Ka Nupepa Kuokoa, Volume XIII, Number 19, 9 May 1874 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.
BUKE XIII. HELU 19. HONOLULU, POAONO, MEI 9, 1874. NA HELU A PAU 649.

E PAU NA PUPUPU KAHIKO!

E pani me na Hale Laau!

PAPA! PAPA! PAPA!

O KELA ME KEIA ANO,

---A ME---

NA LAKO KUKULU HALE

O KELA ME KEIA ANO, MA KA

PA-PAPA O S. G. WAILA MA!

---KIHI O---

ALANUI PAPU me ALANUI MOIWAHINE, no ke Kumukuai HAAHAA

LOA! ae like ka nui me ka makemake.

-----

LAAU NOUAIKI!

NA LAAU KAOLA,

                         NA PAPA MANOANOA,

                       NA PAPA HELE,

                       NA KUA,

                                       AAHO,

                                        AAHO LIILI, &c.

           LAAU ULAULA!

LAAU KAOLA,

NA PAPA MANOANOA,

NA PAPA HELE,

NA KUA,

AAHO, POU,

AAHO LIILII,

MOLINA, &c.

Pili Cida keokeo, Pili Laau ulaula,

Na Puka Hale, o na ano a pau,

Na puka Aninni, o na ano a pau,

Na Olepelepe Puka, o na ano a pau,

--------

Pepa Hale me na Lihilihi.

--------

NA LAKA PUKA!

NA AMI-PUKA,

                       NA-AMI PUKA LIILII,

                  NA KUI NAO.

----- ---

PENA, AILA-PENA, VANIKI,

WAI HOOMALOO.

---------

-PAAKAI Helu 1,

O PUULOA.

-----

E lawe wale ia no na mea i kuaiia

mai keia Pa-papa aku a i kahi o ka mea kuai mai, ina ma ke kaona nei, a ma na Awa

o keia Paeaina e like me ka aelike.

-----

Aia maanei ke Keena o ka

                 MOKU MAHU "KILAUEA,"

          D. TAYLOR, KAPENA.

-----

S G. Waila Ma.

614-3m

 

HE MOOLELO KAAO
NO
ROBIANA LO:
Ka Hiwahiwa o ke Koa.
HELU AKOLU O KA IKAIKA.
I unuhiia mai loko mai o ka Buke Arabia, mai ka Olelo Beritania a ka Olelo Hawaii.
MAHELE III -Helu 117.

            A LOHE o Nalopakiana no keia mau huaolelo, huli ae la oia a ninau i ka ahana nalo, He oiaio anei ka ianei e olelo mai nei ? Hooho like mai la ka ohana nalo, I na mea a pau a ia la i kamailio ae la, pela io no i loaa ai ia makou ka wai momona o na pua, no ka mea, i ka wa no i hemo ai o ka pua a ia la e wehe ana, o ka wa no ia i mohala like mai ai o na pua a pau, a lilo koke no makou i ka inu ana i ka wai o na pua, a ku no makou a hoi mai, me ka ike ole ia aku o ka hopena o kana mau hana, aka ano, ke lohe nei kakou, a o ka oiaio maoli no ia, nolaila, e haawiia na hoomaikai ana a nui nona. A i ka lohe ana o Nalopakiana i ka olelo a ka mea i manaoia ua hewa a me na olelo ike a ka lehulehu, nolaila, ua hoihoi hou oia i kana olelo mua, a hoopuka ae la hoi i kana olelo hooholo hope, e olelo ana, W ola oe e pono ai, a o na hooponopono ana a pau o ke aupani, ke waiho aku nei au ma ka poho o kou lima, a e hana aku oe e like me ka mea pono i kou manao.
            E na hoa paumeume o keia mau la, e hoi ae kakou i hope, a e kamailio hou no Lo Hipa a me na okai, oiai i ka ike ana mai o na okai, ua ola hou o Lo Hipa, hoeu ae la lakou, me ka manao e lolo mai maluna o ianei, aia nae, e hoohamama koke aku ana keia i ka waha o ka eke talena, o ka moni ia mai la no ia o ka hapanui o na okai e ka mana o ka eke talena, a o ke koena; ua eena aku la, a lele auna ae la ma o a maanei, a oia ka mea e laha nei o no okai ma na wahi a pau o ke ao nei, aka, aole no e nele ana ko kakou ike ana i na okai ma na mala pua i hanaia a me na pua e ulu wale ana ma ke kula, no ka mea, o ko lakou wahi aina hooilina iho la no ia.
            O Lo Hipa nae, ua hoomauhala loa oia i na okai, a ua hiki ole iaia ke hoomanawanui, nolaila, ua kapae ae la oia i ka huaolelo "opu alii," a pupuhi aku la i ua aupuui pua nei i ke ahi. Pii aku la ka ula o ke ahi a hiki i ka lani, a holo aku la ka wela a ma ka poli o na wawae o Mahina, oiai oia e moe ana, aka, no ka wela o kona mau kapuai, puoho ae la oia, a i ae la, Heaha la hoi keia mea e maneo nei ma ka poli o kuu mau kapuai me he ilo la? Pane mai la nae o Hoku. Aole paha na he maneo maoli, aole no hoi he maneo na ka ilo, aka, he make na noi, no ka mea, ua hoohewahewa oi i kamoopuna,  ke kane hoopalau a ka moopuna a kaua, no ka mea,  ua poina ia oe ka mea i wanana ia imua o kakou. a o keia no hoi ka manawa, aka, ua hana iho nei nae oi me ka naaupo, aole hoi oe i hoonaauao mua aku i na okai, ka poe kiai hoi o ke aupuui pua, a au hana aku lakou e like me ka mana i haawiia aku ia lakou. Aka, no ko ia la maopopo ole, oiai kona la o ka hiki malihiui ana mai, a e nanea oia i ka mahalo no ka nani o na pua, aka, mai ka lewa, a mai ka lani aku nei no na okai, a lele aku la maluna o ia la, a o ko ia la make no ia. Moe malie nae kela iloko o ka make, a hiki ae la ka ohana nalo a Nalopakiana, hoolaia ae la. A ike nae na okai na ola hou kela, lele hou aku la lakou maluna o ia la, me ka manao paha e lanakila hou ana, aia nae ua pau loa lakou i ka make, a o ke koena, ua hele auwana aku la ma na wahi a pau o ka lewa nei a me ka honua. A no kona inaina, mamuli o kona mainoino ana, ua puhi ae la kela i ke aupuni pua i ke ahi, aia la ko nauahumuhumu mai la, a o ka ula o ke ahi, ua poo mai la ia i ka lani nei, ua hookolo mai la a loaa oe. a oia no ia la e maneo la i ka poli o ko mau kapuai wawae, nolaila, a nui ko ikaika i na mau la iho, pakele kakou, aka, hapa ko ikaika, e papau ana kakou i ka make.
            Ma keia mau olelo maikai a Hoku, ua ulupuni loa a Mahina i ka inaina, a alaae la iluna, a i mai. I hea hoi kou wahi o ka ike ana, o ka'u moopuna ia ? Aole ka hoi au i ike ka mea i oi aku o ka mana a me ka ike, he hiki ia'u ke ike i ko ka lani a me ko ka lewa nei a pau, a ma ko ka honua nei no hoi a pau, a iloko hoi o ka hohonu o ka moana a me na wai lipolipo, aole mea huna e nalo i ka ikeia e a'u, a i keia ka hoi i ka mea i ka onohi o kuu maka, nele iho la ka hoi au i ka ike, a lilo aku la nau ka ike. O ka'u moopuna, aole oia e hele mai ana ma ke ano e nale ana ke huna iaia iho, no ka mea, e hoike ia mai no auanei ia e na ouli kupanaha o ka lewa nei, no ka mea, o ke olai kona ka-ina wawae, ina e ka'i mai kona wawae a ku iho, e naueue auanei ko ka lewa a me ko ka honua ; a o ka hekili kona leo, in a e kahea mai, pi lipu ka hanu o na mea a pau ; o ka uwila, o kona mau onohi no ia, aole he mea e koe i ka ike ia e ia ; a o ke ao apua aiai, o kona kapa ia ; a o na manu hoi a pau o ka lewa nei a me ka honua, oia no kona halelewa e malu ai i ka la a me ka ua ; a o na hoku a pau o ka lani nei, (koe nae oe) o kona mau kanaka ia, nolaila, aohe oia e nale ke hele mai, he mua ko'u ike, he hope kona mea e ae ; i keia mea nae au e olelo mai nei, he enemi no oia a e make no oia e pono ai, no ka mea, he komohewa oia iloko o na palena e kuu aupuni.
            A iloko o keia mau olelo a Mahina, pane aku o Hoku, O keia mau hoailona au e hoike mai nei, pehea oe i ike ai, ua lako oia i keia mau mea a pau? Pane mai o Mahina, O keia mau mea, ua waihoia aku e a'u ma ka lima o Kauiokalewa, a nana hoi i waiho aku ma ka lima o Lo Hipa. Hule ae la i Hoku a ninau ia Kauiokalewa, He oiaio anei, ua waiho aku oi i keia mau mea ma ka lima o ko kane? Hoole mai la kela me ka i mai, Ua poina au i ka haawi ana aku iaia. Huli hoi ae la o Hoku, a pane aku la ia Mahina, Ma keia mau mea au i haawi ai i ka moopuna a kaua, ua lilo pu aku no ia me kou mana ike, a ke noho nei oe he kino wale no, a nolaila, noho nei oe he kino wale no, a nolaila, ua "i se ole oe." Mai pono io no paha kau kaena ana, ina no la hoi ua waiho io ia aku ma ka lima o ua moopuna kane la a kaua, aole hoi e hihi, ua hana iho nei keia moopuna a kaua me ka naaupo, nalaila, e papapau ana kakou i ka make, ke mau keia kuhihewa ou. Pane mai o Mahina, Heaha ko'u mea e nele ai i ka ike? Pane aku o Hoku, Aole la hoi i nana iho, i ike ia ai hoi kou ike ana? Ia manawa, haliu iho la o Mahina ilalo, a i nana aku ka hana, aole ana mea i ike, aka. o ka hohono o ka uwahi kana i houi, a ea ae la oia me ka hilahila, aka, o ka inaina, aia no ia ma ka welelau o kona mau lima, nolaila, ua lele aku la oia maluna o Hoku, a hana naaupo iho la, ma ka poalo ana ae i na maka o Hoku, a kipakuia aku la mawaho o ke aupuni, a oia paha ka hoku makapo e olelo ia nei o "Poloahilani."
            O Kaniokalewa hoi, aia no me ia kakahi aniani kilohi, ka mea nona ka ike palena ole i oleloia,  lawe ae la oia i ua aniani la, a i nana aku ka hana, aia hoi ke aka o Lo Hipa a me ke aupuni pua holookoa, o ka inaina o ke ahi, e nome ana no ia i ka nani o ke aupuni, a lilo iho la kekahi hapa i mea ole. Ua olelo ia no hoi, o ka hapa o ke aupuni i pau i ke ahi, oia no ka pua ino a pupuku hoi a kakou e ike nei, a o ka pua mohala maikai, no ka aoao no ia i pau ole i ke ahi. He mea kaumaha hoi i ko Kauiokalewa manao, ka ike ana aku ia Lo Hipa, e noho ana iloko o ka mainoino mamuli o ka hana pono ole a kona kupunawahine, nolaila, hoi aku la oia a noho i ke aupuni i ka lihilibi o ke anueanue.
            E na hoa, aole i pau ko kakou kamailio ana no Lo Hipa, a ua holohiki wale aku nei no kakou imua ma ke ka ana i ke alanui o kahi a kakou e hele aku, no laila, e aui hou ae kakou nona, a e nana aku hoi no kana mau olelo hoalohaloha,  no ka mea, mahope iho o kona ola ana, hoopuka ae la oia, i ka i ana iho, E kuu aloha, in a o keia make ana iho nei o'u a mai a oe mai, aole no ia he mea no'u e kanalua ai, e hoomau aku no au i ka huli ana a loaa oe. Nana aku la no hoi keia a o ka mohala maikai mai o ka pua, lalau aku la keia a ako ae la, a olelo iho la, Ina he oiaio kuu mea i lohe ai, au hoolaaia keia mala pua nou, alaila, ke lawe nei au a honi iho i keia pua, a oia honi ana o'u i ka pua wale no, ua like no ia me ko kaua honi ana ; o kuu inu ana ia oe e keia wai, o ko'u inu pu ana no ia me ka mea nona keia wai. Oiai hoi ke ahi e nome ana, huli ae la keia a nana aku la, a o ka pii pololei o ka ua o ke ahi iluna, olelo aku la oia, Ke pii la oe e ka ula o kela ahi, a ina oe e ike aku oe iaia, pehea la kona manao no'u ; a ina ua poina ia no ʻ u alaila, e hai aku oe iaia, aole au i poina nona, eia wau la ua mainoino mamuli o kona leo. E hai aku no hoi oe, ina nana keia mau hoao ana ia'u, alaila, e puupuu mai no au i kuu mau lima a in a na ka mea e ae, e hoopolei aku auanei au i kuu mau lima, a e ohi mai i ka ikaika o na mea a pau o ka lewa nei, a e ike auanei lakou i ka mana nei o na mamo a Adamu.
            O keia mau mea a pau a Lo Hipa e lia nei, ua hiki aku no ia imua o Kaniokalewa, me he uwea teregalapa la, a na palapalaia aku la ia ma ka paia o kona rumi moe, i mea hoomanao nana. Aka, i ka hiki ana aku o keia lono imua ona, lana ae la no kona manao e imi mai i ke kane, a i hookahi no ko laua make pu ana. aka, no kona paa ana iloko o ka palama hoomalu a me kona hoohiki paaia ana imua o Mahina, nolaila, ua uumi wale iho la no oia i ke aloha iloko ona, a kapae ae la i ka maona a ka ai, a hoopiha iho la i ke aloha kane. Aka, mamua ae nae o kona haalele loa ana i ka ai a me na mea momona a pau o kana papaaina, ua hoao oia ma ka ai pakiko ana ; a pela no oia i hana mau ai a hiki i ka poina loa ana o ka ai iaia, a hau wale aku la no i ka makani, e like me na hoki hiuhiu ma na aina waoakua.
            A hala ke anahulu la o ke Lo Hipa noho ana ma ke aupuni pua, a pio no hoi ka a ana a ke alii, haalele iho la oia i ke aupuno pua, me kona manao, o ka palena hope la ia o kona halawai ana me na poino ma ke alanui lewa, nolaila, lele aku la oia i ka Hikina, a hala na la eha, haalele mai la ka huihui a ke anu iaia, halawai mai la me ia ka makani pumehana, a hoomanao ae la oia na aupuni honua. Aka, he mea haohao no nae iaia ke ano o keia mehana, no ka mea, o ka mehana maoli nei, he puni loa ke kina, a o keia mehana hoi, he mehana kapakahi, nolaila, hoomanao iho la oia, he mehana na ke ahi.
(Aole i pau)

Hokai ua ike heluhelu ole.

            Aia imua o ka Ana Hookolokolo kiure o Santa Caruza, he hihia e makemakeia ana na ke kiure ike ole i ka heluhelu a me ke kakau palapala. Kaheaia ka inoa o ke kiure mua e hele mai e noho. Ia kaheaia ana aku no, mino aka e kela, a kau e ae la no ko ia nei lima me he manao la e hoohikiia aku ana. Hoohiki io ia aku la, a malu iho la ka aha. Ninau auanei ka lunakanawai, e Mr. Buka, ua hooholo e no nae paha oe i kou manao no keia hihia? Ae aku la ke kiure.
            "Ua pololei anei ia hooholo ana ou aole paha?" Wahi a ka ninau.
            Kiure "Ae."
            Ninau "O ke aha kau i ae mai  nei."
            K. "Penei hoi la, e ike oie, e olelo aku ana au ia oe i ke ano. Ua lohe au i kahi poe e olelo ana iloko o kuu hale kuai."
            N. Heaha kau hana?
            K.  He kuai pinati aku. (Hu ae la ka aka)
            N. Ua hooholo e anei oe i kou manao?
            K. "Ae no ka hoi ; eia ko ʻ u manao, aole e hiki ia'u ke noho ma ke noho ma ke kiure. Ina au e noho, aole e hiki ia'u ke hana i ka'u hana."
            N. "Mai kou lohe ana iloko o ko hale kuai i hooholo e ai oe i kou manao ?"
            K. "Aole."
            N. "Pela hoi ka pinati i olelo iho nei."
            K. Ae, penei e kuai ana hoi au i ka'u hana, aole i hoolohe nui aku au."
            N. "Pehea kou manao no ia mea ?"
            K. "Kai no paha ua papa leo iho la kaua a lawa."
            N. "A @ lohe pono mai i ka'u."
            K. "Ua lohe pono aku nei no hoi au."
            N. "Aole loa io no anei oe i hooholo e iloko iho oe, a i ole, na hooholo e paha oe?"
            K. "Ae ; ua hooholo au, aole i hewa."
            (Hoomaka mai la ka akaaka o ke aha a pau.)
            Hooleia ua wahi kiure nei no ka pono ile ke noho i kiure, a kipakuia.

Make i Aloha nuiia.

            Ua make o Parisa Nahinu, ma Hookena, ma ka auina la Poaha, Feb 17 o keia makahiki. Ua hanauia oia ma Kaawaloa, Okatoba 8. 1850, oia hoi, he 18 mak., he 4 mal. a me 13 la, kona ola ana ma keia ao He keiki i aloha nuiia e na makua, na hoa'aloha a me na mea no a pau i ike iaia. He keiki noonoo a naauao no hoi ma na buke a nupepa hoi He haumana Kula Sabati makaukau, a he mea i aloha nuiia e kona mau hoa kula. He keiki hoapono a malama pono i  na mea a pau i waihoia ma kona lima. He keiki oiaio a haipule io no ; he hoowahawaha i na mea pono ole a pau Ua lalauia mai oia e na lima menemene ole o ka make, a hala aku la ma kela aoao o Ioredane. Ua kuu ka luhi ; ua pau ka ike ana i na mea o keia ola ana ; ua make me ka manaolana a me ka pule i ke Akua a hiki i kona hora hope. "E ake au e make i ka make ana o ka pono, i like hoi ko'u hope me kona." "Owau ke hele aku i ona la, aole ia e hoi hou mai io'u nei." Ua kakauia he mele kanikau nona.
Kuu keiki, kuu pua lei aloha o Parisa no,
Aloha ka uhane ka hoa pili o ke kino [hale,
Hala oe ma ka Poalua auina la,
Hiki aku au ma ka Poaha ahiahi,
Huli au ia oe, aohe nae oe i loaa
O ka pahu ka'u i ike, aohe waiwai oloko,
Auwe kuu keiki, kuu mea minamina e,
Ka anoi mau loa pau ole a kuu puuwai,
Ka manaolana i kou uhane, ua hala,
Hala aku la oe iloko o Ioredane hou,
Me na anela pau ole i ka heluia,
Aloha ino kuu keiki, kuu lei aloha na mae,
Aohe keiki he how pili no ke anu.
D H NAHINU.

Kanikau aloha keia nou e Parisa,
Kuu keiki mai ka malu hale o Kukapao,
Aloha ia wahi a kaua e noho ai,
E hoomanawanui ai i ke anu me ke koe
A@ maeele au la i ko aloha e noho nei.
Auwe kuu keiki hoi,
Kuu keiki o ka la kahea kauaka o ka aina
E uhai a holo ai o ke ahiahi,
Ahi paila loko o'u i ko aloha e,
O ka ukana nui ia a kuu manao e hana nei,
E loa mai ai i ke ao a me ka po,
Auwe kuu keiki, aohe keiki he hoa pili no ke anu-e.
Kuu keiki aloha ua nalo iho nei,
Hele ka uhane haalele i ke kina,
Wehe mai nei oe i ka pili me ka makua,
Aloha ka leo o ke keiki i ka pane mai,
E mama e, hoi mai kaua,
Kuu keiki o ka wai o Wahaino,
Aloha o Haleola i ka hooke a na kanaka.
Aloha o Kalahiki hale i ka malu o ka nui,
Kuu keiki o ka nalu o Pohoele,
Aloha @ ka wai awili pu me ke kai.
Ke hooipo ae la me ka maka o ka opua,
He pua lani ke aloha na'u e noho nei,
Auwe kuu keiki, aohe keiki he hoapili no ke anu. MRS. MARY NAHINU

He kanikau aloha keia nou e Parisa,
Kuu kaikaina mai ka hau anu o Kuapehu,
Oia wahi a kaua e noho koolua ai,
Aloha kou heleheleua a me ka leo i ka pane mai,
E ao mai ai oe ia'u me he makua la,
Kuu kaikaina e, aloha no kaua,
Hele oe haalele i ka pili me ka makua,
Na makua panaho ole o kaua i ka malama la kaua elua a me na pokii kaikuahine elua,
Elua mea a ka manao e lia nei,
O oe e kuu pokii i ka hele hookahi ana,
O Papa makua i ka ike ole ia oe,
Aloha na hoa kula o kaua,
A me na hoa kula Sabati o Pukaana,
Ke noho nei lakou me ka hoomanao ia oe,
Pau kou ike aka i na mea o keia ao,
A me na ehaeha o kou kino nawaliwali,
Noho aku la oe i ka Paredaiso mau loa,
Ike aku la oe i ka hope kupono a kau mau hana, [pono,
"E ake au e make i ka make ana o ka poe pono
I like hoi kuu hope me kona,"
E kuu kaikaina e , aloha no kana.
JOHN NAHINU.

He kanikau aloha keia nou e Parisa,
Kuu kaikunane mai ka mala hale o Kukapao,
Oia home lai a kaua e noho koolua ai,
E kau aku ai na maka o ka iho mai i Papa ma,
Aole oe he kaikunane no'u he makua no,
Aloha o Papa i ka ike ole i kou hele ana,
Hele hookahi ka uhane o Parisa i ke awakea,
E Parisa e, aloha oe, hoi mai no kaua.
HANA NAHINU.

Kanikau aloha keia nou e Parisa,
Kuu keiki mai ka makani anu he kehau,
E wehe ana i ke oho o ke kupukupu,
Auwe kuu keiki e. kuu keiki hoi,
Kuu keiki o ka la o ka pilikia,
I uhai ala ai kaua i ka po me ke ao,
I hoomanao ai i ka Haku ma ka lani,
Auwe kuu keiki e, kuu keiki hoi,
Aohe keiki, he hoa ala no ka po e.
MELE KAULUNAE.

Kanikau aloha keia nou e Parisa,
Kuu keiki aloha ua hele ino nei,
Ua hoi i kahi mau o ke kino, [maka,
Waiho i ka ukana nui a ke aloha he wai
E hanini pulu elo nei i kuu nui kino,
Auwe kuu keiki e, e kuu keiki hoi,
Kuu keiki o ka pihe uwa lua mauka makai
He wa okoa no ia na ko laila kini,
Kuu keiki o ka hana nui a ka haole,
E hooponopono ana o na mea kuai,
Pau kou ike ana i ka nani o keia ao,
Ke ike la oe i ka nani o Ierusalema hou,
Ke hosana pu la oe me ko laila Kula Sabati,
Auwe kuu keiki hoi e.
MELE KAUMU.

Kanikau aloha keia nou e Parisa,
Kuu keiki mai ka lani pohu o ka aina,
Mai ke kai malino la e Kona,
Aloha Hookena ke one hanau o ka makua,
Oia wahi lai a ke aloha i noho ai,
Kuu keiki o ka pono o ke Akua,
Aloha papa i ka ninau mai,
Aloha o kupuna ma i ka uwe iho,
Aloha ino ko kuu moopuna.
Hana na maka pau ka ike 'na,
Auwe kuu keiki hoi e.
MELE KAMAKA.

He kanikau aloha keia nou e Parisa,
Kuu keiki mai ka la wela o Kealia,
Alia oe e ke aloha e apa nei i ke kino,
E lualele nei i kuu manao.
Manao aku au i ko aloha i hoa pili no'u.
Auwe kuu keiki mai ka makani wehe lau niu he
E hea mai ana ia'u e hui wau e,
Aloha ke keiki i ka hele hookahi aohe lua,
Lua ole ka hana a ke aloha noho nei,
O ko'u kuleana no ia o kahi makaainana ole
Auwe kuu keiki e, hoi mai kaua.
HANA KAIMIOLA.

He kanikau aloha keia nou e Parisa,

Kuu keiki o ka malu inia o Luakaha,
E nana ana i ka nani o Aina hou, [olu,
Kou keiki mai ka ua hehi mai iluna o ka
Ke niai hele ae la mauka o Honopuwai,
A hiki mai no ko aloha e uwe no wau,
Auwe kuu keiki e.
AMASA.       

Kanikau aloha keia nou e Parisa,

Kuu kaikunane o ka pupu hookahi,

Elua loua elua no hou mana-e,
Pali ku ke aloha o kou kaikunane,

Paila wela i kuu manawa-e.
Hoona@ aku i ka wai o kapuai,
Aloha Haleola i ka malu hale i kana,
Aloha Kukapai ka home lai o ka makua,
Oia home lai a kaua e noho ai,
Aohe kaikunane he hoa pili no ke anu e.
KAAI NAHINU.
Hookena, Kona Hema, Hawaii.

Pokole na la, wehe i ka pili.

            Ma ka uka iu ano nei o Olaa, Puna, Hawaii, make emoole iho la i Mrs. Ka-noa Nihoa, i ka la e 2 o March A D 1874. I ka hora 11 me 41minute, no ka mai @ vanita, he 14 la o kona mai ana ; wehe koke mai kela i ko maua pili, me ka pokole o na la o ka noho pu ana. Ka manawa o kona ola maikai ana me a'u, hookahi la ; hui me na la o ka mai ana 15 la. Oia ka nui o na la o ko maua noho pu ana. Ua hanauia oia ma Alea, Hilo, i ka malama o Nov 3, 1857. ua mare ia maua e Rev T Coan ma Hilo i ka la 14 o Feb. 1874 e na@e nei. Ka nui o kona mau makahiki o ke ola anam he 16 me 5 malama me 2 la ; a ua haalele mai kela i ka pili a me ka ohana a pau. Aua ma Kealakomo, Puna, Hawaii, kona home kupa me na makua. Nolaila, ua haku iho au i wahi kanikau aloha nona.

He kanikau la he aloha,
Nou e Mrs. Ka-noa,
Ka hoa o na la pokole,
Hoa pili hoi o ke kino,
Oni wale iho kuu po anu,
I ka hoi loli a ke aloha,
Ei aku nei paha oe,
I ka makani kanaheahe,
Wehe oe la i ka pili,
Haalele i na makua,
Ke hele mai nei ke aloha,
A lalawe i kuu nui kino,
Ko kino wailua ka'u i ike,
I ka welelau o ka lihilihi,
A ka lihi au o Waiuli,
Kau e mai ana ka halia,
I ka lawe a ka malua,
Elua kana i ke aloha E hulei nei i ke kino,
He aloha, he aloha,
I ka pua maalo hookahi,
Ua hala e aku la o,
I ke ala hoi ole mai,
Kuu wahine hoi-e,
Aloha-kaua
J. HENRY NIHOA.
Olaa, Puna, Hawaii, March 28, 1874.