Ka Nupepa Kuokoa, Volume XIII, Number 31, 1 August 1874 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XIII.  HELU 31. HONOLULU, POAONO, AUGATE 1, 1874. NA HELU A PAU 661.

 

E Pau na Pupupu Kahiko!

 

E pani me na Hale Laau!

 

PAPA, PAPA, PAPA

O KELA ME KEIA ANO,

 

A me

 

NA LAKO KUKULU HALE

O KELA ME KEIA ANO, MA KA

PA-PAPA O S. G. WAILA MA!

Kihi o

ALANUI PAPU ME ALANUI MOIWAHINE,

No ke Kumukuai HAAHAALOA!

ae like ka nui me

ka makemake.

 

LAAU NOUAIKI!

NA LAAU KAOLA,

    NA PAPA MANOANOA,

        NA PAPA HELE,

            NA KUA,

                AAHO, POU,

                    AAHO LIILII,

                         MOLINA, & e

Pili Cida keokeo, Pili Laau ulaula,

Na Puka Hale, o na ano a pau,

Na Puka Aninni, o na ano a pau,

Na Olepelepe Puka, o na ano a pau.

 

Pepa Hale me na Lihilihi

 

NA LAKA PUKA

NA AMI-PUKA,

            NA AMI-PUKA LIILII.

                        NA KUI NAO,

    PENA, AILA-PENA, VANIKI,

          WAI HOOMALOO.

 

PAAKAI Helu 1,

O PUULOA.

 

E lawe wale ia no na mea i kuai ia mai kela Pa Papa aku a i kahi o ka mea kuai mai, ina ma ke kaona nei, a me na Awe o keia Paeaina e like me ka aelike.

 

Aia maanei ke Keena o ka

            MOKUMAHU “KILAUEA,”

                        L. MARCHANT, Kapena.

 

                        S. G. WAILA MA.

                           640 3m

 

E Hauoli e Hawaii!

 

E Hawaii! E Hawaii! E ala e Hawaii,

Mai ka nanea o ke kau a me ka makalii,

Ua loaa kou Haku, na ka Lani i poni mai,

I makua no ka Lahui e ulu hou ai.

 

E Maui! E Maui! E maui o Kama,

E hoolohe i ka leo o ka Lani, a malama,

I ka leo o ka Mamo a na Kupua nana i nai

A hoohui i ka aina ma ka nohona lokahi.

 

E Oahu! E Oahu! E Oahu a Kakuihewa,

E ala mai ka moe-ino, a mai hana hewa;

E maliu, e hauoli, e kulou a hoonani,

I ka Moi e ola ai, kou Lani! kou Lani!

 

E Kauai! E Kauai! E Kauai o Mano,

E haliu, e hoolono, a mai hoomano,

I ka leo i pae aku ma Kana huakai,

E hooulu ma ka aina i na opuu maikai.

 

E hauoli! E hauoli! ka lehulehu a pau,

E hilinai na puuwai mai Hawaii a Niihau,

I ka puahiwa a kaLani i wae ae ai,

I Haku, i Makua, i alakai no Hawaii.

 

E hauoli! E hauoli! E pule i ka Lani,

E hoomau loa mai i ka mamo alii nani,

A KALAKAUA, ka Moi, ma KAPIOONALANI,

A e hoomau loa aku i lei pohainanai.

                                                            LEAKAHELE.

 

HE KAAO KUPUA!

 

  I loko o kekahi la, ma kekahi wa mamua loa aku nei, e ku ana he mau hale nani i loko o kekahi ululaau nui; a ma ka hu-a loa owaho o ua ululaau nei e ku ana he wahi hale uuka, ua hihiia a paa loa o luna e ka waina a me kekahi mea hihi e ae, a ma keia wahi hoi e hanau ai na manu iloko o la wela o ka makalii; a oiai ma ia wahi, he mea mau ka pa kolonahe ana mai a ka makani i ka wa hooilo, a i ka hui ana ae oia welau kehau waianuhea me na lau o na laau, me hela e oli mai ana i ke mele uwe aloha no ka la Karitimasa; no keia mea ua kaohi paa ia ka iini iloko o ka ohana e noho loa ilaila.

  Aia hoi iloko o ia wahi kekahi wahine, o Dame Lakahaka kona inoa, a e walea mau ana ma na hana lima. O ka mea mau loa nae iaia, oia no ka ulana lole, aka, mamuli o kona hookui ia ana e kekahi manao menemene, a me ka paila ana o kona iini nui no kekahi wahi kaikamahine uuku o Setela ka inoa, ua hoomaha oia i kana hana noeau; a he mea hala ka hoi ia ka olehala o ke koele ana o na huila o kana huila nanala lole, “e malama i ka hoopono i lilo oe i keiki maikai.”

  Ia lohe ana o ua wahi Setela nei i keia mau olelo a kona makuahine, holoʻku la oia ma kahi e popohe maikai mai ana o na pua ala o ke kihapai, a ako aku la i ka pua, a oiai oia e ako ana i kekahi pua, a pu-wa mai ana ke ala o ke onaona o kekahi mau pua e aku, a o ka ia nei hana no ka ako, me ka manao ole ia Dame Lakahaka kona luaui, no ka mea, ua lilo kona manao i ka nani o na pua, a o ka olu iho hoi o na lau laau aiwa loa aku la hoi ua oia nei a ka hoonanauahuki, me ke i iho, “maanei no ka hoi au e noho ai, e kui i kuu pua.” A puanaʻe peneia:

            “Hiaai wale ana hoi au ilaila,

            I ka olu kohai oia Dale,

            Me he la he wai Kuauhoe,

            Ua anu au mamuli o ko leo.”

    Oiai ua o Setela e noho ana, e kui ana no i ka pua; hoea mai ana kahi wahi elemakule uuku, ua hele a hawele ka umiumi ilalo o ka lepo, a hea mea no hoi i ike ole ia eia mamua. A haka pono aku la na maka o ua wahi elemakule nei me ka oluolu o ka nanaina, a aole no he makau iki o Setela ia ano e o ke kino o ua wahi kanaka nei. A ninau aku la oʻPekeokaluukea, (elemakule) ia Setela, “Heaha kau hana maanei, e ke kaikamahine, i hele loa mai ai oe mai kou home mai?”

  Pane mai la o Setela, “e kuu makukane, i hele mai nei au i ka ako pua, a e awiwi ae ana au la i ke kui o huhu mai auanei o mama Dame Lakahaka iaʻu.”

  A ninau aku la o Peke, heaha kau olelo, ina e hoee ana au ia oe e holo maluna o kuu lio?

  Heaha hoi auanei kaʻu olelo olaila, he olioli ka hoi ia noʻu i ka holo maluna o ko lio, wahi a Setela.

  Alaila hahau iho la ka elemakule ma ka ili o ka honua, elima hahau ana me ka laau a me ke kahea ana, “e ka mea hihiu olalo o ka honua e aha ana oe?”

  Aole i emo ku ana, he lio eleele me na eheu lilelile, a o ke ake koke ae la no ia o Setela e kau, iaia no a kau maluna, a o ka lilo aku la no ia i ka lewa, me he manu la ka lele ana. Oiai oia nei e lele nei maluna ae, ike iho la oia i na hale nani, na kanaka, a me na laau maikai e maalo ana malalo oia nei. A ma ka ia nei nana ae i na ao, ua nani loa. A i iho la ua o Setela, pomaikai maoli koʻu ike ana in a mea he nui wale; aka o ka nui o na kamalii opiopio, aole o lakou makemake iki, e luliluli mau ana ko lakou mau poo i ka lele o keia mea eleele iluna me ka hu o ka makani o na eheu.

  A oia lele oia nei a liuliu, mea mania maka hiamoe mai ana, a puliki aku la i ka hulu o ka a-i, a hiamoe iho la, a pau kana ike ana i ka nani e maalo ana, a o ka lele no hoi ka ka lio a hala paha he mau mile, hike ana laua nei iluna o kekahi mauna kiekie.

  Ia hiki ana ma keia wahi, kipaipai aku la ka eheu o ka lio i kekahi pohaku nui, a wehe ia mai ana ka puka, eia ka he Ana kupua, ia wa, hoihoi ia aku la o Setela iloko o ua ana nei a hoomoeia iho la.  

  Oia hiamoe ko ua o Setela, a ala ae, ike ae la oia i keia wahi ano e loa, ua hoonani ia oloko i ke diamana, a o ka papahele me na paia, he gula wale no.

  I kona hoomaopopo ana i keia nani, ilihia iho la oia i ka makau, a uwe ae la me ka leo nui, “aloha wale no ka hoi o mama Dame Lakahaka;” no ka mea, akahi no a uluku mai kona manao eehia no keia mea ano e imua ona. A liuliu, hoea mai ana ka oi kelakela o na kupua kiai o na ana nei, oia hoi o Veolila, a i mai la, “Ooe e Setela ko makou moiwahine, a ma kau kauoha makou e lawelawe aku ai ma keia mua aku.”

  A noi aku la o Setela i ua kupua nei, “e ae mai oe e hoi au e ike i kuu mama ia Dame Lakahaka.”

  Hoole loa aku la Violila, me ka i ana “aole makou e ae aku ia oe e hoi, aka, e noho pu ana no kakou me ka pomaikai.”

  A hala na la he nui, maa loa iho la ia i ka noho ana ma ua wahi nani nei, a pau ae la no hoi kona manao ana i kahi pupupu hale o lakou a me kona makuahine. A hala he mau makahiki, pii ae la ka nani o Setela. A iaia e noho ana iloko o kona Halealii, me ka hana ana i kekahi lole nani i kui pu ia me ke daimana, kui ana ka hekili, a liuliu iki, hoea mai la o “ka mea hihiu o lalo,” me kekahi keiki alii opiopio.

  No keia mea, ala ae la kona hoomanao ana, me ka i iho, “akahi no a maopopo ke kumu o koʻu laweia ana mai nei ma keia mauna—a nolaila, ua ino loa keia mauna a me kona mau kupua liilii.”

  A i ka hala ana o kekahi mau la, hoao ae la laua nei, a kane a wahine iho la laua. A oiai hoi laua e noho oluolu ana, i aku ke Keiki Alii ia Setela, “He mea pono ke hookuuia na kupua ilalo, i hookahl hele ana i ka makahiki, a o ko kaua wa ia e hele ai.” Pane mai nae o Setela, “Pehea auanei e hiki ai?” Paae mai la no hoi ke Keiki Alii Alefereda, “He koloka pouli koʻu, a he hiki loa no iaʻu ke hoopulou ia kaua a elua a nalowale loa me ka ike ole ia mai e na kiai olalo.”

  Ia lohe ana o Setela, ua nui loa kona olioli. A ma kekahi po, ua nui ka wawa ana i waena o na kupua, me ko lakou haka pono ana ia laua nei, a liuliu, alaila, ua nalo aku la lakou.

  A hiki mai la hoi ka manawa e hele ai lakou ilalo, pioloke ae la lakou me na leo nui, e nakolo ana me he hekili la.

  I ka wa hoi i mao ae ai ke kupinai ana, alaila, ike aku la laua nei i ka momoku nui o na kupua i ka puka iwaho; a ia wa no hoi laua nei i puka like ai, me ko lakou ike nui ole mai nae ia laua nei, no ka mea, ua uhi ae la ka mana o ke koloka pouli, o ka nalo no ia o laua nei.

  A ia laua nei i hemo ai iwaho, mailoko aku o ka mauna weliweli, nui loa iho la ko laua olioli. Aia nae iloko o ia wa, ua lawe nui mai la laua nei i ke dala, ke gula a me ke daimana.

  Aia nae ia laua nei i hiki ai i kahi o Dame Lakahaka, noho iho laua malaila, aole nae i liuliu ka noho pu ana iho o Setela me kona makuahine, a o kona make no ia.

  Ma ia wa hoi mahope iho, mare iho la laua nei, a noho iho la laua me ka oluolu, a he nui ka pomaikai i loaa ia laua.—Pi-pi holo kaao.

 

(Aia ke koena ma ka Aoao maloko).

KEAUOKALAKAUA.

Na hana o ka Ahaolelo.

LA HANA 67—IULAI 20, 1874.

  Waiho mai ka Hon. Kauai he palapala hoopii mai na lepera mai o Kalawao, e pili ana no kekahi mau kumu ano ole. Waiho ia ma ka papa.

  Hoike mai o Mi Aholo mai ke Komite ma o ka Papa Hoonaauao no ka palapala hoopii a Kaaikauna o Puna, e noi ana e uku ia oia i $32 no kona noho Kumuao ana, a ma ka noonoo ana, ua ike ia he pono ke waiho ma ka papa. Aponoia ka waiho ma ka papa.

  Hoike mai o Mi Kauai i ka hoike a ka hapa uuku o ke Komite no na poho a me na poino a na poe i hoohaunaele ai ma ka la 12 o Feberuari, a me ke ooi mai, hoopanee loa i na dala $1291.63. Waihoia ma ka papa.

  Noonoo ia ka bila e hookaawale ai i na rep Imaiea, ma kona heluhelu alua ana.

  Me ke noi, ua waihoia ka bila i ke Komite Wae, oia hoi keia poe, na Hon. Kaai, Kuihelani, Kuhina Kalaisina, Waila, a me W. T. Martin.

NA HANA O KA LA.

  Lilo ka Hale i ka noonoo ana i na hana o ka la, oia hoi na mea i koe o ka bila haawina.

  Noi mai ka Hon. Mr. Kipi, e hookomoia iloko o ka bila haawina, i $3,000 i uku hoomau no P. Nahaolelua. Hooholoia.

  Ma kana noi hou no, ua hookaawale ia i $2,400 ka uku hoomau no P. Kanoa.

  Noi mai ka Loio Kuhina e hookomoia iloko o ka bila haawina malalo o ke poo o ke Keena Kalaiaina, i ka h@ina $1291 63 no na poino a me na poho i ka poe hoohaunaele o ka la 12 o Feberuari, e like me ke noi a ke Komite.

  Hoololi mai o Mi Kaai e hoomahuahua ae i $1500.

  Hoololi mai Mi Nawahi, i $143, oiai, o keia iho la na poino o Mr. Ward no ka nahaha ana o kona kaa, a o na poino o na hoa o keia Hale, aole pono ke haawi ia.

  Kokua mai o Mi Kauai i ka Nawahi manao.

  Ma ka ninau ia ana o ka hoololi, ua haule a ua hooholo ia ka $1291 63.

HOAKAKA HUI.

No ka ohana Moi                                $50,000 hooholoia

Na uku Hoomau                                  17,400     “

Ahaolelo & Aha Kuk.                         15,300     “

Oihana Hookolokolo                           68,200     “

  “    o Ko na Aina e                         66,070     “

  “    Kalaiaina                          421,590 70     “

  “    Waiwai                             152,513.17     “

  “    Loio Kuhina                      98,832 90     “

  “    Hoonaauao                        80,660.00

 

                        Huina                 $970,565 87.

 

  Heluhelu ia a hooholoia ka pauku I o ka bila haawina me ka hoina $970,565 87.

  Ma ke noi, ua hooholoia ka bila haawina, e kakau poepoe ia.

  Hoike mai o Mi Nahinu i ka bila e noi ana e ae ia ka laikini maauauwa lole ma keia aupuni, a ua hooholoia ma kona heluhelu akolu ana.

  Hoololi mai o Mi Kaai, e hookomo ia keia mau huaolelo, “e ae ia na makai e huli i na waiwai a ka mea maauauwa, malalo o keia rula.”

  Ma ka ninau ia ana ua hooholo loa ia ka bila.

  Noonoo ia ka bila e kokua ai i ka hooholo ana, i kekahi kuikahi panai like, a mau kuikahi paha o ia ano.

  Mahope o ka hoopaapaa ana, ua hoopanee loa ia ka bila.

  Heluhelu akolu ia ka bila e hoomana ai i ke Kuhina Waiwai, e aie i na kala Kula, ua hooholoia.

  Heluhelu akolu ia ka bila no ka uka hoomau no Major Mahuka, a ua hooholoia.

  Hoopanee ka Hale.  

 

LA HANA 86—IULAI 21, 1874.

  Hoike mai ka Loio Kuhina mai ke Komite i waihoia aku ai ka bila e pili ana i ke kuleana o ka wahine kanemake, a ua noi ia mai e hoopanee loa. A ua waihoia ma ka papa a hoike ia mai ka hoike a ka hapa uuku o ke Komite.

  Hoike mai ka Loio Kuhina mai ke Komike mai i haawi ia aku ai ka bila aie dala. I ka heluhelu ia ana o ka hoike, ua aponoia.

  Noi mai o Mi Kapule e noonoo hou i ke koho ana o neinei, no ka bila e pili ana, no ke kokua ana i ke Kuikahi Panai Like.

NA HANA O KA LA.

  Heluhelu alua ia ka bila e hoololi ana i na Pauku 1420 a me 1423 e pili ana i na haku a me na kauwa. A ua hoike ia mai ka hoike a ka hapanui o ke Komite e hoopanee loa, a o ka ka hapa uuku hoike, e hooholo ia, a e kakau poepoe ia.

  Noi mai o Mi Kipi e hoopanee loa.

  Mahope o ka hoopaapaa ana ua noi ia e waiho hou ia i ke Komike, hooholoia.

  Kapae ia na rula hoike mai o Mi Komoikeehuehu i ka hoike a ka hapa uuku e pili ana no ka bila e hooponopono ai i ke kuleana o ka wahine kanemake, me ke noi mai e hooponopono hou ia ma kahi hemahema, a e hooholo ia me ia hooponopono ana. Waihoia ma ka papa.

  Heluhelu alua ia ka bila e pili ana i ka hooponopono ana i ke kuleana o ka wahine kanemake, a ua waiho hou ia i ke Komite Wae, eia lakou, Komoikeehuehu, Aholo, Kauai, Parker a me Nawahi.

  Heluhelu akolu ia ka bila e kokua ana i ke Kuikahi Panai Like.

  Noi mai o Mi Nawahi e hoopanee loa.

  Mahope o ka hoopaapaa ana, ua haule ka hoopanee loa 14-21.

Ma ke noi e hooholo loa i ka bila, ua hooholo loa ia, he 36 poe koho, 24 ae 12 hoole.

  Heluhelu akolu ia ka bila e hoololi ai i ka Pauku I o ke Kanawai Kiwila, e pili ana i ka laikini opiuma (e hoopaa ana i ka auhau o ka laikini i $16,000) a ua hooho loia 36 poe koho 21 ae, 15 hoole.

  Heluhelu akolu ia ka bila e hoopau au i ka Pauku 16 o ke Kanawai e pili ana i ke oki mare, no ka ae ana e mare no poe i oki ia, a ua hooholo ia.

  Heluhelu akole ia ka bila e hoololi ai i na Pauku 1452 a me 1453 o ke Kanawai Kivila e pili ana i na keiki kamehai, a ua hooholoia.

  Heluhelu akolu ia ka bila e hoololi ai i ka pauku 483 o ke Kanawai Kivila no ka helu ana a me ka ohi ana i na waiwai i moraki ia, a ua hooholoia.

  Waiho ka bila aie dala i ke Komite o ka Hale, a ka la apopo noonoo.

  Hoopanee ka Hale.

 

LA HANA 69—Iulai 22, 1874.

  Hoike mai ka Loio Kuhina mai ke Komite mai i waihoia ai ka bila e kokua ana i na palapala hopu ma na hihia waiwai, a noi mai no hoi e hoopanee loa. Aponoia.

  Hoike mai ka Loio Kuhina mai ke Komite mai o ka hooholo loa, i ko ka Moi apono ana i na hoololi i manao ia no na Haawina 62 a me 63 o ke Kumukanawai.

  Lilo ka Hale i ka noonoo ana i na hana o ka la, oia hoi ka Bila Aie Dala imua o ke Komite o ka hale; o Hon. W. T. Martin ma ka Noho. Heluheluia ka hoike a ke Komite Wae, a me ka palapala hoopii ma Honolulu mai e noi ana, aole e ae aku ka Ahaolelo i ka hooholo ana i ka bila, (i kakau inoa e 300 a oi kanaka; o ka poe no o ka Moiwahine ka nui.)

  Noi mai o Mi Kaukaha i ka wa e pau ai ke Komite, he pono i ka Lunahoomalu, e hoike mai i keia hale, e waihoia ka palapala hoopii i ke Komite Wae.

  Ma ke noi, ua noonoo pakahi ia na pauku o ka bila.

  Noi mai o Mi Mikalemi e hoopanee loa ia ka Pauku I.

  Hoopauia ke Komite Wae no ka hooholo oleia.  Hoopanee ka Hale.

 

LA HANA 70, Iulai 23, 1874

  Heluhelu mai ka Loio Kuhina no ka manawa mua he bila e hooponopono ai i na Kanawai o ke aupuni, a ua hooholo ia ma ka heluhelu alua ana malalo o na rula.

  Mai ia moa hookahi mai no, he hoolaha ana i bila e hoololi ai i ke Kanawai e pili ana i ke koho baloka.

NA HANA O KA LA.

  Lilo ka hale o na hana o ka la, oia hoi ka noonoo ana i ka Bila aie dala, i waiho ia ai i ke Komite o ka Hale, me ka noho ana o Hon W. T. Martin ma ka noho Lunahoomalu.

  Hoike mai ka Hon Kaukaha ua loaa mai iaia he palapala mai kona mau makaainana mai e pane mai ana, no kona ninau ana ʻku i ko lakou manao o ka bila aie dala. A eia ka pane ana mai, ua apono loa ia ka bila aie dala; aka aohe nae he pono ke hoopuka ia ke kela pepa.

  Loihi no ka hoike ana o na Hon Kakina a me Naukana, mamuli o ka hoolo loa i ka bila.

  Hoike mai ke Kuhina Kalaiaina, ua loihi loa ke kamailio ia ana o keia pauku, me ka nana ole ia o ka hana e hoololi ae i ka dala, nolaila, he pono e ninau.

  I ka ninau ia ana e hoopanee loa i ka bila, haule, a aponoia ka paaku I.

  Hoololi mai ka Peresidna C R Bioopa i $200,000, a ua nui loa no keia puu dala e lawa ai na hana e manao ia ana.

  Hoopauia ke Komite, a hoike mai ka Lunahoomalu imua o ka Hale, aole mea i hooholo ia.

                                        Hoopanee ka Hale

 

O Charles K Kahala! Ua hala!

Aloha wale!

  Ma ka la Sabati nei, Iulai 19, oiai na kukuna o ka la e aneane mai ana e haalele i ka ilikai, ua ukali aku la ka uhane o Mr. C K. Kahala i na kini, na kupuna, na makua, na keiki, ka wahine i hala e mamua, a pae aku la me kela aoao o ka muliwai nui o keia ola ana.

  He hoaʻloha oiaio oia no makou, ua hooikaika pu oia me ka hoomanawanui i na luhi me na inea o ke ao nei, ma keia oihana hoonaauao a hanohano hoi he Pai Palapala, no na makahiki he umi a oi, a hiki i koma pauaho ana mai la i na huakepau, a kuu aku la ka luhi no ka luakupapau.  He ekolu a oi na pule o kona kaa ana i ka mai ake pau, a iloko o ka hooikaika nui a kona mau hoaʻloha no ke pale ana ae i ka mai, ma ka hoolawa ana i na Kauka, a me na pono e ae i manaoia he pono, aole nae i waihoia mai, aka, kii koke mai la no ka elele anuanu o ka lua a kaili aku la i ke kukui nana e hoomalamalama kona ala o ka hanu.

  He 30 ka huina o kona mau makahiki o ke ola ana, he kanaka i ikeia no ka oluolu, kaheahea mai, a me ke aloha o kana mau hana, a ua nui na hoaʻloha i loaa iaia ma ia mau haawina maikai.

He mau makahiki i hala, oiai no oia i na la o ka opiopio, ua mare oia me Miss Kamaka, a ua loaa na keiki, aole nae i liuliu mahope mai, make ʻku la ka wahine, a ukali aku la na keiki; a noho hookahi hou iho la oia. Ua hooikaika mau oia ma ka makou oihana. A i mau makahiki pokole iho nei, ua mare oia ia Miss Waimalu, aohe i liuliu iho ka noho ana, haalele mai la kana wahine, a lilo aku la ma ke ano mau o na wahine Hawaii he la@au. Me ka puuwai kupaa, ua hoomanawanui oia i ke pale ana aku i na hana inea a kana wahine, a hiki i kona naloʻuaʻku la.

  Ua mahalo ia oia e kona mau hoa luhi a me na haku hana, no ka hooikaika ma ka hana i kauia aku maluna ona. Ma kona home ma Alanui Ema kona wahi i make ai, malalo o ka hoomanawanui ana a kona hoapili mai na la opiopio mai o Mr. John Gandall. Ma ka auina la Poakahi ua maneleia aku kona kino ma kona wahi mau, “a hoi aku la ka lepo i ka lepo” ma ka ilina o Kawaiahao.

           E na huakepau o kana pahu!

            Pau kana lawe mikioi ana ia oukou;

            E kana hao, ka rula, a e ke kope!

            Pau ke koele ana o kana piha hao;

            E ka rola inika hoi, ka Palaina me ka Malati!

            Pau! aole pa-lu, aole hoopa hou oia ia oukou;

            A! e na keiki hoonohohua!

            Ua hala o Charles he hoa ma keia hana.

                        Ke u nei makou.