Ka Nupepa Kuokoa, Volume XIII, Number 13, 28 Malaki 1874 — Page 4
| This text was transcribed by: | Janel Quirante |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
Voice of Jesus.
Songs of Salvation, p. 34.
1.
Hea Iesu, Hele mai,
Na pokii liilii ;
Lobe, ala, hele ae,
Na pokii liilii.
Leo hea lani nei,
Leo, olu, maikai e,
E hoolohe, a hehai,
Na pokii liilii.
2.
Imi au, aloha no
I ua pokii e ;
Ehu, make no oukou,
No na pokii e.
Nana i kuu kino nei,
Kaulia ma ke kea e;
Ku ano, a hele mai,
E na pokii e.
3.
Ae, ke hele nei makou
I ou la, e Iesu,
Hii, a kai, a kini mau
I na pokii ou.
Ma kou pa e hanai ai,
Ma na kahawai maikai,
Ma na kula uli e,
E hoomalu mau.
HAWAII.
HAAWINA KULA SABATI.
KA HAPAHA ELUA O 1874.
HELU 15, SABATI APERILA 12.
KUMUHANA -- Ke Keiki Bipi Gula
PAUKU BAIBALA -- Puk'. 32:1-6, 19.20.
A IKE aku la na kanaka i ko Mose hookaulua ana i ka iho mai, mai ka mauna mai, akoakoa iho la na kanaka io Aarona la, olelo ae la iaia. E ku oe, e hana i akua no kakou, i mea hele mamua o kakou : no ka mea, o ua Mose la, ke kanaka nana kakou i alakai mai nei, ka aina o Aigupita mai; aole, kakou ike i kona wahi i lilo aku ai.
2 I mai la o Aarona ia lakou, E uhai oukou i na apo gula pepeiao o ka oukou wahine, a me ka oukou keikikane, a me ka oukou kaikamahine, a e lawe mai io'u nei.
3 Uhai iho la na kanaka i na gula pepeiao, i na mea iloko o ko lakou pepeiao, a lawe mai io Aarona la.
4 Lawe iho la ia, mai ko lakou lima'ku, a koli iho la ia mea i ke kila, a hana ae la i bipi keiki i hooheheeia ; a olelo iho la lakou, Eia kou akua, e ka Iseraela, nana oe i lawe mai nei, mai ka aina o Aigupita mai.
5 A ike aku la o Aarona, hana iho la ia i kuahu imua i ke alo o ia mea ; hea aku la o Aarona, i aku la, E, apopo he ahaaina na Iehova.
6 A ia la iho, ala koko ae la lakou, a mohai aku la i ka inohaikuni, a lawe mai no hoi i mohaihoomalu ; a noho iho la na kanaka e ai, a e ino, a ku ae la iluna e pauni.
19 A kokoke ia e hiki i kahi o lakou i hoomoana'i, ike aku la ia i ka bipi keiki, me ka hua ana : ulu puni iho la ko Mose huhu, kiola aku la ia i na papa, mai kona lima aku, a naha iho la laua malalo o ka mauna.
20 Lawe iho la ia i ka bipi keiki a lakou i hana'i, a puhi aku la i ke ahi, a hoowali iho la a okaoka, a lulu aku la ia maluna o ka wai, a hoohainu aku la i na mamo a Iseraela i ka wai.
PAUKA ALAKAI p. 19,20. Hoopaanaau.
MELE Him. 467, Leo-Dalston. (Pono mau.)
Auhea ka pono mau
E pono ai kakou ?
Auhea ka pono e ola'i?
E imi pu kakou
I ke Akua mau,
E pau na akua wahahee.
PULE i hoopauia na akua kii a pau.
Na Nimau a na Kumu i na haumana.
P 1. Aia ao Mose mahea ? Owai ka i pii pu me ia ? Mok 24: 12, 13. Owai ka i noho malalo e malama i ka poe Iseraela ? Mok. 24: 14. Pehea ka loihi o ko Mose noho ana malaila ? Mok. 24: 18. Heaha ka ke Akua i haawi mai ai ia Mose ? mok! 31: 18. Na Kanawai he 10 wale no anei? Aole, o na kanawai, na kauoha he nui wale, mai ka Mokuna 20 a i ka Mokuna 31. Na Kanawai Kuraima, na Kanawai Kivila, me na kuhikuhi no ka halelewa &c. Maluna o keia Kumukanawai anei i kukuluia'i na kanawai kuraima, kanawai kivila o na anpuni naauao? No ka noho loihi ana o Mose ma ka mauna, aha aku la kanaka ia Aarona ? Me he la, he poe hoomanakii lakou mamua. Hiki anei i ke kanaka ke hana i mau akua mana no lakou? Pauku kuhikuhi. Oihana 7: 40.
P 2. 3. Pehea aku la Aarona ? Ae ka oia i ka manao o na kanaka. No ke aha oia i kauoha ai ia lakou e ehai i na apo gula &c? Manao paha oia e minamina ana lakou i na apo gela, aole ae e heawi mai. Ua ae no nae anei lakou? Nohea keia mau apo gula? mok. 12: 35, 36 He aha ke kauoha like a Gideona ? Lunakau. 8: 24-27.
P 4. He akua@ ka Aarona i hana'i ? Heaha hoi kana olelo? Oiaio anei kana olelo ? No ke aha oia i ae ai e hana i akua kii no lakou ? p 21-24. No ke aha i hoohaliia ai oia i ke kii gula me ke keiki bipi? No ka mea, he bipi ka na Aigupita i hoomana nui ai. Owai kekahi Alii i hana i mau Keiki Bipi Gula elua i mau akua ? I Na'Lii 12: 28. Nana hoi ia Lunakanawai 17: 3, 4. isaia 46: 6 Roma 1: 23.
p 5, 6. Heaha kekahi mea a Arona i hana'i ? Heahi hoi kana kauolia ? A pehea hoi kanaka ? Pauku kuhikuhi. I Korineko 10: 7. Ua lohe anei Mose i ka hewa a Aarona ma i hana ai? p 7, 8 Heaha ko ke Akua manao? p 9, 10. Pehea ko Mose uwao ana? p 11-13 Kaua. 9:18-20. Ae anei o Iehova ? p 14. Heaha ma ka lima o Mose iaia e iho ana mai ka mauna mai ? p 15, 16. Heaha ka Iosua olelo ia Mose ? p 17. A pane Mose pehea ? p 18
P 19, 20. I ko Mose ike aua i ke keiki bipi gula, &c., pehea iho la oia i na papa kanawai ? A aha iho la hoi i ke keiki bipi? Nana Hosea 4: 8. Pono anei kana hana? Ae. Ikaika oia -- wiwo ole. Wiwo wale Aarona.
Mele Himeni 93. Leo -- Nerona. C. sacra p. 56.
1
Hauoli; ke ola nei
Ka mea nui e ola'i ;
A, maluna'e ke uwao mau
Me kona koko kamahao.
2
Nui na hewa i hewa'i,
Kau wela mai ke kanawai,
Nana aloha nae Iesu,
Hoolaulea'e, a laulea no.
Na ninau a ke Kahu.
Papa Makua. Paupau'ho ka poe Iseraela, no ke aha? He kumu pono anei ia? Aole anei he mau alakai ko lakou? Oiai hoi, Aarona ke alakai, a noi aku lakou ia ia e hana i ke aha? Hiki anei i ke kanaka ke hana i mau ak ua mana? Pela anei ka manao o kanaka Hawaii mamua? Ua nui hoi anei kanaka i keia wa i manao pela? Ua naauao anei ka poe Iseraela ia manawa? Heaha ka hoomana a lakou i ike'i ma Aigupita? Heaha ka hoomana a na kahuna, a Aberahama ma? Ua nalowale anei ia heomana ?
Papa keikikane me kaikamahine. Heaha ke kii a Aarona i hana'i i aku no lakou? Nohea na apo gula? Ae wale anei lakou e haawi aku i na apo gula pepeiaoia Aarona? No ke aha? No ka noho loihi ana o Mose ma ka mauna, manao anei lakou ua nalo aku o Iehova ko lakou Akua?
Aia hoi ka nani, ke ahi, ka hekili ma ka mauna, ua ae hoi e hoolohe i kana mau olelo apau, haalele koke nae lakou ia Iehova, a olelo, owai ko lakou akua? Ke keiki pipi gula, ke Akua mana ka oia! Kulou iho, a hoomana, a ku ae a ahaaina me ke aha? Haa, hula, paaui.
Hai paanaau mai 1. Kor. 10: 7.
Napokii. Mahea Mose? Ehia la malaila? A loaa mai na papa kanawai ehia? Nawai i kakau? I ko Mose noho loihi ana ma ka Mauna, pehea na kanaka malalo? Heaha ko lakou akua kii? Nawai i hana? noloko mai o ke aha? na apo gula pepeiao. He mau apo pepeiao, a komo lima, a hua lei ai ka oukou. Ina e noi ia 'ku e haawiia mai i mea kokua i ko na aina e, i lohe lakou no Iehova ke Akua oiaio, ae koke anei oukou e haawi mai? minamina paha ea.
Hai paanaau mai Kinohi 35; 2, 4. Ahaaina a hula ka poe Iseraela me ka hoomana ana i ke keiki pipi gula, ke ano nui anei ia o ka poe hoomanakii? Pehea hoi oukou? ua pau anei ka hula? pau ole, e kapa ia anei oukou he poe hoomanakii?
Ke kula apau. No ke aha ko Aarona hoohaliko ana i ke Akua me ke keiki pipi? Oia ko Aigupita akua nui. He alakai o Aarona, he alakai aha i kekahi manawa? No ke aha ke alakai hewa? Owai ka poe hoohalike me ia? Ina hele na kumu, na makua, na kahu i kahi e, a noho loihi, pono anei ke hele lalau na haumana, na keiki, na hoahanau? Owai ka mea e mau ana ? Haawi ka poe Iseraela i na apo gula pepeiao &c., i loaa ke akua hou nana e kokua, a e alakai ; heaha ka kakou e haawi ai i kokua mai ke Akua oiaio a hoola mai?
Ua ahaia kela keiki bipi gula me na papa kanawai ? Akaka anei ka mana ole oia Akua ? Mai pau ka poe Iseraela i ka lukuia e ke Akua no ka hoomanakii aua ; pakele nae ia wai ? Owai ko kakou uwao nui ? A heaha ko kakou pono no ka poe hoomana kii he nui wale ?
MELE, Him. 493, Leo-Kendall, C. Sacra p 135.
I Hauoli e na aina e,
Iesu ke'Lii maikai ;
He ahi kona kanawai,
Hehee na manoa nei.
3 Hai mai na lani i ke Lii,
I kona nani e ;
E hee a pau na 'kua kii,
Na 'kua wahahee.
PULE no na hoomanakii i hoopauia.
Haawina Kula Sabati no Aper. 19.
Pukaana 33 : 12-20. HAWAII.
Hoike Kula Sabati o Siloama.
Ma ka la 28 o Feberuari i hala, ua noikeia ke kula o Kula Sabati o kalekalesia o Siloama malalo o ke alakai ana a A. W. Pupulenui ke Kahu Kula Sabati.
Mawaena o ka hora 8 me 9 ke kani ana o ka hele kahea i na kumu a me ua haumana, no ka liuliu a hoomakaukau ana i na kahiko a hele aku la ma kahi o ke Kahu Kula Sabati. Malaila ka hounohonoho ana o ka huakai e kai aku ai a i ke halepule Siloama, kahi e hoikeia ai na hana o ka hoike kula Sabati.
Ua hoonohoia ka huakai penei : Mamua ka mea lawe i ka pahu Hae Hawaii e welo ana i ka makani, na keiki hookani pahu a me ka ohe me ka lakou mau mea kani. e kani ana. Mahope iho ka papa kula o na keikikane a me na kaikamahine, o S. N. Holokahiki ko lakou kumu. Mahope iho ka papa kula o na wahine, o G H. E. Keaniaole ko lakou kumu Mahope iho ka papa kula o na kane makua i oo, o J. Lulana ko lakou kumu. Mahope ino ka papa kula o na kane opio, o J. Europa ka lakou kumu. Mahope loa ka papa o na hanaka opiopio, o J. Kaahaihonu ko lakou kumu. Ua kai malie aku ka huakai a ko mo i ka halepule Siloama.
I ka pau ana o ka hooponopono o kela papa kula keia papa kula ma na noho, a me ke anaina makaikai, ua hoomalu mai la ke Komite Hoike o ke Kula. A wehe mai la i kana hana ma ke kauoha ana i na papa a pau loa e ku iluua a mele mai i ka himeni 30, Ziona ka leo, aoao 36 o ka Rila Kamalu. Ua puanaia e ka papa kula o Mr Keauiaole, hookahi pauku ma ke mele ana Pule aku la ka Rev Noa Pali. Hoomaka aku la na hana penei iho :
1 -- Na ka Papa Kula o S. N. Holokahiki i hoi e mai keia haawina :
Himeni. "Mele anei ma ka lani?" Hae Hoonani.
Haawina. Ko ke Akua hana ana i na mea a pau iloko o ka lani, a me ka honua. Kinohi 1: 1 -
Himeni. "Kai a nauwe i ka nani." Hae Hoonani.
2 -- Na ka Papa Kula o G. H. E. Keauiaole i hoike mai i keia mau haawina :
Himeni. Hosana Kamalii." Rila Kamalii.
Haawina. Kekahi mea kupanaha loa i ikeia aku ma ka lani. Hoikeana 12: 1.
Himeni. "Lei Alii." Himeni haku.
3 -- Na ka Papa Kula o J. Lulana i hoike mai i keia mau haawina :
Himeni. "Kaipololei." H. Hoonani.
Haawina. Na hoailona mana nui a ke Akua ma o Mose la imua o Parao.
Himeni. "Ke koaio." Rila Hawaii-
4 -- Na ka Papa Kula o J. Eulopa i hoike mai i keia mau haawina
Himeni. 'Lala-la-la." Himeni haku.
Haawina : -- Ka moolelo o Ioba : -- Ioba!
Himeni. No ka Moi W. C. Lunalilo. Penei ka haku ia ana oia Himeni.
1 Auwe aloha ino ka lani,
Williama C. Lunalilo,
Ua hala e aku nei ia,
I ke ala hoi ole mai.
2 Ke uwe paumako nei makou,
Me ka u me ka minamina,
No ka lei lani aloha ua hala.
Ua lawe aku ka makua.
3 E hui pu mai e na hoa,
I ke kanikau o ka lani,
E Hawaii aloha alii,
Ua hala e ka milimili.
4 E mahalo piha ia ke Akua,
No kona lokomaikai,
Nana no la i haawi mai,
Nana no la i lawe aku.
5 -- Na ka Papa Kula o J. Kaahaihanu i hoike mai i keia mau haawina.
Himeni. "Papa koa kula Sabati." Hae
Haawina : -- Na koa ui iloko o ka umu ahi Daniela 3 :
Himeni. -- "Kuu aina hanau."
He mau ninau mawaho kekahi na ka poe no i makaukau no ka ninau ana, a me Ka hai ana mai i na haina. Eia kekahi mau ninau i ninau ia, a ua loaa ole ka haina ia makou.
1 Owai ka makuakane o Ioba ? Aia ma hea ka Palapala Hemolele kahi i hoike ia mai ai?
2 Owai ke kanaka i oi aku kona naauao mamua o Daniela ? Daniela 2:30
3 O ka hanai ana i na puaa, heaha ana ia i ke kanaka?
Ke kau aku nei ko makou mau maka maluna o na makua a me na kaikuauna iloko o na kula Sabati a pau mai Hawaii a Niihau, e hai mai ia makou i na haina a me na kuhikuhi ana o keia mau ninau.
I ka pau ana o na hana. Hoike aku la ke komite i kona manao.
"Ua nana, a ua makaikai iho nei au i ko oukou ike ma na haawina i haawi ia ia oukou i ke kula Sabati o Siloama nei, ke haawi aku nei au i ko'u mahalo i ko oukou makaukau ma na mea a pau i ao ia ia oukou e ka oukou mau kumu. O keia hana ana a oukou i keia la me Kalawao nei, oia ko oukou lawe ana mai i na hana o ka aina kahi a oukou i haalele aku ai. A ua maopopo i ko'u manao eia no me oukou ke kahu nui o na kula Sabati o ke ao holookoa. A ke hai aku nei au e hoomau aku oukou i keia hana imua."
Ma ia hope iho lohe aku la au i ka manao o ke Kahukula, E hoomau ahu no i keia kula ana a hoike hou i ka malama o Mei.
Oia ka pau ana, me ka himeni ana i ka himeni, Hamau. A hookuu ia aku la ke anaina me ka pule hookuu a Mr Pali.
Rev. N. Pali me S. N. Holokahiki. -- Komite.
Kalawao, Molokai, Mar 4, 1874.
Make e ke keiki minamina nui ia, e Parisa.
Ua hanau ia oia ma Kaawaloa Hawaii. Oia hoi ke keiki kane hope loa o D. H. laua o Mele Nahinu.
I ka auina la Sabati hope o ke ola ana o kona makuhine, mamua iki o kona hele ana 'ku i kona home pomaikai ma ka lani, ua bapetisoia keia keiki ; a ua hiamoe koke no o Mele Nahinu iloko o Iseu. Koe mai ka makuakane, me kaua mau keiki kane ekolu O David, o Ioane, a o Parisa. He keiki maikai no o David, a ua make e i kona wa kamalii. Aka, o Parisa liilii nei ka punahele loa iloko o ka hale o kona makua. Ua ano like loa kona helehelena oluolu maikai me ko ka makuahine.
He keiki makaala a miki-oi hoi ma ka hoolohe ana i kona mau makua, a me na kumu, ka poe nana e ao aku ia ia.
He ano maikai a nawaliwali hoi kona kino, mai kona wa keiki nuku mai. Aka, he oluolu maikai kona mau maka, a he lealea ano e kona helehelena i na la a pau. Nani ka oluolu o kona akahai, a me ka ikaika o kona imi ana i na mea e pili i ka naauao, a me ka pono ! He "keiki hoopono pololei ma na mea liilii a pau," me he makua kupoao ma ka hale o kona makua ponoi.
Ma ka mana aupuni, ua koho ia o D. H. Nahinu e hele mai, e koho balota no ka Moi. A ua haalele oia i kana keiki nawaliwali, me ka naau kaumaha, a ua hele mai no oia, a ua hana 'ku e like me ka mea i kauoha ia ma ke Kumukanawai. Aka, e like me kekahi poe hoa, ua loaa ia ia ka pilikia, ua pepehi ia kona kino, a pakele wale kona ola.
Oiai e noho ana oia me ka ehaeha, ua hiki mai ka palapala e hai ana i ka pilikia maoli o keia keiki i aloha nui ia. Ua nee aku oia a kokoke i ka palena o ka muliwai.
Nolaila ua E-e koke no keia makua maluna o ka moku Kilauea, a ua holo aku la me ka manao lana e halawai hou me ke keiki punahele.
Aka, ua kii e mai ka Haku ia ia. I ka la 17 o Feb. i hala'ku nei, ua make no oia. Ua hele aku oia me ka manao lana. Ua komo e oia iloko o kona home pomakai, ma Ierusalema hou, e noho mau loa me ka Haku. Ka huina o kona mau makahiki he 13.
Koe wale mai ke kino kupapau i ka puka ana'ku o ka mukuakane ma kona hale iho. Ua pio ka malamalama o keia hale. Ke uwe aloha pu nei makou me keia mau makua, me ka hoonani aku i ka inoa o Iehova. J. D. P.
Honolulu Marakai 4, 1874.
"Heaha ka'u e hana aku ai ia Iesu !"
Ua pilikia ka oe, e Pilato, ke Kiaaina, ka Lunakanawai ! Elua paahao e ku ana imua ou, Iesu, ka mea au i hoole ai, aole i loaa kekahi hewa iki iloko ona, a Baraba, ka mea au i ike pono ai, he hewa loa ; akaka ole nae ia oe ka mea kupuo ke hookuu ia, Iesu pana, Baraba paha. No ke aha kou pilikia ? Heaha ka pohihihi ? Aole anei i akaka lea ia oe, o Iesu ka mea kupono ke hookuuia, a o kou pono hoi, e hookuu aku?
Heaha ke kumu o ko Pilato pilikia a kanalua ? Ka makau paha. Ae, makau oia i na Iudaio o hoopii lakou ia ia ia Kaisara, a hoopauia kona oihana kiaaina no ka hookuu ana ia Iesu ka mea i kapaia, he alii o na Iudaio. Makau hoi paha oia i ka hoahewa ia Iesu, i ka mea hewa ole, e kaulia ma ke kea a make, o hoopaiia oia mahope no ka ae e make keia kanaka pono, ke alii hoi o na Iudaio, wahi ana.
Ma ka hoopiliana.
1 Owai Iesu? He mea nui Iesu. Ua lohe pinepine ia kona inoa mai ka wa i hanauia'i oia a hiki ia nei. Aole uae i lohe na kanaka Hawaii i keia inoa mamua loa aku. Akahi no a loheia i ka wa i puka mai ai na misiouari. A mailaila mai ua lohe pinepine oukou i ka inoa o Iesu.
He inoa maikai kona. Nui hoi kona mau ano, he Alii, he Mesia, he Hoola, he Keikihipa a ke Akua, he Keiki Hiwahiwa a ke Akua, he Punahele na ke Akua, he Kahu hipa maikai, he Kalahala, he Kumu maikai, he Kumu-waina, he Puka uo ka pa hipa, he kane mare, he makua, he Kahunalapaau, he Kahunanui, he Mohaihala, he makamaka aloha, he Uwao, he pani hakahaka, he kaula nui, he Lunakanawai, he makai nui makuala mau, he Ilamuku hoopai ewaewa ole &c.
2. Ua lilo Iesu i mea hoopilikia, a hoopihoihoi, a hookanalua i na lii, i na kanaka, a i na kamalii. I ka wa i hele ai na Magoi ia Ierusalema e imi ia Iesu, ke Lii o na Iudaio, a lohe ia ua hanauia ia alii, ka piha no ia o Herode ke alii, me ko Ierusalema a pau, i ka makau, a me ka pihoihoi.
Pela hoi ka diabalo me na daimonio, i ko lakou ike ana, ua puka mai Iesu ke keiki a ka Mea Kiekie Lea, makou, pihoihoi, weliweli lakou. Pihoihoi ua Parisaio, na Sadukaio, na Kakauolelo Pela hoi na kanaka ma Nazareta, a ma Gadara; makau a pihoihoi lakou i ka lohe, a ike ana, aia no @ ma ko lakou wahi.
A make Iesu, a ala hou mai, a laweia kona inoa i na aina e, i na aina hoomana kii, a ia Hawaii nei no hoi, ala koke mai no ka makou, ka pihoihoi, ka pilikia, ke kanalua nona.
3. Heaha ke kumu o keia makau, a pihoihoi a kaualua no Iesu?
Ka makau no ke kumu nui, Makau Herade me ko Ierusalema i keia alii hou, ua lohe lakou i kona ano, he alii maikai keia, ka Mesia ia mai ke Akua mai, o hele mai ana e hoopai i ka poe hewa Ua akaka, he poe hewa lakou, hewa Herode, hewa na Iudaio, ua hiki mai paha ka wa hoopai. E pau ana lakou, e lilo ana ka oihana olu ia Iesu. Pihoihoi, a weliweli hoi ka diabalo me na daimonio, no ka manao, ua pokole paha ko lakou manawa, e hiolo ana ko lakou aupuni, e paopao ana Iesu i ke poe o Satana, e hoopau ana i kona mana, e hoihoi aku a hoopau loa ana ia ia me kona poe iloko o ka lua hohonu o ka po.
Pihoihoi, huhu, kanalua, na Parisaio, na Sadukaio, na kakauolelo, na kanaka ma Nazareta, ma Gedara ia Iesu, no ka mea, e hoahewa ana oia i ka lakou mau hana, e houemi ana, e hoopau ana i ko lakou mana, i ko lakou hanohano, ko lakou mau pono kino, pono aupuni, i ko lakou kaena ana no ko lakou pono iho.
Pihoihoi, a ukiuki, a kanalua na kanaka ma na aina e, a ma Hawaii nei i ka lohe ana ua puka mai Iesu ke alii hou.
Makau lakou o hoohiolo ia ko lakou mau akua kii, a hoopauia na hana hewa, na hana lealea, na hana apuka e waiwai ai ; makau hoi o hoopaiia, no ka hana hewa ana. Nui hoi ke kanalua ana no na mea i papaia ; a no na mea i kauoha ia.
4 Nolaila, ua ala mai ka ninau, Heaha ka'u e hana'ku ai ia Iesu ? Ua akaka, ua puka mai Iesu, eia no ia maloko o ka Baibala, maloko o ka waha o na misionari, o na kuhunapule, o na kumu kula Sabati, maloko o na luakini, na kula Sabati, na aha halawai, na ahaaina a ka Haku, maloko o na hale, o na wahi mehameha, maloko o na pule, na himeni, na haawina kula Sabati. Aole wahi i koe i lohe ole ai i ka inoa o Iesu, i ka olelo a Iesu, e paipai ana e mihi, e huli, e pule e manaoio, e haalele i na hewa, i na lealea lapuwale ; e koho ia ia i alii, i kalahala, i kahuhipa, i kumu waina, i kane mare, i uwao, i kumu, i makua, i Hoola, i ola, a pakele i ka make mau loa.
Kani mau ko Iesu inoa ma na pepeiao o kanaka, o kamalii. Hooku mau ia Iesu imua o ko lakou alo, ma ke ao, ma ka po, ma ka hale, ma ke alanui, ma ke kula, ma ka mala. Pa e mai kona leo, Eia no wau, ka Mesia, ke kalahala ; Ua make au nou. Ke makemake nei au e hoola ia oe, e hookumo ia oe iloko o kou aupuni, i alii pu oe me au, a loaa na pono nani pau ole ma ka lani. Ke ae nei anei oe?
Makau, pihoihoi, kanalua nae oe, a ninau, Heaha ka'u e hana'ku ai ia Iesu ?
Imi o Herode e pepehi ia Iesu ; kena mai ka diabalo ia ia, e lele ilalo mai kahi kiekie loa o ka luakini, i make oia. Lalau na Iudaio i na pohaku e hailuku ia ia. Imi ko Nazareta poe e hookaa iho ia ia ilalo i ka pali i make. Ki paku aku ko Gadara ia ia mai ko lakou aina aku. Kumakaia o Iuda Isekariota ia ia i make. Makau Petero, a hoole ia ia. Makau na haumana he 11, a haalele ia ia. Makau Pilato, a ae e make oia. Huhu loa na Iudaio a kau ia ia ma ke kea, i make a nalo loa aku.
Kiai na koa o Pilato i ole e ala hou a ike houia oia ma ka honua.
Hai ia ka inoa o Iesu, me kana olelo i kona aina e ; Uwauwa na la, na kanaka, mai hoopukaia mai keia inoa maanei, e kipakuia, e hoopaa ia iloko o ka hale paahao, e make ka poe i aa e hoopuka mai i keia inoa hou, i keia olelo hou.
E na lii, na luna, na kanaka, na kamalii, na hoahanau kanalua ma Hawaii nei, Heaha ka oukou e hana 'ku ai ia Iesu ? Eia no oia me oukou ; A ko oukou pilikia paha ia, o kona ku mau ana imua o oukou, iloko o ko oukou mau hale, a o ko oukou mau wahi a pau. E aha ana oukou ia ia ? E imi anei e pephi? E lawe anei i na pohaku e hailuku? E kipaku aku anei ia ia mai ko oukou mau wahi aku? E lalau anei ia ia a hookea aku ilalo i na pali? E kumakaia anei ia ia? E hoole, e haalele ? E haawi aku anei ia ia e make ma ke kea? E pepehi, a hooulao, a hoopaa anei ia ia iloko o ka luakupapau? Make hewa ia! Nalo lua anei Iesu i na Iudaio?
Aole anei oia i ala hou mai a lilo i Lunakawai nana lakou i hoopai?
A ku oukou imua ona ma ka la hookolokolo, a ike aku ia ia ma kona ano alii, ano Lunakauawai, e aha aku ana oukou ia ia? Eia ka oukou, ke mihi e ole; E hea aku ana i na kuahiwi, a me na pohaku, "E haule mai oukou maluna iho o makua, a e uhi mai ia makou, mai ka maka o ka mea e noho la ma ka noho alii, a me ka inaina o ke keiki hipa."
A haule oukou ilalo i ka po, a nana 'ku iluna, a ike i ka maka minamina o Iesu e nana mai ana, a ike aku i kona mau lima, kona mau wawao, me kona aoao i hooia no oukou, e aha aku ana oukou ia ia i nalo loa aku?
Eia wale no ka pono ma keia wa ; E pau na kanalua, na makau, na manao kapeke peke, e hookipa ia Iesu me ke aloha ; e hooiaio ia ia makahi akea, e paa, e lawe i ke kea, a hahai mau mamuli ona, a e imi e hookaulana 'ku i kona inoa maikai i na wahi a pau. HAWAII
Nu hou maikai.
Iloko o na nupepa mai Nu Ioka mai, ua hiki mai ka lono, e iho nui ana ka Uhane Hemolele maluna o na ekalesia ma Nu Ioka, ma Brooklya, ma Iersey City, ma Hoboken, a me ua wahi e pili mai ana. Nui ka poe paahana e hele ana i na halawai haipule i kela la keia la, ka poe waiwai a me ka poe ilihune; na kalepa, na loio, na kauka lapaau, na kahu banako, &c, &c. Ma kela mau kulanakauhale, e manao nui ana na kanaka i ka waiwai o ko lakou mau uhane.
Ma Jersey City, he 14 na ekalesia, a he 14 ua kahu ekalesia no hoi. Mai ka hebedoma haipule mai, oia ka hebedoma mua o Ianuari, ua mahuahua ka manao haipule a hiki i keia manawa ; a ke mahuahua aku nei no ia i keia wa.
Iloko o keia mau ekalesia 14, he halawai haipule i kela la keia la. Aole haunaele, he maluhia no na halawai, me ka noonoo, a me na manao hohonu.
Ua manaoia, hookahi tausani, a oi aku paha, ka nui o ka poe i mihi a huli ma ka pono iloko o keia mau ekalesia he 14.
Ma kekahi halawai, olelo mai kekahi hoahanau penei ; "Ua noi aku au ia oukou, e pule no ko makou kahu hou, i hele pu mai ka Uhane Hemolele me ia, i kona hele ana mai e noho iwaena o makou. Nani ka hoolohe ana mai o ke Akua i ka oukou haipule ana ; no ka mea, i ka hoomaka ana o ua kahu nei i kana hana, ua hoomaka pu ka poe hewa e mihi, pule, a huli mai i ka Haku. Ke ohi mai nei makou i na pua nui a maikai iloko o ka ekalesia.
He nui ka haipule ana no na haumana ma kekahi kula nui ma Ilinois, Amerika Hui. Olelo mai kekahi hoahanau penei ; Ua ike makou, ina aole hoolohe mai ke Akua i ko makou mau haipule, ia makou no ka howa. O kekahi poe i lawe i ko lakou mai ia Kristo e hoolaia, wawahi lakou i ko luna o ka hale, i hiki ke waiho i ka mea mai ma ko Iesu alo. Pehea? Ke wawahi nei anei kakou i ko luna o ka hale, me ka manaoio a me ka haipule? Ke hookaawale aku nei anei kakou i na mea e hina ai, i hiki ke alakai i ka poe hewa io Iesu Kristo la? I ole, e makehewa ka pule ana ; a me na hana ana.
Ke manaoio nei kakou i ka pono o ka hai ana i ka olelo a ke Akua ; pela hoi ka hoolohe ana i kana olelo.
Ke manaoio nei no hoi kakou, ua lohe, a ua hoolohe hoi ke Akua i ka pule ; a ina e hai aku pela ia ia, me ka manaoio e like me ka olelo ana, aole paha liuliu, a e hoohamama mai oia i ka lani, a ninini mai i ka Uhane Hemolele. Heaha la ka hope? Alaila e hiki ia kakou ke ao aku i na lawehala i ko lakou aoao ; a e hoohuliia lakou i ke Akua. N. Y. O
NA BUKE
HOOLAHAIA E KA PAPA HAWAII
Baibala Hemolele Nui ili eula nani me na kuhikuhi ma na a ao.....$12 00
" " Nui ili eleele kaekae wai gula.....5 00
" " uuku iki ihi " ".....8 00
" " Pananaiki iho ili eleele.....4.00
Kauoha Hou ili gula nani me na kuhikuhi.....3.00
" " eleele kaekae wai gula.....1.00
" " " ......75
Kauoha Hou Hapa Haole.....75
Lira Hawaii 1848 me ke kanawai......25
" " 1855.....25
Moolelo Ekalesia.....50
Haiao ili lahiahi.....10
Hele Malihini ana.....25
No ko ke Akua ano......25
Lira Kamalii......25
Hoike Palapala Hemolele.....25
Moolelo o Heneri Opukahaia.....25
Hoike Akua.....25
Weheweheia.....25
Ninau Hoike ili manoanoa.....25
" " " lahilahi....10
Kumumua Kula Sabati.....10
Buke Lawe Lima.....10
He Buke no ka Pope.....10
Ui Kula Sabati Helu 3.....25
" " " " 4......25
" " " " 5......25
Buke Euanelio a Ioane.....10
Himeni .....1.00
Himeni Ili nani.....1.75
Na Kauoha Hou Pakeke
Ili Gula nani.....1.50
Ili eleele kaekae nani......50
Ili eleele......35
Kauoha Hou Pakeke me na Halelu
Ili Gula nani.....1.75
Ili eleele kaekae wai gula.....50
Ili eleele......50
Na Halelu Pakeke
Ili Gula nani.....50
Ili eleele kaekae wai gula......30
Ili eleele.....20
Ka Hae Hoonani (Buke Mele)......25
Buke Wehewehe Huaolelo Baibala.....2.00
" " " Ili nani.....3.00
Eia na buke haawi wale
Palapala Liilii--
Helu 4--Makemake anei oe i ke ola
Helu 6--E hele i o Kristo la.
Helu 7--Ka hoi ana mai o ke Keiki Uhauha
Helu 11--No ka hoohiki wahahee i ke Akua
Helu 16--Ka Kehia ana o ka Ahaaina a ka Haku a ma ka Bapetiso ana.
Helu 17--Mai hana ino i na holoholona
Helu 18--No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
J. F. POKUE.
Kakauolelo o ka Papa Hoeke o ka Ahahui Euanelio o ko Hawaii Pae Aina.
KA NUPEPA "KUOKOA!"
Hoopuka mau ia
I KELA POANO KEIA POAONO.
$2.00 no na mahina Umikumamalua
$1.00 " " " Eono.
ME KA HOOKAA MUA MAI.