Ka Nupepa Kuokoa, Volume XIII, Number 38, 19 Kepakemapa 1874 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

Beautiful Eden.

                                          Pure Gold p 82.

1.

  Edena nani ! mala maikai !

  Home e malo a oli mau ai !

  Imi au la ke u a luuluu,

  E pii a maha ma kou mau laau.

Cho.--Edena nani ! Edena nani !

           Nani na pua, nani ka ai ;

  Maemae kou wai la, wai puna, wai mau;

           Edena nani ! i ini au nou.

2.

  Edena nani ! kei na laau !

  Ala na pua, a pua a mau--

  Kaawale aku na ino, na u,

  Kani a mau la kou mau halelu.

Cho.--Edena nani ! Edena nani ! &c.

3.

  Edena nani ! lai kamahao !

  Pu iuiu la kou mau laau !

  Ono na hua, a haa mau no ;

  Pa nani mai la na oli mau ou.

Cho.--Edena nani ! Edena nani ! &c.

4.

  Edena nani ! paa ma ke ao !

  Kou Paredaiso ua uli a mau ;

  Home paa mau no na auwana nei,

  A maha pu me na kini maikai.

Cho.--Edena nani ! Edena nani ! &c.

5.

  Edena nani ! mala maikai !

  Kahi o Iesu e launa mau ai

  Me na haipule a oli pu no,

  Aloha, kanaaho, a malu a mau.

Cho.--Edena nani ! Edena nani ! &c.

                                          HAWAII.

HAAWINA KULA SABATI.

KA HAPAHA EHA O 1874

HELU 38, SABATI OKATOBA 4.

KUMUHANA--Ka Uuu Kuli.

  PAUKU BAIBALA.  Mareko 7: 31-37.

  31 HAALELE aku la ia i na mokuna o Tero, a me Sidona, a hele mai la ia mawawa o na aina o Dokapoli, a i ka moanawai o Galilaia.

  32 Lawe aku la lakou i ona la i kekahi mea kuli, ua uuu no hoi kona leo; nonoi aku la lakou iaia, e kau i kona lima iluna iho ona.

  33 Kal ae la oia iaia mawaho o ka Ahakanaka, a kaawale, hookomo iho la i kona mau lima iloko o kona, mau pepeiao, kuha ae la, a hoopa mai la i kona alelo.

  34 Nana ae la ia iluna i ka lani, uwe aku la, a i mai la iaia, Epata, oia hoi keia, e weheia.

  35 Poha koke ae la kona mau pepeiao, a hoaluia ke kania o kona elelo, a olelo maopopo mai la ia.

  36 Papa mai la Iesu ia lakou, mai hai aku i kekahi; aka, me ka nui o kana papa ana, pela no ka nui o ko lakou hookaulana nna aku.

  37 A mahalo loa iho la lakou, i ae la, Ua hana pono oia i na mea a pau loa.  Hana aku no ia i ke kuli, a loheia, a me ka aa hoi, a olelo no ia.

  PAUKU GULA.  Pauku 37, hoopaa naau.

  MANAO NUI.  Na mea hiki ole i kanaka, ua hiki no i ke Akua.

  MELE--Gula Maemae.  Pure Gold p 6.

  2    Ka olelo a Iesu i haawi mai

          I kuhi lea'e i ke ala maikai,

        He waiwai mau ia a oi nui ae

          Na daimana uka, na momi o kai;

        E imi, e huli, hoopaa a hahai

          Ka olelo a Iesu, ke gula maemae.

  3    Na hua a ka Uhane e haawi mai,

          Ka oli no ia no ke kalaia'e,

        Ke mihi, a pule, a paulele pu,

          A hoopili mau i ka Haku Iesu.

        E noi i ka Uhane i hoomaemaeia'e,

          I loaa ka oli ke gula maemae.

  PULE hoomaikai no ka loaa ana o ke kula mea o keia hapaha hope o ka makahiki, pule hoi no na aina e i loaa na kula Sabati, me na mea a pau e ola'i.

NA NINAU A NA KUMU.

  P 31. Ihea Iesu mamua, a heaha kana hana aloha malaila? p 29,30.  Haalele oia ia wahi a hele mauka ma na kumu o Ioredane ma ka akau o Galilaia, mawaena o Dekapoli a ihea?  Dekapoli heaha ia?  No hea ka inoa? No Deka, umi, me poli, kulanakauhale.  Umikulanakauhale.  He 10 kulanakauhale ma ia aina, ma ke komohama o Ioredane kekahi, a ma ka hikina nae ka nui.  Ua hele Iesu a i ka aoao hikina o ka moanawai hea? No ke aha ka hele ana ilaila ?  Nana i na pauku malalo iho.

  P 32. He kanaka aha ka i laweia io Iesu la? Nawai i lawe? no ke aha?  A nonoi ia Iesu e aha?  Ua ike anei lakou i ka mana o Iesu mamua?  Owai na kuli me na uuu maanei?  A e lawe oukou ia lakou i owai la?

  P 33-34.  Ehia hana a Iesu i hana'i i keia kuli mamua o kona lohe a ekemo ana?  Ehiku paha.  Helu i maopopo.  Aole anei i hiki ia Iesu ke hoola koke?  No ke aha keia mau hana liilii?  He mau mea paha ia e ala'i kanoonoo, ka manaoio o ke kanaka kuli, a o ka poe e nana mai ana.  He kanaka kuli, a aa, aole lohe iki, aole hiki ke hoala i ka manao ma ka ninau a olelo ana ia ia.  Ma ua hoailona e hiki ai. A he kumu hoohalike paha na kakou.  E hana e i kekahi mau mea e ala'i ka manao o kanaka, o kamalii.  Ua hana anei Iesu pela mamua, a mahope ? mok. 8: 23-26. Ioane 9:6.

  P 35-37.  Heluhelu.  Pehea ke kanaka kuli? Pehea mai Isaia 35:5,6.  Ko anei?  Papa Iesu, mai aha? no ke aha? Ua hooloheia anei?  Pehea hoi kanaka? Hai paanaau mai i ka pauku gula.

  MELE.  Laboring for Jesus.  Silver Song p 26.

  1  E  na pokii iki ma ke kula nei,

      Hana mau no Iesu hana a maikai;

      Ma na hora kula, ke a hele ae,

        I ke Kula Sabati.

Cho. Hana mau no Iesu,  No ka Haku e,

         Lu ma kona mala, Waele a maikai;

         Iesu no ke Kahu, Nana e Alakai

            I ka aina maluna'e.

  2  E na koa iki, koa no Iesu,

         Nauwe lanakila,  Nauwe pu a mau;

         Paa ka lole kaua, Kaua oli pu,

           Kaua, mele hoomaikai.

Cho. Hana mau no Iesu, &c.

NA NINAU A KE KAHU.

NA MAKUA.  Heaha ke kumu hana o keia Haawina?  Mahea i kukauia'i?  Ua kakauia anei ma kahi e?  Mahea ka like ole o keia kuli me na kuli a aa e ae a Iesu i hoola'i?  Mat. 9:32. 12:22. Luka 11:14.  Aia mahea keia kuli?  Mai hea mai Iesu a ilaila?  Ka Iesu hana mau anei ke kaapuni ana e hana maikai? Hoopaa.  Oih 10:38.  He kumu hoohalike ia no wai?

  NA KEIKIKANE.  Heaha keia hana mana a Iesu i hana'i?  Mahea ka like ole o keia hana mana me na hana mana e ae a Iesu i hana'i?  Noonoo pono, Ke kanaka lepera, ola ma ke aha? Mar. 1:41.  Ke kanaka uhane haukae ola pehea? mok. 1:25.  Ka mai piva ola ma ke aha? mok. 1:31.  Ke kanaka lolo ola pehea? mok. 2:5,11.  Ka lima maloo, ola i ke aha?  mokuna. 3:3,5.  Makani ino, pau i ke aha? mok. 4:39.  Kanaka daimonio Legeona, ola pehea? mok. 5:8.  Wahine heekoko, ola pehea? ke keikamahine a Iaero, ola ma ke aha?  Ka hanai ana i na kausani elima, ma ke aha?  Makani nui malie i ke aha? mok. 6:51.  Ke kaikamahine a ka makuwahine no Poinikia, ola i ke aha ? mok. 7:29

  NA KAIKAMAHINE.  Hai mai i na hana i ola ai keia kuli.  I Laweia io Iesu la. 2 Nonoi ia Iesu.  Elua hana a kanaka.  Na hana a Iesu.  1.  Hookaawale aku.  2 Hookomo i kona lima iloko o ka pepeiao.  3 Kuha a hoopa i kona alelo.  4 Nana i ka lani.  5 Uwe.  6 Olelo,  Epata, e weheia.  6 ka hana.  No ke aha ka nui o ka hana?  E noonoo pono, a loaa ole ia oukou e kokua mai ka mea noonoo.  No ke aha i lawe ai ke Akua i na la eono e han'i i ka honua nei, oiai i hiki ke hanaia i ka la hookahi a emi mai paha?  He kumu hoohaliki paha keia.  Ma ka hana liilii e huli mai ai kekahi poe.

  NA POKII.  He kanaka aha keia?  He kanaka kuli a uuu.  Pela anei kekahi maanei? Ae, ke keiki a Hakauila.  Aloha anei oukou iaia, a i na kuli e ae, mo na makapo na lolo?  Aloha ia anei kela kuli ma keia Haawina? Ae, aloha na makua, na makamaka, me Iesu.  Ma ke aha i maopopo ai ke aloha o na makua, o na makamaka?  Ma ke aha i maopopo ai ke aloha o Iesu?  Ua pau anei ke kuli a me ka uuu ana o keia kanaka?  pan koke anei?  ma ke aha?  Pehea  Iesu?  Papa, aole make e aha?  Hoolohe anei lakou i keia papa ana?  He mau kuli a uuu ma ka uhane, owai lakou?  O oukou anei kekahi?  Ae, hookuli makou, ekemu ole, pule ole, hoomaikai ole.  Heaha ka pono? E lawe ia makou io Iesu la, a e nonoi aku na haipule ia Iesu e hoola mai.

  KE KULA A PAU.  O ka Iesu man hana e ola'i keia kuli, he kumu hoohalike ia na kakou, na kumu, na kahu, &c., e wehewehe mai kekahi.  Paakiki, hiamoe, kuli loa, leo paa kekahi poe; e hana liilii, e lalau a hookaawale, e heluhelu i kekahi pauku, e alakai i ke kula, i ka halawai, e ninau, hoonaauao, e pule me ka uwe, &c.  Hai like mai i ka pauku gula me ka manao nui.

  MELE "Work in the Vineyard."  Pure Diamonds, p 47.

    1   Na paahana a Iesu,

           Kanaka, me kamalii,

         He uku nani ko oukoa

           Ma ka lani maluna'e.

Cho.    Hana mau nona

            I loaa mai nou

            Ka lani me kona waiwai a pau.

    2   Hana, hana no Iesu,

            Me ka ia la i ao mai;

          Hana, mai ke ao a po;

             Hana a pau ke ola nei.

Cho.      Hana mau nona, &c.;

  PULE i lohe a hoolaia na kuli, na uuu ma ka uhane ma na aina Pegana.

     Haawina no Okatoba 11. Mareko 9:17-29.

                    HAWAII.

Nani ka ulu ana o kekahi laau ma Kaleponi.  Elua mea i kanuia i ka M H 1868, elima makahiki i hala ae; "Eucalyptus" ka inoa o ua laau la.  Eha kapuai me na iniha aha ke anapuni i ko kela ko keia kumu i keia manawa.

KA PONO

O KA

MALAMA KEIKI I BAPETIZOIA,

NO KA HAKU.

  3. Eia kekahi.  E ao aku i ka oukou poe keiki e hana me na lima.

  Manao kekahi poe he mea kaumaha loa ka hana me na lima, no ka mea, wahi a lakou, i ko Iehova hoohewa ana mai i ko kakou makua ia Adamu  no kona hookuli ana i kona pepeiao, kauoha mai la ia ia ia e hana.  Eia kana; Kinohi 3:19. "Ma ka hou o kou maka, e ai ai oo i ka ai, a hiki i kou wa e hoi hou aku ai i ka lepo."  No keia maoao, a no ka molowa kekahi, ohumu ino kekahi poe i ke Akua, a imi ikaika lakou e pakele ai ka hana.  Ua kuhi hewa loa ua poe nei.  O kela kauoha a Iehova, ea, aole kupono ia i ka huhu a me ka ioaina.  Aole loa.  I kona lokomaikai nui mai i na kanaka, hoolilo mai ke Akua ia mea luhi, i mea e oluolu ai, a e pomaikai ai na kanaka a pau.  O ka hana maoli, he mea ia e ono ai ka ai, a me ka hiamoe ana; he mea ia e ikaika ai ke kino, a e oluolu ai ka manao.  He laau lapaau ia no kekahi mau mai, a he mea ia e ole ai ka hoowalewaleia mai a Satana.  No ia mea, ua ikaika loa ka poe mamo a Iseraela i ke ao aku i ka lakou poe keiki i ka hana.  Pela na makua waiwai, a me na makua ilihune.  Eia ka lakou olelo nane, I ao ole kekahi i kana keiki e hana, na ao oia ia ia e aihue.  Nolaila paha, ko Paulo hooikaika ana i kona poe hoahanau.  2. Tesalonike 3:10, 11, 12.  "No ka mea hoi, ia makou i noho ai me oukou, ua olelo aku makou ia oukou penei,  Ina aole e hana kekahi, aole hoi ia e pono ke ai.  Ua lohe hoi makou, e, aia hoi iwaena o oukou kou kekahi poe e hele hokai ana, aole e hana maoli ana, ake, he poe hana lapuwale.  A oia poe, o ka makou ia e kauoha aku nei me ka hooikaika aku ma ko kakou Ilaku, ma o Iesu Kristo la, e hana maoli lakou me ka noho malie, a e ai hoi i ka lakou ai ponoi iho."

  Ina makemake ole oukou, e na hoahanau e lilo ka oukou poe keiki i poe kolohe, i poe aihue paha, ai poe hoowahawahaia e ke Akua, a me kanaka, mai ae aku oukou i ko lakou noho wale ana me ka hana ole.  E ao aku ia lakou i kela hana, i keia hana, a lilo lakou i poe akamai, a makaukau hoi e hana ma na mea e pono ai ke aupuni.  O ka molowa, o ka hana palaualelo, o ka hoowahawaha i ka hana maoli, he mea ia e pono ole ai ke aupuni, ka aina, ka ekalesia, a me kanaka.  E makau oukou i keia noho ana.  E pale ikaika aku.  E kuhikuhi ia Iesu, a me kana poe haumana, a e ao aku i ka oukou poe keiki e hahai mawuli o ia poe, no ka mea, he poe hana ikaika ia poe.  Makemake ke Akua i na kanaka ikaika i ka hana, no ka ea he nui no kana hana, aole pau koke.  O ke ku e i kona poe enemi, o ke kukulu i kona aupuni, a o ka hoolaha i kana olelo a puni ka honua, oia kana. Nolaila, e ao aku i ka oukou poe keiki e koho ma ka hana e lilo ai lakou i poe ikaika, i poe makaukau e kokua mamuli o ka ke Akua hana, a hoomanawanui malaila, a hiki i ka make ana o ke kino.

  4. Eia ka mea i koe a'u e hoakaka aku.  E ao aku i ka oukou poe keiki e makau i ke Akua, a e malama i kona mau kanawai.

  Ma ka hope keia mea, aole nae no kona uuku, no ka mea, oia ka mea nui o na mea a pau loa.  I aku La Iesu ia Mareta, Luka 10:42.  "Hookahi mea e pono ai."  Heaha ia mea?  Na Solomona i hoakaka:  Kekahuna 12-13.  "E makau i ke Akua a e malama i kona mau kanewai, no ka mea, oia ka ke kanaka pono a pau."  Eia ka Iesu, Mataio 6:33.  "Aka, e imi e oukou i ke aupuni o ke Akua, a me kana pono, a e pau ua mau mea la i ka haawaiia mai ia oukou."  Eia hoi ka Paulo:  I Timoteo 4:8.  "O ka hooikaika ana o ke kino, he uuku ka waiwai, aka o ka manao i ke Akua, he mea ia e pono ai i na mea a pau, ua olelo mua ia mai no hoi, nona keia ola ana e noho nei, a me kela ola ana."  Ma keia mau olelo, ua akaka lea ia, o ka makau i ke Akua oia wale no ka mea e pono ai, a o na mea e ae, pau lakou i ke aleia e ia.  O ka naauao maoli, a me ka ike; o ke akamai i ka hana, a me ka noho lako ana ma na mea o ke kino, he maou mea liilii loa me he hunawai hookahi i ka moana Pakifika nei, a me ka huna lepo hookahi i ka mauna kieki, a nui loa!  E hiki no ke hoomanawanui i ka ilihune, a me ka mai, a me ka make o ke kino, aka, o ko ke Akua huhu, a me kona hoopai ana i ka make e ulu mau loa ana, aole loa e hiki ke hoomanawanui!  Hookahi mea wale no e pakele ai ka oukou poe kieki, O ka makau i ke Akua, a me ka malama ana i kona mau kanawai!

  No ia mea, e na makua o Hawaii nei, e na hoahanau, e noonoo pono oukou i keia mea nui.  E manao pinepine oukou i ka waiwai o ka Uhahe hookahi.  E minamina i ka make ana o ka oukou poe keiki.  E hiki anei ia oukou ke nana i ka oukou poe keiki i alohaia, e moe ana iloko o ka lapalapa ana o ke ahi e aa mau loa ana, me ka uwe, a me ka ui na niho?  E hiki anei ia oukou ke ike i ka uwahi o ko lakou hoomainoino mai e pii ana iluna, a mau loa, a mau loa?  Pehea la e pakele ai lakou ia man mea weliweli?  Pau loa lakou i ka hihia i na kanawai o Iehova.  Ua ono ka hewa ia lakou.  Ua makaukau lakou e hele i ka po, a e hele auanei lakou malaila, ke huki ole ia mai lakou e ke Akua, e like me ka momoku ahi noloko mai o ka lapalapa.  E noonoo oukou i ko oukou nawalewale.  Aole loa e hiki ia oukou, e na hoahanau, ke hoohanau hou i ka naau o kekahi o lakou.  Nolaila, e pule pinepine i ke Akua me ka manaoio aku i kana Keiki, me ka manao ikaika, a me ka wai maka, i haawi mai ia i ka Uhane Hemolele, a i hoohanau hou mai i ko lakou mau naau.  I na la a pau loa, e hele hemolele, a me ka pololei imua o Iakou.  Ma ka malama keiki ana, mai ku e ka makuakane i ka makuahine, a o ka makuahine i ka makuakane.  E hana me ka manao lokahi. E akabele oukou. E malama i ko oukou waha, i ko oukou kamailio ana imua o lakou.  Mai hoopuka i kekahi olelo ino mai loko aku o ko oukou waha.  E ao aku i ka oukou poe keiki i ka oiaio, ma ke kamailio ana, a ma ka hana ana, i makau loa lakou i ka wahahee, a me ka hoopunipuni a pau loa. E hooikaika ia lakou e huli i ka ke Akua olelo.  E heluhelu pinepine i ka Baibala.  E ao aku ia lakou i ka palapala, a me ka pololei, a me ka hemolele, a me ka maemae, a me ka maikai o ko ke Akua kanawai. E ao aku ia lakou i ka uku o ka malama ole:  O ka make mau loa. E ao hoi ia lakou i ko lakou hihia i kona kanawai.  E kuhikuhi ia Iesu i ke Keiki a ke Akua, i ke kalahala nui hookahi i haawiia mai  i ola ko ke ao nei,  a e hooikaika ia lakou e hele iona la, e auau i kona koko mana, pau ko lakou haumia, a i pakele lakou i ka make.  E ao aku ia lakou e mihi koke i ko lakou hewa me ka hoopailua, a me ka haalele i na mea ino a pau loa. E ao ia lakou e pule mau aku i ke Akua e malama i ka la Sabati. E hele mau i ka luakini o Iehova i hoolohe lakou i ka Iesu olelo. E kiai mau oukou ia lakou i ka po, a me ke ao.  Mai ae aku i ko lakou hele pu, a launa pu me ka poe kolohe, me na kamalii, a me na kanaka haumia, palaualelo, kuamuamu, huhu.  E pale ikaika aku i ua poe nei, o lilo ka oukou poe keiki i poe like. Ma na mea a pau loa e ao oukou ia lakou e lilo i poe noho malie, i poe oiaio, i poe oluolu hoi, i poe makau i ke Akua, a malama i kona mau kanawai.

  E na makua mea keiki i bapetizoia, e na hoahanau o Hawaii nei, ke noi aku nei makou, e lilo oukou a pau loa i poe malama berita.  Ua hoohiki oukou i ke Akua e malama i ka oukou poe keiki nona. Mai hoohiki ino.  Ua kauia mai ka hoailona o ka malama berita maluna o na keiki a oukou.  Ua bapetizoia lakou iloko o ka inoa o ka Makus, ke Keiki, a me ka Uhane Hemolele. Ma ia hana, ua haawi aku oukou ia lakou i ka Haku. No ia mea, e hooko i ka oukou olelo, a me ko oukou hoohiki ana. E hana ma ka oiaio, a e hoomanawanui a hiki i ka hopena.

Halawai makahiki o ka Ahahui

Misionari Amerika no ko na

aina e.

  O ka halawai makahiki 65. o ko Amerika Papa Misionari no ko na aina e i keia M. H.--aia no ma Rutland, Vermont; e hoomaka ana i ka Poalu, la 6 o Okataba, hora 3, P.M ; a a hoopau ana i ka Poalima, la 9, Okatoba.

  O na kamaaina ma Rutland, a ma na kauhale kokoke mai e hookipa aloha i na lala he nui wale e akoakoa mai ana i keia halawai makahiki, e like me ko lakou hiki.

  Ua manao ke Komite i kohoia e hooponopono, e hiki ia lakou ke hookipa 1,500 ; a 500 paha e kipa me ko lakou poe makamaka ponoi--hui, 2,000 e hookipaia.

  Ia Rev. H. M. Scudder  D. D. Brooklyn, Nu Ioka, ka haiolelo i keia halawai.  O ka halawai M. H. o keia Aha, he halawai nui no ia no ka poe a pau e aloha ana i ko kakou Haku, Iesu Kristo, a makemake hoi e hiki mai kona aupuni iwaena o ko na aina e.

  He Ahahui Misionari kahiko keia--he kanaono kumamalima na makahiki mai kona hoomaka ana i keia oihana.

  I kinohi, aole nui na kahunapule, a me na luna ekalesia ka i launa mai--kakaika hi wale no.  No ka mea, aole maopopo ia lakou e make pono keia oihana.  Ua piha nae kekahi mau kanaka opio i ka uhane o Kristo ; a ikaika ko lakou manao e hele, a e hai aku i ka euanelio o Kristo i ko na aina e. Oia ka hoomaka ana, Aka, aole liuliu, a ua ike pono kekahi mau kahu, a me na luna ekalesia, he hana maikai loa keia, a ua kokua ka Haku i na misionari e hele ana mamuli o kana kauoha--Mat. 28-19, 20--"E hele ae oukou e hoohaumana'ku i na lahuikanaka a pau" &c &c.  A mai ia wa mai, ua mahuahua ka poe kokua i keia oihana maikai.  Nui na kahunapule, na luna ekalesia, na hoahanau haipule, ka poe ilihune a me ka poe waiwai, e kokua mau ana i ka oihana misionari i ko na aina e.  Nui hoi na hoahanau opio ka i hoolilo ia lakou iho i keia hana ;--aia ma Aferika kekahi--ma Asia kekahi, ma Hinedu, ma Ceylona, ma Kina, Iapana, ma Amerika Hema, mawaena o na Inikini, ma Hawaii nei, ma Maikonisia, &c &c.

  Elima, eono paha haneri tausani dala e lilo ana i kela makahiki keia makahi, e kokua i na misionari paahana o ka Papa Amerika e noho ana ma na aina e. Nolaila, ina i emi mai ka loaa, mai na ekalesia mai, alaila ua pilikia ka Papa Amerika i ka hoaie, no ka mea, aole pono ke waiho wale i na misionari me ka hemahema iwena o na pegana, naaupo, hupo, hoomanakii, &c &c.

  I ka 30 o Iune i hala ae, ua hoike ka Pukuu waiwai o ka Papa Amerika ma Bosetona, i ko lakou pilikia no ka lawa ole o na dala ma ka waihona.  I aku la oia, he $88,000 ko lakou aie ia manawa;--a ua kokoke mai ko lakou halawai makahiki; no laila, ua paipai nui oia i na ekalesia, a me na haole waiwai e kokua koke mai, i pau e ka aie, mamua o ka halawai ma Rutland, i ka la 6 Okatoba.

KIDNAPPING.

  He aihue kanaka, me na kamalii keia hana!  Aia ma Germantown, he kauhale kokoke i Piladelepia, Amerika Huiia, kahi i aihueia ai o Keoki, (George) e kekahi mau malihini.  I ka la mua o Iulai i hala ae, e paani ana elua mau keikikane ma ke alanui.  He mau keiki laua na Mr. Ross, he haole kalepa i na mea ai. (Grocer) He mau hora ko laua nalowale ana, alaila hoi mai ka hiapo, a olelo oia i kona makua, ua lawe aku kekahi mau malihini i kona kaikaina iloko o ke kaa lio.  I ka ninau ana i ua keiki nei, ua ikea, he mau malihini elua ka i launa mai i ua mau keikikane nei elua i kekahi mau la i hala ae la, i ko laua paani ana ma ke alanui.  A ua hooluolu mai la laua, me ka hoowalewale mai hoi i ka haawi ana i kekahi mau mea ono ia la ua. (Candy)  A hiki mai ka la akahi o Iulai, hele hou mai ua mau malihini la iloko o ke kaa lio, a ninau i ua mau keiki la, i ko luua makemake e holo lealea aku ma ke kau?  Ae aku no laua, a ee koke i ke kaa, a holo aku la.  A hiki aku ma kau wahi, ku ke kaa, a haawi na malihini i ka hapawalu i ke keiki nui, e hele iloko o ka hale kalepa, e kuai i kekahi mau mea hoopahupahu, (fire crackers.)  A i kona lele ana ilalo, ua paipaiia na lio, a ua holo aku la ke kaa me ke keiki uuku, a aole i ikea hou ia mai.

  I ka lohe ana o na makua i keia mau mea, aole o kana mai ko laua kaumaha, no ka mea, ua maopopo, ua lawe kolohe na malihini i ka kaua keiki aloha, ia Keoki, eha wale no ona mau makahiki.

  Ua hoopii na makua i na makai e imi koke iaia, aka, aole he loaa mai.  A hala na la eha, ua hoolaha aku o Mr. Ross ma ka nupepa ; a olelo oia, e haawi aku i ekolu haneri dala i ka mea e hoihoi mai i ua keiki la.

  Aole liuliu a puka mai keia olelo ma ka nupepa Ledger, (Legera) a penei na olelo: "Ross,--We be ready to negotiate;" oia hoi, "E Rose, ua makaukau maua e hooponopono."  A ia la hookahi no, ua loaa mai ia Mr. Ross he palapala, me ka inoa ole, e olelo ana, "E hoihoiia aku ke keiki no na dala he iwakalua tausani, ($20,000.)  Eia no ke keiki--ua malama pono ia--he nui ko laua liloana e loaa mai, nolaile, aole laua e hoihoi aku iaia, ke loaa ole mai na dala he $20,000.

  Palapala hou o Mr. Ross ma ka nupepa, "ae, e haawi aku no au i ua mau tausani dala nei, ke loaa mai; aka he kanaka ilihune au, a i ka imi ana, aole e loaa mai."

  Palapala mai hoi kekahi ; Ua ikea no he ilihune o Mr Ross; aka he nui ka waiwai o kona mau hoalauna, a pono iaia ke hoolimalima i ua mau dala la, ke makemake oia e malama i ke ola o ke keiki.  Eia hoi, ina e hele mai kekahi e lawe wale'ku iaia, e pepehiia ke keiki a make loa."

  I ka imi ana o Mr. Ross i ua mau tausasani dala la, aole loaa mai; nolaila, aole i akaka ka hopena o ua keiki nei.  Alia, a e lohe hou paha auanei kakou.

Na Lawehala Elima.

  He wai kaao keia i kakauia maloko o kahi buke kaao ma Hinedu.

  Ua hana kekahi kanaka i kekahi karaima, ua hookolokolo ia, a ua hoahewa ia e make.

  Aia no oia iloko o ka halepaahao. A i ke kokoke ana mai o ka la e make ai, olelo oia i ke kiai halepaahao, e hele a hai aku i ke alii, he wahi mea huna kawahao kaua i makemake ai e hoike aku i ke alii, he mea ia e waiwai loa ai ke hana ia.

  Hele no kiai hale a hai aku pela i ke alii.  A kena ke alii e laweia ka lawehala imua ona.  A hiki ae oia imua ona, ku ae la ola a hoike aku i kahi apana gula, a olelo, Ioa e kanuia keia apana gula, e ulu ae ia, a loaa mai he pahaneri apana gula maemae.  E hoao oe, ia'u e ola ana.

  Olioli no ka moi, a hele oia me kona mau luna iloko o ka mala e kanu i na apana gula nei. Alia, wahi a ka lawehala, alia, o ka moi ke hoao mua e kanu.  Ina he lima hewa ole, aluna ole, hao ole kona,  hiki ia ia ke kanu. I na aole, ina hewa ka lima, makehewa ke kanu.  Ae, aole, pane ka moi, ua aihue au i ko kuu makua i kuu wa kamalii.  Aole pono ia'u ke kanu.  Eia no kuu kuhina nui, he lima hewa ole paha kona, nana e kanu.

  Hoole nae ke kuhina nui, aole paha i maemae kuu lima, ma kuu ano ohi, ua ohi hewa au. E hookuu mai ia'u, a na ka puuku aupuni e kanu, he lima hewa ole paha kona. Hoole nae ka puuku, aole, aole, ua lawe hewa paha kuu lima i kahi dala aupuni, a ulu ole keia apana gula ke kanu iho kuu lima. Eia no ke kahunapule, he kanaka hemolele paha oia, a hewa ole kona lima.  Hoole nae ke kahunapule, aole, ke makau nei au e kanu, nui ka'u mau pule, me na mohai, ua hewa paha kuu lima i ka hapai ana e pule, i ke kaumaha ana hoi i na mohai.  E hookuu ia'ku au la.

  A pane ae la ka lawehala,  No ka loaa ole o ka mea hewa ole, a no ka like pu o kakou elima, e ke 'Lii, aole anei he pono ke make pu kakou elima?  Pane mai ka moi, ae, pono paha e pono e make na mea hewa a pau.

  Aka, ke kala nei au ia oe, me ka hookuu aku i ka poe i koe.

  Ma ka hoopili ana.  E hoomanao ka poe hoopii, hookolokolo, hoahewa, a hoopai aku i na e hoopaiia kela me keia e like me kana hewa i hana'i aohe mea e pakele ana. "One ke ao  aku ia hai,  aole anei oe e ao ia oe iho ? Ooe he papa'ku, mai aihue oe, e aihue anei oe ?  Ooe ke olelo aku, mai moe kolohe, e moe kolohe anei oe ? Ooe ke hoopailua i na kii, e aihue no anei oe i na mea laa ?"                    HAWAII.

  PALACE HOTEL.--Ma Kapalakiko e kukuluia'na he Hale Hookipa nui ; a ua manaoia, e oi aku ana ia i na Hale Hookipa a pau ma ke ao nei. Ehiku haneri rumi okoa (700,) a me na rumi auau ekolu haneri me iwakalua (320,) a e hiki ke hookipa i na kanaka hookahi tausani, me na haneri elua (1,200.) Ua manaoia e paa i ka malama o Augate 1875.  A o na dala e lilo no keia Hotele, elua miliona, elua haneri me kanalima tausani dala no ka hale okoa ; ($2,250,000,) a elima haneri tausani dala no ka hoolako ana i ua hale nei ; ($500,000.) Hui a pau loa, $2,750,000.  Nui wale ka lilo no ka hale hookipa ma Kapalakiko.

  MA Sonoma Kaliponia, ua okiia kekahi laau nui; (Redwood,) a ua maheleia e na pahi olo, a ua loaa mai na kapuai papa maikai, he kanalima kumamalua tausani, (52,000, kapuai.)

  Ma Iowa, aha makahihi mamua aku nei, ua koho ia aku la he hookahi wahine, he lunahooponopono i ka oihana kula kamalii; aka, i keia makahiki ua kahoia malaila na wahine he umikumamalima no kela oihana.

  MAKE NUI.--I ka hebedoma hookahi, iloko o ka malama o Iulai, ua make nui na keiki liilii eha haneri kumamalua (402) ma Nu Ioka.  Aloha ino ka hanauna hou.

  UA oleloia, e hiki i ke kanaka ke hele kaapuni i ka honua nei, no na dala hookahi tausani, ($1,000.)

KULA KAHUNAPULE.

  E hoomaka ana ke Kula Kahunapule i ka Poakolu mua o Okatoba, oia ka la 7 o ia mahina.  Ma ia wa e hoi mai na hauinana, ia manawa e komo ai ka poe komo hou.  O na mea i komo, me ka hoaponoia e na Ahahui Euanelio mokupuni e hele mai ai.  E makaala mai ! Mai lohi !!

NA BUKE

I HOOLAHAIA E KA PAPA HAWAII

---ME KE---

KUMUKUAI O KELA ME KEIA.

 BAIBALA HEMOLELE NUI ILI GULA NANI

      me na kuhikuhi ma na aoao.......    .......     .........   $12  00

Baibala Hemolele Nui ili eleele kaekae wai gula....        5  00

Baibala Hemolele uuku iki iho kae wai gula...........        8  00

Baibala Hemolele pananaiki iho ili eleele..      ..........      4  00

Baibala Hemolele ili eleele...   .........   .........   ..........      2  00

Kauoha Hou ili ili gula nani me na kuhikuhi.  ..........      3  00

Kauoha Hou ili eleele kaekae wai gula.......    ..........      1  00

Kauoha Hou ili eleele..........    .........   .........   ..........          75

Kauoha Hou Hapa Haole.....   .........   .........   ..........          75

Lira Hawaii 1848 me ke kanawai....   .........   ..........          25

Lira Hawaii 1855....... .........   .........   .........   ..........          25

Moolelo Ekalesia.......  .........   .........   .........   ..........          50

Haiao ili lahilahi.......   .........   .........   .........   ..........          10

Hele Malihini ana......  .........   .........   .........   ..........          25

No ko ke Akua ano...  .........   .........   .........   ..........          25

Lira Kamalii.......         .........   .........   .........   ..........          25

Hoike Palapala Hemoilele.......            .........   ..........          20

Moolelo o Heneri Opukahaia..            .........   ..........          25

Hoike Akua.......          .........   .........   .........   ..........          15

Wehewehehala......      .........   .........   .........   ..........          10

Ninau Hoike ili manoanoa....  .........   .........   ..........          20

Ninau Hoike ili lahilahi.........  .........   .........   ..........          05

Kumumua Kula Sabati.........   .........   .........   ..........          20

Buke Lawe Lima....... .........   .........   .........   ..........          20

He Buke no ka Pope.. .........   .........   .........   ..........          15

Ui Kula Sabati Helu 3 .........   .........   .........   ..........          25

Ui Kula Sabati Helu 4..........   .........   .........   ..........          15

Ui Kula Sabati Helu 5..........   .........   .........   ..........          25

Buke Euanelio a Ioane........    .........   .........   ..........          10

Himeni Hawaii.......     .........   .........   .........   ..........      1  05

Himeni Hawaii ili nani.........   .........   .........   ..........      1  75

Kumu Leo Mele.......   .........   .........   .........   ..........          10

Kumu Leo Mele ili nani......... .........   .........   ..........          50

NA KAUOHA HOU PAKEKE.

Ili gula nani.......          .........   .........   .........   ..........     1  50

Ili eleele kaekae nani.. .........   .........   .........   ..........          50

Ili  eleele.......   .........   .........   .........   .........   ..........          35

KAUOHA HOU PAKEKE ME NA HALELU

Ili gula nani...  .........   .........   .........   .........   ..........      1  70

Ili eleele kaekae wai gula....... .........   .........   ..........          60

Ili eleele...        .........   .........   .........   .........   ..........          50

Buke Wehewehe Huaolelo Baibala, elua ano..........

Buke Wehewehe Ano Mataio..........   .........   ..........

NA HALELU PAKEKE.

Ili Gula nani... .........   .........   .........   .........   ..........          50

Ili eleele kaekae wai gula.....   .........   .........   ..........          30

Ili eleele..         .........   .........   .........   .........   ..........          20

Ka Hae Hoonani (Buke Mele).........   .........   ..........          25

EIA NA BUKE HAAWI WALE.

PALAPALA LIILII--

  Helu  4--Makemake anei oe i ke o'a?

  Helu  6--E hele i o Kristo la.

  Helu  7--Ka hoi ana mai o ke Keiki Uhauha

  Helu 11-No ka hoohiki wahahee i ke Akua.

  Helu 16-Ka Eehia ana o ka Ahaaina a ka Haku a

                   me ka Bapetizo ana.

  Helu 17-Mai hana ino i na holoholona.

  Helu 18-No ka mahi ana, kuai ana a me ka inu

                     ana i ka Awa.

Ka Davida Malo Kumumanao.

Ka Moolelo o Batimea Puaaiki.

     Aia ke keena kuai buke o ka Papa Hawaii ma ka huina o Alanui Betela me Alanui Kalepa, e kokoke ana i ka Hale Leta.               J. F. POKUE.

  Kakauleta o ka Papa Hooko o ka Ahahui Euanelio o ke Hawaii Pae Aina.

KA NUPEPA "KUOKOA!"

Hoopuka mau ia

I KELA POANO KEIA POAONO.

$2.00  no  na  mahina  Umikumamalua

$1.00    "    "       "        Eono.

ME KA HOOKAA MUA MAI.