ao, a e noho ma kahi malu loa, a e hoopau i ko laua mau la ma ka honua nei, me ka hoikeike hou ole aku i na hoomaewaewa a na wahine.

            A no keia manao, noonoo iho la o Sahazena, he mea kupono ole nona ke kue aku i na manao mua o kona kaikuaana, oiaioia e piha ana i ka huhu a me ke kaumaha, ae aku la nae e ku makaukau oia; me ke noi pu aku, e ae mai oia, e hoi ia (Sahazena) i kona kulanakauhale alii, a e noho alii hou, me ka nana, ina paha e loaa ae ana he mau kane popilikia hou aku e like me laua.

            Ae iho la ua mau alii nei e hoonalowale ia laua, a haalele iho la i ke kulanakauhale me ka ike ole ia, a hele aku la mai ke kakahiaka a hiki i ke ahiahi, hiki ana laua ma kekahi kapakahakai. A i ka wanaao, puiwa ae la lana no ka lohe ana ʻ ku i kekahi leo nui mai ke kai mai, aohe nae laua i puka pono lea loa ae iluna o ke kumu laau, ike e aku la laua i kekahi lalani loihi iloko o ke kai, e hele mai ana i kapakai.

            Mahope koke iho, maopopo ia laua nei he akua lapu, ka enemi o na kanaka a pau. Ua eleele ia oia, me he helehelena la o ke kii hoomaka ʻ uka ʻ u; aia ma kona poo, he pahu aniani nui, a ina e pani me na laka eha e hooopaa ai, alaila paa.

            Aia nae i kona pae ana mai i kula, wehe ae la oia i ua pahu aniani nei mai kona poo ae, a waiho iho la ilalo i ka lepo, a noho iho la no maluna iho o ua pahu la; a mailoko mai o ua pahu la, ua ikeia aku kekahi wahine ui, ua kahikoia me ka aahu nani kumukuai nui, a noho koke iho la no ma ka aoao o ua akua lapu nei, a kamailio iho la me ka leo nahenahe i na wahine ui nei, "E kuu ui nani, ka mea a ʻ u i aihue mai ai ma kou la e mareia ai, a mai ia la mai a hiki ikeia wa, ua aloha loa ia au, e ae mai oe ia ʻ u e hoomaha aku ma kou poli; ihele mai nei au noka makemake e kuu i ka luhi." I ka pau ana o kana kamailio, haule iho la kona poo kihikihi, kau iho la ma na kuli o ka lede ui, a hiamoe iho la iloko o ka hiamoe kulipolipo.

            A ike nae ua wahine nei, ua ka ia loa ia ua akua nei e ka hiamoe nui, hapai ae la ia i ke poo mai kona uha ae, a hookuu iho la i ka honua, a ku ae la a hele aku la i ka pahu aniani, a lawe ae la he pokaa kaula, a helu iho la ia lakou me ka nana pono, a huli ae la i ke ʻ kua lapu, oiaino oia e moe ana, a pane iho la me ka leo ano hoohie, "Naaupo maoli no ka manao, o ka lili ka mea e hoopaaia ai ka ui; me ka manao ole i kau paa ana ia ʻ u, ke ike nei au, o keia mau kaula a pau, na ʻ u wale no ia mai na ipo mai a ʻ u he kanahiku kumam alima."

            A o ua keiki alii koi, eia no lana ke kau nei iluna o ke kumu laau, a hiki i ka wa a ua akua lapu nei i ala ae ai, a ho-o iho la i na wahine nei iloko o ka pahu aniani, a kau ae la iluna o ke poo, a luu akua la iloko o ke kai.

            I ua akua lapu nei i hala aku ai a loihi, hoi iho la ua mau alii nei mai luna iho e ke kumu laau, a olelo ae la ke kaikuaana, "Ua oi loa aku ka hoi ka pilikia o ke ʻ kua lapu mamua ona, a mamuli o ka hoohulihuli a ke kaikaina, ae iho la oia e hoi i kona aupuni, a e hoomaka i ka malama ana i ke aupuni.

            Ia laua nei i hoi aku ai, a mahope o kekahi manawa, manaoiho la ke kaikaina e hoi i kona aupuni, a nolaila, hookuu aku la kona kaikuaana e hoi.

            A mamua ae o ko laua hookaawale ana, pane aku la ke kaikuaana, "Ua noonoo loiki au, a ua hooholo, aole loa e malama i ke kuko no ka wahine, a ke manao nei au me ke kanalua ole, aole e emo a lohe hou oe no ʻ u, aole au e ninau aku ia oe e hahai mai mahope o ʻ u."

            Mahope koke iho o ka hala ana aku o ke kaikaina, koho aku la ka Moi kaikuaana i ke kaikamahine a kekahi o kona poe kaukaualii i wahine nana; ae ia ka mare a hoaoia; moe pu laua ma ka po mua, a i ke kakahiaka ana ae, loaa aku la ke kauoha i ka /Ilamuku nui, e pepehi i ka wahine a ka Moi i mare ai i ka la mamua iho. A i kela a me kei po, e ike ia ana ke anaina mare ma ka hale o ka Moi, aka, i kela a me keia kakahiaka, he poe make wale no na wahine i mareia iho e ia, no kona lili, o hoopulupulu iho no auanei, mikiia mai no e kekahi. a no keia hana iao, na kaulana aku la ia ma na wahi a pau a puni ka aina; a o kela a me keia makua mea kaikamahine, e haalulu mau ana lakou no ke ola o ka lakou mau kaikamahine; a e na Moi makemakeia nei e na makaainana mamua, a ma keia hana ino ana, ua lilo i mea hoowahawaha loa ia e kona lohui.

            O ia iho la ka hopena o na Moi kolohe he makemake a he hoinoia e kona lahui ponoi iho.--Pi-pi holo kaao.

Na Kanawai o ke Kau o 1874.

HE KANAWAI

            E ae ana i kekahi aie Aupuni, a e hoakaka ana i na ano e hoolilo aku ai na dala i loaa mai ma ia hoaie ana.

            E hooholoia e ka Moi a me ka Hale Ahaole la o ko Hawaii Pae Aina i akoakoa iloko o ka Ahaolelo Kau Kanawai o ke Aupuni:

            PAUKU 1. Ma keia, ua haawiia ka mana i ke Alii ka Moi, e aie aku ma ka inoa maikai o ke Aupuni Hawaii, iloko o na makahiki eono mahope iho o ka hooholo ia ana o keia Kanawai, i puu dala aole e oi aku mamua o ka miliona dala; a i ole, e like ka nui me ka mea i manaoia he kupono no na kumu i hana ia ai keia kanawai, a i hoakakaia mahope ae nei; no ia mea, e hiki i ka Moi ke kauoha aku, e hoopukaia na Bona kupono, na Bona Aupuni i kakau kopeia, a i ole ia na palapala kikoo i ka Waihona Aupuni; a iloko o ia mau mahele pakahi, e like me ka mea ana i manao ai he kupono, malalo nae o na olelo o ka Pauku elua o keia kanawai. E loaa no i na Bona ka ukupanee aole e oi aku i ka ehiku a me ekolu hapaumi hapahaneri keneta no ka makahiki, e ukuia i kela a me keia hapalua makahiki; a e hiki no ke hoopau aku i ua mau Bona n ei iloko o na makahiki aole e emi malalo o e umi, aole hoi e oi aku i ka iwakalua.

            PAUKU 2. A e hooholo hou ia, e hoopukaia na Bona no na dala i aie ia me ka ukupanee i ehiku me ekolu hapaumi hapahaneri keneta no ka makahiki; a ma keia ua haawiia ka mana i ke Kuhina Waiwai, me ka ae mai o ka Moi, e hoomakaukauia na Bona e hoopukaia ana, a e kakau inoa ia e Kuhina Waiwai a me ka inoa pu o ka Luna Buke Helu Dala o ke Aupuni, a e Sila ia me ka Sila o ka Oihana Waiwai; e uku ia ana ua mau Bona nei i ka poe nana i hoaie mai ke dala, a i ko lakou poe hope papa; a e hiki no hoi ke kakau ia mau Bona ma na Buke o ka Waihona, malalo o na rula a ke Kuhina Waiwai e kauoha ai. Aka hoi, ina e hui pu ia na kupona no ka uku ana i ka ukupanee, alaila, e hiki no ke hooliloia aku ia hai, me ke kau ole ia iloko o na Buke o ka Waihona. A e hiki no hoi i ke Kuhina Waiwai, mamuli  o ke kauoha o ka Moi, ma ke ano e panai no ke dala maoli, a i mea e uku ai i na haawina, a lilo e ae paha o ke aupuni, e hoopuka i mau Palapala Kikoo i ka Waihona, oia kekahi haawina o keia aie, e ukuia ana ma ka pau pono ana o na makahiki elima, mai ka la aku i hoopukaia ʻ i, aole e emi iho kekahi o ua mau Palapala Kikoo ʻ la malalo o na dala he kanalima, a no ka ukupanee ehiku me ekolu hapahaneri keneta no ka makahiki; aka nae, aole e oi aku ka nui o na Palapala Kikoo i ka Waihona i hoopukaia pela, i kela a me keia manawa, i ka Hookahi Haneri Tausani Dala. A eia hoi kekahi; aole no e hiki ke kono wale i kekahi e lawe ia mau palapala kikoo nei, i ka uku ana i kona haawina, a no kekahi uku e ae paha, ke ole i makemakeia. A ke hoopaa ia nei ka inoa oiaio o ke Aupuni Hawaii, no ka uku pono ia o ka ukupanee a me ke kumupaa o ia mau Bona a me na Palapala Kikoo i ka Waihona, ma ke dala maoli e uku ia, ke hiki aku i ka wa e ukuia ai ia ukupanee a me ke kumupaa.

            PAUKU 3. A e hooholo hou ia ona Palapala Kikoo, i ae ia ma ka Pauku maluna iho e hoopukaia, aia a hoihoi hou ia mai iloko o ka Waihona, alaila, e hiki no ke hoopuka hou ia aku, a i ole ia, o kekahi mau palapala hoiu ma ko lakou wahi, i kela a me keia manawa, a pau pono i na makahiki i wakalua i kauohaia ai no keia aie ana; aka hoi, e uku ana ia mau Palapala Kikoo ʻ la a pau, iloko o ia mau makahiki he iwakalua i oleloia.

            PAUKU 4. A e hooholo hou ia, ua haawiia ka mana i ke Kuhina Waiwai e uku aku noloko ae o na dala o ka Waihona i hookaawale ole ia no kekahi hana e ae, i na dala e lawa ai e hoomakaukau ia ai na Bona a me na Palapala Kikoo, a no ka hana ana a me ka hooholo ana i ka aie i kauohaia ma keia Kanawai; aka hoi, aia hooholo loa ia ua aie nei, alaila, e kau ia ua mau lilo nei ma ka aoao o ua aie nei.

            PAUKU 5. A hooholo hou ia, e hiki no i ke Kuhina Waiwai, me ke aponoia o ka Papa e like me ka mea i oleloia ma ka Pauku 6 o keia Kanawai, ke hoopuka a e hana no ka aie i kauohaia ma keia Kanawai, a o kekahi hapa paha o ia aie, ma na aina e, ina i ike ia ua pono o ia hana ana; a ina pela no e hana ai, alaila, e hiki no iaia ke hooholoia e uku ia ke kumupaa a me ukupanee ma kekahi wahi i olelo ia o ka aina e: a ma kei, ua haawiia ka mana i ua Kuhina ʻ la e hookohu aku i kekahi Luna a mau Luna paha, e like me kona manao he pono, e hana a e hooholo no ua aie nei, malalo hoi o kona kauoha, a no ka uku ana i ka ukupanee, a nana no e kau i ka uku o ia poe Luna, a e kauoha no na rula a me na ano a pau e hooponopono ai no ia aie, a me ka lawe ana ae a hiki i keia Pae Aina, e like me kona manao he pono. A ua haawiia hoi ka mana i ke Kuhina Waiwai, me ke aponoia o ka Papa i olelo mua ia, e hoolilo aku i na Bona i kauohaia ma keia Kanawai, ma ke kumukuai kupono, e like me kona mana e loaa ai ka pono nui o ka lehulehua.

            PAUKU 6. A e hooholo hou no, no ka mea, ua manoia, o ka aie i ae ia ma keia Kanawai, e hooliloia ana no ka hookaa ana i ka aie mua o ke Aupuni, ke hiki mai i ka manawa e hookaa ai o ia aie a me ke kokua ana i ka pono mahiai a me na pono hooulu e ae o ka aina, nolaila, i ka manawa e hooko ia ai keia hoaie ana, a o kekahi hapa paha, alaila, o ka Aha Kuhina o ka Moi a me na Komite ekolu mai ka Aha Kukamalu mai o ke Aupuni, i hookohu pono ia lakou e ka Moi iloko o ka Aha Kukamalu, e lilo lakou i Papa, me ka mana no ka hoolilo ana aku i kekahi mahele o ia dala, ma na palapala hoaie, i hoopaaia ma ka moraki ana i ka waiwai paa, a maluna paha o na mea hooulu a hana lima paha iloko o keia aupuni; a maluna paha o na mea makine i hana ia maanei, a i laweia mai, mai na aina e paha; aka hoi, aole e oi aku ke dala i haawi mua ia ma ia ano, mamua ae o ka elua hapakolu o ke kumukuai o ia waiwai, i ka wa i haawiia ua kokua nei. A o keia Papa e hoonohoia nei, e loaa no ia lakou ka mana e kau i na rula e pili ana i ka hoopaa poho, ka uku panee, ka manawa a me kahi e hookaaia ai ka ukupanee a me na rula e ae e hoomaopopo ai no ka hookaa hou ana i na puu dala i haawiia ma ke ano kokua, e like hoi me ko lakou manao ana he pono, a na ke Kuhina Waiwai e hoike aku i na dala i hoolilo ia ʻ ku, a me ka hoike pu mai i na loaa, i kela halawai ana keia halawai ana o ka Ahaolelo.

            PAUKU 7. A e hooholo hou ia, o kekahi o ia mau dala i ae ia e hoaie aku ma keia kanawai, e hiki no ke hooliloia aku, ke manaoia he pono e ka Papa i hoonohoia ma ka Pauku 6, no ke kukulu ana i mau Hale Papaa no ka hoaku ana i na mea ulu, a no ke kokua ana i ka hooholo mokumahu mawaena o na mokupuni, a no ke kokua ana i ka Oihana Ee moku mai na aina e mai. A o na Palapala Hoaie mai i loaa mai i ke Aupuni, i hoike ia ma ka Pauku 6, e malamaia a pau loa, i puu dala e hookaa aku ai i na Bona a me na Bila Dala i haawiia no ka aie, aole hoi e hooliloia no kekahi kumu e ae.

            Aponoia i keia la 7 o Aug. M H 1874

            KALAKAUA R.

HE KANAWAI

            E hoonohonoho a e hooponopono hou ai i na Kanawai o ke Aupuni.

            No ka mea, o na Kanawai o ke Aupuni e kau nei, ua hemahema ma kekahi mau ano nui, a no na hoololi pinepine, ua hemahema ka huli ia a ma kekahi mau olelo hooholo o ka Aha Kiekie, ua lawe okoa ia a hapa paha i na loina o na Kanawai o na aina e, a no ia mea, ua kanalua ia no ke ano maoli o kekahi mau Kanawai. A no ka mea, no ia mau kumu i haiia ae la, a no kekahi mau kumu pono e ae, ua manaoia he mea pono ke hoonohonoho a hooponopono hou ia na Kanawai, Nolaila:

            E hooholoia e ka Moi a me ka Hale Ahaolelo o ko Hawaii Pae Aina, i akoakoa iloko o ka Ahaolelo Kau Kanawai o ke Aupuni:

            PAUKU 1. E ku no i ke Kanawai, a ma keia ua haawiia ka mana i ke Alii ka Moi e hookohu aku i ekolu poe Komisina, he mau mea hoi a ka Moi i manao ai he poe makaukau no ia hana, na lakou no e hoonohonoho a e hooponopono hou i na Kanawai o ke Aupuni e kau nei a me na Kanawai i hooholoia ma keia Kau Ahaolelo, a e hui pu ia me kekahi mau olelo wehewehe a me na kuhikuhi i na olelo hooholo ano nui o ka Aha Kiekie, a e hoike no ko lakou mau hana imua o ka Ahaolelo o kela Kau e hiki mai ana.

            PAUKU 2. Ma keia ua hookaawaleia na dala i ekolu tausani elima haneri e uku ai i na lilo no ka hana i kauohaia ma keia Kanawai, a ua ae ia ʻ ku ke Kuhina Waiwai e haawi aku ia dala i ua poe Komisina nei i kela a me keia manawa e like me ka mea i manaoia ua pono.

            PAUKU 3.  E lilo keia i Kanawai mai ka la aku i aponoia ʻ i.

            Aponoia i keia la 7 o Aug. M H 1874.

            KALAKAUA R.

HE KANAWAI

            E hoololi ai i na Pauku 2 a me 3 o ke Kanawai i kapaia "He Kanawai e hoopau ai i ke Kanawai i kapaia he Kanawai e pili ana i ke koho Balota," i aponoia ma ka la 31 o Dekemaba, 1864, a e hooponopono ai no ka pono koho Balota no na Lunamakaainana iloko o ka Ahaolelo Kau Kanawai o ke Aupuni, i aponoia i ka la 24 o Iune 1868, a e hoopau loa ana i na Pauku 1 a me 2 o ka Mokuna LXXXVI o ke Kanawai hoopai Karaima.

            E hooholoia e ka Moi a me ka Hale Ahaolelo o ko Hawaii Pae Aina, i akoakoa iloko o ka Ahaolelo Kau Kanawai o ke Aupuni:

            PAUKU 1. E hoololiia a ma keia, ua hoololiia no ka Pauku 2 o ia Kanawai, a penei e heluheluia ʻ i.

            Pauku 2. O kela kanaka keia kanaka malalo o ka Moi, ina ua noho paa ma keia aupuni i hookahi makahiki mamua iho o ka la koho, a na ike oia i ka heluhelu a me ke kakaulima, ina ua hanau oia mahope iho o ka makahiki 1840, a ina ua hookomo oia i kona inoa ma ka papa inoa o ka poe koho o kona Apana e like me ka mea i hoakakaia mahope ae nei, e hiki no iaia ke koho i kekahi kanaka a mau kanaka paha i ka Poeikohoia no ia Apana, aka hoi, aole e hiki i kekahi kanaka pupule, a hupo paha ke koho, aole hoi i kekahi kanaka i hihia i ke Karaima nui ma ka hookolokolo ana ma keia Aupuni, ke ole i kala ia kona hewa e ka Moi, a ke ole hoi ke loaa iaia i na pono a pau o ke kanaka kupa ma ia kala ana, o ka poe wale no i ae ia ma keia Pauku, o lakou wale no kai ae ia e koho balota, ma ke koho ana i na Lunamakaainana iloko o ka Hale Ahaolelo o keia Aupuni."

            PAUKU 2. E hoololiia a ma keia, ua hoololiia no ka Pauku 3 o ia Kanawai, a penai e heluheluia ʻ i:

            Pauku 3. Na kela a me keia Luna Helu, maloko o ko lakou mau Apana iho, e kakau pololei ma na Buke Helu, ma na lalani okoa, e like me ke ano pai hakahaka i hoikeia malalo ae nei, na inoa o na kanaka a pau i kupono i ke koho balota, e like me ka Pauku 2 o keia Kanawai; a ina hoi e ikeia kekahi kanaka i loaa iaia na pono e koho balota ai, e like me ka Pauku 62 o ke Kumukanawai i hoololiia, aka nae, ua loaa ke kumu malalo o ke Kumukanawai e loaa ole ai iaia ka pono o ke koho balota ana, alaila, e kakau pololei ka Luna Helu ia meama ka lalani i hookaawaleia no ke poo, "Kela mea keia mea."

NO KA PONO O KE KOHO BALOTA.

Inoa

Na Makahiki.

Ka loihi o kona noho ana ma keia Aupuni.

Ike i ka heluhelu me ke kakaulima i na hoi ua hanau mahope o ka M H 1840.)

Kela a me keia mea.

            PAUKU 3. E lilo keia i Kanawai mahope iho o ka la 1 o Iune M.H. 1875, a o na Pauku 1 a me 2 o ka Mokuna LXXXVI o ke Kanawai Hoopai Karaima, e hoopauia a ma keia ua hoopau loa ia.

            Aponoia i keia la 7 o Aug. M.H. 1874

            KALAKAUA R.

Make I Alohaia.

E KE KUOKOA E; Aloha oe:-

            Ma ka la 28 o Augate aku nei, make iho la o Napoi ka ʻ u wahine mare. Ua mareia maea ma ka la 9 o Mei o kaia makahiki no. A no ke aloha, ua haku iho au i wahi kanikau nona.

He kanikau aloha nou e Napoi,

Ua haalele mai oe ia ʻ u i ka hora 2, Aug 28,

Aloha Kalepolepo ia wahi a kaua i pili ai,

Aloha Kaluaihakoko ia kaha loa,

Aloha Puuloa huli nana ia Palauea,

Aloha Waipao i ka malu iaia,

Aloha Keekeehia ia puu kaulana,

Aloha ka Rosy Ranch,

Aloha Ulupalakua ia uku iu ano,

Aloha ka hale poepoe,

Ia hale hoolaukanaka a kaua e noho ai,

Aloha kahi ai haihai i ka lima o na kanaka

Aloha oe, aloha la-e.

Aloha Kukahuelo ia wai hoihoi,

Aloha ka mekini hoomaloo kepaa,

Aloha ke oeoe i ke kani mai i ke aumoe,

Moe au a huli aku aole oe,

Auwe kuu wahine-e.

Kuu wahine ka ka mea aloha ua hala,

E aloha ae ana i ka hale puhiko,

O ia hale hoolaukanaka ke hele ia,

Aloha Puuokaeo, ia puu kau mai iluna,

Aloha ka puu o Makakualole, wehiwehi i ka lau laau, (ohe,

Aloha Kanenelu ia wai hoi pu no me ka

Aloha Puu@ahoe huli nana i ka makani,

Auwe kou wahine aloha ua hala-e.

            KAAPA.

Ulupalakua, Sept. 9. 1874